ຄຳຖາມຈາກຜູ້ອ່ານ
ພະເຢຊູເປັນມະຫາປະໂລຫິດເມື່ອໃດ ແລະຄຳສັນຍາໃໝ່ມີຜົນບັງຄັບໃຊ້ເມື່ອໃດ?
ພະເຢຊູເປັນມະຫາປະໂລຫິດຕອນທີ່ເພິ່ນຮັບບັບເຕມາໃນປີ ຄ.ສ 29. ເຮົາຮູ້ເລື່ອງນີ້ໄດ້ແນວໃດ? ຕອນທີ່ພະເຢຊູຮັບບັບເຕມາເພິ່ນໄດ້ຖວາຍຕົວເອງເທິງແທ່ນບູຊາໂດຍໄນເຊິ່ງໝາຍເຖິງ “ຄວາມຕ້ອງການ” ຂອງພະເຈົ້າ. (ຄລຕ. 1:4; ຮຣ. 10:5-10) ແທ່ນບູຊາເປັນສ່ວນທີ່ສຳຄັນຂອງວິຫານ ວິຫານໂດຍໄນກໍມີຕັ້ງແຕ່ຕອນພະເຢຊູຮັບບັບເຕມາ. ເຊິ່ງວິຫານໂດຍໄນໝາຍເຖິງທຸກສິ່ງທີ່ເຮົາເຮັດເພື່ອນະມັດສະການພະເຢໂຫວາໃນແບບທີ່ຖືກຕ້ອງໂດຍອາໄສເຄື່ອງບູຊາໄຖ່ຂອງພະເຢຊູ.—ມທ. 3:16, 17; ຮຣ. 5:4-6
ວິຫານໂດຍໄນກໍຕ້ອງມີມະຫາປະໂລຫິດ ດັ່ງນັ້ນພະເຢໂຫວາຈຶ່ງແຕ່ງຕັ້ງພະເຢຊູໃຫ້ເປັນມະຫາປະໂລຫິດດ້ວຍ “ພະລັງບໍລິສຸດແລະລິດເດດ.” (ກຈກ. 10:37, 38; ມຣກ. 1:9-11) ແຕ່ເຮົາຮູ້ໄດ້ແນວໃດວ່າພະເຢຊູຖືກແຕ່ງຕັ້ງໃຫ້ເປັນມະຫາປະໂລຫິດກ່ອນທີ່ເພິ່ນຈະຕາຍແລະຄືນມາຈາກຕາຍ? ຕົວຢ່າງຂອງອາໂຣນແລະຜູ້ທີ່ຈະສືບຕຳແໜ່ງມະຫາປະໂລຫິດຈະຊ່ວຍເຮົາໃຫ້ຮູ້ເລື່ອງນີ້.
ຕາມກົດໝາຍຂອງໂມເຊມີພຽງແຕ່ມະຫາປະໂລຫິດເທົ່ານັ້ນທີ່ຈະສາມາດເຂົ້າໄປໃນຫ້ອງບໍລິສຸດທີ່ສຸດໃນເຕັ້ນສັກສິດ ເຊິ່ງຕໍ່ມາຫ້ອງບໍລິສຸດທີ່ສຸດນັ້ນຢູ່ໃນວິຫານ. ວິຫານນີ້ຈະມີຜ້າກັ້ງຂັ້ນລະຫວ່າງຫ້ອງບໍລິສຸດແລະຫ້ອງບໍລິສຸດທີ່ສຸດເຊິ່ງມະຫາປະໂລຫິດຈະຜ່ານຜ້າກັ້ງເຂົ້າໄປໃນຫ້ອງບໍລິສຸດທີ່ສຸດສະເພາະໃນວັນທີ່ໄຖ່ບາບເທົ່ານັ້ນ. (ຮຣ. 9:1-3, 6, 7) ຄືກັບອາໂຣນແລະຜູ້ທີ່ຈະສືບຕຳແໜ່ງມະຫາປະໂລຫິດຈະຕ້ອງຖືກແຕ່ງຕັ້ງເປັນມະຫາປະໂລຫິດກ່ອນທີ່ເຂົາເຈົ້າຈະສາມາດຜ່ານຜ້າກັ້ງເຂົ້າໄປໃນຫ້ອງບໍລິສຸດທີ່ສຸດໄດ້. ພະເຢຊູກໍຄືກັນ ເພິ່ນຕ້ອງຖືກແຕ່ງຕັ້ງເປັນມະຫາປະໂລຫິດກ່ອນທີ່ເພິ່ນຈະຕາຍແລະສາມາດຜ່ານ “ຜ້າກັ້ງນັ້ນກໍແມ່ນຮ່າງກາຍທີ່ເພິ່ນໄດ້ສະລະ” ເພື່ອຂຶ້ນໄປເທິງສະຫວັນ. (ຮຣ. 10:20) ນີ້ຈຶ່ງເປັນເຫດຜົນທີ່ອັກຄະສາວົກໂປໂລບອກວ່າພະເຢຊູຈະມາ “ໃນຖານະມະຫາປະໂລຫິດ” ເຊິ່ງຈະຜ່ານ “ເຂົ້າໄປໃນເຕັ້ນທີ່ຍິ່ງໃຫຍ່ກວ່າແລະສົມບູນກວ່າເປັນເຕັ້ນທີ່ມະນຸດບໍ່ໄດ້ສ້າງ” ແລະເຂົ້າໄປໃນ “ສະຫວັນ.”—ຮຣ. 9:11, 24
ແລ້ວຄຳສັນຍາໃໝ່ມີຜົນບັງຄັບໃຊ້ຕອນໃດ? ຕອນທີ່ພະເຢຊູຂຶ້ນໄປເທິງສະຫວັນເພິ່ນໄດ້ມອບຊີວິດມະນຸດທີ່ສົມບູນແບບໃຫ້ກັບພະເຢໂຫວາ ເພິ່ນໄດ້ເຮັດຕາມຂັ້ນຕອນເພື່ອເຮັດໃຫ້ຄຳສັນຍາໃໝ່ມີຜົນບັງຄັບໃຊ້. ແລ້ວມີຂັ້ນຕອນຫຍັງແດ່?
ທຳອິດພະເຢຊູໄປຢູ່ຕໍ່ໜ້າພະເຢໂຫວາ ຈາກນັ້ນພະເຢຊູເອົາຄຸນຄ່າຂອງຄ່າໄຖ່ມອບໃຫ້ພະເຢໂຫວາ ແລະສຸດທ້າຍພະເຢໂຫວາກໍຮັບເອົາຄຸນຄ່າຂອງຄ່າໄຖ່ນັ້ນ. ເຖິງວ່າຈະເຮັດຕາມຂັ້ນຕອນເຫຼົ່ານີ້ແລ້ວ ແຕ່ຄຳສັນຍາໃໝ່ມີຜົນບັງຄັບໃຊ້ເລີຍບໍ?
ຄຳພີໄບເບິນບໍ່ໄດ້ບອກເຮົາຢ່າງຈະແຈ້ງວ່າພະເຢໂຫວາຮັບເອົາຄຸນຄ່າຂອງເຄື່ອງບູຊາໄຖ່ພະເຢຊູເມື່ອໃດ ດັ່ງນັ້ນ ເຮົາຈຶ່ງບໍ່ສາມາດບອກໄດ້ວ່າຄຳສັນຍາໃໝ່ມີຜົນບັງຄັບໃຊ້ຕອນໃດ ແຕ່ເຮົາຮູ້ວ່າພະເຢຊູຂຶ້ນໄປເທິງສະຫວັນ 10 ມື້ກ່ອນວັນເພັນເຕກອດ. (ກຈກ. 1:3) ໃນລະຫວ່າງນັ້ນພະເຢຊູໄດ້ເອົາຄຸນຄ່າຂອງຄ່າໄຖ່ມອບໃຫ້ກັບພະເຢໂຫວາ. (ຮຣ. 9:12) ແລະຄຳສັນຍາໃໝ່ມີຜົນບັງຄັບໃຊ້ຍ້ອນເຮົາເຫັນສິ່ງເກີດຂຶ້ນໃນວັນເພັນເຕກອດປີ ຄ.ສ 33. (ກຈກ. 2:1-4, 32, 33) ນີ້ໝາຍຄວາມວ່າຄຳສັນຍາໃໝ່ມີຜົນບັງຄັບໃຊ້ແລ້ວ.
ສະຫຼຸບແລ້ວຄຳສັນຍາໃໝ່ມີຜົນບັງຄັບໃຊ້ຫຼັງຈາກທີ່ພະເຢໂຫວາຮັບເອົາຄຸນຄ່າຂອງຄ່າໄຖ່ຂອງພະເຢຊູ ແລະມີຜູ້ຖືກເຈີມເຂົ້າຮ່ວມໃນສັນຍານັ້ນ. ພະເຢຊູເປັນທັງມະຫາປະໂລຫິດແລະເປັນຄົນກາງໃນຄຳສັນຍາໃໝ່ນີ້.—ຮຣ. 7:25; 8:1-3, 6; 9:13-15
