ບົດຄວາມສຶກສາທີ 45
ໃຫ້ເຫັນຄ່າສິດທິພິເສດທີ່ໄດ້ນະມັດສະການຢູ່ວິຫານໂດຍໄນຂອງພະເຢໂຫວາ
‘ໃຫ້ທຸກຄົນນະມັດສະການພະອົງຜູ້ທີ່ສ້າງຟ້າແລະໂລກ.’—ພນມ. 14:7
ເພງ 93 ຂໍອວຍພອນການປະຊຸມຂອງເຮົາ
ໃຈຄວາມສຳຄັນ a
1. ທູດສະຫວັນເວົ້າຫຍັງ ແລະສິ່ງທີ່ລາວເວົ້າເຮັດໃຫ້ເຮົາຮູ້ສຶກແນວໃດ?
ຖ້າທູດສະຫວັນມາເວົ້າກັບເຈົ້າ ເຈົ້າຊິຟັງສິ່ງທີ່ລາວເວົ້າບໍ? ທີ່ຈິງ ໃນທຸກມື້ນີ້ທູດສະຫວັນກຳລັງເວົ້າກັບ “ທຸກປະເທດ ທຸກຕະກູນ ທຸກພາສາ ແລະທຸກຊົນຊາດ.” ລາວເວົ້າຫຍັງ? ລາວເວົ້າວ່າ: ‘ໃຫ້ຢຳເກງພະເຈົ້າແລະຍ້ອງຍໍສັນລະເສີນພະອົງ . . . ໃຫ້ທຸກຄົນນະມັດສະການພະອົງຜູ້ທີ່ສ້າງຟ້າແລະໂລກ.’ (ພນມ. 14:6, 7) ພະເຢໂຫວາເປັນພະເຈົ້າທ່ຽງແທ້ອົງດຽວທີ່ທຸກຄົນຄວນນະມັດສະການ. ເຮົາຂອບໃຈແທ້ໆທີ່ເພິ່ນໃຫ້ເຮົາມີໂອກາດນະມັດສະການເພິ່ນຢູ່ວິຫານໂດຍໄນທີ່ຍິ່ງໃຫຍ່ຂອງເພິ່ນ!
2. ວິຫານໂດຍໄນຂອງພະເຢໂຫວາໝາຍເຖິງຫຍັງ? (ເບິ່ງຂອບ “ ວິຫານໂດຍໄນບໍ່ໄດ້ໝາຍເຖິງຫຍັງ?”)
2 ວິຫານໂດຍໄນໝາຍເຖິງຫຍັງແທ້ໆແລະເຮົາຈະໄດ້ຄຳອະທິບາຍທີ່ລະອຽດກ່ຽວກັບວິຫານໂດຍໄນນີ້ຈາກໃສ? ວິຫານໂດຍໄນບໍ່ແມ່ນຕຶກແທ້ໆແຕ່ແມ່ນການຈັດກຽມຂອງພະເຢໂຫວາທີ່ຊ່ວຍເຮົາໃຫ້ນະມັດສະການເພິ່ນໃນແບບທີ່ເພິ່ນຍອມຮັບໂດຍອາໄສຄ່າໄຖ່ຂອງພະເຢຊູ. ອັກຄະສາວົກໂປໂລໄດ້ອະທິບາຍເລື່ອງນີ້ໃນຈົດໝາຍທີ່ລາວຂຽນໄປຫາຄລິດສະຕຽນທີ່ຢູ່ແຂວງຢູດາຍ. b
3-4. ມີເລື່ອງຫຍັງແດ່ທີ່ເຮັດໃຫ້ໂປໂລເປັນຫ່ວງຄລິດສະຕຽນໃນແຂວງຢູດາຍ? ແລະລາວຊ່ວຍເຂົາເຈົ້າແນວໃດ?
3 ເປັນຫຍັງໂປໂລຈຶ່ງຂຽນຈົດໝາຍໄປຫາຄລິດສະຕຽນທີ່ຢູ່ແຂວງຢູດາຍ? ເບິ່ງຄືວ່າມີ 2 ເຫດຜົນ. ເຫດຜົນທຳອິດແມ່ນເພື່ອໃຫ້ກຳລັງໃຈເຂົາເຈົ້າ. ກ່ອນທີ່ຈະເຂົ້າມາເປັນຄລິດສະຕຽນ ເຂົາເຈົ້າຫຼາຍຄົນນັບຖືສາສະໜາຢິວ. ພວກຫົວໜ້າສາສະໜາຢິວອາດເຍາະເຍີ້ຍທີ່ເຂົາເຈົ້າເຂົ້າມາເປັນຄລິດສະຕຽນ. ເປັນຫຍັງຈຶ່ງເຍາະເຍີ້ຍ? ຍ້ອນຄລິດສະຕຽນບໍ່ມີວິຫານເພື່ອໃຫ້ໄປນະມັດສະການ ບໍ່ມີແທ່ນບູຊາເພື່ອເຜົາສັດເປັນເຄື່ອງບູຊາໃຫ້ພະເຈົ້າ ແລະບໍ່ມີປະໂລຫິດ. ເລື່ອງແບບນີ້ອາດເຮັດໃຫ້ຄລິດສະຕຽນເຫຼົ່ານີ້ທໍ້ໃຈແລະເຮັດໃຫ້ຄວາມເຊື່ອຂອງເຂົາເຈົ້າອ່ອນລົງ. (ຮຣ. 2:1; 3:12, 14) ບາງຄົນອາດຄິດຢາກກັບໄປນັບຖືສາສະໜາຢິວຄືເກົ່າ.
4 ເຫດຜົນທີ 2 ໂປໂລຊ່ວຍຄລິດສະຕຽນເຫຼົ່ານັ້ນໃຫ້ເຫັນວ່າເຂົາເຈົ້າບໍ່ໄດ້ພະຍາຍາມເຂົ້າໃຈຄຳສອນໃໝ່ຫຼືຄຳສອນທີ່ເລິກເຊິ່ງໃນຄຳພີໄບເບິນ ເຊິ່ງເປັນຄືກັບ “ອາຫານແຂງ.” (ຮຣ. 5:11-14) ເບິ່ງຄືວ່າບາງຄົນຍັງເຮັດຕາມກົດໝາຍຂອງໂມເຊຢູ່. ໂປໂລອະທິບາຍວ່າ ເຄື່ອງບູຊາຕ່າງໆທີ່ກົດໝາຍຂອງໂມເຊກຳນົດໄວ້ບໍ່ສາມາດກຳຈັດບາບໄດ້ແທ້. ຍ້ອນແນວນັ້ນ ກົດໝາຍຂອງໂມເຊຈຶ່ງ “ຖືກຍົກເລີກ.” ຈາກນັ້ນ ໂປໂລໄດ້ສອນຄລິດສະຕຽນເຫຼົ່ານັ້ນກ່ຽວກັບຄຳສອນບາງຢ່າງທີ່ເລິກເຊິ່ງ. ລາວເຕືອນເຂົາເຈົ້າໃຫ້ຄິດເຖິງ “ຄວາມຫວັງທີ່ດີກວ່າ” ໂດຍອາໄສຄ່າໄຖ່ຂອງພະເຢຊູ ເຊິ່ງຈະຊ່ວຍເຂົາເຈົ້າໃຫ້ “ໃກ້ຊິດພະເຈົ້າ” ໄດ້ແທ້ໆ.—ຮຣ. 7:18, 19
5. ເຮົາຕ້ອງເຂົ້າໃຈເລື່ອງຫຍັງໃນປຶ້ມເຮັບເຣີ? ແລະຍ້ອນຫຍັງ?
5 ໂປໂລອະທິບາຍກັບພີ່ນ້ອງວ່າ ການນະມັດສະການຂອງເຂົາເຈົ້າໃນຕອນນີ້ດີກວ່າການນະມັດສະການແຕ່ກີ້. ການນະມັດສະການຂອງຄົນຢິວ “ເປັນພຽງເງົາຂອງສິ່ງທີ່ຈະມີມາ ແຕ່ຂອງແທ້ຈະມາທາງພະຄລິດ.” (ກລຊ. 2:17) ເງົາເປັນພຽງຮູບຊົງຂອງສິ່ງໃດສິ່ງໜຶ່ງເທົ່ານັ້ນ ແຕ່ມັນບໍ່ແມ່ນສິ່ງນັ້ນແທ້ໆ. ຄ້າຍຄືກັນ ການນະມັດສະການຂອງຄົນຢິວໃນສະໄໝແຕ່ກີ້ຈຶ່ງເປັນແຕ່ເງົາຂອງການນະມັດສະການຂອງຄລິດສະຕຽນ. ເຮົາຕ້ອງເຂົ້າໃຈເລື່ອງການຈັດກຽມຂອງພະເຢໂຫວາເພື່ອບາບຂອງເຮົາຈະໄດ້ຮັບການຍົກໂທດ ແລະຊ່ວຍເຮົາໃຫ້ນະມັດສະການພະເຢໂຫວາໃນແບບທີ່ເພິ່ນຍອມຮັບ. ໃຫ້ເຮົາມາສົມທຽບລະຫວ່າງ “ເງົາ” (ການນະມັດສະການຂອງຄົນຢິວໃນສະໄໝແຕ່ກີ້) ກັບ “ຂອງແທ້” (ການນະມັດສະການຂອງຄລິດສະຕຽນ) ທີ່ເວົ້າໃນປຶ້ມເຮັບເຣີ. ການເຮັດແບບນີ້ຈະຊ່ວຍເຮົາໃຫ້ເຂົ້າໃຈຫຼາຍຂຶ້ນກ່ຽວກັບວິຫານໂດຍໄນແລະມັນກ່ຽວຂ້ອງກັບເຮົາແນວໃດ.
ເຕັ້ນສັກສິດ
6. ເຕັ້ນສັກສິດໃຊ້ເພື່ອຫຍັງ?
6 ການນະມັດສະການຂອງຄົນຢິວໃນສະໄໝແຕ່ກີ້. ໂປໂລເວົ້າເຖິງເຕັ້ນສັກສິດທີ່ສ້າງໃນສະໄໝຂອງໂມເຊໃນປີ 1512 ກ່ອນ ຄ.ສ. (ເບິ່ງຮູບ “ການນະມັດສະການຂອງຄົນຢິວໃນສະໄໝແຕ່ກີ້ກັບການນະມັດສະການຂອງຄລິດສະຕຽນ.”) ເຕັ້ນສັກສິດເປັນບ່ອນທີ່ຄົນອິດສະຣາເອນມາຢູ່ລວມກັນເພື່ອນະມັດສະການພະເຈົ້າແລະເຜົາເຄື່ອງບູຊາໃຫ້ເພິ່ນ. (ອພຍ. 29:43-46) ເຂົາເຈົ້າຫາມເຕັ້ນສັກສິດໄປນຳເມື່ອຍ້າຍຈາກບ່ອນໜຶ່ງໄປອີກບ່ອນໜຶ່ງຕອນທີ່ຢູ່ບ່ອນກັນດານ. ເຂົາເຈົ້າໃຊ້ເຕັ້ນນີ້ເກືອບ 500 ປີຈົນຮອດຕອນທີ່ສ້າງວິຫານຢູ່ເມືອງເຢຣູຊາເລັມ. (ອພຍ. 25:8, 9; ຈຊບ. 9:22) ເຕັ້ນສັກສິດນີ້ຍັງໝາຍເຖິງສິ່ງທີ່ດີກວ່າທີ່ພະເຢໂຫວາໄດ້ຈັດກຽມໄວ້ສຳລັບຄລິດສະຕຽນ.
7. ວິຫານໂດຍໄນເລີ່ມມີໃນຕອນໃດ?
7 ການນະມັດສະການຂອງຄລິດສະຕຽນ. ເຕັ້ນສັກສິດໃນສະໄໝແຕ່ກີ້ “ເປັນເງົາຂອງສິ່ງທີ່ຢູ່ໃນສະຫວັນ” ແລະເປັນພາບສະແດງເຖິງວິຫານໂດຍໄນທີ່ຍິ່ງໃຫຍ່ຂອງພະເຢໂຫວາ. ໂປໂລບອກວ່າ: “ເຕັ້ນນີ້ເປັນພາບສະແດງເຖິງສິ່ງທີ່ເຮັດຢູ່ຕອນນີ້.” (ຮຣ. 8:5; 9:9) ຕອນທີ່ໂປໂລຂຽນຈົດໝາຍໄປຫາຄລິດສະຕຽນໃນແຂວງຢູດາຍ ວິຫານໂດຍໄນກໍມີຢູ່ແລ້ວ. ວິຫານໂດຍໄນເລີ່ມມີໃນປີ 29 ເຊິ່ງເປັນປີທີ່ພະເຢຊູຮັບບັບເຕມາແລະຖືກແຕ່ງຕັ້ງດ້ວຍພະລັງບໍລິສຸດແລະເລີ່ມຮັບໃຊ້ເປັນ “ມະຫາປະໂລຫິດທີ່ຍິ່ງໃຫຍ່” ຢູ່ວິຫານໂດຍໄນຂອງພະເຢໂຫວາ. c—ຮຣ. 4:14; ກຈກ. 10:37, 38
ປະໂລຫິດໃຫຍ່
8-9. ຕາມເຮັບເຣີ 7:23-27 ປະໂລຫິດໃຫຍ່ຂອງພວກອິດສະຣາເອນກັບພະເຢຊູທີ່ເປັນປະໂລຫິດໃຫຍ່ທີ່ຍິ່ງໃຫຍ່ຕ່າງກັນແນວໃດ?
8 ການນະມັດສະການຂອງຄົນຢິວໃນສະໄໝແຕ່ກີ້. ປະໂລຫິດໃຫຍ່ເຮັດໜ້າທີ່ເປັນຕົວແທນປະຊາຊົນເພື່ອຢູ່ຕໍ່ໜ້າພະເຈົ້າ. ປະໂລຫິດໃຫຍ່ຄົນທຳອິດແມ່ນອາໂຣນ. ພະເຢໂຫວາແຕ່ງຕັ້ງລາວຕອນທີ່ອຸທິດເຕັ້ນສັກສິດ. ຄືກັບທີ່ໂປໂລອະທິບາຍໄວ້ວ່າ: “ຕ້ອງມີຫຼາຍຄົນເຮັດໜ້າທີ່ປະໂລຫິດສືບຕໍ່ກັນ ເພາະພວກເຂົາຕ້ອງຕາຍຈຶ່ງເຮັດໜ້າທີ່ຕໍ່ໄປບໍ່ໄດ້.” d (ອ່ານເຮັບເຣີ 7:23-27) ນອກຈາກນັ້ນ ປະໂລຫິດໃຫຍ່ຂອງພວກອິດສະຣາເອນເປັນຄົນບໍ່ສົມບູນແບບ. ເຂົາເຈົ້າຈຶ່ງຕ້ອງເຜົາເຄື່ອງບູຊາສຳລັບຄວາມຜິດຂອງໂຕເອງ. ປະໂລຫິດໃຫຍ່ຂອງພວກອິດສະຣາເອນຕ່າງກັນຫຼາຍແທ້ໆກັບພະເຢຊູ ເຊິ່ງເປັນປະໂລຫິດໃຫຍ່ທີ່ຍິ່ງໃຫຍ່.
9 ການນະມັດສະການຂອງຄລິດສະຕຽນ. ພະເຢຊູປະໂລຫິດໃຫຍ່ຂອງເຮົາ “ຮັບໃຊ້ . . . ໃນເຕັ້ນທີ່ແທ້ຈິງເຊິ່ງພະເຢໂຫວາຕັ້ງໄວ້ ບໍ່ແມ່ນມະນຸດ.” (ຮຣ. 8:1, 2) ໂປໂລເວົ້າວ່າ: “ພະເຢຊູເຮັດໜ້າທີ່ປະໂລຫິດໂດຍບໍ່ຕ້ອງມີຜູ້ສືບທອດ ເພາະເພິ່ນມີຊີວິດຕະຫຼອດໄປ.” ໂປໂລຍັງບອກອີກວ່າ ພະເຢຊູ “ບໍລິສຸດ ແຕກຕ່າງກັບຄົນບາບ.” ເພິ່ນບໍ່ຄືກັບປະໂລຫິດໃຫຍ່ຂອງພວກອິດສະຣາເອນ. ພະເຢຊູບໍ່ຕ້ອງເຜົາ “ເຄື່ອງບູຊາທຸກໆມື້” ສຳລັບຄວາມຜິດຂອງໂຕເອງ. ຕອນນີ້ເຮົາຈະມາເບິ່ງຄວາມແຕກຕ່າງລະຫວ່າງການນະມັດສະການຂອງຄົນຢິວໃນສະໄໝແຕ່ກີ້ກັບການນະມັດສະການຂອງຄລິດສະຕຽນໃນເລື່ອງແທ່ນບູຊາແລະເຄື່ອງບູຊາ.
ແທ່ນບູຊາແລະເຄື່ອງບູຊາ
10. ເຄື່ອງບູຊາທີ່ຢູ່ເທິງແທ່ນບູຊາທອງແດງເປັນພາບສະແດງເຖິງຫຍັງ?
10 ການນະມັດສະການຂອງຄົນຢິວໃນສະໄໝແຕ່ກີ້. ຢູ່ທາງເຂົ້າເຕັ້ນສັກສິດມີແທ່ນບູຊາທີ່ເປັນທອງແດງທີ່ໃຊ້ເຜົາສັດເພື່ອເປັນເຄື່ອງບູຊາໃຫ້ພະເຢໂຫວາ. (ອພຍ. 27:1, 2; 40:29) ແຕ່ເຄື່ອງບູຊາເຫຼົ່ານີ້ບໍ່ສາມາດຊ່ວຍມະນຸດໃຫ້ໄດ້ຮັບການຍົກໂທດບາບໄດ້ຢ່າງຄົບຖ້ວນ. (ຮຣ. 10:1-4) ເຄື່ອງບູຊາທີ່ເປັນສັດທີ່ຕ້ອງເຜົາເປັນປະຈຳຢູ່ເຕັ້ນສັກສິດເປັນພາບສະແດງເຖິງເຄື່ອງບູຊາແບບໜຶ່ງທີ່ສາມາດໄຖ່ບາບໄດ້ຢ່າງຄົບຖ້ວນ.
11. ແທ່ນບູຊາທີ່ພະເຢຊູມອບໂຕເອງເປັນເຄື່ອງບູຊາໝາຍເຖິງຫຍັງ? (ເຮັບເຣີ 10:5-7, 10)
11 ການນະມັດສະການຂອງຄລິດສະຕຽນ. ພະເຢຊູຮູ້ວ່າພະເຢໂຫວາສົ່ງເພິ່ນມາໂລກນີ້ເພື່ອມາຕາຍເປັນຄ່າໄຖ່ໃຫ້ມະນຸດ. (ມທ. 20:28) ດັ່ງນັ້ນ ຕອນທີ່ພະເຢຊູຮັບບັບເຕມາເພິ່ນໄດ້ສະເໜີໂຕເອງທີ່ຈະເຮັດຕາມຄວາມຕ້ອງການຂອງພະເຢໂຫວາ. (ຢຮ. 6:38; ຄລຕ. 1:4) ແທ່ນບູຊາທີ່ພະເຢຊູມອບໂຕເອງເປັນເຄື່ອງບູຊາໝາຍເຖິງຄວາມຕ້ອງການຂອງພະເຢໂຫວາ. ນັ້ນກໍຄືເພິ່ນຢາກໃຫ້ພະເຢຊູສະລະຊີວິດມະນຸດທີ່ສົມບູນແບບ. ພະເຢຊູສະລະຊີວິດ “ພຽງເທື່ອດຽວ” ແຕ່ສາມາດໄຖ່ບາບແລະປົກປິດບາບຂອງມະນຸດທຸກຄົນທີ່ສະແດງຄວາມເຊື່ອໃນເພິ່ນໄດ້ຕະຫຼອດໄປ. (ອ່ານເຮັບເຣີ 10:5-7, 10) ຕໍ່ໄປເຮົາຈະມາເບິ່ງວ່າ ສ່ວນຕ່າງໆໃນເຕັ້ນສັກສິດໝາຍເຖິງຫຍັງ.
ຫ້ອງບໍລິສຸດກັບຫ້ອງບໍລິສຸດທີ່ສຸດ
12. ມີແຕ່ໃຜເທົ່ານັ້ນທີ່ສາມາດເຂົ້າໄປໃນແຕ່ລະຫ້ອງຂອງເຕັ້ນສັກສິດ?
12 ການນະມັດສະການຂອງຄົນຢິວໃນສະໄໝແຕ່ກີ້. ທາງໃນຂອງເຕັ້ນສັກສິດແລະທາງໃນຂອງວິຫານຢູ່ເມືອງເຢຣູຊາເລັມມີລັກສະນະຄ້າຍຄືກັນ. ທາງໃນມີ 2 ຫ້ອງຄື: “ຫ້ອງບໍລິສຸດ” ກັບ “ຫ້ອງບໍລິສຸດທີ່ສຸດ” ແລະມີຜ້າກັ້ງຂັ້ນລະຫວ່າງ 2 ຫ້ອງນີ້. (ຮຣ. 9:2-5; ອພຍ. 26:31-33) ໃນຫ້ອງບໍລິສຸດມີຂາຕະກຽງຄຳ ແທ່ນບູຊາທີ່ໃຊ້ເຜົາເຄື່ອງຫອມ ແລະໂຕະສຳລັບວາງເຂົ້າຈີ່ທີ່ຕັ້ງໄວ້. ມີແຕ່ປະໂລຫິດທີ່ “ຖືກເລືອກແລະໄດ້ຮັບການແຕ່ງຕັ້ງ” ເທົ່ານັ້ນຈຶ່ງຈະເຂົ້າໄປເຮັດວຽກຮັບໃຊ້ຢູ່ໃນຫ້ອງນີ້ໄດ້. (ຈຊບ. 3:3, 7, 10) ໃນຫ້ອງບໍລິສຸດທີ່ສຸດມີຫີບສັນຍາທີ່ໂອບຄຳ ເຊິ່ງສະແດງວ່າພະເຢໂຫວາຢູ່ຫັ້ນ. (ອພຍ. 25:21, 22) ມີແຕ່ປະໂລຫິດໃຫຍ່ເທົ່ານັ້ນທີ່ໄດ້ຮັບອະນຸຍາດໃຫ້ຍ່າງຜ່ານຜ້າກັ້ງເຂົ້າໄປໃນຫ້ອງບໍລິສຸດທີ່ສຸດໃນວັນໄຖ່ຄວາມຜິດປະຈຳປີ. ລາວຈະເອົາເລືອດສັດເຂົ້າໄປໃນຫ້ອງນັ້ນເພື່ອໄຖ່ຄວາມຜິດໃຫ້ໂຕເອງແລະຄົນໝົດຊາດທຸກໆປີ. (ລລວ. 16:2, 17) ໃນທີ່ສຸດ ພະເຢໂຫວາກໍເປີດເຜີຍໃຫ້ຮູ້ຜ່ານທາງພະລັງບໍລິສຸດວ່າ ທັງສອງຫ້ອງນີ້ເປັນພາບສະແດງເຖິງຫຍັງ.—ຮຣ. 9:6-8 e
13. ຫ້ອງບໍລິສຸດກັບຫ້ອງບໍລິສຸດທີ່ສຸດທີ່ຢູ່ໃນເຕັ້ນສັກສິດເປັນພາບສະແດງເຖິງຫຍັງ?
13 ການນະມັດສະການຂອງຄລິດສະຕຽນ. ມີແຕ່ລູກສິດຂອງພະເຢຊູຈຳນວນ 144.000 ຄົນທີ່ຖືກເລືອກດ້ວຍພະລັງບໍລິສຸດແລະມີສາຍສຳພັນທີ່ພິເສດກັບພະເຢໂຫວາຈຶ່ງຈະໄດ້ຮັບໃຊ້ເປັນປະໂລຫິດຮ່ວມກັບພະເຢຊູໃນສະຫວັນ. (ພນມ. 1:6; 14:1) ຫ້ອງບໍລິສຸດໃນເຕັ້ນສັກສິດເປັນພາບສະແດງເຖິງການທີ່ຜູ້ຖືກເລືອກຖືກຮັບເປັນລູກຂອງພະເຈົ້າຕອນທີ່ເຂົາເຈົ້າຍັງມີຊີວິດຢູ່ໃນໂລກນີ້. (ຣມ. 8:15-17) ຫ້ອງບໍລິສຸດທີ່ສຸດເປັນພາບສະແດງເຖິງສະຫວັນ ເຊິ່ງເປັນບ່ອນຢູ່ຂອງພະເຢໂຫວາ. “ຜ້າກັ້ງ” ທີ່ຂັ້ນລະຫວ່າງຫ້ອງບໍລິສຸດກັບຫ້ອງບໍລິສຸດທີ່ສຸດເປັນພາບສະແດງເຖິງຮ່າງກາຍຂອງພະເຢຊູທີ່ເປັນມະນຸດ. ຖ້າເພິ່ນຍັງມີຮ່າງກາຍແບບນີ້ຢູ່ ເພິ່ນກໍບໍ່ສາມາດໄປສະຫວັນເພື່ອເຮັດໜ້າທີ່ປະໂລຫິດໃຫຍ່ທີ່ຍິ່ງໃຫຍ່ຢູ່ວິຫານໂດຍໄນໄດ້. ດັ່ງນັ້ນ ເພິ່ນຈຶ່ງຕ້ອງສະລະຮ່າງກາຍຂອງເພິ່ນ. ການເຮັດແບບນີ້ເປີດໂອກາດໃຫ້ທຸກຄົນທີ່ຖືກເລືອກຂຶ້ນໄປສະຫວັນໄດ້. ແຕ່ເຂົາເຈົ້າກໍຕ້ອງສະລະຮ່າງກາຍທີ່ເປັນມະນຸດເພື່ອຈະໄດ້ຮັບລາງວັນໃນສະຫວັນ. (ຮຣ. 10:19, 20; 1ກຣ. 15:50) ຫຼັງຈາກທີ່ພະເຢຊູຟື້ນຄືນມາຈາກຕາຍ ເພິ່ນກໍເຂົ້າໄປຫ້ອງບໍລິສຸດທີ່ສຸດຂອງວິຫານໂດຍໄນ ເຊິ່ງໃນທີ່ສຸດທຸກຄົນທີ່ຖືກເລືອກກໍຈະເຂົ້າໄປບ່ອນນັ້ນຄືກັນ.
14. ຕາມເຮັບເຣີ 9:12, 24-26 ອັນໃດທີ່ເຮັດໃຫ້ການຈັດກຽມຂອງພະເຢໂຫວາເລື່ອງວິຫານໂດຍໄນດີກວ່າການນະມັດສະການຂອງຄົນຢິວ?
14 ເຮົາເຫັນໄດ້ແຈ້ງວ່າການຈັດກຽມຂອງພະເຢໂຫວາທີ່ຊ່ວຍເຮົາໃຫ້ນະມັດສະການເພິ່ນໃນແບບທີ່ເພິ່ນຍອມຮັບໂດຍອາໄສຄ່າໄຖ່ ແລະການເຮັດໜ້າທີ່ປະໂລຫິດຂອງພະເຢຊູເປັນເລື່ອງທີ່ດີກວ່າການນະມັດສະການຂອງຄົນຢິວແທ້ໆ. ປະໂລຫິດໃຫຍ່ຂອງພວກອິດສະຣາເອນເອົາເລືອດສັດເຂົ້າໄປໃນຫ້ອງບໍລິສຸດທີ່ສຸດເພື່ອມອບເປັນເຄື່ອງບູຊາໃຫ້ພະເຢໂຫວາ. ແຕ່ພະເຢຊູ “ເຂົ້າໄປໃນສະຫວັນ” ເຊິ່ງເປັນບ່ອນບໍລິສຸດທີ່ສຸດຢູ່ຕໍ່ໜ້າພະເຢໂຫວາ. ເພິ່ນເອົາສິດຂອງເພິ່ນໃນການເປັນມະນຸດສົມບູນແບບໃນໂລກມອບໃຫ້ພະເຢໂຫວາ “ເພື່ອກຳຈັດບາບຕະຫຼອດໄປໂດຍຖວາຍຕົວເພິ່ນເອງເປັນເຄື່ອງບູຊາ.” (ອ່ານເຮັບເຣີ 9:12, 24-26) ເຄື່ອງບູຊາຂອງພະເຢຊູເປັນເຄື່ອງບູຊາທີ່ດີທີ່ສຸດ ຍ້ອນສາມາດກຳຈັດບາບໄດ້ຕະຫຼອດໄປສຳລັບເຮົາ. ເລື່ອງທີ່ເຮົາຈະຮຽນຕໍ່ໄປແມ່ນ ເຮົາທຸກຄົນສາມາດນະມັດສະການພະເຢໂຫວາຢູ່ວິຫານໂດຍໄນໄດ້ ບໍ່ວ່າເຮົາຈະມີຄວາມຫວັງທີ່ຈະໄປສະຫວັນຫຼືຢູ່ໃນໂລກ.
ເດີ່ນທາງໃນແລະທາງນອກຂອງວິຫານ
15. ໃຜທີ່ຮັບໃຊ້ຢູ່ເດີ່ນຂອງເຕັ້ນສັກສິດ?
15 ການນະມັດສະການຂອງຄົນຢິວໃນສະໄໝແຕ່ກີ້. ເດີ່ນເຕັ້ນສັກສິດເປັນບ່ອນໂລ່ງທີ່ມີຮົ້ວອ້ອມ ແລະມີແຕ່ພວກປະໂລຫິດເທົ່ານັ້ນທີ່ຈະເຮັດວຽກຮັບໃຊ້ຢູ່ຫັ້ນ. ຢູ່ເດີ່ນນັ້ນມີແທ່ນບູຊາທອງແດງສຳລັບເຜົາເຄື່ອງບູຊາເຜົາ ແລະມີອ່າງທອງແດງທີ່ພວກປະໂລຫິດໃຊ້ເພື່ອລ້າງຕີນລ້າງມືກ່ອນຈະເຮັດວຽກຮັບໃຊ້ທີ່ສັກສິດ. (ອພຍ. 30:17-20; 40:6-8) ຕໍ່ມາ ເມື່ອມີການສ້າງວິຫານກໍມີເດີ່ນທາງນອກນຳ ເຊິ່ງເປັນບ່ອນທີ່ຄົນທີ່ບໍ່ແມ່ນປະໂລຫິດມານະມັດສະການພະເຈົ້າໄດ້.
16. ໃຜທີ່ຮັບໃຊ້ຢູ່ເດີ່ນທາງໃນຂອງວິຫານໂດຍໄນ? ແລະໃຜທີ່ຮັບໃຊ້ຢູ່ເດີ່ນທາງນອກຂອງວິຫານໂດຍໄນ?
16 ການນະມັດສະການຂອງຄລິດສະຕຽນ. ກ່ອນທີ່ຄົນທີ່ຖືກເລືອກຈະຂຶ້ນໄປຮັບໃຊ້ເປັນປະໂລຫິດຮ່ວມກັບພະເຢຊູໃນສະຫວັນ ເຂົາເຈົ້າຮັບໃຊ້ຢ່າງສັດຊື່ໃນໂລກຢູ່ເດີ່ນທາງໃນຂອງວິຫານໂດຍໄນ. ອ່າງໃຫຍ່ທີ່ຢູ່ເດີ່ນເຕັ້ນສັກສິດແລະເດີ່ນວິຫານເຕືອນໃຈເຂົາເຈົ້າແລະຄລິດສະຕຽນທຸກຄົນວ່າ ຕ້ອງຮັກສາຄວາມສະອາດດ້ານສິນລະທຳແລະດ້ານຄວາມເຊື່ອຢູ່ສະເໝີ. ແລ້ວ “ຄົນຝູງໃຫຍ່” ທີ່ສະໜັບສະໜູນຄົນທີ່ຖືກເລືອກເດ? ເຂົາເຈົ້ານະມັດສະການພະເຈົ້າຢູ່ໃສ? ອັກຄະສາວົກໂຢຮັນເຫັນເຂົາເຈົ້າຢືນ “ຢູ່ຕໍ່ໜ້າບັນລັງຂອງພະເຈົ້າແລະເຮັດວຽກຮັບໃຊ້ທີ່ສັກສິດໃຫ້ພະອົງທັງເວັນທັງຄືນໃນວິຫານຂອງພະອົງ.” (ພນມ. 7:9, 13-15) ດັ່ງນັ້ນ ຄົນຝູງໃຫຍ່ນະມັດສະການພະເຈົ້າໃນໂລກຢູ່ເດີ່ນທາງນອກຂອງວິຫານໂດຍໄນ. ເຮົາເຫັນຄ່າແທ້ໆທີ່ພະເຢໂຫວາໃຫ້ເຮົາມີໂອກາດນະມັດສະການເພິ່ນຢູ່ວິຫານໂດຍໄນທີ່ຍິ່ງໃຫຍ່!
ເຮົາມີສິດທິພິເສດທີ່ໄດ້ນະມັດສະການພະເຢໂຫວາ
17. ເຮົາມີສິດທິພິເສດທີ່ໄດ້ມອບເຄື່ອງບູຊາແບບໃດໃຫ້ພະເຢໂຫວາ?
17 ໃນທຸກມື້ນີ້ ຄລິດສະຕຽນທຸກຄົນມີສິດທິພິເສດທີ່ໄດ້ມອບເຄື່ອງບູຊາໃຫ້ພະເຢໂຫວາໂດຍໃຊ້ເວລາ ກຳລັງ ແລະຊັບສິນເງິນຄຳເພື່ອສະໜັບສະໜູນການປົກຄອງຂອງເພິ່ນ. ຄືກັບທີ່ໂປໂລບອກຄລິດສະຕຽນໃນແຂວງຢູດາຍ ເຮົາກໍສາມາດ “ຖວາຍເຄື່ອງບູຊາຜ່ານທາງພະເຢຊູສະເໝີເຊິ່ງກໍແມ່ນຄຳສັນລະເສີນພະເຈົ້າ ເປັນຄຳເວົ້າທີ່ອອກຈາກປາກພວກເຮົາເຊິ່ງປະກາດຊື່ຂອງພະອົງຢ່າງເປີດເຜີຍ.” (ຮຣ. 13:15) ເຮົາສາມາດສະແດງໃຫ້ເຫັນວ່າ ເຮົາເຫັນຄ່າສິດທິພິເສດທີ່ໄດ້ນະມັດສະການພະເຢໂຫວາໂດຍເຮັດທຸກສິ່ງທີ່ເຮົາເຮັດໄດ້ໃຫ້ເພິ່ນ.
18. ຕາມເຮັບເຣີ 10:22-25 ເຮົາຕ້ອງເຮັດຫຍັງສະເໝີ? ແລະເຮົາຕ້ອງບໍ່ລືມຫຍັງ?
18 ອ່ານເຮັບເຣີ 10:22-25. ໃນຕອນທ້າຍຂອງຈົດໝາຍທີ່ໂປໂລຂຽນໄປຫາຄລິດສະຕຽນໃນແຂວງຢູດາຍ ລາວເວົ້າເຖິງບາງຢ່າງທີ່ເຮົາຕ້ອງເຮັດສະເໝີໃນການນະມັດສະການພະເຢໂຫວາ. ສິ່ງເຫຼົ່ານັ້ນແມ່ນ ການອະທິດຖານຫາພະເຢໂຫວາ ປະກາດກັບຄົນອື່ນ ໄປປະຊຸມ ໃຫ້ກຳລັງໃຈກັນ ແລະ “ເຮັດສິ່ງເຫຼົ່ານີ້ໃຫ້ຫຼາຍຂຶ້ນເມື່ອ [ເຮົາ] ເຫັນວ່າວັນ [ຂອງພະເຢໂຫວາ] ໃກ້ຈະມາຮອດແລ້ວ.” ໃນຕອນທ້າຍຂອງປຶ້ມພະນິມິດ ທູດສະຫວັນຂອງພະເຢໂຫວາເວົ້າ 2 ເທື່ອວ່າ “ໃຫ້ນະມັດສະການພະເຈົ້າ!” (ພນມ. 19:10; 22:9) ຂໍໃຫ້ເຮົາຢ່າລືມຄວາມຈິງທີ່ເລິກເຊິ່ງກ່ຽວກັບວິຫານໂດຍໄນທີ່ຍິ່ງໃຫຍ່ຂອງພະເຢໂຫວາ ແລະຂໍໃຫ້ເຮົາເຫັນຄ່າສິດທິພິເສດທີ່ໄດ້ນະມັດສະການພະເຈົ້າທີ່ຍິ່ງໃຫຍ່ຂອງເຮົາ!
ເພງ 88 ຂໍໃຫ້ເຮົາຮູ້ທາງຂອງພະອົງ
a ຄຳສອນທີ່ເລິກເຊິ່ງເລື່ອງໜຶ່ງທີ່ຢູ່ໃນຄຳພີໄບເບິນແມ່ນເລື່ອງວິຫານໂດຍໄນທີ່ຍິ່ງໃຫຍ່ຂອງພະເຢໂຫວາ. ວິຫານນີ້ໝາຍເຖິງຫຍັງ? ໃນບົດຄວາມນີ້ເຮົາຈະມາເບິ່ງລາຍລະອຽດຕ່າງໆໃນປຶ້ມເຮັບເຣີທີ່ເວົ້າກ່ຽວກັບວິຫານນີ້. ບົດຄວາມນີ້ຈະຊ່ວຍເຈົ້າໃຫ້ເຫັນຄ່າຫຼາຍຂຶ້ນໃນສິດທິພິເສດທີ່ໄດ້ນະມັດສະການພະເຢໂຫວາ.
b ເພື່ອຈະຮູ້ວ່າປຶ້ມເຮັບເຣີເວົ້າເລື່ອງຫຍັງ ໃຫ້ເບິ່ງວິດີໂອບົດນຳຂອງປຶ້ມເຮັບເຣີ ໃນເວັບໄຊ jw.org.
c ປຶ້ມເຮັບເຣີເປັນປຶ້ມຫົວດຽວໃນພະຄຳພີຄລິດສະຕຽນພາກພາສາກຣີກທີ່ເວົ້າເຖິງພະເຢຊູວ່າເປັນປະໂລຫິດໃຫຍ່.
d ປຶ້ມອ້າງອີງຫົວໜຶ່ງບອກວ່າອາດມີປະໂລຫິດໃຫຍ່ຮອດ 84 ຄົນເຮັດໜ້າທີ່ສືບຕໍ່ກັນຈົນຮອດຕອນທີ່ວິຫານໃນເມືອງເຢຣູຊາເລັມຖືກທຳລາຍໃນປີ 70.
e ເພື່ອຈະເຂົ້າໃຈຄວາມໝາຍຂອງສິ່ງທີ່ປະໂລຫິດໃຫຍ່ເຮັດໃນວັນໄຖ່ຄວາມຜິດ ໃຫ້ເບິ່ງວິດີໂອເລື່ອງເຕັ້ນສັກສິດ ໃນເວັບໄຊ jw.org. (ພາສາອັງກິດ)
f ເບິ່ງປຶ້ມການນະມັດສະການທີ່ບໍລິສຸດຂອງພະເຢໂຫວາໄດ້ຮັບການຟື້ນຟູ! ໜ້າ 240. (ພາສາໄທ)
g ເບິ່ງຂອບ “ວິທີທີ່ພະວິນຍານເປີດເຜີຍຄວາມໝາຍຂອງພະວິຫານຝ່າຍວິນຍານ” ໃນຫໍສັງເກດການ 15 ກໍລະກົດ 2010 ໜ້າ 22. (ພາສາໄທ)
