ເຈົ້າມີຂໍ້ມູນຄວາມຈິງທີ່ເຊື່ອຖືໄດ້ບໍ?
“ຄົນທີ່ຕອບກ່ອນໄດ້ຍິນຄວາມຈິງກໍເຮັດເລື່ອງໂງ່ແລະໜ້າອັບອາຍ.”—ສຸພາສິດ 18:13, ລ.ມ.
1, 2. (ກ) ເຮົາຕ້ອງພັດທະນາຄວາມສາມາດຫຍັງທີ່ສຳຄັນ ແລະຍ້ອນຫຍັງ? (ຂ) ເຮົາຈະຮຽນຫຍັງໃນບົດຄວາມນີ້?
ເຮົາທຸກຄົນຕ້ອງພັດທະນາຄວາມສາມາດທີ່ຈະວິເຄາະຂໍ້ມູນເພື່ອຈະໄດ້ຂໍ້ສະຫຼຸບທີ່ຖືກຕ້ອງ. (ສຸພາສິດ 3:21-23; 8:4, 5) ຖ້າບໍ່ວິເຄາະຢ່າງດີ ຊາຕານແລະໂລກຂອງມັນກໍຈະບິດເບືອນຄວາມຄິດຂອງເຮົາໄດ້ງ່າຍໆ. (ເອເຟດ 5:6; ໂກໂລດ 2:8) ແນ່ນອນ ເພື່ອຈະໄດ້ຂໍສະຫຼຸບທີ່ຖືກຕ້ອງ ເຮົາຕ້ອງມີຂໍ້ມູນຄວາມຈິງ. ສຸພາສິດ 18:13 (ລ.ມ.) ບອກວ່າ: “ຄົນທີ່ຕອບກ່ອນໄດ້ຍິນຄວາມຈິງກໍເຮັດເລື່ອງໂງ່ແລະໜ້າອັບອາຍ.”
2 ໃນບົດຄວາມນີ້ ເຮົາຈະມາຮຽນວ່າອັນໃດເຮັດໃຫ້ເປັນເລື່ອງຍາກທີ່ເຮົາຈະຮູ້ຂໍ້ມູນແທ້ຈິງເພື່ອຈະໄດ້ຂໍ້ສະຫຼຸບທີ່ຖືກຕ້ອງ ແລະເຮົາຍັງຈະໄດ້ຮຽນຫຼັກການແລະຕົວຢ່າງໃນຄຳພີໄບເບິນເຊິ່ງສອນໃຫ້ເຮົາຮູ້ວິທີວິເຄາະຂໍ້ມູນ.
ຢ່າເຊື່ອ “ຖ້ອຍຄຳທຸກຂໍ້”
3. ເປັນຫຍັງເຮົາຕ້ອງໃຊ້ຫຼັກການໃນສຸພາສິດ 14:15? (ເບິ່ງຮູບທຳອິດ)
3 ໃນທຸກມື້ນີ້ ເຮົາໄດ້ຮັບຂໍ້ມູນຂ່າວສານມາຈາກຫຼາຍຊ່ອງທາງ ເຊັ່ນ: ອິນເຕີເນັດ ໂທລະທັດ ຫຼືສື່ອື່ນໆ. ນອກຈາກນັ້ນເຮົາຍັງໄດ້ຮັບຂໍ້ມູນທາງອີເມວ ຂໍ້ຄວາມທາງມືຖື ແລະເລື່ອງເລົ່າຕ່າງໆຈາກໝູ່. ບາງເທື່ອເບິ່ງຄືວ່າຂໍ້ມູນເຫຼົ່ານີ້ມີມາບໍ່ໝົດຈັກເທື່ອ. ດັ່ງນັ້ນ ເຮົາຕ້ອງລະມັດລະວັງ. ໝູ່ຂອງເຮົາອາດມີເຈຕະນາດີ ແຕ່ກໍຍັງມີຄົນອື່ນອີກທີ່ຕັ້ງໃຈເຜີຍແຜ່ຂໍ້ມູນຜິດໆຫຼືບິດເບືອນຄວາມຈິງ. ຫຼັກການອັນໃດໃນຄຳພີໄບເບິນຈະຊ່ວຍເຮົາໃຫ້ວິເຄາະສິ່ງທີ່ເຮົາໄດ້ຍິນ? ໃນສຸພາສິດ 14:15 ບອກວ່າ: “ຄົນຊື່ກໍເຊື່ອຖ້ອຍຄຳທຸກຂໍ້ ແຕ່ວ່າຄົນຮູ້ກໍຄອຍລະວັງບາດຕີນແຫ່ງຕົນ.”
4. ໃນຟີລິບ 4:8, 9 ຊ່ວຍເຮົາແນວໃດໃຫ້ເລືອກສິ່ງທີ່ອ່ານ ແລະເປັນຫຍັງການມີຂໍ້ມູນທີ່ຖືກຕ້ອງຈຶ່ງເປັນເລື່ອງສຳຄັນຫຼາຍ? (ເບິ່ງຂອບ “ ແຫຼ່ງທີ່ຊ່ວຍເຮົາໃຫ້ໄດ້ຂໍ້ມູນຄວາມຈິງທີ່ເຊື່ອຖືໄດ້”)
4 ເພື່ອຈະຕັດສິນໃຈໄດ້ຢ່າງຖືກຕ້ອງ ເຮົາຕ້ອງມີຂໍ້ມູນຄວາມຈິງທີ່ເຊື່ອຖືໄດ້. ດັ່ງນັ້ນ ເຮົາຕ້ອງລະມັດລະວັງໃຫ້ຫຼາຍຂຶ້ນເມື່ອເຮົາເລືອກສິ່ງທີ່ອ່ານ. (ອ່ານຟີລິບ 4:8, 9) ເຮົາບໍ່ຄວນເສຍເວລາໄປກັບການເບິ່ງຂ່າວໃນອິນເຕີເນັດທີ່ບໍ່ໜ້າເຊື່ອຖືຫຼືອ່ານຂ່າວລືທີ່ສົ່ງຕໍ່ໆກັນມາທາງອີເມວ. ເປັນເລື່ອງສຳຄັນຫຼາຍທີ່ເຮົາຈະບໍ່ເຂົ້າເວັບໄຊຂອງພວກທີ່ທໍລະຍົດພະເຈົ້າເຊິ່ງສົ່ງເສີມແນວຄິດຂອງຕົນເອງ. ເຂົາເຈົ້າຢາກເຮັດໃຫ້ຄວາມເຊື່ອຂອງຜູ້ຮັບໃຊ້ພະເຈົ້າອ່ອນລົງແລະຕ້ອງການບິດເບືອນຄວາມຈິງ. ຂໍ້ມູນທີ່ເຊື່ອຖືບໍ່ໄດ້ຈະເຮັດໃຫ້ຕັດສິນໃຈຜິດພາດ. ຢ່າຄິດວ່າຂໍ້ມູນທີ່ບໍ່ຈິງຈະບໍ່ສົ່ງຜົນກະທົບຕໍ່ເຈົ້າ.—1 ຕີໂມເຕ 6:20, 21
5. ພວກອິດສະລາແອນໄດ້ຍິນເລື່ອງຕົວະຫຍັງ ແລະມັນສົ່ງຜົນຕໍ່ເຂົາເຈົ້າແນວໃດ?
5 ເລື່ອງຕົວະອາດເຮັດໃຫ້ເກີດຜົນເສຍຫາຍຮ້າຍແຮງໄດ້. ໃນສະໄໝໂມເຊ ມີຜູ້ສອດແນມ 12 ຄົນໄປເບິ່ງແຜ່ນດິນທີ່ພະເຈົ້າສັນຍາ. ຫຼັງຈາກກັບມາ ຜູ້ສອດແນມ 10 ຄົນກໍໄດ້ເວົ້າເລື່ອງໃນແງ່ລົບ. (ຈົດເຊັນບັນຊີ 13:25-33) ເຂົາເຈົ້າໃຫ້ຂໍ້ມູນເກີນຈິງ ນີ້ເຮັດໃຫ້ພວກອິດສະລາແອນຢ້ານແລະໝົດກຳລັງໃຈ. (ຈົດເຊັນບັນຊີ 14:1-4) ເປັນຫຍັງພວກອິດສະລາແອນຈຶ່ງຮູ້ສຶກແບບນັ້ນ? ບາງເທື່ອເຂົາເຈົ້າອາດຄິດວ່າເລື່ອງໃນແງ່ລົບທີ່ໄດ້ຍິນນັ້ນເປັນເລື່ອງຈິງ ເພາະຜູ້ສອດແນມສ່ວນໃຫຍ່ເວົ້າຄືກັນ. ດັ່ງນັ້ນຈຶ່ງເຮັດໃຫ້ພວກອິດສະລາແອນບໍ່ເຊື່ອເລື່ອງດີໆທີ່ຜູ້ສອດແນມອີກ 2 ຄົນເວົ້າກ່ຽວກັບແຜ່ນດິນທີ່ພະເຈົ້າສັນຍາ. (ຈົດເຊັນບັນຊີ 14:6-10) ແທນທີ່ພວກອິດສະລາແອນຈະຫາຂໍ້ມູນຄວາມຈິງແລະເຊື່ອຟັງພະເຢໂຫວາ ເຂົາເຈົ້າກໍພັດເຮັດສິ່ງທີ່ບໍ່ສະຫຼາດໂດຍເລືອກເຊື່ອເລື່ອງໃນແງ່ລົບນັ້ນ.
6. ເປັນຫຍັງເຮົາບໍ່ແປກໃຈເມື່ອໄດ້ຍິນເລື່ອງທີ່ໜ້າຕົກໃຈກ່ຽວກັບພະຍານພະເຢໂຫວາ?
6 ເຮົາຕ້ອງລະວັງເປັນພິເສດເມື່ອເຮົາໄດ້ຍິນເລື່ອງຕົວະກ່ຽວກັບພະຍານພະເຢໂຫວາ. ຂໍໃຫ້ເຮົາຈື່ສະເໝີວ່າຊາຕານສັດຕູຂອງເຮົາມັນຖືກເອີ້ນວ່າ: “ຜູ້ທີ່ຟ້ອງ [“ກ່າວຫາ,” ລ.ມ.] ພວກພີ່ນ້ອງຂອງເຮົາ.” (ຄຳປາກົດ 12:10) ພະເຍຊູເຕືອນວ່າຄົນທີ່ຕໍ່ຕ້ານ “ຈະເລົ່າເລື່ອງອັນຊົ່ວຮ້າຍບໍ່ຈິງທຸກປະການ” ໃສ່ເຮົາ. (ມັດທາຍ 5:11) ຖ້າເຮົາເຊື່ອຄຳເຕືອນນີ້ແທ້ໆ ເຮົາຈະບໍ່ຕົກໃຈເລີຍເມື່ອເຮົາໄດ້ຍິນເລື່ອງທີ່ແປກໆກ່ຽວກັບພະຍານພະເຢໂຫວາ.
7. ເຮົາຄວນຖາມຕົວເອງແນວໃດກ່ອນທີ່ຈະສົ່ງອີເມວຫຼືຂໍ້ຄວາມທາງມືຖື?
7 ເຈົ້າມັກສົ່ງອີເມວ ຫຼືຂໍ້ຄວາມທາງມືຖືໃຫ້ໝູ່ບໍ? ຕອນທີ່ເຈົ້າໄດ້ເຫັນເລື່ອງທີ່ໜ້າສົນໃຈໃນຂ່າວຫຼືໄດ້ຍິນປະສົບການໃດໜຶ່ງ ເຈົ້າຮູ້ສຶກວ່າຕົວເອງເປັນຄືກັບນັກຂ່າວທີ່ຕ້ອງບອກຂ່າວທັນທີບໍ? ກ່ອນຈະສົ່ງອີເມວ ຫຼືຂໍ້ຄວາມ ຂໍໃຫ້ຖາມຕົວເອງວ່າ: ‘ຂ້ອຍໝັ້ນໃຈບໍວ່າຂ່າວນັ້ນແມ່ນເລື່ອງແທ້? ຂ້ອຍມີຂໍ້ມູນທີ່ເຊື່ອຖືໄດ້ແທ້ໆບໍ?’ ຖ້າເຈົ້າບໍ່ແນ່ໃຈ ເຈົ້າກໍກຳລັງແຜ່ກະຈາຍຂ່າວທີ່ບໍ່ແມ່ນຄວາມຈິງ. ດັ່ງນັ້ນ ຖ້າເຈົ້າບໍ່ຮູ້ວ່າເລື່ອງນັ້ນແມ່ນແທ້ຫຼືບໍ່ ຢ່າສົ່ງຕໍ່ ໃຫ້ລຶບຖິ້ມໄປເລີຍ!
8. ຜູ້ຕໍ່ຕ້ານເຮົາໃນບາງປະເທດໄດ້ເຮັດຫຍັງ ແລະເຮົາອາດຊ່ວຍເຂົາເຈົ້າໂດຍບໍ່ຮູ້ໂຕໄດ້ແນວໃດ?
8 ຍັງມີເຫດຜົນອື່ນອີກທີ່ວ່າເປັນຫຍັງຈຶ່ງເປັນອັນຕະລາຍທີ່ຈະສົ່ງຕໍ່ອີເມວ ຫຼືຂໍ້ຄວາມໃຫ້ຄົນອື່ນໂດຍບໍ່ຄິດກ່ອນ. ໃນບາງປະເທດ ວຽກປະກາດຂອງເຮົາຖືກຈຳກັດ ແລະເຖິງຂັ້ນຖືກສັ່ງຫ້າມ. ຜູ້ຕໍ່ຕ້ານເຮົາໃນປະເທດເຫຼົ່ານີ້ອາດຕັ້ງໃຈແຜ່ກະຈາຍເລື່ອງທີ່ແຕ່ງຂຶ້ນມາເພື່ອໃຫ້ເຮົາຢ້ານແລະສົງໄສກັນເອງ. ຂໍໃຫ້ຄິດເຖິງສິ່ງທີ່ເກີດຂຶ້ນໃນສະໄໝອະດີດສະຫະພາບໂຊວຽດ. ຕຳຫຼວດລັບ KGB ໄດ້ກະຈາຍຄຳຕົວະທີ່ວ່າມີພີ່ນ້ອງບາງຄົນທີ່ມີຊື່ສຽງດີໄດ້ທໍລະຍົດພະເຈົ້າ. * (ເບິ່ງໄຂເງື່ອນ) ໜ້າເສົ້າໃຈ ພີ່ນ້ອງຫຼາຍຄົນເຊື່ອເລື່ອງຕົວະນີ້ແລະອອກໄປຈາກອົງການ. ເຖິງວ່າໃນເວລາຕໍ່ມາຈະມີຫຼາຍຄົນກັບເຂົ້າມາ ແຕ່ບາງຄົນກໍບໍ່ກັບມາເລີຍ. ເຂົາເຈົ້າຍອມໃຫ້ເລື່ອງຕົວະທຳລາຍຄວາມເຊື່ອຂອງເຂົາເຈົ້າ. (1 ຕີໂມເຕ 1:19) ເຮົາຈະບໍ່ເປັນແບບນີ້ໄດ້ແນວໃດ? ເຮົາຕ້ອງບໍ່ແຜ່ກະຈາຍເລື່ອງແງ່ລົບຫຼືເລື່ອງທີ່ເຮົາຍັງບໍ່ແນ່ໃຈ. ຢ່າເຊື່ອທຸກສິ່ງທີ່ເຈົ້າໄດ້ຍິນ. ເຈົ້າຕ້ອງແນ່ໃຈກ່ອນວ່າເລື່ອງນັ້ນເປັນຄວາມຈິງ.
ຂໍ້ມູນທີ່ບໍ່ຄົບຖ້ວນ
9. ມີຫຍັງອີກທີ່ເຮັດໃຫ້ເປັນເລື່ອງຍາກທີ່ຈະໄດ້ຂໍ້ສະຫຼຸບທີ່ຖືກຕ້ອງ?
9 ບາງເທື່ອເລື່ອງທີ່ເຮົາໄດ້ຍິນກໍມີພຽງບາງສ່ວນເທົ່ານັ້ນທີ່ເປັນເລື່ອງຈິງ. ສ່ວນເລື່ອງອື່ນໆເຮົາກໍບໍ່ຮູ້ຄວາມຈິງທັງໝົດ. ນີ້ເຮັດໃຫ້ຍາກຫຼາຍທີ່ເຮົາຈະໄດ້ຂໍ້ສະຫຼຸບທີ່ຖືກຕ້ອງ. ເລື່ອງທີ່ມີຂໍ້ມູນຈິງແດ່ບໍ່ຈິງແດ່ເຊື່ອຖືບໍ່ໄດ້! ເຮົາຈະເຮັດແນວໃດເພື່ອຈະບໍ່ຖືກຕົວະເພາະເລື່ອງແບບນີ້?—ເອເຟດ 4:14
10. ເປັນຫຍັງພວກອິດສະລາແອນເກືອບຈະເຮັດສົງຄາມຕໍ່ສູ້ກັນເອງແລະອັນໃດຊ່ວຍເຂົາເຈົ້າບໍ່ໃຫ້ເຮັດແບບນັ້ນ?
10 ເຮົາສາມາດໄດ້ຮັບບົດຮຽນຈາກສິ່ງທີ່ເກີດຂຶ້ນກັບພວກອິດສະລາແອນທີ່ຢູ່ແຖວແມ່ນໍ້າຢູລະເດນຟາກຕາເວັນຕົກໃນສະໄໝຂອງໂຢຊວຍ. (ໂຢຊວຍ 22:9-34) ເຂົາເຈົ້າໄດ້ຍິນວ່າພວກອິດສະລາແອນທີ່ຢູ່ແຖວແມ່ນໍ້າຢູລະເດນທາງຟາກຕາເວັນອອກໄດ້ສ້າງແທ່ນບູຊາໃຫຍ່ຢູ່ໃກ້ກັບແມ່ນໍ້າ. ເລື່ອງນີ້ແມ່ນເລື່ອງແທ້ແຕ່ມັນກໍບໍ່ແມ່ນທັງໝົດ. ພວກທີ່ຢູ່ຟາກຕາເວັນຕົກຄິດວ່າພວກທີ່ຢູ່ຟາກຕາເວັນອອກກະບົດຕໍ່ພະເຢໂຫວາ. ດັ່ງນັ້ນ ເຂົາເຈົ້າຈຶ່ງລວມຕົວກັນເພື່ອຈະເຮັດສົງຄາມຕໍ່ສູ້ກັບພວກນັ້ນ. (ອ່ານໂຢຊວຍ 22:9-12) ແຕ່ກ່ອນທີ່ພວກຟາກຕາເວັນຕົກຈະໄປໂຈມຕີ ເຂົາເຈົ້າໄດ້ສົ່ງຄົນໄປສືບຖາມຂໍ້ມູນຄວາມຈິງ. ເຂົາເຈົ້າໄດ້ຮູ້ຫຍັງ? ພວກທີ່ຢູ່ຟາກຕາເວັນອອກບໍ່ໄດ້ສ້າງແທ່ນບູຊາໃຫ້ພະປອມ ແຕ່ເຂົາເຈົ້າສ້າງເພື່ອເຕືອນຄວາມຈຳໃຫ້ທຸກຄົນຮູ້ວ່າເຂົາເຈົ້ານະມັດສະການພະເຢໂຫວາຄືກັນ. ພວກອິດສະລາແອນທີ່ຢູ່ຟາກຕາເວັນຕົກຄົງດີໃຈຫຼາຍແທ້ໆທີ່ໄດ້ໃຊ້ເວລາກວດສອບຄວາມຈິງທັງໝົດກ່ອນ ເຊິ່ງເຮັດໃຫ້ບໍ່ໄດ້ໄປເຮັດສົງຄາມຕໍ່ສູ້ພີ່ນ້ອງຕົວເອງ.
11. (ກ) ເມຟີໂບເຊດຖືກປະຕິບັດຢ່າງບໍ່ຍຸຕິທຳແນວໃດ? (ຂ) ດາວິດຄວນເຮັດຫຍັງກ່ອນຈະຕັດສິນເມຟີໂບເຊດຢ່າງບໍ່ຍຸຕິທຳ?
11 ບາງເທື່ອເຮົາອາດຮູ້ສຶກເຈັບໃຈຍ້ອນມີຄົນແຜ່ກະຈາຍຂ່າວທີ່ມີຄວາມຈິງກ່ຽວກັບເຮົາພຽງແຕ່ບາງສ່ວນ. ນີ້ເກີດຂຶ້ນກັບເມຟີໂບເຊດ. ກະສັດດາວິດໃຈກວ້າງໄດ້ເອົາທີ່ດິນທັງໝົດຂອງຊາອຶລຍົກໃຫ້ເມຟີໂບເຊດເຊິ່ງເປັນຫຼານຂອງຊາອຶລ. (2 ຊາເມືອນ 9:6, 7) ແຕ່ຕໍ່ມາດາວິດໄດ້ຍິນເລື່ອງໃນແງ່ລົບກ່ຽວກັບເມຟີໂບເຊດ ດາວິດບໍ່ໄດ້ກວດສອບເບິ່ງວ່າເລື່ອງນັ້ນເປັນຄວາມຈິງຫຼືບໍ່ ລາວຈຶ່ງຍຶດທີ່ດິນແລະສິ່ງຂອງທັງໝົດຄືນ. (2 ຊາເມືອນ 16:1-4) ເວລາຕໍ່ມາດາວິດໄດ້ລົມກັບລາວ ດາວິດກໍຮູ້ວ່າຕົວເອງໄດ້ເຮັດສິ່ງທີ່ຜິດພາດກໍເລີຍຍົກທີ່ດິນແລະສິ່ງຂອງບາງສ່ວນຄືນໃຫ້ລາວ. (2 ຊາເມືອນ 19:24-29) ຖ້າດາວິດໃຊ້ເວລາເພື່ອຫາຂໍ້ມູນຄວາມຈິງ ແທນທີ່ຈະຟ້າວຕັດສິນໃຈທັງໆທີ່ຍັງບໍ່ໄດ້ຂໍ້ມູນຄົບຖ້ວນ ເມຟີໂບເຊດກໍຄົງບໍ່ຕ້ອງເຈິກັບຄວາມບໍ່ຍຸຕິທຳແບບນີ້.
12, 13. (ກ) ພະເຍຊູໄດ້ເຮັດຫຍັງຕອນທີ່ຄົນອື່ນເວົ້າຕົວະກ່ຽວກັບເພິ່ນ? (ຂ) ເຮົາຄວນເຮັດຫຍັງຖ້າບາງຄົນເວົ້າຕົວະກ່ຽວກັບເຮົາ?
12 ເຈົ້າຈະເຮັດແນວໃດຖ້າມີບາງຄົນແຜ່ກະຈາຍເລື່ອງຕົວະກ່ຽວກັບເຈົ້າ? ເລື່ອງນີ້ກໍເຄີຍເກີດຂຶ້ນກັບພະເຍຊູແລະໂຢຮັນຜູ້ໃຫ້ບັບເຕມາ. (ອ່ານມັດທາຍ 11:18, 19) ພະເຍຊູເຮັດແນວໃດ? ພະເຍຊູບໍ່ໄດ້ໃຊ້ເວລາແລະກຳລັງທັງໝົດເພື່ອເຮັດໃຫ້ຜູ້ຄົນເຊື່ອວ່າເລື່ອງເຫຼົ່ານັ້ນບໍ່ຈິງ. ກົງກັນຂ້າມ ພະເຍຊູກະຕຸ້ນຜູ້ຄົນໃຫ້ເບິ່ງຕາມຄວາມເປັນຈິງ ເພິ່ນຢາກໃຫ້ເຂົາເຈົ້າເບິ່ງໄປທີ່ສິ່ງທີ່ເພິ່ນເຮັດແລະສອນ. ເພິ່ນບອກວ່າ: “ສະຕິປັນຍາທີ່ແທ້ຈິງກໍເຫັນໄດ້ຈາກຜົນທີ່ປາກົດອອກມາ.”—ມັດທາຍ 11:19, ລ.ມ.
13 ເຮົາໄດ້ບົດຮຽນທີ່ມີຄ່າຫຼາຍຈາກພະເຍຊູ. ບາງເທື່ອຜູ້ຄົນອາດເວົ້າກ່ຽວກັບເຮົາໃນແບບບໍ່ຍຸຕິທຳ ຫຼືໃນທາງທີ່ບໍ່ດີ ແລະເຮົາອາດກັງວົນວ່າສິ່ງນີ້ຈະທຳລາຍຊື່ສຽງຂອງເຮົາ. ແຕ່ວິທີທີ່ເຮົາໃຊ້ຊີວິດສາມາດສະແດງໃຫ້ຜູ້ຄົນເຫັນວ່າເຮົາເປັນຄົນແນວໃດແທ້ໆ. ດັ່ງທີ່ເຮົາໄດ້ຮຽນຈາກຕົວຢ່າງຂອງພະເຍຊູ ການປະພຶດທີ່ດີຂອງເຮົາຈະພິສູດໄດ້ວ່າເລື່ອງທີ່ຄົນອື່ນກ່າວຫາ ແລະເລື່ອງທີ່ຈິງແດ່ບໍ່ຈິງແດ່ກ່ຽວກັບເຮົານັ້ນເປັນເລື່ອງບໍ່ຈິງ.
ເຈົ້າເພິ່ງຄວາມເຂົ້າໃຈຂອງຕົວເອງບໍ?
14, 15. ເປັນຫຍັງເຮົາບໍ່ຄວນເພິ່ງຄວາມເຂົ້າໃຈຂອງຕົວເອງ?
14 ເຮົາເຫັນແລ້ວວ່າເປັນເລື່ອງຍາກທີ່ເຮົາຈະໄດ້ຂໍ້ມູນຄວາມຈິງທີ່ໜ້າເຊື່ອຖື. ອີກບັນຫາໜຶ່ງຄື ເຮົາບໍ່ສົມບູນແບບ. ເຮົາອາດຮັບໃຊ້ພະເຢໂຫວາມາຫຼາຍປີ ແລະກໍອາດສະຫຼາດໃນບາງເລື່ອງ. ຄົນອື່ນໆອາດນັບຖືເຮົາຍ້ອນເຮົາຄິດເກັ່ງແລະຕັດສິນໃຈເກັ່ງ. ເລື່ອງນີ້ອາດເຮັດໃຫ້ເຮົາມີບັນຫາບໍ?
ຄຳພີໄບເບິນເຕືອນຢ່າງຊັດເຈນວ່າເຮົາບໍ່ຄວນເພິ່ງຄວາມເຂົ້າໃຈຂອງຕົວເອງ
15 ແມ່ນແລ້ວ. ເຮົາອາດເລີ່ມເພິ່ງຄວາມເຂົ້າໃຈຂອງຕົວເອງ. ເຮົາອາດເຊື່ອແລະເຮັດຕາມຄວາມຄິດກັບຄວາມຮູ້ສຶກຂອງຕົວເອງ. ເຮົາອາດເລີ່ມເຊື່ອວ່າເຮົາເຂົ້າໃຈສະຖານະການດີ ເຖິງວ່າເຮົາຈະຍັງບໍ່ຮູ້ຄວາມຈິງທັງໝົດກໍຕາມ. ນີ້ເປັນເລື່ອງອັນຕະລາຍຫຼາຍ! ຄຳພີໄບເບິນເຕືອນຢ່າງຊັດເຈນວ່າເຮົາບໍ່ຄວນເພິ່ງຄວາມເຂົ້າໃຈຂອງຕົວເອງ.—ສຸພາສິດ 3:5, 6; 28:26
16. ໃນເຫດການສົມມຸດນີ້ ມີຫຍັງເກີດຂຶ້ນໃນຮ້ານອາຫານ ແລະເຈມຄິດແນວໃດ?
16 ຂໍໃຫ້ເບິ່ງເຫດການສົມມຸດນີ້: ແລງມື້ໜຶ່ງມີຜູ້ເຖົ້າແກ່ຄົນໜຶ່ງຊື່ເຈມໄປຮ້ານອາຫານ ແລະເຫັນຜູ້ເຖົ້າແກ່ຊື່ຈອນນັ່ງກັບຜູ້ຍິງຄົນໜຶ່ງທີ່ບໍ່ແມ່ນເມຍຂອງລາວ. ເບິ່ງຄືວ່າສອງຄົນສະໜິດສະໜົມກັນຫຼາຍ ເຂົາເຈົ້າເວົ້ານົວຫົວມ່ວນແລະກໍກອດກັນ. ເຈມຮູ້ສຶກບໍ່ສະບາຍໃຈຫຼາຍແລະລາວຈະເລີ່ມຄິດສົງໄສວ່າ: ‘ຈອນກັບເມຍປະກັນແລ້ວຫວາ? ແລະລູກຂອງເຂົາເຈົ້າເດຈະເປັນແນວໃດ?’ ກ່ອນໜ້ານີ້ເຈມເຄີຍເຫັນເລື່ອງໃນທຳນອງນີ້ມາແລ້ວ ຖ້າເຈົ້າເປັນເຈມເຈົ້າຈະຮູ້ສຶກແນວໃດ?
17. ເຈມໄດ້ມາຮູ້ຄວາມຈິງອັນໃດໃນພາຍຫຼັງ ແລະເຮົາໄດ້ບົດຮຽນຫຍັງ?
17 ແຕ່ຢຸດກ່ອນບຶດໜຶ່ງ. ເຖິງວ່າເຈມຈະຄິດວ່າຈອນບໍ່ສັດຊື່ຕໍ່ເມຍຂອງຕົວເອງ ແຕ່ເຈມຮູ້ຄວາມຈິງທັງໝົດແລ້ວບໍ? ໃນແລງມື້ນັ້ນ ເຈມໂທຫາຈອນຈຶ່ງໄດ້ຮູ້ວ່າຜູ້ຍິງຄົນນັ້ນເປັນນ້ອງສາວຂອງຈອນທີ່ຢູ່ຫ່າງໄກເຊິ່ງມາຢ້ຽມຢາມລາວ. ຈອນກັບນ້ອງສາວບໍ່ເຫັນກັນມາຫຼາຍປີແລ້ວແລະນ້ອງສາວມາແວ່ຢາມອ້າຍບຶດດຽວ ຈອນເອງກໍມີເວລາພຽງແຕ່ມາກິນເຂົ້າກັບນ້ອງເທົ່ານັ້ນ ແລະເມຍຂອງຈອນມາກິນເຂົ້ານຳບໍ່ໄດ້. ເຈມຮູ້ສຶກດີໃຈຫຼາຍທີ່ບໍ່ໄດ້ເລົ່າສິ່ງທີ່ລາວຄິດໃຫ້ຄົນອື່ນຟັງ! ເຮົາໄດ້ບົດຮຽນຫຍັງ? ບໍ່ວ່າເຮົາຈະຮັບໃຊ້ພະເຢໂຫວາມາດົນປານໃດກໍຕາມ ເຮົາຕ້ອງມີຂໍ້ມູນຄວາມຈິງທຸກຢ່າງກ່ອນຈຶ່ງຈະສາມາດໄດ້ຂໍ້ສະຫຼຸບທີ່ຖືກຕ້ອງໄດ້.
18. ອັນໃດອາດເຮັດໃຫ້ເຮົາເຊື່ອເລື່ອງທີ່ບໍ່ດີກ່ຽວກັບພີ່ນ້ອງ?
18 ມັນອາດເປັນເລື່ອງຍາກທີ່ຈະວິເຄາະສະຖານະການໄດ້ຢ່າງຖືກຕ້ອງ ຖ້າເປັນເລື່ອງທີ່ກ່ຽວຂ້ອງກັບພີ່ນ້ອງທີ່ເຮົາມີບັນຫານຳ. ຖ້າເຮົາຄິດແຕ່ເລື່ອງທີ່ມີບັນຫາກັນ ເຮົາກໍອາດເລີ່ມສົງໄສລາວໄດ້. ເມື່ອເຮົາໄດ້ຍິນເລື່ອງທີ່ບໍ່ດີກ່ຽວກັບຄົນນັ້ນ ເຮົາອາດຢາກເຊື່ອທັນທີເຖິງວ່າຍັງບໍ່ມີຫຍັງພິສູດວ່າເປັນເລື່ອງຈິງ. ເຮົາໄດ້ບົດຮຽນຫຍັງ? ຖ້າເຮົາປ່ອຍໃຫ້ຕົວເອງມີຄວາມຮູ້ສຶກທີ່ບໍ່ດີກັບພີ່ນ້ອງ ມັນກໍອາດເຮັດໃຫ້ເຮົາໄດ້ຂໍ້ສະຫຼຸບທີ່ຜິດໆໂດຍທີ່ບໍ່ມີຂໍ້ມູນຄວາມຈິງ. (1 ຕີໂມເຕ 6:4, 5) ເຮົາບໍ່ຄວນເກັບຄວາມຮູ້ສຶກທີ່ບໍ່ດີໄວ້ໃນໃຈເຊັ່ນ: ຄວາມອິດສາ. ຢ່າລືມວ່າພະເຢໂຫວາຢາກໃຫ້ເຮົາຮັກພີ່ນ້ອງແລະໃຫ້ອະໄພເຂົາເຈົ້າຈາກຫົວໃຈ.—ອ່ານໂກໂລດ 3:12-14
ຫຼັກການໃນຄຳພີໄບເບິນຈະປົກປ້ອງເຮົາ
19, 20. (ກ) ຫຼັກການຫຍັງແດ່ໃນຄຳພີໄບເບິນທີ່ຈະຊ່ວຍເຮົາໃຫ້ວິເຄາະຂໍ້ມູນຢ່າງຖືກຕ້ອງ? (ຂ) ເຮົາຈະພິຈາລະນາຫຍັງໃນບົດຄວາມຕໍ່ໄປ?
19 ໃນທຸກມື້ນີ້ເປັນເລື່ອງຍາກແທ້ໆທີ່ຈະໄດ້ຂໍ້ມູນຄວາມຈິງທີ່ເຊື່ອຖືໄດ້ແລະວິເຄາະຢ່າງຖືກຕ້ອງ. ຍ້ອນຫຍັງ? ຍ້ອນວ່າຂໍ້ມູນສ່ວນໃຫຍ່ບໍ່ຄົບຖ້ວນ ຫຼືອາດຈະຖືກພຽງບາງສ່ວນ ແລະເຮົາເອງກໍບໍ່ສົມບູນແບບ. ສິ່ງໃດຈະຊ່ວຍເຮົາໄດ້? ຫຼັກການໃນຄຳພີໄບເບິນ! ຕົວຢ່າງເຊັ່ນ: ຫຼັກການໜຶ່ງບອກວ່າເປັນເລື່ອງໂງ່ທີ່ຈະຕອບກ່ອນໄດ້ຍິນຄວາມຈິງ. (ສຸພາສິດ 18:13) ອີກຫຼັກການໜຶ່ງບອກວ່າເຮົາບໍ່ຄວນເຊື່ອທຸກສິ່ງທີ່ໄດ້ຍິນໂດຍທີ່ບໍ່ກວດສອບເບິ່ງວ່າແມ່ນແທ້ຫຼືບໍ່. (ສຸພາສິດ 14:15) ແລະບໍ່ວ່າເຮົາຈະຮັບໃຊ້ພະເຢໂຫວາມາດົນສໍ່າໃດ ເຮົາກໍບໍ່ຄວນເພິ່ງຄວາມເຂົ້າໃຈຂອງຕົວເອງ. (ສຸພາສິດ 3:5, 6) ຫຼັກການໃນຄຳພີໄບເບິນຈະປົກປ້ອງເຮົາຖ້າເຮົາມີຂໍ້ມູນຄວາມຈິງທີ່ເຊື່ອຖືໄດ້ ເຊິ່ງຈະຊ່ວຍເຮົາໃຫ້ໄດ້ຂໍ້ສະຫຼຸບທີ່ຖືກຕ້ອງແລະຕັດສິນໃຈຢ່າງສະຫຼາດ.
20 ແຕ່ຍັງມີອີກເຫດຜົນໜຶ່ງທີ່ວ່າເປັນຫຍັງເຮົາຈຶ່ງຮູ້ສຶກວ່າຍາກທີ່ຈະຮູ້ຈັກຄວາມຈິງແທ້ໆຂອງສະຖານະການໃດໜຶ່ງ. ເນື່ອງຈາກເຮົາເປັນມະນຸດ ເຮົາຈຶ່ງຟ້າວຕັດສິນຕາມສິ່ງທີ່ຕາເຫັນ. ໃນບົດຄວາມຕໍ່ໄປ ເຮົາຈະຮຽນຮູ້ວ່າເຮົາອາດຕັດສິນຄົນອື່ນຕາມສິ່ງທີ່ຕາເຫັນໃນແງ່ມຸມໃດແດ່ ແລະເຮົາຈະບໍ່ເຮັດແບບນັ້ນໄດ້ແນວໃດ.
^ ຂໍ້ 8 ເບິ່ງປຶ້ມປະຈຳປີຂອງພະຍານພະເຢໂຫວາ 2004 (ພາສາອັງກິດ) ໜ້າ 111-112 ແລະປຶ້ມປະຈຳປີ 2008 (ພາສາອັງກິດ) ໜ້າ 133-135.
