ບົດຄວາມສຶກສາທີ 8
ເພງທີ 123 ເຊື່ອຟັງກົດລະບຽບຂອງອົງການພະເຈົ້າຢ່າງພັກດີ
ເຮັດຕາມການຊີ້ນຳຂອງພະເຢໂຫວາສະເໝີ
“ເຮົາເຢໂຫວາ . . . ເຮົາພາເຈົ້າໄປໃນຫົນທາງທີ່ເຈົ້າຄວນໄປ.”—ອຊຢ. 48:17
ຈຸດສຳຄັນ
ບົດຄວາມນີ້ຈະຊ່ວຍເຮົາໃຫ້ເຫັນວ່າພະເຢໂຫວາຊີ້ນຳປະຊາຊົນຂອງເພິ່ນໃນທຸກມື້ນີ້ແນວໃດ ແລະເຮົາຈະໄດ້ຮັບປະໂຫຍດຫຍັງເມື່ອເຮັດຕາມການຊີ້ນຳຂອງເພິ່ນ.
1. ເປັນຫຍັງເຮົາຕ້ອງໃຫ້ພະເຢໂຫວາຊີ້ນຳ? ຂໍໃຫ້ຍົກຕົວຢ່າງ.
ສົມມຸດວ່າເຈົ້າຫຼົງຢູ່ໃນປ່າ. ຢູ່ຫັ້ນມີແຕ່ອັນຕະລາຍເຊັ່ນ: ມີສັດປ່າທີ່ເປັນຕາຢ້ານ ມີພືດແລະແມງໄມ້ຫຼາຍຊະນິດທີ່ມີພິດ. ຖ້າເຈົ້າເຈິແບບນັ້ນເຈົ້າຕ້ອງຢ້ານຫຼາຍແທ້ໆ ແຕ່ຖ້າເຈົ້າໄປກັບຄົນທີ່ຮູ້ຈັກແຖວນັ້ນດີ ຮູ້ວ່າບ່ອນໃດທີ່ເປັນອັນຕະລາຍແລະຊ່ວຍເຈົ້າໃຫ້ຫຼີກລ່ຽງໄດ້ ເຈົ້າຄືຊິຮູ້ສຶກປອດໄພແລະອຸ່ນໃຈແມ່ນບໍ? ໂລກທີ່ເຮົາຢູ່ໃນທຸກມື້ນີ້ກໍເປັນຄືກັບປ່າທີ່ມີແຕ່ອັນຕະລາຍແລະເຮັດໃຫ້ຄວາມເຊື່ອຂອງເຮົາອ່ອນລົງ ແຕ່ເຮົາມີຜູ້ນຳທາງທີ່ດີທີ່ສຸດ ຜູ້ນັ້ນແມ່ນພະເຢໂຫວາ. ເພິ່ນຊ່ວຍເຮົາໃຫ້ພົ້ນຈາກອັນຕະລາຍຕ່າງໆໄດ້ແລະພາເຮົາໄປຮອດຈຸດໝາຍປາຍທາງ ນັ້ນກໍຄືຊີວິດຕະຫຼອດໄປໃນໂລກໃໝ່.
2. ພະເຢໂຫວາຊີ້ນຳເຮົາແນວໃດ?
2 ພະເຢໂຫວາຊີ້ນຳເຮົາແນວໃດ? ວິທີຫຼັກທີ່ເພິ່ນຊີ້ນຳແມ່ນໂດຍທາງຄຳພີໄບເບິນ. ເພິ່ນຍັງໃຊ້ມະນຸດໃຫ້ຊີ້ນຳເຮົາ. ຕົວຢ່າງເຊັ່ນ: ເພິ່ນໃຊ້ “ທາດທີ່ສັດຊື່ແລະສຸຂຸມ” ເພື່ອໃຫ້ຄວາມຮູ້ທີ່ເສີມຄວາມເຊື່ອເຊິ່ງຊ່ວຍເຮົາໃຫ້ຕັດສິນໃຈໄດ້ຢ່າງສະຫຼາດ. (ມທ. 24:45) ນອກຈາກນັ້ນ ພະເຢໂຫວາຍັງໃຊ້ຜູ້ຊາຍທີ່ມີຄວາມສາມາດໃຫ້ຊີ້ນຳເຮົາ. ຕົວຢ່າງເຊັ່ນ: ຜູ້ເບິ່ງແຍງໝວດແລະຜູ້ເບິ່ງແຍງໃນປະຊາຄົມໃຫ້ກຳລັງໃຈແລະໃຫ້ຄຳແນະນຳເພື່ອຊ່ວຍເຮົາໃຫ້ຜ່ານເວລາທີ່ຫຍຸ້ງຍາກລຳບາກໄປໄດ້. ເຮົາຮູ້ສຶກຂອບໃຈແທ້ໆທີ່ມີຄຳແນະນຳທີ່ໄວ້ໃຈໄດ້ເຊິ່ງຊ່ວຍເຮົາໃຫ້ຮັບມືກັບບັນຫາຕ່າງໆໃນສະໄໝສຸດທ້າຍ ຊ່ວຍເຮົາໃຫ້ເປັນຄົນທີ່ພະເຢໂຫວາຍອມຮັບ ແລະຊ່ວຍເຮົາຕໍ່ໆໄປໃຫ້ຢູ່ໃນທາງທີ່ພາໄປເຖິງຊີວິດ.
3. ເຮົາຈະຮຽນຫຍັງໃນບົດຄວາມນີ້?
3 ບາງເທື່ອເຮົາອາດຮູ້ສຶກວ່າຍາກທີ່ຈະເຮັດຕາມການຊີ້ນຳຂອງພະເຢໂຫວາໂດຍສະເພາະຖ້າເຮົາໄດ້ຮັບຄຳແນະນຳຈາກມະນຸດທີ່ບໍ່ສົມບູນແບບ. ຍ້ອນຫຍັງ? ຍ້ອນເຮົາອາດບໍ່ມັກຄຳແນະນຳນັ້ນຫຼືເຮົາອາດຮູ້ສຶກວ່າຄຳແນະນຳນັ້ນໃຊ້ບໍ່ໄດ້ ແລະຄິດເອົາເອງວ່າຄຳແນະນຳນັ້ນບໍ່ໄດ້ມາຈາກພະເຢໂຫວາ. ຕອນທີ່ເຮົາຮູ້ສຶກແບບນັ້ນ ເຮົາແຮ່ງຕ້ອງເຮັດໃຫ້ໂຕເອງໝັ້ນໃຈວ່າພະເຢໂຫວາກຳລັງຊີ້ນຳປະຊາຊົນຂອງເພິ່ນ ແລະການເຮັດຕາມການຊີ້ນຳຂອງເພິ່ນຈະເຮັດໃຫ້ເຮົາໄດ້ຮັບປະໂຫຍດສະເໝີ. ເພື່ອຊ່ວຍເຮົາໃຫ້ໝັ້ນໃຈຫຼາຍຂຶ້ນ ໃນບົດຄວາມນີ້ເຮົາຈະຮຽນ 3 ຈຸດຄື: (1) ພະເຢໂຫວາຊີ້ນຳປະຊາຊົນຂອງເພິ່ນແນວໃດໃນສະໄໝທີ່ຂຽນຄຳພີໄບເບິນ? (2) ເພິ່ນກຳລັງຊີ້ນຳເຮົາແນວໃດໃນທຸກມື້ນີ້? ແລະ (3) ເຮົາຈະໄດ້ຮັບປະໂຫຍດຫຍັງຖ້າເຮົາເຮັດຕາມການຊີ້ນຳຂອງເພິ່ນຕໍ່ໆໄປ?
ຕັ້ງແຕ່ອະດີດຈົນຮອດປັດຈຸບັນ ພະເຢໂຫວາໃຊ້ມະນຸດໃຫ້ເປັນຕົວແທນຂອງເພິ່ນເພື່ອຊີ້ນຳປະຊາຊົນຂອງເພິ່ນ (ເບິ່ງຂໍ້ 3)
ພະເຢໂຫວາຊີ້ນຳພວກອິດສະຣາເອນແນວໃດ?
4-5. ພະເຢໂຫວາເຮັດໃຫ້ເຫັນແນວໃດວ່າເພິ່ນກຳລັງໃຊ້ໂມເຊໃຫ້ຊີ້ນຳພວກອິດສະຣາເອນ? (ເບິ່ງຮູບ)
4 ພະເຢໂຫວາແຕ່ງຕັ້ງໂມເຊໃຫ້ພາພວກອິດສະຣາເອນອອກຈາກເອຢິບ ແລະເພິ່ນໃຫ້ເຂົາເຈົ້າເຫັນຫຼັກຖານທີ່ຊັດເຈນວ່າເພິ່ນກຳລັງໃຊ້ໂມເຊໃຫ້ຊີ້ນຳເຂົາເຈົ້າ. ຕົວຢ່າງເຊັ່ນ: ເພິ່ນໃຫ້ມີເສົາຂີ້ເຝື້ອນຳທາງເຂົາເຈົ້າໃນຕອນກາງເວັນ ແລະເມື່ອຮອດຕອນກາງຄືນເສົານັ້ນກໍກາຍເປັນເສົາໄຟເພື່ອໃຫ້ແສງສະຫວ່າງກັບເຂົາເຈົ້າ. (ອພຍ. 13:21) ໂມເຊພາພວກອິດສະຣາເອນນຳເສົານັ້ນໄປຈົນຮອດທະເລແດງ. ພວກອິດສະຣາເອນຢ້ານຫຼາຍ ຍ້ອນວ່າທາງໜ້າເຂົາເຈົ້າແມ່ນທະເລແດງ ແລະຢູ່ທາງຫຼັງເຂົາເຈົ້າແມ່ນກອງທັບເອຢິບທີ່ກຳລັງໄລ່ນຳມາ. ເຂົາເຈົ້າຄິດວ່າໂມເຊກຳລັງພາເຂົາເຈົ້າໄປຜິດທາງ ແຕ່ວ່າບໍ່ແມ່ນແບບນັ້ນ. ພະເຢໂຫວາຕັ້ງໃຈໃຫ້ໂມເຊພາເຂົາເຈົ້າໄປຫັ້ນ. (ອພຍ. 14:2) ແລ້ວເພິ່ນກໍເຮັດການອັດສະຈັນເພື່ອຊ່ວຍເຂົາເຈົ້າໃຫ້ລອດ.—ອພຍ. 14:26-28
ໂມເຊເພິ່ງເສົາຂີ້ເຝື້ອເພື່ອນຳທາງປະຊາຊົນຂອງພະເຈົ້າຜ່ານບ່ອນກັນດານ (ເບິ່ງຂໍ້ 4-5)
5 ຕະຫຼອດ 40 ປີຕໍ່ມາ ໂມເຊຍັງໝັ້ນໃຈຢູ່ສະເໝີວ່າພະເຢໂຫວາໃຊ້ເສົາຂີ້ເຝື້ອເພື່ອນຳທາງພວກອິດສະຣາເອນຜ່ານບ່ອນກັນດານ. a ມີໄລຍະໜຶ່ງພະເຢໂຫວາໃຫ້ເສົາຂີ້ເຝື້ອລອຍຢູ່ເທິງເຕັ້ນຂອງໂມເຊເຊິ່ງພວກອິດສະຣາເອນທຸກຄົນແນມເຫັນໄດ້. (ອພຍ. 33:7, 9, 10) ພະເຢໂຫວາເວົ້າກັບໂມເຊຈາກເສົາຂີ້ເຝື້ອ ແລ້ວໂມເຊກໍເອົາສິ່ງທີ່ພະເຢໂຫວາເວົ້າໄປບອກພວກອິດສະຣາເອນ. (ພສ. 99:7) ດັ່ງນັ້ນ ພວກອິດສະຣາເອນເຫັນຫຼັກຖານຊັດເຈນວ່າພະເຢໂຫວາໃຊ້ໂມເຊໃຫ້ຊີ້ນຳເຂົາເຈົ້າ.
ໂມເຊກັບໂຢຊວຍຜູ້ສືບຕຳແໜ່ງຕໍ່ຈາກລາວ (ເບິ່ງຂໍ້ 5, 7)
6. ພວກອິດສະຣາເອນຕອບຮັບແນວໃດຕໍ່ການຊີ້ນຳຂອງພະເຢໂຫວາ? (ຈົດເຊັນບັນຊີ 14:2, 10, 11)
6 ເປັນຕາໜ້າເສຍດາຍທີ່ພວກອິດສະຣາເອນສ່ວນຫຼາຍບໍ່ສົນໃຈຫຼັກຖານຕ່າງໆທີ່ເຫັນແຈ້ງວ່າໂມເຊເປັນຕົວແທນຂອງພະເຢໂຫວາ. (ອ່ານຈົດເຊັນບັນຊີ 14:2, 10, 11) ມີຫຼາຍເທື່ອທີ່ເຂົາເຈົ້າບໍ່ຍອມຮັບວ່າໂມເຊເປັນຜູ້ທີ່ພະເຢໂຫວາໃຊ້ໃຫ້ຊີ້ນຳເຂົາເຈົ້າ. ຜົນກໍຄື ຄົນອິດສະຣາເອນລຸ້ນນັ້ນບໍ່ໄດ້ເຂົ້າໄປໃນແຜ່ນດິນທີ່ພະເຈົ້າສັນຍາໄວ້.—ຈຊບ. 14:30
7. ມີຕົວຢ່າງຂອງໃຜແດ່ທີ່ເຮັດຕາມການຊີ້ນຳຂອງພະເຢໂຫວາ? (ຈົດເຊັນບັນຊີ 14:24) (ເບິ່ງຮູບ)
7 ແຕ່ກໍມີຄົນອິດສະຣາເອນບາງຄົນເຮັດຕາມການຊີ້ນຳຂອງພະເຢໂຫວາ. ຕົວຢ່າງເຊັ່ນ: ພະເຢໂຫວາບອກວ່າ: “ກາເລັບ . . . ເຊື່ອຟັງເຮົາສຸດຫົວໃຈ.” (ອ່ານຈົດເຊັນບັນຊີ 14:24) ພະເຢໂຫວາໃຫ້ລາງວັນກາເລັບ ແລະເຖິງຂັ້ນໃຫ້ລາວເລືອກວ່າລາວຢາກຢູ່ບ່ອນໃດໃນແຜ່ນດິນທີ່ເພິ່ນສັນຍາໄວ້. (ຢຊ. 14:12-14) ຄົນອິດສະຣາເອນລຸ້ນຕໍ່ມາທີ່ໄດ້ເຂົ້າໄປໃນແຜ່ນດິນທີ່ພະເຈົ້າສັນຍາໄວ້ກໍເປັນຕົວຢ່າງທີ່ດີໃນການເຮັດຕາມການຊີ້ນຳຂອງພະເຢໂຫວາ. ຫຼັງຈາກທີ່ໂຢຊວຍເປັນຜູ້ນຳພວກອິດສະຣາເອນຕໍ່ຈາກໂມເຊ ຄົນອິດສະຣາເອນລຸ້ນນີ້ “ນັບຖືໂຢຊວຍຫຼາຍຕະຫຼອດຊີວິດຂອງລາວ.” (ຢຊ. 4:14) ຍ້ອນແນວນີ້ ພະເຢໂຫວາຈຶ່ງອວຍພອນເຂົາເຈົ້າແລະພາເຂົາເຈົ້າເຂົ້າໄປໃນແຜ່ນດິນທີ່ເພິ່ນສັນຍາໄວ້.—ຢຊ. 21:43, 44
8. ໃນສະໄໝທີ່ກະສັດປົກຄອງ ພະເຢໂຫວາຊີ້ນຳປະຊາຊົນຂອງເພິ່ນແນວໃດ? (ເບິ່ງຮູບ)
8 ຫຼາຍປີຕໍ່ມາ ພະເຢໂຫວາໄດ້ແຕ່ງຕັ້ງພວກຜູ້ຕັດສິນໃຫ້ຊີ້ນຳປະຊາຊົນຂອງເພິ່ນ. ຫຼັງຈາກນັ້ນ ໃນສະໄໝທີ່ມີກະສັດປົກຄອງ ພະເຢໂຫວາໄດ້ແຕ່ງຕັ້ງພວກຜູ້ພະຍາກອນໃຫ້ຊີ້ນຳປະຊາຊົນຂອງເພິ່ນ. ກະສັດທີ່ສັດຊື່ໄດ້ເຮັດຕາມຄຳແນະນຳຂອງຜູ້ພະຍາກອນ ເຊັ່ນ: ກະສັດດາວິດຍອມຮັບຢ່າງຖ່ອມໃຈຕໍ່ການສັ່ງສອນຈາກຜູ້ພະຍາກອນນາທານ. (2ຊມ. 12:7, 13; 1ຂຄ. 17:3, 4) ກະສັດເຢໂຮຊາຟັດເຮັດຕາມຄຳແນະນຳຂອງຜູ້ພະຍາກອນຢາຮາຊີເອນແລະສະໜັບສະໜູນປະຊາຊົນໃນຢູດາໃຫ້ “ເຊື່ອໃນຜູ້ພະຍາກອນຂອງພະເຈົ້າ.” (2ຂຄ. 20:14, 15, 20) ຕອນທີ່ກະສັດເຮເຊກີຢາຢູ່ໃນສະຖານະການທີ່ຫຍຸ້ງຍາກລຳບາກ ລາວຂໍຄວາມຊ່ວຍເຫຼືອຈາກຜູ້ພະຍາກອນເອຊາຢາ. (ອຊຢ. 37:1-6) ທຸກເທື່ອທີ່ກະສັດຂອງອິດສະຣາເອນເຮັດຕາມການຊີ້ນຳຂອງພະເຢໂຫວາ ເພິ່ນກໍອວຍພອນແລະປົກປ້ອງປະຊາຊົນຂອງເພິ່ນ. (2ຂຄ. 20:29, 30; 32:22) ທຸກຄົນຄວນເຫັນຢ່າງຊັດເຈນວ່າພະເຢໂຫວາກຳລັງໃຊ້ຜູ້ພະຍາກອນໃຫ້ຊີ້ນຳປະຊາຊົນຂອງເພິ່ນ. ແຕ່ກະສັດຫຼາຍອົງແລະປະຊາຊົນສ່ວນຫຼາຍບໍ່ເຊື່ອຟັງຜູ້ພະຍາກອນຂອງພະເຢໂຫວາ.—ຢຣມ. 35:12-15
ກະສັດເຮເຊກີຢາກັບຜູ້ພະຍາກອນເອຊາຢາ (ເບິ່ງຂໍ້ 8)
ພະເຢໂຫວາຊີ້ນຳຄລິດສະຕຽນໃນສະຕະວັດທຳອິດແນວໃດ?
9. ພະເຢໂຫວາໃຊ້ໃຜໃຫ້ຊີ້ນຳຄລິດສະຕຽນໃນສະຕະວັດທຳອິດ? (ເບິ່ງຮູບ)
9 ຫຼັງຈາກພະເຢຊູຕາຍ ພະເຢໂຫວາໄດ້ຕັ້ງປະຊາຄົມຄລິດສະຕຽນຂຶ້ນ. ເພິ່ນຊີ້ນຳຄລິດສະຕຽນໃນສະຕະວັດທຳອິດແນວໃດ? ເພິ່ນແຕ່ງຕັ້ງພະເຢຊູໃຫ້ເປັນຜູ້ນຳປະຊາຄົມ. (ອຟຊ. 5:23) ພະເຢຊູບໍ່ໄດ້ມາບອກລູກສິດແຕ່ລະຄົນວ່າຕ້ອງເຮັດແນວໃດ ແຕ່ເພິ່ນໃຊ້ອັກຄະສາວົກແລະພວກຜູ້ເບິ່ງແຍງໃນເມືອງເຢຣູຊາເລັມໃຫ້ຊີ້ນຳເຂົາເຈົ້າ. (ກຈກ. 15:1, 2) ນອກຈາກນັ້ນ ພະເຢຊູຍັງແຕ່ງຕັ້ງຜູ້ເບິ່ງແຍງເພື່ອຊີ້ນຳປະຊາຄົມຕ່າງໆ.—1ທຊ. 5:12; ຕຕ. 1:5
ອັກຄະສາວົກກັບພວກຜູ້ເບິ່ງແຍງໃນເມືອງເຢຣູຊາເລັມ (ເບິ່ງຂໍ້ 9)
10. (ກ) ຄລິດສະຕຽນສ່ວນຫຼາຍໃນຕອນນັ້ນຍອມຮັບການຊີ້ນຳບໍ? (ກິດຈະການ 15:30, 31) (ຂ) ເປັນຫຍັງບາງຄົນໃນສະໄໝທີ່ຂຽນຄຳພີໄບເບິນຈຶ່ງບໍ່ຍອມຮັບຄົນທີ່ເປັນຕົວແທນຂອງພະເຢໂຫວາ? (ເບິ່ງຂອບ “ ເປັນຫຍັງບາງຄົນຈຶ່ງບໍ່ຍອມຮັບຫຼັກຖານທີ່ເຫັນໄດ້ຢ່າງຊັດເຈນ”)
10 ຄລິດສະຕຽນໃນຕອນນັ້ນຍອມຮັບການຊີ້ນຳຈາກພະເຢໂຫວາບໍ? ເຂົາເຈົ້າສ່ວນຫຼາຍເຕັມໃຈເຮັດຕາມການຊີ້ນຳນັ້ນ. ຄຳພີໄບເບິນບອກວ່າ ເມື່ອເຂົາເຈົ້າໄດ້ອ່ານຈົດໝາຍຈາກພວກອັກຄະສາວົກ ເຂົາເຈົ້າ “ກໍດີໃຈຫຼາຍແລະມີກຳລັງໃຈ.” (ອ່ານກິດຈະການ 15:30, 31) ໃນສະໄໝຂອງເຮົາ ພະເຢໂຫວາຊີ້ນຳປະຊາຊົນຂອງເພິ່ນແນວໃດ?
ພະເຢໂຫວາຊີ້ນຳເຮົາແນວໃດໃນທຸກມື້ນີ້?
11. ພະເຢໂຫວາໄດ້ຊີ້ນຳປະຊາຊົນຂອງເພິ່ນແນວໃດໃນທຸກມື້ນີ້? ຂໍໃຫ້ຍົກຕົວຢ່າງ.
11 ພະເຢໂຫວາຍັງຊີ້ນຳປະຊາຊົນຂອງເພິ່ນໃນທຸກມື້ນີ້ໂດຍທາງຄຳພີໄບເບິນແລະພະເຢຊູລູກຊາຍຂອງເພິ່ນທີ່ເປັນຜູ້ນຳປະຊາຄົມ. ເຮົາເຫັນຫຼັກຖານບໍວ່າພະເຢໂຫວາກຳລັງໃຊ້ມະນຸດທີ່ເປັນຕົວແທນຂອງເພິ່ນ? ເຫັນແທ້. ຕົວຢ່າງເຊັ່ນ: ໃຫ້ຄິດເຖິງສິ່ງທີ່ເກີດຂຶ້ນຫຼັງຈາກປີ 1870 ຊາລ ເທດ ຣັດເຊວກັບພວກໝູ່ຂອງລາວໄດ້ເຫັນວ່າປີ 1914 ຈະເປັນປີທີ່ສຳຄັນ ຍ້ອນພະເຈົ້າຈະຕັ້ງການປົກຄອງຂອງເພິ່ນຂຶ້ນໃນສະຫວັນ. (ດນອ. 4:25, 26) ເຂົາເຈົ້າໝັ້ນໃຈແບບນັ້ນຍ້ອນໄດ້ສຶກສາຄົ້ນຄວ້າຄຳພະຍາກອນຕ່າງໆໃນຄຳພີໄບເບິນ. ພະເຢໂຫວາຊີ້ນຳການຄົ້ນຄວ້າຂອງເຂົາເຈົ້າໃນເລື່ອງນີ້ບໍ? ເພິ່ນໄດ້ຊີ້ນຳແທ້. ໃນປີ 1914 ເຫດການຕ່າງໆໃນໂລກຢືນຢັນວ່າການປົກຄອງຂອງພະເຈົ້າເລີ່ມປົກຄອງແລ້ວ. ສົງຄາມໂລກຄັ້ງທີ 1 ໄດ້ເກີດຂຶ້ນ ແລະມີໂລກລະບາດ ມີແຜ່ນດິນໄຫວໃຫຍ່ຢູ່ບ່ອນຕ່າງໆແລະມີຄວາມອຶດຢາກ. (ລກ. 21:10, 11) ເຫັນໄດ້ແຈ້ງວ່າພະເຢໂຫວາໃຊ້ຄົນເຫຼົ່ານີ້ໃຫ້ຊ່ວຍປະຊາຊົນຂອງເພິ່ນ.
12-13. ໃນໄລຍະສົງຄາມໂລກຄັ້ງທີ 2 ມີການຈັດກຽມຫຍັງແດ່ເພື່ອຊ່ວຍໃຫ້ການປະກາດແລະການສອນເພີ່ມຂຶ້ນ?
12 ພີ່ນ້ອງທີ່ນຳໜ້າໃນອົງການຂອງພະເຢໂຫວາໄດ້ສຶກສາຄົ້ນຄວ້າພະນິມິດ 17:8. ຈາກການຄົ້ນຄວ້ານັ້ນເຂົາເຈົ້າເຂົ້າໃຈວ່າສົງຄາມໂລກຄັ້ງທີ 2 ຈະບໍ່ໄດ້ນຳໄປສູ່ສົງຄາມອາມາເຄໂດນ ແຕ່ເຂົາເຈົ້າຮູ້ວ່າຈະມີໄລຍະເວລາທີ່ສະຫງົບສຸກຫຼັງຈາກສົງຄາມນັ້ນເຊິ່ງພະຍານພະເຢໂຫວາຈະປະກາດໄດ້ຫຼາຍຂຶ້ນ. ເຖິງຈະເບິ່ງຄືວ່າເປັນເລື່ອງແປກໃນຕອນນັ້ນ ແຕ່ອົງການຂອງພະເຢໂຫວາໄດ້ຕັ້ງໂຮງຮຽນກິລຽດຂຶ້ນເພື່ອຝຶກມິດຊັນນາຣີໃຫ້ໄປປະກາດແລະສອນຢູ່ປະເທດຕ່າງໆ. ມິດຊັນນາຣີເຫຼົ່ານີ້ຖືກສົ່ງໄປແມ່ນແຕ່ໃນໄລຍະທີ່ມີສົງຄາມ. ນອກຈາກນັ້ນ ທາດທີ່ສັດຊື່ແລະສຸຂຸມຍັງໄດ້ຈັດຫຼັກສູດການຮັບໃຊ້ຕາມລະບອບຂອງພະເຈົ້າ bໃນທຸກປະຊາຄົມເພື່ອຊ່ວຍຜູ້ປະກາດທຸກຄົນໃຫ້ປະກາດແລະສອນໄດ້ດີຂຶ້ນ. ໂດຍວິທີນີ້ ພະເຢໂຫວາກຽມປະຊາຊົນຂອງເພິ່ນໄວ້ສຳລັບເຮັດວຽກປະກາດໃນອະນາຄົດ.
13 ເມື່ອຄິດຄືນຫຼັງ ເຮົາເຫັນແຈ້ງວ່າພະເຢໂຫວາຊີ້ນຳປະຊາຊົນຂອງເພິ່ນໃນໄລຍະເວລາທີ່ຍາກລຳບາກ. ນັບຕັ້ງແຕ່ສົງຄາມໂລກຄັ້ງທີ 2 ເປັນຕົ້ນມາ ປະຊາຊົນຂອງພະເຢໂຫວາໃນຫຼາຍປະເທດມີອິດສະຫຼະໃນການປະກາດຂ່າວດີເຊິ່ງເຮັດໃຫ້ຫຼາຍຄົນໄດ້ຮູ້ຈັກພະເຢໂຫວາ. ຕອນນີ້ວຽກປະກາດກຳລັງຂະຫຍາຍໄປທົ່ວໂລກ.
14. ເປັນຫຍັງເຮົາຈຶ່ງໝັ້ນໃຈຄຳແນະນຳທີ່ມາຈາກອົງການຂອງພະເຢໂຫວາແລະຈາກຜູ້ເບິ່ງແຍງທີ່ຖືກແຕ່ງຕັ້ງ? (ພະນິມິດ 2:1) (ເບິ່ງຮູບ)
14 ໃນທຸກມື້ນີ້ ຄະນະກຳມະການປົກຄອງຍັງເຮັດຕາມການຊີ້ນຳຂອງພະເຢຊູສະເໝີ. ເຂົາເຈົ້າຢາກໃຫ້ຄຳແນະນຳພີ່ນ້ອງໃນແບບທີ່ສອດຄ່ອງກັບຄວາມຕ້ອງການຂອງພະເຢໂຫວາແລະພະເຢຊູແທ້ໆ. ເຂົາເຈົ້າໃຫ້ຄຳແນະນຳພີ່ນ້ອງໂດຍຜ່ານທາງຜູ້ເບິ່ງແຍງໝວດແລະຜູ້ເບິ່ງແຍງໃນປະຊາຄົມ. c ຄຳພີໄບເບິນບອກວ່າຜູ້ເບິ່ງແຍງທີ່ເປັນຜູ້ຖືກເລືອກແລະຜູ້ເບິ່ງແຍງທັງໝົດໃນປະຊາຄົມຕ່າງໆຢູ່ “ໃນມືເບື້ອງຂວາ” ຂອງພະຄລິດ. (ອ່ານພະນິມິດ 2:1) ເຖິງຈະເປັນແນວນັ້ນ ຜູ້ເບິ່ງແຍງທຸກຄົນກໍເປັນຄົນບໍ່ສົມບູນແບບ ເຂົາເຈົ້າເຮັດຜິດພາດໄດ້. ແມ່ນແຕ່ໂມເຊ ໂຢຊວຍ ແລະພວກອັກຄະສາວົກກໍເຮັດຜິດພາດເປັນບາງເທື່ອ. (ຈຊບ. 20:12; ຢຊ. 9:14, 15; ຣມ. 3:23) ແຕ່ເຮົາເຫັນແຈ້ງວ່າພະເຢຊູກຳລັງຊີ້ນຳທາດທີ່ສັດຊື່ແລະສຸຂຸມແລະຜູ້ເບິ່ງແຍງທຸກຄົນທີ່ຖືກແຕ່ງຕັ້ງ ແລະເພິ່ນຈະເຮັດແບບນັ້ນ “ສະເໝີຈົນຮອດສະໄໝສຸດທ້າຍຂອງໂລກນີ້.” (ມທ. 28:20) ດັ່ງນັ້ນ ເຮົາຈຶ່ງໝັ້ນໃຈໃນການຊີ້ນຳຂອງພະເຢຊູທີ່ໃຫ້ຜ່ານທາງພີ່ນ້ອງເຫຼົ່ານີ້ທີ່ຖືກແຕ່ງຕັ້ງ.
ຄະນະກຳມະການປົກຄອງໃນປັດຈຸບັນ (ເບິ່ງຂໍ້ 14)
ເຮົາໄດ້ຮັບປະໂຫຍດເມື່ອເຮັດຕາມການຊີ້ນຳຂອງພະເຢໂຫວາຕໍ່ໆໄປ
15-16. ເຈົ້າໄດ້ຮຽນຫຍັງຈາກປະສົບການຂອງຄົນທີ່ເຮັດຕາມການຊີ້ນຳຂອງພະເຢໂຫວາ?
15 ເມື່ອເຮົາເຮັດຕາມການຊີ້ນຳຂອງພະເຢໂຫວາຕໍ່ໆໄປ ເຮົາຈະໄດ້ຮັບປະໂຫຍດຕັ້ງແຕ່ຕອນນີ້. ໃຫ້ເຮົາເບິ່ງຕົວຢ່າງຂອງພີ່ນ້ອງແອນດີ້ກັບຣູບິ້ນທີ່ເຮັດຕາມຄຳແນະນຳທີ່ໃຫ້ໃຊ້ຊີວິດແບບຮຽບງ່າຍ. (ຮຣ. 13:5) ຜົນກໍຄື ເຂົາເຈົ້າມີໂອກາດໄດ້ເປັນອາສາສະໝັກຊ່ວຍໃນໂຄງການກໍ່ສ້າງຂອງອົງການ. ຣູບິ້ນເວົ້າວ່າ: “ເຮົາຕ້ອງຢູ່ໃນຫ້ອງນ້ອຍໆແລະບ່ອນທີ່ເຮົາຢູ່ບາງເທື່ອກໍບໍ່ມີເຮືອນຄົວ. ຂ້ອຍຕ້ອງໄດ້ຂາຍອຸປະກອນຖ່າຍຮູບທັງໝົດເຖິງວ່າຂ້ອຍມັກຖ່າຍຮູບຫຼາຍ. ຂ້ອຍຈົນໄຫ້ຕອນທີ່ຂາຍມັນ. ແຕ່ຂ້ອຍຢາກເປັນຄືກັບຊາຣາເມຍຂອງອັບຣາຮາມທີ່ຕັ້ງໃຈຈະເບິ່ງໄປທາງໜ້າບໍ່ຄິດເຖິງແຕ່ອະດີດ.” (ຮຣ. 11:15) ຜົວເມຍຄູ່ນີ້ໄດ້ຮັບປະໂຫຍດແນວໃດຈາກການຕັດສິນໃຈແບບນີ້? ຣູບິ້ນເວົ້າວ່າ: “ເຮົາມີຄວາມສຸກຫຼາຍທີ່ຮູ້ວ່າເຮົາກຳລັງໃຫ້ທຸກສິ່ງທີ່ເຮົາມີກັບພະເຢໂຫວາ. ຕອນທີ່ເຮົາເຮັດວຽກມອບໝາຍຂອງພະເຢໂຫວາ ເຮົາເຫັນເລີຍວ່າຊີວິດໃນໂລກໃໝ່ຈະເປັນແນວໃດ.” ແອນດີ້ກໍເວົ້າວ່າ: “ເຮົາດີໃຈຫຼາຍທີ່ໄດ້ໃຫ້ທຸກສິ່ງທີ່ເຮົາມີເພື່ອສະໜັບສະໜູນການປົກຄອງຂອງພະເຈົ້າ.”
16 ເຮົາຈະໄດ້ຮັບປະໂຫຍດຫຍັງອີກເມື່ອເຮັດຕາມການຊີ້ນຳຂອງພະເຢໂຫວາຕໍ່ໆໄປ? ຫຼັງຈາກມາເຊຍຮຽນຈົບມັດທະຍົມຕອນປາຍ ລາວຢາກເຮັດຕາມຄຳແນະນຳທີ່ໃຫ້ເອົາວຽກຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ. (ມທ. 6:33; ຣມ. 12:11) ລາວເວົ້າວ່າ: “ຂ້ອຍໄດ້ທຶນຮຽນຟຣີ 4 ປີຈາກມະຫາວິທະຍາໄລ ແຕ່ຂ້ອຍຢາກເຮັດຕາມເປົ້າໝາຍທີ່ຈະເຮັດວຽກຮັບໃຊ້ໃຫ້ຫຼາຍຂຶ້ນ ຂ້ອຍຈຶ່ງເລືອກຮຽນຢູ່ໂຮງຮຽນສອນວິຊາຊີບເພື່ອຈະມີວຽກເຮັດຕອນເປັນໄພໂອເນຍ. ການເຮັດແບບນີ້ເປັນການຕັດສິນໃຈທີ່ດີທີ່ສຸດຢ່າງໜຶ່ງໃນຊີວິດຂອງຂ້ອຍ. ຕອນນີ້ ຂ້ອຍມີຄວາມສຸກທີ່ໄດ້ເປັນໄພໂອເນຍປະຈຳ. ຍ້ອນຂ້ອຍສາມາດປັບປ່ຽນຕາຕະລາງເຮັດວຽກ ຂ້ອຍຈຶ່ງໄປຊ່ວຍວຽກເບເທນແບບໄປກັບໄດ້ ແລະຍັງຊ່ວຍວຽກອື່ນໆຂອງອົງການໄດ້ນຳອີກ.”
17. ເຮົາຈະໄດ້ຮັບປະໂຫຍດຫຍັງອີກຈາກການເຮັດຕາມການຊີ້ນຳຂອງພະເຢໂຫວາຕໍ່ໆໄປ? (ເອຊາຢາ 48:17, 18)
17 ບາງເທື່ອເຮົາໄດ້ຮັບຄຳແນະນຳທີ່ຊ່ວຍປົກປ້ອງເຮົາເຊັ່ນ ບໍ່ໃຫ້ເປັນຄົນຮັກເງິນຫຼືບໍ່ເຮັດບາງຢ່າງທີ່ຈະເຮັດໃຫ້ເຮົາເຮັດຜິດກົດໝາຍຂອງພະເຈົ້າ. ເຮົາຈະໄດ້ຮັບປະໂຫຍດຈາກຄຳແນະນຳເຫຼົ່ານີ້ຖ້າເຮົາເຮັດຕາມແທ້ໆ. ເຮົາຈະບໍ່ເຄັ່ງຕຶງ ບໍ່ມີຫຍັງລົບກວນໃຈ ແລະສາມາດຫຼີກລ່ຽງບັນຫາຫຼາຍຢ່າງໄດ້. (1ຕມ 6:9, 10) ຜົນກໍຄື ເຮົາຈະຮັບໃຊ້ພະເຢໂຫວາໄດ້ຢ່າງເຕັມທີເຊິ່ງຈະເຮັດໃຫ້ເຮົາມີຄວາມສຸກແລະສະຫງົບໃຈແທ້ໆ.—ອ່ານເອຊາຢາ 48:17, 18
18. ເປັນຫຍັງເຈົ້າຈຶ່ງຕັ້ງໃຈທີ່ຈະເຮັດຕາມການຊີ້ນຳຂອງພະເຢໂຫວາຕໍ່ໆໄປ?
18 ເຮົາໝັ້ນໃຈວ່າພະເຢໂຫວາຍັງຈະໃຊ້ມະນຸດໃຫ້ເປັນຕົວແທນຂອງເພິ່ນເພື່ອຊີ້ນຳປະຊາຊົນຂອງເພິ່ນໃນໄລຍະຄວາມທຸກລຳບາກຄັ້ງໃຫຍ່ໄປຈົນຮອດສະໄໝ 1.000 ປີ. (ພສ. 45:16) ຕອນນັ້ນ ເຮົາຈະເຮັດຕາມການຊີ້ນຳຂອງພະເຢໂຫວາຢູ່ບໍເຖິງວ່າເຮົາອາດບໍ່ມັກ? ຖ້າເຮົາຝຶກຕັ້ງແຕ່ຕອນນີ້ ມັນກໍງ່າຍທີ່ເຮົາຈະເຮັດຕາມການຊີ້ນຳຂອງເພິ່ນໃນອະນາຄົດ. ດັ່ງນັ້ນ ໃຫ້ເຮົາເຮັດຕາມການຊີ້ນຳຂອງພະເຢໂຫວາສະເໝີເຊິ່ງລວມເຖິງການເຊື່ອຟັງພີ່ນ້ອງຊາຍທີ່ຖືກແຕ່ງຕັ້ງໃຫ້ນຳໜ້າແລະເບິ່ງແຍງເຮົາ. (ອຊຢ. 32:1, 2; ຮຣ. 13:17) ເຮົາໝັ້ນໃຈພະເຢໂຫວາໄດ້ຮ້ອຍເປີເຊັນ. ເພິ່ນເປັນຜູ້ນຳທາງທີ່ດີທີ່ສຸດຂອງເຮົາເຊິ່ງຊ່ວຍເຮົາໃຫ້ພົ້ນຈາກອັນຕະລາຍທີ່ທຳລາຍສາຍສຳພັນຂອງເຮົາກັບເພິ່ນ ແລະເພິ່ນຍັງຊ່ວຍເຮົາໃຫ້ໄປເຖິງຈຸດໝາຍປາຍທາງ ນັ້ນກໍຄືຊີວິດຕະຫຼອດໄປໃນໂລກໃໝ່.
ເຈົ້າຈະຕອບແນວໃດ?
-
ພະເຢໂຫວາຊີ້ນຳພວກອິດສະຣາເອນແນວໃດ?
-
ພະເຢໂຫວາຊີ້ນຳຄລິດສະຕຽນໃນສະຕະວັດທຳອິດແນວໃດ?
-
ໃນທຸກມື້ນີ້ ເຮົາໄດ້ຮັບປະໂຫຍດແນວໃດຈາກການເຮັດຕາມການຊີ້ນຳຂອງພະເຢໂຫວາ?
ເພງທີ 48 ໃຊ້ຊີວິດຕາມແນວທາງຂອງພະເຢໂຫວາທຸກວັນ
a ພະເຢໂຫວາຍັງແຕ່ງຕັ້ງທູດສະຫວັນອົງໜຶ່ງໃຫ້ນຳໜ້າພວກອິດສະຣາເອນເພື່ອພາເຂົາເຈົ້າເຂົ້າໄປໃນແຜ່ນດິນທີ່ເພິ່ນສັນຍາໄວ້. ທູດສະຫວັນອົງນັ້ນແມ່ນມີຄາເອນຫຼືພະເຢຊູກ່ອນທີ່ເພິ່ນຈະມາເປັນມະນຸດຢູ່ໂລກນີ້.—ອພຍ. 14:19; 32:34
b ຕໍ່ມາແມ່ນໂຮງຮຽນການຮັບໃຊ້ຕາມລະບອບຂອງພະເຈົ້າເຊິ່ງປັດຈຸບັນນີ້ເປັນສ່ວນໜຶ່ງຂອງການປະຊຸມກາງອາທິດ.
c ເບິ່ງຂອບ “ໜ້າທີ່ຮັບຜິດຊອບຂອງຄະນະກຳມະການປົກຄອງ” ໃນຫໍສັງເກດການເດືອນກຸມພາ 2021 ໜ້າ 18.
