ບົດຄວາມສຶກສາທີ 44
ສຶກສາຄຳພີໄບເບິນໃຫ້ລະອຽດທຸກດ້ານ
“ເຂົ້າໃຈຄວາມຈິງຄົບທຸກດ້ານ ທັງຄວາມກວ້າງ ຄວາມຍາວ ຄວາມສູງ ແລະຄວາມເລິກ.”—ອຟຊ. 3:18
ເພງ 95 ແສງສະຫວ່າງທີ່ແຮງກ້າຂຶ້ນ
ໃຈຄວາມສຳຄັນ a
1-2. ວິທີທີ່ດີທີ່ສຸດໃນການອ່ານແລະສຶກສາຄຳພີໄບເບິນແມ່ນເຮັດແນວໃດ? ຂໍໃຫ້ຍົກຕົວຢ່າງ.
ສົມມຸດວ່າເຈົ້າຈະຊື້ເຮືອນຫຼັງໜຶ່ງ. ເຈົ້າຈະເຮັດຫຍັງກ່ອນຕັດສິນໃຈຊື້? ເຈົ້າຈະເບິ່ງແຕ່ຮູບຖ່າຍທາງໜ້າເຮືອນແລ້ວກໍພໍບໍ? ເຈົ້າບໍ່ເຮັດແບບນັ້ນດອກ. ເຈົ້າຄືຊິຢາກຍ່າງເບິ່ງອ້ອມເຮືອນ ເຂົ້າໄປເບິ່ງທຸກຫ້ອງ ແລະເບິ່ງທຸກສ່ວນຂອງເຮືອນຢ່າງລະອຽດ. ບາງທີເຈົ້າອາດຈະຂໍເບິ່ງແບບເຮືອນນຳເພື່ອຈະຮູ້ວ່າເຮືອນຫຼັງນັ້ນປຸກແນວໃດ. ເຫັນໄດ້ແຈ້ງວ່າ ເຈົ້າຢາກເຫັນທຸກລາຍລະອຽດຂອງເຮືອນທີ່ເຈົ້າຈະຊື້.
2 ຕອນທີ່ເຮົາອ່ານແລະສຶກສາຄຳພີໄບເບິນ ເຮົາກໍສາມາດເຮັດຄ້າຍໆກັນ. ຜູ້ຊ່ຽວຊານດ້ານຄຳພີໄບເບິນເວົ້າວ່າ: “ຄຳພີໄບເບິນເປັນຄືກັບຕຶກທີ່ໃຫຍ່ໆສູງໆແລະປຸກຢູ່ເທິງຮາກຖານທີ່ເລິກໆ.” ຄັນຊັ້ນ ເຮົາຈະຮູ້ຈັກສິ່ງທີ່ຂຽນໃນຄຳພີໄບເບິນໃຫ້ດີໄດ້ແນວໃດ? ຖ້າເຈົ້າອ່ານຄຳພີໄບເບິນໄວໆເຈົ້າອາດຈະຮຽນຮູ້ແຕ່ຄວາມຈິງພື້ນຖານເທົ່ານັ້ນ ເຊິ່ງເປັນ “ເລື່ອງພື້ນຖານກ່ຽວກັບຄຳສອນຂອງພະເຈົ້າ.” (ຮຣ. 5:12) ຄືກັບທີ່ເຈົ້າຕ້ອງເຂົ້າໄປໃນເຮືອນເພື່ອເບິ່ງວ່າເຮືອນເປັນແນວໃດ ເຈົ້າກໍຕ້ອງສຶກສາຄຳພີໄບເບິນໃຫ້ລະອຽດເພື່ອຈະເຂົ້າໃຈຫຼາຍຂຶ້ນ. ວິທີທີ່ດີທີ່ສຸດໃນການສຶກສາຄຳພີໄບເບິນແມ່ນ ໃຫ້ເບິ່ງວ່າແຕ່ລະຈຸດກ່ຽວຂ້ອງກັນແນວໃດ ໃຫ້ພະຍາຍາມເຂົ້າໃຈສິ່ງທີ່ເຈົ້າເຊື່ອ ແລະເຫດຜົນທີ່ເຈົ້າເຊື່ອແບບນັ້ນ.
3. ອັກຄະສາວົກໂປໂລກະຕຸ້ນພີ່ນ້ອງຮ່ວມຄວາມເຊື່ອໃຫ້ເຮັດຫຍັງ? ແລະຍ້ອນຫຍັງລາວຈຶ່ງເຮັດແບບນັ້ນ? (ເອເຟໂຊ 3:14-19)
3 ເຮົາຕ້ອງສຶກສາຄຳພີໄບເບິນຢ່າງລະອຽດເພື່ອຈະເຂົ້າໃຈຢ່າງເລິກເຊິ່ງ. ອັກຄະສາວົກໂປໂລກະຕຸ້ນພີ່ນ້ອງຮ່ວມຄວາມເຊື່ອໃຫ້ໝັ່ນສຶກສາຄຳພີໄບເບິນເພື່ອເຂົາເຈົ້າຈະ “ເຂົ້າໃຈຄວາມຈິງຄົບທຸກດ້ານ ທັງຄວາມກວ້າງ ຄວາມຍາວ ຄວາມສູງ ແລະຄວາມເລິກ.” ເມື່ອເຮັດແບບນັ້ນ ເຂົາເຈົ້າຈະ “ຕັ້ງໝັ້ນຄົງແລະຍຶດ” ຢູ່ກັບຄວາມເຊື່ອຂອງເຂົາເຈົ້າ. (ອ່ານເອເຟໂຊ 3:14-19) ເຮົາກໍຕ້ອງເຮັດແບບນັ້ນຄືກັນ. ໃຫ້ເຮົາມາເບິ່ງວິທີທີ່ເຮົາຈະສຶກສາຄຳພີໄບເບິນຢ່າງລະອຽດເພື່ອຈະເຂົ້າໃຈຄວາມໝາຍແທ້ໆ.
ສຶກສາຄວາມຈິງທີ່ເລິກເຊິ່ງໃນຄຳພີໄບເບິນ
4. ເຮົາຈະເຮັດແນວໃດເພື່ອຈະໃກ້ຊິດກັບພະເຢໂຫວາຫຼາຍຂຶ້ນ? ຂໍໃຫ້ຍົກຕົວຢ່າງ.
4 ເຮົາບໍ່ຢາກເຂົ້າໃຈແຕ່ຄວາມຮູ້ພື້ນຖານໃນຄຳພີໄບເບິນເທົ່ານັ້ນ ແຕ່ເຮົາຢາກເຂົ້າໃຈ “ສິ່ງທີ່ເລິກເຊິ່ງຂອງພະເຈົ້າ” ນຳ ເຊິ່ງເຮົາເຮັດແບບນັ້ນໄດ້ໂດຍການຊ່ວຍເຫຼືອຈາກພະລັງບໍລິສຸດ. (1ກຣ. 2:9, 10) ໃຫ້ເຈົ້າຕັ້ງເປົ້າໝາຍທີ່ຈະສຶກສາສ່ວນຕົວເພື່ອຈະໃກ້ຊິດກັບພະເຢໂຫວາຫຼາຍຂຶ້ນ. ເຈົ້າອາດຄົ້ນຄວ້າວ່າພະເຢໂຫວາໄດ້ສະແດງຄວາມຮັກຕໍ່ຜູ້ຮັບໃຊ້ຂອງເພິ່ນໃນອະດີດແນວໃດ ແລະການເຮັດແບບນັ້ນສະແດງໃຫ້ເຫັນແນວໃດວ່າເພິ່ນຮັກເຈົ້າຄືກັນ. ເຈົ້າອາດຄົ້ນຄວ້າໄດ້ນຳວ່າພະເຢໂຫວາຢາກໃຫ້ພວກອິດສະຣາເອນນະມັດສະການເພິ່ນແນວໃດ ແລ້ວສົມທຽບວ່າເພິ່ນຢາກໃຫ້ເຮົານະມັດສະການເພິ່ນແນວໃດໃນທຸກມື້ນີ້ ຫຼືເຈົ້າອາດສຶກສາລະອຽດກ່ຽວກັບຄຳພະຍາກອນຕ່າງໆທີ່ພະເຢຊູເຮັດໃຫ້ເກີດຂຶ້ນແທ້ຕອນທີ່ເພິ່ນມີຊີວິດແລະຮັບໃຊ້ຢູ່ໃນໂລກນີ້.
5. ໃນການສຶກສາສ່ວນຕົວ ມີຫົວເລື່ອງໃດບໍທີ່ເຈົ້າຢາກຄົ້ນຄວ້າຢ່າງລະອຽດ?
5 ບາງຄົນທີ່ມັກຄົ້ນຄວ້າຢ່າງລະອຽດໄດ້ເວົ້າເຖິງບາງສິ່ງທີ່ເຂົາເຈົ້າຢາກຮຽນຮູ້ຕື່ມອີກໃນຄຳພີໄບເບິນ. ບາງເລື່ອງທີ່ເຂົາເຈົ້າເວົ້າເຖິງແມ່ນຢູ່ໃນຂອບ “ ຫົວເລື່ອງສຳລັບສຶກສາສ່ວນຕົວ.” ເຈົ້າຈະມ່ວນຫຼາຍກັບການສຶກສາຫົວເລື່ອງເຫຼົ່ານີ້. ໃຫ້ເບິ່ງຂໍ້ມູນຈາກຄູ່ມືຄົ້ນຄວ້າສຳລັບພະຍານພະເຢໂຫວາ. ການສຶກສາຄຳພີໄບເບິນແບບເລິກເຊິ່ງຈະຊ່ວຍເຈົ້າໃຫ້ມີຄວາມເຊື່ອທີ່ເຂັ້ມແຂງແລະຊ່ວຍເຈົ້າໃຫ້ “ພົບຄວາມຮູ້ຂອງພະເຈົ້າ.” (ສຸພາ. 2:4, 5, ລ.ມ) ຕອນນີ້ເຮົາຈະເບິ່ງຄວາມຈິງບາງຢ່າງທີ່ເລິກເຊິ່ງໃນຄຳພີໄບເບິນເຊິ່ງເຮົາສາມາດສຶກສາຢ່າງລະອຽດ.
ຄິດໃຫ້ເລິກເຊິ່ງກ່ຽວກັບຄວາມຕ້ອງການຂອງພະເຈົ້າ
6. (ກ) ເປັນຫຍັງຄວາມຕ້ອງການຂອງພະເຢໂຫວາຈຶ່ງສຳເລັດສະເໝີ? (ຂ) ຜົນຈາກສິ່ງທີ່ພະເຢໂຫວາເຮັດຈະເປັນແນວໃດ?
6 ໃຫ້ເຮົາມາເບິ່ງວ່າຄຳພີໄບເບິນເວົ້າແນວໃດກ່ຽວກັບຄວາມຕ້ອງການຂອງພະເຢໂຫວາ. ຄວາມຕ້ອງການຂອງພະເຢໂຫວາບໍ່ເຄີຍລົ້ມເຫຼວ. ຍ້ອນຫຍັງ? ຍ້ອນວ່າ ເມື່ອພະເຢໂຫວາຕັດສິນໃຈເຮັດບາງຢ່າງ ເພິ່ນບໍ່ໄດ້ຍຶດຕິດກັບວິທີໃດວິທີໜຶ່ງສະເພາະເພື່ອໃຫ້ມັນສຳເລັດ ແຕ່ເພິ່ນພ້ອມທີ່ຈະປັບປ່ຽນເພື່ອໃຫ້ຄວາມຕ້ອງການຂອງເພິ່ນສຳເລັດ. ເຮົາຂອບໃຈແທ້ໆທີ່ພະເຢໂຫວາໄດ້ເປີດເຜີຍ “ຄວາມຕ້ອງການທີ່ມີຕະຫຼອດໄປ” ຂອງເພິ່ນເທື່ອລະເລັກເທື່ອລະໜ້ອຍໃນຄຳພີໄບເບິນ. (ອຟຊ. 3:11) ພະເຢໂຫວາສາມາດເລືອກວິທີໃດວິທີໜຶ່ງເພື່ອໃຫ້ຄວາມຕ້ອງການຂອງເພິ່ນສຳເລັດ. ເພິ່ນເຮັດສຳເລັດສະເໝີຍ້ອນເພິ່ນ “ເຮັດທຸກສິ່ງເພື່ອໃຫ້ຄວາມຕ້ອງການຂອງເພິ່ນເກີດຂຶ້ນແທ້.” (ສຸພາ. 16:4, ລ.ມ) ຜົນຈາກສິ່ງທີ່ພະເຢໂຫວາເຮັດຈະຢູ່ຕະຫຼອດໄປ. ຄວາມຕ້ອງການຂອງພະເຢໂຫວາແມ່ນຫຍັງ? ແລະເພິ່ນໄດ້ປັບປ່ຽນແນວໃດເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ?
7. ຫຼັງຈາກມະນຸດຄູ່ທຳອິດບໍ່ເຊື່ອຟັງ ພະເຢໂຫວາໄດ້ປັບປ່ຽນວິທີຂອງເພິ່ນແນວໃດເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ? (ມັດທາຍ 25:34)
7 ພະເຢໂຫວາໄດ້ບອກມະນຸດຄູ່ທຳອິດໃຫ້ຮູ້ກ່ຽວກັບຄວາມຕ້ອງການຂອງເພິ່ນທີ່ມີຕໍ່ເຂົາເຈົ້າ. ເພິ່ນບອກເຂົາເຈົ້າວ່າ: “ໃຫ້ພວກເຈົ້າມີລູກມີຫຼານຫຼາຍໆຈົນເຕັມໂລກ ແລະໃຫ້ເບິ່ງແຍງໂລກ . . . ແລະສິ່ງທີ່ມີຊີວິດທັງໝົດໃນໂລກ.” (ປຖກ. 1:28) ເມື່ອອາດາມກັບເອວາບໍ່ເຊື່ອຟັງ ມະນຸດທຸກຄົນໃນໂລກຈຶ່ງກາຍເປັນຄົນບາບ. ແຕ່ເລື່ອງນີ້ບໍ່ໄດ້ຢຸດຄວາມຕ້ອງການຂອງພະເຢໂຫວາ. ເພິ່ນໄດ້ປັບປ່ຽນວິທີເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ. ໃນທັນທີທັນໃດ ເພິ່ນໄດ້ຕັດສິນໃຈທີ່ຈະຕັ້ງການປົກຄອງທີ່ຢູ່ໃນສະຫວັນຂຶ້ນເພື່ອເຮັດໃຫ້ຄວາມຕ້ອງການຂອງເພິ່ນຕັ້ງແຕ່ທຳອິດສຳລັບມະນຸດໃນໂລກເກີດຂຶ້ນແທ້. (ອ່ານມັດທາຍ 25:34) ເມື່ອຮອດເວລາທີ່ພະເຢໂຫວາກຳນົດໄວ້ ເພິ່ນກໍໄດ້ສົ່ງລູກຊາຍຄົນດຽວຂອງເພິ່ນມາໂລກນີ້ເພື່ອສອນເລື່ອງການປົກຄອງຂອງເພິ່ນ ແລະເພື່ອຕາຍເປັນຄ່າໄຖ່ເພື່ອຊ່ວຍເຮົາໃຫ້ພົ້ນຈາກບາບແລະຄວາມຕາຍ. ຕໍ່ມາ ພະເຢໂຫວາໄດ້ປຸກພະເຢຊູໃຫ້ຄືນມາຈາກຕາຍແລະໃຫ້ເພິ່ນກັບໄປສະຫວັນເພື່ອປົກຄອງເປັນກະສັດໃນການປົກຄອງຂອງພະເຈົ້າ. ແຕ່ມີອີກຫຼາຍເລື່ອງທີ່ເຮົາຮຽນຮູ້ໄດ້ກ່ຽວກັບຄວາມຕ້ອງການຂອງພະເຈົ້າ.
ໃຫ້ນຶກພາບເຖິງຕອນທີ່ຜູ້ຮັບໃຊ້ທຸກຄົນຂອງພະເຢໂຫວາທີ່ຢູ່ໃນສະຫວັນແລະຢູ່ໃນໂລກເປັນອັນໜຶ່ງອັນດຽວກັນໃນການເຊື່ອຟັງເພິ່ນ! (ເບິ່ງຂໍ້ 8)
8. (ກ) ເລື່ອງຫຼັກໃນຄຳພີໄບເບິນແມ່ນຫຍັງ? (ຂ) ຕາມເອເຟໂຊ 1:8-11 ອັນໃດແມ່ນຄວາມຕ້ອງການທີ່ສຳຄັນທີ່ສຸດຂອງພະເຢໂຫວາ? (ເບິ່ງຮູບໜ້າປົກ)
8 ເລື່ອງຫຼັກໃນຄຳພີໄບເບິນແມ່ນພະເຢໂຫວາຈະເຮັດໃຫ້ຊື່ຂອງເພິ່ນພົ້ນຈາກຄຳຕຳໜິເມື່ອເພິ່ນເຮັດໃຫ້ຄວາມຕ້ອງການຂອງເພິ່ນທີ່ມີຕໍ່ໂລກນີ້ສຳເລັດໂດຍທາງການປົກຄອງຂອງເພິ່ນທີ່ມີພະເຢຊູເປັນກະສັດ. ຄວາມຕ້ອງການຂອງພະເຢໂຫວາບໍ່ເຄີຍປ່ຽນ. ເພິ່ນສັນຍາວ່າທຸກສິ່ງຈະເກີດຂຶ້ນແທ້ຕາມທີ່ເພິ່ນໄດ້ບອກໄວ້. (ອຊຢ. 46:10, 11; ຮຣ. 6:17, 18) ໃນຕອນນັ້ນ ໂລກຈະກາຍເປັນບ່ອນທີ່ງາມໆເຊິ່ງລູກຫຼານຂອງອາດາມແລະເອວາທີ່ສົມບູນແບບແລະເຮັດສິ່ງທີ່ຖືກຕ້ອງຈະ “ມີຄວາມສຸກກັບຊີວິດຕະຫຼອດໄປ.” (ເພງ. 22:26, ລ.ມ) ພະເຢໂຫວາບໍ່ພຽງແຕ່ຈະເຮັດໃຫ້ເລື່ອງນີ້ເທົ່ານັ້ນສຳເລັດ. ຄວາມຕ້ອງການທີ່ສຳຄັນທີ່ສຸດຂອງເພິ່ນແມ່ນເຮັດໃຫ້ຜູ້ຮັບໃຊ້ຂອງເພິ່ນທີ່ຢູ່ໃນສະຫວັນແລະຢູ່ໃນໂລກເປັນອັນໜຶ່ງອັນດຽວກັນໃນການເຊື່ອຟັງເພິ່ນ. ແລ້ວທຸກຄົນໃນໂລກຈະເຊື່ອຟັງພະເຢໂຫວາໃນຖານະຜູ້ປົກຄອງຂອງເຂົາເຈົ້າ. (ອ່ານເອເຟໂຊ 1:8-11) ເຈົ້າຮູ້ສຶກງຶດບໍໃນວິທີທີ່ພະເຢໂຫວາຈະເຮັດໃຫ້ຄວາມຕ້ອງການຂອງເພິ່ນສຳເລັດ?
ຄິດໃຫ້ເລິກເຊິ່ງກ່ຽວກັບອະນາຄົດຂອງເຈົ້າ
9. ການອ່ານຄຳພີໄບເບິນເຮັດໃຫ້ເຮົາເຫັນອະນາຄົດໄດ້ໄກສ່ຳໃດ?
9 ໃຫ້ເຮົາມາເບິ່ງຄຳພະຍາກອນທີ່ພະເຢໂຫວາເວົ້າໃນສວນເອເດນຢູ່ປະຖົມມະການ 3:15. b ຄຳພະຍາກອນນັ້ນເວົ້າເຖິງເຫດການຕ່າງໆທີ່ຈະເຮັດໃຫ້ຄວາມຕ້ອງການຂອງພະເຢໂຫວາເກີດຂຶ້ນແທ້. ແຕ່ເລື່ອງເຫຼົ່ານັ້ນຈະເກີດຂຶ້ນໃນອີກຫຼາຍພັນປີຕໍ່ມາ. ເລື່ອງເຫຼົ່ານັ້ນລວມເຖິງເລື່ອງທີ່ພະເຈົ້າບອກອັບຣາຮາມວ່າຫຼັງຈາກຫຼາຍຊົ່ວອາຍຸຄົນ ລູກຫຼານຄົນໜຶ່ງຂອງລາວຈະເປັນພະຄລິດ. (ປຖກ. 22:15-18) ໃນປີ 33 ສົ້ນຕີນຂອງພະເຢຊູຖືກເຮັດໃຫ້ບວມຊ້ຳຕາມທີ່ບອກໄວ້. (ກຈກ. 3:13-15) ຄຳພະຍາກອນທີ່ບອກວ່າເຊື້ອສາຍຈະຢຽບຫົວຂອງຊາຕານຈົນມຸ່ນຈະເກີດຂຶ້ນໃນອີກຫຼາຍກວ່າ 1.000 ປີຫຼັງຈາກນີ້. (ພນມ. 20:7-10) ຄຳພີໄບເບິນຍັງບອກໃຫ້ຮູ້ອີກຫຼາຍເລື່ອງກ່ຽວກັບສິ່ງທີ່ຈະເກີດຂຶ້ນເມື່ອຄວາມເປັນສັດຕູກັນລະຫວ່າງລະບົບຂອງຊາຕານກັບອົງການຂອງພະເຢໂຫວາມາຮອດຈຸດສູງສຸດ.
10. (ກ) ມີເຫດການຫຍັງແດ່ໃນອະນາຄົດທີ່ຈະເກີດຂຶ້ນໃນໄວໆນີ້? (ຂ) ເຮົາຈະກຽມໂຕກຽມໃຈແນວໃດ? (ເບິ່ງໄຂເງື່ອນ)
10 ໃຫ້ຄິດເຖິງເຫດການຕ່າງໆທີ່ສັ່ນສະເທືອນໂລກທີ່ຄຳພີໄບເບິນບອກໄວ້. ທຳອິດ ຊາດຕ່າງໆຈະເວົ້າວ່າ “ສະຫງົບສຸກແລະປອດໄພແລ້ວ!” (1ທຊ. 5:2, 3) ຈາກນັ້ນ ຄວາມທຸກລຳບາກຄັ້ງໃຫຍ່ຈະເລີ່ມແບບ “ກະທັນຫັນ” ເມື່ອຊາດຕ່າງໆໂຈມຕີສາສະໜາປອມທັງໝົດ. (ພນມ. 17:16) ຫຼັງຈາກນັ້ນຈະມີເຫດການທີ່ເໜືອທຳມະຊາດທີ່ “‘ລູກມະນຸດ’ ມາເທິງເມກໃນທ້ອງຟ້າດ້ວຍລິດເດດແລະລັດສະໝີທີ່ແຮງກ້າ.” (ມທ. 24:30) ພະເຢຊູຈະຕັດສິນຄົນ. ເພິ່ນຈະແຍກແກະອອກຈາກແບ້. (ມທ. 25:31-33, 46) ໃນຕອນນັ້ນ ຊາຕານຈະບໍ່ຢູ່ລ້າໆ. ຍ້ອນມັນຊັງປະຊາຊົນຂອງພະເຢໂຫວາຫຼາຍ ມັນຈະກະຕຸ້ນກຸ່ມຊາດຕ່າງໆທີ່ຄຳພີໄບເບິນເອີ້ນວ່າໂຄກຂອງແຜ່ນດິນມາໂຄກໃຫ້ໂຈມຕີປະຊາຊົນຂອງພະເຢໂຫວາ. (ເອເຊກ. 38:2, 10, 11) ເມື່ອຮອດຕອນໃດຕອນໜຶ່ງ ຄົນທີ່ຖືກເລືອກທີ່ຍັງເຫຼືອຢູ່ຈະຖືກລວບລວມຂຶ້ນໄປສະຫວັນເພື່ອໄປຮ່ວມກັບພະເຢຊູແລະກອງທັບໃນສະຫວັນເພື່ອຕໍ່ສູ້ໃນສົງຄາມອາມາເຄໂດນ ເຊິ່ງເປັນຈຸດຈົບຂອງຄວາມທຸກລຳບາກຄັ້ງໃຫຍ່. c (ມທ. 24:31; ພນມ. 16:14, 16) ຈາກນັ້ນ ການປົກຄອງ 1.000 ປີຂອງພະຄລິດຈະເລີ່ມຕົ້ນ.—ພນມ. 20:6
ເຈົ້າຈະໃກ້ຊິດກັບພະເຢໂຫວາຫຼາຍແທ້ໆຫຼັງຈາກທີ່ໄດ້ຮຽນຮູ້ກ່ຽວກັບເພິ່ນເປັນເວລາຫຼາຍພັນລ້ານປີ (ເບິ່ງຂໍ້ 11)
11. ຄວາມຫວັງເລື່ອງຊີວິດຕະຫຼອດໄປມີຄວາມໝາຍແນວໃດສຳລັບເຈົ້າ? (ເບິ່ງຮູບ)
11 ຕອນນີ້ໃຫ້ຄິດເຖິງອະນາຄົດຂອງເຈົ້າຫຼັງຈາກ 1.000 ປີຜ່ານໄປ. ຄຳພີໄບເບິນບອກວ່າພະເຢໂຫວາ “ໄດ້ສ້າງມະນຸດໃຫ້ຢາກມີຊີວິດຢູ່ຕະຫຼອດໄປ.” (ຜູ້ປ. 3:11, ລ.ມ) ເລື່ອງນີ້ມີຜົນແນວໃດຕໍ່ເຈົ້າແລະສາຍສຳພັນຂອງເຈົ້າກັບພະເຢໂຫວາ? ປຶ້ມຫຍັບເຂົ້າໃກ້ພະເຢໂຫວາ ໜ້າ 319 ເວົ້າວ່າ: “ຫຼັງຈາກມີຊີວິດຢູ່ຫຼາຍຮ້ອຍ ຫຼາຍພັນ ຫຼາຍລ້ານ ຈົນກະທັ່ງວ່າຮອດຫຼາຍພັນລ້ານປີ ເຮົາຈະຮູ້ກ່ຽວກັບພະເຢໂຫວາພະເຈົ້າຫຼາຍກວ່າທີ່ເຮົາຮູ້ໃນຕອນນີ້. ແຕ່ເຮົາຍັງຮູ້ສຶກວ່າມີສິ່ງຕ່າງໆທີ່ໜ້າອັດສະຈັນຢ່າງນັບບໍ່ຖ້ວນທີ່ເຮົາສາມາດຮຽນໄດ້ . . . ຊີວິດຖາວອນຈະເຕັມໄປດ້ວຍຄວາມໝາຍແລະມີຄວາມຫຼາກຫຼາຍເກີນກວ່າຈະນຶກພາບອອກໄດ້ແລະການຫຍັບເຂົ້າໃກ້ພະເຢໂຫວາຫຼາຍຂຶ້ນຈະເປັນສ່ວນໜຶ່ງຂອງຊີວິດແບບນັ້ນເຊິ່ງໃຫ້ຜົນຕອບແທນຫຼາຍທີ່ສຸດສະເໝີ.” ໃນຕອນນີ້ ໃຫ້ເຮົາຮຽນຮູ້ກ່ຽວກັບຄຳພີໄບເບິນຕໍ່ໆໄປ. ມີຫຍັງອີກທີ່ເຮົາຈະຮຽນຮູ້ໄດ້?
ເບິ່ງຂຶ້ນໄປໃນສະຫວັນ
12. ເຮົາຈະເບິ່ງຂຶ້ນໄປໃນສະຫວັນໄດ້ແນວໃດ? ຂໍໃຫ້ຍົກຕົວຢ່າງ.
12 ຄຳພີໄບເບິນບອກໃຫ້ເຮົາຮູ້ໜ້ອຍໜຶ່ງວ່າບ່ອນຢູ່ຂອງພະເຢໂຫວາທີ່ຢູ່ “ບ່ອນທີ່ສູງຫຼາຍ” ເປັນແນວໃດ. (ອຊຢ. 33:5) ຄຳພີໄບເບິນບອກໃຫ້ຮູ້ກ່ຽວກັບຄວາມຍິ່ງໃຫຍ່ຂອງພະເຢໂຫວາແລະອົງການຂອງເພິ່ນທີ່ຢູ່ໃນສະຫວັນ. (ອຊຢ. 6:1-4; ດນອ. 7:9, 10; ພນມ. 4:1-6) ຕົວຢ່າງ ເຮົາສາມາດອ່ານສິ່ງທີ່ເປັນຕາໜ້າເກງຂາມທີ່ເອເຊກຽນເຫັນຕອນທີ່ “ທ້ອງຟ້າໄດ້ເປີດອອກແລະ [ລາວ] ໄດ້ເຫັນນິມິດຫຼາຍເລື່ອງຈາກພະເຈົ້າ.”—ເອເຊກ. 1:1, ລ.ມ
13. ຕາມເຮັບເຣີ 4:14-16 ເຈົ້າຮູ້ສຶກແນວໃດໃນສິ່ງທີ່ພະເຢຊູກຳລັງເຮັດຈາກສະຫວັນ?
13 ໃຫ້ຄິດເຖິງສິ່ງທີ່ພະເຢຊູກຳລັງເຮັດເພື່ອເຮົາຈາກສະຫວັນໃນຖານະເປັນກະສັດແລະເປັນປະໂລຫິດໃຫຍ່ທີ່ເຫັນອົກເຫັນໃຈ. ໂດຍທາງພະເຢຊູ ເຮົາສາມາດອະທິດຖານຕໍ່ໜ້າ “ບັນລັງຂອງພະເຈົ້າຜູ້ມີຄວາມກະລຸນາທີ່ຍິ່ງໃຫຍ່” ເພື່ອຂໍຄວາມເມດຕາແລະຂໍໃຫ້ເພິ່ນຊ່ວຍ “ເມື່ອພວກເຮົາຕ້ອງການຄວາມຊ່ວຍເຫຼືອ.” (ອ່ານເຮັບເຣີ 4:14-16) ໃນແຕ່ລະມື້ ໃຫ້ຄິດເຖິງສິ່ງທີ່ພະເຢໂຫວາແລະພະເຢຊູໄດ້ເຮັດເພື່ອເຮົາ ແລະສິ່ງທີ່ພວກເພິ່ນກຳລັງເຮັດເພື່ອເຮົາຈາກສະຫວັນ. ຄວາມຮັກທີ່ພວກເພິ່ນມີຕໍ່ເຮົາຄວນກະຕຸ້ນເຮົາໃຫ້ຮັບໃຊ້ແລະນະມັດສະການພະເຢໂຫວາຢ່າງກະຕືລືລົ້ນ.—2ກຣ. 5:14, 15
ໃຫ້ນຶກພາບວ່າເຈົ້າຈະມີຄວາມສຸກຫຼາຍສ່ຳໃດໃນໂລກໃໝ່ທີ່ຮູ້ວ່າເຈົ້າໄດ້ຊ່ວຍຄົນອື່ນໃຫ້ເຂົ້າມາເປັນພະຍານພະເຢໂຫວາແລະເປັນລູກສິດຂອງພະເຢຊູ! (ເບິ່ງຂໍ້ 14)
14. ວິທີໜຶ່ງທີ່ດີທີ່ສຸດທີ່ສະແດງວ່າເຮົາຂອບໃຈພະເຢໂຫວາແລະພະເຢຊູແມ່ນຫຍັງ? (ເບິ່ງຮູບ)
14 ວິທີໜຶ່ງທີ່ດີທີ່ສຸດທີ່ສະແດງວ່າເຮົາຂອບໃຈພະເຢໂຫວາແລະພະເຢຊູກໍຄື ພະຍາຍາມຊ່ວຍຄົນອື່ນໃຫ້ເຂົ້າມາເປັນພະຍານພະເຢໂຫວາແລະເປັນລູກສິດຂອງພະເຢຊູ. (ມທ. 28:19, 20) ໂປໂລໄດ້ເຮັດແບບນັ້ນ. ລາວຮູ້ວ່າພະເຢໂຫວາຕ້ອງການ “ໃຫ້ຄົນທຸກຊະນິດລອດແລະໄດ້ຮັບຄວາມຮູ້ທີ່ຖືກຕ້ອງເລື່ອງຄວາມຈິງ.” (1ຕມ. 2:3, 4) ໂປໂລພະຍາຍາມປະກາດຂ່າວດີກັບຫຼາຍຄົນເທົ່າທີ່ເປັນໄປໄດ້ “ເພື່ອຈະຊ່ວຍບາງຄົນໃຫ້ລອດໄດ້ບໍ່ວ່າຈະດ້ວຍວິທີໃດກໍຕາມ.”—1ກຣ. 9:22, 23
ໃຫ້ມີຄວາມສຸກໃນການສຶກສາຄົ້ນຄວ້າຄຳພີໄບເບິນ
15. ຕາມຄຳເພງ 1:2 ສິ່ງໃດຈະເຮັດໃຫ້ເຮົາມີຄວາມສຸກ?
15 ຜູ້ຂຽນຄຳເພງອະທິບາຍວ່າຄົນທີ່ມີຄວາມສຸກແລະຄົນທີ່ເຮັດຫຍັງກໍສຳເລັດແມ່ນຄົນທີ່ “ມັກກົດໝາຍຂອງພະເຢໂຫວາຫຼາຍ” ແລະ “ຄິດຕຶກຕອງກ່ຽວກັບກົດໝາຍຂອງເພິ່ນທັງກາງເວັນແລະກາງຄືນ.” (ເພງ. 1:1-3, ລ.ມ) ຜູ້ແປຄຳພີໄບເບິນຄົນໜຶ່ງທີ່ຊື່ໂຈເຊັບ ຣ໋ອດເທີແຮັມອະທິບາຍຂໍ້ຄຳພີນີ້ວ່າ: “ຄົນເຮົາຄວນຢາກໄດ້ຄຳແນະນຳຈາກພະເຈົ້າຈົນເຖິງຂັ້ນລົງມືຊອກຫາ ຮຽນຮູ້ ແລະໃຊ້ເວລາຄົ້ນຄວ້າແລະຄິດຕຶກຕອງກ່ຽວກັບຄຳແນະນຳນັ້ນ.” ລາວຍັງເວົ້າອີກວ່າ: “ຖ້າມື້ໃດຜ່ານໄປໂດຍທີ່ເຮົາບໍ່ໄດ້ອ່ານຄຳພີໄບເບິນ ມື້ນັ້ນກໍບໍ່ມີຄວາມໝາຍຫຍັງ.” ເຈົ້າມີຄວາມສຸກກັບການສຶກສາຄຳພີໄບເບິນໄດ້ໂດຍຄົ້ນຄວ້າຢ່າງລະອຽດໃຫ້ຫຼາຍທີ່ສຸດເທົ່າທີ່ຈະເຮັດໄດ້ ແລະຄິດເບິ່ງວ່າຈຸດຕ່າງໆໃນຄຳພີໄບເບິນກ່ຽວຂ້ອງກັນແນວໃດ. ການເຂົ້າໃຈຄຳພີໄບເບິນໃນທຸກດ້ານເຮັດໃຫ້ເຮົາມີຄວາມສຸກຫຼາຍແທ້ໆ!
16. ເຮົາຈະຮຽນຫຍັງໃນບົດຄວາມຕໍ່ໄປ?
16 ຄວາມຈິງຫຼາຍເລື່ອງທີ່ຢູ່ໃນຄຳພີໄບເບິນທີ່ພະເຢໂຫວາສອນເຮົາບໍ່ຍາກເກີນໄປທີ່ເຮົາຈະເຂົ້າໃຈ. ໃນບົດຄວາມຕໍ່ໄປເຮົາຈະຮຽນຮູ້ຄວາມຈິງທີ່ເລິກເຊິ່ງອີກເລື່ອງໜຶ່ງ ເຊິ່ງກໍຄືວິຫານໂດຍໄນທີ່ຍິ່ງໃຫຍ່ຂອງພະເຢໂຫວາ. ໂປໂລໄດ້ອະທິບາຍເລື່ອງນີ້ໃນຈົດໝາຍທີ່ລາວຂຽນໄປຫາຄລິດສະຕຽນທີ່ຢູ່ແຂວງຢູດາຍ. ຂໍໃຫ້ເຈົ້າມີຄວາມສຸກໃນການຮຽນຮູ້ກ່ຽວກັບເລື່ອງນີ້.
ເພງ 94 ເຮົາຂອບໃຈພະເຈົ້າສຳລັບພະຄຳພີ
a ການສຶກສາຄຳພີໄບເບິນເຮັດໃຫ້ເຮົາມ່ວນ ໄດ້ຮັບປະໂຫຍດ ແລະເຮັດໃຫ້ເຮົາໃກ້ຊິດຫຼາຍຂຶ້ນກັບພະເຢໂຫວາພໍ່ຂອງເຮົາທີ່ຢູ່ໃນສະຫວັນ. ໃນບົດຄວາມນີ້ເຮົາຈະເບິ່ງວິທີທີ່ເຮົາຈະສຶກສາຄຳພີໄບເບິນຢ່າງລະອຽດທັງຄວາມກວ້າງ ຄວາມຍາວ ຄວາມສູງ ແລະຄວາມເລິກ.
b ໃຫ້ເບິ່ງບົດຄວາມ “ຄຳພະຍາກອນເກົ່າແກ່ທີ່ສຳຄັນຕໍ່ເຮົາ” ໃນຫໍສັງເກດການເດືອນກໍລະກົດ 2022.
c ເພື່ອຈະຮູ້ວິທີກຽມໂຕໃຫ້ພ້ອມສຳລັບເຫດການທີ່ສັ່ນສະເທືອນໂລກເຊິ່ງກຳລັງຈະເກີດຂຶ້ນໃນອະນາຄົດໃກ້ໆນີ້ ໃຫ້ເບິ່ງປຶ້ມລາຊະອານາຈັກຂອງພະເຈົ້າປົກຄອງແລ້ວ! ໜ້າ 230.
