ບົດຄວາມສຶກສາທີ 14
ເຈົ້າກຳລັງເຮັດວຽກຮັບໃຊ້ຂອງເຈົ້າໃຫ້ສຳເລັດຄົບຖ້ວນບໍ?
“ປະກາດຂ່າວດີຕໍ່ໄປ ແລະເຮັດວຽກຮັບໃຊ້ຂອງເຈົ້າໃຫ້ສຳເລັດຄົບຖ້ວນ.”—2 ຕີໂມ. 4:5, ລ.ມ., ໄຂເງື່ອນ
ເພງ 57 ປະກາດກັບຄົບທຸກຊະນິດ
ໃຈຄວາມສຳຄັນ *
ຫຼັງຈາກທີ່ພະເຍຊູຟື້ນຄືນຈາກຕາຍ ເພິ່ນໄດ້ໄປພົບກັບພວກລູກສິດ ແລະສັ່ງເຂົາເຈົ້າວ່າ “ຈົ່ງໄປແລະກະທຳໃຫ້ . . . ເປັນລູກສິດ” (ເບິ່ງຂໍ້ 1)
1. ຜູ້ຮັບໃຊ້ຂອງພະເຈົ້າທຸກຄົນຢາກເຮັດຫຍັງ ແລະຍ້ອນຫຍັງ? (ເບິ່ງຮູບໜ້າປົກ).
ພະເຍຊູຄລິດສັ່ງພວກລູກສິດວ່າ: “ຈົ່ງໄປແລະກະທຳໃຫ້ພວກຕ່າງປະເທດທັງປວງເຂົ້າເປັນລູກສິດ.” (ມັດ. 28:19) ຍ້ອນວຽກນີ້ເປັນວຽກທີ່ສຳຄັນກວ່າ ຄຸ້ມຄ່າກວ່າ ແລະຮີບດ່ວນກວ່າວຽກອາຊີບອື່ນໆທັງໝົດໃນຊີວິດ ຜູ້ຮັບໃຊ້ທີ່ສັດຊື່ຂອງພະເຈົ້າທຸກຄົນຈຶ່ງຢາກຮຽນຮູ້ວິທີທີ່ຈະເຮັດວຽກມອບໝາຍນີ້ “ໃຫ້ສຳເລັດຄົບຖ້ວນ.” (2 ຕີໂມ. 4:5, ລ.ມ.) ແຕ່ມັນບໍ່ງ່າຍທີ່ເຮົາຈະໃຊ້ເວລາກັບວຽກຮັບໃຊ້ໃຫ້ຫຼາຍເທົ່າທີ່ເຮົາຢາກເຮັດ.
2. ມີບັນຫາຫຍັງແດ່ທີ່ເຮັດໃຫ້ເປັນເລື່ອງຍາກທີ່ເຮົາຈະເຮັດວຽກຮັບໃຊ້ໃຫ້ສຳເລັດ?
2 ໃນຊີວິດປະຈຳວັນ ເຮົາຍັງຕ້ອງໃຊ້ເວລາແລະເຫື່ອແຮງກັບຫຼາຍສິ່ງທີ່ສຳຄັນ. ເຮົາອາດຕ້ອງເຮັດວຽກຫຼາຍຊົ່ວໂມງເພື່ອຫາລ້ຽງຕົວເອງກັບຄອບຄົວ. ເຮົາອາດຍັງມີໜ້າທີ່ຮັບຜິດຊອບອື່ນໆອີກໃນຄອບຄົວ ເຮົາອາດເຈັບປ່ວຍ ຊຶມເສົ້າ ຫຼືມີບັນຫາຍ້ອນເຖົ້າແລ້ວ. ເມື່ອເຮົາມີບັນຫາແບບນີ້ ເຮົາຈະເຮັດວຽກຮັບໃຊ້ໃຫ້ສຳເລັດຄົບຖ້ວນໄດ້ແນວໃດ?
3. ເຮົາໄດ້ຂໍ້ສະຫຼຸບຫຍັງຈາກຄຳເວົ້າຂອງພະເຍຊູໃນມັດທາຍ 13:23?
3 ຖ້າສະພາບການຂອງເຮົາເຮັດໃຫ້ເຮົາບໍ່ມີເວລາຮັບໃຊ້ພະເຢໂຫວາໄດ້ຢ່າງເຕັມທີ ຂໍຢ່າຟ້າວທໍ້ໃຈ. ພະເຍຊູເອງກໍຮູ້ວ່າບໍ່ແມ່ນທຸກຄົນຈະໃຊ້ເວລາແລະເຫື່ອແຮງເຮັດວຽກຮັບໃຊ້ໄດ້ເທົ່າກັນ. (ອ່ານມັດທາຍ 13:23) ພະເຢໂຫວາເຫັນຄຸນຄ່າທຸກສິ່ງທີ່ເຮົາເຮັດໃນການຮັບໃຊ້ພະອົງຢ່າງສຸດຫົວໃຈ. (ເຫບ. 6:10-12) ແຕ່ຖ້າເຮົາຮູ້ສຶກວ່າສະພາບການຂອງເຮົາເປີດໂອກາດໃຫ້ເຮົາຮັບໃຊ້ໄດ້ຫຼາຍຂຶ້ນ. ບົດຄວາມນີ້ຈະຊ່ວຍເຮົາໃຫ້ເຫັນວ່າ ເຮົາຄວນເຮັດແນວໃດເພື່ອຈະໃຫ້ວຽກຮັບໃຊ້ເປັນສິ່ງສຳຄັນທີ່ສຸດໃນຊີວິດ ຈັດຊີວິດໃຫ້ຮຽບງ່າຍ ແລະພັດທະນາຄວາມສາມາດໃນການປະກາດແລະການ ສອນຂອງເຮົາໃຫ້ດີຂຶ້ນ. ທຳອິດ ຂໍໃຫ້ເຮົາມາເບິ່ງກ່ອນວ່າການເຮັດວຽກຮັບໃຊ້ໃຫ້ສຳເລັດຄົບຖ້ວນໝາຍຄວາມວ່າແນວໃດ?
4. ການເຮັດວຽກຮັບໃຊ້ໃຫ້ສຳເລັດຄົບຖ້ວນໝາຍຄວາມວ່າແນວໃດ?
4 ເວົ້າງ່າຍໆຄື ການເຮັດວຽກຮັບໃຊ້ໃຫ້ສຳເລັດຄົບຖ້ວນໝາຍຄວາມວ່າ ເຮົາຕ້ອງໄປປະກາດແລະສອນໃຫ້ຫຼາຍທີ່ສຸດເທົ່າທີ່ເຮົາເຮັດໄດ້. ສຳລັບພະເຢໂຫວາແລ້ວ ແຮງກະຕຸ້ນຂອງເຮົາເປັນເລື່ອງສຳຄັນ ບໍ່ພຽງແຕ່ເຮັດໃຫ້ມີຈຳນວນຊົ່ວໂມງຫຼາຍເທົ່ານັ້ນ. ເຮົາເຮັດວຽກຮັບໃຊ້ *ສຸດຊີວິດຍ້ອນວ່າເຮົາຮັກພະອົງ ແລະຮັກເພື່ອນບ້ານ. (ມໂກ. 12:30, 31; ໂກໂລ. 3:23) ການຮັບໃຊ້ພະເຈົ້າສຸດຊີວິດໝາຍເຖິງການທຸ່ມເທກຳລັງແລະເຫື່ອແຮງທັງໝົດທີ່ເຮົາມີເພື່ອຮັບໃຊ້ພະອົງ. ເມື່ອເຮົາເຫັນຄຸນຄ່າໃນສິດທິພິເສດທີ່ໄດ້ປະກາດ ເຮົາກໍຈະພະຍາຍາມບອກຂ່າວດີກັບຜູ້ຄົນໃຫ້ຫຼາຍທີ່ສຸດເທົ່າທີ່ເປັນໄປໄດ້.
5-6. ຂໍໃຫ້ຍົກຕົວຢ່າງວ່າຄົນທີ່ມີເວລາບໍ່ຫຼາຍຈະໃຫ້ການຮັບໃຊ້ເປັນສິ່ງທີ່ສຳຄັນທີ່ສຸດໃນຊີວິດໄດ້ແນວໃດ.
5 ຂໍໃຫ້ນຶກພາບວ່າຊາຍໜຸ່ມຄົນໜຶ່ງມັກຫຼິ້ນກິຕ້າຫຼາຍ. ລາວມີຄວາມສຸກທຸກຄັ້ງທີ່ໄດ້ຫຼິ້ນ. ໃນທີ່ສຸດ ລາວກໍໄດ້ວຽກຫຼິ້ນກິຕ້າຢູ່ຮ້ານອາຫານແຫ່ງໜຶ່ງໃນວັນເສົາອາທິດ ແຕ່ເງິນທີ່ໄດ້ບໍ່ພໍໃຊ້. ດັ່ງນັ້ນ ລາວຈຶ່ງໄປເຮັດວຽກເປັນພະນັກງານຮັບເງິນຢູ່ທີ່ຮ້ານຂາຍເຄື່ອງ ເຊິ່ງເຮັດວັນຈັນຫາວັນສຸກ. ເຖິງວ່າລາວຈະໃຊ້ເວລາສ່ວນຫຼາຍເຮັດວຽກຢູ່ຮ້ານຂາຍເຄື່ອງ ແຕ່ໃຈຂອງລາວກໍຢູ່ກັບການຫຼິ້ນກິຕ້າ. ທີ່ຈິງ ລາວຢາກຝຶກຫຼິ້ນໃຫ້ເກັ່ງເພື່ອຈະເປັນນັກດົນຕີມືອາຊີບ. ເຖິງວ່າລາວມີເວລາບໍ່ຫຼາຍ ແຕ່ລາວກໍມີຄວາມສຸກທຸກຄັ້ງທີ່ມີໂອກາດໄດ້ຫຼິ້ນກິຕ້າ.
6 ຄ້າຍຄືກັນ ເຮົາອາດມີເວລາບໍ່ຫຼາຍທີ່ຈະເຮັດວຽກປະກາດ ແຕ່ເຮົາກໍມັກເຮັດວຽກນີ້ຫຼາຍ ແລະເຮົາກໍພະຍາຍາມຝຶກຝົນຄວາມສາມາດເພື່ອຈະຊ່ວຍຄົນອື່ນໃຫ້ເຂົ້າໃຈຂ່າວດີ. ຍ້ອນເຈົ້າມີຫຼາຍສິ່ງຫຼາຍຢ່າງທີ່ຕ້ອງເບິ່ງແຍງ ເຈົ້າອາດສົງໄສວ່າເຈົ້າຈະເຮັດແນວໃດເພື່ອໃຫ້ວຽກປະກາດເປັນສິ່ງທີ່ສຳຄັນທີ່ສຸດໃນຊີວິດຂອງເຈົ້າ?
ເຮົາຈະເຮັດໃຫ້ວຽກປະກາດເປັນສິ່ງສຳຄັນທີ່ສຸດໃນຊີວິດໄດ້ແນວໃດ?
7-8. ພະເຍຊູຄິດແນວໃດຕໍ່ວຽກປະກາດ ແລະເຮົາຈະຮຽນແບບເພິ່ນໄດ້ແນວໃດ?
7 ໃຫ້ເຮົາມາເບິ່ງວ່າພະເຍຊູຄິດແນວໃດກ່ຽວກັບວຽກປະກາດ ເພິ່ນເປັນຕົວຢ່າງທີ່ດີຫຼາຍ. ເພິ່ນເຮັດໃຫ້ການເວົ້າເລື່ອງລາຊະອານາຈັກຂອງພະເຈົ້າເປັນສິ່ງທີ່ສຳຄັນທີ່ສຸດໃນຊີວິດ. (ໂຢ. 4:34, 35) ພະເຍຊູຍ່າງຫຼາຍຮ້ອຍກິໂລແມັດເພື່ອປະກາດກັບຜູ້ຄົນໃຫ້ຫຼາຍທີ່ສຸດ. ເພິ່ນໃຊ້ທຸກໂອກາດເພື່ອຈະເວົ້າກັບຜູ້ຄົນໃນບ່ອນສາທາລະນະແລະໃນເຮືອນຂອງເຂົາເຈົ້າ. ພະເຍຊູທຸ່ມເທທັງຊີວິດເພື່ອເຮັດວຽກປະກາດ.
8 ເມື່ອເຮົາສ້າງໂອກາດທີ່ຈະເວົ້າຂ່າວດີກັບຄົນອື່ນບໍ່ວ່າຢູ່ໃສຫຼືເວລາໃດ ນີ້ສະແດງວ່າເຮົາພະຍາຍາມຮຽນແບບພະເຍຊູ. ເຮົາພ້ອມທີ່ຈະເສຍສະລະຄວາມສະດວກສະບາຍສ່ວນຕົວເພື່ອຈະມີສ່ວນຮ່ວມໃນວຽກປະກາດ. (ມໂກ. 6:31-34; 1 ເປ. 2:21) ບາງຄົນໃນປະຊາຄົມສາມາດຮັບໃຊ້ເປັນໄພໂອເນຍພິເສດ ໄພໂອເນຍປະຈຳ ຫຼືໄພໂອເນຍສົບທົບ. ສ່ວນຄົນອື່ນໆໄດ້ຮຽນເວົ້າພາສາໃໝ່ ຫຼືໄດ້ຍ້າຍໄປເຂດທີ່ມີຄວາມຈຳເປັນຕ້ອງການຜູ້ປະກາດ. ແຕ່ສ່ວນຫຼາຍຜູ້ທີ່ເຮັດວຽກປະກາດແມ່ນຜູ້ປະກາດລາຊະອານາຈັກທີ່ເຮັດສຸດຄວາມສາມາດ. ບໍ່ວ່າເຮົາຮັບໃຊ້ແບບໃດກໍຕາມ ພະເຢໂຫວາບໍ່ໄດ້ຄາດໝາຍໃຫ້ເຮົາເຮັດຫຼາຍກວ່າທີ່ເຮົາເຮັດໄດ້. ພະອົງຢາກໃຫ້ເຮົາທຸກຄົນມີຄວາມສຸກໃນການຮັບໃຊ້ພະອົງຕອນທີ່ເຮົາປະກາດ “ຂ່າວດີທີ່ດີເລີດຂອງພະເຈົ້າຜູ້ມີຄວາມສຸກ.”—1 ຕີໂມ. 1:11, ລ.ມ.; ບັນຍັດ. 30:11
9. (ກ) ເຖິງວ່າໂປໂລຕ້ອງຫາລ້ຽງຊີບ ແຕ່ລາວໄດ້ຈັດໃຫ້ວຽກປະກາດສຳຄັນທີ່ສຸດໃນຊີວິດຂອງລາວໄດ້ແນວໃດ? (ຂ) ກິດຈະການ 28:16, 30, 31 ສະແດງວ່າໂປໂລມີຄວາມຄິດແນວໃດຕໍ່ວຽກປະກາດ?
9 ອັກຄະສາວົກໂປໂລວາງຕົວຢ່າງທີ່ດີໂດຍຈັດໃຫ້ວຽກຮັບໃຊ້ເປັນສິ່ງສຳຄັນທີ່ສຸດໃນຊີວິດ. ຕອນທີ່ລາວຢູ່ເມືອງໂກລິນໂທໃນລະຫວ່າງການເດີນທາງໄປປະກາດຢູ່ຕ່າງປະເທດຮອບທີ 2 ເງິນຂອງລາວເກືອບຈະໝົດ ແລະລາວຕ້ອງໃຊ້ເວລາໄລຍະໜຶ່ງເຮັດວຽກຫຍິບເຕັ້ນ. ແຕ່ໂປໂລບໍ່ໄດ້ຖືວ່າການເຮັດວຽກຫຍິບເຕັ້ນເປັນສິ່ງສຳຄັນທີ່ສຸດ. ລາວເຮັດວຽກນີ້ເພື່ອຈະຮັບໃຊ້ຕໍ່ໄປໄດ້ ໂດຍບໍ່ຕ້ອງການ “ຮັບຄ່າຈ້າງ” ຈາກການປະກາດກັບຊາວໂກລິນໂທ. (2 ໂກ. 11:7) ເຖິງວ່າໂປໂລຕ້ອງເຮັດວຽກເພື່ອຫາລ້ຽງຊີບ ແຕ່ລາວກໍໃຫ້ຄວາມສຳຄັນກັບວຽກປະກາດສະເໝີ ແລະລາວໄປປະກາດທຸກວັນສະບາໂຕ. ເມື່ອສະພາບການຂອງລາວດີຂຶ້ນ ລາວກໍໃຫ້ຄວາມສຳຄັນກັບການປະກາດຫຼາຍຂຶ້ນ. ລາວ “ທຸ່ມເທເວລາໃນວຽກປະກາດຄຳສອນຂອງພະເຈົ້າແລະໃຫ້ຊາວຢິວເຫັນຫຼັກຖານທີ່ພິສູດວ່າພະເຍຊູເປັນຄລິດ.” (ກິດ. 18:3-5, ລ.ມ.; 2 ໂກ. 11:9) ຕໍ່ມາ ໃນລະຫວ່າງ 2 ປີທີ່ໂປໂລຖືກກັກບໍລິເວນໃຫ້ຢູ່ແຕ່ເຮືອນໃນໂລມ ລາວໄດ້ປະກາດກັບຄົນທີ່ມາຢ້ຽມຢາມ ແລະຂຽນຈົດໝາຍຫຼາຍສະບັບ. (ອ່ານກິດຈະການ 28:16, 30, 31) ໂປໂລຕັ້ງໃຈແນ່ວແນ່ທີ່ຈະບໍ່ຍອມໃຫ້ອັນໃດກໍຕາມສຳຄັນກວ່າວຽກປະກາດຂອງລາວ. ລາວຂຽນວ່າ: “ຍ້ອນເຮົາໄດ້ຮັບມອບໝາຍວຽກຮັບໃຊ້ນີ້ . . . ເຮົາຈຶ່ງບໍ່ທໍ້ຖອຍ.” (2 ໂກ. 4:1, ລ.ມ.) ຄືກັບໂປໂລ ເຖິງວ່າເຮົາຕ້ອງເຮັດວຽກເພື່ອຫາລ້ຽງຕົວເອງແລະຄອບຄົວ ເຮົາຍັງສາມາດຈັດໃຫ້ວຽກປະກາດເປັນສິ່ງທີ່ສຳຄັນທີ່ສຸດໃນຊີວິດໄດ້.
ມີຫຼາຍວິທີທີ່ເຮົາສາມາດເຮັດວຽກຮັບໃຊ້ໃຫ້ສຳເລັດຄົບຖ້ວນ (ເບິ່ງຂໍ້ 10-11)
10-11. ຖ້າເຮົາມີບັນຫາສຸຂະພາບເຮົາຈະເຮັດວຽກຮັບໃຊ້ໃຫ້ສຳເລັດຄົບຖ້ວນໄດ້ແນວໃດ?
10 ຖ້າເຮົາປະກາດຕາມບ້ານເຮືອນໄດ້ບໍ່ຫຼາຍຍ້ອນອາຍຸສູງຫຼືມີບັນຫາສຸຂະພາບ ເຮົາກໍຍັງມີຄວາມສຸກກັບການເຮັດວຽກປະກາດໃນຮູບແບບອື່ນໄດ້. ຜູ້ປະກາດໃນສະຕະວັດທຳອິດໄປຫາຜູ້ຄົນໃນທຸກບ່ອນບໍ່ວ່າຈະຢູ່ໃສ. ເຂົາເຈົ້າໄດ້ໃຊ້ທຸກໂອກາດທີ່ຈະເວົ້າເລື່ອງຄວາມຈິງກັບ ‘ຄົນທີ່ໄດ້ພົບ’ ເຊັ່ນ: ຢູ່ຕາມບ້ານເຮືອນ ບ່ອນສາທາລະນະ ຫຼືປະກາດແບບບໍ່ເປັນທາງການ. (ກິດ. 17:17; 20:20) ຖ້າເຮົາຍ່າງຫຼາຍບໍ່ໄດ້ ເຮົາອາດນັ່ງປະກາດໃນບ່ອນສາທາລະນະທີ່ມີຜູ້ຄົນມັກຜ່ານໄປມາ ຫຼືອາດປະກາດແບບບໍ່ເປັນທາງການ ຂຽນຈົດໝາຍ ຫຼືທາງໂທລະສັບ. ຜູ້ປະກາດຫຼາຍຄົນທີ່ບໍ່ສາມາດໄປປະກາດຕາມບ້ານເຮືອນຍ້ອນບັນຫາສຸຂະພາບຫຼືບັນຫາອື່ນໆກໍມີຄວາມສຸກແລະຮູ້ສຶກອີ່ມໃຈພໍໃຈເມື່ອປະກາດໃນຮູບແບບດັ່ງກ່າວນັ້ນ.
11 ເຖິງວ່າຈະມີບັນຫາສຸຂະພາບ ແຕ່ເຈົ້າສາມາດເຮັດວຽກຮັບໃຊ້ຂອງເຈົ້າໃຫ້ສຳເລັດຄົບຖ້ວນໄດ້. ຂໍໃຫ້ຄິດເຖິງຕົວຢ່າງຂອງອັກຄະສາວົກໂປໂລອີກເທື່ອໜຶ່ງ ລາວບອກວ່າ: “ເຮົາອາດກະທຳສັບພະທຸກສິ່ງໄດ້ດ້ວຍພະອົງຜູ້ຊູແຮງຂອງເຮົາ.” (ຟີລິບ 4:13) ໂປໂລຈຳເປັນຕ້ອງມີພະລັງນີ້ ເພາະມີເທື່ອໜຶ່ງທີ່ລາວບໍ່ສະບາຍໃນລະຫວ່າງການເດີນທາງໄປປະກາດຢູ່ຕ່າງປະເທດ. ລາວບອກກັບພີ່ນ້ອງໃນຄາລາຊີວ່າ “ຄັ້ງທຳອິດທີ່ຂ້ອຍໄດ້ປະກາດຂ່າວດີກັບພວກເຈົ້າກໍຍ້ອນເຈັບປ່ວຍ.” (ຄລາ. 4:13, ລ.ມ.) ຄ້າຍຄືກັນ ບັນຫາທີ່ເຈົ້າມີດ້ານສຸຂະພາບອາດເປີດໂອກາດໃຫ້ເຈົ້າປະກາດຂ່າວດີກັບຄົນອື່ນ ເຊັ່ນ: ທ່ານໝໍ ພະຍາບານ ແລະຜູ້ເບິ່ງແຍງຄົນເຈັບ. ສ່ວນຫຼາຍຄົນເຫຼົ່ານີ້ບໍ່ຢູ່ເຮືອນຕອນທີ່ພີ່ນ້ອງມາປະກາດຕາມບ້ານເຮືອນ.
ເຮົາຈະຈັດໃຫ້ຊີວິດຮຽບງ່າຍໄດ້ແນວໃດ?
12. ການໃຫ້ “ຕາຂອງທ່ານຊື່ດີ” ໝາຍຄວາມວ່າແນວໃດ?
12 ພະເຍຊູບອກວ່າ: “ຕາເປັນໂຄມໄຟແຫ່ງກາຍ. ເຫດສັນນີ້ຖ້າຕາຂອງທ່ານຊື່ດີກາຍທັງສິ້ນຈະເຕັມໄປດ້ວຍແຈ້ງ.” (ມັດ. 6:22) ເພິ່ນໝາຍຄວາມວ່າ ໃຫ້ຕາຂອງເຮົາເບິ່ງໄປແຕ່ສິ່ງດຽວ ເປົ້າໝາຍດຽວ ຈຸດປະສົງດຽວ ແລະບໍ່ວອກແວກ. ພະເຍຊູວາງຕົວຢ່າງໃນເລື່ອງນີ້ໂດຍທຸ່ມເທຊີວິດກັບວຽກຮັບໃຊ້ ແລະເພິ່ນສອນລູກສິດໃຫ້ຈົດຈໍ່ກັບວຽກຮັບໃຊ້ພະເຢໂຫວາແລະ ລາຊະອານາຈັກຂອງພະອົງ. ເມື່ອເຮົາທຸ່ມເທຊີວິດຂອງເຮົາໃນວຽກຮັບໃຊ້ ເຮົາກໍກຳລັງຮຽນແບບພະເຍຊູໂດຍ “ໃຫ້ການປົກຄອງຂອງພະເຈົ້າແລະຄວາມຖືກຕ້ອງຊອບທຳຂອງພະອົງເປັນສິ່ງສຳຄັນທີ່ສຸດໃນຊີວິດ.”—ມັດ. 6:33, ລ.ມ.
13. ສິ່ງໃດຈະຊ່ວຍເຮົາໃຫ້ຈົດຈໍ່ກັບວຽກຮັບໃຊ້?
13 ວິທີໜຶ່ງທີ່ເຮົາຈະຈົດຈໍ່ກັບວຽກຮັບໃຊ້ຄືໂດຍຈັດຊີວິດໃຫ້ຮຽບງ່າຍເພື່ອຈະມີເວລາຫຼາຍຂຶ້ນໃນການຊ່ວຍເຫຼືອຄົນອື່ນໃຫ້ຮູ້ຈັກແລະຮັກພະເຢໂຫວາ. * ຕົວຢ່າງ: ເຮົາປັບຕາຕະລາງເຮັດວຽກໄດ້ບໍເພື່ອຈະມີເວລາຫຼາຍຂຶ້ນໃນການປະກາດກາງອາທິດ? ເຮົາຕັດກິດຈະກຳບາງຢ່າງທີ່ກິນເວລາຫຼາຍອອກໄປໄດ້ບໍ?
14. ຜົວເມຍຄູ່ໜຶ່ງໄດ້ເຮັດຫຍັງເພື່ອຈະມີເວລາປະກາດຫຼາຍຂຶ້ນ?
14 ຜູ້ເຖົ້າແກ່ຄົນໜຶ່ງຊື່ອີລາຍອັດກັບເມຍໄດ້ເຮັດແບບນັ້ນ. ລາວບອກວ່າ: “ໃນຕອນນັ້ນ ພວກເຮົາເລີ່ມເປັນໄພໂອເນຍທັນທີບໍ່ໄດ້ ແຕ່ເຮົາໄດ້ປັບປ່ຽນບາງຢ່າງເພື່ອຈະມີເວລາປະກາດຫຼາຍຂຶ້ນ. ເຮົາຫຼຸດຄ່າໃຊ້ຈ່າຍລົງ ຕັດກິດຈະກຳບາງຢ່າງທີ່ບໍ່ຈຳເປັນອອກໄປ ແລະຂໍປັບຕາຕະລາງເຮັດວຽກກັບນາຍຈ້າງ. ຜົນກໍຄື ເຮົາໄປຮ່ວມປະກາດໃນຕອນແລງໄດ້ ມີນັກສຶກສາເພີ່ມຂຶ້ນ ແລະແມ່ນແຕ່ສາມາດໄປປະກາດກາງອາທິດເດືອນລະ 2 ເທື່ອໄດ້. ພວກເຮົາມີຄວາມສຸກຫຼາຍອີ່ຫຼີ!”
ເຮົາຈະພັດທະນາຄວາມສາມາດໃນການປະກາດແລະການສອນໄດ້ແນວໃດ?
ການນຳໃຊ້ສິ່ງທີ່ໄດ້ຮຽນຈາກການປະຊຸມກາງອາທິດຈະຊ່ວຍເຮົາໃຫ້ມີຄວາມສາມາດໃນການປະກາດແລະການສອນໃຫ້ດີຂຶ້ນຕໍ່ໆໄປ (ເບິ່ງຂໍ້ 15-16) *
15-16. ຕາມທີ່ບອກໄວ້ໃນ 1 ຕີໂມເຕ 4:13, 15 ເຮົາຈະພັດທະນາຄວາມສາມາດໃນການເປັນຜູ້ປະກາດໄດ້ແນວໃດ? (ເບິ່ງຂອບ “ ເປົ້າໝາຍທີ່ຊ່ວຍຂ້ອຍໃຫ້ເຮັດວຽກຮັບໃຊ້ຢ່າງສຳເລັດຄົບຖ້ວນ.”)
15 ອີກວິທີໜຶ່ງທີ່ເຮົາຈະເຮັດວຽກຮັບໃຊ້ໃຫ້ສຳເລັດສຸພາ. 1:5; ອ່ານ 1 ຕີໂມເຕ 4:13, 15
ຄົບຖ້ວນແມ່ນໂດຍພັດທະນາຄວາມສາມາດໃນການປະກາດແລະການສອນ. ຄົນທີ່ເຮັດວຽກບາງອາຊີບຕ້ອງໄດ້ຝຶກອົບຮົມເປັນປະຈຳເພື່ອຈະໄດ້ພັດທະນາຄວາມຮູ້ຄວາມສາມາດໃຫ້ດີຂຶ້ນ. ຜູ້ປະກາດຂ່າວດີເລື່ອງລາຊະອານາຈັກຂອງພະເຈົ້າກໍຕ້ອງເຮັດຄືກັນ. ເຮົາຕ້ອງຮຽນຮູ້ຕໍ່ໆໄປເພື່ອຈະເປັນຜູ້ປະກາດທີ່ມີຄວາມສາມາດຫຼາຍຂຶ້ນ.—16 ເຮົາຈະພັດທະນາຄວາມສາມາດໃນການປະກາດແລະການສອນຂອງເຮົາຕໍ່ໆໄປໄດ້ແນວໃດ? ໂດຍເອົາໃຈໃສ່ສິ່ງທີ່ໄດ້ຮຽນຮູ້ໃນການປະຊຸມຊີວິດຄລິດສະຕຽນແລະວຽກຮັບໃຊ້. ການປະຊຸມນີ້ຝຶກເຮົາເປັນປະຈຳໃຫ້ມີຄວາມສາມາດທີ່ຈະປະກາດໄດ້ດີຂຶ້ນ. ຕົວຢ່າງເຊັ່ນ: ເມື່ອປະທານການປະຊຸມໃຫ້ຄຳແນະນຳຜູ້ທີ່ເຮັດສ່ວນນັກຮຽນ ເຮົາກໍຈະເຫັນບາງຈຸດທີ່ຈະນຳໄປໃຊ້ເພື່ອພັດທະນາຄວາມສາມາດໃນການປະກາດແລະການສອນຂອງເຮົາ. ຈາກນັ້ນ ເຮົາສາມາດເຮັດຕາມຈຸດເຫຼົ່ານັ້ນເມື່ອປະກາດກັບຜູ້ຄົນ. ເຮົາອາດຂໍຄວາມຊ່ວຍເຫຼືອຫຼືເຮັດວຽກຮັບໃຊ້ນຳຜູ້ດູແລກຸ່ມປະກາດ ຜູ້ປະກາດຄົນອື່ນໆທີ່ມີປະສົບການ ໄພໂອເນຍ ຫຼືຜູ້ດູແລໝວດ. ເມື່ອຊຳນານໃນການໃຊ້ເຄື່ອງມືແຕ່ລະຢ່າງໃນກ່ອງເຄື່ອງມືສຳລັບການສອນ ເຮົາກໍຈະມີຄວາມສຸກຫຼາຍຂຶ້ນໃນການປະກາດແລະການສອນຄົນອື່ນ.
17. ເຈົ້າຈະໄດ້ຫຍັງເມື່ອເຈົ້າເຮັດວຽກຮັບໃຊ້ໃຫ້ສຳເລັດຄົບຖ້ວນ?
17 ເປັນສິດທິພິເສດແທ້ໆທີ່ພະເຢໂຫວາໃຫ້ເຮົາ “ເປັນເພື່ອນຮ່ວມງານ” ຂອງພະອົງ! (1 ໂກ. 3:9, ລ.ມ.) ເມື່ອເຈົ້າ “ເບິ່ງອອກວ່າສິ່ງໃດສຳຄັນກວ່າ” ແລະຈົດຈໍ່ກັບວຽກຮັບໃຊ້ ເຈົ້າກໍຈະ “ນະມັດສະການພະເຢໂຫວາຢ່າງມີຄວາມສຸກ.” (ຟີລິບ 1:10, ລ.ມ.; ເພງ. 100:2, ລ.ມ.) ໃນຖານະເປັນຜູ້ຮັບໃຊ້ພະເຈົ້າ ເຈົ້າສາມາດໝັ້ນໃຈໄດ້ວ່າພະອົງຈະໃຫ້ເຈົ້າມີກຳລັງທີ່ຈຳເປັນຕ້ອງມີເພື່ອຈະເຮັດວຽກຮັບໃຊ້ໃຫ້ສຳເລັດຄົບຖ້ວນ ບໍ່ວ່າເຈົ້າຈະປະສົບບັນຫາຫຼືມີຂໍ້ຈຳກັດສ່ຳໃດກໍຕາມ. (2 ໂກ. 4:1, 7; 6:4) ບໍ່ວ່າສະພາບການຂອງເຈົ້າຈະເຮັດໃຫ້ເຈົ້າປະກາດໄດ້ຫຼາຍຫຼືໜ້ອຍ ເຈົ້າກໍສາມາດ “ພູມໃຈ” ໄດ້ເພາະເຈົ້າເຮັດວຽກຮັບໃຊ້ສຸດຊີວິດ. (ຄລາ. 6:4, ທ.ປ.) ເມື່ອເຈົ້າເຮັດວຽກຮັບໃຊ້ໃຫ້ສຳເລັດຄົບຖ້ວນ ກໍສະແດງວ່າເຈົ້າຮັກພະເຢໂຫວາແລະເພື່ອນມະນຸດ. ‘ເມື່ອກະທຳຢ່າງນັ້ນເຈົ້າຈະຊ່ອຍຕົວເອງໃຫ້ພົ້ນແລະຄົນທັງຫຼາຍທີ່ຟັງເຈົ້າ.’—1 ຕີໂມ. 4:16
ເພງ 58 ຊອກຫາຄົນທີ່ມັກຄວາມສະຫງົບສຸກ
^ ຂໍ້ 5 ພະເຍຊູສັ່ງເຮົາໃຫ້ປະກາດຂ່າວດີເລື່ອງລາຊະອານາຈັກຂອງພະເຈົ້າແລະສອນຄົນໃຫ້ເປັນລູກສິດ. ໃນບົດຄວາມນີ້ເຮົາຈະພິຈາລະນາວ່າ ເຮົາຈະເຮັດວຽກຮັບໃຊ້ໃຫ້ສຳເລັດຄົບຖ້ວນໄດ້ແນວໃດເຖິງວ່າຈະມີບັນຫາຫຼາຍຢ່າງ ແລະເຮົາຍັງຈະຮຽນຮູ້ວ່າ ເຮົາຈະເປັນຜູ້ປະກາດທີ່ດີຂຶ້ນແລະມີຄວາມສຸກຫຼາຍຂຶ້ນໃນວຽກປະກາດໄດ້ແນວໃດ.
^ ຂໍ້ 4 ການອະທິບາຍສຳນວນ: ວຽກຮັບໃຊ້ໝາຍເຖິງການປະກາດແລະການສອນ ການກໍ່ສ້າງແລະການບຳລຸງຮັກສາອາຄານສະຖານທີ່ຕ່າງໆທີ່ອົງການໃຊ້ ແລະວຽກງານບັນເທົາທຸກເມື່ອເກີດໄພພິບັດຂຶ້ນ.—2 ໂກ. 5:18, 19; 8:4
^ ຂໍ້ 13 ເບິ່ງ 7 ຂັ້ນຕອນໃນຂອບຊື່ “ວິທີຈັດຊີວິດໃຫ້ຮຽບງ່າຍ” ໃນຫໍສັງເກດການ ສະບັບ ກໍລະກົດ 2016 ໜ້າ 8
^ ຂໍ້ 62 ຄຳອະທິບາຍຮູບພາບ: ພີ່ນ້ອງຍິງເຮັດສ່ວນກັບໄປຢາມໃນການປະຊຸມກາງອາທິດ ເມື່ອປະທານໃຫ້ຄຳແນະນຳ ລາວກໍຈົດບາງຢ່າງໄວ້ໃນຈຸນລະສານການສອນ. ຕໍ່ມາລາວກໍນຳສິ່ງທີ່ຮຽນໃນການປະຊຸມນັ້ນໄປໃຊ້ໃນວຽກປະກາດ.