ບົດຄວາມສຶກສາທີ 46
ພະເຢໂຫວາຮັບປະກັນແນວໃດວ່າຄຳສັນຍາເລື່ອງໂລກໃໝ່ຈະເກີດຂຶ້ນແທ້?
“ທຸກຄົນໃນໂລກທີ່ຂໍພອນໃຫ້ໂຕເອງຈະໄດ້ພອນຈາກພະເຈົ້າແຫ່ງຄວາມຈິງ.”—ອຊຢ. 65:16
ເພງ 3 ເປັນກຳລັງ ຄວາມຫວັງ ແລະຄວາມໝັ້ນໃຈຂອງເຮົາ
ໃຈຄວາມສຳຄັນ a
1. ສິ່ງທີ່ຜູ້ພະຍາກອນເອຊາຢາບອກພວກອິດສະຣາເອນໝາຍຄວາມວ່າແນວໃດ?
ຜູ້ພະຍາກອນເອຊາຢາເວົ້າເຖິງພະເຢໂຫວາວ່າເປັນ “ພະເຈົ້າແຫ່ງຄວາມຈິງ.” ຄຳວ່າ “ຄວາມຈິງ” ແປຕາມໂຕແມ່ນ “ອາແມນ.” (ອຊຢ. 65:16) ຄຳວ່າ “ອາແມນ” ໝາຍຄວາມວ່າ “ຂໍໃຫ້ເປັນແນວນັ້ນ” ຫຼື “ແນ່ນອນ.” ໃນຄຳພີໄບເບິນ ເມື່ອໃຊ້ຄຳວ່າ “ອາແມນ” ກັບພະເຢໂຫວາຫຼືພະເຢຊູ ໝາຍຄວາມວ່າສິ່ງທີ່ພວກເພິ່ນເວົ້າຫຼືເຮັດຈະເກີດຂຶ້ນແທ້. ດັ່ງນັ້ນ ສິ່ງທີ່ເອຊາຢາບອກພວກອິດສະຣາເອນໝາຍຄວາມວ່າ ຖ້າພະເຢໂຫວາບອກລ່ວງໜ້າວ່າສິ່ງໃດສິ່ງໜຶ່ງຈະເກີດຂຶ້ນ ມັນກໍຈະເກີດຂຶ້ນແທ້. ພະເຢໂຫວາເຮັດຕາມຄຳສັນຍາຂອງເພິ່ນສະເໝີ.
2. ເປັນຫຍັງເຮົາຈຶ່ງໝັ້ນໃຈໄດ້ໃນຄຳສັນຍາຂອງພະເຢໂຫວາກ່ຽວກັບອະນາຄົດຂອງເຮົາ? ໃນບົດຄວາມນີ້ເຮົາຈະຮຽນຫຍັງ?
2 ເຮົາໝັ້ນໃຈໄດ້ຄືກັນບໍວ່າສິ່ງທີ່ພະເຢໂຫວາສັນຍາໄວ້ກ່ຽວກັບອະນາຄົດຈະເກີດຂຶ້ນແທ້? ເກືອບ 800 ປີຫຼັງຈາກສະໄໝຂອງເອຊາຢາ ໂປໂລເວົ້າເຖິງເຫດຜົນທີ່ເຮົາໝັ້ນໃຈໄດ້ວ່າຄຳສັນຍາຂອງພະເຢໂຫວາຈະເກີດຂຶ້ນແທ້ສະເໝີ. ໂປໂລເວົ້າວ່າ: “ພະເຈົ້າບໍ່ມີທາງເວົ້າຕົວະ.” (ຮຣ. 6:18) ຄືກັບທີ່ຕົ້ນໝາກມ່ວງບໍ່ສາມາດອອກໝາກເປັນໝາກກ້ຽງໄດ້ ພະເຢໂຫວາຜູ້ເປັນບໍ່ເກີດຂອງຄວາມຈິງກໍເວົ້າຕົວະບໍ່ໄດ້. ຍ້ອນແນວນີ້ ເຮົາສາມາດໝັ້ນໃຈໄດ້ເຕັມທີໃນສິ່ງທີ່ພະເຢໂຫວາເວົ້າ ລວມເຖິງຄຳສັນຍາທຸກຢ່າງກ່ຽວກັບອະນາຄົດ ຂອງເຮົາ. ໃນບົດຄວາມນີ້ເຮົາຈະມາເບິ່ງວ່າພະເຢໂຫວາໄດ້ສັນຍາວ່າຈະໃຫ້ຫຍັງກັບເຮົາໃນອະນາຄົດ ແລະພະເຢໂຫວາຮັບປະກັນກັບເຮົາແນວໃດວ່າຄຳສັນຍາຂອງເພິ່ນຈະເກີດຂຶ້ນແທ້.
ພະເຢໂຫວາໄດ້ສັນຍາເລື່ອງຫຍັງ?
3. (ກ) ຄຳສັນຍາຫຍັງທີ່ຜູ້ຮັບໃຊ້ຂອງພະເຢໂຫວາມັກຫຼາຍ? (ພະນິມິດ 21:3, 4) (ຂ) ບາງຄົນເວົ້າແນວໃດເມື່ອເຮົາອ່ານຄຳສັນຍາເຫຼົ່ານີ້ໃຫ້ເຂົາເຈົ້າຟັງ?
3 ຄຳສັນຍາທີ່ເຮົາຈະເບິ່ງນຳກັນເປັນຄຳສັນຍາທີ່ຜູ້ຮັບໃຊ້ຂອງພະເຢໂຫວາທຸກຄົນມັກຫຼາຍ. (ອ່ານພະນິມິດ 21:3, 4) ພະເຢໂຫວາສັນຍາວ່າ: “ຄວາມຕາຍຈະບໍ່ມີອີກຕໍ່ໄປ ຄວາມໂສກເສົ້າຫຼືສຽງຮ້ອງໄຫ້ເສຍໃຈຫຼືຄວາມເຈັບປວດຈະບໍ່ມີອີກເລີຍ.” ເຮົາອ່ານຂໍ້ຄຳພີເຫຼົ່ານີ້ເພື່ອໃຫ້ກຳລັງໃຈຄົນທີ່ເຮົາປະກາດນຳ ແລະເພື່ອໃຫ້ເຂົາເຈົ້າເຫັນວ່າຊີວິດໃນໂລກໃໝ່ຈະເປັນແນວໃດ. ບາງຄົນເວົ້າແນວໃດເມື່ອເຮົາອ່ານຄຳສັນຍາເຫຼົ່ານີ້ໃຫ້ເຂົາເຈົ້າຟັງ? ເຂົາເຈົ້າອາດເວົ້າວ່າ: “ມັນກະດີແທ້ ແຕ່ຂ້ອຍບໍ່ເຊື່ອດອກວ່າມັນຊິເກີດຂຶ້ນແທ້.”
4. (ກ) ຕອນທີ່ພະເຢໂຫວາສັນຍາເລື່ອງໂລກໃໝ່ ເພິ່ນຮູ້ຫຍັງລ່ວງໜ້າ? (ຂ) ນອກຈາກເຮັດຄຳສັນຍາແລ້ວ ພະເຢໂຫວາໄດ້ເຮັດຫຍັງອີກ?
4 ຕອນທີ່ພະເຢໂຫວາດົນໃຈໂຢຮັນໃຫ້ຂຽນຄຳສັນຍານີ້ກ່ຽວກັບໂລກໃໝ່ ເພິ່ນຮູ້ວ່າໃນທຸກມື້ນີ້ເຮົາຈະບອກເລື່ອງຄວາມຫວັງນີ້ໃຫ້ຄົນອື່ນຮູ້ເມື່ອປະກາດເລື່ອງການປົກຄອງຂອງເພິ່ນ. ພະເຢໂຫວາຮູ້ວ່າມັນຍາກສຳລັບຫຼາຍຄົນທີ່ຈະເຊື່ອວ່າສິ່ງເຫຼົ່ານີ້ຈະເກີດຂຶ້ນໃນອະນາຄົດ. (ອຊຢ. 42:9; 60:2; 2ກຣ. 4:3, 4) ຄັນຊັ້ນ ເຮົາຈະຊ່ວຍຄົນອື່ນແລະລວມທັງໂຕເຮົາເອງແນວໃດໃຫ້ໝັ້ນໃຈໄດ້ວ່າສິ່ງທີ່ເວົ້າໃນພະນິມິດ 21:3, 4 ຈະເກີດຂຶ້ນແທ້? ນອກຈາກເຮັດຄຳສັນຍາແລ້ວ ພະເຢໂຫວາຍັງໃຫ້ເຫດຜົນທີ່ໜັກແໜ້ນທີ່ຊ່ວຍເຮົາໃຫ້ໝັ້ນໃຈວ່າເພິ່ນຈະເຮັດຕາມຄຳສັນຍານັ້ນ. ພະເຢໂຫວາໃຫ້ເຫດຜົນຫຍັງແດ່?
ພະເຢໂຫວາຮັບປະກັນວ່າຄຳສັນຍາຂອງເພິ່ນຈະເກີດຂຶ້ນແທ້
5. ພະຄຳພີຂໍ້ໃດທີ່ໃຫ້ເຫດຜົນວ່າເຮົາສາມາດເຊື່ອໃນຄຳສັນຍາຂອງພະເຢໂຫວາໄດ້? ແລະຂໍ້ເຫຼົ່ານັ້ນເວົ້າແນວໃດ?
5 ໃນພະຄຳພີຂໍ້ຕໍ່ໆມາ ເຮົາເຫັນເຫດຜົນຕ່າງໆທີ່ຈະເຊື່ອໃນຄຳສັນຍາຂອງພະເຢໂຫວາເລື່ອງໂລກໃໝ່. ຂໍ້ເຫຼົ່ານັ້ນເວົ້າຈັ່ງຊີ້: “ພະອົງຜູ້ນັ່ງເທິງບັນລັງນັ້ນເວົ້າວ່າ: ‘ເຮົາກຳລັງສ້າງທຸກສິ່ງຂຶ້ນໃໝ່.’ ພະອົງເວົ້າອີກວ່າ: ‘ຂຽນໄວ້ເດີ້! ເພາະຄຳເວົ້າທັງໝົດນີ້ເຊື່ອຖືໄດ້ແລະເປັນຄວາມຈິງ.’ ແລ້ວພະອົງກໍເວົ້າກັບຂ້ອຍວ່າ: ‘ເລື່ອງທັງໝົດນີ້ສຳເລັດແລ້ວ! ເຮົາເປັນອັນຟາແລະໂອເມກາ ເປັນຈຸດເລີ່ມຕົ້ນແລະຈຸດຈົບ.’”—ພນມ. 21:5, 6
6. ເປັນຫຍັງສິ່ງທີ່ຂຽນໄວ້ໃນພະນິມິດ 21:5, 6 ຈຶ່ງເຮັດໃຫ້ເຮົາໝັ້ນໃຈໃນຄຳສັນຍາຂອງພະເຢໂຫວາຫຼາຍຂຶ້ນ?
6 ເປັນຫຍັງຄຳເວົ້າທີ່ຢູ່ໃນຂໍ້ພະຄຳພີເຫຼົ່ານີ້ຈຶ່ງເຮັດໃຫ້ເຮົາໝັ້ນໃຈໃນຄຳສັນຍາຂອງພະເຈົ້າຫຼາຍຂຶ້ນ? ປຶ້ມວິວອນໃກ້ຈະຮອດຈຸດສຸດຍອດເວົ້າເຖິງຂໍ້ເຫຼົ່ານີ້ວ່າ: “ມັນເປັນຄືກັບວ່າພະເຢໂຫວາເປັນຜູ້ເຊັນໃສ່ໃບຮັບປະກັນຫຼືໃບສະແດງກຳມະສິດໃຫ້ມະນຸດທີ່ສັດຊື່ໄດ້ສິ່ງດີໆເຫຼົ່ານີ້ໃນອະນາຄົດ.” b ໃນພະນິມິດ 21:3, 4 ຂຽນກ່ຽວກັບຄຳສັນຍາຂອງພະເຈົ້າ ແລະໃນຂໍ້ 5-6 ເປັນຄືກັບເພິ່ນເຊັນຮັບປະກັນວ່າສິ່ງທີ່ເພິ່ນສັນຍາໄວ້ຈະເກີດຂຶ້ນແທ້. ໃຫ້ເຮົາມາເບິ່ງວ່າພະເຢໂຫວາຮັບປະກັນແນວໃດທີ່ຊ່ວຍເຮົາໃຫ້ເຊື່ອເພິ່ນໄດ້.
7. ໃນພະນິມິດ 21:5 ໃຜເປັນຜູ້ເວົ້າ? ແລະເປັນຫຍັງຄຳເວົ້ານີ້ຈຶ່ງພິເສດ?
7 ໃນພະນິມິດ 21:5 ເລີ່ມຕົ້ນວ່າ: “ພະອົງຜູ້ນັ່ງເທິງບັນລັງນັ້ນເວົ້າວ່າ.” ຄຳເວົ້ານີ້ພິເສດຫຼາຍຍ້ອນໃນປຶ້ມພະນິມິດມີແຕ່ 3 ເທື່ອເທົ່ານັ້ນທີ່ພະເຢໂຫວາເປັນຜູ້ເວົ້າເອງ. ຄຳເວົ້ານີ້ບໍ່ແມ່ນທູດສະຫວັນແລະບໍ່ແມ່ນ ພະເຢຊູເປັນຜູ້ເວົ້າ ແຕ່ພະເຢໂຫວາເປັນຜູ້ເວົ້າເອງ! ຄຳເວົ້ານີ້ເຮັດໃຫ້ເຮົາເຊື່ອໄດ້ແທ້ໆໃນສິ່ງທີ່ເພິ່ນເວົ້າຕໍ່ຈາກນັ້ນ. ເປັນຫຍັງຈຶ່ງເປັນແນວນັ້ນ? ຍ້ອນພະເຢໂຫວາ “ເວົ້າຕົວະບໍ່ໄດ້.” (ຕຕ. 1:2) ດັ່ງນັ້ນ ສິ່ງທີ່ເຮົາອ່ານໃນພະນິມິດ 21:5, 6 ຈຶ່ງເຊື່ອໄດ້ແທ້ໆ.
“ເຮົາກຳລັງສ້າງທຸກສິ່ງຂຶ້ນໃໝ່”
8. ພະເຢໂຫວາເວົ້າຫຍັງເພື່ອເນັ້ນວ່າຄຳສັນຍາຂອງເພິ່ນຈະເກີດຂຶ້ນແທ້? (ເອຊາຢາ 46:10)
8 ພະເຢໂຫວາເວົ້າວ່າ: “ເຮົາກຳລັງສ້າງທຸກສິ່ງຂຶ້ນໃໝ່.” ພະເຢໂຫວາກຳລັງເວົ້າເຖິງສິ່ງທີ່ຈະເກີດຂຶ້ນໃນອະນາຄົດ. ແຕ່ຍ້ອນເພິ່ນໝັ້ນໃຈແທ້ໆວ່າຄຳສັນຍາຂອງເພິ່ນຈະເກີດຂຶ້ນແທ້ ເພິ່ນຈຶ່ງເວົ້າຄືກັບວ່າມັນກຳລັງເກີດຂຶ້ນແລ້ວ.—ອ່ານເອຊາຢາ 46:10
9. (ກ) ຄຳວ່າ “ເຮົາກຳລັງສ້າງທຸກສິ່ງຂຶ້ນໃໝ່” ໝາຍເຖິງຫຍັງ? (ຂ) ຈະເກີດຫຍັງຂຶ້ນກັບ “ຟ້າສະຫວັນ” ແລະ “ໂລກ” ທີ່ມີຢູ່ໃນຕອນນີ້?
9 ພະເຢໂຫວາເວົ້າວ່າ: “ເຮົາກຳລັງສ້າງທຸກສິ່ງຂຶ້ນໃໝ່.” ຄຳເວົ້ານີ້ໝາຍຄວາມວ່າແນວໃດ? ໝາຍເຖິງ 2 ສິ່ງທີ່ພະເຢໂຫວາຈະເຮັດ ນັ້ນຄືການປ່ຽນແທນແລະການຟື້ນຟູ. ພະເຢໂຫວາຈະປ່ຽນຫຍັງ? ໃນພະນິມິດ 21:1 ເວົ້າວ່າ: “ຟ້າສະຫວັນເກົ່າແລະໂລກເກົ່ານັ້ນກໍຫາຍສາບສູນໄປແລ້ວ.” “ຟ້າສະຫວັນເກົ່າ” ໝາຍເຖິງລັດຖະບານຕ່າງໆທີ່ຄວບຄຸມໂດຍຊາຕານແລະພວກປີສາດຂອງມັນ. (ມທ. 4:8, 9; 1ຢຮ. 5:19) ຕາມທີ່ໃຊ້ໃນຄຳພີໄບເບິນ “ໂລກ” ອາດໝາຍເຖິງຄົນທີ່ຢູ່ໃນໂລກ. (ພບຍ. 32:1; ເພງ. 96:1, ລ.ມ.) ແຕ່ “ໂລກເກົ່າ” ໝາຍເຖິງສັງຄົມມະນຸດທີ່ບໍ່ດີໃນທຸກມື້ນີ້. ພະເຢໂຫວາຈະບໍ່ປັບປຸງຫຼືປ່ຽນແປງ “ຟ້າສະຫວັນ” ແລະ “ໂລກ” ທີ່ມີຢູ່ຕອນນີ້ ແຕ່ເພິ່ນຈະທຳລາຍບໍ່ໃຫ້ເຫຼືອ. ຈາກນັ້ນ ເພິ່ນຈະປ່ຽນແທນດ້ວຍ “ຟ້າສະຫວັນໃໝ່ແລະໂລກໃໝ່” ເຊິ່ງໝາຍເຖິງລັດຖະບານໃໝ່ແລະສັງຄົມມະນຸດໃໝ່.
10. ພະເຢໂຫວາຈະສ້າງຫຍັງຂຶ້ນໃໝ່?
10 ມີຫຍັງອີກທີ່ພະເຢໂຫວາຈະສ້າງຂຶ້ນໃໝ່? (ພນມ. 21:5) ເພິ່ນຈະເຮັດໃຫ້ໂລກເປັນບ່ອນທີ່ງາມໆແລະເຮັດໃຫ້ມະນຸດເປັນຄົນສົມບູນແບບ. ຄືກັບເອຊາຢາໄດ້ບອກໄວ້ ພະເຢໂຫວາຈະເຮັດໃຫ້ທົ່ວໂລກງາມຄືກັບສວນເອເດັນ ແລະເພິ່ນຈະຟື້ນຟູເຮົາໃຫ້ມີຮ່າງກາຍທີ່ສົມບູນແບບໂດຍປົວແຕ່ລະຄົນໃຫ້ດີເປັນປົກກະຕິ. ຄົນເປັນລ່ອຍ ຄົນຕາບອດ ແລະຄົນຫູໜວກຈະດີເປັນປົກກະຕິ ແລະແມ່ນແຕ່ຄົນຕາຍກໍຈະກັບມາມີຊີວິດອີກ.—ອຊຢ. 25:8; 35:1-7
“ຄຳເວົ້າທັງໝົດນີ້ເຊື່ອຖືໄດ້ແລະເປັນຄວາມຈິງ. . . . ເລື່ອງທັງໝົດນີ້ສຳເລັດແລ້ວ!”
11. ພະເຢໂຫວາບອກໂຢຮັນໃຫ້ເຮັດຫຍັງ? ແລະຍ້ອນຫຍັງ?
11 ພະເຢໂຫວາເວົ້າຫຍັງອີກເພື່ອຮັບປະກັນວ່າເຮົາສາມາດເຊື່ອເພິ່ນໄດ້? ເພິ່ນບອກໂຢຮັນວ່າ: “ຂຽນໄວ້ເດີ້! ເພາະຄຳເວົ້າທັງໝົດນີ້ເຊື່ອຖືໄດ້ແລະເປັນຄວາມຈິງ.” (ພນມ. 21:5) ພະເຢໂຫວາບໍ່ພຽງແຕ່ສັ່ງໂຢຮັນໃຫ້ “ຂຽນ” ເທົ່ານັ້ນ ແຕ່ເພິ່ນຍັງບອກເຫດຜົນນຳວ່າເປັນຫຍັງຕ້ອງຂຽນ. ເພິ່ນເວົ້າວ່າ: “ເພາະຄຳເວົ້າທັງໝົດນີ້ເຊື່ອຖືໄດ້ແລະເປັນຄວາມຈິງ.” ເຮົາດີໃຈແທ້ໆທີ່ໂຢຮັນຟັງຄຳສັ່ງຂອງພະເຢໂຫວາ ຍ້ອນເຮົາສາມາດອ່ານເລື່ອງຄຳສັນຍາຂອງພະເຈົ້າກ່ຽວກັບໂລກໃໝ່ແລະຄິດເຖິງສິ່ງດີໆທີ່ກຳລັງຖ້າເຮົາຢູ່ໃນອະນາຄົດ.
12. ເປັນຫຍັງພະເຢໂຫວາຈຶ່ງເວົ້າໄດ້ວ່າ “ເລື່ອງທັງໝົດນີ້ສຳເລັດແລ້ວ!”?
12 ພະເຢໂຫວາເວົ້າຕໍ່ວ່າ: “ເລື່ອງທັງໝົດນີ້ສຳເລັດແລ້ວ!” (ພນມ. 21:6) ເປັນຫຍັງພະເຢໂຫວາຈຶ່ງເວົ້າຄືກັບວ່າຄຳສັນຍາເຫຼົ່ານີ້ເກີດຂຶ້ນແລ້ວ? ພະເຢໂຫວາເວົ້າແບບນີ້ໄດ້ ຍ້ອນບໍ່ມີຫຍັງຈະຂັດຂວາງເພິ່ນບໍ່ໃຫ້ເຮັດຕາມທີ່ເພິ່ນຕ້ອງການ. ຈາກນັ້ນ ພະເຢໂຫວາເວົ້າອີກສິ່ງໜຶ່ງທີ່ຢືນຢັນວ່າຄຳສັນຍາຂອງເພິ່ນຈະເກີດຂຶ້ນແທ້. ເພິ່ນໄດ້ເວົ້າຫຍັງ?
“ເຮົາເປັນອັນຟາແລະໂອເມກາ”
13. ເປັນຫຍັງພະເຢໂຫວາຈຶ່ງເວົ້າວ່າ “ເຮົາເປັນອັນຟາແລະໂອເມກາ”?
13 ຕາມທີ່ໄດ້ເວົ້າມາແລ້ວ ພະເຢໂຫວາເປັນຜູ້ເວົ້າເອງ 3 ເທື່ອໃນນິມິດທີ່ເພິ່ນໃຫ້ໂຢຮັນເຫັນ. (ພນມ. 1:8; 21:5, 6; 22:13) ໃນແຕ່ລະເທື່ອ ພະເຢໂຫວາເວົ້າວ່າ: “ເຮົາເປັນອັນຟາແລະໂອເມກາ.” ໃນພາສາກຣີກ ອັນຟາເປັນໂຕອັກສອນໂຕທຳອິດແລະໂອເມກາເປັນໂຕອັກສອນໂຕສຸດທ້າຍ ຄືກັບໂຕອັກສອນ ກ ແລະ ຮ ໃນພາສາລາວ. ເມື່ອພະເຢໂຫວາເວົ້າວ່າ: “ເຮົາເປັນອັນຟາແລະໂອເມກາ” ກໍໝາຍຄວາມວ່າເມື່ອເພິ່ນເລີ່ມເຮັດສິ່ງໃດສິ່ງໜຶ່ງ ເພິ່ນກໍຈະເຮັດສິ່ງນັ້ນໃຫ້ສຳເລັດ.
ເມື່ອພະເຢໂຫວາເລີ່ມເຮັດສິ່ງໃດສິ່ງໜຶ່ງ ເພິ່ນກໍຈະເຮັດໃຫ້ສິ່ງນັ້ນສຳເລັດ (ເບິ່ງຂໍ້ 14, 17)
14. (ກ) ຕອນໃດທີ່ພະເຢໂຫວາເວົ້າວ່າ “ອັນຟາ” ແລະ “ໂອເມກາ”? (ຂ) ປະຖົມມະການ 2:1-3 ຮັບປະກັນເລື່ອງຫຍັງ?
14 ຫຼັງຈາກພະເຢໂຫວາສ້າງອາດາມກັບເອວາ ເພິ່ນບອກເຂົາເຈົ້າໃຫ້ຮູ້ກ່ຽວກັບຈຸດປະສົງຂອງເພິ່ນສຳລັບມະນຸດໃນໂລກ. ຄຳພີໄບເບິນເວົ້າວ່າ: “ພະເຈົ້າອວຍພອນເຂົາເຈົ້າແລະບອກວ່າ ‘ໃຫ້ພວກເຈົ້າມີລູກມີຫຼານຫຼາຍໆຈົນເຕັມໂລກ ແລະໃຫ້ເບິ່ງແຍງໂລກ.’” (ປຖກ. 1:28) ຕອນທີ່ພະເຢໂຫວາເວົ້າເລື່ອງນີ້ ມັນເປັນຄືກັບເພິ່ນເວົ້າວ່າ “ອັນຟາ.” ພະເຢໂຫວາເວົ້າແຈ້ງກ່ຽວກັບຄວາມຕ້ອງການຂອງເພິ່ນວ່າ ເມື່ອຮອດເວລານັ້ນລູກຫຼານຂອງອາດາມກັບເອວາທີ່ເປັນຄົນສົມບູນແບບແລະເຊື່ອຟັງຈະເຕັມໂລກນີ້ ແລະເຂົາເຈົ້າຈະເຮັດໃຫ້ໂລກນີ້ເປັນບ່ອນທີ່ງາມໆ. ໃນອະນາຄົດ ເມື່ອຈຸດປະສົງຂອງພະເຢໂຫວາສຳເລັດ ມັນກໍຈະເປັນຄືກັບເພິ່ນເວົ້າວ່າ “ໂອເມກາ.” ຫຼັງຈາກທີ່ພະເຢໂຫວາສ້າງທຸກສິ່ງທຸກຢ່າງທີ່ຢູ່ເທິງຟ້າແລະຢູ່ໃນໂລກແລ້ວໆເພິ່ນໄດ້ເວົ້າບາງຢ່າງເພື່ອສະແດງໃຫ້ເຫັນວ່າຄວາມຕ້ອງການຂອງເພິ່ນຈະເກີດຂຶ້ນແທ້. ຄຳເວົ້ານັ້ນຢູ່ໃນປະຖົມມະການ 2:1-3. (ອ່ານ) ສິ່ງທີ່ພະເຢໂຫວາເວົ້າສະແດງໃຫ້ເຫັນວ່າຄວາມຕ້ອງການຂອງເພິ່ນສຳລັບມະນຸດແລະໂລກຈະເກີດຂຶ້ນແທ້ໃນຕອນທ້າຍຂອງມື້ທີ 7.
15. ເປັນຫຍັງຊາຕານຈຶ່ງຄິດວ່າມັນສາມາດຂັດຂວາງບໍ່ໃຫ້ຄວາມຕ້ອງການຂອງພະເຢໂຫວາສຳເລັດເປັນຈິງ?
15 ຫຼັງຈາກອາດາມກັບເອວາບໍ່ເຊື່ອຟັງ ເຂົາເຈົ້າກໍກາຍເປັນຄົນບາບແລະຖ່າຍທອດບາບກັບຄວາມຕາຍໃຫ້ລູກຫຼານຂອງເຂົາເຈົ້າ. (ຣມ. 5:12) ຍ້ອນແນວນີ້ຈຶ່ງເບິ່ງຄືວ່າມັນເປັນໄປບໍ່ໄດ້ທີ່ພະເຢໂຫວາຈະເຮັດໃຫ້ໂລກນີ້ມີແຕ່ຄົນທີ່ສົມບູນແບບແລະເຊື່ອຟັງເພິ່ນ. ຊາຕານສາມາດຢຸດພະເຢໂຫວາໄດ້ບໍຈາກການເຮັດໃຫ້ຄວາມຕ້ອງການຂອງເພິ່ນສຳເລັດເປັນຈິງ? ຊາຕານອາດຄິດວ່າພະເຢໂຫວາເຫຼືອແຕ່ສອງສາມທາງເລືອກເທົ່ານັ້ນ. ທາງເລືອກໜຶ່ງກໍຄື ຂ້າອາດາມກັບເອວາແລ້ວສ້າງມະນຸດທີ່ສົມບູນແບບຄູ່ໃໝ່ເພື່ອເຮັດໃຫ້ຄວາມຕ້ອງການຂອງເພິ່ນເກີດຂຶ້ນແທ້. ແຕ່ຖ້າພະເຢໂຫວາເຮັດແບບນັ້ນ ຊາຕານກໍຈະເວົ້າໃຫ້ເພິ່ນວ່າເປັນພະເຈົ້າທີ່ຂີ້ຕົວະ. ຍ້ອນຫຍັງ? ຍ້ອນວ່າໃນປະຖົມມະການ 1:28 ພະເຢໂຫວາບອກອາດາມກັບເອວາວ່າລູກຫຼານຂອງເຂົາເຈົ້າຈະເຕັມໂລກ.
16. ເປັນຫຍັງຊາຕານຈຶ່ງຄິດວ່າມັນຈະເວົ້າໃຫ້ພະເຢໂຫວາໄດ້ວ່າເປັນພະເຈົ້າທີ່ລົ້ມເຫຼວ?
16 ອີກທາງເລືອກໜຶ່ງທີ່ຊາຕານຄິດວ່າພະເຢໂຫວາເລືອກທີ່ຈະເຮັດແມ່ນຫຍັງ? ມັນອາດຄິດວ່າພະເຢໂຫວາຈະປ່ອຍໃຫ້ອາດາມກັບເອວາມີລູກມີຫຼານ ແຕ່ລູກຫຼານຂອງເຂົາເຈົ້າຈະບໍ່ມີທາງເປັນຄົນສົມບູນແບບ. (ຜູ້ປ 7:20; ຣມ. 3:23) ຖ້າເປັນແບບນັ້ນ ແນ່ນອນວ່າຊາຕານຈະເວົ້າໃຫ້ພະເຢໂຫວາວ່າເປັນພະເຈົ້າທີ່ລົ້ມເຫຼວ. ຍ້ອນຫຍັງ? ຍ້ອນທາງເລືອກນີ້ຈະບໍ່ໄດ້ເຮັດໃຫ້ຄວາມຕ້ອງການຂອງພະເຢໂຫວາເກີດຂຶ້ນແທ້ ເຊິ່ງກໍຄືໃຫ້ລູກຫຼານຂອງອາດາມກັບເອວາທີ່ເປັນຄົນສົມບູນແບບແລະເຊື່ອຟັງມີຢູ່ເຕັມໂລກທີ່ງາມໆນີ້.
17. ເມື່ອຊາຕານ ອາດາມ ແລະເອວາບໍ່ເຊື່ອຟັງ ພະເຢໂຫວາມີວິທີແກ້ໄຂແນວໃດ? ແລະໃນທີ່ສຸດຜົນຈະເປັນແນວໃດ? (ເບິ່ງຮູບ)
17 ຊາຕານບໍ່ມີທາງຄິດພໍ້ໃນສິ່ງທີ່ພະເຢໂຫວາຈະເຮັດ. ພະເຢໂຫວາມີວິທີແກ້ໄຂທີ່ດີທີ່ສຸດເພື່ອໃຫ້ຄວາມຕ້ອງການຂອງເພິ່ນສຳເລັດ. (ເພງ. 92:5) ການທີ່ພະເຢໂຫວາຍອມໃຫ້ອາດາມກັບເອວາມີລູກມີຫຼານສະແດງວ່າເພິ່ນບໍ່ໄດ້ເວົ້າຕົວະ. ພະເຢໂຫວາເຮັດໃຫ້ເຫັນວ່າຖ້າເພິ່ນເວົ້າວ່າຈະເຮັດສິ່ງໃດສິ່ງໜຶ່ງກໍບໍ່ມີຫຍັງຢຸດເພິ່ນໄດ້. ພະເຢໂຫວາເຮັດໃຫ້ຄວາມຕ້ອງການຂອງເພິ່ນເກີດຂຶ້ນແທ້ໂດຍໃຫ້ມີ “ເຊື້ອສາຍ” ເຊິ່ງຈະຊ່ວຍຊີວິດລູກຫຼານຂອງອາດາມກັບເອວາທີ່ເຊື່ອຟັງ. (ປຖກ. 3:15) ເຊື້ອສາຍຜູ້ນີ້ຈະຍອມຕາຍເປັນຄ່າໄຖ່ເພື່ອຊ່ວຍມະນຸດໃຫ້ລອດ. ຊາຕານບໍ່ມີທາງຄິດພໍ້ວິທີແກ້ໄຂບັນຫາແບບນີ້. ຍ້ອນຫຍັງ? ຍ້ອນຄ່າໄຖ່ອາໄສຄວາມຮັກທີ່ບໍ່ເຫັນແກ່ໂຕ. (ມທ. 20:28; ຢຮ. ) ຊາຕານບໍ່ມີຄຸນລັກສະນະນີ້ ຍ້ອນມັນເຫັນແກ່ໂຕ. ແລ້ວຄ່າໄຖ່ຈະເຮັດໃຫ້ສິ່ງໃດເກີດຂຶ້ນ? ໃນຕອນທ້າຍການປົກຄອງ 1.000 ປີຂອງພະຄລິດ ລູກຫຼານຂອງອາດາມກັບເອວາທີ່ເປັນຄົນສົມບູນແບບແລະເຊື່ອຟັງຈະໄດ້ຢູ່ໃນໂລກທີ່ງາມໆຄືກັບທີ່ພະເຢໂຫວາຕັ້ງໃຈໄວ້ໃນຕອນທຳອິດ. ໃນຕອນນັ້ນ ມັນຈະເປັນຄືກັບວ່າພະເຢໂຫວາເວົ້າວ່າ: “ໂອເມກາ.” 3:16
ເຮົາຈະເຊື່ອໝັ້ນໃນຄຳສັນຍາຂອງພະເຢໂຫວາເລື່ອງໂລກໃໝ່ຫຼາຍຂຶ້ນໄດ້ແນວໃດ?
18. ມີ 3 ເຫດຜົນຫຍັງແດ່ທີ່ພະເຢໂຫວາເຮັດໃຫ້ເຮົາໝັ້ນໃຈໃນຄຳສັນຍາຂອງເພິ່ນ? (ເບິ່ງຂອບ “ ເຫດຜົນ 3 ຢ່າງທີ່ເຮັດໃຫ້ເຮົາໝັ້ນໃຈໃນຄຳສັນຍາຂອງພະເຢໂຫວາ”)
18 ໃນບົດຄວາມນີ້ ເຮົາໄດ້ເບິ່ງເຫດຜົນຕ່າງໆທີ່ຊ່ວຍເຮົາໃຫ້ໝັ້ນໃຈວ່າໂລກຈະກາຍເປັນສວນທີ່ງາມໆ. ແຕ່ເຮົາຈະຊ່ວຍຄົນອື່ນໃຫ້ໝັ້ນໃຈໄດ້ແນວໃດວ່າມັນຈະເກີດຂຶ້ນແທ້? ເຫດຜົນທຳອິດ ພະເຢໂຫວາເປັນຜູ້ເຮັດຄຳສັນຍາເອງ. ປຶ້ມພະນິມິດເວົ້າວ່າ: “ພະອົງຜູ້ນັ່ງເທິງບັນລັງນັ້ນເວົ້າວ່າ ‘ເຮົາກຳລັງສ້າງທຸກສິ່ງຂຶ້ນໃໝ່.’” ພະເຢໂຫວາມີສະຕິປັນຍາ ມີລິດເດດ ແລະມີຄວາມຕ້ອງການທີ່ຈະເຮັດໃຫ້ຄຳສັນຍາຂອງເພິ່ນເກີດຂຶ້ນແທ້. ເຫດຜົນທີ 2 ພະເຢໂຫວາຮູ້ວ່າສິ່ງທີ່ເພິ່ນເວົ້າຈະເກີດຂຶ້ນແທ້. ຍ້ອນແນວນີ້ ເພິ່ນຈຶ່ງເວົ້າວ່າ: “ຄຳເວົ້າທັງໝົດນີ້ເຊື່ອຖືໄດ້ແລະເປັນຄວາມຈິງ. . . . ເລື່ອງທັງໝົດນີ້ສຳເລັດແລ້ວ!” ເຫດຜົນທີ 3 ເມື່ອພະເຢໂຫວາເລີ່ມເຮັດສິ່ງໃດສິ່ງໜຶ່ງ ເພິ່ນກໍຈະເຮັດໃຫ້ສິ່ງນັ້ນສຳເລັດແລະບໍ່ມີຫຍັງຈະຂັດຂວາງເພິ່ນໄດ້. ຍ້ອນແນວນີ້ ເພິ່ນຈຶ່ງເວົ້າວ່າ: “ເຮົາເປັນອັນຟາແລະໂອເມກາ.” ພະເຢໂຫວາຈະເຮັດໃຫ້ເຫັນວ່າຊາຕານເປັນຜູ້ເວົ້າຕົວະແລະສິ່ງທີ່ມັນເຮັດກໍລົ້ມເຫຼວ.
19. ຖ້າມີຄົນບອກວ່າບໍ່ເຊື່ອເລື່ອງຄຳສັນຍາຂອງພະເຈົ້າກ່ຽວກັບໂລກໃໝ່ ເຈົ້າຈະເຮັດແນວໃດ?
19 ຂໍໃຫ້ຈື່ໄວ້ວ່າທຸກເທື່ອທີ່ເຈົ້າບອກຄົນອື່ນກ່ຽວກັບຄຳຮັບປະກັນຂອງພະເຢໂຫວາທີ່ວ່າຄຳສັນຍາຂອງເພິ່ນຈະເກີດຂຶ້ນແທ້ ເຈົ້າກໍຈະໝັ້ນໃຈໃນຄຳສັນຍາຂອງເພິ່ນຫຼາຍຂຶ້ນ. ເທື່ອໜ້າ ຖ້າເຈົ້າອ່ານຄຳສັນຍາຂອງພະເຢໂຫວາເລື່ອງໂລກໃໝ່ທີ່ຢູ່ໃນພະນິມິດ 21:4 ໃຫ້ບາງຄົນຟັງແລະລາວເວົ້າວ່າ: “ມັນກໍດີແທ້ ແຕ່ຂ້ອຍບໍ່ເຊື່ອດອກວ່າມັນຈະເກີດຂຶ້ນແທ້.” ເຈົ້າຈະເຮັດແນວໃດ? ໃຫ້ເຈົ້າອ່ານແລະອະທິບາຍຂໍ້ 5-6 ໃຫ້ລາວຟັງນຳເພື່ອໃຫ້ລາວເຫັນວິທີທີ່ພະເຢໂຫວາຮັບປະກັນວ່າຄຳສັນຍາຂອງເພິ່ນຈະເກີດຂຶ້ນແທ້ໂດຍເພິ່ນເອງເປັນຜູ້ເຊັນຮັບຮອງແລ້ວ.—ອຊຢ. 65:16
ເພງ 145 ຄຳສັນຍາຂອງພະເຈົ້າເລື່ອງອຸທິຍານ