ເຈົ້າຈື່ໄດ້ບໍ?
ເຈົ້າໄດ້ອ່ານຫໍສັງເກດການຂອງປີນີ້ຢ່າງລະອຽດບໍ?ໃຫ້ມາເບິ່ງວ່າເຈົ້າຈະຕອບຄຳຖາມຕໍ່ໄປນີ້ໄດ້ຫຼືບໍ່.
ພະເຢໂຫວາວາງຕົວຢ່າງແນວໃດໃນການປະຕິບັດກັບຜູ້ຍິງ?
ພະເຢໂຫວາປະຕິບັດກັບຜູ້ຍິງແບບບໍ່ລຳອຽງ. ເພິ່ນບໍ່ໄດ້ມັກຜູ້ຊາຍຫຼາຍກວ່າຜູ້ຍິງ. ເພິ່ນຟັງຄຳອະທິດຖານຂອງຜູ້ຍິງແລະສົນໃຈຄວາມຮູ້ສຶກແລະບັນຫາທີ່ເຂົາເຈົ້າເຈິ. ເພິ່ນໄວ້ໃຈຜູ້ຍິງໂດຍໃຫ້ເຂົາເຈົ້າເຮັດວຽກຫຼາຍຢ່າງທີ່ສຳຄັນ.—ຫ24.01 ໜ້າ 15-16
ເຮົາຈະເອົາຄຳແນະນຳໃນເອເຟໂຊ 5:7 ທີ່ບອກວ່າ “ຢ່າເຮັດຄືກັບເຂົາເຈົ້າ” ໄປໃຊ້ແນວໃດ?
ໂປໂລເຕືອນເຮົາບໍ່ໃຫ້ເປັນໝູ່ກັບຄົນທີ່ບໍ່ຮັກພະເຢໂຫວາເຊິ່ງເຮັດໃຫ້ມັນເປັນເລື່ອງຍາກທີ່ເຮົາຈະເຮັດຕາມມາດຕະຖານຂອງເພິ່ນ. ການເປັນໝູ່ກັບຜູ້ໃດຜູ້ໜຶ່ງບໍ່ແມ່ນສະເພາະຄົນທີ່ເຮົາເຫັນໜ້າຕໍ່ໜ້າເທົ່ານັ້ນ ແຕ່ລວມເຖິງຄົນທີ່ເຮົາຫຼິ້ນນຳໃນສື່ສັງຄົມອອນລາຍນຳ.—ຫ24.03 ໜ້າ 22-23
ເຮົາຕ້ອງລະວັງເລື່ອງຕົວະແບບໃດ?
ເຮົາຕ້ອງລະວັງເລື່ອງທີ່ບໍ່ໄດ້ຮັບການກວດເບິ່ງກ່ອນວ່າເປັນຄວາມຈິງຫຼືບໍ່ທີ່ພີ່ນ້ອງທີ່ຫວັງດີສົ່ງໃຫ້ເຮົາ ອີເມວຈາກຄົນທີ່ເຮົາບໍ່ຮູ້ຈັກ ແລະຄົນທີ່ທໍລະຍົດພະເຈົ້າທີ່ເຮັດທຳທ່າສົນໃຈຄວາມຈິງ.—ຫ24.04 ໜ້າ 12
ມີຫຍັງແດ່ທີ່ເຮົາຮູ້ແລະມີຫຍັງແດ່ທີ່ເຮົາບໍ່ຮູ້ກ່ຽວກັບວິທີທີ່ພະເຢໂຫວາຈະຕັດສິນກະສັດໂຊໂລໂມນລວມທັງຄົນທີ່ຕາຍໃນເມືອງໂຊໂດມກັບເມືອງໂກໂມຣາ ແລະຄົນທີ່ຕາຍຕອນນ້ຳຖ້ວມໂລກ?
ເຮົາບໍ່ຮູ້ແທ້ໆວ່າພະເຢໂຫວາໄດ້ຕັດສິນໃຈແລ້ວບໍວ່າຄົນເຫຼົ່ານີ້ຈະຕາຍຕະຫຼອດໄປ ແຕ່ເຮົາຮູ້ວ່າພະເຢໂຫວາຮູ້ຄວາມຈິງທຸກຢ່າງແລະເພິ່ນມີຄວາມເມດຕາຫຼາຍ.—ຫ24.05 ໜ້າ 3-4
ການຮູ້ວ່າພະເຢໂຫວາເປັນຄືກັບ “ຫີນຜາ” ເຮັດໃຫ້ເຮົາໝັ້ນໃຈໃນເລື່ອງໃດ? (ພບຍ. 32:4)
ພະເຢໂຫວາເປັນບ່ອນລີ້ໄພຂອງເຮົາ. ເຮົາໄວ້ໃຈເພິ່ນໄດ້ຍ້ອນເພິ່ນເຮັດຕາມຄຳສັນຍາສະເໝີ. ເພິ່ນໝັ້ນຄົງ ຄຸນລັກສະນະແລະຄວາມຕ້ອງການຂອງເພິ່ນບໍ່ເຄີຍປ່ຽນແປງ.—ຫ24.06 ໜ້າ 26-28
ອັນໃດຈະຊ່ວຍເຈົ້າໃຫ້ປັບໂຕເຂົ້າກັບປະຊາຄົມໃໝ່?
ໃຫ້ໄວ້ວາງໃຈພະເຢໂຫວາ ເພິ່ນຈະຊ່ວຍເຈົ້າຄືກັບທີ່ໄດ້ຊ່ວຍຜູ້ຮັບໃຊ້ຂອງເພິ່ນໃນສະໄໝກ່ອນ. ຢ່າປຽບທຽບປະຊາຄົມໃໝ່ກັບປະຊາຄົມເກົ່າ. ໃຊ້ເວລາກັບພີ່ນ້ອງແລະມີສ່ວນຮ່ວມກັບປະຊາຄົມໃໝ່ ແລະພະຍາຍາມຊອກໝູ່ໃໝ່.—ຫ24.07 ໜ້າ 26-28
ມີບົດຮຽນຫຍັງແດ່ໃນຕົວຢ່າງປຽບທຽບ 3 ເລື່ອງໃນມັດທາຍບົດ 25?
ຕົວຢ່າງປຽບທຽບເລື່ອງແກະກັບແບ້ເນັ້ນກ່ຽວກັບການເປັນຄົນທີ່ສັດຊື່ແລະພັກດີ. ຕົວຢ່າງປຽບທຽບເລື່ອງຜູ້ສາວບໍລິສຸດທີ່ສະຫຼາດກັບຜູ້ສາວບໍລິສຸດທີ່ໂງ່ເນັ້ນກ່ຽວກັບການເປັນຄົນກຽມພ້ອມແລະຕື່ນໂຕຢູ່ສະເໝີ ແລະຕົວຢ່າງປຽບທຽບເລື່ອງເງິນຕະລັນເນັ້ນເຖິງຄວາມສຳຄັນຂອງການເປັນຄົນດຸໝັ່ນແລະຫ້າວຫັນ.—ຫ24.09 ໜ້າ 20-24
ຫ້ອງທີ່ຢູ່ທາງເຂົ້າທາງໜ້າຂອງວິຫານທີ່ໂຊໂລໂມນສ້າງສູງສ່ຳໃດ?
ໃນ 2 ຂ່າວຄາວ 3:4 ສຳເນົາພະຄຳພີບາງສະບັບບອກວ່າສູງ “120 ສອກ” ຫຼື 53 ແມັດ. ແຕ່ຂໍ້ຄວາມໃນພະຄຳພີສະບັບອື່ນຢືນຢັນວ່າຫ້ອງນີ້ສູງ “20 ສອກ” ຫຼືປະມານ 9 ແມັດ. ຄວາມສູງ 9 ແມັດນີ້ເບິ່ງຄືວ່າພໍດີກັບຄວາມໜາຂອງຝາວິຫານ.—ຫ24.10 ໜ້າ 31
ຜູ້ຊ່ວຍວຽກຮັບໃຊ້ຕ້ອງ “ມີເມຍຄົນດຽວ” ໝາຍຄວາມວ່າແນວໃດ? (1ຕມ. 3:12)
ໝາຍຄວາມວ່າລາວຕ້ອງແຕ່ງດອງກັບຜູ້ຍິງຄົນດຽວເທົ່ານັ້ນແລະຕ້ອງບໍ່ເຮັດຜິດສິນລະທຳທາງເພດ. ນອກຈາກນັ້ນ ລາວບໍ່ຄວນສະແດງຄວາມສົນໃຈຕໍ່ຜູ້ຍິງຄົນອື່ນໃນແບບທີ່ບໍ່ເໝາະສົມ.—ຫ24.11 ໜ້າ 19
ເປັນຫຍັງເຮົາຈຶ່ງເວົ້າໄດ້ວ່າສິ່ງທີ່ຂຽນໄວ້ໃນໂຢຮັນ 6:53 ບໍ່ແມ່ນຕົວຢ່າງຂອງການກິນອາຫານແລງຂອງພະຄລິດ?
ໃນໂຢຮັນ 6:53 ພະເຢຊູບອກໃຫ້ກິນຊີ້ນແລະກິນເລືອດຂອງເພິ່ນ. ພະເຢຊູເວົ້າເລື່ອງນີ້ໃນປີ 32 ຢູ່ແຂວງຄາລີເລກັບຄົນຢິວທີ່ຍັງຕ້ອງສະແດງຄວາມເຊື່ອໃນເພິ່ນ. ແຕ່ການກິນອາຫານແລງຂອງພະຄລິດຖືກຕັ້ງຂຶ້ນໃນ 1 ປີຕໍ່ມາຢູ່ເມືອງເຢຣູຊາເລັມ. ຕອນທີ່ກິນອາຫານແລງນັ້ນ ພະເຢຊູເວົ້າກັບຜູ້ທີ່ຈະຮ່ວມປົກຄອງກັບເພິ່ນໃນສະຫວັນ.—ຫ24.12 ໜ້າ 10-11
