ເຄັດລັບການຄົ້ນຄວ້າ
ທົບທວນຈຸດສຳຄັນ
ບາງເທື່ອມັນຍາກສຳລັບເຈົ້າບໍທີ່ຈະຈື່ສິ່ງທີ່ຫາກໍອ່ານ? ເຮົາທຸກຄົນເຄີຍເປັນແບບນັ້ນ. ຄັນຊັ້ນ ເຮົາຄວນເຮັດແນວໃດ? ໃຫ້ທົບທວນຈຸດສຳຄັນ.
ຕອນທີ່ສຶກສາສ່ວນໂຕ ໃຫ້ຢຸດເປັນໄລຍະໆເພື່ອທົບທວນສິ່ງທີ່ເຈົ້າຫາກໍຮຽນ. ໃນຈົດໝາຍທີ່ໂປໂລຂຽນໄປຫາພີ່ນ້ອງ ລາວແນະນຳສິ່ງທີ່ເຂົາເຈົ້າຄວນເຮັດຕອນທີ່ອ່ານຈົດໝາຍນັ້ນ. ລາວເວົ້າວ່າ: “ຈຸດສຳຄັນຂອງເລື່ອງທີ່ພວກເຮົາກຳລັງເວົ້າເຖິງແມ່ນ.” (ຮຣ. 8:1) ການທີ່ໂປໂລເຮັດແບບນີ້ຊ່ວຍພີ່ນ້ອງໃຫ້ເຂົ້າໃຈວິທີທີ່ລາວຫາເຫດຜົນແລະຊ່ວຍໃຫ້ເຫັນວ່າແຕ່ລະເລື່ອງທີ່ລາວເວົ້າກ່ຽວຂ້ອງກັນແນວໃດ.
ເຈົ້າອາດໃຊ້ເວລາ 10 ນາທີໃນຕອນທ້າຍຂອງການສຶກສາເພື່ອທົບທວນຈຸດສຳຄັນຂອງເລື່ອງທີ່ເຈົ້າໄດ້ຮຽນ. ຖ້າເຈົ້າຈື່ຈຸດຕ່າງໆບໍ່ໄດ້ປານໃດ ໃຫ້ກັບໄປເບິ່ງຫົວຂໍ້ຍ່ອຍຫຼືອ່ານປະໂຫຍກທຳອິດຂອງແຕ່ລະວັກເພື່ອຊ່ວຍເຈົ້າໃຫ້ຈື່ໄດ້. ຖ້າເຈົ້າຮຽນເລື່ອງໃໝ່ ລອງອະທິບາຍເລື່ອງນັ້ນໃຫ້ເປັນຄຳເວົ້າຂອງໂຕເອງ. ການທົບທວນຈຸດສຳຄັນບໍ່ພຽງແຕ່ຊ່ວຍໃຫ້ຈື່ເລື່ອງທີ່ໄດ້ຮຽນເທົ່ານັ້ນ ແຕ່ຍັງຊ່ວຍໃຫ້ເຫັນວ່າເຈົ້າຈະເອົາເລື່ອງນັ້ນໄປໃຊ້ໃນຊີວິດໄດ້ແນວໃດ.
