ຄຳຖາມຈາກຜູ້ອ່ານ
ເປັນຫຍັງຈຶ່ງບໍ່ອະນຸຍາດໃຫ້ໃຜເອົາສື່ແລະສິ່ງພິມຂອງພະຍານພະເຢໂຫວາລົງໃນເວັບໄຊອື່ນຫຼືສື່ສັງຄົມອອນລາຍ?
ເນື່ອງຈາກເຮົາເຮັດສື່ແລະສິ່ງພິມກ່ຽວກັບຄຳພີໄບເບິນໃຫ້ໃຜກໍໄດ້ເຂົ້າມາເບິ່ງແລະອ່ານໄດ້ຟຣີໆ ບາງຄົນຈຶ່ງຄິດວ່າການກ໋ອບປີ້ແລະການລົງສິ່ງເຫຼົ່ານີ້ໃນເວັບໄຊອື່ນໆຫຼືໃນສື່ສັງຄົມອອນລາຍກໍໜ້າຈະເຮັດໄດ້. ແຕ່ການເຮັດແບບນີ້ເປັນການລະເມີດເງື່ອນໄຂການນຳໃຊ້ * (ເບິ່ງໄຂເງື່ອນ) ແລະອາດເຮັດໃຫ້ເກີດບັນຫາຮ້າຍແຮງຕໍ່ເວັບໄຊຂອງເຮົາ. ໃນເງື່ອນໄຂການນຳໃຊ້ນີ້ບອກຊັດເຈນວ່າບໍ່ອະນຸຍາດໃຫ້ “ເອົາເນື້ອໃນຈາກເວັບໄຊນີ້ບໍ່ວ່າຈະເປັນພາບ ສິ່ງພິມທີ່ເປັນໄຟລເອເລັກໂຕຣນິກ ເຄື່ອງໝາຍການຄ້າ ຮູບພາບ ວິດີໂອ ຫຼືບົດຄວາມລົງໃນອິນເຕີເນັດ (ບໍ່ວ່າຈະເປັນເວັບໄຊ ເວັບແຊໄຟລແລະວິດີໂອ ຫຼືທາງສື່ສັງຄົມອອນລາຍ).” ເປັນຫຍັງຈຶ່ງຕ້ອງມີກົດລະບຽບເຫຼົ່ານີ້?
ທຸກຢ່າງໃນເວັບໄຊຂອງເຮົາມີລິຂະສິດເຊິ່ງໝາຍຄວາມວ່າຖືກຄຸ້ມຄອງດ້ວຍກົດໝາຍ. ນີ້ເປັນເລື່ອງສຳຄັນເພື່ອປ້ອງກັນບໍ່ໃຫ້ເອົາໄປໃຊ້ໃນທາງທີ່ຜິດ. ຄົນທີ່ທໍລະຍົດພະເຈົ້າແລະຄົນທີ່ຕໍ່ຕ້ານອົງການພະຍາຍາມເອົາສື່ແລະສິ່ງພິມຂອງເຮົາໄປໃສ່ໃນເວັບໄຊຂອງເຂົາເຈົ້າເພື່ອຫຼອກລວງພະຍານພະເຢໂຫວາແລະຄົນອື່ນໆ. ເວັບໄຊຂອງເຂົາເຈົ້າອອກແບບເພື່ອເຮັດໃຫ້ຄົນທີ່ເຂົ້າໄປອ່ານເກີດຄວາມສົງໄສໃນໃຈ. (ຄຳເພງ 26:4; ສຸພາສິດ 22:5) ແລະບາງຄົນໄດ້ໃຊ້ເນື້ອໃນຈາກສິ່ງພິມ ຫຼືໂລໂກ້ jw.org ລົງໂຄສະນາ ສິນຄ້າ ແລະແອບໃນມືຖື. ເນື່ອງຈາກເຮົາຈົດລິຂະສິດແລະເຄື່ອງໝາຍການຄ້າໄວ້ ເຮົາຈຶ່ງມີສິດຕາມກົດໝາຍທີ່ຈະຫ້າມການໃຊ້ງານທີ່ບໍ່ເໝາະສົມ. (ສຸພາສິດ 27:12) ແຕ່ຖ້າເຮົາຍອມໃຫ້ບາງຄົນຫຼືແມ່ນແຕ່ພີ່ນ້ອງຂອງເຮົາເອົາເນື້ອໃນລົງໃນເວັບໄຊອື່ນໆ ຫຼືໃຊ້ໂລໂກ້ jw.org ເພື່ອຂາຍສິນຄ້າ ສານກໍອາດຈະບໍ່ຟັງເມື່ອເຮົາຟ້ອງຮ້ອງ.
ຖ້າເຮົາດາວໂຫຼດສິ່ງພິມຈາກເວັບໄຊອື່ນທີ່ບໍ່ແມ່ນເວັບໄຊ jw.org ກໍອາດເປັນອັນຕະລາຍ. ພະເຢໂຫວາໃຫ້ “ທາດທີ່ສັດຊື່ແລະສຸຂຸມ” ເທົ່ານັ້ນຈັດກຽມອາຫານຕາມເວລາໃຫ້ພວກເຮົາ. (ມັດທາຍ 24:45, ລ.ມ.) “ທາດ” ແຈກຈ່າຍຄວາມຮູ້ທີ່ເສີມຄວາມເຊື່ອໃຫ້ເຮົາທາງເວັບໄຊທາງການພຽງ 3 ເວັບນີ້ເທົ່ານັ້ນຄື: www.jw.org, tv.jw.org ແລະ wol.jw.org. ນອກຈາກນັ້ນ ເຮົາຍັງມີແອັບພລິເຄເຊິນທາງການພຽງ 3 ແອັບເທົ່ານັ້ນຄື JW Language®, JW Library® ແລະ JW Library Sign Language®. ໂດຍທາງເວັບໄຊແລະແອັບເຫຼົ່ານີ້ ເຮົາໝັ້ນໃຈໄດ້ວ່າເຮົາຈະບໍ່ເຈິໂຄສະນາຫຼືສິ່ງທີ່ຫຼອກລວງຈາກໂລກຂອງຊາຕານ. ແຕ່ຖ້າເຮົາຮັບເອົາສື່ແລະສິ່ງພິມຂອງເຮົາຈາກເວັບໄຊຫຼືແອັບອື່ນໆກໍບໍ່ຮັບປະກັນວ່າຂໍ້ມູນເຫຼົ່ານັ້ນຈະຖືກດັດແປງໃໝ່ຫຼືບໍ່.—ຄຳເພງ 18:26; 19:8
ນອກຈາກນັ້ນ ຖ້າເຮົາເອົາສື່ແລະສິ່ງພິມລົງໃນເວັບໄຊທີ່ຜູ້ຄົນຈະສະແດງຄວາມເຫັນໄດ້ ນີ້ກໍເປີດໂອກາດໃຫ້ຄົນທີ່ທໍລະຍົດພະເຈົ້າແລະຄົນທີ່ມັກວິຈານເຂົ້າມາສ້າງຄວາມສົງໄສຕໍ່ອົງການພະເຢໂຫວາ. ພີ່ນ້ອງບາງຄົນຖືກລໍ້ໃຈໃຫ້ເຂົ້າຮ່ວມໃນການໂຕ້ຖຽງກັບເຂົາເຈົ້າ ເຊິ່ງຈະເຮັດໃຫ້ຊື່ສຽງຂອງພະເຢໂຫວາເສຍຫາຍຫຼາຍຂຶ້ນກວ່າເກົ່າ. ຫ້ອງສົນທະນາໃນອິນເຕີເນັດບໍ່ແມ່ນບ່ອນເໝາະສົມທີ່ຈະແກ້ໄຂຄວາມຄິດຂອງຄົນ ແລະຊ່ວຍເຂົາເຈົ້າຮູ້ຈັກຄວາມຈິງ. (1 ຕີໂມເຕ 6:3-5; 2 ຕີໂມເຕ 2:23-25) ນອກຈາກນັ້ນ ບາງຄົນຍັງໄດ້ສ້າງບັນຊີຜູ້ໃຊ້ປອມໃນເວັບໄຊຕ່າງໆແລະສື່ສັງຄົມອອນລາຍໂດຍເຮັດໃຫ້ເບິ່ງຄືວ່າມາຈາກອົງການ ຫຼືຈາກຄະນະກຳມະການປົກຄອງ. ແຕ່ທີ່ຈິງ ບໍ່ມີສະມາຊິກຄະນະກຳມະການປົກຄອງຄົນໃດມີໜ້າເວັບເປັນຂອງຕົວເອງຫຼືບັນຊີຜູ້ໃຊ້ໃນສື່ສັງຄົມອອນລາຍ.
ເມື່ອເຮົາແນະນຳເວັບໄຊ jw.org ກັບຜູ້ຄົນໂດຍກົງ ເຮົາກໍສະໜັບສະໜູນວຽກປະກາດ “ຂ່າວດີ.” (ມັດທາຍ 24:14, ລ.ມ.) ເວັບໄຊແລະແອັບຂອງເຮົາກຳລັງປັບປຸງໃຫ້ດີຂຶ້ນເລື້ອຍໆ. ເຮົາຢາກໃຫ້ທຸກຄົນໄດ້ຮັບປະໂຫຍດຈາກສິ່ງເຫຼົ່ານີ້. ດັ່ງນັ້ນ ເຮົາໄດ້ຮັບອະນຸຍາດໃຫ້ສາມາດກ໋ອບປີ້ສື່ແລະສິ່ງພິມຫຼືສົ່ງລິ້ງໃນເວັບໄຊຂອງເຮົາໃຫ້ຄົນອື່ນໄດ້. ໂດຍວິທີນີ້ ເຮົາຈຶ່ງຊ່ວຍຜູ້ຄົນໃຫ້ເຫັນວ່າແຫຼ່ງດຽວເທົ່ານັ້ນທີ່ພະເຢໂຫວາແຈກຈ່າຍຄວາມຮູ້ທີ່ເສີມຄວາມເຊື່ອຄືຜ່ານທາງ “ທາດທີ່ສັດຊື່ແລະສຸຂຸມ.”
^ ຂໍ້ 1 ລິ້ງ “ເງື່ອນໄຂການນຳໃຊ້” ຈະຢູ່ທາງລຸ່ມຂອງໜ້າຫຼັກເວັບໄຊ jw.org ແລະຂໍ້ຫ້າມນີ້ໃຊ້ກັບທຸກຢ່າງທີ່ຢູ່ໃນເວັບໄຊຂອງເຮົາ.
