ບົດຄວາມສຶກສາທີ 44
ເພງທີ 33 ມອບພາລະຂອງເຈົ້າໄວ້ກັບພະເຢໂຫວາ
ເຮົາຈະຮັບມືກັບຄວາມບໍ່ຍຸຕິທຳໄດ້ແນວໃດ?
“ຢ່າໃຫ້ຄວາມຊົ່ວຊະນະພວກເຈົ້າໄດ້ ແຕ່ໃຫ້ເອົາຊະນະຄວາມຊົ່ວດ້ວຍຄວາມດີ.”—ຣມ. 12:21
ຈຸດສຳຄັນ
ຮຽນຮູ້ວິທີຮັບມືກັບຄວາມບໍ່ຍຸຕິທຳໂດຍຫຼີກລ່ຽງບໍ່ເຮັດໃຫ້ເກີດບັນຫາຮ້າຍແຮງຫຼາຍກວ່າເກົ່າ.
1-2. ໃຜທີ່ອາດປະຕິບັດກັບເຮົາແບບບໍ່ຍຸຕິທຳ? ຂໍໃຫ້ອະທິບາຍ.
ພະເຢຊູໄດ້ເລົ່າຕົວຢ່າງປຽບທຽບເລື່ອງແມ່ໝ້າຍຄົນໜຶ່ງທີ່ອ້ອນວອນຂໍຜູ້ພິພາກສາເລື້ອຍໆໃຫ້ຊ່ວຍລາວຍ້ອນລາວຖືກປະຕິບັດແບບບໍ່ຍຸຕິທຳ. ແນ່ນອນວ່າພວກລູກສິດຂອງພະເຢຊູເຂົ້າໃຈດີວ່າແມ່ໝ້າຍຜູ້ນີ້ຮູ້ສຶກແນວໃດຍ້ອນໃນສະໄໝນັ້ນຫຼາຍຄົນກໍເຈິກັບຄວາມບໍ່ຍຸຕິທຳ. (ລກ. 18:1-5) ໃນທຸກມື້ນີ້ ເຮົາກໍເຂົ້າໃຈຄວາມຮູ້ສຶກຂອງແມ່ໝ້າຍຜູ້ນັ້ນຄືກັນຍ້ອນເຮົາທຸກຄົນກໍເຄີຍເຈິກັບຄວາມບໍ່ຍຸຕິທຳໃນຊີວິດ.
2 ໃນໂລກທຸກມື້ນີ້ ຫຼາຍຄົນມີອະຄະຕິ ລຳອຽງ ແລະຂົ່ມເຫງຄົນອື່ນ. ຍ້ອນແນວນີ້ເຮົາຈຶ່ງບໍ່ແປກໃຈເລີຍທີ່ຖືກປະຕິບັດແບບບໍ່ຍຸຕິທຳ. (ປຍຈ. 5:8) ເຮົາອາດບໍ່ໄດ້ຄິດວ່າພີ່ນ້ອງຮ່ວມຄວາມເຊື່ອຈະປະຕິບັດກັບເຮົາແບບບໍ່ຍຸຕິທຳ ແຕ່ຄວາມຈິງກໍຄືເລື່ອງແບບນີ້ເກີດຂຶ້ນໄດ້. ແນ່ນອນວ່າພີ່ນ້ອງຂອງເຮົາບໍ່ແມ່ນຜູ້ທີ່ຕໍ່ຕ້ານເຮົາ ເຂົາເຈົ້າເປັນພຽງຄົນທີ່ບໍ່ສົມບູນແບບ. ເຮົາສາມາດຮຽນຮູ້ຈາກວິທີທີ່ພະເຢຊູຮັບມືກັບຄວາມບໍ່ຍຸຕິທຳທີ່ເກີດຈາກພວກຜູ້ຕໍ່ຕ້ານ. ຖ້າເຮົາສາມາດອົດທົນກັບຄວາມບໍ່ຍຸຕິທຳທີ່ເກີດຈາກຄົນທີ່ຕໍ່ຕ້ານເຮົາ ເຮົາກໍແຮ່ງຕ້ອງອົດທົນກັບພີ່ນ້ອງແມ່ນບໍ? ພະເຢໂຫວາຮູ້ສຶກແນວໃດເມື່ອຄົນອື່ນຫຼືພີ່ນ້ອງເຮັດກັບເຮົາແບບບໍ່ຍຸຕິທຳ? ເພິ່ນສົນໃຈສິ່ງທີ່ເກີດຂຶ້ນກັບເຮົາບໍ?
3. ພະເຢໂຫວາສົນໃຈກ່ຽວກັບຄວາມບໍ່ຍຸຕິທຳທີ່ເຮົາເຈິບໍ ແລະເຮົາຮູ້ໄດ້ແນວໃດ?
3 ພະເຢໂຫວາສົນໃຈແທ້ໆວ່າເຮົາຖືກປະຕິບັດແນວໃດ ຍ້ອນ “ພະເຢໂຫວາຮັກຄວາມຍຸຕິທຳ.” (ພສ. 37:28) ພະເຢຊູຮັບຮອງກັບເຮົາວ່າ ພະເຢໂຫວາ “ຈະໃຫ້ຄວາມຍຸຕິທຳ . . . ທັນທີ” ເມື່ອຮອດເວລາ. (ລກ. 18:7, 8) ອີກບໍ່ດົນ ພະເຢໂຫວາຈະກຳຈັດຄວາມທຸກລຳບາກທຸກຢ່າງທີ່ເຮົາເຈິໃຫ້ໝົດໄປ ແລະເພິ່ນຈະບໍ່ຍອມໃຫ້ເຮົາທົນທຸກກັບຄວາມບໍ່ຍຸຕິທຳອີກຕໍ່ໄປ.—ພສ. 72:1, 2
4. ໃນທຸກມື້ນີ້ ພະເຢໂຫວາຊ່ວຍເຮົາແນວໃດໃຫ້ຮູ້ວິທີຮັບມືກັບຄວາມບໍ່ຍຸຕິທຳ?
4 ຕອນທີ່ເຮົາລໍຖ້າໃຫ້ຮອດເວລາທີ່ພະເຢໂຫວາຈະເຮັດໃຫ້ທົ່ວໂລກມີແຕ່ຄວາມຍຸຕິທຳ ເພິ່ນກໍຊ່ວຍເຮົາໃຫ້ຮູ້ວິທີຮັບມືກັບຄວາມບໍ່ຍຸຕິທຳທີ່ເຮົາເຈິໃນຕອນນີ້. (2ປຕ. 3:13) ເພິ່ນສອນເຮົາໃຫ້ຫຼີກລ່ຽງການເຮັດສິ່ງທີ່ບໍ່ສະຫຼາດເມື່ອຖືກປະຕິບັດແບບບໍ່ຍຸຕິທຳ. ວິທີໜຶ່ງທີ່ພະເຢໂຫວາສອນເຮົາແມ່ນ ເພິ່ນໃຫ້ຂຽນໄວ້ໃນຄຳພີໄບເບິນວ່າພະເຢຊູເຮັດແນວໃດຕອນທີ່ຖືກປະຕິບັດແບບບໍ່ຍຸຕິທຳ. ພະເຢໂຫວາຍັງໃຫ້ຄຳແນະນຳໃນຄຳພີໄບເບິນວ່າເຮົາຕ້ອງເຮັດຈັ່ງໃດເມື່ອຖືກປະຕິບັດແບບບໍ່ຍຸຕິທຳ.
ລະວັງສິ່ງທີ່ເຮົາເຮັດຕອນທີ່ຖືກປະຕິບັດແບບບໍ່ຍຸຕິທຳ
5. ເມື່ອຖືກປະຕິບັດແບບບໍ່ຍຸຕິທຳ ເປັນຫຍັງເຮົາຕ້ອງລະວັງວິທີທີ່ເຮົາຕອບໂຕ້?
5 ເຮົາອາດຮູ້ສຶກເສຍໃຈຫຼາຍແລະທຸກໃຈເມື່ອຖືກປະຕິບັດແບບບໍ່ຍຸຕິທຳ. (ປຍຈ. 7:7) ໂຢບແລະຮາບາກຸກທີ່ເປັນຜູ້ຮັບໃຊ້ທີ່ສັດຊື່ກໍຮູ້ສຶກແບບນັ້ນຄືກັນ. (ໂຢບ 6:2, 3; ຮບກ. 1:1-3) ເຖິງວ່າເປັນເລື່ອງປົກກະຕິທີ່ເຮົາອາດຮູ້ສຶກແບບນີ້ ແຕ່ເຮົາຕ້ອງລະວັງວິທີທີ່ເຮົາຕອບໂຕ້ເພື່ອຈະບໍ່ເຮັດສິ່ງທີ່ຜິດ.
6. ຕົວຢ່າງຂອງອັບຊາໂລມສອນຫຍັງເຮົາ? (ເບິ່ງຮູບນຳ)
6 ເມື່ອເຮົາຫຼືຄົນທີ່ເຮົາຮັກຖືກປະຕິບັດແບບບໍ່ຍຸຕິທຳ ເຮົາອາດຢາກຈັດການເລື່ອງນັ້ນດ້ວຍໂຕເອງ. ແຕ່ການເຮັດແບບນັ້ນອາດເຮັດໃຫ້ເລື່ອງຮ້າຍແຮງຫຼາຍກວ່າເກົ່າ. ໃຫ້ເຮົາມາເບິ່ງຕົວຢ່າງຂອງອັບຊາໂລມລູກຊາຍຂອງກະສັດດາວິດ. ລາວຄຽດແຄ້ນຫຼາຍຕອນທີ່ຕາມານ້ອງສາວຂອງລາວຖືກອຳໂນນທີ່ເປັນອ້າຍຄົນລະແມ່ຂົ່ມຂືນ. ຕາມກົດໝາຍຂອງໂມເຊ ອຳໂນນມີໂທດເຖິງຕາຍຍ້ອນສິ່ງທີ່ລາວເຮັດ. (ລລວ. 20:17) ເຖິງວ່າອັບຊາໂລມມີສິດທີ່ຈະໃຈຮ້າຍຂະໜາດນັ້ນ ແຕ່ລາວບໍ່ມີສິດທີ່ຈະຈັດການເລື່ອງນັ້ນດ້ວຍໂຕເອງໂດຍຂ້າອຳໂນນ.—2ຊມ. 13:20-23, 28, 29
ອັບຊາໂລມບໍ່ໄດ້ຄວບຄຸມຄວາມໃຈຮ້າຍຂອງໂຕເອງຕອນທີ່ຕາມານ້ອງສາວຂອງລາວຖືກຂົ່ມຂືນ (ເບິ່ງຂໍ້ 6)
7. ເມື່ອຜູ້ຂຽນເພງສັນລະເສີນຄົນໜຶ່ງເຫັນຄວາມບໍ່ຍຸຕິທຳ ລາວຮູ້ສຶກແນວໃດຕອນທຳອິດ?
7 ເມື່ອຄົນທີ່ເຮັດຜິດບໍ່ໄດ້ຖືກລົງໂທດ ເຮົາອາດສົງໄສວ່າການເຮັດສິ່ງທີ່ຖືກຕ້ອງກະມີປະໂຫຍດຢູ່ບໍ. ຜູ້ຂຽນເພງສັນລະເສີນຄົນໜຶ່ງສັງເກດເຫັນວ່າຄົນດີຖືກຄົນຊົ່ວເຮັດແນວບໍ່ດີໃຫ້ ແຕ່ຄົນຊົ່ວກໍເບິ່ງຄືວ່າມີຊີວິດທີ່ມີຄວາມສຸກ. ລາວເວົ້າວ່າ: “ຄົນຊົ່ວກໍເປັນແນວນີ້ແຫຼະ ອີ່ຫຍັງກໍງ່າຍໝົດສຳລັບເຂົາເຈົ້າ.” (ພສ. 73:12) ລາວທຸກໃຈຫຼາຍທີ່ເຫັນຄວາມບໍ່ຍຸຕິທຳຈົນເກືອບຄິດວ່າການຮັບໃຊ້ພະເຢໂຫວາບໍ່ມີປະໂຫຍດຫຍັງເລີຍ. ລາວເວົ້າວ່າ: “ເມື່ອລູກພະຍາຍາມເຂົ້າໃຈເລື່ອງນີ້ ລູກກໍທຸກໃຈຫຼາຍ.” (ພສ. 73:14, 16) ແລ້ວລາວກໍເວົ້າວ່າ: “ລູກເກືອບຈະເຈີດອອກຈາກທາງໄປແລ້ວ. ມັນເປັນຄືກັບວ່າລູກກຳລັງຈະມື່ນລົ້ມ.” (ພສ. 73:2) ພີ່ນ້ອງຊາຍຊື່ອາເບີໂຕ້ aກໍເຄີຍເຈິເລື່ອງຄ້າຍໆກັນນີ້.
8. ພີ່ນ້ອງຊາຍຄົນໜຶ່ງໄດ້ເຈິກັບຄວາມບໍ່ຍຸຕິທຳຫຍັງ ແລະມັນສົ່ງຜົນຕໍ່ລາວແນວໃດ?
8 ອາເບີໂຕ້ຖືກກ່າວຫາແບບຜິດໆວ່າລັກເງິນຂອງປະຊາຄົມ. ຍ້ອນແນວນີ້ລາວຈຶ່ງສູນເສຍສິດທິພິເສດບໍ່ໄດ້ເປັນຜູ້ເບິ່ງແຍງ ແລະພີ່ນ້ອງຫຼາຍຄົນໃນປະຊາຄົມທີ່ຮູ້ເລື່ອງນີ້ກໍເຊົານັບຖືລາວ. ລາວເວົ້າວ່າ: “ຂ້ອຍຮູ້ສຶກຄຽດແຮງ ໃຈຮ້າຍ ແລະເສຍໃຈຫຼາຍ.” ລາວປ່ອຍໃຫ້ຄວາມຮູ້ສຶກນີ້ສົ່ງຜົນຕໍ່ສາຍສຳພັນຂອງລາວກັບພະເຢໂຫວາຈົນເຊົາໄປປະຊຸມແລະເຊົາໄປປະກາດເປັນເວລາ 5 ປີ. ປະສົບການນີ້ເປັນຕົວຢ່າງໃຫ້ເຫັນວ່າອາດເກີດຫຍັງຂຶ້ນຖ້າເຮົາບໍ່ຄວບຄຸມຄວາມໃຈຮ້າຍຕອນທີ່ຖືກປະຕິບັດແບບບໍ່ຍຸຕິທຳ.
ຮຽນແບບວິທີທີ່ພະເຢຊູຮັບມືກັບຄວາມບໍ່ຍຸຕິທຳ
9. ພະເຢຊູຕ້ອງອົດທົນກັບຄວາມບໍ່ຍຸຕິທຳຫຍັງແດ່? (ເບິ່ງຮູບນຳ)
9 ພະເຢຊູເປັນຕົວຢ່າງທີ່ດີໃຫ້ເຮົາໃນການຮັບມືກັບຄວາມບໍ່ຍຸຕິທຳ. ໃຫ້ເຮົາມາເບິ່ງວ່າພະເຢຊູເຈິກັບຄວາມບໍ່ຍຸຕິທຳຫຍັງແດ່ຈາກຄົນໃນຄອບຄົວແລະຈາກຄົນອື່ນ. ຄົນໃນຄອບຄົວຂອງພະເຢຊູເວົ້າໃຫ້ເພິ່ນວ່າເປັນບ້າ ພວກຫົວໜ້າສາສະໜາກໍກ່າວຫາວ່າເພິ່ນເປັນພວກດຽວກັນກັບພວກປີສາດ ແລະພວກທະຫານໂຣມກໍເຍາະເຍີ້ຍເພິ່ນ ຕີເພິ່ນ ແລ້ວກໍຂ້າເພິ່ນ. (ມຣກ. 3:21, 22; 14:55; 15:16-20, 35-37) ເຖິງຈະເປັນແນວນັ້ນ ພະເຢຊູກໍອົດທົນກັບຄວາມບໍ່ຍຸຕິທຳທັງໝົດໂດຍບໍ່ໄດ້ຕອບໂຕ້ຄືນ. ເຮົາຈະຮຽນແບບພະເຢຊູແນວໃດໃນເລື່ອງນີ້?
ພະເຢຊູວາງຕົວຢ່າງທີ່ດີໃນການຮັບມືກັບຄວາມບໍ່ຍຸຕິທຳ (ເບິ່ງຂໍ້ 9-10)
10. ພະເຢຊູຮັບມືກັບຄວາມບໍ່ຍຸຕິທຳແນວໃດ? (1 ເປໂຕ 2:21-23)
10 ອ່ານ 1 ເປໂຕ 2:21-23. b ພະເຢຊູເປັນຕົວຢ່າງທີ່ດີຫຼາຍໃຫ້ເຮົາໃນເລື່ອງການຮັບມືກັບຄວາມບໍ່ຍຸຕິທຳ. ເພິ່ນຮູ້ວ່າຕອນໃດຄວນມິດແລະຕອນໃດຄວນເວົ້າ. (ມທ. 26:62-64) ຕອນທີ່ມີຄົນເວົ້າໃສ່ຮ້າຍເພິ່ນໃນເລື່ອງທີ່ບໍ່ແມ່ນຄວາມຈິງ ເພິ່ນກໍບໍ່ຕອບຫຍັງ. (ມທ. 11:19) ເມື່ອເພິ່ນຕ້ອງເວົ້າ ເພິ່ນກໍບໍ່ໄດ້ເວົ້າດູຖູກຄົນທີ່ຂົ່ມເຫງເພິ່ນຫຼືບໍ່ໄດ້ຂົ່ມຂູ່ເຂົາເຈົ້າ. ພະເຢຊູຄວບຄຸມຄຳເວົ້າຂອງເພິ່ນໄດ້ສະເໝີ ຍ້ອນເພິ່ນ “ຝາກໂຕເອງໄວ້ກັບພະເຈົ້າທີ່ຕັດສິນຢ່າງຍຸຕິທຳ.” ພະເຢຊູຮູ້ວ່າພະເຢໂຫວາເຫັນທີ່ເພິ່ນຖືກປະຕິບັດແບບບໍ່ຍຸຕິທຳ ແລະເພິ່ນໝັ້ນໃຈວ່າພະເຢໂຫວາຈະຈັດການກັບເລື່ອງນັ້ນໃນເວລາທີ່ເໝາະສົມ.
11. ເຮົາຈະຄວບຄຸມຄຳເວົ້າຂອງໂຕເອງແນວໃດແດ່? (ເບິ່ງຮູບນຳ)
11 ເມື່ອເຮົາຖືກປະຕິບັດແບບບໍ່ຍຸຕິທຳ ເຮົາສາມາດຮຽນແບບພະເຢຊູໄດ້ໂດຍຄວບຄຸມຄຳເວົ້າຂອງເຮົາ. ເລື່ອງບໍ່ດີບາງຢ່າງທີ່ເຮົາເຈິອາດເປັນເລື່ອງເລັກນ້ອຍແລະເຮົາສາມາດເບິ່ງຂ້າມໄດ້ ຫຼືເຮົາອາດມິດຢູ່ເພື່ອຈະບໍ່ເວົ້າສິ່ງທີ່ອາດເຮັດໃຫ້ສະຖານະການຮ້າຍແຮງກວ່າເກົ່າ. (ປຍຈ. 3:7; ຢກບ. 1:19, 20) ແຕ່ບາງເທື່ອເຮົາອາດຈຳເປັນຕ້ອງເວົ້າເມື່ອເຫັນວ່າບາງຄົນຖືກປະຕິບັດແບບບໍ່ຍຸຕິທຳ ຫຼືອາດຕ້ອງເວົ້າເພື່ອປົກປ້ອງຄວາມເຊື່ອຂອງເຮົາ. (ກຈກ. 6:1, 2) ຕອນທີ່ເຮົາເວົ້າ ເຮົາຄວນພະຍາຍາມເຕັມທີທີ່ຈະເວົ້າແບບໃຈເຢັນໆແລະເວົ້າດ້ວຍຄວາມນັບຖື.—1ປຕ. 3:15 c
ເມື່ອເຮົາຖືກປະຕິບັດແບບບໍ່ຍຸຕິທຳ ເຮົາຄວນຮຽນແບບພະເຢຊູໂດຍຄິດຢ່າງຮອບຄອບວ່າຈະເວົ້າຕອນໃດແລະຈະເວົ້າແນວໃດ (ເບິ່ງຂໍ້ 11-12)
12. ເຮົາຈະຝາກໂຕເອງໄວ້ກັບ “ພະເຈົ້າທີ່ຕັດສິນຢ່າງຍຸຕິທຳ” ໄດ້ແນວໃດ?
12 ເຮົາຍັງສາມາດຮຽນແບບພະເຢຊູໄດ້ໂດຍຝາກໂຕເອງໄວ້ກັບ “ພະເຈົ້າທີ່ຕັດສິນຢ່າງຍຸຕິທຳ.” ເມື່ອມີຄົນເຮັດບໍ່ດີຕໍ່ເຮົາ ຫຼືຕັດສິນເຮົາແບບບໍ່ຍຸຕິທຳ ເຮົາໝັ້ນໃຈໄດ້ວ່າພະເຢໂຫວາຮູ້ຄວາມຈິງທຸກຢ່າງ. ການໝັ້ນໃຈແບບນີ້ຊ່ວຍເຮົາໃຫ້ອົດທົນໄດ້ເມື່ອຖືກປະຕິບັດແບບບໍ່ຍຸຕິທຳຍ້ອນເຮົາຮູ້ວ່າໃນທີ່ສຸດພະເຢໂຫວາຈະແກ້ໄຂບັນຫາທັງໝົດ. ຖ້າເຮົາໄວ້ໃຈພະເຢໂຫວາແລະຝາກເລື່ອງຕ່າງໆໄວ້ກັບເພິ່ນ ເຮົາກໍຈະບໍ່ຈົມຢູ່ກັບຄວາມໃຈຮ້າຍຫຼືເກັບຄວາມຄຽດແຄ້ນໄວ້ໃນໃຈ. ຄວາມຮູ້ສຶກເຫຼົ່ານີ້ສາມາດເຮັດໃຫ້ເຮົາລົງມືເຮັດສິ່ງທີ່ບໍ່ດີ ບໍ່ມີຄວາມສຸກ ແລະທຳລາຍສາຍສຳພັນຂອງເຮົາກັບພະເຢໂຫວາ.—ພສ. 37:8
13. ຖ້າເຈົ້າຮູ້ສຶກວ່າຍາກທີ່ຈະອົດທົນກັບຄວາມບໍ່ຍຸຕິທຳ ເຈົ້າສາມາດໝັ້ນໃຈໃນເລື່ອງໃດ?
13 ແນ່ນອນວ່າເຮົາບໍ່ສາມາດເຮັດຕາມຕົວຢ່າງຂອງພະເຢຊູໄດ້ຮ້ອຍເປີເຊັນ. ບາງເທື່ອເຮົາອາດຈະເວົ້າຫຼືເຮັດສິ່ງທີ່ເຮັດໃຫ້ເຮົາຮູ້ສຶກເສຍໃຈພາຍຫຼັງ. (ຢກບ. 3:2) ບາງເທື່ອວິທີທີ່ຄົນອື່ນເຮັດກັບເຮົາແບບບໍ່ຍຸຕິທຳກໍອາດເຮັດໃຫ້ເຮົາເຈັບປວດທັງຮ່າງກາຍແລະຈິດໃຈເຊິ່ງເປັນເລື່ອງຍາກທີ່ຈະອົດທົນໄດ້. ຖ້າເລື່ອງນີ້ເກີດຂຶ້ນກັບເຈົ້າ ຂໍໃຫ້ໝັ້ນໃຈວ່າພະເຢໂຫວາຮູ້ດີວ່າເຈົ້າກຳລັງເຈິຫຍັງຢູ່ ແລະພະເຢຊູກໍເຂົ້າໃຈຄວາມຮູ້ສຶກຂອງເຈົ້າເພາະເພິ່ນກໍເຄີຍເຈັບປວດຍ້ອນຄວາມບໍ່ຍຸຕິທຳຄືກັນ. (ຮຣ. 4:15, 16) ນອກຈາກພະເຢໂຫວາຈະໃຫ້ເຮົາມີຕົວຢ່າງທີ່ດີຂອງພະເຢຊູແລ້ວ ເພິ່ນກໍຍັງໃຫ້ຄຳແນະນຳຈາກຄຳພີໄບເບິນເພື່ອຈະຊ່ວຍເຮົາໃຫ້ຮັບມືກັບຄວາມບໍ່ຍຸຕິທຳໄດ້. ໃຫ້ເຮົາມາເບິ່ງຄຳແນະນຳ 2 ຂໍ້ນຳກັນຈາກປຶ້ມໂຣມທີ່ຈະຊ່ວຍເຮົາໃນເລື່ອງນີ້.
“ປ່ອຍໃຫ້ພະເຈົ້າສະແດງຄວາມໃຈຮ້າຍຕໍ່ຜູ້ທີ່ເຮັດຜິດດີກວ່າ”
14. ການທີ່ເຮົາ “ປ່ອຍໃຫ້ພະເຈົ້າສະແດງຄວາມໃຈຮ້າຍຕໍ່ຜູ້ທີ່ເຮັດຜິດດີກວ່າ” ໝາຍຄວາມວ່າແນວໃດ? (ໂຣມ 12:19)
14 ອ່ານໂຣມ 12:19. ອັກຄະສາວົກໂປໂລກະຕຸ້ນຄລິດສະຕຽນວ່າ: “ປ່ອຍໃຫ້ພະເຈົ້າສະແດງຄວາມໃຈຮ້າຍຕໍ່ຜູ້ທີ່ເຮັດຜິດດີກວ່າ.” ເຮົາປ່ອຍໃຫ້ພະເຢໂຫວາສະແດງຄວາມໃຈຮ້າຍແທນເຮົາໂດຍໃຫ້ເພິ່ນຈັດການກັບຄວາມບໍ່ຍຸຕິທຳນັ້ນຕາມວິທີຂອງເພິ່ນແລະໃນເວລາທີ່ເພິ່ນເຫັນວ່າເໝາະສົມ. ຫຼັງຈາກພີ່ນ້ອງຊາຍທີ່ຊື່ຈອນຖືກປະຕິບັດແບບບໍ່ຍຸຕິທຳ ລາວເວົ້າວ່າ: “ຂ້ອຍຕ້ອງຕໍ່ສູ້ກັບຄວາມຮູ້ສຶກຢາກຈັດການກັບຄວາມບໍ່ຍຸຕິທຳດ້ວຍໂຕເອງ ແຕ່ໂຣມ 12:19 ໄດ້ຊ່ວຍຂ້ອຍໃຫ້ລໍຖ້າຢ່າງອົດທົນແລະໄວ້ໃຈວ່າພະເຢໂຫວາຈະຈັດການເລື່ອງນີ້.”
15. ເປັນຫຍັງການລໍຖ້າໃຫ້ພະເຢໂຫວາຈັດການກັບບັນຫາຈຶ່ງດີທີ່ສຸດ?
15 ເຮົາໄດ້ຮັບປະໂຫຍດເມື່ອເຮົາລໍຖ້າໃຫ້ພະເຢໂຫວາຈັດການກັບບັນຫາ. ຖ້າເຮັດແບບນັ້ນ ເຮົາຈະບໍ່ເຄັ່ງຕຶງແລະບໍ່ຕ້ອງແບກພາລະທີ່ຕ້ອງແກ້ບັນຫາດ້ວຍໂຕເອງ. ພະເຢໂຫວາຢາກຊ່ວຍເຮົາແທ້ໆ ມັນເປັນຄືກັບເພິ່ນກຳລັງບອກເຮົາວ່າ: ‘ປະຄວາມບໍ່ຍຸຕິທຳໄວ້ກັບພໍ່ ພໍ່ຊິຈັດການເອງ.’ ຖ້າເຮົາເຊື່ອໃນຄຳສັນຍາຂອງພະເຢໂຫວາທີ່ບອກວ່າ “ເຮົາຈະເປັນຜູ້ຕອບແທນເອງ” ເຮົາກໍຈະປ່ອຍວາງເລື່ອງນັ້ນຍ້ອນໝັ້ນໃຈວ່າພະເຢໂຫວາຈະຈັດການໃນວິທີທີ່ດີທີ່ສຸດ. ສິ່ງນີ້ໄດ້ຊ່ວຍພີ່ນ້ອງຈອນທີ່ເວົ້າເຖິງກ່ອນໜ້ານີ້ ລາວເວົ້າວ່າ: “ຖ້າຂ້ອຍລໍຖ້າໃຫ້ພະເຢໂຫວາຈັດການກັບບັນຫາ ເພິ່ນຈະເຮັດໄດ້ດີກວ່າຂ້ອຍແນ່ນອນ.”
“ໃຫ້ເອົາຊະນະຄວາມຊົ່ວດ້ວຍຄວາມດີ”
16-17. ການອະທິດຖານຊ່ວຍເຮົາແນວໃດ “ໃຫ້ເອົາຊະນະຄວາມຊົ່ວດ້ວຍຄວາມດີ”? (ໂຣມ 12:21)
16 ອ່ານໂຣມ 12:21. ໂປໂລຍັງກະຕຸ້ນຄລິດສະຕຽນ “ໃຫ້ເອົາຊະນະຄວາມຊົ່ວດ້ວຍຄວາມດີ.” ໃນຄຳບັນລະຍາຍເທິງພູຂອງພະເຢຊູ ເພິ່ນບອກວ່າ: “ໃຫ້ຮັກສັດຕູຂອງພວກເຈົ້າແລະອະທິດຖານເພື່ອຄົນທີ່ຂົ່ມເຫງພວກເຈົ້າ.” (ມທ. 5:44) ພະເຢຊູໄດ້ເຮັດແບບນັ້ນແທ້ໆ. ເຮົາອາດຄິດເຖິງຄວາມເຈັບປວດທີ່ພະເຢຊູຕ້ອງອົດທົນຕອນທີ່ພວກທະຫານໂຣມຕອກເພິ່ນໄວ້ເທິງເສົາ. ພະເຢຊູຖືກປະຕິບັດແບບໂຫດຮ້າຍອີ່ຫຼີແລະຕ້ອງທົນທຸກກັບຄວາມເຈັບປວດທໍລະມານສຸດຂີດເຊິ່ງເຮົາບໍ່ມີທາງເຂົ້າໃຈເລີຍວ່າເພິ່ນເຈັບປວດຫຼາຍສ່ຳໃດ.
17 ພະເຢຊູຍັງຮັກແລະສັດຊື່ຕໍ່ພະເຢໂຫວາຕໍ່ໆໄປເຖິງວ່າເພິ່ນຈະເຈັບປວດທໍລະມານຫຼາຍ. ແທນທີ່ພະເຢຊູຈະຂໍໃຫ້ພະເຢໂຫວາລົງໂທດພວກທະຫານ ແຕ່ເພິ່ນພັດອະທິດຖານວ່າ: “ພໍ່ເອີ້ຍ ຍົກໂທດໃຫ້ເຂົາເຈົ້າແດ່. ເຂົາເຈົ້າບໍ່ຮູ້ວ່າກຳລັງເຮັດຫຍັງຢູ່.” (ລກ. 23:34) ເມື່ອເຮົາອະທິດຖານຂໍໃຫ້ພະເຢໂຫວາຊ່ວຍຄົນທີ່ເຮັດບໍ່ດີຕໍ່ເຮົາ ມັນກໍຈະຊ່ວຍເຮົາໃຫ້ຮູ້ສຶກສະຫງົບໃຈແລະໃຈຮ້າຍໜ້ອຍລົງ ແລະອາດເຖິງຂັ້ນຊ່ວຍເຮົາໃຫ້ປ່ຽນຄວາມຮູ້ສຶກທີ່ມີຕໍ່ເຂົາເຈົ້າ.
18. ການອະທິດຖານຊ່ວຍອາເບີໂຕ້ແລະຈອນແນວໃດໃຫ້ຮັບມືກັບຄວາມບໍ່ຍຸຕິທຳ?
18 ການອະທິດຖານໄດ້ຊ່ວຍພີ່ນ້ອງຊາຍ 2 ຄົນທີ່ເວົ້າເຖິງໃນບົດນີ້ໃຫ້ຮັບມືກັບຄວາມບໍ່ຍຸຕິທຳທີ່ເຂົາເຈົ້າເຈິ. ພີ່ນ້ອງອາເບີໂຕ້ເວົ້າວ່າ: “ຂ້ອຍອະທິດຖານເພື່ອພີ່ນ້ອງທີ່ເຮັດກັບຂ້ອຍແບບບໍ່ຍຸຕິທຳ. ຂ້ອຍຂໍພະເຢໂຫວາບັກຫຼາຍໆເທື່ອເພື່ອຊ່ວຍຂ້ອຍໃຫ້ເຊົາໃຈຮ້າຍກ່ຽວກັບສິ່ງທີ່ເກີດຂຶ້ນກັບຂ້ອຍ.” ເປັນຕາດີໃຈທີ່ຕອນນີ້ອາເບີໂຕ້ໄດ້ກັບມາຮັບໃຊ້ພະເຢໂຫວາຄືນອີກ. ສ່ວນພີ່ນ້ອງຈອນກໍເວົ້າວ່າ: “ຂ້ອຍໄດ້ອະທິດຖານຫາພະເຢໂຫວາຫຼາຍເທື່ອເພື່ອຂໍໃຫ້ເພິ່ນຊ່ວຍພີ່ນ້ອງທີ່ເຮັດບໍ່ດີຕໍ່ຂ້ອຍ ແລະຂໍໃຫ້ເພິ່ນຊ່ວຍຂ້ອຍຍົກໂທດໃຫ້ລາວ. ພະເຢໂຫວາໄດ້ຊ່ວຍຂ້ອຍໃຫ້ເຊົາໃຈຮ້າຍໃຫ້ພີ່ນ້ອງຜູ້ນັ້ນແລະເຊົາຕັດສິນລາວ. ການອະທິດຖານແບບນັ້ນຍັງຊ່ວຍຂ້ອຍໃຫ້ສະຫງົບໃຈນຳ.”
19. ເຮົາຕ້ອງເຮັດຫຍັງຕໍ່ໄປຈົນກວ່າໂລກຊົ່ວນີ້ຈະເຖິງຈຸດຈົບ? (1 ເປໂຕ 3:8, 9)
19 ຈົນກວ່າໂລກຊົ່ວນີ້ຈະເຖິງຈຸດຈົບ ເຮົາອາດຖືກປະຕິບັດແບບບໍ່ຍຸຕິທຳ. ແຕ່ບໍ່ວ່າເຮົາຈະຕ້ອງອົດທົນກັບຫຍັງກໍຕາມ ຂໍຢ່າເຊົາອະທິດຖານຂໍໃຫ້ພະເຢໂຫວາຊ່ວຍ. ນອກຈາກນັ້ນ ຂໍໃຫ້ເຮົາຮຽນແບບວິທີທີ່ພະເຢຊູຮັບມືກັບຄວາມບໍ່ຍຸຕິທຳ ແລະໃຫ້ເຮົາໃຊ້ຫຼັກການໃນຄຳພີໄບເບິນຕໍ່ໆໄປ. ຖ້າເຮົາເຮັດແບບນັ້ນ ເຮົາກໍໝັ້ນໃຈໄດ້ວ່າພະເຢໂຫວາຈະອວຍພອນເຮົາແນ່ນອນ.—ອ່ານ 1 ເປໂຕ 3:8, 9
ເພງທີ 38 ພະອົງຈະເຮັດໃຫ້ເຈົ້າເຂັ້ມແຂງ
a ຊື່ສົມມຸດ.
b ໃນ 1 ເປໂຕ ບົດ 2 ແລະ 3 ເປໂຕເວົ້າເຖິງສະຖານະການທີ່ຄລິດສະຕຽນຖືກປະຕິບັດແບບບໍ່ຍຸຕິທຳຈາກພວກເຈົ້ານາຍທີ່ໂຫດຫ້ຽມແລະຈາກຜົວທີ່ມີຄວາມເຊື່ອຕ່າງກັນ.—1ປຕ. 2:18-20; 3:1-6, 8, 9
c ເບິ່ງວິດີໂອຄວາມຮັກເຮັດໃຫ້ເກີດສັນຕິສຸກແທ້ ໃນເວັບໄຊ jw.org.
