ຄຳຖາມຈາກຜູ້ອ່ານ
ຫ້ອງທີ່ຢູ່ທາງເຂົ້າທາງໜ້າຂອງວິຫານທີ່ໂຊໂລໂມນສ້າງສູງສ່ຳໃດ?
ວິຫານທີ່ໂຊໂລໂມນສ້າງມີຫ້ອງທີ່ຢູ່ທາງເຂົ້າທາງໜ້າເຊິ່ງເປັນທາງເຂົ້າຫ້ອງບໍລິສຸດ. ຄຳພີໄບເບິນສະບັບແປໂລກໃໝ່ທີ່ອອກກ່ອນປີ 2023 ບອກວ່າ: “ຫ້ອງທີ່ຢູ່ທາງເຂົ້າທາງໜ້າກວ້າງ 20 ສອກສ່ຳກັບຄວາມກວ້າງຂອງວິຫານ ແລະສູງ 120.” (2ຂຄ. 3:4) ນອກຈາກນັ້ນ ຄຳພີໄບເບິນສະບັບແປອື່ນກໍບອກວ່າຫ້ອງທີ່ຢູ່ທາງເຂົ້າທາງໜ້າສູງ “120 ສອກ” ຫຼື 53 ແມັດ.
ແຕ່ຄຳພີໄບເບິນສະບັບແປໂລກໃໝ່ທີ່ອອກປີ 2023 ບອກວ່າຫ້ອງທີ່ຢູ່ທາງເຂົ້າທາງໜ້າຂອງວິຫານທີ່ໂຊໂລໂມນສ້າງ “ສູງ 20 ສອກ” ຫຼືປະມານ 9 ແມັດ. a ໃຫ້ເຮົາເບິ່ງບາງເຫດຜົນນຳກັນສຳລັບການປັບປ່ຽນນີ້.
ໃນ 1 ກະສັດ 6:3 ບໍ່ໄດ້ເວົ້າເຖິງຄວາມສູງຂອງຫ້ອງທີ່ຢູ່ທາງເຂົ້າທາງໜ້າ. ໃນຂໍ້ນີ້ ເຢເຣມີຢາທີ່ເປັນຜູ້ຂຽນເວົ້າເຖິງແຕ່ຄວາມຍາວແລະຄວາມກວ້າງຂອງຫ້ອງ ແຕ່ບໍ່ໄດ້ເວົ້າເຖິງຄວາມສູງ. ໃນບົດຕໍ່ມາ ລາວເວົ້າເຖິງລາຍລະອຽດອື່ນໆທີ່ໜ້າສົນໃຈຂອງວິຫານ ລວມທັງອ່າງທະເລທອງແດງ ລໍ້ 10 ຄັນ ແລະເສົາທອງແດງ 2 ຕົ້ນທີ່ຢູ່ທາງນອກຫ້ອງທີ່ຢູ່ທາງເຂົ້າທາງໜ້າ. (1ກສ. 7:15-37) ຖ້າຫ້ອງທີ່ຢູ່ທາງເຂົ້າທາງໜ້າສູງກາຍ 50 ແມັດແທ້ໆແລະສູງກວ່າສ່ວນອື່ນໆຂອງວິຫານ ເປັນຫຍັງເຢເຣມີຢາຈຶ່ງບໍ່ເວົ້າເຖິງຄວາມສູງຂອງຫ້ອງນີ້? ທີ່ຈິງ ຫຼາຍຮ້ອຍປີຕໍ່ມາພວກນັກປະຫວັດສາດຄົນຢິວບອກວ່າຫ້ອງນີ້ບໍ່ໄດ້ສູງກວ່າສ່ວນອື່ນໆຂອງວິຫານທີ່ໂຊໂລໂມນສ້າງ.
ນັກວິຊາການສົງໄສວ່າຖ້າຫ້ອງທີ່ຢູ່ທາງເຂົ້າທາງໜ້າສູງ 120 ສອກແທ້ ຝາຂອງຫ້ອງຈະຮັບນ້ຳໜັກໄດ້ບໍ. ໃນສະໄໝບູຮານ ສິ່ງປຸກສ້າງທີ່ສູງໆເຮັດຈາກຫີນແລະດິນຈີ່ ເຊັ່ນ ປະຕູວິຫານຢູ່ເອຢິບ. ສິ່ງປຸກສ້າງເຫຼົ່ານີ້ມີຖານທີ່ໃຫຍ່ແລະກວ້າງ ແລະຈະຄ່ອຍໆນ້ອຍລົງຈົນຮອດຈອມ. ແຕ່ວິຫານທີ່ໂຊໂລໂມນສ້າງບໍ່ເປັນແບບນັ້ນ. ພວກນັກວິຊາການເຊື່ອວ່າຝາຂອງວິຫານຄືຊິໜາບໍ່ກາຍ 6 ສອກຫຼືປະມານ 2,7 ແມັດ. ຕີໂອດໍ ບັດສ໌ກິນ ນັກປະຫວັດສາດທີ່ຊ່ຽວຊານດ້ານສະຖາປັດຕະຍະກຳລົງຄວາມເຫັນວ່າ: “ຖ້າອີງຕາມຂໍ້ມູນກ່ຽວກັບຄວາມໜາຂອງຝາ [ຫ້ອງທີ່ຢູ່ທາງເຂົ້າທາງໜ້າຂອງວິຫານ] ນີ້ ຫ້ອງທີ່ຢູ່ທາງເຂົ້າທາງໜ້າກໍບໍ່ຄວນສູງກາຍ 120 ສອກ.”
ຂໍ້ຄວາມໃນ 2 ຂ່າວຄາວ 3:4 ອາດຄັດລອກຜິດ. ເຖິງວ່າໃນຂໍ້ນີ້ມີສຳເນົາພະຄຳພີບາງສະບັບຂຽນວ່າ “120” ແຕ່ໃນສຳເນົາອື່ນໆທີ່ເຊື່ອຖືໄດ້ ເຊັ່ນ: ໂຄເດັກສ໌ອະເລັກຊານດຣິນຸສ໌ໃນສະຕະວັດທີ 5 ແລະໂຄເດັກສ໌ອຳໂບຣເຊນນຸສ໌ໃນສະຕະວັດທີ 6 ກໍຂຽນວ່າ “20 ສອກ.” ເປັນຫຍັງຈຶ່ງມີການຄັດລອກຜິດເປັນ “120”? ຍ້ອນໃນພາສາເຮັບເຣີຄຳວ່າ “ໜຶ່ງຮ້ອຍ” ກັບ “ສອກ” ມີໂຕອັກສອນເຮັບເຣີທີ່ຄ້າຍກັນ. ດັ່ງນັ້ນ ຜູ້ຄັດລອກອາດຈະຂຽນຄຳວ່າ “ໜຶ່ງຮ້ອຍ” ແທນທີ່ຈະຂຽນຄຳວ່າ “ສອກ.”
ແນ່ນອນວ່າ ເຖິງວ່າເຮົາພະຍາຍາມເຂົ້າໃຈລາຍລະອຽດແລະອະທິບາຍໃຫ້ເຫັນພາບວິຫານທີ່ໂຊໂລໂມນສ້າງໃຫ້ຖືກຕ້ອງທີ່ສຸດເທົ່າທີ່ເປັນໄປໄດ້ ແຕ່ສິ່ງທີ່ສຳຄັນແມ່ນເຮົາຢາກເຂົ້າໃຈວ່າວິຫານນີ້ໝາຍເຖິງຫຍັງ. ວິຫານນີ້ໝາຍເຖິງວິຫານໂດຍໄນ. ເຮົາຂອບໃຈແທ້ໆທີ່ພະເຢໂຫວາເຊີນຜູ້ຮັບໃຊ້ຂອງເພິ່ນທຸກຄົນໃຫ້ເຂົ້າມານະມັດສະການເພິ່ນຢູ່ວິຫານໂດຍໄນ.—ຮຣ. 9:11-14; ພນມ. 3:12; 7:9-17
a ໄຂເງື່ອນໃນຂໍ້ຄຳພີນີ້ບອກວ່າ “ສຳເນົາພະຄຳພີເກົ່າແກ່ບາງສະບັບຂຽນວ່າ ‘120’ ແຕ່ສຳເນົາພະຄຳພີອື່ນໆແລະພະຄຳພີສະບັບແປບາງສະບັບຂຽນວ່າ ‘20 ສອກ.’”