ບົດຄວາມສຶກສາທີ 40
ເພງທີ 30 ພະອົງເປັນພະເຈົ້າ ເປັນພໍ່ ແລະເພື່ອນຂອງຂ້ອຍ
ພະເຢໂຫວາ “ປິ່ນປົວຄົນທີ່ຫົວໃຈແຕກສະຫຼາຍ”
“ເພິ່ນປິ່ນປົວຄົນທີ່ຫົວໃຈແຕກສະຫຼາຍ ແລະເພິ່ນພັນບາດໃຫ້ເຂົາເຈົ້ານຳ.”—ພສ. 147:3
ຈຸດສຳຄັນ
ພະເຢໂຫວາເປັນຫ່ວງຜູ້ທີ່ມີບາດແຜທາງຈິດໃຈ. ບົດນີ້ຈະຊ່ວຍເຮົາໃຫ້ເຫັນວ່າພະເຢໂຫວາຊ່ວຍເຮົາແນວໃດໃຫ້ຮັບມືກັບຄວາມໂສກເສົ້າເສຍໃຈ ແລະເພິ່ນຊ່ວຍເຮົາແນວໃດເພື່ອໃຫ້ກຳລັງໃຈຄົນອື່ນ.
1. ພະເຢໂຫວາຮູ້ສຶກແນວໃດຕໍ່ຜູ້ຮັບໃຊ້ຂອງເພິ່ນ?
ພະເຢໂຫວາເຫັນທຸກສິ່ງທີ່ຜູ້ຮັບໃຊ້ຂອງເພິ່ນຢູ່ໃນໂລກນີ້ເຈິ. ເພິ່ນເຫັນທັງຕອນທີ່ເຮົາມີຄວາມສຸກແລະຕອນທີ່ເຮົາມີຄວາມທຸກ. (ພສ. 37:18) ເມື່ອເພິ່ນເຫັນວ່າເຮົາກຳລັງພະຍາຍາມສຸດຄວາມສາມາດເພື່ອຮັບໃຊ້ເພິ່ນເຖິງວ່າເຮົາຕ້ອງເຈິເລື່ອງທີ່ເຮັດໃຫ້ທຸກໃຈ ເພິ່ນກໍດີໃຈຫຼາຍທີ່ເຮົາເຮັດແບບນັ້ນ. ນອກຈາກດີໃຈແລ້ວ ເພິ່ນກໍພ້ອມທີ່ຈະຊ່ວຍເຮົາແລະໃຫ້ກຳລັງໃຈເຮົາ.
2. ພະເຢໂຫວາເບິ່ງແຍງຄົນທີ່ຫົວໃຈແຕກສະຫຼາຍແນວໃດ ແລະເຮົາຕ້ອງເຮັດຫຍັງເພື່ອຈະໄດ້ຮັບການເບິ່ງແຍງຈາກເພິ່ນ?
2 ເພງສັນລະເສີນ 147:3 ເຮັດໃຫ້ເຫັນວ່າພະເຢໂຫວາເບິ່ງແຍງຄົນທີ່ຫົວໃຈແຕກສະຫຼາຍຄືກັບທີ່ທ່ານໝໍເບິ່ງແຍງຄົນທີ່ບາດເຈັບ. ພະຄຳພີຂໍ້ນີ້ເຮັດໃຫ້ເຮົາເຫັນວິທີທີ່ພະເຢໂຫວາເບິ່ງແຍງຄົນທີ່ມີບາດແຜທາງຈິດໃຈ. ແຕ່ເຮົາຕ້ອງເຮັດຫຍັງຖ້າເຮົາຢາກໄດ້ຮັບການເບິ່ງແຍງຈາກພະເຢໂຫວາ? ໃຫ້ເບິ່ງຕົວຢ່າງຕໍ່ໄປນີ້. ທ່ານໝໍທີ່ເກັ່ງສາມາດປົວຄົນທີ່ບາດເຈັບໃຫ້ເຊົາໄດ້. ແຕ່ເພື່ອຈະເຊົາ ຄົນທີ່ບາດເຈັບຕ້ອງເຮັດຕາມຄຳແນະນຳທຸກຢ່າງຂອງທ່ານໝໍ. ຄ້າຍຄືກັນ ເຮົາຕ້ອງເຮັດຕາມຄຳແນະນຳຂອງພະເຢໂຫວາເພື່ອຈະໄດ້ຮັບການປິ່ນປົວທາງຈິດໃຈ. ໃນບົດນີ້ ເຮົາຈະເບິ່ງວ່າພະເຢໂຫວາໃຫ້ຄຳແນະນຳຫຍັງໃນຄຳພີໄບເບິນເພື່ອຊ່ວຍຄົນທີ່ກຳລັງທຸກໃຈ ແລະເຮົາຈະເບິ່ງວ່າເຮົາຈະເຮັດຕາມຄຳແນະນຳຂອງເພິ່ນໄດ້ແນວໃດ.
ພະເຢໂຫວາຮັບປະກັນວ່າເຮົາມີຄ່າຫຼາຍຕໍ່ເພິ່ນ
3. ເປັນຫຍັງບາງຄົນຮູ້ສຶກວ່າໂຕເອງບໍ່ມີຄ່າ?
3 ເຮົາຢູ່ໃນໂລກທີ່ມີແຕ່ຄົນທີ່ບໍ່ສະແດງຄວາມຮັກ. ຫຼາຍຄົນຈຶ່ງຮູ້ສຶກວ່າໂຕເອງບໍ່ມີຄ່າ. ພີ່ນ້ອງຍິງຊື່ເຮເລັນ aເວົ້າວ່າ: “ຂ້ອຍໃຫຍ່ມາໃນຄອບຄົວທີ່ບໍ່ໄດ້ຮັກກັນ. ພໍ່ມັກໃຊ້ຄວາມຮຸນແຮງແລະດ່າພວກເຮົາທຸກຄົນໃນຄອບຄົວວ່າເປັນຄົນບໍ່ມີປະໂຫຍດຫຍັງ.” ບາງເທື່ອເຈົ້າອາດເຄີຍເຈິຄືກັບເຮເລັນ. ເຈົ້າຖືກປະຕິບັດແບບບໍ່ດີ ຖືກດ່າ ຫຼືຖືກເຮັດໃຫ້ຮູ້ສຶກວ່າໂຕເອງບໍ່ມີຄ່າ. ຖ້າເປັນແບບນັ້ນ ເຈົ້າຄືຊິຮູ້ສຶກວ່າຍາກທີ່ຈະເຊື່ອວ່າມີຄົນຮັກເຈົ້າແທ້ໆ.
4. ໃນເພງສັນລະເສີນ 34:18 ພະເຢໂຫວາຮັບປະກັນກັບເຮົາແນວໃດ?
4 ເຖິງວ່າຄົນອື່ນຈະປະຕິບັດກັບເຈົ້າແບບບໍ່ດີ ແຕ່ເຈົ້າໝັ້ນໃຈໄດ້ວ່າພະເຢໂຫວາຮັກແລະເບິ່ງວ່າເຈົ້າມີຄ່າຫຼາຍ. ເພິ່ນ “ຢູ່ໃກ້ຄົນທີ່ຫົວໃຈແຕກສະຫຼາຍ.” (ອ່ານເພງສັນລະເສີນ 34:18) ຖ້າເຈົ້າກຳລັງ “ທໍ້ໃຈແຮງ” ຂໍໃຫ້ຈື່ໄວ້ວ່າພະເຢໂຫວາເຫັນສິ່ງທີ່ດີໃນໂຕເຈົ້າ ແລະເພິ່ນຊັກນຳເຈົ້າເປັນສ່ວນໂຕໃຫ້ເຂົ້າມາຫາເພິ່ນ. (ຢຮ. 6:44) ເພິ່ນພ້ອມທີ່ຈະຊ່ວຍເຈົ້າສະເໝີ ຍ້ອນເຈົ້າມີຄ່າຫຼາຍສຳລັບເພິ່ນ.
5. ເຮົາໄດ້ຮຽນຫຍັງຈາກວິທີທີ່ພະເຢຊູປະຕິບັດກັບຄົນທີ່ຖືກຄົນອື່ນດູຖູກ?
5 ເຮົາສາມາດຮູ້ວ່າພະເຢໂຫວາຮູ້ສຶກແນວໃດຈາກຕົວຢ່າງຂອງພະເຢຊູ. ຕອນທີ່ພະເຢຊູມີຊີວິດຢູ່ໃນໂລກ ເພິ່ນສົນໃຈຄົນທີ່ຖືກຄົນອື່ນດູຖູກແລະເພິ່ນປະຕິບັດກັບເຂົາເຈົ້າດ້ວຍຄວາມເຫັນອົກເຫັນໃຈ. (ມທ. 9:9-12) ເມື່ອຜູ້ຍິງຄົນໜຶ່ງທີ່ເປັນພະຍາດຮ້າຍແຮງມາບາຍເສື້ອຂອງພະເຢຊູຍ້ອນຫວັງວ່າຈະເຊົາຈາກພະຍາດນັ້ນ ພະເຢຊູເວົ້າປອບໃຈລາວແລະຊົມເຊີຍລາວທີ່ມີຄວາມເຊື່ອ. (ມຣກ. 5:25-34) ພະເຢຊູຮຽນແບບພະເຢໂຫວາພໍ່ຂອງເພິ່ນໄດ້ຢ່າງສົມບູນແບບ. (ຢຮ. 14:9) ດັ່ງນັ້ນ ເຈົ້າກໍໝັ້ນໃຈໄດ້ວ່າພະເຢໂຫວາເບິ່ງວ່າເຈົ້າມີຄ່າ ແລະເພິ່ນເຫັນສິ່ງດີໆໃນໂຕເຈົ້າເຊິ່ງລວມເຖິງຄວາມເຊື່ອແລະຄວາມຮັກທີ່ເຈົ້າມີຕໍ່ເພິ່ນ.
6. ຖ້າເຈົ້າຮູ້ສຶກວ່າໂຕເອງບໍ່ມີຄ່າ ເຈົ້າຄວນເຮັດຫຍັງ?
6 ເຈົ້າຄວນເຮັດແນວໃດຖ້າຮູ້ສຶກເລື້ອຍໆວ່າໂຕເອງບໍ່ມີຄ່າ? ໃຫ້ອ່ານຂໍ້ຄຳພີທີ່ຊ່ວຍເຈົ້າໃຫ້ໝັ້ນໃຈວ່າເຈົ້າມີຄ່າຕໍ່ພະເຢໂຫວາແລະຄິດຕຶກຕອງກ່ຽວກັບຂໍ້ຄຳພີເຫຼົ່ານັ້ນ. b (ພສ. 94:19) ຖ້າເຈົ້າເຮັດບໍ່ໄດ້ຕາມທີ່ຕັ້ງເປົ້າໝາຍໄວ້ຫຼືທໍ້ໃຈຍ້ອນຮູ້ສຶກວ່າເຮັດບໍ່ໄດ້ຫຼາຍຄືກັບຄົນອື່ນ ຢ່າຕຳໜິໂຕເອງ ຍ້ອນພະເຢໂຫວາບໍ່ໄດ້ຄາດໝາຍຈາກເຈົ້າຫຼາຍກວ່າທີ່ເຈົ້າເຮັດໄດ້. (ພສ. 103:13, 14) ຖ້າໃນອະດີດມີຄົນເຮັດບໍ່ດີກັບເຈົ້າ ຢ່າໂທດໂຕເອງ ຍ້ອນມັນບໍ່ແມ່ນຄວາມຜິດຂອງເຈົ້າ. ທີ່ຈິງ ເຈົ້າບໍ່ຄວນຖືກປະຕິບັດແບບນັ້ນ! ຂໍໃຫ້ຈື່ໄວ້ວ່າພະເຢໂຫວາຈະຕັດສິນຄົນທີ່ເຮັດຜິດ ບໍ່ແມ່ນຕັດສິນຄົນທີ່ຖືກທຳຮ້າຍ. (1ປຕ. 3:12) ຊານດຣ້າທີ່ຖືກທຳຮ້າຍຕອນເປັນເດັກນ້ອຍເວົ້າວ່າ: “ຂ້ອຍອະທິດຖານຫາພະເຢໂຫວາຕະຫຼອດຂໍໃຫ້ເພິ່ນຊ່ວຍຂ້ອຍໃຫ້ເຫັນສິ່ງດີໆໃນໂຕເອງຄືກັບທີ່ເພິ່ນເຫັນ.”
7. ສິ່ງທີ່ເຮົາເຄີຍເຈິໃນອະດີດເປັນປະໂຫຍດແນວໃດໃນການຮັບໃຊ້ພະເຢໂຫວາ?
7 ພະເຢໂຫວາສາມາດໃຊ້ເຈົ້າໃຫ້ຊ່ວຍຄົນອື່ນໄດ້. ເພິ່ນໃຫ້ກຽດເຈົ້າໂດຍໃຫ້ເຈົ້າເປັນໝູ່ເຮັດວຽກກັບເພິ່ນໃນການປະກາດ. (1ກຣ. 3:9) ສິ່ງທີ່ເຈົ້າເຈິໃນຊີວິດອາດເຮັດໃຫ້ເຈົ້າເຫັນອົກເຫັນໃຈຄົນອື່ນ ເຂົ້າໃຈຄົນອື່ນ ແລະຊ່ວຍຄົນອື່ນໄດ້ຫຼາຍ. ເຮເລັນທີ່ເວົ້າເຖິງກ່ອນໜ້ານີ້ເຄີຍໄດ້ຮັບຄວາມຊ່ວຍເຫຼືອຈາກພະເຢໂຫວາແລະພີ່ນ້ອງ ແລະຕອນນີ້ລາວສາມາດຊ່ວຍຄົນອື່ນໄດ້. ລາວເວົ້າວ່າ: “ຂ້ອຍເຄີຍຮູ້ສຶກວ່າໂຕເອງບໍ່ມີຄ່າ ແຕ່ພະເຢໂຫວາເຮັດໃຫ້ຂ້ອຍເຫັນວ່າມີຄົນຮັກຂ້ອຍ ແລະເພິ່ນໃຊ້ຂ້ອຍໃຫ້ຊ່ວຍຄົນອື່ນ.” ເຮເລັນມີຄວາມສຸກຫຼາຍທີ່ໄດ້ຮັບໃຊ້ເປັນໄພໂອເນຍປະຈຳ.
ພະເຢໂຫວາຢາກໃຫ້ເຮົາຍອມຮັບວ່າເພິ່ນຍົກໂທດໃຫ້ເຮົາແລ້ວ
8. ໃນເອຊາຢາ 1:18 ພະເຢໂຫວາຮັບປະກັນຫຍັງກັບເຮົາ?
8 ຜູ້ຮັບໃຊ້ຂອງພະເຢໂຫວາບາງຄົນເສຍໃຈບໍ່ເຊົາກັບຄວາມຜິດທີ່ເຄີຍເຮັດຜ່ານມາ ບໍ່ວ່າຈະເປັນກ່ອນຫຼືຫຼັງຈາກຮັບບັບເຕມາແລ້ວ. ແຕ່ເຮົາຄວນຈື່ໄວ້ວ່າພະເຢໂຫວາຮັກເຮົາຫຼາຍແລະເພິ່ນໄດ້ຈັດກຽມຄ່າໄຖ່ເພື່ອຍົກໂທດຄວາມຜິດຂອງເຮົາ. ເຮົາໝັ້ນໃຈໄດ້ວ່າເພິ່ນຢາກໃຫ້ເຮົາຮັບເອົາຂອງຂວັນນີ້. ພະເຢໂຫວາຮັບປະກັນກັບເຮົາວ່າຫຼັງຈາກທີ່ເຮົາ “ລົມກັນ” c ກັບເພິ່ນແລະກັບມາເປັນໝູ່ຂອງເພິ່ນ ເພິ່ນຈະບໍ່ຄິດເຖິງຄວາມຜິດທີ່ເຮົາເຄີຍເຮັດ. (ອ່ານເອຊາຢາ 1:18) ເຮົາຂອບໃຈແທ້ໆທີ່ພະເຢໂຫວາພໍ່ທີ່ມີຄວາມຮັກຍົກໂທດໃຫ້ເຮົາແລະບໍ່ຈື່ຄວາມຜິດທີ່ເຮົາເຄີຍເຮັດ! ນອກຈາກນັ້ນ ເພິ່ນກໍບໍ່ລືມສິ່ງດີໆທີ່ເຮົາເຄີຍເຮັດເພື່ອເພິ່ນ.—ພສ. 103:9, 12; ຮຣ. 6:10
9. ແທນທີ່ຈະຄິດເຖິງແຕ່ຄວາມຜິດທີ່ເຮົາເຄີຍເຮັດໃນອະດີດ ເຮົາຄວນເຮັດຫຍັງ?
9 ຖ້າເຈົ້າທຸກໃຈຍ້ອນຄວາມຜິດທີ່ເຄີຍເຮັດຜ່ານມາ ຂໍໃຫ້ເຈົ້າພະຍາຍາມເຕັມທີທີ່ຈະຈົດຈໍ່ຢູ່ກັບສິ່ງທີ່ເຈົ້າກຳລັງເຮັດໃນຕອນນີ້ແລະສິ່ງທີ່ເຈົ້າເຮັດໄດ້ໃນອະນາຄົດ ແທນທີ່ຈະຈົມຢູ່ກັບອະດີດ. ໃຫ້ເຮົາເບິ່ງຕົວຢ່າງຂອງໂປໂລ. ໂປໂລເສຍໃຈຫຼາຍທີ່ເຄີຍຂົ່ມເຫງຄລິດສະຕຽນຢ່າງໜັກ ແຕ່ລາວຮູ້ວ່າພະເຢໂຫວາໄດ້ຍົກໂທດໃຫ້ລາວແລ້ວ. (1ຕມ. 1:12-15) ໂປໂລຍັງຄິດເຖິງຄວາມຜິດທີ່ລາວເຄີຍເຮັດບໍ? ບໍ່. ລາວບໍ່ໄດ້ຄິດເຖິງເລື່ອງນັ້ນຄືກັບທີ່ລາວບໍ່ໄດ້ຄິດເຖິງສິ່ງທີ່ລາວເຄີຍເຮັດສຳເລັດຕອນທີ່ເປັນຟາຣິຊາຍ. (ຟລປ. 3:4-8, 13-15) ແທນທີ່ຈະເປັນແບບນັ້ນ ໂປໂລກະຕືລືລົ້ນຮັບໃຊ້ພະເຢໂຫວາແລະເບິ່ງໄປທີ່ອະນາຄົດ. ເຈົ້າກໍເຮັດໄດ້ຄືກັບໂປໂລ. ເຖິງວ່າເຈົ້າປ່ຽນແປງອະດີດບໍ່ໄດ້ ແຕ່ເຈົ້າສາມາດຍ້ອງຍໍສັນລະເສີນພະເຢໂຫວາແລະເຮັດໃຫ້ເພິ່ນມີຄວາມສຸກໄດ້ ແລະເຈົ້າຍັງສາມາດຄິດເຖິງສິ່ງດີໆໃນອະນາຄົດທີ່ພະເຢໂຫວາສັນຍາວ່າຈະໃຫ້ເຈົ້າ.
10. ຖ້າເຈົ້າເຄີຍເຮັດໃຫ້ຄົນອື່ນເສຍໃຈ ເຈົ້າຄວນເຮັດຫຍັງ?
10 ເຈົ້າອາດຮູ້ສຶກທຸກໃຈຍ້ອນສິ່ງທີ່ເຈົ້າເຄີຍເຮັດໃນອະດີດເຮັດໃຫ້ຄົນອື່ນເສຍໃຈ. ອັນໃດຈະຊ່ວຍເຈົ້າໄດ້? ໃຫ້ພະຍາຍາມເຮັດທຸກສິ່ງທີ່ເຮັດໄດ້ເພື່ອແກ້ໄຂເລື່ອງນັ້ນ ເຊິ່ງລວມເຖິງການຂໍໂທດຜູ້ນັ້ນຈາກໃຈແທ້ໆ. (2ກຣ. 7:11) ໃຫ້ເຈົ້າອະທິດຖານຂໍໃຫ້ພະເຢໂຫວາຊ່ວຍຄົນທີ່ເຈົ້າເຮັດໃຫ້ເສຍໃຈ. ພະເຢໂຫວາຈະຊ່ວຍເຈົ້າແລະຜູ້ນັ້ນໃຫ້ມີສັນຕິສຸກແລະຮັບໃຊ້ເພິ່ນຕໍ່ໆໄປ.
11. ເຮົາຮຽນຫຍັງຈາກຕົວຢ່າງຂອງຜູ້ພະຍາກອນໂຢນາ? (ເບິ່ງຮູບໜ້າປົກນຳ)
11 ຂໍໃຫ້ເຈົ້າຮຽນຮູ້ຈາກຄວາມຜິດພາດຂອງໂຕເອງແລະເຕັມໃຈໃຫ້ພະເຢໂຫວາໃຊ້ເຈົ້າບໍ່ວ່າຈະເປັນເລື່ອງໃດກໍຕາມ. ໃຫ້ເຮົາເບິ່ງຕົວຢ່າງຂອງຜູ້ພະຍາກອນໂຢນາ. ພະເຢໂຫວາມອບໝາຍໃຫ້ໂຢນາໄປປະກາດຢູ່ເມືອງນີເນເວ ແຕ່ລາວພັດໜີໄປອີກທາງໜຶ່ງ. ພະເຢໂຫວາຈຶ່ງສອນໂຢນາ ແລະລາວກໍໄດ້ຮຽນຮູ້ຈາກຄວາມຜິດພາດຂອງໂຕເອງ. (ຢນ. 1:1-4, 15-17; 2:7-10) ພະເຢໂຫວາຍັງໃຊ້ໂຢນາຕໍ່ໄປ. ເພິ່ນບອກລາວອີກເທື່ອໜຶ່ງໃຫ້ໄປເມືອງນີເນເວ ແລະເທື່ອນີ້ລາວເຮັດຕາມທັນທີ. ໂຢນາບໍ່ໄດ້ປ່ອຍໃຫ້ຄວາມເສຍໃຈໃນສິ່ງທີ່ລາວເຮັດຜິດພາດຂັດຂວາງລາວໄວ້ຈົນບໍ່ຍອມຮັບເອົາວຽກມອບໝາຍຈາກພະເຢໂຫວາ.—ຢນ. 3:1-3
ຫຼັງຈາກພະເຢໂຫວາຊ່ວຍຜູ້ພະຍາກອນໂຢນາອອກມາຈາກທ້ອງປາໃຫຍ່ ເພິ່ນບອກລາວອີກເທື່ອໜຶ່ງໃຫ້ໄປເມືອງນີເນເວແລະປະກາດຂ່າວສານຂອງເພິ່ນ (ເບິ່ງຂໍ້ 11)
ພະເຢໂຫວາໃຫ້ພະລັງບໍລິສຸດເພື່ອປອບໂຍນເຮົາ
12. ພະເຢໂຫວາໃຫ້ສັນຕິສຸກກັບເຮົາແນວໃດຕອນທີ່ເຮົາທຸກໃຈຫຼືເຈິກັບການສູນເສຍ? (ຟີລິບປອຍ 4:6, 7)
12 ພະເຢໂຫວາໃຫ້ພະລັງບໍລິສຸດເພື່ອປອບໂຍນເຮົາຕອນທີ່ເຮົາທຸກໃຈຫຼືເຈິກັບການສູນເສຍ. ໃຫ້ເບິ່ງຕົວຢ່າງຂອງຣອນກັບແຄຣໍ. ລູກຊາຍຂອງເຂົາເຈົ້າຂ້າໂຕຕາຍ. ຣອນກັບແຄຣໍເວົ້າວ່າ: “ເຮົາ 2 ຄົນເຄີຍເຈິຄວາມລຳບາກມາກ່ອນ ແຕ່ເທື່ອນີ້ໂຫດຮ້າຍທີ່ສຸດ. ທຸກເທື່ອທີ່ນອນບໍ່ຫຼັບເຮົາກໍອະທິດຖານ ເຮົາຈຶ່ງມີສັນຕິສຸກຄືກັບທີ່ບອກໄວ້ໃນຟີລິບປອຍ 4:6, 7.” (ອ່ານ) ຖ້າເຈົ້າກຳລັງເຈິກັບເລື່ອງທີ່ເຮັດໃຫ້ຫົວໃຈແຕກສະຫຼາຍ ໃຫ້ອະທິດຖານລະບາຍຄວາມຮູ້ສຶກກັບພະເຢໂຫວາ. ເຈົ້າສາມາດເຮັດແບບນັ້ນໄດ້ເລື້ອຍໆແລະດົນສ່ຳໃດກໍໄດ້ຕາມທີ່ເຈົ້າຕ້ອງການ. (ພສ. 86:3; 88:1) ໃຫ້ເຈົ້າຂໍພະລັງບໍລິສຸດຈາກພະເຢໂຫວາເລື້ອຍໆແລະເພິ່ນຈະໃຫ້ຕາມທີ່ເຈົ້າຂໍ.—ລກ. 11:9-13
13. ພະລັງບໍລິສຸດຊ່ວຍເຮົາແນວໃດໃຫ້ຮັບໃຊ້ພະເຢໂຫວາຢ່າງສັດຊື່ຕໍ່ໆໄປ? (ເອເຟໂຊ 3:16)
13 ເຈົ້າເຄີຍເຈິກັບບັນຫາທີ່ໜັກໆຈົນເກືອບບໍ່ມີແຮງເຮັດຫຍັງບໍ? ພະລັງບໍລິສຸດສາມາດໃຫ້ກຳລັງເຈົ້າເພື່ອຮັບໃຊ້ພະເຢໂຫວາຢ່າງສັດຊື່ຕໍ່ໄປໄດ້. (ອ່ານເອເຟໂຊ 3:16) ໃຫ້ເບິ່ງເລື່ອງຂອງພີ່ນ້ອງຍິງຊື່ຟໍຣ້າ. ລາວກັບຜົວຮັບໃຊ້ເປັນມິດຊັນນາຣີນຳກັນ. ແຕ່ຜົວນອກໃຈລາວ ແລະໃນທີ່ສຸດເຂົາເຈົ້າກໍປະກັນ. ຟໍຣ້າເວົ້າວ່າ: “ຂ້ອຍເສຍໃຈຫຼາຍຍ້ອນຜົວບໍ່ສັດຊື່ ແລະຂ້ອຍຄິດຫຍັງບໍ່ອອກເລີຍ. ຂ້ອຍອະທິດຖານຂໍພະລັງບໍລິສຸດຈາກພະເຢໂຫວາເພື່ອຊ່ວຍໃຫ້ອົດທົນໄດ້. ພະເຢໂຫວາປອບໂຍນຂ້ອຍແລະຊ່ວຍຂ້ອຍໃຫ້ຮັບມືກັບບັນຫາທີ່ຕອນທຳອິດເບິ່ງຄືວ່າຈະຮັບມືບໍ່ໄດ້.” ຟໍຣ້າຮູ້ສຶກວ່າພະເຢໂຫວາຊ່ວຍລາວໃຫ້ໝັ້ນໃຈວ່າເພິ່ນຈະຊ່ວຍລາວໃຫ້ຮັບມືກັບບັນຫາຕ່າງໆໄດ້. ຟໍຣ້າເວົ້າຕື່ມອີກວ່າ: “ເພງສັນລະເສີນ 119:32 ກົງກັບຊີວິດຂ້ອຍເລີຍ. ຂໍ້ນັ້ນເວົ້າວ່າ: ‘ລູກຈະເຮັດຕາມກົດໝາຍຂອງພະອົງຢ່າງກະຕືລືລົ້ນ ຍ້ອນພະອົງຊ່ວຍລູກໃຫ້ເຂົ້າໃຈກົດໝາຍຂອງພະອົງ.’”
14. ເຮົາຈະໃຫ້ພະລັງບໍລິສຸດຂອງພະເຢໂຫວາຊ່ວຍເຮົາແນວໃດ?
14 ຫຼັງຈາກທີ່ເຈົ້າອະທິດຖານຂໍພະລັງບໍລິສຸດຈາກພະເຢໂຫວາແລ້ວ ເຈົ້າຄວນເຮັດຫຍັງ? ໃຫ້ເຮັດສິ່ງທີ່ຈະຊ່ວຍເຈົ້າໃຫ້ໄດ້ຮັບພະລັງບໍລິສຸດຫຼາຍຂຶ້ນ ເຊັ່ນ: ເຂົ້າຮ່ວມການປະຊຸມ ໄປປະກາດ ແລະອ່ານຄຳພີໄບເບິນທຸກໆມື້ເພື່ອຊ່ວຍເຈົ້າໃຫ້ຄິດແບບດຽວກັບທີ່ພະເຢໂຫວາຄິດ. (ຟລປ. 4:8, 9) ຕອນທີ່ອ່ານຄຳພີໄບເບິນ ໃຫ້ສັງເກດວ່າຄົນໃນຄຳພີໄບເບິນເຈິບັນຫາຫຍັງແດ່ ແລະພະເຢໂຫວາຊ່ວຍເຂົາເຈົ້າແນວໃດໃຫ້ອົດທົນກັບບັນຫາເຫຼົ່ານັ້ນ. ຊານດຣ້າທີ່ເວົ້າເຖິງກ່ອນໜ້ານີ້ຕ້ອງຮັບມືກັບບັນຫາທີ່ໜັກໆຫຼາຍຢ່າງໃນຊີວິດ. ລາວເວົ້າວ່າ: “ເລື່ອງຂອງໂຢເຊັບໃຫ້ກຳລັງໃຈຂ້ອຍຫຼາຍ. ໂຢເຊັບບໍ່ຍອມໃຫ້ບັນຫາແລະຄວາມບໍ່ຍຸຕິທຳທີ່ລາວເຈິທຳລາຍສາຍສຳພັນທີ່ລາວມີຕໍ່ພະເຢໂຫວາ.”—ປຖກ. 39:21-23
ພະເຢໂຫວາໃຊ້ພີ່ນ້ອງເພື່ອປອບໂຍນເຮົາ
15. ເຮົາຈະໄດ້ຮັບການປອບໂຍນຈາກໃຜ ແລະເຂົາເຈົ້າປອບໂຍນເຮົາແນວໃດ? (ເບິ່ງຮູບນຳ)
15 ຕອນທີ່ເຮົາກຳລັງເຈິກັບບັນຫາທີ່ໜັກໆ ພີ່ນ້ອງສາມາດ ‘ໃຫ້ກຳລັງໃຈເຮົາ [ໄດ້] ຫຼາຍ.’ (ກລຊ. 4:11) ພະເຢໂຫວາໃຊ້ພີ່ນ້ອງເພື່ອສະແດງໃຫ້ເຫັນຄວາມຮັກທີ່ເພິ່ນມີຕໍ່ເຮົາ. ເຂົາເຈົ້າປອບໂຍນເຮົາໂດຍຟັງເຮົາດ້ວຍຄວາມເຫັນອົກເຫັນໃຈແລະໃຫ້ເວລາເຮົາ. ເຂົາເຈົ້າອາດໃຫ້ກຳລັງໃຈເຮົາໂດຍໃຊ້ຂໍ້ຄຳພີຫຼືອະທິດຖານກັບເຮົາ. d (ຣມ. 15:4) ບາງເທື່ອເຂົາເຈົ້າອາດເຕືອນເຮົາບໍ່ໃຫ້ລືມວ່າພະເຢໂຫວາຄິດແນວໃດກ່ຽວກັບເລື່ອງຕ່າງໆ ເຊິ່ງການເຮັດແບບນີ້ຈະຊ່ວຍເຮົາໃຫ້ອົດທົນຕໍ່ໆໄປໄດ້. ພີ່ນ້ອງຍັງຊ່ວຍເຮົາໃນວິທີອື່ນນຳ ເຊັ່ນ ເຮັດຂອງກິນໃຫ້ຕອນທີ່ເຮົາຮູ້ສຶກທໍ້ໃຈ.
ໝູ່ທີ່ໄວ້ໃຈໄດ້ແລະມີຄວາມເປັນຜູ້ໃຫຍ່ສາມາດໃຫ້ກຳລັງໃຈເຈົ້າແລະຊ່ວຍເຈົ້າໄດ້ (ເບິ່ງຂໍ້ 15)
16. ເຮົາຕ້ອງເຮັດຫຍັງເພື່ອຈະໄດ້ຮັບຄວາມຊ່ວຍເຫຼືອຈາກຄົນອື່ນ?
16 ບາງເທື່ອ ເພື່ອຈະໄດ້ຮັບຄວາມຊ່ວຍເຫຼືອຈາກຄົນອື່ນ ເຮົາອາດຕ້ອງຂໍໃຫ້ເຂົາເຈົ້າຊ່ວຍ. ພີ່ນ້ອງຮັກເຮົາແລະເຂົາເຈົ້າກໍຢາກຊ່ວຍເຮົາ. (ສພສ. 17:17) ແຕ່ເຂົາເຈົ້າອາດບໍ່ຮູ້ວ່າເຮົາຮູ້ສຶກແນວໃດຫຼືຕ້ອງການຫຍັງ. (ສພສ. 14:10) ຖ້າເຈົ້າກຳລັງເຈັບປວດໃຈ ໃຫ້ລົມກັບໝູ່ທີ່ເຈົ້າສະໜິດທີ່ມີຄວາມເປັນຜູ້ໃຫຍ່ແລະບອກເຂົາເຈົ້າວ່າເຈົ້າຮູ້ສຶກແນວໃດ. ບອກໃຫ້ເຂົາເຈົ້າຮູ້ວ່າເຈົ້າຢາກໃຫ້ເຂົາເຈົ້າຊ່ວຍຫຍັງ. ເຈົ້າອາດລົມກັບຜູ້ເບິ່ງແຍງໜຶ່ງຫຼືສອງຄົນທີ່ເຈົ້າລົມນຳແລ້ວຮູ້ສຶກສະບາຍໃຈ. ພີ່ນ້ອງຍິງບາງຄົນອາດຮູ້ສຶກສະດວກໃຈທີ່ຈະລົມກັບພີ່ນ້ອງຍິງທີ່ມີຄວາມເປັນຜູ້ໃຫຍ່.
17. ມີຫຍັງທີ່ອາດເຮັດໃຫ້ເຮົາບໍ່ໄດ້ຮັບກຳລັງໃຈຈາກພີ່ນ້ອງ ແລະເຮົາຈະເອົາຊະນະໄດ້ແນວໃດ?
17 ຢ່າແຍກໂຕຢູ່ຄົນດຽວ. ຕອນທີ່ເຈົ້າທຸກໃຈ ເຈົ້າອາດບໍ່ຢາກຢູ່ກັບຄົນອື່ນ ແລະບາງເທື່ອພີ່ນ້ອງອາດບໍ່ເຂົ້າໃຈແທ້ໆວ່າເຈົ້າຮູ້ສຶກແນວໃດ ຫຼືເຂົາເຈົ້າອາດເວົ້າບາງຢ່າງທີ່ເຮັດໃຫ້ເຈົ້າເສຍໃຈ. (ຢກບ. 3:2) ເຖິງຈະເປັນແນວນັ້ນ ຢ່າແຍກໂຕຈາກພີ່ນ້ອງ. ພະເຢໂຫວາສາມາດໃຊ້ເຂົາເຈົ້າໃຫ້ກຳລັງໃຈເຈົ້າ. ຜູ້ເບິ່ງແຍງຊື່ກາວິນທີ່ເປັນໂລກຊຶມເສົ້າເວົ້າວ່າ: “ສິ່ງທີ່ຂ້ອຍບໍ່ຢາກເຮັດທີ່ສຸດແມ່ນລົມກັບໝູ່ຫຼືໃຊ້ເວລາກັບໝູ່.” ເຖິງຈະຮູ້ສຶກແບບນັ້ນ ກາວິນກໍພະຍາຍາມຢູ່ກັບພີ່ນ້ອງ ແລະການເຮັດແບບນີ້ເຮັດໃຫ້ລາວຮູ້ສຶກດີຂຶ້ນຫຼາຍ. ພີ່ນ້ອງຍິງຊື່ເອມີ້ເວົ້າວ່າ: “ປະສົບການທີ່ບໍ່ດີໃນອະດີດເຮັດໃຫ້ຂ້ອຍໄວ້ໃຈຄົນອື່ນຍາກ. ແຕ່ຕອນນີ້ຂ້ອຍກຳລັງຮຽນຮູ້ທີ່ຈະຮັກແລະໄວ້ໃຈພີ່ນ້ອງຄືກັບທີ່ພະເຢໂຫວາເຮັດ. ຂ້ອຍຮູ້ວ່າການເຮັດແບບນີ້ເຮັດໃຫ້ພະເຢໂຫວາມີຄວາມສຸກ ແລະຂ້ອຍເອງກໍມີຄວາມສຸກຄືກັນ.”
ຄຳສັນຍາຂອງພະເຢໂຫວາກ່ຽວກັບອະນາຄົດເຮັດໃຫ້ເຮົາໄດ້ກຳລັງໃຈ
18. ເຮົາລໍຖ້າສິ່ງໃດໃນອະນາຄົດ ແລະເຮົາສາມາດເຮັດຫຍັງຕັ້ງແຕ່ຕອນນີ້?
18 ເຮົາສາມາດເບິ່ງໄປທີ່ອະນາຄົດດ້ວຍຄວາມໝັ້ນໃຈທີ່ວ່າອີກບໍ່ດົນພະເຢໂຫວາຈະກຳຈັດທຸກສິ່ງທີ່ເຮັດໃຫ້ເຮົາເຈັບປວດທັງດ້ານຮ່າງກາຍແລະຈິດໃຈ. (ພນມ. 21:3, 4) ໃນຕອນນັ້ນ ເຮົາຈະບໍ່ເກັບສິ່ງທີ່ເຮັດໃຫ້ເຈັບປວດໃຈໄວ້ໃນໃຈອີກ. (ອຊຢ. 65:17) ຄືກັບທີ່ເຮົາໄດ້ຮຽນມາແລ້ວ ພະເຢໂຫວາ ‘ພັນບາດ’ ໃຫ້ເຮົາຕັ້ງແຕ່ຕອນນີ້. ຂໍໃຫ້ເຈົ້າຍອມຮັບສິ່ງຕ່າງໆທີ່ພະເຢໂຫວາຈັດກຽມໄວ້ດ້ວຍຄວາມຮັກເພື່ອໃຫ້ກຳລັງໃຈເຈົ້າແລະຊ່ວຍເຈົ້າ ແລະໃຫ້ເຈົ້າໝັ້ນໃຈສະເໝີວ່າ ‘ເພິ່ນເປັນຫ່ວງເຈົ້າ.’—1ປຕ. 5:7
ເພງທີ 7 ພະເຢໂຫວາເປັນກຳລັງຂອງເຮົາ
a ຊື່ສົມມຸດ.
b ເບິ່ງຂອບ “ ພະເຢໂຫວາເບິ່ງວ່າເຈົ້າມີຄ່າ”
c ເພື່ອຈະ “ລົມກັນ” ກັບພະເຢໂຫວາ ເຮົາຕ້ອງສະແດງໃຫ້ເຫັນວ່າເຮົາກັບໃຈແທ້ໆໂດຍຂໍໃຫ້ເພິ່ນຍົກໂທດຄວາມຜິດໃຫ້ເຮົາ ແລະເຮົາຕ້ອງປ່ຽນແປງໂຕເອງນຳ. ຖ້າເຮົາເຮັດຜິດຮ້າຍແຮງ ເຮົາຕ້ອງຂໍໃຫ້ຜູ້ເບິ່ງແຍງຊ່ວຍເຮົາຄືກັນ.—ຢກບ. 5:14, 15
