ເຮັດວຽກຮ່ວມກັບພະເຢໂຫວາທຸກມື້
“ເຮົາເປັນເພື່ອນຮ່ວມງານຂອງພະເຈົ້າ.”—1 ໂກລິນໂທ 3:9, ລ.ມ.
1. ມີວິທີໃດແດ່ທີ່ເຮົາເຮັດວຽກຮ່ວມກັບພະເຢໂຫວາໄດ້?
ຕອນທີ່ພະເຢໂຫວາສ້າງມະນຸດ ພະອົງຢາກໃຫ້ເຂົາເຈົ້າເຮັດວຽກຮ່ວມກັບພະອົງ. ເຖິງວ່າມະນຸດໃນທຸກມື້ນີ້ບໍ່ສົມບູນແບບ ແຕ່ຄົນທີ່ສັດຊື່ກໍສາມາດເຮັດວຽກຮ່ວມກັບພະເຢໂຫວາໄດ້. ຕົວຢ່າງ: “ເຮົາເປັນເພື່ອນຮ່ວມງານຂອງພະເຈົ້າ” ເມື່ອເຮົາປະກາດຂ່າວດີເລື່ອງລາຊະອານາຈັກຂອງພະອົງແລະເຮັດໃຫ້ຄົນເປັນລູກສິດ. (1 ໂກລິນໂທ 3:5-9, ລ.ມ.) ເປັນກຽດທີ່ຍິ່ງໃຫຍ່ແທ້ໆທີ່ຜູ້ສ້າງເອກະພົບໄດ້ເລືອກເຮົາໃຫ້ເຮັດວຽກທີ່ສຳຄັນນີ້! ແຕ່ການປະກາດບໍ່ແມ່ນທາງດຽວທີ່ເຮົາເຮັດວຽກຮ່ວມກັບພະເຢໂຫວາ. ໃນບົດຄວາມນີ້ ເຮົາຈະຮຽນຮູ້ວ່າ ເຮົາຍັງເຮັດວຽກຮ່ວມກັບພະອົງແນວໃດເມື່ອເຮົາຊ່ວຍຄອບຄົວແລະພີ່ນ້ອງໃນປະຊາຄົມ ເມື່ອເຮົາເປັນຄົນມີນໍ້າໃຈຕ້ອນຮັບແຂກ ເມື່ອເຮົາຊ່ວຍວຽກໃນອົງການຂອງພະຍານພະເຢໂຫວາທີ່ເຮັດຢູ່ທົ່ວໂລກ ແລະເມື່ອເຮົາເຮັດວຽກຮັບໃຊ້ພະເຢໂຫວາຫຼາຍຂຶ້ນ.—ໂກໂລດ 3:23
2. ເປັນຫຍັງເຮົາບໍ່ຄວນສົມທຽບສິ່ງທີ່ເຮົາເຮັດເພື່ອພະເຢໂຫວາກັບສິ່ງທີ່ຄົນອື່ນເຮັດ?
2 ເມື່ອເຮົາສຶກສາບົດຄວາມນີ້ ເປັນເລື່ອງສຳຄັນທີ່ເຮົາຈະຈື່ວ່າທຸກຄົນບໍ່ຄືກັນ ເຊັ່ນ: ອາຍຸ ສຸຂະພາບ ສະພາບການ ແລະຄວາມສາມາດ. ດັ່ງນັ້ນ ເມື່ອເຮົາເຮັດວຽກຮັບໃຊ້ພະເຢໂຫວາ ເຮົາບໍ່ຄວນສົມທຽບສິ່ງທີ່ເຮົາເຮັດກັບສິ່ງທີ່ຄົນອື່ນເຮັດ. ອັກຄະສາວົກໂປໂລບອກວ່າ: “ໃຫ້ແຕ່ລະຄົນກວດສອບເບິ່ງສິ່ງທີ່ຕົວເອງເຮັດ ແລ້ວລາວຈະພູມໃຈກັບຕົວເອງ ແລະຢ່າປຽບທຽບກັບຄົນອື່ນ.”—ຄາລາຊີ 6:4, ລ.ມ.
ຊ່ວຍຄອບຄົວຂອງເຈົ້າແລະຄົນອື່ນໆໃນປະຊາຄົມ
3. ເປັນຫຍັງເຮົາທຸກຄົນທີ່ເບິ່ງແຍງຄອບຄົວກໍກຳລັງເຮັດວຽກຮ່ວມກັບພະເຢໂຫວາ?
3 ພະເຢໂຫວາຄາດໝາຍໃຫ້ເຮົາຕ້ອງເບິ່ງແຍງຄອບຄົວ. ຕົວຢ່າງ: ເຈົ້າອາດຕ້ອງຫາລ້ຽງຄອບຄົວ. ຜູ້ເປັນແມ່ຫຼາຍຄົນກໍຕ້ອງເບິ່ງແຍງລູກນ້ອຍຢູ່ເຮືອນ. ເມື່ອພໍ່ແມ່ຂອງເຮົາບໍ່ສາມາດເບິ່ງແຍງຕົວເອງໄດ້ ເຮົາກໍອາດຈະຕ້ອງໄດ້ເບິ່ງແຍງເຂົາເຈົ້າ. ເລື່ອງເຫຼົ່ານີ້ສຳຄັນຫຼາຍແທ້ໆ. ຄຳພີໄບເບິນບອກວ່າ: “ຖ້າຜູ້ໜຶ່ງຜູ້ໃດບໍ່ບົວລະບັດລ້ຽງຍາຕິພີ່ນ້ອງແຫ່ງຕົນແລະຄອບຄົວແຫ່ງຕົນເປັນຕົ້ນ ຜູ້ນັ້ນໄດ້ປະຕິເສດຄວາມເຊື່ອແລ້ວ ແລະເປັນອັນຊົ່ວກວ່າຄົນທີ່ບໍ່ເຊື່ອ.” (1 ຕີໂມເຕ 5:8) ຖ້າເຈົ້າມີໜ້າທີ່ຮັບຜິດຊອບໃນຄອບຄົວ ເຈົ້າອາດຮັບໃຊ້ພະເຢໂຫວາໄດ້ບໍ່ຫຼາຍເທົ່າທີ່ເຈົ້າຢາກເຮັດ. ແຕ່ຢ່າຟ້າວທໍ້ໃຈ! ພະເຢໂຫວາພໍໃຈເມື່ອເຈົ້າເບິ່ງແຍງຄອບຄົວຂອງເຈົ້າ.—1 ໂກລິນໂທ 10:31
4. ພໍ່ແມ່ຈະໃຫ້ລາຊະອານາຈັກຂອງພະເຈົ້າເປັນສິ່ງສຳຄັນທີ່ສຸດໄດ້ແນວໃດ ແລະຜົນເປັນແນວໃດ?
4 ພໍ່ແມ່ຄລິດສະຕຽນກໍສາມາດເຮັດວຽກຮ່ວມກັບພະເຢໂຫວາໄດ້ໂດຍຊ່ວຍລູກໆໃຫ້ມີເປົ້າໝາຍຮັບໃຊ້ພະອົງ. ພໍ່ແມ່ຫຼາຍຄົນກໍເຮັດແບບນັ້ນຢູ່ແລ້ວ ຜົນກໍຄື: ລູກຊາຍລູກສາວຂອງເຂົາເຈົ້າໄດ້ຕັດສິນໃຈຮັບໃຊ້ພະເຢໂຫວາເຕັມເວລາ ເຖິງວ່າຈະຫ່າງໄກຈາກບ້ານ. ບາງຄົນກໍເປັນມິດຊັນນາລີ ຮັບໃຊ້ເປັນໄພໂອເນຍໃນບ່ອນທີ່ຕ້ອງການຜູ້ປະກາດ ແລະຮັບໃຊ້ຢູ່ເບເທນ. ແນ່ນອນ ເມື່ອລູກຂອງເຈົ້າຢູ່ຫ່າງໄກ ພໍ່ແມ່ບໍ່ສາມາດໃຊ້ເວລາກັບລູກໄດ້ຫຼາຍເທົ່າທີ່ເຂົາເຈົ້າຕ້ອງການ. ແຕ່ເຂົາເຈົ້າກໍໃຫ້ກຳລັງໃຈລູກທີ່ຈະຮັບໃຊ້ພະເຢໂຫວາຕໍ່ໆໄປບໍ່ວ່າຈະຢູ່ໃສກໍຕາມ. ຍ້ອນຫຍັງ? ຍ້ອນເຂົາເຈົ້າມີຄວາມສຸກຫຼາຍທີ່ລູກໃຫ້ພະເຢໂຫວາສຳຄັນທີ່ສຸດໃນຊີວິດ. (3 ໂຢຮັນ 4) ພໍ່ແມ່ຫຼາຍຄົນຄົງຮູ້ສຶກຄືກັບອານາທີ່ໄດ້ເອົາຊາເມືອນມາ “ຖວາຍ” ໃຫ້ພະເຢໂຫວາ.—1 ຊາເມືອນ 1:28
5. ເຈົ້າສາມາດຊ່ວຍພີ່ນ້ອງໃນປະຊາຄົມໄດ້ແນວໃດແດ່? (ເບິ່ງຮູບທຳອິດ)
5 ຖ້າເຈົ້າບໍ່ມີໜ້າທີ່ຮັບຜິດຊອບທີ່ຕ້ອງເອົາໃຈໃສ່ຄອບຄົວໃນທັນທີ ເຈົ້າຈະຊ່ວຍພີ່ນ້ອງທີ່ເຈັບປ່ວຍ ຄົນສູງອາຍຸຫຼືຄົນອື່ນໆທີ່ຕ້ອງການຄວາມຊ່ວຍເຫຼືອໄດ້ບໍ? ຫຼືເຈົ້າຈະສົມທົບກັບຄົນທີ່ເບິ່ງແຍງເຂົາເຈົ້າໄດ້ບໍ? ຂໍໃຫ້ເບິ່ງວ່າໃນປະຊາຄົມຂອງເຈົ້າມີໃຜແດ່ທີ່ອາດຕ້ອງການຄວາມຊ່ວຍເຫຼືອ. ຕົວຢ່າງ: ອາດມີພີ່ນ້ອງຍິງທີ່ເບິ່ງແຍງພໍ່ແມ່ທີ່ສູງອາຍຸ. ເຈົ້າຈະຊ່ວຍເບິ່ງແຍງພໍ່ແມ່ຂອງລາວໄດ້ບໍເພື່ອລາວຈະມີເວລາໃຫ້ກັບເລື່ອງອື່ນໆທີ່ສຳຄັນ? ຫຼືເຈົ້າອາດຊ່ວຍບາງຄົນໂດຍອາສາພາໄປປະຊຸມ ໄປຕະຫຼາດ ຫຼືໄປຢາມບາງຄົນຢູ່ໂຮງໝໍ. ເມື່ອເຈົ້າເຮັດແບບນັ້ນ ເຈົ້າອາດກຳລັງເຮັດວຽກຮ່ວມກັບພະເຢໂຫວາໃນການຕອບຄຳອະທິດຖານຂອງພີ່ນ້ອງ.—ອ່ານ 1 ໂກລິນໂທ 10:24
ເປັນຄົນມີນໍ້າໃຈຕ້ອນຮັບແຂກ
6. ເຮົາຈະເປັນຄົນມີນໍ້າໃຈຕ້ອນຮັບແຂກແນວໃດ?
ເຮົາຄວນຊ່ວຍເຫຼືອຄົນອື່ນເມື່ອເຮົາມີໂອກາດທີ່ຈະເຮັດແບບນັ້ນ
6 ເພື່ອນຮ່ວມງານຂອງພະເຈົ້າເປັນຄົນທີ່ມີນໍ້າໃຈຕ້ອນຮັບແຂກ. ໃນຄຳພີໄບເບິນຄຳວ່າ: “ນໍ້າໃຈຕ້ອນຮັບແຂກ” ໃນພາສາເກັຣກໝາຍເຖິງ “ມີຄວາມເມດຕາຕໍ່ຄົນແປກໜ້າ.” (ເຫບເລີ 13:2, ລ.ມ.) ໃນຄຳພີໄບເບິນເຮົາໄດ້ອ່ານກ່ຽວກັບຕົວຢ່າງທີ່ຊ່ວຍສອນເຮົາໃຫ້ຮູ້ວິທີສະແດງຄວາມກະລຸນາ. (ຕົ້ນເດີມ 18:1-5) ເຮົາສາມາດຊ່ວຍເຫຼືອຄົນອື່ນເມື່ອເຮົາມີໂອກາດແລະເຮົາກໍຄວນເຮັດແບບນັ້ນ ບໍ່ວ່າເຂົາເຈົ້າຈະເປັນ “ພີ່ນ້ອງຮ່ວມຄວາມເຊື່ອຂອງເຮົາ” ຫຼືບໍ່ກໍຕາມ.—ຄາລາຊີ 6:10, ລ.ມ.
7. ເມື່ອເຈົ້າສະແດງນໍ້າໃຈຕ້ອນຮັບຜູ້ຮັບໃຊ້ເຕັມເວລາ ເຈົ້າຈະໄດ້ຮັບປະໂຫຍດຫຍັງແດ່?
7 ເຈົ້າສາມາດເຮັດວຽກຮ່ວມກັບພະເຢໂຫວາໂດຍມີນໍ້າໃຈຕ້ອນຮັບຜູ້ຮັບໃຊ້ເຕັມເວລາທີ່ຕ້ອງການບ່ອນພັກໄດ້ບໍ? (ອ່ານ 3 ໂຢຮັນ 5, 8) ເມື່ອເຮົາເຮັດແບບນັ້ນ ທັງເຮົາແລະພີ່ນ້ອງກໍຈະໄດ້ຮັບປະໂຫຍດກໍຄືກັນ. ຄຳພີໄບເບິນເອີ້ນວ່າເປັນການ “ໃຫ້ກຳລັງໃຈກັນແລະກັນ.” (ໂລມ 1:11, 12, ລ.ມ.) ໃຫ້ເຮົາມາເບິ່ງຕົວຢ່າງຂອງໂອລາບ. ຕອນທີ່ລາວຍັງນ້ອຍ ມີຜູ້ດູແລໝວດໂສດຄົນໜຶ່ງມາຢາມປະຊາຄົມຂອງລາວແລະຕ້ອງການບ່ອນພັກ ແຕ່ກໍບໍ່ມີໃຜໃນປະຊາຄົມສາມາດຫາບ່ອນພັກໃຫ້ໄດ້. ໂອລາບຈຶ່ງຖາມພໍ່ແມ່ຂອງລາວເຊິ່ງບໍ່ໄດ້ເປັນພະຍານພະເຢໂຫວາວ່າ: ໃຫ້ຜູ້ດູແລໝວດມາພັກຢູ່ບ້ານໄດ້ບໍ ເຂົາເຈົ້າກໍບອກວ່າໄດ້ ແຕ່ໂອລາບຕ້ອງໄປນອນຢູ່ໂຊຟາ. ໂອລາບຕົກລົງແລະລາວກໍບໍ່ເສຍໃຈເລີຍ. ໃນອາທິດນັ້ນລາວມີຄວາມສຸກຫຼາຍແທ້ໆ! ທັງລາວແລະຜູ້ດູແລໝວດຕື່ນແຕ່ເຊົ້າທຸກມື້ ແລະໄດ້ລົມກັນຫຼາຍເລື່ອງທີ່ໜ້າສົນໃຈຕອນທີ່ກິນເຂົ້າເຊົ້າ. ຜູ້ດູແລໝວດໃຫ້ກຳລັງໃຈໂອລາບຫຼາຍເຊິ່ງຊ່ວຍລາວໃຫ້ຕັດສິນໃຈເລີ່ມຮັບໃຊ້ເຕັມເວລາ. ໃນໄລຍະ 40 ປີທີ່ຜ່ານມາ ໂອລາບກໍໄດ້ຮັບໃຊ້ເປັນມິດຊັນນາລີຢູ່ຫຼາຍປະເທດ.
8. ເປັນຫຍັງເຮົາຄວນສະແດງຄວາມຮັກເຖິງວ່າຄົນອື່ນຈະບໍ່ເຫັນຄຸນຄ່າໃນຕອນທຳອິດ? ໃຫ້ຍົກຕົວຢ່າງ.
8 ເຮົາສາມາດສະແດງຄວາມຮັກຕໍ່ຄົນແປກໜ້າໃນຫຼາຍວິທີ ເຖິງວ່າເຂົາເຈົ້າຈະບໍ່ເຫັນຄຸນຄ່າໃນຕອນທຳອິດ. ຕົວຢ່າງ: ພີ່ນ້ອງຍິງໃນແອດສະປາຍໄດ້ນຳການສຶກສາຄຳພີໄບເບິນກັບຜູ້ຍິງຊື່ເຈດສິກາທີ່ມາຈາກປະເທດເອກົວເຕີ. ຄັ້ງໜຶ່ງໃນລະຫວ່າງທີ່ສຶກສາ ເຈດສິກາຮ້ອງໄຫ້ບໍ່ຢຸດ ພີ່ນ້ອງຍິງຈຶ່ງໄດ້ຖາມລາວວ່າເປັນຫຍັງຄືຮ້ອງໄຫ້. ເຈດສິກາບອກວ່າ ກ່ອນທີ່ລາວຈະມາແອດສະປາຍ ລາວທຸກຍາກຫຼາຍ ແລະມື້ໜຶ່ງບໍ່ມີອາຫານໃຫ້ລູກສາວກິນ ມີແຕ່ນໍ້າລ້າໆ. ເຈດສິກາອະທິດຖານຂໍຄວາມຊ່ວຍເຫຼືອຕອນທີ່ເອົາລູກນອນ. ຫຼັງຈາກນັ້ນບໍ່ດົນ ພະຍານພະເຢໂຫວາສອງຄົນກໍມາຢາມເຈດສິກາ ແລະໃຫ້ວາລະສານກັບລາວ ແຕ່ເຈດສິກາເຮັດຫຍາບຄາຍຕໍ່ເຂົາເຈົ້າແລະຈີກວາລະສານແລ້ວເວົ້າວ່າ: “ນີ້ຫວາອາຫານທີ່ເຈົ້າຢາກໃຫ້ຂ້ອຍເອົາໃຫ້ລູກກິນ?” ພີ່ນ້ອງພະຍາຍາມເວົ້າດີໆກັບລາວ ແຕ່ລາວກໍບໍ່ຟັງ. ຕໍ່ມາພີ່ນ້ອງກໍໄດ້ເອົາກະຕ່າທີ່ມີອາຫານມາປະໄວ້ໜ້າບ້ານຂອງລາວ. ນີ້ຈຶ່ງເປັນເຫດຜົນທີ່ລາວຮ້ອງໄຫ້ເພາະຮູ້ວ່າພະເຈົ້າຕອບຄຳອະທິດຖານແລ້ວແຕ່ລາວບໍ່ສົນໃຈເອງ. ຕອນນີ້ເຈດສິກາໄດ້ຕັ້ງໃຈແນ່ວແນ່ຮັບໃຊ້ພະເຢໂຫວາ. ເຫັນໄດ້ແຈ້ງວ່າ ຄວາມໃຈກວ້າງຂອງພີ່ນ້ອງເຮັດໃຫ້ເກີດຜົນດີແທ້ໆ.—ຜູ້ເທສະໜາປ່າວປະກາດ 11:1, 6
ອາສາສະໝັກເຮັດວຽກໃນອົງການຂອງພະເຢໂຫວາ
9, 10. (ກ) ມີໂອກາດໃດແດ່ທີ່ຊາວອິດສະລາແອນເປັນອາສາສະໝັກໄດ້? (ຂ) ໃນທຸກມື້ນີ້ມີວິທີໃດແດ່ທີ່ເຮົາຈະຊ່ວຍວຽກໃນປະຊາຄົມໄດ້?
9 ໃນສະໄໝກ່ອນ ຊາວອິດສະລາແອນມີຫຼາຍໂອກາດທີ່ຈະເປັນອາສາສະໝັກ. (ອົບພະຍົບ 36:2; 1 ຂ່າວຄາວ 29:5; ເນເຫມີ 11:2) ທຸກມື້ນີ້ ເຈົ້າກໍມີຫຼາຍໂອກາດທີ່ຈະເປັນອາສາສະໝັກໄດ້ໂດຍໃຊ້ເວລາ ວັດຖຸສິ່ງຂອງ ແລະຄວາມສາມາດຂອງເຈົ້າເພື່ອຊ່ວຍເຫຼືອພີ່ນ້ອງ. ເມື່ອເຈົ້າເຮັດແບບນັ້ນ ເຈົ້າຈະມີຄວາມສຸກຫຼາຍແທ້ໆແລະພະເຢໂຫວາຈະອວຍພອນເຈົ້າຢ່າງຫຼວງຫຼາຍ.
10 ຄຳພີໄບເບິນສະໜັບສະໜູນພີ່ນ້ອງຊາຍໃນປະຊາຄົມໃຫ້ເຮັດວຽກຮ່ວມກັບພະເຈົ້າໂດຍເປັນຜູ້ຊ່ວຍງານຮັບໃຊ້ແລະຜູ້ເຖົ້າແກ່ເພື່ອຮັບໃຊ້ຄົນອື່ນ. (1 ຕີໂມເຕ 3:1, 8, 9; 1 ເປໂຕ 5:2, 3) ຄົນເຫຼົ່ານັ້ນທີ່ເຮັດແບບນີ້ແມ່ນຢາກຊ່ວຍຄົນອື່ນໃນຫຼາຍໆທາງລວມເຖິງເລື່ອງການນະມັດສະການນຳ. (ກິດຈະການ 6:1-4) ຜູ້ເຖົ້າແກ່ເຄີຍຂໍໃຫ້ເຈົ້າຊ່ວຍວຽກບໍ ເຊັ່ນ: ຕ້ອນຮັບ ສັບພະໜັງສື ເຂດປະກາດ ການບຳລຸງຮັກສາ ຫຼືເລື່ອງອື່ນໆ? ພີ່ນ້ອງທີ່ຊ່ວຍໃນເລື່ອງຕ່າງໆນີ້ເວົ້າຄືກັນວ່າເຂົາເຈົ້າມີສຸກຫຼາຍແທ້ໆ.
ຄົນທີ່ອາສາສະໝັກເຮັດວຽກໂຄງການຂອງອົງການຈະມີໝູ່ໃໝ່ໆສະເໝີ (ເບິ່ງຂໍ້ 11)
11. ພີ່ນ້ອງຍິງຄົນໜຶ່ງໄດ້ຮັບປະໂຫຍດແນວໃດຈາກການທີ່ໄດ້ເຮັດວຽກໂຄງການກໍ່ສ້າງ?
11 ຫາຍເທື່ອຄົນທີ່ອາສາສະໝັກເຮັດວຽກໂຄງການກໍ່ສ້າງກໍຈະມີໝູ່ໃໝ່ເພີ່ມຂຶ້ນ. ພີ່ນ້ອງຍິງຄົນໜຶ່ງຊື່ມາຈີ້ເຮັດວຽກໃນໂຄງການກໍ່ສ້າງຫໍປະຊຸມມາໄດ້ 18 ປີ. ໃນໂຄງການນີ້ລາວໃຫ້ຄວາມສົນໃຈພີ່ນ້ອງຍິງທີ່ຍັງໜຸ່ມແລະຊ່ວຍຝຶກເຂົາເຈົ້າ. ລາວບອກວ່າມັນເປັນວິທີທີ່ດີຫຼາຍຕໍ່ຜູ້ເຮັດວຽກອາສາສະໝັກທີ່ຈະໃຫ້ກຳລັງໃຈກັນແລະກັນ. (ໂລມ 1:12) ທີ່ຈິງ ເມື່ອລາວເຈິສະພາບການທີ່ຍາກໃນຊີວິດໝູ່ທີ່ເຮັດວຽກໃນໂຄງການນີ້ກໍຈະໃຫ້ກຳລັງໃຈລາວ. ເຈົ້າເຄີຍອາສາສະໝັກໃນໂຄງການກໍ່ສ້າງບໍ? ເຈົ້າສາມາດເຮັດວຽກໃນໂຄງການນີ້ໄດ້ ເຖິງວ່າຈະບໍ່ມີຄວາມຊຳນານສະເພາະທາງກໍຕາມ.
12. ເຈົ້າຈະໃຫ້ຄວາມຊ່ວຍເຫຼືອຫຼັງຈາກເກີດໄພພິບັດໂດຍວິທີໃດ?
12 ເຮົາຍັງສາມາດເຮັດວຽກຮ່ວມກັບພະເຢໂຫວາໄດ້ໂດຍການຊ່ວຍພີ່ນ້ອງຂອງເຮົາຫຼັງເກີດໄພທຳມະຊາດ. ຕົວຢ່າງ: ເຮົາສາມາດບໍລິຈາກເງິນ. (ໂຢຮັນ 13:34, 35; ກິດຈະການ 11:27-30) ວິທີອື່ນໆອີກທີ່ເຮົາຊ່ວຍໄດ້ຄືການເຮັດອະນາໄມຫຼືການສ້ອມແປງອາຄານຫຼັງຈາກເກີດໄພທຳມະຊາດ. ພີ່ນ້ອງຍິງຊື່ກາເບຍລາເຊິ່ງເປັນຄົນໂປໂລຍ ບ້ານຂອງລາວເສຍຫາຍໜັກຫຼາຍຍ້ອນນໍ້າຖ້ວມ ແຕ່ລາວດີໃຈຫຼາຍທີ່ເຫັນພີ່ນ້ອງຈາກປະຊາຄົມໃກ້ໆມາຊ່ວຍລາວ. ເມື່ອລາວຄິດເຖິງປະສົບການນີ້ ລາວບອກວ່າລາວບໍ່ໄດ້ກັງວົນກັບວັດຖຸສິ່ງຂອງທີ່ເສຍໄປ ກົງກັນຂ້າມ ລາວສົນໃຈສິ່ງທີ່ໄດ້ຮັບ. ລາວບອກວ່າ: “ປະສົບການນີ້ເຮັດໃຫ້ຂ້ອຍໝັ້ນໃຈວ່າການເປັນສ່ວນໜຶ່ງຂອງປະຊາຄົມຄລິດສະຕຽນເປັນສິດທິພິເສດທີ່ຍິ່ງໃຫຍ່ ແລະເຮັດໃຫ້ມີຄວາມສຸກຄວາມຍິນດີແທ້ໆ.” ຫຼາຍຄົນທີ່ໄດ້ຮັບຄວາມຊ່ວຍເຫຼືອຫຼັງຈາກເກີດໄພທຳມະຊາດກໍເວົ້າວ່າເຂົາເຈົ້າກໍຮູ້ສຶກແບບນັ້ນຄືກັນ. ຜູ້ທີ່ເຮັດວຽກຮ່ວມກັບພະເຢໂຫວາກໍຊ່ວຍໃຫ້ພີ່ນ້ອງຮູ້ສຶກອີ່ມໃຈພໍໃຈແລະມີຄວາມສຸກຫຼາຍແທ້ໆ.—ອ່ານກິດຈະການ 20:35; 2 ໂກລິນໂທ 9:6, 7
13. ວຽກອາສາສະໝັກສາມາດຊ່ວຍເຮົາໃຫ້ຮັກພະເຢໂຫວາຫຼາຍຂຶ້ນໄດ້ແນວໃດ? ຂໍໃຫ້ຍົກຕົວຢ່າງ.
13 ພີ່ນ້ອງຍິງຄົນໜຶ່ງຊື່ສະເຕຟານີ ແລະຜູ້ປະກາດຄົນອື່ນໆໃນເຂດຂອງລາວເຮັດວຽກຮ່ວມກັບພະເຢໂຫວາໂດຍຊ່ວຍພະຍານພະເຢໂຫວາທີ່ໜີມາຢູ່ສະຫະລັດເອເມຣິກາຍ້ອນເກີດສົງຄາມໃນປະເທດຂອງເຂົາເຈົ້າ. ສະເຕຟານີກັບຜູ້ປະກາດຄົນອື່ນໆຊ່ວຍຫາເຮືອນແລະເຟີນິເຈີໃຫ້ພີ່ນ້ອງທີ່ອົບພະຍົບເຫຼົ່ານັ້ນ. ລາວບອກວ່າ: “ເຂົາເຈົ້າດີໃຈແລະຮູ້ຄຸນຄ່າຫຼາຍທີ່ໄດ້ປະສົບຄວາມຮັກຂອງພີ່ນ້ອງຈາກທົ່ວໂລກ ພວກເຮົາກໍມີຄວາມສຸກຄືກັນ. ຫຼາຍຄອບຄົວຄິດວ່າພວກເຮົາຊ່ວຍເຂົາເຈົ້າ ແຕ່ແທ້ໆແລ້ວເຂົາເຈົ້າຕ່າງຫາກທີ່ຊ່ວຍພວກເຮົາຫຼາຍ. ແຮ່ງເຮົາເຫັນຄວາມຮັກ ຄວາມເປັນນໍ້າໜຶ່ງໃຈດຽວ ຄວາມເຊື່ອແລະການໝາຍເພິ່ງພະເຢໂຫວາ ມັນກໍແຮ່ງເຮັດໃຫ້ເຮົາຮັກພະອົງ ແລະເຫັນຄຸນຄ່າຫຼາຍແທ້ໆຕໍ່ທຸກສິ່ງທຸກຢ່າງທີ່ອົງການເຮັດເພື່ອເຮົາ.”
ເຮັດວຽກຮັບໃຊ້ພະເຢໂຫວາຫຼາຍຂຶ້ນ
14, 15. (ກ) ຜູ້ພະຍາກອນເອຊາອີມີຄວາມຄິດແນວໃດ? (ຂ) ຄລິດສະຕຽນຈະມີຄວາມຄິດຄືກັບລາວໄດ້ແນວໃດ?
14 ເຈົ້າຢາກເຮັດວຽກຮ່ວມກັບພະເຢໂຫວາຫຼາຍຂຶ້ນໄດ້ບໍ? ເຈົ້າເຕັມໃຈຍ້າຍໄປໃນເຂດທີ່ມີຄວາມຕ້ອງການຜູ້ປະກາດບໍ? ແນ່ນອນວ່າເຮົາບໍ່ຈຳເປັນຕ້ອງຍ້າຍໄປໄກໆເພື່ອໃຫ້ເຫັນວ່າເປັນຄົນໃຈກວ້າງ. ແຕ່ກໍມີພີ່ນ້ອງບາງຄົນເຮັດໄດ້ ເຂົາເຈົ້າເຕັມໃຈຄືກັນກັບຜູ້ພະຍາກອນເອຊາອີ. ເມື່ອພະເຢໂຫວາຖາມວ່າ: “ເຮົາຈະໃຊ້ຜູ້ໃດໄປແລະໃຜຈະໄປແທນໝວດເຮົາ?” ເອຊາອີກໍຕອບວ່າ: “ຂ້ານ້ອຍຢູ່ທີ່ນີ້ ເຊີນພະອົງໃຊ້ຂ້ານ້ອຍໄປ.” (ເອຊາອີ 6:8) ເຈົ້າເຕັມໃຈແລະພ້ອມທີ່ຈະຊ່ວຍອົງການຂອງພະເຢໂຫວາບໍ? ມີບາງວິທີໃດແດ່ທີ່ເຈົ້າຊ່ວຍໄດ້?
15 ພະເຍຊູເວົ້າກ່ຽວກັບການປະກາດແລະເຮັດໃຫ້ຄົນເປັນລູກສິດວ່າ: “ການກ່ຽວເຂົ້າມີມາກຫຼາຍແຕ່ວ່າຜູ້ທຳການກໍມີໜ້ອຍຄົນ. ເຫດສັນນີ້ທ່ານທັງຫຼາຍຈົ່ງອ້ອນວອນຂໍເຊີນພະອົງເຈົ້າແຫ່ງການກ່ຽວເຂົ້ານັ້ນ ເພື່ອພະອົງຈະໃຊ້ຄົນທັງຫຼາຍໄປທຳການໃນການກ່ຽວເຂົ້າແຫ່ງພະອົງເຖີ້ນ.” (ມັດທາຍ 9:37, 38) ເຈົ້າສາມາດຮັບໃຊ້ເປັນໄພໂອເນຍໃນເຂດທີ່ຕ້ອງການຜູ້ປະກາດໄດ້ບໍ? ຫຼືເຈົ້າສາມາດຊ່ວຍບາງຄົນໃຫ້ເປັນໄພໂອເນຍໄດ້ບໍ? ພີ່ນ້ອງຫຼາຍຄົນຮູ້ສຶກວ່າການເປັນໄພໂອເນຍໃນເຂດທີ່ຕ້ອງການຜູ້ປະກາດເປັນວິທີທີ່ດີຫຼາຍທີ່ຈະສະແດງຄວາມຮັກຕໍ່ພະເຈົ້າແລະເພື່ອນບ້ານ. ເຈົ້າຄິດເຖິງວິທີອື່ນອີກບໍເພື່ອເຈົ້າຈະເຮັດວຽກຮັບໃຊ້ຫຼາຍຂຶ້ນ? ຖ້າເຮັດໄດ້ເຈົ້າຈະມີຄວາມສຸກທີ່ສຸດ.
16, 17. ມີວິທີໃດອີກທີ່ເຈົ້າຈະເຮັດວຽກຮັບໃຊ້ພະເຢໂຫວາຫຼາຍຂຶ້ນ?
16 ເຈົ້າເຕັມໃຈຮັບໃຊ້ໃນເບເທນຫຼືຊ່ວຍໂຄງການກໍ່ສ້າງຫຼືເປັນອາສາສະໝັກຊົ່ວຄາວທີ່ເຮັດວຽກຈັກມື້ໜຶ່ງຫຼືຫຼາຍມື້ຕໍ່ອາທິດໄດ້ບໍ? ອົງການຂອງພະເຢໂຫວາຕ້ອງການຄົນທີ່ເຕັມໃຈສະເໝີທີ່ຈະຮັບໃຊ້ບໍ່ວ່າຈະໄປບ່ອນໃດທີ່ມີຄວາມຈຳເປັນແລະຄົນທີ່ຈະເຮັດຫຍັງກໍຕາມທີ່ຂໍໃຫ້ເຮັດ ເຖິງວ່າຈະບໍ່ເຄີຍເຮັດວຽກແບບນີ້ມາກ່ອນ. ພະເຢໂຫວາເຫັນຄ່າທຸກຄົນທີ່ເຕັມໃຈເສຍສະລະແລະຮັບໃຊ້ບໍ່ວ່າບ່ອນໃດກໍຕາມທີ່ມີຄວາມຈຳເປັນ.—ຄຳເພງ 110:3
17 ເຈົ້າຢາກໄດ້ຮັບການຝຶກຝົນຫຼາຍຂຶ້ນບໍເຊິ່ງຈະຊ່ວຍເຈົ້າໃຫ້ຮັບໃຊ້ພະເຢໂຫວາຢ່າງເຕັມທີ? ເຈົ້າອາດຕອບຮັບເຂົ້າໂຮງຮຽນຜູ້ປະກາດລາຊະອານາຈັກ. ໂຮງຮຽນນີ້ຝຶກພີ່ນ້ອງໃຫ້ພ້ອມຮັບໃຊ້ພະເຢໂຫວາແບບເຕັມເວລາເຊິ່ງອົງການສາມາດໃຊ້ເຂົາເຈົ້າໄດ້ຫຼາຍຂຶ້ນ. ຄົນທີ່ເຂົ້າໂຮງຮຽນນີ້ຕ້ອງເຕັມໃຈຮັບໃຊ້ບໍ່ວ່າຈະຖືກສົ່ງໄປໃສກໍຕາມ. ເຈົ້າເຕັມໃຈເຮັດເພື່ອພະເຢໂຫວາຫຼາຍຂຶ້ນດ້ວຍວິທີນີ້ບໍ?—1 ໂກລິນໂທ 9:23
18. ມີປະໂຫຍດຫຍັງແດ່ເມື່ອເຮົາເຮັດວຽກຮ່ວມກັບພະເຢໂຫວາທຸກມື້?
18 ເນື່ອງຈາກເຮົາເປັນຄົນຂອງພະເຢໂຫວາ ເຮົາຈຶ່ງເປັນຄົນທີ່ມີນໍ້າໃຈຕ້ອນຮັບແຂກ ເຮັດດີ ກະລຸນາ ແລະສະແດງຄວາມຮັກ. ເຮົາເປັນຫ່ວງຜູ້ຄົນທຸກມື້ ການເຮັດແບບນີ້ເຮັດໃຫ້ເຮົາມີຄວາມຍິນດີ ມີສັນຕິສຸກ ແລະມີຄວາມສຸກ. (ຄາລາຊີ 5:22, 23) ບໍ່ວ່າສະຖານະການຂອງເຈົ້າຈະເປັນແນວໃດ ເຈົ້າຈະມີຄວາມສຸກຖ້າເຈົ້າຮຽນແບບຄວາມໃຈກວ້າງຂອງພະເຢໂຫວາແລະເປັນເພື່ອນຮ່ວມງານທີ່ມີຄ່າຂອງພະອົງ!—ສຸພາສິດ 3:9, 10
