ບົດຄວາມສຶກສາທີ 47
ເພງທີ 103 ຜູ້ບຳລຸງລ້ຽງຂອງຂວັນທີ່ເປັນມະນຸດ
ພີ່ນ້ອງຊາຍ ເຈົ້າມີເປົ້າໝາຍທີ່ຈະເປັນຜູ້ເບິ່ງແຍງບໍ?
“ຖ້າຜູ້ຊາຍຄົນໃດພະຍາຍາມທີ່ຈະໄດ້ເປັນຜູ້ເບິ່ງແຍງກໍສະແດງວ່າລາວຢາກເຮັດວຽກທີ່ດີ.”—1ຕມ. 3:1
ຈຸດສຳຄັນ
ໃນບົດນີ້ຈະເວົ້າເຖິງຄຸນສົມບັດຕ່າງໆໃນຄຳພີໄບເບິນທີ່ພີ່ນ້ອງຊາຍຕ້ອງມີເພື່ອຈະໄດ້ເປັນຜູ້ເບິ່ງແຍງ.
1-2. ຜູ້ເບິ່ງແຍງເຮັດ “ວຽກທີ່ດີ” ຫຍັງແດ່?
ຖ້າເຈົ້າເປັນຜູ້ຊ່ວຍວຽກຮັບໃຊ້ມາໄລຍະໜຶ່ງແລ້ວ ເຈົ້າຄືຊິຢາກປັບປຸງໂຕເອງຫຼາຍຂຶ້ນເພື່ອຈະມີຄຸນສົມບັດເປັນຜູ້ເບິ່ງແຍງ. ເຈົ້າຢາກເຮັດ “ວຽກທີ່ດີ” ນີ້ບໍ?—1ຕມ. 3:1
2 ຜູ້ເບິ່ງແຍງເຮັດວຽກຫຍັງແດ່? ລາວນຳໜ້າໃນການປະກາດ ສອນພີ່ນ້ອງໃນປະຊາຄົມ ໃຫ້ກຳລັງໃຈພີ່ນ້ອງ ແລະຊ່ວຍພີ່ນ້ອງໃຫ້ມີຄວາມເຊື່ອເຂັ້ມແຂງໂດຍທາງຄຳເວົ້າແລະການກະທຳຂອງລາວ. ຍ້ອນເຫດຜົນເຫຼົ່ານີ້ ຄຳພີໄບເບິນຈຶ່ງເອີ້ນຜູ້ເບິ່ງແຍງທີ່ເຮັດວຽກໜັກວ່າເປັນ “ຂອງຂວັນທີ່ເປັນມະນຸດ.”—ອຟຊ. 4:8
3. ພີ່ນ້ອງຊາຍຕ້ອງມີຄຸນສົມບັດຫຍັງເພື່ອຈະໄດ້ເປັນຜູ້ເບິ່ງແຍງ? (1 ຕີໂມທຽວ 3:1-7; ຕີໂຕ 1:5-9)
3 ພີ່ນ້ອງຊາຍຕ້ອງມີຄຸນສົມບັດຫຍັງເພື່ອຈະໄດ້ເປັນຜູ້ເບິ່ງແຍງ? ການມີຄຸນສົມບັດເພື່ອຈະໄດ້ເປັນຜູ້ເບິ່ງແຍງຕ່າງຈາກການມີຄຸນສົມບັດທີ່ຈະເຮັດວຽກອາຊີບ. ຕາມປົກກະຕິແລ້ວ ຕອນທີ່ໄປສະໝັກວຽກ ຖ້າເຈົ້າມີຄວາມສາມາດຕາມທີ່ນາຍຈ້າງຕ້ອງການ ເຈົ້າກໍຈະໄດ້ວຽກນັ້ນ. ແຕ່ຖ້າເຈົ້າຢາກເປັນຜູ້ເບິ່ງແຍງ ເຈົ້າບໍ່ພຽງແຕ່ປະກາດແລະສອນເກັ່ງເທົ່ານັ້ນ ເຈົ້າຕ້ອງມີຄຸນສົມບັດທີ່ຜູ້ເບິ່ງແຍງຕ້ອງມີເຊິ່ງບອກໄວ້ໃນ 1 ຕີໂມທຽວ 3:1-7 ແລະ ຕີໂຕ 1:5-9. (ອ່ານ) ໃນບົດນີ້ຈະເວົ້າເຖິງຄຸນສົມບັດບາງຢ່າງໃນຂໍ້ຄຳພີເຫຼົ່ານີ້ທີ່ຜູ້ເບິ່ງແຍງຕ້ອງມີ ເຊັ່ນ: ມີຊື່ສຽງທີ່ດີທັງໃນແລະນອກປະຊາຄົມ ເປັນຫົວໜ້າຄອບຄົວທີ່ດີ ແລະເຕັມໃຈຮັບໃຊ້ພີ່ນ້ອງ.
ມີຊື່ສຽງທີ່ດີ
4. ການ “ເປັນຄົນທີ່ບໍ່ມີບ່ອນຕິ” ໝາຍຄວາມວ່າແນວໃດ?
4 ເພື່ອຈະມີຄຸນສົມບັດເປັນຜູ້ເບິ່ງແຍງ ເຈົ້າຕ້ອງ “ເປັນຄົນທີ່ບໍ່ມີບ່ອນຕິ” ເຊິ່ງໝາຍຄວາມວ່າເຈົ້າຕ້ອງມີຊື່ສຽງທີ່ດີໃນປະຊາຄົມຍ້ອນການປະພຶດທີ່ດີຂອງເຈົ້າແລະບໍ່ຄວນມີໃຜຕຳໜິເຈົ້າໄດ້. ນອກຈາກນັ້ນ ‘ຄົນທີ່ຢູ່ນອກປະຊາຄົມຄວນເຫັນວ່າເຈົ້າມີຊື່ສຽງທີ່ດີ.’ ແນ່ນອນວ່າຄົນທີ່ບໍ່ໄດ້ຮັບໃຊ້ພະເຢໂຫວາອາດຈະເວົ້າບໍ່ດີກ່ຽວກັບຄວາມເຊື່ອຂອງເຈົ້າ ແຕ່ເຂົາເຈົ້າບໍ່ຄວນມີເຫດຜົນທີ່ຈະສົງໄສວ່າເຈົ້າເປັນຄົນດີແລະສັດຊື່. (ດນອ. 6:4, 5) ດັ່ງນັ້ນ ໃຫ້ຖາມໂຕເອງວ່າ: ‘ຂ້ອຍມີຊື່ສຽງທີ່ດີທັງໃນແລະນອກປະຊາຄົມບໍ?’
5. ເຈົ້າຈະສະແດງໃຫ້ເຫັນແນວໃດວ່າເຈົ້າເປັນຄົນທີ່ “ຮັກຄວາມດີ”?
5 ຖ້າເຈົ້າເປັນຄົນທີ່ “ຮັກຄວາມດີ” ເຈົ້າຈະເບິ່ງແຕ່ຈຸດດີໃນໂຕຄົນອື່ນແລະຊົມເຊີຍເຂົາເຈົ້າ. ເຈົ້າຍັງມີຄວາມສຸກທີ່ໄດ້ເຮັດດີເພື່ອຄົນອື່ນແລະເຮັດຫຼາຍກວ່າທີ່ເຂົາເຈົ້າຂໍຊ້ຳ. (1ທຊ. 2:8) ເປັນຫຍັງຄຸນລັກສະນະນີ້ຈຶ່ງສຳຄັນຫຼາຍສຳລັບຜູ້ເບິ່ງແຍງ? ຍ້ອນເຂົາເຈົ້າຍິນດີທີ່ຈະໃຊ້ເວລາຂອງໂຕເອງເພື່ອໃຫ້ກຳລັງໃຈພີ່ນ້ອງແລະເຮັດວຽກມອບໝາຍຕ່າງໆໃນປະຊາຄົມ. (1ປຕ. 5:1-3) ເຖິງວ່າຈະເຮັດວຽກຫຼາຍຢ່າງ ແຕ່ເຂົາເຈົ້າກໍມີຄວາມສຸກທີ່ໄດ້ຮັບໃຊ້ຄົນອື່ນ.—ກຈກ. 20:35
6. ການເປັນຄົນ “ມີນ້ຳໃຈຕ້ອນຮັບແຂກ” ໝາຍຄວາມວ່າແນວໃດ? (ເຮັບເຣີ 13:2, 16; ເບິ່ງຮູບນຳ)
6 ເຈົ້າສະແດງໃຫ້ເຫັນວ່າເປັນຄົນ “ມີນ້ຳໃຈຕ້ອນຮັບແຂກ” ເມື່ອເຈົ້າເຮັດສິ່ງທີ່ດີເພື່ອຄົນອື່ນລວມທັງຄົນທີ່ບໍ່ແມ່ນໝູ່ສະໜິດຂອງເຈົ້າ. (1ປຕ. 4:9) ປຶ້ມອ້າງອີງຫົວໜຶ່ງກ່ຽວກັບຄຳພີໄບເບິນເວົ້າເຖິງຄົນທີ່ມີນ້ຳໃຈຕ້ອນຮັບແຂກວ່າ: “ລາວໃຈດີກັບທຸກຄົນແມ່ນແຕ່ກັບຄົນທີ່ລາວບໍ່ຮູ້ຈັກແລະຍິນດີຊວນເຂົາເຈົ້າມາເຮືອນລາວ.” ໃຫ້ຖາມໂຕເອງວ່າ: ‘ຂ້ອຍມີຊື່ສຽງແນວໃດເລື່ອງການມີນ້ຳໃຈຕ້ອນຮັບແຂກ?’ (ອ່ານເຮັບເຣີ 13:2, 16) ຄົນທີ່ມີນ້ຳໃຈຕ້ອນຮັບແຂກຈະຕ້ອນຮັບທຸກຄົນບໍ່ວ່າຈະເປັນຄົນຕ່ຳຕ້ອຍຫຼືຄົນທີ່ເຮັດວຽກໜັກໃນການຮັບໃຊ້ ເຊັ່ນ: ຜູ້ເບິ່ງແຍງໝວດແລະຜູ້ທີ່ຖືກເຊີນໃຫ້ມາບັນລະຍາຍຈາກປະຊາຄົມອື່ນ.—ປຖກ. 18:2-8; ສພສ. 3:27; ລກ. 14:13, 14; ກຈກ. 16:15; ຣມ. 12:13
ຜົວເມຍຄູ່ໜຶ່ງສະແດງນ້ຳໃຈຕ້ອນຮັບຜູ້ເບິ່ງແຍງໝວດກັບເມຍ (ເບິ່ງຂໍ້ 6)
7. ຜູ້ເບິ່ງແຍງຈະສະແດງໃຫ້ເຫັນແນວໃດວ່າລາວ “ບໍ່ເປັນຄົນເຫັນແກ່ເງິນ”?
7 “ບໍ່ເປັນຄົນເຫັນແກ່ເງິນ.” ນີ້ໝາຍຄວາມວ່າເຈົ້າບໍ່ໄດ້ໃຫ້ເງິນແລະວັດຖຸສິ່ງຂອງເປັນສິ່ງທີ່ສຳຄັນທີ່ສຸດ. ບໍ່ວ່າເຈົ້າຈະຮັ່ງຫຼືທຸກ ເຈົ້າໃຫ້ການຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ. (ມທ. 6:33) ເຈົ້າໃຊ້ເວລາ ກຳລັງ ແລະຊັບສິນຂອງເຈົ້າເພື່ອນະມັດສະການພະເຢໂຫວາ ເບິ່ງແຍງຄອບຄົວ ແລະຮັບໃຊ້ພີ່ນ້ອງໃນປະຊາຄົມ. (ມທ. 6:24; 1ຢຮ. 2:15-17) ໃຫ້ຖາມໂຕເອງວ່າ: ‘ເງິນສຳຄັນຫຼາຍສ່ຳໃດສຳລັບຂ້ອຍ? ຂ້ອຍພໍໃຈກັບສິ່ງທີ່ມີບໍ ຫຼືຂ້ອຍສົນໃຈແຕ່ການຫາເງິນແລະຢາກໄດ້ຊັບສົມບັດຫຼາຍຂຶ້ນ?’—1ຕມ. 6:6, 17-19
8. ການ “ຮູ້ຈັກຄວບຄຸມໂຕເອງ” ໝາຍຄວາມວ່າແນວໃດ?
8 ຖ້າເຈົ້າ “ຮູ້ຈັກຄວບຄຸມໂຕເອງ” ເຈົ້າກໍເປັນຄົນທີ່ມີຄວາມສົມດຸນໃນທຸກເລື່ອງຂອງຊີວິດ. ຕົວຢ່າງເຊັ່ນ: ເຈົ້າຈະບໍ່ກິນຫຼືດື່ມຫຼາຍໂພດ ເຈົ້າຈະນຸ່ງເຄື່ອງແລະແຕ່ງໂຕໃນແບບທີ່ເໝາະສົມ ແລະເຈົ້າຈະເລືອກການພັກຜ່ອນຢ່ອນໃຈທີ່ດີງາມ. ເຈົ້າຈະບໍ່ຕົກເປັນທາດຂອງສິ່ງທີ່ຄົນໃນໂລກນີ້ນິຍົມ. (ລກ. 21:34; ຢກບ. 4:4) ເຈົ້າຈະໃຈເຢັນ ເຖິງວ່າມີຄົນເຮັດບໍ່ດີຕໍ່ເຈົ້າ. ເຈົ້າຈະ “ບໍ່ເປັນຄົນຂີ້ເຫຼົ້າ” ແລະບໍ່ມີຊື່ສຽງວ່າເປັນຄົນທີ່ດື່ມຫຼາຍໂພດ. ໃຫ້ຖາມໂຕເອງວ່າ: ‘ວິທີທີ່ຂ້ອຍໃຊ້ຊີວິດສະແດງໃຫ້ເຫັນບໍວ່າຂ້ອຍຮູ້ຈັກຄວບຄຸມໂຕເອງ?’
9. ການ “ມີສະຕິຮອບຄອບ” ແລະເປັນຄົນທີ່ “ມີລະບຽບ” ໝາຍຄວາມວ່າແນວໃດ?
9 ຖ້າເຈົ້າ “ມີສະຕິຮອບຄອບ” ເຈົ້າຈະຄິດເຖິງຫຼັກການໃນຄຳພີໄບເບິນເມື່ອເຈິກັບສະຖານະການຕ່າງໆໃນຊີວິດ. ເຈົ້າຈະຄິດຢ່າງເລິກເຊິ່ງວ່າຈະເອົາຫຼັກການເຫຼົ່ານີ້ໄປໃຊ້ກັບເລື່ອງນັ້ນແນວໃດ ເຊິ່ງການເຮັດແບບນີ້ຈະຊ່ວຍເຈົ້າໃຫ້ມີຄວາມເຂົ້າໃຈຫຼາຍຂຶ້ນແລະຕັດສິນໃຈໄດ້ຢ່າງສະຫຼາດ. ເຈົ້າຈະບໍ່ຟ້າວຕັດສິນໃຈໂດຍອາໄສຂໍ້ມູນພຽງເລັກນ້ອຍ ແຕ່ເຈົ້າຈະຊອກຫາຂໍ້ມູນທຸກຢ່າງໃຫ້ຄົບຖ້ວນກ່ອນ. (ສພສ. 18:13) ເມື່ອເຮັດແບບນີ້ ເຈົ້າຈະຕັດສິນໃຈຢ່າງສະຫຼາດເຊິ່ງສະແດງໃຫ້ເຫັນວ່າເຈົ້າພະຍາຍາມຄິດຄືກັບພະເຢໂຫວາ. ຖ້າເຈົ້າເປັນຄົນ “ມີລະບຽບ” ເຈົ້າຈະເຮັດສິ່ງຕ່າງໆຢ່າງເປັນລະບຽບແລະກົງຕໍ່ເວລາ. ທຸກຄົນຈະເຫັນວ່າເຈົ້າເປັນຄົນທີ່ໄວ້ໃຈໄດ້ແລະເຮັດຕາມຄຳແນະນຳເມື່ອຜູ້ເບິ່ງແຍງໃຫ້ເຈົ້າເຮັດວຽກບາງຢ່າງ. ຄຸນສົມບັດເຫຼົ່ານີ້ເຮັດໃຫ້ເຈົ້າມີຊື່ສຽງທີ່ດີ. ຕອນນີ້ເຮົາຈະມາເບິ່ງຄຸນສົມບັດຂອງຜູ້ເບິ່ງແຍງທີ່ຄຳພີໄບເບິນເວົ້າເຖິງສຳລັບການເປັນຫົວໜ້າຄອບຄົວທີ່ດີ.
ເປັນຫົວໜ້າຄອບຄົວທີ່ດີ
10. ພີ່ນ້ອງຊາຍຈະ “ນຳໜ້າຄອບຄົວຂອງໂຕເອງຢ່າງດີ” ໄດ້ແນວໃດ?
10 ຖ້າເຈົ້າເປັນຜົວແລະຢາກເປັນຜູ້ເບິ່ງແຍງ ຄອບຄົວຂອງເຈົ້າຕ້ອງມີຊື່ສຽງທີ່ດີນຳ. ດັ່ງນັ້ນ ເຈົ້າຕ້ອງ “ນຳໜ້າຄອບຄົວຂອງໂຕເອງຢ່າງດີ.” ນີ້ໝາຍຄວາມວ່າເຈົ້າຕ້ອງມີຊື່ສຽງວ່າເປັນຫົວໜ້າຄອບຄົວທີ່ມີຄວາມຮັກແລະມີຄວາມຮັບຜິດຊອບ. ເລື່ອງນີ້ລວມເຖິງການນຳໜ້າຄອບຄົວໃນການນະມັດສະການພະເຢໂຫວາ. ເປັນຫຍັງເລື່ອງນີ້ຈຶ່ງສຳຄັນ? ໂປໂລຫາເຫດຜົນວ່າ: “ຖ້າຜູ້ຊາຍຄົນໃດບໍ່ຮູ້ຈັກນຳໜ້າຄອບຄົວຂອງໂຕເອງ ລາວຈະເບິ່ງແຍງປະຊາຄົມຂອງພະເຈົ້າໄດ້ແນວໃດ?”—1ຕມ. 3:5
11-12. ເປັນຫຍັງການປະພຶດຂອງລູກຈຶ່ງສົ່ງຜົນຕໍ່ພີ່ນ້ອງຊາຍທີ່ຈະເປັນຜູ້ເບິ່ງແຍງ? (ເບິ່ງຮູບນຳ)
11 ຖ້າເຈົ້າເປັນພໍ່ ເຈົ້າຕ້ອງ “ມີລູກທີ່ເຊື່ອຟັງແລະປະພຶດໂຕດີ.” ເຈົ້າຕ້ອງຝຶກແລະສອນລູກດ້ວຍຄວາມຮັກ. ແນ່ນອນວ່າເຈົ້າຢາກໃຫ້ລູກມີຄວາມສຸກແລະໄດ້ຫຼິ້ນໄດ້ຫົວຢ່າງມ່ວນຊື່ນຄືກັບເດັກນ້ອຍຄົນອື່ນ. ແຕ່ເຈົ້າກໍຕ້ອງສອນລູກຢ່າງດີເພື່ອເຂົາເຈົ້າຈະເຊື່ອຟັງ ນັບຖືຄົນອື່ນ ແລະປະພຶດໂຕດີ. ນອກຈາກນັ້ນ ເຈົ້າຕ້ອງພະຍາຍາມເຕັມທີເພື່ອຊ່ວຍລູກໃຫ້ສະໜິດກັບພະເຢໂຫວາ ໃຊ້ຊີວິດຕາມຫຼັກການໃນຄຳພີໄບເບິນ ແລະກ້າວໜ້າຈົນເຖິງຂັ້ນຮັບບັບເຕມາ.
12 “ມີລູກທີ່ມີຄວາມເຊື່ອແລະບໍ່ມີຊື່ສຽງວ່າເປັນຄົນທີ່ໃຊ້ຊີວິດຕາມໃຈໂຕເອງຫຼືເປັນຄົນດື້ດ້ານ.” ຖ້າລູກທີ່ຮັບບັບເຕມາແລ້ວຫຼືກ້າວໜ້າຈົນເຖິງຂັ້ນຈະຮັບບັບເຕມາໄດ້ເຮັດຜິດຮ້າຍແຮງ ເລື່ອງນີ້ຈະສົ່ງຜົນແນວໃດຕໍ່ຜູ້ເປັນພໍ່? ຖ້າພໍ່ບໍ່ບອກບໍ່ສອນລູກ ລາວກໍອາດຈະບໍ່ໄດ້ເປັນຜູ້ເບິ່ງແຍງ.—ເບິ່ງຫໍສັງເກດການ 15 ຕຸລາ 1996 ໜ້າ 21 ຂໍ້ 6-7. (ພາສາໄທ)
ພໍ່ສອນລູກໃຫ້ເຮັດສິ່ງດີໆເພື່ອພະເຢໂຫວາແລະເພື່ອພີ່ນ້ອງໃນປະຊາຄົມ (ເບິ່ງຂໍ້ 11)
ຮັບໃຊ້ປະຊາຄົມ
13. ເຈົ້າຈະສະແດງໃຫ້ເຫັນແນວໃດວ່າເປັນຄົນ “ມີເຫດຜົນ” ແລະ “ບໍ່ເອົາຄວາມຄິດຂອງໂຕເອງເປັນໃຫຍ່”?
13 ພີ່ນ້ອງຊາຍທີ່ມີຄຸນລັກສະນະທີ່ດີຕາມທີ່ບອກໄວ້ໃນຄຳພີໄບເບິນມີຄ່າຫຼາຍຕໍ່ປະຊາຄົມ. ຄົນທີ່ “ມີເຫດຜົນ” ຈະພະຍາຍາມສ້າງສັນຕິສຸກແລະຊ່ວຍຄົນອື່ນໃຫ້ມີສັນຕິສຸກຕໍ່ກັນ. ຄົນທີ່ມີເຫດຜົນຈະຟັງແລະພະຍາຍາມເຂົ້າໃຈຄວາມຮູ້ສຶກຂອງຄົນອື່ນນຳ. ຕົວຢ່າງເຊັ່ນ: ຕອນທີ່ຄະນະຜູ້ເບິ່ງແຍງປະຊຸມກັນ. ຖ້າຜູ້ເບິ່ງແຍງສ່ວນຫຼາຍເຫັນດີກັບການຕັດສິນໃຈທີ່ສອດຄ່ອງກັບຫຼັກການໃນຄຳພີໄບເບິນ ເຈົ້າຈະສະໜັບສະໜູນການຕັດສິນໃຈນັ້ນບໍເຖິງວ່າເຈົ້າບໍ່ເຫັນດີນຳ? ການ “ບໍ່ເອົາຄວາມຄິດຂອງໂຕເອງເປັນໃຫຍ່” ໝາຍຄວາມວ່າເຈົ້າຈະບໍ່ຮຽກຮ້ອງໃຫ້ຄົນອື່ນເຮັດຕາມທີ່ເຈົ້າຕ້ອງການ ແຕ່ເຈົ້າຈະເຫັນຄ່າແລະຟັງຄຳຄິດເຫັນຂອງຄົນອື່ນ. (ປຖກ. 13:8, 9; ສພສ. 15:22) ເຈົ້າຈະ “ບໍ່ເປັນຄົນມັກຜິດຖຽງ” ຫຼື “ບໍ່ໃຈຮ້າຍງ່າຍ.” ນີ້ໝາຍຄວາມວ່າເຈົ້າຈະບໍ່ເວົ້າແຮງໆຫຼືບໍ່ຜິດຖຽງກັບຄົນອື່ນ ແຕ່ຈະເວົ້າແບບອ່ອນໂຍນແລະມີເຫດມີຜົນ. ຖ້າເຈົ້າເປັນຄົນມີສັນຕິສຸກ ເຈົ້າຈະເປັນຝ່າຍເລີ່ມສ້າງສັນຕິສຸກກັບຄົນອື່ນແມ່ນແຕ່ໃນສະຖານະການທີ່ເຄັ່ງຕຶງ. (ຢກບ. 3:17, 18) ຄຳເວົ້າທີ່ອ່ອນໂຍນຂອງເຈົ້າສາມາດເຮັດໃຫ້ຄົນອື່ນໃຈເຢັນລົງລວມທັງຄົນທີ່ຕໍ່ຕ້ານນຳ.—ຜຕສ. 8:1-3; ສພສ. 20:3; 25:15; ມທ. 5:23, 24
14. “ບໍ່ແມ່ນຄົນທີ່ຫາກໍເຂົ້າມາເຊື່ອ” ແລະຄົນທີ່ “ພັກດີ” ໝາຍຄວາມວ່າແນວໃດ?
14 ພີ່ນ້ອງຊາຍທີ່ຈະເປັນຜູ້ເບິ່ງແຍງຕ້ອງ “ບໍ່ແມ່ນຄົນທີ່ຫາກໍເຂົ້າມາເຊື່ອ.” ນີ້ບໍ່ໄດ້ໝາຍຄວາມວ່າເຈົ້າຕ້ອງຮັບບັບເຕມາຫຼາຍໆປີຈຶ່ງຈະເປັນຜູ້ເບິ່ງແຍງໄດ້ ແຕ່ເຈົ້າຕ້ອງໃຊ້ເວລາເພື່ອຈະເປັນຜູ້ໃຫຍ່ທາງຄວາມເຊື່ອ. ກ່ອນທີ່ເຈົ້າຈະຖືກແຕ່ງຕັ້ງໃຫ້ເປັນຜູ້ເບິ່ງແຍງ ເຈົ້າຕ້ອງສະແດງໃຫ້ເຫັນວ່າເຈົ້າເປັນຄືກັບພະເຢຊູໂດຍເປັນຄົນຖ່ອມແລະພ້ອມທີ່ຈະລໍຖ້າພະເຢໂຫວາເອົາວຽກມອບໝາຍໃນປະຊາຄົມໃຫ້ເຈົ້າ. (ມທ. 20:23; ຟລປ. 2:5-8) ເຈົ້າເປັນຄົນ “ພັກດີ” ເມື່ອເຈົ້າສັດຊື່ຕໍ່ພະເຢໂຫວາໂດຍໃຊ້ຊີວິດຕາມມາດຕະຖານຂອງເພິ່ນແລະເຮັດຕາມການຊີ້ນຳຂອງເພິ່ນທີ່ໃຫ້ຜ່ານທາງອົງການ.—1ຕມ. 4:15
15. ຜູ້ເບິ່ງແຍງຕ້ອງບັນລະຍາຍເກັ່ງບໍ? ຂໍໃຫ້ອະທິບາຍ.
15 ຄຳພີໄບເບິນບອກຈະແຈ້ງວ່າຜູ້ເບິ່ງແຍງຕ້ອງ “ມີຄວາມສາມາດໃນການສອນ.” ນີ້ໝາຍຄວາມວ່າເຈົ້າຕ້ອງບັນລະຍາຍເກັ່ງບໍ? ບໍ່ແມ່ນ. ຜູ້ເບິ່ງແຍງທີ່ດີຫຼາຍຄົນເຖິງວ່າຈະບັນລະຍາຍບໍ່ເກັ່ງ ແຕ່ເຂົາເຈົ້າກໍສອນໄດ້ດີໃນການປະກາດແລະຕອນໄປໃຫ້ກຳລັງໃຈພີ່ນ້ອງ. (1ຕມ. 3:2 ສົມທຽບກັບ 1 ໂກຣິນໂທ 12:28, 29 ແລະເອເຟໂຊ 4:11) ເຖິງວ່າເຈົ້າບັນລະຍາຍບໍ່ເກັ່ງ ແຕ່ເຈົ້າຕ້ອງພະຍາຍາມຕໍ່ໆໄປທີ່ຈະປັບປຸງຄວາມສາມາດໃນການເປັນຜູ້ສອນທີ່ດີ. ເຈົ້າຈະເຮັດແບບນັ້ນໄດ້ແນວໃດ?
16. ເຈົ້າຈະເປັນຜູ້ສອນທີ່ດີໄດ້ແນວໃດ? (ເບິ່ງຮູບນຳ)
16 “ຍຶດໝັ້ນກັບຖ້ອຍຄຳທີ່ເປັນຄວາມຈິງ.” ເພື່ອຈະເປັນຜູ້ສອນທີ່ດີ ຄຳສອນແລະຄຳແນະນຳຂອງເຈົ້າຕ້ອງມາຈາກຄຳພີໄບເບິນ. ເຈົ້າຕ້ອງໝັ່ນສຶກສາຄຳພີໄບເບິນແລະປຶ້ມຕ່າງໆຂອງອົງການ. (ສພສ. 15:28; 16:23; ຕຕ. 1:9) ຕອນທີ່ເຈົ້າສຶກສາ ໃຫ້ສັງເກດເບິ່ງດີໆວ່າຈະເອົາຫຼັກການໃນຄຳພີໄບເບິນໄປໃຊ້ຢ່າງຖືກຕ້ອງໄດ້ແນວໃດ. ຕອນທີ່ສອນ ໃຫ້ເຈົ້າພະຍາຍາມຊ່ວຍຜູ້ທີ່ເຈົ້າສອນໃຫ້ຮັກພະເຢໂຫວາຫຼາຍຂຶ້ນແລະກະຕຸ້ນເຂົາເຈົ້າໃຫ້ເອົາສິ່ງທີ່ໄດ້ຮຽນໄປໃຊ້. ເຈົ້າຈະເປັນຜູ້ສອນທີ່ດີຂຶ້ນຖ້າເຈົ້າຂໍຄຳແນະນຳຈາກຜູ້ເບິ່ງແຍງທີ່ມີປະສົບການແລະເຮັດຕາມຄຳແນະນຳເຫຼົ່ານັ້ນ. (1ຕມ. 5:17) ຜູ້ເບິ່ງແຍງຕ້ອງ “ສາມາດໃຫ້ກຳລັງໃຈ” ພີ່ນ້ອງໄດ້ ແຕ່ບາງເທື່ອຜູ້ເບິ່ງແຍງກໍຕ້ອງໃຫ້ຄຳແນະນຳຫຼືເຖິງຂັ້ນ “ຕັກເຕືອນ” ເຂົາເຈົ້ານຳ. ໃນກໍລະນີແບບນີ້ ຜູ້ເບິ່ງແຍງຕ້ອງເປັນຄົນອ່ອນໂຍນສະເໝີ. ຖ້າເຈົ້າເປັນຄົນອ່ອນໂຍນ ສະແດງຄວາມຮັກ ແລະສອນຈາກຄຳພີໄບເບິນ ເຈົ້າກໍຈະເປັນຜູ້ສອນທີ່ດີຍ້ອນເຈົ້າກຳລັງຮຽນແບບພະເຢຊູຄູຜູ້ຍິ່ງໃຫຍ່.—ມທ. 11:28-30; 2ຕມ. 2:24
ຜູ້ຊ່ວຍວຽກຮັບໃຊ້ໃຊ້ໂອກາດຕອນທີ່ຢູ່ກັບຜູ້ເບິ່ງແຍງທີ່ມີປະສົບການເພື່ອຮຽນຮູ້ທີ່ຈະໃຫ້ກຳລັງໃຈຄົນອື່ນໂດຍໃຊ້ຄຳພີໄບເບິນ. ລາວຍັງຝຶກຊ້ອມຄຳບັນລະຍາຍຢູ່ຕໍ່ໜ້າແວ່ນ. (ເບິ່ງຂໍ້ 16)
ພະຍາຍາມຕໍ່ໆໄປ
17. (ກ) ອັນໃດຈະຊ່ວຍຜູ້ຊ່ວຍວຽກຮັບໃຊ້ໃຫ້ພະຍາຍາມຕໍ່ໆໄປເພື່ອຈະໄດ້ເຮັດໜ້າທີ່ຜູ້ເບິ່ງແຍງ? (ຂ) ຜູ້ເບິ່ງແຍງຄວນຄິດເຖິງຫຍັງແດ່ເມື່ອພິຈາລະນາຄຸນສົມບັດຂອງພີ່ນ້ອງຊາຍທີ່ຈະຖືກແຕ່ງຕັ້ງໃຫ້ເປັນຜູ້ເບິ່ງແຍງ? (ເບິ່ງຂອບ “ ໃຫ້ເປັນຄົນມີເຫດຜົນຕອນທີ່ພິຈາລະນາຄຸນສົມບັດຂອງພີ່ນ້ອງຊາຍ”)
17 ຫຼັງຈາກໄດ້ເບິ່ງຄຸນສົມບັດຕ່າງໆຂອງການເປັນຜູ້ເບິ່ງແຍງ ຜູ້ຊ່ວຍວຽກຮັບໃຊ້ບາງຄົນອາດຮູ້ສຶກວ່າເຂົາເຈົ້າຄືຊິບໍ່ສາມາດເປັນຜູ້ເບິ່ງແຍງໄດ້ຍ້ອນມີຄຸນສົມບັດຫຼາຍຢ່າງອີ່ຫຼີທີ່ເຂົາເຈົ້າຕ້ອງມີ. ແຕ່ຂໍໃຫ້ຈື່ໄວ້ວ່າພະເຢໂຫວາແລະອົງການຂອງເພິ່ນບໍ່ໄດ້ຄາດໝາຍວ່າເຈົ້າຕ້ອງເຮັດຕາມຄຸນລັກສະນະເຫຼົ່ານີ້ໄດ້ຮ້ອຍເປີເຊັນ. (1ປຕ. 2:21) ພະເຢໂຫວາຈະໃຊ້ພະລັງບໍລິສຸດຂອງເພິ່ນເພື່ອຊ່ວຍເຈົ້າໃຫ້ສາມາດພັດທະນາຄຸນລັກສະນະເຫຼົ່ານີ້ໄດ້. (ຟລປ. 2:13) ມີຄຸນລັກສະນະໃດບໍທີ່ເຈົ້າຢາກປັບປຸງເປັນພິເສດ? ໃຫ້ອະທິດຖານຫາພະເຢໂຫວາກ່ຽວກັບເລື່ອງນີ້ ຄົ້ນຄວ້າກ່ຽວກັບຄຸນລັກສະນະນັ້ນ ແລະຂໍຄຳແນະນຳຈາກຜູ້ເບິ່ງແຍງຜູ້ໃດຜູ້ໜຶ່ງເພື່ອເຈົ້າຈະຮູ້ວິທີປັບປຸງ.
18. ຜູ້ຊ່ວຍວຽກຮັບໃຊ້ທຸກຄົນຄວນພະຍາຍາມເຮັດຫຍັງ?
18 ພີ່ນ້ອງຊາຍທຸກຄົນລວມທັງຜູ້ທີ່ເປັນຜູ້ເບິ່ງແຍງແລ້ວ ຂໍໃຫ້ຕັ້ງໃຈທີ່ຈະພັດທະນາຄຸນສົມບັດຕ່າງໆທີ່ເວົ້າເຖິງໃນບົດນີ້ຕໍ່ໆໄປ. (ຟລປ. 3:16) ເຈົ້າເປັນຜູ້ຊ່ວຍວຽກຮັບໃຊ້ບໍ? ຂໍໃຫ້ພະຍາຍາມກ້າວໜ້າຕໍ່ໆໄປ! ອະທິດຖານຂໍໃຫ້ພະເຢໂຫວາຝຶກແລະນວດປັ້ນເຈົ້າໃຫ້ເປັນຄົນທີ່ເພິ່ນສາມາດໃຊ້ວຽກໄດ້ຫຼາຍຂຶ້ນໃນປະຊາຄົມ. (ອຊຢ. 64:8) ຂໍໃຫ້ພະເຢໂຫວາອວຍພອນຄວາມພະຍາຍາມຂອງເຈົ້າທີ່ຈະມີຄຸນສົມບັດເປັນຜູ້ເບິ່ງແຍງ.
ເພງທີ 101 ເຮັດວຽກຮ່ວມກັນຢ່າງເປັນນ້ຳໜຶ່ງໃຈດຽວ
