ຄຳຖາມຈາກຜູ້ອ່ານ
ໃຜແມ່ນ “ພວກທູດສະຫວັນທີ່ພະເຈົ້າເລືອກໄວ້”ທີ່ເວົ້າເຖິງໃນ 1 ຕີໂມທຽວ 5:21?
ອັກຄະສາວົກໂປໂລໄດ້ຂຽນຈົດໝາຍໄປຫາຕີໂມທຽວທີ່ເປັນຜູ້ເບິ່ງແຍງຄືກັນກັບລາວ. ໂປໂລຂຽນວ່າ: “ຂ້ອຍຂໍສັ່ງເຈົ້າຕໍ່ໜ້າພະເຈົ້າແລະພະຄລິດເຢຊູລວມທັງພວກທູດສະຫວັນທີ່ພະເຈົ້າເລືອກໄວ້ວ່າ ໃຫ້ເຈົ້າເຮັດຕາມຄຳແນະນຳເຫຼົ່ານີ້ໂດຍບໍ່ມີອະຄະຕິກັບໃຜແລະບໍ່ລຳອຽງ.”—1ຕມ. 5:21
ເພື່ອຊ່ວຍເຮົາໃຫ້ຮູ້ວ່າທູດສະຫວັນເຫຼົ່ານີ້ແມ່ນໃຜ ທຳອິດເຮົາຈະມາເບິ່ງກ່ອນວ່າທູດສະຫວັນພວກໃດທີ່ບໍ່ໄດ້ລວມຢູ່ໃນທູດສະຫວັນກຸ່ມນີ້. ເຫັນໄດ້ແຈ້ງວ່າທູດສະຫວັນເຫຼົ່ານີ້ບໍ່ແມ່ນສ່ວນໜຶ່ງຂອງ 144.000 ຄົນ. ຕອນທີ່ໂປໂລຂຽນໄປຫາຕີໂມທຽວ ຜູ້ຖືກເລືອກຍັງບໍ່ທັນຖືກປຸກໃຫ້ຂຶ້ນໄປສະຫວັນເທື່ອ. ພວກອັກຄະສາວົກແລະຜູ້ຖືກເລືອກຄົນອື່ນໆຍັງບໍ່ທັນມີຮ່າງກາຍສຳລັບສະຫວັນ ສະນັ້ນ “ພວກທູດສະຫວັນທີ່ພະເຈົ້າເລືອກໄວ້” ຈຶ່ງບໍ່ໄດ້ໝາຍເຖິງເຂົາເຈົ້າ.—1ກຣ. 15:50-54; 1ທຊ. 4:13-17; 1ຢຮ. 3:2
ນອກຈາກນັ້ນ “ພວກທູດສະຫວັນທີ່ພະເຈົ້າເລືອກໄວ້” ບໍ່ໄດ້ໝາຍເຖິງພວກທູດສະຫວັນທີ່ບໍ່ເຊື່ອຟັງໃນສະໄໝນ້ຳຖ້ວມໂລກ. ພວກທູດສະຫວັນເຫຼົ່ານັ້ນໄປຢູ່ຝ່າຍຊາຕານແລະຖືກເອີ້ນວ່າປີສາດເຊິ່ງເປັນສັດຕູຂອງພະເຢຊູ. (ປຖກ. 6:2; ລກ. 8:30, 31; 2ປຕ. 2:4) ໃນອະນາຄົດ ພະເຢຊູຈະຖິ້ມພວກມັນລົງໃນເຫວເລິກແລະຂັງໄວ້ 1.000 ປີ. ຫຼັງຈາກນັ້ນ ພວກມັນຈະຖືກທຳລາຍພ້ອມກັບຊາຕານ.—ຢດ. 6; ພນມ. 20:1-3, 10
ສະນັ້ນ “ພວກທູດສະຫວັນທີ່ພະເຈົ້າເລືອກໄວ້” ທີ່ໂປໂລເວົ້າເຖິງຕ້ອງແມ່ນທູດສະຫວັນທີ່ຢູ່ໃນສະຫວັນເຊິ່ງສະໜັບສະໜູນທັງ “ພະເຈົ້າແລະພະຄລິດເຢຊູ.”
ມີທູດສະຫວັນທີ່ສັດຊື່ເປັນໝື່ນເປັນແສນອົງ. (ຮຣ. 12:22, 23) ເບິ່ງຄືວ່າພະເຢໂຫວາໃຫ້ທູດສະຫວັນແຕ່ລະອົງເຮັດວຽກຕ່າງກັນ. (ພນມ. 14:17, 18) ຕົວຢ່າງເຊັ່ນ: ພະເຢໂຫວາໃຫ້ທູດສະຫວັນພຽງແຕ່ອົງດຽວຂ້າທະຫານອັດຊີເຣຍ 185.000 ຄົນຕາຍ. (2ກສ. 19:35) ແຕ່ທູດສະຫວັນຫຼາຍອົງອາດຖືກມອບໝາຍໃຫ້ “ຄັດຄົນທີ່ເປັນຕົ້ນເຫດພາໃຫ້ຄົນອື່ນເຮັດຜິດ ແລະຄັດຄົນທີ່ເຮັດຊົ່ວອອກໄປຈາກການປົກຄອງຂອງ [ພະເຢຊູ].” (ມທ. 13:39-41) ທູດສະຫວັນບາງອົງອາດຖືກມອບໝາຍໃຫ້ “ລວບລວມຄົນທີ່ພະເຈົ້າເລືອກໄວ້” ເພື່ອໄປສະຫວັນ. (ມທ. 24:31) ທູດສະຫວັນບາງອົງກໍ ‘ປົກປ້ອງເຮົາທຸກທາງ.’—ພສ. 91:11; ມທ. 18:10 ສົມທຽບກັບມັດທາຍ 4:11; ລູກາ 22:43
“ພວກທູດສະຫວັນທີ່ພະເຈົ້າເລືອກໄວ້” ທີ່ເວົ້າເຖິງໃນ 1 ຕີໂມທຽວ 5:21 ອາດຖືກມອບໝາຍໃຫ້ຊ່ວຍເຫຼືອແລະເບິ່ງແຍງປະຊາຄົມໃນເລື່ອງຕ່າງໆ. ໃນແວດບົດນີ້ ໂປໂລໃຫ້ຄຳແນະນຳຜູ້ເບິ່ງແຍງກ່ຽວກັບວິທີທີ່ເຂົາເຈົ້າເຮັດໜ້າທີ່ຮັບຜິດຊອບຂອງໂຕເອງໃນປະຊາຄົມແລະວິທີທີ່ຄົນໃນປະຊາຄົມຄວນສະແດງຄວາມນັບຖືຕໍ່ຜູ້ເບິ່ງແຍງ. ໂປໂລບອກວ່າຜູ້ເບິ່ງແຍງບໍ່ຄວນ “ມີອະຄະຕິກັບໃຜແລະບໍ່ລຳອຽງ” ແລະບໍ່ຄວນເປັນຄົນທີ່ຟ້າວຕັດສິນໃຈໂດຍບໍ່ຄິດໃຫ້ດີໆກ່ອນ. ຈາກນັ້ນ ໂປໂລໃຫ້ເຫດຜົນທີ່ສຳຄັນຫຼາຍເພື່ອໃຫ້ຜູ້ເບິ່ງແຍງເຮັດຕາມຄຳແນະນຳຂອງລາວ. ລາວເວົ້າວ່າຜູ້ເບິ່ງແຍງຮັບໃຊ້ພີ່ນ້ອງ “ຕໍ່ໜ້າພະເຈົ້າແລະພະຄລິດເຢຊູລວມທັງພວກທູດສະຫວັນທີ່ພະເຈົ້າເລືອກໄວ້” ເຊິ່ງໝາຍຄວາມວ່າພະເຢໂຫວາ ພະເຢຊູ ແລະ “ພວກທູດສະຫວັນທີ່ພະເຈົ້າເລືອກໄວ້” ກຳລັງເບິ່ງວ່າເຂົາເຈົ້າເບິ່ງແຍງປະຊາຄົມແນວໃດ. ສະນັ້ນ ເຫັນໄດ້ແຈ້ງວ່າທູດສະຫວັນບາງອົງຖືກມອບໝາຍໃຫ້ເຮັດວຽກທີ່ກ່ຽວຂ້ອງກັບປະຊາຄົມ ເຊັ່ນ: ປົກປ້ອງຜູ້ຮັບໃຊ້ຂອງພະເຢໂຫວາ ເບິ່ງແຍງວຽກປະກາດ ແລະລາຍງານສິ່ງທີ່ເຂົາເຈົ້າເຫັນໃຫ້ພະເຢໂຫວາຮູ້.—ມທ. 18:10; ພນມ. 14:6
