ບົດຄວາມສຶກສາທີ 50
ເພງທີ 135 ພະເຢໂຫວາເຊີນຢ່າງອົບອຸ່ນວ່າ ລູກຂອງເຮົາຈົ່ງມີປັນຍາເຖີດ
ພໍ່ແມ່ຈະຊ່ວຍລູກແນວໃດໃຫ້ມີຄວາມເຊື່ອເຂັ້ມແຂງ?
“[ໃຫ້] ກວດເບິ່ງຈົນໝັ້ນໃຈວ່າອັນໃດແມ່ນສິ່ງທີ່ພະເຈົ້າຕ້ອງການໃຫ້ພວກເຈົ້າເຮັດ ເຊິ່ງເປັນສິ່ງທີ່ດີ ສົມບູນ ແລະເຮັດໃຫ້ເພິ່ນພໍໃຈ.”—ຣມ. 12:2
ຈຸດສຳຄັນ
ໃນບົດນີ້ ພໍ່ແມ່ຈະຮຽນຮູ້ວິທີລົມກັບລູກກ່ຽວກັບເລື່ອງພະເຢໂຫວາແລະເລື່ອງຄຳພີໄບເບິນເພື່ອຊ່ວຍລູກໃຫ້ມີຄວາມເຊື່ອເຂັ້ມແຂງ.
1-2. ພໍ່ແມ່ຄວນຮູ້ສຶກແນວໃດເມື່ອລູກຖາມຄຳຖາມກ່ຽວກັບຄວາມເຊື່ອ?
ຫຼາຍຄົນເຫັນດີວ່າການລ້ຽງລູກເປັນວຽກທີ່ໜັກຫຼາຍ. ຖ້າເຈົ້າເປັນພໍ່ແມ່ ເຮົາຂໍຊົມເຊີຍເຈົ້າທີ່ພະຍາຍາມເຕັມທີເພື່ອຊ່ວຍລູກໃຫ້ມີຄວາມເຊື່ອເຂັ້ມແຂງ. (ພບຍ. 6:6, 7) ເມື່ອລູກໃຫຍ່ຂຶ້ນ ລາວອາດມີຄຳຖາມຕ່າງໆກ່ຽວກັບຄວາມເຊື່ອແລະມາດຕະຖານທີ່ຢູ່ໃນຄຳພີໄບເບິນ.
2 ທຳອິດເມື່ອລູກຖາມແບບນີ້ ເຈົ້າອາດຄິດວ່າລູກຍັງບໍ່ມີຄວາມເຊື່ອເຂັ້ມແຂງປານໃດ. ທີ່ຈິງ ເມື່ອເດັກນ້ອຍໃຫຍ່ຂຶ້ນ ເຂົາເຈົ້າກໍຕ້ອງຖາມຄຳຖາມເພື່ອຈະເຮັດໃຫ້ຄວາມເຊື່ອເປັນຂອງໂຕເອງ. (1ກຣ. 13:11) ສະນັ້ນ ເຈົ້າບໍ່ຕ້ອງຢ້ານ. ຕອນທີ່ລູກຖາມ ໃຫ້ໃຊ້ໂອກາດນັ້ນເພື່ອຊ່ວຍລູກໃຫ້ຝຶກໃຊ້ຄວາມສາມາດໃນການຄິດຫາເຫດຜົນເພື່ອລູກຈະມີຄວາມເຊື່ອທີ່ເຂັ້ມແຂງ.
3. ເຮົາຈະຮຽນຫຍັງໃນບົດນີ້?
3 ໃນບົດນີ້ ເຮົາຈະເບິ່ງວິທີຕ່າງໆທີ່ພໍ່ແມ່ສາມາດຊ່ວຍລູກໃຫ້ (1) ເຮັດໃຫ້ຄວາມເຊື່ອເປັນຂອງໂຕເອງ (2) ເຫັນຄ່າມາດຕະຖານທີ່ຢູ່ໃນຄຳພີໄບເບິນວ່າອັນໃດຖືກອັນໃດຜິດ ແລະ (3) ຮູ້ຈັກອະທິບາຍຄວາມເຊື່ອຂອງໂຕເອງ. ນອກຈາກນັ້ນ ເຮົາຈະເບິ່ງວ່າເປັນຫຍັງຈຶ່ງເປັນເລື່ອງທີ່ດີທີ່ລູກຕັ້ງຄຳຖາມ ແລະເຮົາຍັງຈະເບິ່ງວ່າມີກິດຈະກຳຫຍັງແດ່ທີ່ພໍ່ແມ່ຈະເຮັດກັບລູກໄດ້ເຊິ່ງຈະເປີດໂອກາດໃຫ້ໄດ້ລົມກັບລູກກ່ຽວກັບເລື່ອງຄວາມເຊື່ອ.
ຊ່ວຍລູກໃຫ້ມີຄວາມເຊື່ອເປັນຂອງໂຕເອງ
4. ລູກອາດຖາມຄຳຖາມຫຍັງແດ່ ແລະຍ້ອນຫຍັງ?
4 ຄົນທີ່ເປັນພໍ່ແມ່ຮູ້ດີວ່າການມີຄວາມເຊື່ອໃນພະເຢໂຫວາບໍ່ແມ່ນສິ່ງທີ່ເຂົາເຈົ້າຈະເອົາໃຫ້ລູກໄດ້ໂດຍອັດຕະໂນມັດ. ເຈົ້າເອງກໍບໍ່ໄດ້ເກີດມາພ້ອມກັບມີຄວາມເຊື່ອໃນພະເຢໂຫວາ. ລູກຂອງເຈົ້າກໍເປັນແບບນັ້ນຄືກັນ. ເມື່ອໃຫຍ່ຂຶ້ນມາລູກອາດຈະຖາມເຈົ້າວ່າ: ‘ລູກຈະຮູ້ໄດ້ແນວໃດວ່າພະເຢໂຫວາມີແທ້? ລູກຈະເຊື່ອໄດ້ແທ້ໆບໍກ່ຽວກັບສິ່ງທີ່ຂຽນໄວ້ໃນຄຳພີໄບເບິນ?’ ທີ່ຈິງ ຄຳພີໄບເບິນກະຕຸ້ນເຮົາໃຫ້ໃຊ້ການ “ຄິດ [ຫາເຫດຜົນ]” ແລະ “ໃຫ້ກວດເບິ່ງທຸກສິ່ງຈົນໝັ້ນໃຈ.” (ຣມ. 12:1; 1ທຊ. 5:21) ຄັນຊັ້ນ ເຈົ້າຈະຊ່ວຍລູກແນວໃດໃຫ້ມີຄວາມເຊື່ອເຂັ້ມແຂງ?
5. ພໍ່ແມ່ຈະຊ່ວຍລູກແນວໃດໃຫ້ໝັ້ນໃຈໃນຄຳພີໄບເບິນ? (ໂຣມ 12:2)
5 ສະໜັບສະໜູນລູກໃຫ້ຊອກຫາຫຼັກຖານທີ່ສະແດງວ່າສິ່ງທີ່ຂຽນໄວ້ໃນຄຳພີໄບເບິນເປັນຄວາມຈິງ. (ອ່ານໂຣມ 12:2) ເມື່ອລູກຖາມຄຳຖາມ ໃຫ້ໃຊ້ໂອກາດນັ້ນຊ່ວຍລູກໃຫ້ຮູ້ວິທີຊອກຄຳຕອບໂດຍໃຊ້ເຄື່ອງມືຄົ້ນຄວ້າຕ່າງໆຂອງອົງການ ເຊັ່ນ ຄູ່ມືຄົ້ນຄວ້າສຳລັບພະຍານພະເຢໂຫວາ. ໃນຄູ່ມືຄົ້ນຄວ້ານີ້ ໃນສ່ວນ “ຫົວເລື່ອງ” ມີຫົວຂໍ້ທີ່ຊື່ວ່າ “ຄຳພີໄບເບິນ” ລູກຂອງເຈົ້າອາດຈະເບິ່ງໃນຫົວຂໍ້ຍ່ອຍທີ່ຊື່ວ່າ “ໄດ້ຮັບການດົນໃຈຈາກພະເຈົ້າ” ເພື່ອເບິ່ງຫຼັກຖານທີ່ບອກໃຫ້ຮູ້ວ່າຄຳພີໄບເບິນບໍ່ແມ່ນປຶ້ມທີ່ຂຽນໂດຍມະນຸດ ແຕ່ແມ່ນ “ຄຳສອນຂອງພະເຈົ້າແທ້ໆ.” (1ທຊ. 2:13) ຕົວຢ່າງເຊັ່ນ: ລາວອາດຄົ້ນຄວ້າຫຼາຍຂຶ້ນໃນປຶ້ມຕ່າງໆຂອງອົງການກ່ຽວກັບເມືອງນີເນເວທີ່ຢູ່ອັດຊີເຣຍໃນສະໄໝບູຮານ. ແຕ່ກີ້ນັກວິຊາການດ້ານຄຳພີໄບເບິນເວົ້າວ່າບໍ່ເຄີຍມີເມືອງນີເນເວ ແຕ່ປະມານປີ 1850 ນັກຄົ້ນຄວ້າໄດ້ຄົ້ນພົບຊາກຫັກພັງຂອງເມືອງນີ້ຢູ່ໃຕ້ພື້ນດິນເຊິ່ງເລື່ອງນີ້ພິສູດວ່າສິ່ງທີ່ຂຽນໄວ້ໃນຄຳພີໄບເບິນຖືກຕ້ອງ. (ຊຟຢ. 2:13-15) ສຳລັບຂໍ້ມູນເພີ່ມເຕີມກ່ຽວກັບການທຳລາຍເມືອງນີເນເວເຮັດໃຫ້ຄຳພະຍາກອນໃນຄຳພີໄບເບິນເກີດຂຶ້ນແທ້ແນວໃດ ລູກຂອງເຈົ້າອາດຈະເບິ່ງບົດຄວາມ “ເຈົ້າຮູ້ບໍ?” ໃນຫໍສັງເກດການເດືອນພະຈິກ ປີ 2021. ເມື່ອລູກສົມທຽບສິ່ງທີ່ປຶ້ມຕ່າງໆຂອງອົງການເວົ້າກັບປຶ້ມອ້າງອີງອື່ນໆທີ່ເຊື່ອຖືໄດ້ ລູກກໍແຮ່ງຈະມີຄວາມເຊື່ອຫຼາຍຂຶ້ນວ່າສິ່ງທີ່ຂຽນໄວ້ໃນຄຳພີໄບເບິນຖືກຕ້ອງ.
6. ພໍ່ແມ່ຈະຊ່ວຍລູກແນວໃດໃຫ້ຝຶກໃຊ້ຄວາມສາມາດໃນການຄິດຫາເຫດຜົນ? ຂໍໃຫ້ອະທິບາຍ. (ເບິ່ງຮູບນຳ)
6 ຊ່ວຍລູກໃຫ້ຝຶກໃຊ້ຄວາມສາມາດໃນການຄິດຫາເຫດຜົນກ່ຽວກັບຫຼັກຖານທີ່ສະແດງວ່າສິ່ງທີ່ຂຽນໄວ້ໃນຄຳພີໄບເບິນຖືກຕ້ອງ. ພໍ່ແມ່ມີຫຼາຍໂອກາດທີ່ຈະລົມກັບລູກກ່ຽວກັບເລື່ອງຄຳພີໄບເບິນແລະເລື່ອງພະເຢໂຫວາຕອນໄປຫໍພິພິທະພັນ ໄປຍ່າງຫຼິ້ນຢູ່ສວນສາທາລະນະ ຫຼືໄປທົວເບເທນ. ຕົວຢ່າງເຊັ່ນ: ເຈົ້າກັບລູກອາດເບິ່ງປຶ້ມຫຼືວິດີໂອທີ່ເວົ້າເຖິງວັດຖຸບູຮານໃດໜຶ່ງຫຼືເຫດການໃດໜຶ່ງທີ່ເກີດຂຶ້ນໃນປະຫວັດສາດເຊິ່ງກ່ຽວຂ້ອງກັບສິ່ງທີ່ຢູ່ໃນຄຳພີໄບເບິນ. ການເຮັດແບບນີ້ຈະຊ່ວຍລູກໃຫ້ເຫັນແລະໝັ້ນໃຈຫຼາຍຂຶ້ນວ່າສິ່ງທີ່ຄຳພີໄບເບິນເວົ້າຖືກຕ້ອງ. ລູກຂອງເຈົ້າຮູ້ບໍວ່າມີຊື່ຂອງພະເຢໂຫວາຂຽນໄວ້ໃນແຜ່ນຫີນແກະສະຫຼັກຂອງຄົນໂມອາບເຊິ່ງມີອາຍຸ 3.000 ປີ? ແຜ່ນຫີນຂອງແທ້ແມ່ນຢູ່ຫໍພິພິທະພັນລູບຢູ່ປະເທດຝຣັ່ງ. ນອກຈາກນັ້ນ ແບບຈຳລອງຂອງແຜ່ນຫີນແກະສະຫຼັກນີ້ຍັງວາງສະແດງຢູ່ຫໍພິພິທະພັນ “ຄຳພີໄບເບິນແລະຊື່ຂອງພະເຈົ້າ” ຢູ່ສຳນັກງານໃຫຍ່ຂອງພະຍານພະເຢໂຫວາຢູ່ວໍວິກ ນິວຢອກ. ເຈົ້າກັບລູກສາມາດເບິ່ງວັດຖຸບູຮານຕ່າງໆ ເຊັ່ນ: ແຜ່ນຫີນແກະສະຫຼັກຂອງຄົນໂມອາບໃນອິນເຕີເນັດຫຼືໃນປຶ້ມຕ່າງໆຂອງອົງການ. ແຜ່ນຫີນນີ້ບອກໃຫ້ຮູ້ວ່າເມຊາກະສັດຂອງໂມອາບໄດ້ກະບົດຕໍ່ອິດສະຣາເອນເຊິ່ງເປັນຕາມທີ່ຄຳພີໄບເບິນເວົ້າ. (2ກສ. 3:4, 5) ເມື່ອລູກເຫັນກັບຕາໂຕເອງກ່ຽວກັບຫຼັກຖານຕ່າງໆທີ່ສະແດງວ່າຄຳພີໄບເບິນເວົ້າຄວາມຈິງແລະຖືກຕ້ອງ ຄວາມເຊື່ອຂອງລາວກໍຈະເຂັ້ມແຂງຂຶ້ນ.—ສົມທຽບກັບ 2 ຂ່າວຄາວ 9:6
ເຈົ້າຈະຝຶກລູກໃຫ້ໃຊ້ຄວາມສາມາດໃນການຄິດຫາເຫດຜົນໄດ້ບໍໂດຍໃຫ້ລູກສັງເກດເບິ່ງຫຼັກຖານທາງປະຫວັດສາດໃນຫໍພິພິທະພັນ? (ເບິ່ງຂໍ້ 6)
7-8. (ກ) ເຮົາຮຽນຫຍັງຈາກຮູບຊົງງາມໆທີ່ເຮົາເຫັນໃນທຳມະຊາດ? ຂໍໃຫ້ອະທິບາຍ (ເບິ່ງຮູບນຳ) (ຂ) ມີຄຳຖາມຫຍັງທີ່ຈະຊ່ວຍລູກໃຫ້ມີຄວາມເຊື່ອຫຼາຍຂຶ້ນວ່າມີຜູ້ສ້າງ?
7 ກະຕຸ້ນລູກໃຫ້ສັງເກດສິ່ງທີ່ຢູ່ໃນທຳມະຊາດ. ຕອນທີ່ໄປຍ່າງຫຼິ້ນກັບລູກຢູ່ສວນສາທາລະນະຫຼືພາລູກໄປທ່ຽວຢູ່ນອກເມືອງ ໃຫ້ເຈົ້າຊ່ວຍລູກໃຫ້ສັງເກດເບິ່ງຮູບຊົງຕ່າງໆທີ່ເປັນຕາງຶດຂອງສິ່ງທີ່ເຫັນໃນທຳມະຊາດ. ຍ້ອນຫຍັງ? ຍ້ອນຮູບຊົງເຫຼົ່ານີ້ສະແດງໃຫ້ເຫັນວ່າມັນບໍ່ໄດ້ເກີດຂຶ້ນມາເອງ ແຕ່ມີຜູ້ສ້າງທີ່ມີສະຕິປັນຍາແລະສະຫຼາດຫຼາຍອອກແບບພວກມັນ. ຕົວຢ່າງເຊັ່ນ: ຫຼາຍຢ່າງໃນທຳມະຊາດມີຮູບຊົງແບບກົ້ນຫອຍ ນັກວິທະຍາສາດໃຊ້ເວລາຫຼາຍປີເພື່ອສຶກສາຄົ້ນຄວ້າກ່ຽວກັບຮູບຊົງເຫຼົ່ານີ້. ນັກວິທະຍາສາດຄົນໜຶ່ງຊື່ນິໂຄລາ ຟາເມລີອະທິບາຍວ່າເມື່ອເຮົານັບຈຳນວນເສັ້ນໂຄ້ງກົ້ນຫອຍຂອງສິ່ງໜຶ່ງທີ່ມີຢູ່ໃນທຳມະຊາດ ເຮົາກໍຈະເຫັນວ່າມັນກົງກັບໂຕເລກໜຶ່ງສະເພາະ ຊຸດໂຕເລກນີ້ເອີ້ນວ່າລຳດັບຟີໂບນັກຊີ. ເຮົາສາມາດເຫັນຮູບຊົງແບບກົ້ນຫອຍໃນຫຼາຍຢ່າງເຊັ່ນ: ໃນບາງກາແລັກຊີ ເປືອກຫອຍ ໃບໄມ້ ແລະແກ່ນດອກຕາເວັນ. a
8 ຢູ່ໂຮງຮຽນ ໃນວິຊາຊີວະສາດລູກອາດຈະໄດ້ຮຽນກ່ຽວກັບຮູບຊົງອື່ນໆອີກທີ່ເຫັນເລື້ອຍໆໃນທຳມະຊາດ. ຕົວຢ່າງເຊັ່ນ: ເກັດຫິມະ. ເກັດຫິມະແຕ່ລະເກັດຈະມີລັກສະນະພິເສດທີ່ແຕກເປັນກິ່ງກ້ານແລະກິ່ງກ້ານນັ້ນກໍແຕກເປັນກິ່ງນ້ອຍໆແລະມີຂະໜາດນ້ອຍລົງເລື້ອຍໆ. ຂະບວນການນີ້ເອີ້ນວ່າແຟັກໂທ້ເຊິ່ງເປັນຄຳທີ່ໃຊ້ເພື່ອບອກຮູບຊົງທີ່ເປັນແບບເກົ່າສະເໝີ ເປັນຮູບແບບຊ້ຳໆກັນ ແລະມີຫຼາຍຂະໜາດຮຽງຊ້ອນກັນ. ໃຜເປັນຜູ້ສ້າງແລະອອກແບບລວດລາຍທີ່ງາມໆແບບນີ້ໃນທຳມະຊາດ? ແຮ່ງລູກຄິດເຖິງຄຳຖາມນີ້ແລະຄິດເລິກເຊິ່ງກ່ຽວກັບສິ່ງຕ່າງໆທີ່ມີໃນທຳມະຊາດ ມັນກໍຈະຊ່ວຍລາວໃຫ້ມີຄວາມເຊື່ອຫຼາຍຂຶ້ນວ່າພະເຢໂຫວາເປັນຜູ້ສ້າງທຸກສິ່ງ. (ຮຣ. 3:4) ເມື່ອລູກໃຫຍ່ຂຶ້ນ ເຈົ້າຕ້ອງຊ່ວຍລູກໃຫ້ເຂົ້າໃຈວ່າເປັນຫຍັງການເຊື່ອຟັງຄຳສັ່ງຂອງພະເຢໂຫວາຈຶ່ງເປັນເລື່ອງສຳຄັນ. ເຈົ້າອາດຖາມລູກວ່າ: “ຖ້າພະເຢໂຫວາສ້າງເຮົາ ມັນກໍມີເຫດຜົນແມ່ນບໍທີ່ເພິ່ນຈະໃຫ້ຄຳແນະນຳທີ່ດີເພື່ອເຮົາຈະມີຄວາມສຸກໃນຊີວິດ?” ຈາກນັ້ນ ເຈົ້າກໍບອກລູກວ່າຄຳແນະນຳທີ່ດີນັ້ນຢູ່ໃນຄຳພີໄບເບິນ.
NASA, ESA, and the Hubble Heritage (STScl/AURA)-ESA/Hubble Collaboration
ໃຜເປັນຜູ້ອອກແບບຮູບຊົງທີ່ງາມໆໃນທຳມະຊາດ? (ເບິ່ງຂໍ້ 7-8)
ຊ່ວຍລູກໃຫ້ເຫັນຄ່າມາດຕະຖານທີ່ຢູ່ໃນຄຳພີໄບເບິນວ່າອັນໃດຖືກອັນໃດຜິດ
9. ອັນໃດອາດເຮັດໃຫ້ລູກສົງໄສກ່ຽວກັບມາດຕະຖານທີ່ຢູ່ໃນຄຳພີໄບເບິນວ່າອັນໃດຖືກອັນໃດຜິດ?
9 ຖ້າລູກສົງໄສເລື່ອງມາດຕະຖານທີ່ຢູ່ໃນຄຳພີໄບເບິນວ່າອັນໃດຖືກອັນໃດຜິດ ໃຫ້ພະຍາຍາມຊອກຫາເຫດຜົນວ່າເປັນຫຍັງລູກຈຶ່ງສົງໄສແບບນັ້ນ. ລູກສົງໄສຍ້ອນບໍ່ເຊື່ອວ່າສິ່ງທີ່ຄຳພີໄບເບິນສອນເປັນຄວາມຈິງບໍ ຫຼືຍ້ອນບໍ່ຮູ້ວິທີອະທິບາຍຄວາມເຊື່ອຂອງໂຕເອງກັບຄົນອື່ນ? ບໍ່ວ່າຈະກໍລະນີໃດ ເຈົ້າສາມາດຊ່ວຍລູກໃຫ້ເຂົ້າໃຈວ່າເປັນຫຍັງການເຊື່ອຟັງຄຳສັ່ງຂອງພະເຢໂຫວາທີ່ຢູ່ໃນຄຳພີໄບເບິນວ່າອັນໃດຖືກອັນໃດຜິດຈຶ່ງສຳຄັນ. ເຈົ້າສາມາດເຮັດແບບນັ້ນໂດຍສຶກສາປຶ້ມຊີວິດທີ່ມີຄວາມສຸກຕະຫຼອດໄປ! b ກັບລູກ.
10. ເຈົ້າຈະຊ່ວຍລູກແນວໃດໃຫ້ເຫັນຄ່າສາຍສຳພັນທີ່ລາວມີກັບພະເຢໂຫວາ?
10 ຊ່ວຍລູກໃຫ້ເຫັນຄ່າສາຍສຳພັນທີ່ລາວມີກັບພະເຢໂຫວາ. ຕອນທີ່ສຶກສາຄຳພີໄບເບິນກັບລູກ ໃຫ້ເຈົ້າໃຊ້ຄຳຖາມທີ່ກະຕຸ້ນຄວາມຄິດແລະໃຊ້ຕົວຢ່າງປຽບທຽບທີ່ຢູ່ໃນປຶ້ມຊີວິດທີ່ມີຄວາມສຸກຕະຫຼອດໄປ! ເພື່ອຈະຮູ້ວ່າລູກຮູ້ສຶກແນວໃດ. (ສພສ. 20:5) ຕົວຢ່າງເຊັ່ນ: ໃນບົດທີ 8 ໄດ້ສົມທຽບພະເຢໂຫວາວ່າເປັນໝູ່ທີ່ດີທີ່ເປັນຫ່ວງເຮົາແລະເຕືອນເຮົາສະເໝີ. ຫຼັງຈາກອ່ານ 1 ໂຢຮັນ 5:3 ກັບລູກແລ້ວ ເຈົ້າອາດຖາມວ່າ: “ເມື່ອຮູ້ວ່າພະເຢໂຫວາເປັນໝູ່ທີ່ດີແບບນີ້ ເຮົາຄວນເບິ່ງຄຳແນະນຳຂອງເພິ່ນແນວໃດ?” ການຖາມແບບນີ້ເບິ່ງຄືວ່າເປັນຄຳຖາມທີ່ງ່າຍໆ ແຕ່ມັນອາດຊ່ວຍລູກໃຫ້ເຂົ້າໃຈວ່າພະເຢໂຫວາໃຫ້ມີກົດບາງຢ່າງກໍຍ້ອນເພິ່ນຮັກເຮົາ.—ອຊຢ. 48:17, 18
11. ເຈົ້າຈະຊ່ວຍລູກແນວໃດໃຫ້ເຫັນຄ່າຄຳແນະນຳທີ່ຢູ່ໃນຄຳພີໄບເບິນ? (ສຸພາສິດ 2:10, 11)
11 ໃຫ້ລົມກັບລູກວ່າການເອົາຄຳແນະນຳໃນຄຳພີໄບເບິນໄປໃຊ້ເປັນປະໂຫຍດແນວໃດ. ຕອນທີ່ອ່ານຄຳພີໄບເບິນຫຼືອ່ານຂໍ້ພະຄຳພີປະຈຳວັນກັບລູກ ໃຫ້ລົມກັນວ່າຫຼັກການໃນຄຳພີໄບເບິນຊ່ວຍຄອບຄົວຂອງເຈົ້າແນວໃດ. ຕົວຢ່າງເຊັ່ນ: ລູກເຫັນບໍວ່າການເປັນຄົນດຸໝັ່ນແລະສັດຊື່ເປັນປະໂຫຍດແນວໃດ? (ຮຣ. 13:18) ນອກຈາກນັ້ນ ເຈົ້າອາດເນັ້ນກັບລູກວ່າການເອົາຫຼັກການໃນຄຳພີໄບເບິນໄປໃຊ້ປົກປ້ອງເຮົາທາງດ້ານຮ່າງກາຍແລະທາງດ້ານອາລົມແນວໃດ. (ສພສ. 14:29, 30) ການລົມກັນແບບນີ້ຈະຊ່ວຍລູກໃຫ້ເຫັນຄ່າຄຳແນະນຳທີ່ຢູ່ໃນຄຳພີໄບເບິນຫຼາຍຂຶ້ນ.—ອ່ານສຸພາສິດ 2:10, 11
12. ພີ່ນ້ອງສະຕີບກັບເມຍໄດ້ຊ່ວຍລູກແນວໃດໃຫ້ເຫັນຄ່າຫຼັກການທີ່ຢູ່ໃນຄຳພີໄບເບິນ?
12 ພີ່ນ້ອງສະຕີບພໍ່ຄົນໜຶ່ງຢູ່ປະເທດຝຣັ່ງເວົ້າເຖິງວິທີທີ່ລາວກັບເມຍຊ່ວຍອີຕັ້ນລູກຊາຍຂອງເຂົາເຈົ້າທີ່ເປັນໄວລຸ້ນໃຫ້ເຂົ້າໃຈວ່າພະເຢໂຫວາຕັ້ງກົດຕ່າງໆກໍຍ້ອນເພິ່ນຮັກເຮົາ. ພີ່ນ້ອງສະຕີບເວົ້າວ່າ: “ເຮົາຖາມລູກວ່າ ‘ເປັນຫຍັງພະເຢໂຫວາຢາກໃຫ້ເຮົາເຮັດຕາມຄຳສັ່ງຂອງເພິ່ນ? ເລື່ອງນີ້ສະແດງໃຫ້ເຫັນແນວໃດວ່າເພິ່ນຮັກເຮົາ? ຈະເກີດຫຍັງຂຶ້ນຖ້າລູກບໍ່ເຮັດຕາມຄຳສັ່ງນັ້ນ?’” ການລົມກັນແບບນີ້ຊ່ວຍອີຕັ້ນໃຫ້ເຫັນວ່າມາດຕະຖານທີ່ຢູ່ໃນຄຳພີໄບເບິນວ່າອັນໃດຖືກອັນໃດຜິດເປັນປະໂຫຍດຕໍ່ລາວແທ້ໆ. ພີ່ນ້ອງສະຕີບເວົ້າຕື່ມອີກວ່າ: “ເປົ້າໝາຍຂອງເຮົາແມ່ນຊ່ວຍລູກໃຫ້ເຫັນວ່າສະຕິປັນຍາທີ່ຢູ່ໃນຄຳພີໄບເບິນເໜືອກວ່າສະຕິປັນຍາຂອງມະນຸດຫຼາຍ.”
13. ພໍ່ແມ່ຈະຝຶກລູກແນວໃດໃຫ້ໃຊ້ຫຼັກການໃນຄຳພີໄບເບິນ? ຂໍໃຫ້ຍົກຕົວຢ່າງ.
13 ຝຶກລູກໃຫ້ໃຊ້ຫຼັກການໃນຄຳພີໄບເບິນ. ບາງເທື່ອນາຍຄູອາດບອກລູກຂອງເຈົ້າໃຫ້ອ່ານປຶ້ມຫົວໜຶ່ງ ແຕ່ໃນປຶ້ມນັ້ນອາດມີໂຕລະຄອນທີ່ເຮັດບາງຢ່າງທີ່ພະເຢໂຫວາບໍ່ມັກ ເຊັ່ນ: ເຮັດຜິດສິນລະທຳທາງເພດຫຼືມັກໃຊ້ຄວາມຮຸນແຮງ. ປຶ້ມນັ້ນຍັງຂຽນໃນແບບທີ່ເຮັດໃຫ້ຜູ້ອ່ານຮູ້ສຶກວ່າການເຮັດສິ່ງເຫຼົ່ານັ້ນບໍ່ຜິດ. ເຈົ້າອາດໃຫ້ລູກຄິດເບິ່ງວ່າພະເຢໂຫວາຮູ້ສຶກແນວໃດຕໍ່ກັບການກະທຳຂອງໂຕລະຄອນເຫຼົ່ານັ້ນ. (ສພສ. 22:24, 25; 1ກຣ. 15:33; ຟລປ. 4:8) ການເຮັດແບບນີ້ອາດຈະຊ່ວຍລູກໃຫ້ປະກາດກັບນາຍຄູແລະໝູ່ຢູ່ໃນຫ້ອງຕອນທີ່ລົມກັນກ່ຽວກັບເລື່ອງທີ່ຖືກມອບໝາຍໃຫ້ອ່ານ.
ຊ່ວຍລູກໃຫ້ຮູ້ຈັກອະທິບາຍຄວາມເຊື່ອຂອງໂຕເອງ
14. ເລື່ອງໃດທີ່ຍາກສຳລັບໄວລຸ້ນທີ່ຈະບອກຄົນອື່ນ ແລະເປັນຫຍັງຈຶ່ງຍາກ?
14 ບາງເທື່ອໄວລຸ້ນອາດຮູ້ສຶກຢ້ານທີ່ຈະບອກຄົນອື່ນກ່ຽວກັບຄວາມເຊື່ອຂອງໂຕເອງ. ຕົວຢ່າງເຊັ່ນ: ເຂົາເຈົ້າອາດບໍ່ກ້າເມື່ອຕ້ອງອະທິບາຍວ່າເປັນຫຍັງຈຶ່ງບໍ່ເຊື່ອທິດສະດີເລື່ອງວິວັດທະນາການ. ຍ້ອນຫຍັງຈຶ່ງບໍ່ກ້າ? ຍ້ອນອາຈານອາດເວົ້າວ່າເລື່ອງວິວັດທະນາການເປັນຄວາມຈິງ ບໍ່ແມ່ນທິດສະດີຊື່ໆ. ຖ້າເຈົ້າເປັນພໍ່ແມ່ ເຈົ້າຈະຊ່ວຍລູກແນວໃດໃຫ້ໝັ້ນໃຈວ່າສິ່ງທີ່ເຂົາເຈົ້າເຊື່ອເປັນຄວາມຈິງ?
15. ອັນໃດຈະຊ່ວຍໄວລຸ້ນໃຫ້ໝັ້ນໃຈຫຼາຍຂຶ້ນວ່າສິ່ງທີ່ລາວເຊື່ອເປັນຄວາມຈິງ?
15 ຊ່ວຍລູກໃຫ້ໝັ້ນໃຈຫຼາຍຂຶ້ນໃນສິ່ງທີ່ລາວເຊື່ອ. ລູກຂອງເຈົ້າບໍ່ຈຳເປັນຕ້ອງອາຍຍ້ອນລາວເຊື່ອວ່າມີຜູ້ສ້າງ. (2ຕມ. 1:8) ເປັນຫຍັງຈຶ່ງບໍ່ຕ້ອງອາຍ? ນັກວິທະຍາສາດຫຼາຍຄົນກໍເຊື່ອວ່າສິ່ງມີຊີວິດບໍ່ໄດ້ເກີດຂຶ້ນມາດ້ວຍໂຕມັນເອງແບບກະທັນຫັນຫຼືແບບບັງເອີນ. ເຂົາເຈົ້າເຫັນຫຼັກຖານຢ່າງຈະແຈ້ງວ່າຕ້ອງມີຜູ້ໃດຜູ້ໜຶ່ງທີ່ສະຫຼາດແລະມີສະຕິປັນຍາສ້າງສິ່ງທີ່ມີຊີວິດທີ່ສະຫຼັບຊັບຊ້ອນເຫຼົ່ານີ້. ຍ້ອນແນວນີ້ ເຂົາເຈົ້າຈຶ່ງບໍ່ເຊື່ອທິດສະດີເລື່ອງວິວັດທະນາການທີ່ສອນຢູ່ໂຮງຮຽນໃນທົ່ວໂລກ. ສິ່ງໜຶ່ງທີ່ອາດຈະຊ່ວຍລູກຂອງເຈົ້າໃຫ້ມີຄວາມເຊື່ອເຂັ້ມແຂງແລະມີຄວາມກ້າແມ່ນ ໃຫ້ຖາມພີ່ນ້ອງຄົນອື່ນວ່າອັນໃດເຮັດໃຫ້ເຂົາເຈົ້າເຊື່ອວ່າຊີວິດເກີດຂຶ້ນມາຍ້ອນມີຜູ້ສ້າງ. c
16. ພໍ່ແມ່ຈະຊ່ວຍລູກແນວໃດໃຫ້ຮູ້ອະທິບາຍວ່າເປັນຫຍັງລາວຈຶ່ງເຊື່ອວ່າມີຜູ້ສ້າງ? (1 ເປໂຕ 3:15) (ເບິ່ງຮູບນຳ)
16 ຊ່ວຍລູກໃຫ້ສາມາດອະທິບາຍກັບຄົນອື່ນວ່າເປັນຫຍັງລາວຈຶ່ງເຊື່ອວ່າມີຜູ້ສ້າງ. (ອ່ານ 1 ເປໂຕ 3:15) ເຈົ້າອາດເຫັນວ່າມີປະໂຫຍດທີ່ຈະເບິ່ງນຳກັນກັບລູກໃນບົດຄວາມຊຸດ “ໜຸ່ມສາວຖາມວ່າ—ມີພະເຈົ້າສ້າງຫຼືວິວັດທະນາການ?” ໃນເວັບໄຊ jw.org. ຈາກນັ້ນ ໃຫ້ລູກເລືອກຄຳອະທິບາຍທີ່ລາວຮູ້ສຶກວ່າອາດຊ່ວຍຄົນອື່ນໃຫ້ເຂົ້າໃຈວ່າມີຜູ້ສ້າງ. ໃຫ້ລູກຝຶກອະທິບາຍເລື່ອງນັ້ນກັບເຈົ້າ. ໃຫ້ເຕືອນລູກວ່າບໍ່ຕ້ອງຖຽງກັບໝູ່ຢູ່ໂຮງຮຽນກ່ຽວກັບເລື່ອງນັ້ນ ແຕ່ບອກລູກໃຫ້ອະທິບາຍແບບງ່າຍໆແລະແບບມີເຫດຜົນຖ້າມີໝູ່ສົນໃຈຢາກລົມໃນເລື່ອງນັ້ນ. ຕົວຢ່າງເຊັ່ນ: ໝູ່ອາດເວົ້າວ່າ: “ຂ້ອຍເຊື່ອແຕ່ສິ່ງທີ່ຂ້ອຍເຫັນເທົ່ານັ້ນ ຂ້ອຍບໍ່ເຄີຍເຫັນພະເຈົ້າຈ້າງຂ້ອຍກະບໍ່ເຊື່ອດອກ!” ລູກຂອງເຈົ້າອາດຖາມວ່າ: “ສົມມຸດວ່າເຈົ້າຍ່າງເຂົ້າໄປໃນປ່າທີ່ເລິກໆແລະເຫັນເຮືອນຫຼັງໜຶ່ງທີ່ງາມໆຢູ່ຫັ້ນ. ເຈົ້າຄິດວ່າເຮືອນຫຼັງນັ້ນເກີດຂຶ້ນມາເອງບໍ? ແນ່ນອນວ່າຕ້ອງມີຜູ້ໃດຜູ້ໜຶ່ງສ້າງເຮືອນຫຼັງນັ້ນ. ຄ້າຍຄືກັນ ໂລກຂອງເຮົາແລະສິ່ງທີ່ມີຊີວິດທຸກຢ່າງກໍຕ້ອງມີຜູ້ສ້າງຄືກັນ.”
ໃຫ້ອະທິບາຍແບບງ່າຍໆແລະແບບມີເຫດຜົນເມື່ອລົມກັບໝູ່ຢູ່ໂຮງຮຽນ (ເບິ່ງຂໍ້ 16-17) d
17. ພໍ່ແມ່ຈະຊ່ວຍລູກແນວໃດໃຫ້ຊອກວິທີບອກຄົນອື່ນເລື່ອງຄຳພີໄບເບິນ? ຂໍໃຫ້ຍົກຕົວຢ່າງ.
17 ຊ່ວຍລູກໃຫ້ຊອກວິທີທີ່ຈະບອກຄົນອື່ນເລື່ອງຄຳພີໄບເບິນ. (ຣມ. 10:10) ເຈົ້າອາດສົມທຽບການເວົ້າເລື່ອງຄຳພີໄບເບິນກັບຄົນອື່ນວ່າເປັນຄືກັບເດັກນ້ອຍຮຽນຍ່າງ. ທຳອິດ ເດັກນ້ອຍຮຽນຢືນກ່ອນ ແລ້ວຈາກນັ້ນກໍຈະຮຽນຍ່າງເທື່ອລະກ້າວສອງກ້າວ. ຄ້າຍຄືກັນ ລູກຂອງເຈົ້າອາດເລີ່ມປະກາດກັບຄົນອື່ນແບບງ່າຍໆກ່ອນ. ຕົວຢ່າງເຊັ່ນ: ລາວອາດຖາມໝູ່ຢູ່ໂຮງຮຽນວ່າ: “ເຈົ້າຮູ້ບໍວ່າເວລານັກວິສະວະກອນສ້າງບາງຢ່າງຂຶ້ນມາ ເຂົາເຈົ້າມັກຮຽນແບບສິ່ງທີ່ຢູ່ໃນທຳມະຊາດ. ຂ້ອຍຊິເປີດວິດີໂອໜຶ່ງໃຫ້ເຈົ້າເບິ່ງ.” ຫຼັງຈາກເປີດວິດີໂອເລື່ອງໜຶ່ງໃນວິດີໂອຊຸດທີ່ຊື່ວ່າມີຜູ້ອອກແບບບໍ? ລູກຂອງເຈົ້າອາດຖາມວ່າ: “ຖ້າຄົນທີ່ອອກແບບສິ່ງປະດິດທີ່ຮຽນແບບທຳມະຊາດຍັງໄດ້ຮັບຄຳຊົມເຊີຍວ່າເກັ່ງ ຄັນຊັ້ນຜູ້ທີ່ສ້າງສິ່ງຕ່າງໆໃນທຳມະຊາດກໍແຮ່ງຕ້ອງໄດ້ຮັບຄຳຊົມເຊີຍຫຼາຍກວ່ານັ້ນອີກບໍ່ແມ່ນບໍ?” ການລົມກັນງ່າຍໆແບບນີ້ອາດກະຕຸ້ນຄວາມສົນໃຈຂອງໝູ່ແລະອາດເຮັດໃຫ້ລາວຢາກຮຽນຮູ້ຫຼາຍຂຶ້ນ.
ຊ່ວຍລູກຕໍ່ໆໄປໃຫ້ມີຄວາມເຊື່ອເຂັ້ມແຂງ
18. ພໍ່ແມ່ຈະຊ່ວຍລູກຕໍ່ໆໄປແນວໃດໃຫ້ມີຄວາມເຊື່ອເຂັ້ມແຂງ?
18 ເຮົາຢູ່ໃນໂລກທີ່ມີແຕ່ຄົນທີ່ບໍ່ເຊື່ອໃນພະເຢໂຫວາ. (2ປຕ. 3:3) ສະນັ້ນ ຕອນທີ່ພໍ່ແມ່ສຶກສາຄຳພີໄບເບິນກັບລູກ ໃຫ້ກະຕຸ້ນລູກທີ່ຈະຄົ້ນຄວ້າເລື່ອງທີ່ຈະຊ່ວຍລາວໃຫ້ໝັ້ນໃຈຫຼາຍຂຶ້ນໃນຄຳພີໄບເບິນແລະສິ່ງທີ່ຄຳພີໄບເບິນບອກວ່າອັນໃດຖືກອັນໃດຜິດ. ຊ່ວຍລູກໃຫ້ຝຶກໃຊ້ຄວາມສາມາດໃນການຄິດຫາເຫດຜົນໂດຍສັງເກດເບິ່ງການສ້າງທີ່ເປັນຕາງຶດຂອງພະເຢໂຫວາ. ຊ່ວຍລູກໃຫ້ເຂົ້າໃຈຄຳພະຍາກອນໃນຄຳພີໄບເບິນທີ່ເກີດຂຶ້ນແທ້ແລ້ວ. ສິ່ງທີ່ສຳຄັນທີ່ສຸດແມ່ນ ໃຫ້ອະທິດຖານກັບລູກແລະອະທິດຖານເພື່ອລູກ. ເມື່ອເຮັດແບບນີ້ ເຈົ້າກໍໝັ້ນໃຈໄດ້ວ່າພະເຢໂຫວາຈະອວຍພອນທີ່ເຈົ້າພະຍາຍາມຊ່ວຍລູກໃຫ້ມີຄວາມເຊື່ອເຂັ້ມແຂງ.—2ຂຄ. 15:7
ເພງທີ 133 ນະມັດສະການພະເຢໂຫວາຕັ້ງແຕ່ຍັງໜຸ່ມ
a ສຳລັບຂໍ້ມູນເພີ່ມເຕີມໃຫ້ເບິ່ງວິດີໂອສິ່ງໜ້າອັດສະຈັນທີ່ພະເຈົ້າສ້າງບອກເຖິງຄວາມຍິ່ງໃຫຍ່ຂອງພະອົງ—ຮູບແບບ ໃນເວັບໄຊ jw.org.
b ຖ້າລູກຂອງເຈົ້າຮຽນປຶ້ມຊີວິດທີ່ມີຄວາມສຸກຕະຫຼອດໄປ! ຈົບແລ້ວ ເຈົ້າອາດຈະທົບທວນກັບລາວບາງບົດໃນຕອນ 3 ແລະຕອນ 4 ເຊິ່ງເວົ້າເຖິງມາດຕະຖານທີ່ຢູ່ໃນຄຳພີໄບເບິນວ່າອັນໃດຖືກອັນໃດຜິດ.
c ເບິ່ງບົດຄວາມ “ເປັນຫຍັງເຮົາຈຶ່ງເຊື່ອວ່າມີຜູ້ສ້າງ” ໃນຕື່ນເຖີດ! ເດືອນກັນຍາ ປີ 2006 ແລະປຶ້ມຕົ້ນກຳເນີດຂອງຊີວິດ—ຫ້າຄຳຖາມທີ່ໜ້າຄິດ. ສຳລັບຕົວຢ່າງເພີ່ມເຕີມ ເບິ່ງວິດີໂອຊຸດມຸມມອງເລື່ອງຕົ້ນກຳເນີດຂອງຊີວິດ ໃນເວັບໄຊ jw.org. (ພາສາໄທ)
d ຄຳອະທິບາຍຮູບ: ໄວລຸ້ນຄົນໜຶ່ງທີ່ເປັນພະຍານເປີດວິດີໂອເລື່ອງໜຶ່ງຈາກວິດີໂອຊຸດທີ່ຊື່ວ່າມີຜູ້ອອກແບບບໍ? ໃຫ້ໝູ່ນັກຮຽນເບິ່ງ.
