ບົດຄວາມສຶກສາທີ 46
ເພງທີ 49 ເຮັດໃຫ້ພະເຢໂຫວາພໍໃຈ
ພີ່ນ້ອງຊາຍ ເຈົ້າມີເປົ້າໝາຍທີ່ຈະເປັນຜູ້ຊ່ວຍວຽກຮັບໃຊ້ບໍ?
“ການໃຫ້ເຮັດໃຫ້ມີຄວາມສຸກຫຼາຍກວ່າການຮັບ.”—ກຈກ. 20:35
ຈຸດສຳຄັນ
ກະຕຸ້ນພີ່ນ້ອງຊາຍທີ່ຮັບບັບເຕມາແລ້ວໃຫ້ພະຍາຍາມມີຄຸນສົມບັດເພື່ອຈະໄດ້ເປັນຜູ້ຊ່ວຍວຽກຮັບໃຊ້.
1. ອັກຄະສາວົກໂປໂລຮູ້ສຶກແນວໃດຕໍ່ຜູ້ຊ່ວຍວຽກຮັບໃຊ້?
ຜູ້ຊ່ວຍວຽກຮັບໃຊ້ເຮັດວຽກທີ່ສຳຄັນຫຼາຍຢ່າງໃນປະຊາຄົມ. ອັກຄະສາວົກໂປໂລເຫັນຄ່າພີ່ນ້ອງຊາຍທີ່ສັດຊື່ເຫຼົ່ານີ້ແທ້ໆ. ເຮົາເຫັນເລື່ອງນີ້ໄດ້ຕອນທີ່ໂປໂລຂຽນຈົດໝາຍໄປຫາພີ່ນ້ອງຢູ່ເມືອງຟີລິບປອຍ. ລາວຂຽນຄຳທັກທາຍເປັນພິເສດເຖິງຜູ້ຊ່ວຍວຽກຮັບໃຊ້ແລະຜູ້ເບິ່ງແຍງ.—ຟລປ. 1:1
2. ພີ່ນ້ອງລູອິດສ໌ຮູ້ສຶກແນວໃດກັບການເປັນຜູ້ຊ່ວຍວຽກຮັບໃຊ້?
2 ພີ່ນ້ອງຊາຍທີ່ຮັບບັບເຕມາແລ້ວ ບໍ່ວ່າຈະອາຍຸໜ້ອຍຫຼືອາຍຸຫຼາຍກໍມີຄວາມສຸກກັບການເປັນຜູ້ຊ່ວຍວຽກຮັບໃຊ້. ຕົວຢ່າງເຊັ່ນ: ພີ່ນ້ອງເດເວນໄດ້ເປັນຜູ້ຊ່ວຍວຽກຮັບໃຊ້ຕອນອາຍຸ 18 ປີ. ສ່ວນພີ່ນ້ອງລູອິດສ໌ໄດ້ເປັນຜູ້ຊ່ວຍວຽກຮັບໃຊ້ຕອນອາຍຸ 50 ປາຍປີ. ລາວເວົ້າແທນຄວາມຮູ້ສຶກຂອງຫຼາຍຄົນທີ່ເປັນຜູ້ຊ່ວຍວຽກຮັບໃຊ້ວ່າ: “ຂ້ອຍຮູ້ສຶກວ່າເປັນສິດທິພິເສດແທ້ໆທີ່ໄດ້ເຮັດວຽກເປັນຜູ້ຊ່ວຍວຽກຮັບໃຊ້. ພີ່ນ້ອງໃນປະຊາຄົມສະແດງຄວາມຮັກຕໍ່ຂ້ອຍຫຼາຍ ແລະຕອນນີ້ຂ້ອຍສາມາດສະແດງຄວາມຮັກຕໍ່ເຂົາເຈົ້າໂດຍຮັບໃຊ້ເຂົາເຈົ້າ.”
3. ເຮົາຈະຕອບຄຳຖາມຫຍັງໃນບົດນີ້?
3 ຖ້າເຈົ້າເປັນພີ່ນ້ອງຊາຍທີ່ຮັບບັບເຕມາແລ້ວແລະຍັງບໍ່ທັນເປັນຜູ້ຊ່ວຍວຽກຮັບໃຊ້ເທື່ອ ເຈົ້າຈະຕັ້ງເປົ້າໝາຍເປັນຜູ້ຊ່ວຍວຽກຮັບໃຊ້ໄດ້ບໍ? ສິ່ງໃດຄວນກະຕຸ້ນເຈົ້າໃຫ້ຢາກເປັນຜູ້ຊ່ວຍວຽກຮັບໃຊ້? ເຈົ້າຕ້ອງມີຄຸນສົມບັດຫຍັງແດ່ຕາມຫຼັກການໃນພະຄຳພີ? ໃນບົດນີ້ຈະຕອບຄຳຖາມເຫຼົ່ານີ້. ແຕ່ກ່ອນອື່ນໃຫ້ເຮົາມາເບິ່ງວ່າຜູ້ຊ່ວຍວຽກຮັບໃຊ້ມີໜ້າທີ່ຫຍັງແດ່.
ຜູ້ຊ່ວຍວຽກຮັບໃຊ້ມີໜ້າທີ່ຫຍັງແດ່?
4. ຜູ້ຊ່ວຍວຽກຮັບໃຊ້ມີໜ້າທີ່ຫຍັງແດ່? (ເບິ່ງຮູບນຳ)
4 ຜູ້ຊ່ວຍວຽກຮັບໃຊ້ແມ່ນພີ່ນ້ອງຊາຍທີ່ຮັບບັບເຕມາແລ້ວທີ່ຖືກແຕ່ງຕັ້ງດ້ວຍພະລັງບໍລິສຸດ. ເຂົາເຈົ້າມີໜ້າທີ່ຊ່ວຍຜູ້ເບິ່ງແຍງເຮັດວຽກທີ່ສຳຄັນຫຼາຍຢ່າງໃນປະຊາຄົມ ເຊັ່ນ: ບາງຄົນຊ່ວຍຈັດເຂດປະກາດໃຫ້ພີ່ນ້ອງແລະຈັດກຽມປຶ້ມໃຫ້ພຽງພໍເພື່ອພີ່ນ້ອງຈະໃຊ້ໃນການປະກາດ. ບາງຄົນຊ່ວຍອະນາໄມແລະເບິ່ງແຍງຮັກສາຫໍປະຊຸມ. ສ່ວນບາງຄົນກໍເຮັດໜ້າທີ່ຕ້ອນຮັບ ຄຸມເຄື່ອງສຽງແລະເປີດວິດີໂອໃນການປະຊຸມ. ທັງໝົດນີ້ແມ່ນວຽກທົ່ວໄປທີ່ຜູ້ຊ່ວຍວຽກຮັບໃຊ້ຕ້ອງເຮັດ. ແຕ່ສິ່ງສຳຄັນທີ່ສຸດແມ່ນເຂົາເຈົ້າຕ້ອງຮັກພະເຢໂຫວາ ໃຊ້ຊີວິດຕາມມາດຕະຖານຂອງເພິ່ນ ແລະຮັກພີ່ນ້ອງຫຼາຍ. (ມທ. 22:37-39) ພີ່ນ້ອງຊາຍທີ່ຮັບບັບເຕມາແລ້ວຕ້ອງເຮັດຫຍັງເພື່ອຈະໄດ້ເປັນຜູ້ຊ່ວຍວຽກຮັບໃຊ້?
5. ພີ່ນ້ອງຊາຍທີ່ຢາກເປັນຜູ້ຊ່ວຍວຽກຮັບໃຊ້ຕ້ອງເຮັດຫຍັງແດ່?
5 ຄຳພີໄບເບິນບອກໃຫ້ຮູ້ວ່າພີ່ນ້ອງຊາຍທີ່ຈະເປັນຜູ້ຊ່ວຍວຽກຮັບໃຊ້ຕ້ອງມີຄຸນສົມບັດຫຍັງແດ່. (1ຕມ. 3:8-10, 12, 13) ຖ້າເຈົ້າຢາກໄດ້ຮັບສິດທິພິເສດນີ້ ເຈົ້າຕ້ອງສຶກສາຄົ້ນຄວ້າກ່ຽວກັບຄຸນສົມບັດເຫຼົ່ານີ້ແລະພະຍາຍາມເຮັດຕາມນັ້ນໃຫ້ໄດ້. ແຕ່ກ່ອນອື່ນໝົດ ເຈົ້າຕ້ອງຮູ້ກ່ອນວ່າສິ່ງໃດກະຕຸ້ນເຈົ້າໃຫ້ຢາກເປັນຜູ້ຊ່ວຍວຽກຮັບໃຊ້.
ສິ່ງໃດຄວນກະຕຸ້ນເຈົ້າໃຫ້ຢາກເປັນຜູ້ຊ່ວຍວຽກຮັບໃຊ້?
6. ສິ່ງໃດຄວນກະຕຸ້ນເຈົ້າໃຫ້ຢາກຮັບໃຊ້ພີ່ນ້ອງ? (ມັດທາຍ 20:28; ເບິ່ງຮູບໜ້າປົກນຳ)
6 ພະເຢຊູເປັນຕົວຢ່າງທີ່ດີທີ່ສຸດໃຫ້ເຮົາ. ເພິ່ນເຮັດທຸກຢ່າງດ້ວຍຄວາມຮັກ ເພິ່ນຮັກພະເຢໂຫວາແລະຮັກຄົນອື່ນ. ຄວາມຮັກກະຕຸ້ນເພິ່ນໃຫ້ເຮັດວຽກໜັກແລະເຮັດວຽກທີ່ຕ່ຳຕ້ອຍເພື່ອຄົນອື່ນ. (ອ່ານມັດທາຍ 20:28; ຢຮ. 13:5, 14, 15) ຖ້າສິ່ງທີ່ເຈົ້າເຮັດຖືກກະຕຸ້ນຈາກຄວາມຮັກ ພະເຢໂຫວາກໍຈະອວຍພອນເຈົ້າແລະຊ່ວຍເຈົ້າໃຫ້ມີຄຸນສົມບັດທີ່ຈະເປັນຜູ້ຊ່ວຍວຽກຮັບໃຊ້ຕາມທີ່ຕັ້ງເປົ້າໝາຍໄວ້.—1ກຣ. 16:14; 1ປຕ. 5:5
7. ເປັນຫຍັງພີ່ນ້ອງຊາຍບໍ່ຄວນເປັນຄົນທີ່ເຫັນແກ່ໂຕແລະທະເຍີທະຍານ?
7 ຄົນໃນໂລກນີ້ມັກຍົກຍ້ອງຄົນທີ່ພະຍາຍາມເຮັດໃຫ້ໂຕເອງເບິ່ງເປັນຄົນທີ່ສຳຄັນ. ແຕ່ໃນອົງການຂອງພະເຢໂຫວາບໍ່ເປັນແບບນັ້ນ. ພີ່ນ້ອງຊາຍທີ່ຮັກຄົນອື່ນຄືກັບທີ່ພະເຢຊູ ຮັກ ລາວຈະບໍ່ເປັນຄົນທີ່ຢາກໄດ້ອຳນາດ ບໍ່ຢາກເປັນຄົນສຳຄັນ ຫຼືບໍ່ຢາກມີຕຳແໜ່ງສູງ. ຖ້າຄົນທີ່ທະເຍີທະຍານຖືກແຕ່ງຕັ້ງໃຫ້ເຮັດວຽກທີ່ສຳຄັນໃນປະຊາຄົມ ລາວຄືຊິບໍ່ຍອມເຮັດວຽກທີ່ຕ່ຳຕ້ອຍຫຼືວຽກອື່ນໆທີ່ຈຳເປັນເພື່ອຈະເບິ່ງແຍງແກະທີ່ມີຄ່າຂອງພະເຢໂຫວາ. ລາວອາດຄິດວ່າໂຕເອງສຳຄັນຫຼາຍຈົນບໍ່ຢາກເຮັດວຽກເຫຼົ່ານັ້ນ. (ຢຮ. 10:12) ພະເຢໂຫວາຈະບໍ່ອວຍພອນຄົນທີ່ເຮັດວຽກດ້ວຍແຮງກະຕຸ້ນທີ່ເຫັນແກ່ໂຕ ທະເຍີທະຍານ ແລະຍິ່ງ ເຖິງວ່າລາວຈະພະຍາຍາມຫຼາຍສ່ຳໃດກໍຕາມ.—1ກຣ. 10:24, 33; 13:4, 5
8. ພະເຢຊູໃຫ້ຄຳແນະນຳຫຍັງກັບອັກຄະສາວົກຂອງເພິ່ນ?
8 ບາງເທື່ອແມ່ນແຕ່ໝູ່ທີ່ສະໜິດທີ່ສຸດຂອງພະເຢຊູກໍຍັງຢາກໄດ້ສິດທິພິເສດດ້ວຍແຮງກະຕຸ້ນທີ່ບໍ່ຖືກຕ້ອງ. ຂໍໃຫ້ຄິດເຖິງສິ່ງທີ່ອັກຄະສາວົກຢາໂກໂບແລະໂຢຮັນໄດ້ເຮັດ. ເຂົາເຈົ້າມາຂໍຕຳແໜ່ງທີ່ສຳຄັນໃນການປົກຄອງຂອງພະເຢຊູ. ເພິ່ນບໍ່ໄດ້ຍ້ອງເຂົາເຈົ້າທີ່ມາຂໍແບບນັ້ນ ແຕ່ເພິ່ນໄດ້ອະທິບາຍໃຫ້ອັກຄະສາວົກທັງສິບສອງຄົນຟັງວ່າ: “ຜູ້ໃດຢາກເປັນໃຫຍ່ກໍຕ້ອງຮັບໃຊ້ຄົນອື່ນ ແລະຜູ້ໃດຢາກເປັນຄົນສຳຄັນທີ່ສຸດກໍຕ້ອງເປັນທາດຮັບໃຊ້ຄົນອື່ນ.” (ມຣກ. 10:35-37, 43, 44) ດັ່ງນັ້ນ ຖ້າພີ່ນ້ອງຊາຍມີແຮງກະຕຸ້ນທີ່ຖືກຕ້ອງເຊິ່ງກໍຄືຢາກຮັບໃຊ້ຄົນອື່ນ ເຂົາເຈົ້າກໍຈະຊ່ວຍປະຊາຄົມໄດ້ຫຼາຍແທ້ໆ.—1ທຊ. 2:8
ສິ່ງໃດຈະຊ່ວຍເຈົ້າໃຫ້ຢາກຮັບໃຊ້ພີ່ນ້ອງ?
9. ສິ່ງໃດຈະຊ່ວຍເຈົ້າໃຫ້ຢາກຮັບໃຊ້ພີ່ນ້ອງ?
9 ແນ່ນອນວ່າເຈົ້າຮັກພະເຢໂຫວາແລະຢາກຮັບໃຊ້ຄົນອື່ນ ແຕ່ເຈົ້າອາດຈະບໍ່ຢາກເຮັດວຽກທີ່ຜູ້ຊ່ວຍວຽກຮັບໃຊ້ເຮັດ. ສິ່ງໃດຈະຊ່ວຍເຈົ້າໃຫ້ຢາກເຮັດວຽກນີ້? ໃຫ້ຄິດເບິ່ງວ່າເຈົ້າຈະມີຄວາມສຸກຫຼາຍສ່ຳໃດທີ່ໄດ້ເຮັດວຽກຮັບໃຊ້ພີ່ນ້ອງ. ພະເຢຊູບອກວ່າ: “ການໃຫ້ເຮັດໃຫ້ມີຄວາມສຸກຫຼາຍກວ່າການຮັບ.” (ກຈກ. 20:35) ພະເຢຊູໃຊ້ຊີວິດຕາມຫຼັກການນີ້ ແລະເພິ່ນມີຄວາມສຸກຫຼາຍແທ້ໆທີ່ໄດ້ຮັບໃຊ້ຄົນອື່ນ. ຖ້າເຈົ້າເຮັດແບບເພິ່ນ ເຈົ້າກໍຈະມີຄວາມສຸກຄືກັນ.
10. ພະເຢຊູສະແດງໃຫ້ເຫັນແນວໃດວ່າເພິ່ນມີຄວາມສຸກຫຼາຍທີ່ໄດ້ຮັບໃຊ້ຄົນອື່ນ? (ມາຣະໂກ 6:31-34)
10 ໃຫ້ເຮົາມາເບິ່ງຕົວຢ່າງຂອງພະເຢຊູທີ່ສະແດງໃຫ້ເຫັນວ່າເພິ່ນມີຄວາມສຸກຫຼາຍທີ່ໄດ້ຮັບໃຊ້ຄົນອື່ນ. (ອ່ານມາຣະໂກ 6:31-34) ມີເທື່ອໜຶ່ງ ພະເຢຊູກັບພວກອັກຄະສາວົກເມື່ອຍຫຼາຍ ແລະເຂົາເຈົ້າກຳລັງເດີນທາງໄປບ່ອນທີ່ຫ່າງໄກຈາກຄົນເພື່ອຈະໄດ້ພັກຜ່ອນໜ້ອຍໜຶ່ງ. ແຕ່ມີຄົນບັກຫຼາຍໆໄປຖ້າຢູ່ຫັ້ນກ່ອນຍ້ອນເຂົາເຈົ້າຢາກຟັງພະເຢຊູສອນ. ເພິ່ນຈະປະຕິເສດເຂົາເຈົ້າກໍໄດ້ຍ້ອນເພິ່ນກັບພວກອັກຄະສາວົກ “ຮອດບໍ່ມີເວລາຈະກິນເຂົ້າ.” ຫຼືເພິ່ນອາດຈະສອນເຂົາເຈົ້າໜ້ອຍໜຶ່ງ ແລ້ວບອກເຂົາເຈົ້າກັບເມືອເຮືອນກໍໄດ້. ແຕ່ຍ້ອນພະເຢຊູຮັກຄົນອື່ນ ເພິ່ນຈຶ່ງ “ສອນເຂົາເຈົ້າຫຼາຍເລື່ອງ” ແລະເພິ່ນຍັງສອນເຂົາເຈົ້າຕໍ່ໄປຈົນຮອດ “ຕອນແລງ.” (ມຣກ. 6:35) ພະເຢຊູເຮັດແບບນັ້ນບໍ່ແມ່ນຍ້ອນຈຳເປັນຕ້ອງເຮັດ ແຕ່ຍ້ອນເພິ່ນ “ຮູ້ສຶກອີ່ຕົນ” ເຂົາເຈົ້າ. ເພິ່ນຢາກສອນເຂົາເຈົ້າຍ້ອນເພິ່ນຮັກເຂົາເຈົ້າ. ການຮັບໃຊ້ຄົນອື່ນເຮັດໃຫ້ພະເຢຊູມີຄວາມສຸກຫຼາຍແທ້ໆ.
11. ພະເຢຊູຮັບໃຊ້ຄົນອື່ນແນວໃດ? (ເບິ່ງຮູບນຳ)
11 ພະເຢຊູຊ່ວຍຄົນອື່ນໂດຍສອນເຂົາເຈົ້າເລື່ອງພະເຢໂຫວາ ແຕ່ເພິ່ນຍັງຊ່ວຍເຂົາເຈົ້າໃນດ້ານອື່ນນຳ. ເພິ່ນໄດ້ເຮັດການອັດສະຈັນເພື່ອໃຫ້ມີອາຫານສຳລັບເຂົາເຈົ້າ ແລ້ວກໍໃຫ້ພວກລູກສິດເອົາໄປຢາຍ. (ມຣກ. 6:41) ໂດຍວິທີນີ້ ພະເຢຊູສອນພວກລູກສິດໃຫ້ຮູ້ວິທີຮັບໃຊ້ຄົນອື່ນ. ນອກຈາກນັ້ນ ເພິ່ນຍັງເຮັດໃຫ້ພວກລູກສິດເຫັນວ່າການເຮັດວຽກຮັບໃຊ້ແບບນີ້ເປັນວຽກທີ່ສຳຄັນເຊິ່ງເປັນວຽກທີ່ຜູ້ຊ່ວຍວຽກຮັບໃຊ້ເຮັດ. ພວກອັກຄະສາວົກຕ້ອງມີຄວາມສຸກຫຼາຍແທ້ໆທີ່ໄດ້ເຮັດວຽກຮ່ວມກັບພະເຢຊູໃນການແຈກຢາຍອາຫານທີ່ອັດສະຈັນນີ້ຈົນ “ທຸກຄົນໄດ້ກິນຈົນອີ່ມ.” (ມຣກ. 6:42) ແນ່ນອນວ່ານີ້ບໍ່ແມ່ນແຕ່ເທື່ອດຽວທີ່ພະເຢຊູໃຫ້ຄວາມຈຳເປັນຂອງຄົນອື່ນມາກ່ອນຂອງໂຕເອງ. ເພິ່ນຮັບໃຊ້ຄົນອື່ນຕະຫຼອດຊີວິດທີ່ເພິ່ນຢູ່ໃນໂລກນີ້. (ມທ. 4:23; 8:16) ພະເຢຊູມີຄວາມສຸກຫຼາຍທີ່ໄດ້ສອນແລະເບິ່ງແຍງຄວາມຈຳເປັນຂອງ ຄົນອື່ນ. ເຈົ້າກໍຈະມີຄວາມສຸກຫຼາຍຄືກັນຖ້າເຈົ້າເຕັມໃຈຮັບໃຊ້ຄົນອື່ນໃນຖານະຜູ້ຊ່ວຍວຽກຮັບໃຊ້.
12. ເປັນຫຍັງເຮົາບໍ່ຄວນຄິດວ່າໂຕເອງບໍ່ມີຄວາມສາມາດທີ່ຈະຊ່ວຍປະຊາຄົມໄດ້?
12 ຖ້າເຈົ້າຮູ້ສຶກວ່າໂຕເອງບໍ່ມີຄວາມສາມາດຫຍັງທີ່ພິເສດ ກໍຢ່າຟ້າວທໍ້ໃຈ. ແນ່ນອນວ່າເຈົ້າມີຄຸນລັກສະນະບາງຢ່າງທີ່ເປັນປະໂຫຍດຕໍ່ປະຊາຄົມ. ໃຫ້ຄິດເຖິງສິ່ງທີ່ໂປໂລເວົ້າໃນ 1 ໂກຣິນໂທ 12:12-30 ແລະອະທິດຖານຂໍພະເຢໂຫວາຊ່ວຍເຈົ້າໃຫ້ເຫັນວ່າເລື່ອງນີ້ກົງກັບເຈົ້າແນວໃດ. ຄຳເວົ້າຂອງໂປໂລເຮັດໃຫ້ເຫັນແຈ້ງວ່າເຈົ້າມີຄວາມສຳຄັນແລະມີຄ່າຫຼາຍໃນປະຊາຄົມຄືກັບຜູ້ຮັບໃຊ້ຂອງພະເຢໂຫວາຄົນອື່ນໆ. ຖ້າຕອນນີ້ເຈົ້າຍັງບໍ່ມີຄຸນສົມບັດທີ່ຈະເປັນຜູ້ຊ່ວຍວຽກຮັບໃຊ້ ກໍຢ່າຟ້າວທໍ້ໃຈ. ຂໍໃຫ້ເຈົ້າເຮັດໃນສິ່ງທີ່ເຮັດໄດ້ເພື່ອຮັບໃຊ້ພະເຢໂຫວາແລະຊ່ວຍເຫຼືອພີ່ນ້ອງ. ຂໍໃຫ້ໝັ້ນໃຈວ່າຜູ້ເບິ່ງແຍງຈະຄິດເຖິງຄວາມສາມາດຂອງເຈົ້າແລະຈະເອົາວຽກທີ່ເໝາະກັບເຈົ້າໃຫ້ເຈົ້າເຮັດກ່ອນທີ່ເຈົ້າຈະເປັນຜູ້ຊ່ວຍວຽກຮັບໃຊ້.—ຣມ. 12:4-8
13. ອັນໃດເປັນອີກເຫດຜົນໜຶ່ງທີ່ພີ່ນ້ອງຊາຍຄວນພະຍາຍາມເພື່ອຈະໄດ້ເປັນຜູ້ຊ່ວຍວຽກຮັບໃຊ້?
13 ອີກເຫດຜົນໜຶ່ງທີ່ພີ່ນ້ອງຊາຍຄວນພະຍາຍາມເພື່ອຈະໄດ້ເປັນຜູ້ຊ່ວຍວຽກຮັບໃຊ້ກໍຄື ຄຸນສົມບັດຫຼາຍຢ່າງຂອງຜູ້ຊ່ວຍວຽກຮັບໃຊ້ເປັນຄຸນສົມບັດທີ່ຄລິດສະຕຽນທຸກຄົນຕ້ອງມີຢູ່ແລ້ວ. ເຮົາທຸກຄົນຄວນສະໜິດກັບພະເຢໂຫວາ ມີຄວາມສຸກໃນການໃຫ້ ແລະເປັນຕົວຢ່າງທີ່ດີໃນການໃຊ້ຊີວິດແບບທີ່ພະເຢໂຫວາພໍໃຈ. ດັ່ງນັ້ນ ເບິ່ງຄືວ່າພີ່ນ້ອງຊາຍມີຄຸນສົມບັດຫຼາຍຢ່າງຂອງຜູ້ຊ່ວຍວຽກຮັບໃຊ້ຢູ່ແລ້ວ. ແຕ່ພີ່ນ້ອງຊາຍຕ້ອງເຮັດຫຍັງອີກເພື່ອຈະໄດ້ເປັນຜູ້ຊ່ວຍວຽກຮັບໃຊ້?
ສິ່ງທີ່ຕ້ອງເຮັດເພື່ອຈະໄດ້ເປັນຜູ້ຊ່ວຍວຽກຮັບໃຊ້
14. ການເປັນຄົນ “ເອົາຈິງເອົາຈັງ” ໝາຍຄວາມວ່າແນວໃດ? (1 ຕີໂມທຽວ 3:8-10, 12)
14 ໃຫ້ເຮົາມາເບິ່ງຄຸນສົມບັດບາງຢ່າງທີ່ບອກໄວ້ໃນ 1 ຕີໂມທຽວ 3:8-10, 12. (ອ່ານ) ຜູ້ຊ່ວຍວຽກຮັບໃຊ້ “ຕ້ອງເປັນຄົນເອົາຈິງເອົາຈັງ.” ສຳນວນນີ້ຍັງອາດແປວ່າ “ສົມຄວນໄດ້ຮັບຄວາມນັບຖື” “ມີກຽດ” ຫຼື “ເຊື່ອຖືໄດ້.” ນີ້ບໍ່ໄດ້ໝາຍຄວາມວ່າເຈົ້າຊິມ່ວນຊິຫົວບໍ່ໄດ້ເລີຍ. (ປຍຈ. 3:1, 4) ແຕ່ມັນໝາຍຄວາມວ່າເຈົ້າຕ້ອງເອົາໃຈໃສ່ໜ້າທີ່ຮັບຜິດຊອບຂອງໂຕເອງຢ່າງດີ. ຖ້າເຈົ້າມີຊື່ສຽງວ່າເປັນຄົນທີ່ໄວ້ໃຈໄດ້ແລະເພິ່ງພາໄດ້ ພີ່ນ້ອງໃນປະຊາຄົມກໍຈະນັບຖືເຈົ້າ.
15. ການ “ບໍ່ເປັນຄົນເວົ້າຫຼົບລີ້ນປີ້ນຄວາມ” ແລະ “ບໍ່ໂລບຊອກຫາຜົນປະໂຫຍດໃຫ້ໂຕເອງ” ໝາຍຄວາມວ່າແນວໃດ?
15 ການ “ບໍ່ເປັນຄົນເວົ້າຫຼົບລີ້ນປີ້ນຄວາມ” ໝາຍຄວາມວ່າເຈົ້າເປັນຄົນທີ່ຈິງໃຈ ສັດຊື່ ແລະເຊື່ອຖືໄດ້. ເຈົ້າ ຈະຮັກສາຄຳເວົ້າແລະບໍ່ຫຼອກລວງຄົນອື່ນ. (ສພສ. 3:32) ການ “ບໍ່ໂລບຊອກຫາຜົນປະໂຫຍດໃຫ້ໂຕເອງ” ໝາຍຄວາມວ່າເຈົ້າຕ້ອງສັດຊື່ເມື່ອເຮັດທຸລະກິດແລະເຮັດວຽກທີ່ກ່ຽວກັບເງິນ. ເຈົ້າຈະບໍ່ໃຊ້ຄວາມເປັນໝູ່ກັບພີ່ນ້ອງໃນປະຊາຄົມເພື່ອຊອກຫາຜົນປະໂຫຍດໃຫ້ໂຕເອງໃນເລື່ອງເງິນ.
16. (ກ) ການ “ບໍ່ກິນເຫຼົ້າຫຼາຍ” ໝາຍຄວາມວ່າແນວໃດ? (ຂ) ການ “ບໍ່ມີຫຍັງລົບກວນໃຈຮູ້ຜິດຮູ້ຖືກ” ໝາຍຄວາມວ່າແນວໃດ?
16 ການ “ບໍ່ກິນເຫຼົ້າຫຼາຍ” ໝາຍຄວາມວ່າເຈົ້າຕ້ອງບໍ່ກິນເຫຼົ້າຫຼາຍໂພດ ຫຼືບໍ່ມີຊື່ສຽງວ່າເປັນຄໍທອງແດງ. ການ “ບໍ່ມີຫຍັງລົບກວນໃຈຮູ້ຜິດຮູ້ຖືກ” ໝາຍຄວາມວ່າເຈົ້າໄດ້ໃຊ້ຊີວິດຕາມມາດຕະຖານຂອງພະເຢໂຫວາ. ເຖິງວ່າເຈົ້າບໍ່ສົມບູນແບບ ແຕ່ເຈົ້າກໍມີໃຈທີ່ສະຫງົບໄດ້ຍ້ອນເຈົ້າມີສາຍສຳພັນທີ່ດີກັບພະເຢໂຫວາ.
17. ການ “ທົດລອງເບິ່ງຄວາມເໝາະສົມ” ໝາຍຄວາມວ່າແນວໃດ? (1 ຕີໂມທຽວ 3:10; ເບິ່ງຮູບນຳ)
17 ການ “ທົດລອງເບິ່ງຄວາມເໝາະສົມ” ໝາຍຄວາມວ່າຜູ້ເບິ່ງແຍງໄດ້ເຫັນແລ້ວວ່າເຈົ້າເຮັດວຽກມອບໝາຍໄດ້ດີແລະເຂົາເຈົ້າສາມາດໄວ້ໃຈເຈົ້າໄດ້. ດັ່ງນັ້ນ ເມື່ອຜູ້ເບິ່ງແຍງເອົາວຽກໃຫ້ເຈົ້າເຮັດ ໃຫ້ເຈົ້າເອົາໃຈໃສ່ເຮັດຕາມຄຳແນະນຳຂອງເຂົາເຈົ້າແລະຂອງອົງການ. ເຈົ້າຕ້ອງຮູ້ວ່າຄວນເຮັດວຽກນັ້ນແນວໃດແລະຄວນເຮັດໃຫ້ແລ້ວຕອນໃດ. ເມື່ອເຈົ້າເຮັດວຽກມອບໝາຍທີ່ໄດ້ຮັບຢ່າງດີແລະເຮັດດ້ວຍຄວາມກະຕືລືລົ້ນ ພີ່ນ້ອງໃນປະຊາຄົມກໍຈະເຫັນຄວາມກ້າວໜ້າຂອງເຈົ້າແລະເຫັນຄ່າສິ່ງທີ່ເຈົ້າເຮັດ. ຜູ້ເບິ່ງແຍງຕ້ອງຕື່ນໂຕແລະຝຶກພີ່ນ້ອງຊາຍທີ່ຮັບບັບເຕມາແລ້ວ. (ອ່ານ 1 ຕີໂມທຽວ 3:10) ໃນປະຊາຄົມຂອງເຈົ້າມີພີ່ນ້ອງຊາຍທີ່ຮັບບັບເຕມາແລ້ວເຊິ່ງມີອາຍຸ 10 ຫາ 14 ປີບໍ? ເຂົາເຈົ້າມີນິດໄສສຶກສາສ່ວນໂຕທີ່ດີບໍ? ເຂົາເຈົ້າມັກອອກຄຳຄິດເຫັນຢູ່ການປະຊຸມແລະມັກໄປປະກາດບໍ? ຖ້າມີ ໃຫ້ລອງເອົາວຽກທີ່ເໝາະກັບອາຍຸແລະຄວາມສາມາດຂອງເຂົາເຈົ້າໃຫ້ເຂົາເຈົ້າເຮັດ. ການເຮັດແບບນີ້ເປັນການ “ທົດລອງເບິ່ງຄວາມເໝາະສົມ” ຂອງພີ່ນ້ອງຊາຍທີ່ຍັງນ້ອຍເຫຼົ່ານີ້ ແລະເມື່ອເຂົາເຈົ້າອາຍຸປະມານ 17 ຫາ 19 ປີ ເຂົາເຈົ້າກໍອາດຈະມີຄຸນສົມບັດເປັນຜູ້ຊ່ວຍວຽກຮັບໃຊ້ໄດ້.
18. ການເປັນຄົນ “ບໍ່ມີບ່ອນຕິ” ໝາຍຄວາມວ່າແນວໃດ?
18 ການເປັນຄົນ “ບໍ່ມີບ່ອນຕິ” ໝາຍຄວາມວ່າບໍ່ຄວນມີໃຜກ່າວຫາເຈົ້າໄດ້ວ່າເຈົ້າເຮັດຜິດຮ້າຍແຮງ. ແນ່ນອນວ່າເຮົາອາດຈະຖືກກ່າວຫາແບບຜິດໆ. ພະເຢຊູກໍເຄີຍຖືກກ່າວຫາແບບຜິດໆ ແລະເພິ່ນໄດ້ບອກລ່ວງໜ້າວ່າພວກລູກສິດຂອງເພິ່ນກໍຈະເຈິແບບນີ້ຄືກັນ. (ຢຮ. 15:20) ແຕ່ຖ້າເຈົ້າປະພຶດໂຕດີຢູ່ສະເໝີຄືກັບພະເຢຊູ ເຈົ້າກໍຈະມີຊື່ສຽງທີ່ດີໃນປະຊາຄົມ.—ມທ. 11:19
19. ການ “ມີເມຍຄົນດຽວ” ໝາຍຄວາມວ່າແນວໃດ?
19 “ມີເມຍຄົນດຽວ.” ຖ້າເຈົ້າແຕ່ງດອງແລ້ວ ເຈົ້າຕ້ອງເຮັດຕາມມາດຕະຖານຂອງພະເຢໂຫວາໃນເລື່ອງການແຕ່ງດອງທີ່ເພິ່ນກຳນົດໄວ້ຕັ້ງແຕ່ທຳອິດທີ່ວ່າໃຫ້ມີຜົວດຽວເມຍດຽວ. ນີ້ເປັນສິ່ງທີ່ເຮົາທຸກຄົນຕ້ອງເຮັດຕາມ. (ມທ. 19:3-9) ພີ່ນ້ອງຊາຍຕ້ອງບໍ່ເຮັດຜິດສິນລະທຳທາງເພດ. (ຮຣ. 13:4) ນີ້ໝາຍຄວາມວ່າລາວຕ້ອງສັດຊື່ຕໍ່ເມຍແລະບໍ່ສະແດງຄວາມສົນໃຈຕໍ່ຜູ້ຍິງຄົນອື່ນແບບບໍ່ເໝາະສົມ.—ໂຢບ 31:1
20. ພີ່ນ້ອງຊາຍຈະເບິ່ງແຍງຄອບຄົວຢ່າງດີໄດ້ແນວໃດ?
20 “ໃຫ້ນຳໜ້າຄອບຄົວແລະສັ່ງສອນລູກຂອງໂຕເອງຢ່າງດີ.” ຖ້າເຈົ້າເປັນຫົວໜ້າຄອບຄົວ ເຈົ້າຕ້ອງຖືວ່າໜ້າທີ່ນີ້ເປັນຄວາມຮັບຜິດຊອບທີ່ສຳຄັນຫຼາຍ. ໃຫ້ເຈົ້າຈັດການນະມັດສະການຄອບຄົວເປັນປະຈຳ ໄປປະກາດກັບຄອບຄົວເລື້ອຍໆເທົ່າທີ່ເຈົ້າເຮັດໄດ້ ແລະຊ່ວຍລູກໃຫ້ສະໜິດກັບພະເຢໂຫວາ. (ອຟຊ. 6:4) ຜູ້ຊາຍທີ່ເບິ່ງແຍງຄອບຄົວໄດ້ກໍສະແດງໃຫ້ເຫັນວ່າລາວສາມາດເບິ່ງແຍງປະຊາຄົມໄດ້.—ສົມທຽບກັບ 1 ຕີໂມທຽວ 3:5
21. ຖ້າເຈົ້າຍັງບໍ່ໄດ້ເປັນຜູ້ຊ່ວຍວຽກຮັບໃຊ້ ເຈົ້າຄວນເຮັດຫຍັງແດ່?
21 ຖ້າເຈົ້າເປັນພີ່ນ້ອງຊາຍ ແຕ່ຍັງບໍ່ໄດ້ເປັນຜູ້ຊ່ວຍວຽກຮັບໃຊ້ ຂໍໃຫ້ອ່ານບົດຄວາມນີ້ຢ່າງລະອຽດແລະອະທິດຖານຂໍໃຫ້ພະເຢໂຫວາຊ່ວຍເຈົ້າກ່ຽວກັບເລື່ອງນີ້. ນອກຈາກນັ້ນ ຂໍໃຫ້ສຶກສາຄົ້ນຄວ້າຄຸນສົມບັດຂອງຄົນທີ່ຈະເປັນຜູ້ຊ່ວຍວຽກຮັບໃຊ້ແລະພະຍາຍາມເຕັມທີທີ່ຈະມີຄຸນສົມບັດເຫຼົ່ານີ້. ຂໍໃຫ້ເຈົ້າຮັກພະເຢໂຫວາແລະຮັກພີ່ນ້ອງຫຼາຍຂຶ້ນ ແລະຄິດເບິ່ງວ່າເປັນຫຍັງເຈົ້າຈຶ່ງຢາກຮັບໃຊ້ເຂົາເຈົ້າ. (1ປຕ. 4:8, 10) ຂໍໃຫ້ເຈົ້າພະຍາຍາມທີ່ຈະໄດ້ເປັນຜູ້ຊ່ວຍວຽກຮັບໃຊ້ ແລ້ວເຈົ້າຈະມີຄວາມສຸກທີ່ໄດ້ຮັບໃຊ້ພີ່ນ້ອງໃນປະຊາຄົມ. ຂໍໃຫ້ພະເຢໂຫວາອວຍພອນຄວາມພະຍາຍາມຂອງເຈົ້າທີ່ຈະເຮັດໜ້າທີ່ເປັນຜູ້ຊ່ວຍວຽກຮັບໃຊ້!—ຟລປ. 2:13
ເພງທີ 17 “ເຮົາຢາກຊ່ວຍ”
a ຄຳອະທິບາຍຮູບ: ຮູບເບື້ອງຊ້າຍ: ພະເຢຊູຖ່ອມໂຕຮັບໃຊ້ຄົນອື່ນ. ຮູບເບື້ອງຂວາ: ຜູ້ຊ່ວຍວຽກຮັບໃຊ້ຊ່ວຍເຫຼືອພີ່ນ້ອງສູງອາຍຸໃນປະຊາຄົມ.