ບົດຄວາມສຶກສາທີ 52
ພີ່ນ້ອງຍິງທີ່ຍັງໜຸ່ມ ຂໍໃຫ້ເຈົ້າເປັນຄລິດສະຕຽນທີ່ມີຄວາມເປັນຜູ້ໃຫຍ່
“ສ່ວນຜູ້ຍິງກໍຄືກັນ ຄວນ . . . ຄວບຄຸມຕົວເອງໄດ້ໃນທຸກດ້ານ ແລະສັດຊື່ໃນທຸກສິ່ງ.”—1ຕມ. 3:11
ເພງ 133 ນະມັດສະການພະເຢໂຫວາຕັ້ງແຕ່ຍັງໜຸ່ມ
ໃຈຄວາມສຳຄັນ a
1. ເພື່ອຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ ເຮົາຕ້ອງເຮັດຫຍັງ?
ເຮົາຮູ້ສຶກແປກໃຈຫຼາຍແທ້ໆທີ່ເຫັນເດັກນ້ອຍໃນທຸກມື້ນີ້ໃຫຍ່ໄວຫຼາຍ ເຊິ່ງກໍເປັນເລື່ອງທຳມະຊາດ. ແຕ່ການເປັນຄລິດສະຕຽນທີ່ມີຄວາມເປັນຜູ້ໃຫຍ່ບໍ່ແມ່ນສິ່ງທີ່ໄດ້ມາໂດຍອັດຕະໂນມັດ. b (1ກຣ. 13:11; ຮຣ. 6:1) ເພື່ອຈະກ້າວໜ້າເປັນຄລິດສະຕຽນທີ່ມີຄວາມເປັນຜູ້ໃຫຍ່ ເຮົາຕ້ອງໃກ້ຊິດກັບພະເຢໂຫວາ. ນອກຈາກນັ້ນ ເຮົາຕ້ອງມີພະລັງບໍລິສຸດຂອງເພິ່ນນຳເພື່ອຈະຊ່ວຍເຮົາໃຫ້ມີຄຸນລັກສະນະແບບພະເຈົ້າ ຝຶກທັກສະຕ່າງໆທີ່ເປັນປະໂຫຍດ ແລະກຽມພ້ອມສຳລັບໜ້າທີ່ຮັບຜິດຊອບໃນອະນາຄົດ.—ສຸພາ. 1:5
2. ເຮົາໄດ້ຮຽນຫຍັງຈາກປະຖົມມະການ 1:27 ແລະໃນບົດຄວາມນີ້ເຮົາຈະຮຽນຫຍັງ?
2 ພະເຢໂຫວາສ້າງມະນຸດໃຫ້ເປັນຜູ້ຊາຍແລະຜູ້ຍິງ. (ອ່ານປະຖົມມະການ 1:27) ຜູ້ຊາຍກັບຜູ້ຍິງບໍ່ພຽງແຕ່ຕ່າງກັນທາງດ້ານຮ່າງກາຍເທົ່ານັ້ນ ແຕ່ກໍຍັງມີສິ່ງອື່ນນຳທີ່ຕ່າງກັນ. ຕົວຢ່າງເຊັ່ນ: ພະເຢໂຫວາສ້າງຜູ້ຊາຍແລະຜູ້ຍິງໃຫ້ມີໜ້າທີ່ຕ່າງກັນ. ເຂົາເຈົ້າຈຶ່ງຕ້ອງມີຄຸນລັກສະນະແລະທັກສະບາງຢ່າງທີ່ຈະຊ່ວຍເຂົາເຈົ້າໃຫ້ເຮັດໜ້າທີ່ຂອງໂຕເອງໄດ້. (ປຖກ. 2:18) ໃນບົດຄວາມນີ້ເຮົາຈະມາເບິ່ງວ່າ ພີ່ນ້ອງຍິງທີ່ຍັງໜຸ່ມຕ້ອງເຮັດຫຍັງເພື່ອຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ ແລະໃນບົດຄວາມຕໍ່ໄປເຮົາຈະເບິ່ງວ່າ ພີ່ນ້ອງຊາຍທີ່ຍັງໜຸ່ມຕ້ອງເຮັດຫຍັງເພື່ອຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ຄືກັນ.
ໃຫ້ມີຄຸນລັກສະນະແບບພະເຈົ້າ
ການຮຽນແບບຄຸນລັກສະນະດີໆຂອງຜູ້ຮັບໃຊ້ທີ່ສັດຊື່ໃນສະໄໝແຕ່ກີ້ ເຊັ່ນ: ເຣເບກາ ເອັດສະເທີ ແລະອາບີກາຍຈະຊ່ວຍເຈົ້າໃຫ້ເປັນພີ່ນ້ອງຍິງທີ່ມີຄວາມເປັນຜູ້ໃຫຍ່(ເບິ່ງຂໍ້ 3-4)
3-4. ພີ່ນ້ອງຍິງທີ່ຍັງໜຸ່ມຈະຊອກຫາຕົວຢ່າງທີ່ດີໄດ້ຈາກໃສ? (ເບິ່ງຮູບ)
3 ຄຳພີໄບເບິນເວົ້າເຖິງຜູ້ຍິງຫຼາຍຄົນທີ່ຮັກແລະຮັບໃຊ້ພະເຢໂຫວາ. (ເບິ່ງບົດຄວາມ “ເຮົາຮຽນຫຍັງໄດ້ຈາກຜູ້ຍິງໃນຄຳພີໄບເບິນ?” ໃນເວັບໄຊ jw.org) c ເຂົາເຈົ້າເປັນຄືກັບຂໍ້ຄຳພີຫຼັກໃນບົດຄວາມນີ້ທີ່ບອກວ່າ: “ຄວບຄຸມຕົວເອງໃນທຸກດ້ານ” ແລະ “ສັດຊື່ໃນທຸກສິ່ງ.” ນອກຈາກນັ້ນ ຍັງມີຕົວຢ່າງທີ່ດີຂອງພີ່ນ້ອງຍິງທີ່ມີຄວາມເປັນຜູ້ໃຫຍ່ທີ່ເປັນຕາຮຽນແບບໃນປະຊາຄົມຂອງເຮົານຳ.
4 ພີ່ນ້ອງຍິງທີ່ຍັງໜຸ່ມ ມີພີ່ນ້ອງຍິງຄົນໃດບໍທີ່ເປັນຕົວຢ່າງທີ່ດີທີ່ເຈົ້າຈະຮຽນແບບ? ເຂົາເຈົ້າມີຄຸນລັກສະນະທີ່ດີຫຍັງແດ່ ແລະເຈົ້າຈະຮຽນແບບເຂົາເຈົ້າໄດ້ແນວໃດ? ຕໍ່ໄປນີ້ ເຮົາຈະມາເບິ່ງຄຸນລັກສະນະ 3 ຢ່າງທີ່ຄລິດສະຕຽນທີ່ມີຄວາມເປັນຜູ້ໃຫຍ່ຕ້ອງມີ.
5. ເປັນຫຍັງພີ່ນ້ອງຍິງທີ່ມີຄວາມເປັນຜູ້ໃຫຍ່ຕ້ອງມີຄວາມຖ່ອມ?
5 ຄວາມຖ່ອມເປັນຄຸນລັກສະນະທີ່ຄລິດສະຕຽນທີ່ມີຄວາມເປັນຜູ້ໃຫຍ່ຕ້ອງມີ. ຖ້າພີ່ນ້ອງຍິງເປັນຄົນຖ່ອມ ລາວຈະມີສາຍສຳພັນທີ່ດີກັບພະເຢໂຫວາແລະຄົນອື່ນ. (ຢກບ. 4:6) ຕົວຢ່າງເຊັ່ນ: ຜູ້ຍິງທີ່ຮັກພະເຢໂຫວາຈະສະໜັບສະໜູນການຈັດກຽມຂອງເພິ່ນທີ່ໃຫ້ຜູ້ຊາຍເປັນຜູ້ນຳ ບໍ່ວ່າໃນຄອບຄົວຫຼືໃນປະຊາຄົມ. d—1ກຣ. 11:3
6. ພີ່ນ້ອງຍິງທີ່ຍັງໜຸ່ມຈະຮຽນແບບເຣເບກາແນວໃດໃນເລື່ອງຄວາມຖ່ອມ?
6 ໃຫ້ເຮົາມາເບິ່ງຕົວຢ່າງຂອງເຣເບກາ. ລາວເປັນຜູ້ຍິງທີ່ສະຫຼາດ ກ້າຕັດສິນໃຈ ຮູ້ວ່າຄວນເຮັດຫຍັງແລະເຮັດຕອນໃດ. (ປຖກ. 24:58; 27:5-17) ແຕ່ລາວຍັງສະແດງຄວາມນັບຖືແລະຍອມຢູ່ໃຕ້ອຳນາດ. (ປຖກ. 24:17, 18, 65) ຖ້າເຈົ້າເປັນຄົນຖ່ອມແລະສະໜັບສະໜູນການຈັດກຽມຂອງພະເຢໂຫວາຄືກັບເຣເບກາ ເຈົ້າກໍຈະເປັນຕົວຢ່າງທີ່ດີໃຫ້ກັບທຸກຄົນທັງໃນຄອບຄົວແລະໃນປະຊາຄົມ.
7. ພີ່ນ້ອງຍິງທີ່ຍັງໜຸ່ມຈະຮຽນແບບເອັດສະເທີແນວໃດໃນເລື່ອງຄວາມຈຽມໂຕ?
7 ຄວາມຈຽມໂຕເປັນຄຸນລັກສະນະທີ່ສຳຄັນອີກຢ່າງໜຶ່ງທີ່ຄລິດສະຕຽນທີ່ມີຄວາມເປັນຜູ້ໃຫຍ່ຕ້ອງມີ. ຄຳພີໄບເບິນບອກວ່າ: “ຄົນຈຽມໂຕຈະມີສະຕິປັນຍາ.” (ສຸພາ. 11:2, ລ.ມ) ເອັດສະເທີເປັນຄົນຈຽມໂຕແລະຮັກພະເຈົ້າ. ຄວາມຈຽມໂຕຊ່ວຍລາວບໍ່ໃຫ້ເປັນຄົນຍິ່ງ ເຖິງລາວຈະເປັນລາຊີນີແລ້ວ. ລາວຍັງເຊື່ອຟັງແລະເຮັດຕາມຄຳແນະນຳຂອງມໍເດກາຍທີ່ເປັນພີ່ນ້ອງຂອງລາວ. (ອສທ. 2:10, 20, 22) ເຈົ້າກໍສະແດງໃຫ້ເຫັນວ່າເຈົ້າເປັນຄົນຈຽມໂຕໄດ້ໂດຍຂໍຄຳແນະນຳດີໆຈາກພີ່ນ້ອງແລະເຮັດຕາມ.—ຕຕ. 2:3-5
8. ຕາມ 1 ຕີໂມທຽວ 2:9, 10 ຄວາມຈຽມໂຕຊ່ວຍພີ່ນ້ອງຍິງແນວໃດໃນການຕັດສິນໃຈເລື່ອງການແຕ່ງໂຕ?
8 ເອັດສະເທີຍັງສະແດງຄວາມຈຽມໂຕໃນອີກດ້ານໜຶ່ງນຳ. ຄຳພີໄບເບິນບອກວ່າລາວເປັນ “ຄົນງາມຫຼາຍ” ແຕ່ລາວບໍ່ໄດ້ພະຍາຍາມເຮັດໃຫ້ຄົນອື່ນສົນໃຈຄວາມງາມຂອງລາວ. (ອສທ. 2:7, 15) ພີ່ນ້ອງຍິງຈະຮຽນແບບເອັດສະເທີໄດ້ແນວໃດ? ວິທີໜຶ່ງກໍຄືເຮັດຕາມທີ່ບອກໄວ້ໃນ 1 ຕີໂມທຽວ 2:9, 10. (ອ່ານ) ໃນຂໍ້ນັ້ນອັກຄະສາວົກໂປໂລແນະນຳພີ່ນ້ອງຍິງໃຫ້ແຕ່ງໂຕແບບສຸພາບຮຽບຮ້ອຍແລະແບບຄົນທີ່ມີສະຕິດີ. ຄຳພາສາກຣີກທີ່ໃຊ້ໃນຂໍ້ນີ້ເຮັດໃຫ້ເຫັນວ່າພີ່ນ້ອງຍິງຕ້ອງແຕ່ງໂຕໃນແບບທີ່ໜ້ານັບຖືແລະຄິດເຖິງຄວາມຮູ້ສຶກຂອງຄົນອື່ນ. ເຮົາຢາກຊົມເຊີຍພີ່ນ້ອງຍິງທີ່ມີຄວາມເປັນຜູ້ໃຫຍ່ທຸກຄົນທີ່ແຕ່ງໂຕສຸພາບຮຽບຮ້ອຍ.
9. ເຮົາໄດ້ຮຽນຫຍັງຈາກຕົວຢ່າງຂອງອາບີກາຍ?
9 ການມີວິຈາລະນະຍານທີ່ດີເປັນຄຸນລັກສະນະອີກຢ່າງໜຶ່ງທີ່ພີ່ນ້ອງຍິງທີ່ມີຄວາມເປັນຜູ້ໃຫຍ່ຕ້ອງມີ. ການມີວິຈາລະນະຍານທີ່ດີແມ່ນຫຍັງ? ແມ່ນຄວາມສາມາດທີ່ຈະແຍກອອກວ່າອັນໃດຖືກອັນໃດຜິດ ແລະເລືອກເຮັດສິ່ງທີ່ຖືກຕ້ອງ. ໃຫ້ເຮົາມາເບິ່ງຕົວຢ່າງຂອງອາບີກາຍນຳກັນ. ຜົວຂອງລາວຕັດສິນໃຈແບບທີ່ບໍ່ສະຫຼາດແລະເຮັດໃຫ້ທຸກຄົນໃນຄອບຄົວຕົກຢູ່ໃນອັນຕະລາຍ. ແຕ່ຍ້ອນອາບີກາຍມີວິຈາລະນະຍານທີ່ດີຈຶ່ງເຮັດໃຫ້ທຸກຄົນໃນຄອບຄົວປອດໄພ. (1ຊມ. 25:14-23, 32-35) ການມີວິຈາລະນະຍານທີ່ດີຊ່ວຍເຮົາໃຫ້ຮູ້ວ່າຕອນໃດຄວນເວົ້າແລະຕອນໃດບໍ່ຄວນເວົ້າ ແລະຍັງຊ່ວຍເຮົາໃຫ້ສະແດງຄວາມສົນໃຈຕໍ່ພີ່ນ້ອງໃນແບບພໍດີພໍງາມ.—1ທຊ. 4:11
ຝຶກທັກສະຕ່າງໆທີ່ເປັນປະໂຫຍດ
ການອ່ານແລະຂຽນໄດ້ດີເປັນປະໂຫຍດກັບເຈົ້າແນວໃດ? (ເບິ່ງຂໍ້ 11)
10-11. ການອ່ານແລະຂຽນໄດ້ດີເປັນປະໂຫຍດຕໍ່ເຈົ້າແລະຄົນອື່ນແນວໃດ? (ເບິ່ງຮູບ)
10 ພີ່ນ້ອງຍິງຈຳເປັນຕ້ອງຮຽນທັກສະທີ່ເປັນປະໂຫຍດແລະໃຊ້ໄດ້ແທ້ ເຊິ່ງທັກສະບາງຢ່າງຖ້າຮຽນຕັ້ງແຕ່ຍັງນ້ອຍ ກໍຈະເປັນປະໂຫຍດກັບລາວຕະຫຼອດຊີວິດ. ໃຫ້ເຮົາມາເບິ່ງທັກສະບາງຢ່າງນຳກັນ.
11 ອ່ານແລະຂຽນໄດ້ດີ. ບາງວັດທະນະທຳຫຼາຍຄົນຄິດວ່າຜູ້ຍິງບໍ່ຈຳເປັນຕ້ອງອ່ານຫຼືຂຽນໄດ້. ແຕ່ນີ້ເປັນທັກສະສຳຄັນຫຼາຍສຳລັບຄລິດສະຕຽນທຸກຄົນ. e (1ຕມ. 4:13) ດັ່ງນັ້ນ ໃຫ້ພະຍາຍາມຮຽນອ່ານແລະຂຽນຕໍ່ໆໄປເຖິງຈະຮູ້ສຶກວ່າຍາກ. ຖ້າເຈົ້າອ່ານແລະຂຽນໄດ້ດີ ເຈົ້າຈະໄດ້ຮັບປະໂຫຍດຫຍັງ? ມັນຈະຊ່ວຍເຈົ້າໃຫ້ຊອກວຽກໄດ້ງ່າຍຂຶ້ນແລະມີລາຍໄດ້ ເປັນນັກຮຽນແລະຜູ້ສອນຄຳພີໄບເບິນໄດ້ດີຂຶ້ນ ແລະສິ່ງທີ່ສຳຄັນເຈົ້າຈະໃກ້ຊິດກັບພະເຢໂຫວາຫຼາຍຂຶ້ນຍ້ອນເຈົ້າໄດ້ອ່ານແລະໄດ້ຄິດຕຶກຕອງຄຳສອນຂອງເພິ່ນທີ່ຢູ່ໃນຄຳພີໄບເບິນ.—ຢຊ. 1:8; 1ຕມ. 4:15
12. ສຸພາສິດ 31:26 ຊ່ວຍເຈົ້າແນວໃດໃຫ້ເປັນຜູ້ຟັງແລະສື່ສານໄດ້ດີ?
12 ຟັງແລະສື່ສານໄດ້ດີ. ນີ້ເປັນຄຸນລັກສະນະທີ່ສຳຄັນສຳລັບຄລິດສະຕຽນ. ຢາໂກໂບໃຫ້ຄຳແນະນຳກ່ຽວກັບເລື່ອງນີ້ວ່າ: “ທຸກຄົນຕ້ອງໄວໃນການຟັງ ຊ້າໃນການເວົ້າ.” (ຢກບ. 1:19) ຖ້າເຈົ້າຕັ້ງໃຈຟັງຄົນອື່ນເວົ້າ ເຈົ້າກໍກຳລັງສະແດງຄວາມ “ເຫັນອົກເຫັນໃຈ” ລາວ. (1ປຕ. 3:8) ຖ້າເຈົ້າບໍ່ແນ່ໃຈວ່າເຈົ້າເຂົ້າໃຈຄົນອື່ນບໍຫຼືບໍ່ໝັ້ນໃຈວ່າລາວຮູ້ສຶກແນວໃດ ກໍໃຫ້ຖາມລາວ. ເມື່ອເຈົ້າເຂົ້າໃຈແລ້ວ ກ່ອນທີ່ເຈົ້າຈະເວົ້າໃຫ້ຄິດໜ້ອຍໜຶ່ງກ່ອນ. (ສຸພາ. 15:28; ໄຂເງື່ອນ) ເຈົ້າອາດຖາມໂຕເອງວ່າ: ‘ສິ່ງທີ່ຂ້ອຍຈະເວົ້າເປັນຄວາມຈິງແລະຈະເຮັດໃຫ້ລາວຮູ້ສຶກດີບໍ? ຂ້ອຍສະແດງຄວາມນັບຖືແລະກະລຸນາຕໍ່ລາວບໍ?’ ນອກຈາກນັ້ນ ລອງສັງເກດພີ່ນ້ອງຍິງທີ່ເປັນຜູ້ໃຫຍ່ໃນວິທີທີ່ເຂົາເຈົ້າເວົ້າແລະຟັງແລ້ວຮຽນແບບເຂົາເຈົ້າ. (ອ່ານສຸພາສິດ 31:26) ແຮ່ງເຈົ້າຮຽນທັກສະນີ້ໄດ້ດີຂຶ້ນ ເຈົ້າກໍຈະເປັນໝູ່ກັບຄົນອື່ນໄດ້ງ່າຍຂຶ້ນແລະມີຄວາມສຳພັນທີ່ດີກັບຄົນອື່ນ.
ພີ່ນ້ອງຍິງທີ່ຮູ້ຈັກເຮັດວຽກເຮືອນມີຄ່າຫຼາຍແທ້ໆສຳລັບຄອບຄົວແລະປະຊາຄົມ (ເບິ່ງຂໍ້ 13)
13. ມີວຽກເຮືອນແບບໃດແດ່ທີ່ເຈົ້າຈະຮຽນໄດ້? (ເບິ່ງຮູບ)
13 ຮຽນເຮັດວຽກເຮືອນ. ໃນຫຼາຍປະເທດສ່ວນຫຼາຍແລ້ວຄົນທີ່ເຮັດວຽກເຮືອນແມ່ນຜູ້ຍິງ. ແມ່ຂອງເຈົ້າຫຼືພີ່ນ້ອງຍິງອາດສອນເຈົ້າໄດ້. ພີ່ນ້ອງຍິງຄົນໜຶ່ງທີ່ຊື່ຊິນດີ້ບອກວ່າ: “ແມ່ສອນສິ່ງທີ່ມີຄ່າຫຼາຍທີ່ສຸດຢ່າງໜຶ່ງໃຫ້ກັບຂ້ອຍ ນັ້ນຄືການດຸໝັ່ນເຮັດວຽກເຮັດໃຫ້ມີຄວາມສຸກ. ແມ່ສອນຂ້ອຍໃຫ້ເຮັດຫຼາຍຢ່າງເຊັ່ນ: ແຕ່ງກິນ ອະນາໄມເຮືອນ ຫຍິບເຄື່ອງ ແລະຊື້ເຄື່ອງ. ສິ່ງເຫຼົ່ານີ້ເຮັດໃຫ້ຊີວິດຂ້ອຍງ່າຍຂຶ້ນແລະເຮັດໃຫ້ຂ້ອຍຮັບໃຊ້ພະເຢໂຫວາໄດ້ຫຼາຍຂຶ້ນ. ນອກຈາກນີ້ ແມ່ຍັງສອນໃຫ້ຂ້ອຍເປັນຄົນມີນ້ຳໃຈ. ຂ້ອຍຈຶ່ງໄດ້ເຈິພີ່ນ້ອງທີ່ໜ້າຮັກຫຼາຍຄົນທີ່ເປັນຕົວຢ່າງທີ່ດີໃຫ້ກັບຂ້ອຍ.” (ສຸພາ. 31:15, 21, 22) ພີ່ນ້ອງຍິງທີ່ດຸໝັ່ນ ມີນ້ຳໃຈຕ້ອນຮັບແຂກ ແລະເຮັດວຽກເຮືອນເປັນ ມີຄ່າຕໍ່ຄອບຄົວແລະປະຊາຄົມຫຼາຍແທ້ໆ.—ສຸພາ. 31:13, 17, 27; ກຈກ. 16:15
14. ເຈົ້າໄດ້ບົດຮຽນຫຍັງຈາກຕົວຢ່າງຂອງພີ່ນ້ອງຄຣິດສະໂຕ? ແລະເຈົ້າຄວນຈົດຈໍ່ກັບສິ່ງໃດ?
14 ຮຽນທັກສະທີ່ຈະຊ່ວຍໃຫ້ລ້ຽງໂຕເອງໄດ້. ເປັນເລື່ອງສຳຄັນຫຼາຍທີ່ຄລິດສະຕຽນທີ່ມີຄວາມເປັນຜູ້ໃຫຍ່ທຸກຄົນຈະຮຽນຮູ້ທັກສະທີ່ຈະຊ່ວຍໃຫ້ລ້ຽງໂຕເອງໄດ້. (ຟລປ. 4:11) ພີ່ນ້ອງຍິງທີ່ຊື່ຄຣິດສະໂຕບອກວ່າ: “ພໍ່ແມ່ຊ່ວຍຂ້ອຍວາງແຜນວ່າຈະເລືອກຮຽນຫຍັງເພື່ອຈະມີວຽກເຮັດ. ພໍ່ແນະນຳໃຫ້ຂ້ອຍຮຽນບັນຊີ ເຊິ່ງມັນກໍດີຫຼາຍແທ້ໆ.” ນອກຈາກຮຽນທັກສະທີ່ຈະມີວຽກເຮັດແລ້ວ ໃຫ້ເຈົ້າລອງຈັດງົບແລະບໍ່ໃຊ້ເງິນເກີນທີ່ກຳນົດໄວ້. (ສຸພາ. 31:16, 18) ຖ້າເຈົ້າພໍໃຈໃນສິ່ງທີ່ມີຢູ່ແລະບໍ່ຊື້ເຄື່ອງລາຄາແພງຈົນເຮັດໃຫ້ເປັນໜີ້ ເຈົ້າກໍສາມາດຈົດຈໍ່ຢູ່ກັບການຮັບໃຊ້ພະເຢໂຫວາ.—1ຕມ. 6:8
ກຽມພ້ອມສຳລັບໜ້າທີ່ຮັບຜິດຊອບໃນອະນາຄົດ
15-16. ເປັນຫຍັງພີ່ນ້ອງຍິງທີ່ເປັນໂສດຈຶ່ງມີຄ່າຫຼາຍ? (ມາຣະໂກ 10:29, 30)
15 ເມື່ອເຈົ້າພະຍາຍາມທີ່ຈະມີຄຸນລັກສະນະແບບພະເຈົ້າແລະຝຶກທັກສະຕ່າງໆທີ່ເປັນປະໂຫຍດແລ້ວ ເຈົ້າກໍຈະພ້ອມສຳລັບໜ້າທີ່ຮັບຜິດຊອບໃນອະນາຄົດ. ໃຫ້ມາເບິ່ງວ່າມີຫຍັງແດ່ທີ່ເຈົ້າຈະເຮັດໄດ້.
16 ເຈົ້າອາດຈະເປັນໂສດໄລຍະໜຶ່ງ. ຄືກັບທີ່ພະເຢຊູບອກໄວ້ ຜູ້ຍິງບາງຄົນເລືອກທີ່ຈະບໍ່ແຕ່ງດອງ ເຖິງວ່າຈະຂັດກັບວັດທະນະທຳໃນບ່ອນທີ່ລາວຢູ່. (ມທ. 19:10-12) ສ່ວນບາງຄົນອາດຍັງເປັນໂສດຍ້ອນເຫດຜົນອື່ນ. ບໍ່ວ່າຈະເຫດຜົນໃດ ຂໍໃຫ້ໝັ້ນໃຈວ່າພະເຢໂຫວາແລະພະເຢຊູບໍ່ໄດ້ເບິ່ງວ່າຄລິດສະຕຽນທີ່ເປັນໂສດບໍ່ມີຄ່າ. ໃນທົ່ວໂລກພີ່ນ້ອງຍິງທີ່ເປັນໂສດເປັນຕົວຢ່າງທີ່ດີສຳລັບພີ່ນ້ອງໃນປະຊາຄົມຍ້ອນເຂົາເຈົ້າສະແດງຄວາມຮັກແລະສົນໃຈຄົນອື່ນ. ເຂົາເຈົ້າຈຶ່ງເປັນຄືກັບແມ່ ເປັນຄືກັບເອື້ອຍ ຫຼືເປັນຄືກັບນ້ອງສາວຂອງຫຼາຍຄົນໃນປະຊາຄົມ.—ອ່ານມາຣະໂກ 10:29, 30; 1ຕມ. 5:2
17. ພີ່ນ້ອງຍິງທີ່ຍັງໜຸ່ມຈະກຽມໂຕເປັນຜູ້ຮັບໃຊ້ເຕັມເວລາໄດ້ແນວໃດ?
17 ເຈົ້າອາດເປັນຜູ້ຮັບໃຊ້ເຕັມເວລາ. ພີ່ນ້ອງຍິງມີສ່ວນສຳຄັນໃນການສະໜັບສະໜູນວຽກປະກາດຢູ່ທົ່ວໂລກ. (ເພງ. 68:11) ເຈົ້າວາງແຜນທີ່ຈະເຮັດວຽກຮັບໃຊ້ເຕັມເວລາໄດ້ບໍ ເຊັ່ນ: ເຈົ້າອາດເປັນໄພໂອເນຍ ເປັນອາສາສະໝັກໃນທີມກໍ່ສ້າງ ແລະຮັບໃຊ້ຢູ່ເບເທນ. ໃຫ້ເຈົ້າອະທິດຖານກ່ຽວກັບເປົ້າໝາຍຂອງເຈົ້າ. ລົມກັບພີ່ນ້ອງທີ່ເຮັດຕາມເປົ້າໝາຍໄດ້ສຳເລັດ ແລະໃຫ້ເບິ່ງວ່າເຈົ້າຕ້ອງເຮັດຫຍັງອີກເພື່ອຈະມີຄຸນສົມບັດທີ່ຈະຮັບໃຊ້ໃນແບບທີ່ເຈົ້າຕັ້ງເປົ້າໝາຍໄວ້. ຈາກນັ້ນໃຫ້ວາງແຜນໃນແບບທີ່ເຈົ້າຈະເຮັດໄດ້ແທ້. ຖ້າເຈົ້າເຮັດຕາມເປົ້າໝາຍທີ່ວາງໄວ້ໄດ້ ມັນກໍຈະເປີດໂອກາດທີ່ໜ້າຕື່ນເຕັ້ນໃຫ້ເຈົ້າແລະຮັບໃຊ້ພະເຢໂຫວາຫຼາຍຮູບແບບ.
ຖ້າເຈົ້າຄິດທີ່ຈະແຕ່ງດອງ ເຈົ້າຕ້ອງເລືອກໃຫ້ດີໆວ່າໃຜຈະມາເປັນຜົວຂອງເຈົ້າ (ເບິ່ງຂໍ້ 18)
18. ເປັນຫຍັງພີ່ນ້ອງຍິງຄວນເລືອກຄົນທີ່ລາວຈະແຕ່ງດອງນຳໃຫ້ດີໆ? (ເບິ່ງຮູບ)
18 ເຈົ້າອາດເລືອກທີ່ຈະແຕ່ງດອງ. ຄຸນລັກສະນະແລະທັກສະຕ່າງໆທີ່ເວົ້າເຖິງກ່ອນໜ້ານີ້ຈະຊ່ວຍເຈົ້າໃຫ້ເປັນເມຍທີ່ດີໄດ້. ແນ່ນອນວ່າຖ້າເຈົ້າຄິດທີ່ຈະແຕ່ງດອງ ເຈົ້າຕ້ອງຄິດໃຫ້ດີໆຍ້ອນມັນເປັນເລື່ອງໜຶ່ງທີ່ສຳຄັນທີ່ສຸດໃນຊີວິດຂອງເຈົ້າ. ຂໍໃຫ້ຈື່ໄວ້ວ່າຄົນທີ່ເຈົ້າຈະແຕ່ງດອງນຳຈະເປັນຜູ້ນຳຂອງເຈົ້າ ແລະເຈົ້າຈະຢູ່ໃຕ້ອຳນາດຂອງລາວ. (ຣມ. 7:2; ອຟຊ. 5:23, 33) ດັ່ງນັ້ນ ໃຫ້ຖາມໂຕເອງວ່າ: ‘ລາວເປັນຄລິດສະຕຽນທີ່ມີຄວາມເປັນຜູ້ໃຫຍ່ບໍ? ລາວໃຫ້ພະເຢໂຫວາສຳຄັນທີ່ສຸດໃນຊີວິດບໍ? ເມື່ອລາວຕ້ອງຕັດສິນໃຈບາງເລື່ອງ ລາວຕັດສິນໃຈແບບສະຫຼາດບໍ? ເມື່ອລາວເຮັດຜິດ ລາວຍອມຮັບບໍ? ລາວໃຫ້ກຽດຜູ້ຍິງບໍ? ລາວສາມາດຫາລ້ຽງຂ້ອຍໄດ້ບໍ? ລາວສາມາດຊ່ວຍຂ້ອຍໃຫ້ໃກ້ຊິດກັບພະເຢໂຫວາໄດ້ບໍ? ເມື່ອຂ້ອຍທຸກໃຈຫຼືກັງວົນ ລາວພ້ອມທີ່ຈະຢູ່ຄຽງຂ້າງຂ້ອຍບໍ? ລາວມີຄວາມຮັບຜິດຊອບບໍ ເຊັ່ນ ລາວມີໜ້າທີ່ຫຍັງໃນປະຊາຄົມແລະລາວເຮັດວຽກນັ້ນແນວໃດ?’ (ລກ. 16:10; 1ຕມ. 5:8) ແນ່ນອນວ່າຖ້າເຈົ້າຢາກໄດ້ຜົວທີ່ດີ ເຈົ້າກໍຕ້ອງເປັນເມຍທີ່ດີຄືກັນ.
19. ເປັນຫຍັງການເປັນ “ຜູ້ຊ່ວຍ” ຈຶ່ງເປັນໜ້າທີ່ທີ່ມີກຽດ?
19 ຄຳພີໄບເບິນບອກວ່າເມຍເປັນ “ຜູ້ຊ່ວຍ” ຂອງຜົວແລະ “ເປັນຄູ່” ຂອງລາວ. (ປຖກ. 2:18) ຄຳເວົ້ານີ້ໝາຍຄວາມວ່າຜູ້ຍິງສຳຄັນໜ້ອຍກວ່າຜູ້ຊາຍບໍ? ບໍ່ແມ່ນແນວນັ້ນ! ການທີ່ຜູ້ຍິງເປັນຜູ້ຊ່ວຍເປັນໜ້າທີ່ທີ່ມີກຽດຫຼາຍ. ແທ້ໆແລ້ວຄຳພີໄບເບິນບອກເລື້ອຍໆວ່າພະເຢໂຫວາເປັນ “ຜູ້ຊ່ວຍ.” (ເພງ. 54:4, ລ.ມ; ຮຣ. 13:6) ເມຍທີ່ດີແລະເປັນຜູ້ຊ່ວຍຂອງຜົວຈະສະໜັບສະໜູນຜົວ ແລະຊ່ວຍໃຫ້ຜົວຕັດສິນໃຈໄດ້ດີໃນເລື່ອງທີ່ມີຜົນຕໍ່ຄອບຄົວ. ຍ້ອນລາວຮັກພະເຢໂຫວາຈຶ່ງເຮັດໃຫ້ຜົວມີຊື່ສຽງທີ່ດີນຳ. (ສຸພາ. 31:11, 12; 1ຕມ. 3:11) ເພື່ອຈະກຽມພ້ອມສຳລັບໜ້າທີ່ຮັບຜິດຊອບນີ້ໃນອະນາຄົດ ພີ່ນ້ອງຍິງທີ່ຍັງໂສດຈະກຽມໂຕໄດ້ໂດຍພັດທະນາຄວາມຮັກທີ່ມີຕໍ່ພະເຢໂຫວາໃຫ້ຫຼາຍຂຶ້ນແລະເປັນຜູ້ຊ່ວຍທີ່ດີຂອງຄອບຄົວແລະຂອງປະຊາຄົມຕັ້ງແຕ່ຕອນນີ້.
20. ແມ່ທີ່ດີຈະສົ່ງຜົນແນວໃດຕໍ່ຄອບຄົວ?
20 ເຈົ້າອາດເປັນແມ່. ຫຼັງຈາກທີ່ແຕ່ງດອງແລ້ວ ເຈົ້າອາດຈະມີລູກ. (ເພງ. 127:3) ດັ່ງນັ້ນ ເປັນເລື່ອງດີທີ່ຈະຄິດລ່ວງໜ້າກ່ຽວກັບເລື່ອງນີ້. ຄຸນລັກສະນະແລະທັກສະຕ່າງໆທີ່ເວົ້າເຖິງໃນບົດຄວາມນີ້ຈະຊ່ວຍເຈົ້າໃຫ້ເປັນເມຍແລະເປັນແມ່ທີ່ດີໄດ້. ຖ້າເຈົ້າສະແດງຄວາມຮັກ ຄວາມກະລຸນາ ແລະອົດທົນ ມັນກໍຈະຊ່ວຍໃຫ້ຄອບຄົວຂອງເຈົ້າອົບອຸ່ນແລະລູກຂອງເຈົ້າກໍຈະຮູ້ສຶກວ່າພໍ່ແມ່ຮັກເຂົາເຈົ້າແລະຮູ້ສຶກປອດໄພ.—ສຸພາ. 24:3
ພີ່ນ້ອງຍິງທີ່ຍັງໜຸ່ມຫຼາຍຄົນຮຽນຄຳພີໄບເບິນແລະເຮັດຕາມສິ່ງທີ່ໄດ້ຮຽນຈົນກາຍເປັນຄລິດສະຕຽນທີ່ມີຄວາມເປັນຜູ້ໃຫຍ່ (ເບິ່ງຂໍ້ 21)
21. ເຮົາຄວນຮູ້ສຶກແນວໃດກັບພີ່ນ້ອງຍິງ ແລະເປັນຫຍັງເຮົາຈຶ່ງຮູ້ສຶກແບບນັ້ນ? (ເບິ່ງຮູບໜ້າປົກ)
21 ພີ່ນ້ອງຍິງ ເຮົາຮັກເຈົ້າຫຼາຍ ຍ້ອນເຈົ້າເຮັດເພື່ອພະເຢໂຫວາແລະເພື່ອພີ່ນ້ອງ. (ຮຣ. 6:10) ເຈົ້າພະຍາຍາມທີ່ຈະມີຄຸນລັກສະນະແບບພະເຈົ້າ ຝຶກທັກສະທີ່ຈະຊ່ວຍເຈົ້າແລະຄົນອື່ນໃຫ້ມີຄວາມສຸກຫຼາຍຂຶ້ນ ແລະກຽມພ້ອມສຳລັບໜ້າທີ່ຮັບຜິດຊອບໃນອະນາຄົດ. ເຈົ້າມີຄ່າຫຼາຍແທ້ໆສຳລັບອົງການຂອງພະເຢໂຫວາ!
ເພງ 137 ພີ່ນ້ອງຍິງທີ່ສັດຊື່
a ພີ່ນ້ອງຍິງທີ່ຍັງໜຸ່ມ ເຈົ້າມີຄ່າຫຼາຍໃນປະຊາຄົມ. ເຈົ້າສາມາດເປັນຄລິດສະຕຽນທີ່ມີຄວາມເປັນຜູ້ໃຫຍ່ໄດ້ຖ້າເຈົ້າພະຍາຍາມມີຄຸນລັກສະນະແບບພະເຈົ້າ ຝຶກທັກສະຕ່າງໆທີ່ເປັນປະໂຫຍດ ແລະກຽມພ້ອມສຳລັບໜ້າທີ່ຮັບຜິດຊອບໃນອະນາຄົດ. ຖ້າເຈົ້າເຮັດແບບນັ້ນ ເຈົ້າຈະມີຄວາມສຸກແລະໄດ້ຮັບສິ່ງດີໆຫຼາຍຢ່າງຈາກການຮັບໃຊ້ພະເຢໂຫວາ.
b ການອະທິບາຍຄຳສັບ: ຄົນທີ່ພະຍາຍາມເປັນຄລິດສະຕຽນທີ່ມີຄວາມເປັນຜູ້ໃຫຍ່ແມ່ນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ ບໍ່ແມ່ນສະຕິປັນຍາຂອງໂລກນີ້. ລາວຮຽນແບບຕົວຢ່າງຂອງພະເຢຊູ ພະຍາຍາມເຕັມທີທີ່ຈະໃກ້ຊິດກັບພະເຢໂຫວາສະເໝີ ແລະສະແດງຄວາມຮັກແບບບໍ່ເຫັນແກ່ໂຕຕໍ່ຄົນອື່ນ.
c (ພາສາໄທ)
e ເພື່ອຈະເຂົ້າໃຈວ່າການອ່ານສຳຄັນສ່ຳໃດ ເບິ່ງບົດຄວາມໃນເວັບໄຊ jw.org ເລື່ອງ “ເປັນຫຍັງການອ່ານຈຶ່ງສຳຄັນສຳລັບເດັກນ້ອຍ?—ຕອນ 1: ອ່ານຫຼືເບິ່ງ?”
