ບົດຄວາມສຶກສາທີ 21
ເຈົ້າເຫັນຄ່າຂອງຂວັນທີ່ພະເຈົ້າໃຫ້ບໍ?
“ພະເຢໂຫວາພະເຈົ້າຂອງຂ້ອຍ ພະອົງເຮັດສິ່ງມະຫັດສະຈັນຫຼາຍຢ່າງແລະມີໂຄງການຫຼາຍຢ່າງສຳລັບພວກເຮົາ.”—ເພງ. 40:5, ລ.ມ.
ເພງ 5 ຜົນງານອັນລ້ຳເລີດຂອງພະເຈົ້າ
ໃຈຄວາມສຳຄັນ *
1-2. ຕາມຄຳເພງ 40:5 ມີຂອງຂວັນຫຍັງແດ່ທີ່ພະເຢໂຫວາໃຫ້ເຮົາ ແລະເປັນຫຍັງເຮົາຕ້ອງຮຽນຮູ້ກ່ຽວກັບຂອງຂວັນນັ້ນ?
ພະເຢໂຫວາເປັນພະເຈົ້າທີ່ໃຈກວ້າງ. ຂໍໃຫ້ຄິດເຖິງຂອງຂວັນບາງຢ່າງທີ່ພະອົງໃຫ້ເຮົາ ເຊັ່ນ: ໜ່ວຍໂລກເຊິ່ງເປັນບ້ານທີ່ສວຍງາມແລະສົມບູນແບບຂອງເຮົາ ສະໝອງຂອງເຮົາທີ່ຖືກອອກແບບຢ່າງອັດສະຈັນ ແລະຄຳພີໄບເບິນເຊິ່ງເປັນຄຳເວົ້າຂອງພະເຈົ້າ. ຍ້ອນພະເຢໂຫວາໃຫ້ຂອງຂວັນ 3 ຢ່າງນີ້ກັບເຮົາ ເຮົາຈຶ່ງມີບ່ອນຢູ່ອາໄສ ສາມາດຄິດແລະສື່ສານກັບຄົນອື່ນໄດ້ ແລະສາມາດຮູ້ຄຳຕອບທີ່ສຳຄັນທີ່ສຸດໃນຊີວິດທີ່ເຮົາຢາກຮູ້.—ອ່ານຄຳເພງ 40:5 *
2 ໃນບົດຄວາມນີ້ເຮົາຈະມາຮຽນນຳກັນກ່ຽວກັບຂອງຂວັນ 3 ຢ່າງ. ແຮ່ງເຮົາຄິດຕຶກຕອງເຖິງຂອງຂວັນເຫຼົ່ານັ້ນຫຼາຍເທົ່າໃດ ເຮົາກໍແຮ່ງຈະຮູ້ຄຸນຄ່າແລະຢາກເຮັດໃຫ້ພະເຢໂຫວາທີ່ເປັນຜູ້ສ້າງທຸກສິ່ງມີຄວາມສຸກຫຼາຍຂຶ້ນ. (ພນມ. 4:11) ນອກຈາກນັ້ນ ເຮົາຍັງຈະສາມາດຫາເຫດຜົນໄດ້ດີຂຶ້ນກັບຄົນທີ່ເຊື່ອເລື່ອງວິວັດທະນາການ.
ໜ່ວຍໂລກທີ່ສວຍງາມຂອງເຮົາ
3. ເປັນຫຍັງໜ່ວຍໂລກຈຶ່ງແຕກຕ່າງຈາກດາວເຄາະດວງອື່ນໆ?
3 ສະຕິປັນຍາຂອງພະເຈົ້າເຫັນໄດ້ຈາກວິທີທີ່ພະອົງສ້າງໂລກເຊິ່ງເປັນບ້ານຂອງເຮົາ. (ຣມ. 1:20; ຮຣ. 3:4) ເຖິງວ່າໜ່ວຍໂລກຂອງເຮົາຈະບໍ່ແມ່ນດາວເຄາະດວງດຽວທີ່ປິ່ນອ້ອມດວງຕາເວັນ ແຕ່ໜ່ວຍໂລກກໍພິເສດກວ່າດາວເຄາະດວງອື່ນໆເພາະມັນມີສະພາບແວດລ້ອມທີ່ເໝາະສົມທີ່ສຸດທີ່ມະນຸດຈະດຳລົງຊີວິດຢູ່ໄດ້.
4. ເປັນຫຍັງໜ່ວຍໂລກທີ່ພະເຈົ້າສ້າງຈຶ່ງດີກວ່າເຮືອທີ່ມະນຸດສ້າງ?
4 ໃນອີກແງ່ໜຶ່ງ ໜ່ວຍໂລກຂອງເຮົາກໍຄ້າຍຄືກັບເຮືອທີ່ລອຍຢູ່ໃນມະຫາສະໝຸດອັນກວ້າງໃຫຍ່. ແຕ່ເຮືອທີ່ມະນຸດສ້າງຂຶ້ນແຕກຕ່າງກັນຫຼາຍກັບໜ່ວຍໂລກທີ່ພະເຢໂຫວາສ້າງ. ຕົວຢ່າງ: ຄົນທີ່ອາໄສໃນເຮືອຈະມີຊີວິດຢູ່ໄດ້ດົນປານໃດຖ້າພວກເຂົາຕ້ອງຜະລິດອົກຊີແຊນ ອາຫານແລະນ້ຳເອົາເອງ ແລະຖິ້ມສິ່ງເສດເຫຼືອລົງທະເລບໍ່ໄດ້? ອີກບໍ່ດົນຄົນທີ່ຢູ່ໃນເຮືອນັ້ນກໍຄືຊິຕາຍ. ກົງກັນຂ້າມ ໜ່ວຍໂລກຮອງຮັບສິ່ງທີ່ມີຊີວິດຫຼາຍພັນລ້ານຊະນິດໄດ້. ໂລກຍັງຜະລິດອົກຊີແຊນ ອາຫານ ແລະນ້ຳທັງໝົດທີ່ເຮົາຈຳເປັນຕ້ອງມີ ແລະສິ່ງເຫຼົ່ານີ້ກໍມີພຽງພໍສະເໝີແລະບໍ່ໝົດຈັກເທື່ອ ແລະສິ່ງເສດເຫຼືອກໍບໍ່ໄດ້ເອົາໄປຖິ້ມນອກອະວະກາດ ແຕ່ໂລກຂອງເຮົາກໍຍັງສວຍງາມແລະສາມາດອາໄສຢູ່ໄດ້. ເປັນແບບນັ້ນໄດ້ແນວໃດ? ພະເຢໂຫວາອອກແບບໜ່ວຍໂລກໃຫ້ສາມາດປ່ຽນສິ່ງເສດເຫຼືອໃຫ້ມາເປັນສິ່ງທີ່ດີແລະກັບມາໃຊ້ໄດ້ອີກ. ໃຫ້ເຮົາມາເບິ່ງນຳກັນກ່ຽວກັບການອອກແບບທີ່ດີເລີດ 2 ຢ່າງຄື: ວົງຈອນຂອງອົກຊີແຊນແລະວົງຈອນຂອງນ້ຳ.
5. ວົງຈອນຂອງອົກຊີແຊນເປັນແນວໃດ ແລະສິ່ງນີ້ສະແດງເຖິງຄວາມຈິງຫຍັງ?
5 ອົກຊີແຊນ. ເປັນທາດອາຍທີ່ມະນຸດແລະສັດຕ້ອງການເພື່ອຈະມີຊີວິດຢູ່ໄດ້. ມີການປະເມີນວ່າສິ່ງທີ່ມີຊີວິດຫາຍໃຈເອົາອົກຊີແຊນຫຼາຍຮ້ອຍຕື້ໂຕນຕໍ່ໜຶ່ງປີ. ໃນຂະນະດຽວກັນ ສິ່ງທີ່ມີຊີວິດເຫຼົ່ານີ້ກໍປ່ອຍອາຍກາກໂບນິກອອກມາເຊິ່ງເປັນສິ່ງເສດເຫຼືອ. ແຕ່ສິ່ງທີ່ມີຊີວິດໃນໂລກນີ້ກໍບໍ່ເຄີຍຂາດອົກຊີແຊນ ແລະອາຍກາກໂບນິກຫຼື “ສິ່ງເສດເຫຼືອ” ທີ່ຖືກປ່ອຍອອກມາກໍບໍ່ເຄີຍມີຫຼາຍເກີນໄປຈົນລົ້ນຊັ້ນບັນຍາກາດ. ຍ້ອນຫຍັງ? ກໍເພາະວ່າພະເຢໂຫວາໄດ້ສ້າງສິ່ງທີ່ມີຊີວິດແບບໜຶ່ງອີກຄື ຕົ້ນໄມ້ທີ່ໃຫຍ່ໆຈົນໄປຮອດຫຍ້າທີ່ນ້ອຍໆເຊິ່ງດູດເອົາອາຍກາກໂບນິກແລະປ່ອຍອົກຊີແຊນອອກມາ. ວົງຈອນຂອງອົກຊີແຊນສະແດງເຖິງຄວາມຈິງທີ່ຂຽນໄວ້ໃນກິດຈະການ 17:24, 25 ທີ່ວ່າ: “ພະເຈົ້າ . . . ເປັນຜູ້ທີ່ໃຫ້ຊີວິດ ລົມຫາຍໃຈ.”
6. ວົງຈອນຂອງນ້ຳເປັນແນວໃດ ແລະນີ້ພິສູດໃຫ້ເຫັນຫຍັງ? (ເບິ່ງຂອບ “ ວົງຈອນຂອງນ້ຳເປັນຂອງຂວັນຈາກພະເຢໂຫວາ.”)
6 ເຮົາມີນ້ຳ ຢູ່ເທິງໂລກໃນຮູບແບບຂອງທາດແຫຼວໄດ້ກໍເພາະໂລກຂອງເຮົາຕັ້ງຢູ່ຕຳແໜ່ງທີ່ຫ່າງຈາກດວງຕາເວັນໃນໄລຍະທີ່ເໝາະສົມ. ຖ້າໜ່ວຍໂລກຫຍັບໄປໃກ້ດວງຕາເວັນແຕ່ໜ້ອຍດຽວ ນ້ຳເທິງໂລກກໍຈະລະເຫີຍໄປ ໂລກກໍຈະຮ້ອນແລະແຫ້ງແລ້ງແລ້ວສິ່ງທີ່ມີຊີວິດກໍຈະຕາຍ ແລະຖ້າໂລກຫ່າງອອກຈາກດວງຕາເວັນແຕ່ໜ້ອຍດຽວ ນ້ຳໝົດໂລກກໍຈະກ້າມແລະໜ່ວຍໂລກກໍຈະເຕັມໄປດ້ວຍນ້ຳກ້ອນແລະຫິມະ. ເນື່ອງຈາກພະເຢໂຫວາຕັ້ງໂລກໄວ້ໃນຕຳແໜ່ງທີ່ເໝາະສົມ ວົງຈອນຂອງນ້ຳໃນໂລກຈຶ່ງສາມາດຄ້ຳຈູນສິ່ງທີ່ມີຊີວິດໄດ້. ດວງຕາເວັນເຮັດໃຫ້ນ້ຳໃນມະຫາສະໝຸດແລະພື້ນຜິວໂລກເກີດການລະເຫີຍອາຍຂຶ້ນກໍ່ຕົວເປັນກ້ອນເມກ. ໃນແຕ່ລະປີດວງຕາເວັນໄດ້ເຮັດໃຫ້ນ້ຳລະເຫີຍອາຍເກືອບ 500.000 ກິໂລແມັດກ້ອນ. ນ້ຳນີ້ຈະຂຶ້ນໄປຢູ່ຊັ້ນບັນຍາກາດປະມານ 10 ມື້ກ່ອນທີ່ຈະກາຍເປັນຝົນຫຼືຫິມະຕົກລົງມາ. ແລ້ວນ້ຳກໍຈະໄຫຼລົງສູ່ມະຫາສະໝຸດຫຼືແຫຼ່ງນ້ຳອື່ນໆອີກແລະກໍຈະໝູນວຽນເປັນວົງຈອນແບບນີ້ຕະຫຼອດ. ພະເຢໂຫວາອອກແບບວົງຈອນນີ້ເພື່ອຈະໃຫ້ໂລກມີນ້ຳຕະຫຼອດ ນີ້ພິສູດໃຫ້ເຫັນວ່າພະເຢໂຫວາມີທັງສະຕິປັນຍາແລະພະລັງອຳນາດຫຼາຍແທ້ໆ.—ໂຢບ 36:27, 28; ຜູ້ປ. 1:7
7. ມີວິທີໃດແດ່ທີ່ເຮົາສະແດງໃຫ້ເຫັນວ່າເຮົາເຫັນຄຸນຄ່າຂອງຂວັນທີ່ບອກໃນຄຳເພງ 115:16?
7 ເຮົາຈະເຫັນຄຸນຄ່າໂລກທີ່ສວຍງາມແລະສິ່ງດີຕ່າງໆທີ່ຢູ່ໃນໂລກຫຼາຍຂຶ້ນໄດ້ແນວໃດ? (ອ່ານຄຳເພງ 115:16) ວິທີໜຶ່ງຄື ຄິດຕຶກຕອງກ່ຽວກັບສິ່ງຕ່າງໆທີ່ພະເຢໂຫວາສ້າງ. ນີ້ຈະຊ່ວຍເຮົາໃຫ້ຂອບໃຈພະອົງທຸກມື້ທີ່ໃຫ້ສິ່ງດີໆຫຼາຍຢ່າງກັບເຮົາ. ນອກຈາກນັ້ນ ເຮົາຍັງສະແດງໃຫ້ເຫັນວ່າເຮົາເຫັນຄຸນຄ່າໂດຍຮັກສາຄວາມສະອາດໃນບ່ອນທີ່ເຮົາຢູ່ເທົ່າທີ່ເປັນໄປໄດ້.
ສະໝອງທີ່ອັດສະຈັນຂອງເຮົາ
8. ເປັນຫຍັງຈຶ່ງເວົ້າໄດ້ວ່າສະໝອງຂອງເຮົາເປັນຕາງຶດງໍ້ແທ້ໆ?
8 ສະໝອງຂອງມະນຸດຖືກອອກແບບໃຫ້ມີຄວາມສາມາດທີ່ເປັນຕາງຶດງໍ້ແທ້ໆ. ຕອນທີ່ເຈົ້າຢູ່ໃນທ້ອງແມ່ ສະໝອງຂອງເຈົ້າກໍຖືກສ້າງຕາມແຜນການທີ່ກຳນົດໄວ້ກ່ອນແລ້ວ ແລະມີຈຸລັງສະໝອງໃໝ່ຫຼາຍພັນຈຸລັງຖືກສ້າງຂຶ້ນທຸກໆນາທີ! ນັກວິໄຈປະເມີນວ່າສະໝອງຜູ້ໃຫຍ່ມີຈຸລັງພິເສດເກືອບ 100 ຕື້ຈຸລັງທີ່ເອີ້ນວ່າ ຈຸລັງປະສາດ ແລະເມື່ອເອົາຈຸລັງເຫຼົ່ານີ້ມາລວມກັນກໍຈະມີນ້ຳໜັກພຽງແຕ່ປະມານ 1.5 ກິໂລກຼາມ. ໃຫ້ເຮົາມາເບິ່ງຄວາມສາມາດທີ່ພິເສດສອງຢ່າງຂອງສະໝອງນຳກັນ.
9. ອັນໃດເຮັດໃຫ້ເຈົ້າເຫັນວ່າຄວາມສາມາດໃນການເວົ້າເປັນຂອງຂວັນຈາກພະເຈົ້າ?
9 ຄວາມສາມາດໃນການເວົ້າ ເປັນສິ່ງທີ່ອັດສະຈັນ. ຂໍໃຫ້ຄິດເຖິງສິ່ງທີ່ເກີດຂຶ້ນເມື່ອເຮົາເວົ້າ. ແຕ່ລະຄຳທີ່ເຈົ້າເວົ້າອອກມາ ສະໝອງຂອງເຈົ້າຈະຕ້ອງປະສານກັບການເຄື່ອນໄຫວຂອງກ້າມເນື້ອ 100 ມັດທີ່ຢູ່ໃນລີ້ນ ລຳຄໍ ສົບ ຄາງກະໄຕ ແລະໜ້າເອິກ. ກ້າມເນື້ອທັງໝົດເຫຼົ່ານີ້ຕ້ອງເຄື່ອນໄຫວຕາມຈັງຫວະທີ່ແນ່ນອນເພື່ອຈະອອກສຽງຢ່າງຈະແຈ້ງ. ການວິໄຈໜຶ່ງໃນປີ 2019 ກ່ຽວກັບຄວາມສາມາດໃນການເວົ້າພາສາຕ່າງໆບອກວ່າ ແອນ້ອຍສາມາດຮັບຮູ້ແລະຕອບສະໜອງຄຳສັບແຕ່ລະຄຳໄດ້. ການຄົ້ນພົບນີ້ສອດຄ່ອງກັບສິ່ງທີ່ນັກວິໄຈຫຼາຍຄົນເຊື່ອທີ່ວ່າ ເຮົາເກີດມາພ້ອມກັບຄວາມສາມາດໃນການຈື່ຈຳແລະຮຽນຮູ້ພາສາ. ແນ່ນອນວ່າ ການທີ່ເຮົາສາມາດເວົ້າໄດ້ເປັນຂອງຂວັນມາຈາກພະເຈົ້າ.—ອົບ. 4:11
10. ເຮົາຈະສະແດງໃຫ້ເຫັນແນວໃດວ່າເຮົາເຫັນຄ່າຄວາມສາມາດໃນການເວົ້າທີ່ພະເຈົ້າໃຫ້?
10 ວິທີໜຶ່ງທີ່ເຮົາສະແດງວ່າເຮົາເຫັນຄ່າຄວາມສາມາດໃນການເວົ້າກໍຄື ອະທິບາຍຄວາມເຊື່ອກັບຄົນທີ່ສົງໄສວ່າເປັນຫຍັງເຮົາບໍ່ເຊື່ອເລື່ອງວິວັດທະນາການ. (ເພງ. 9:1; 1 ປຕ. 3:15) ຄົນທີ່ສົ່ງເສີມຫຼັກຄຳສອນເລື່ອງວິວັດທະນາການຢາກເຮັດໃຫ້ເຮົາເຊື່ອວ່າໂລກແລະທຸກສິ່ງທີ່ມີຊີວິດໃນໂລກເກີດຂຶ້ນໂດຍບັງເອີນ. ຖ້າເຮົາໃຊ້ຄຳພີໄບເບິນແລະບາງຈຸດໃນບົດຄວາມນີ້ລົມກັບພວກເຂົາ ເຮົາກໍຈະສາມາດເວົ້າປົກປ້ອງພະເຢໂຫວາພໍ່ໃນສະຫວັນ ແລະສາມາດອະທິບາຍໃຫ້ກັບຄົນທີ່ເຕັມໃຈຟັງວ່າ ເປັນຫຍັງເຮົາຈຶ່ງເຊື່ອວ່າພະເຢໂຫວາເປັນຜູ້ສ້າງສະຫວັນແລະໂລກ.—ເພງ. 102:25; ເອຊາ. 40:25, 26
11. ອັນໃດຄືເຫດຜົນໜຶ່ງທີ່ສະໝອງຂອງເຮົາເປັນຕາງຶດແທ້ໆ?
11 ຄວາມສາມາດໃນການຈື່ຈຳຂອງເຮົາ ເປັນຕາງຶດແທ້ໆ. ໃນອະດີດນັກຂຽນຄົນໜຶ່ງເຄີຍກະປະມານວ່າ ສະໝອງຂອງຄົນເຮົາສາມາດຈື່ຂໍ້ມູນເທົ່າກັນກັບຂໍ້ມູນທີ່ຢູ່ໃນປຶ້ມ 20 ລ້ານຫົວ. ແຕ່ຕອນນີ້ສະໝອງຂອງຄົນເຮົາສາມາດຈື່ໄດ້ຫຼາຍກວ່ານັ້ນອີກ. ຍ້ອນມີຄວາມຈື່ຈຳແບບນີ້ ເຮົາຈຶ່ງສາມາດເຮັດຫຍັງໄດ້ແດ່?
12. ຄວາມສາມາດໃນການຮຽນຮູ້ເລື່ອງສິນລະທຳເຮັດໃຫ້ເຮົາຕ່າງຈາກສັດແນວໃດ?
12 ໃນບັນດາສິ່ງທີ່ມີຊີວິດທັງໝົດທີ່ຢູ່ເທິງໂລກ ມີແຕ່ມະນຸດເທົ່ານັ້ນທີ່ສາມາດຮຽນຮູ້ເລື່ອງຫຼັກສິນລະທຳ ໂດຍການຈື່ແລະວິເຄາະເຫດການທີ່ຜ່ານມາ. ດ້ວຍເຫດນີ້ເຮົາຈຶ່ງສາມາດມີມາດຕະຖານດ້ານສິນລະທຳທີ່ດີຂຶ້ນ ປ່ຽນວິທີຄິດແລະການໃຊ້ຊີວິດຂອງເຮົາ. (1 ກຣ. 6:9-11; ກລຊ. 3:9, 10) ທີ່ຈິງ ເຮົາສາມາດຝຶກໃຈຮູ້ຜິດຮູ້ຖືກຂອງເຮົາເພື່ອແຍກໃຫ້ອອກວ່າອັນໃດຖືກອັນໃດຜິດ. (ຮຣ. 5:14) ນອກຈາກນັ້ນ ເຮົາຍັງສາມາດສະແດງຄວາມຮັກ ຄວາມເຫັນອົກເຫັນໃຈ ແລະຄວາມເມດຕາໄດ້ ແລະເຮົາກໍຍັງຮຽນແບບຄວາມຍຸຕິທຳຂອງພະເຢໂຫວາໄດ້ນຳອີກ.
13. ຕາມຄຳເພງ 77:11, 12 ເຮົາຄວນໃຊ້ການຈື່ຈຳເຊິ່ງເປັນຂອງຂວັນຈາກພະເຈົ້າແນວໃດ?
13 ວິທີໜຶ່ງທີ່ພິສູດວ່າເຮົາເຫັນຄ່າການຈື່ຈຳເຊິ່ງເປັນຂອງຂວັນກໍໂດຍການພະຍາຍາມຈື່ສະເໝີວ່າ ພະເຢໂຫວາໄດ້ຊ່ວຍເຮົາແລະໃຫ້ກຳລັງໃຈເຮົາແນວໃດໃນອະດີດ. ນີ້ເຮັດໃຫ້ເຮົາໝັ້ນໃຈວ່າພະອົງຍັງຈະຊ່ວຍເຮົາອີກໃນອະນາຄົດ. (ອ່ານຄຳເພງ 77:11, 12; 78:4, 7) ແລະອີກວິທີກໍໂດຍການຈື່ສິ່ງດີຕ່າງໆທີ່ຄົນອື່ນເຮັດເພື່ອເຮົາແລະເຫັນຄ່າໃນສິ່ງທີ່ພວກເຂົາເຮັດ. ນັກຄົ້ນຄວ້າຫຼາຍຄົນພົບວ່າ ຄົນທີ່ຮູ້ຈັກສຳນຶກບຸນຄຸນຄົນອື່ນຈະເປັນຄົນທີ່ມີຄວາມສຸກຫຼາຍ. ນອກຈາກນັ້ນ ເຮົາຍັງສາມາດຮຽນແບບພະເຢໂຫວາແລະເລືອກທີ່ຈະລືມບາງສິ່ງ. ຕົວຢ່າງ: ພະເຢໂຫວາເປັນພະເຈົ້າທີ່ມີຄວາມຈື່ຈຳທີ່ດີທີ່ສຸດ ແຕ່ພະອົງກໍເລືອກທີ່ຈະລືມຄວາມຜິດແລະຍົກໂທດໃຫ້ເຮົາຖ້າເຮົາກັບໃຈແທ້ໆ. (ເພງ. 25:7; 130:3, 4) ແລະພະອົງກໍຢາກໃຫ້ເຮົາເຮັດແບບນີ້ກັບຄົນອື່ນຄືກັນເມື່ອພວກເຂົາຂໍໂທດທີ່ເຮັດໃຫ້ເຮົາເສຍໃຈ.—ມທ. 6:14; ລກ. 17:3, 4
ເຮົາຈະສະແດງໃຫ້ເຫັນວ່າເຮົາຮູ້ຄຸນຄ່າພະເຢໂຫວາທີ່ໃຫ້ສະໝອງເຊິ່ງເປັນຂອງຂວັນກັບເຮົາ ໂດຍໃຊ້ມັນເພື່ອສັນລະເສີນພະອົງ (ເບິ່ງຂໍ້ 14) *
14. ເຮົາຈະສະແດງໃຫ້ເຫັນແນວໃດວ່າເຮົາຮູ້ຄຸນຄ່າພະເຢໂຫວາທີ່ໃຫ້ສະໝອງເຊິ່ງເປັນຂອງຂວັນກັບເຮົາ?
14 ເຮົາຈະສະແດງໃຫ້ເຫັນແນວໃດວ່າເຮົາຮູ້ຄຸນຄ່າພະເຢໂຫວາທີ່ໃຫ້ສະໝອງເຊິ່ງເປັນຂອງຂວັນກັບເຮົາ? ໂດຍໃຊ້ມັນເພື່ອສັນລະເສີນພະອົງ. ບາງຄົນເລືອກທີ່ຈະໃຊ້ສະໝອງຂອງຕົວເອງເພື່ອຈຸດປະສົງທີ່ເຫັນແກ່ຕົວ ເຊັ່ນ: ຕັ້ງມາດຕະຖານເອົາເອງວ່າອັນໃດຖືກອັນໃດຜິດ. ແຕ່ເນື່ອງຈາກພະເຢໂຫວາເປັນຜູ້ສ້າງເຮົາ ຈຶ່ງເປັນເລື່ອງສົມເຫດສົມຜົນແທ້ໆທີ່ມາດຕະຖານຂອງພະເຢໂຫວາດີກວ່າມາດຕະຖານທີ່ເຮົາຕັ້ງເອງ. (ຣມ. 12:1, 2) ຖ້າເຮົາໃຊ້ຊີວິດຕາມມາດຕະຖານຂອງພະອົງ ເຮົາກໍຈະມີຄວາມສຸກ. (ເອຊາ. 48:17, 18) ແລະທີ່ສຳຄັນຊີວິດຂອງເຮົາກໍຈະມີຄວາມໝາຍ ນັ້ນກໍຄື ໃຊ້ຊີວິດເພື່ອຍົກຍ້ອງສັນລະເສີນພະເຢໂຫວາເຊິ່ງເປັນທັງຜູ້ສ້າງແລະພໍ່ ແລະເຮົາກໍຈະເຮັດໃຫ້ພະອົງພູມໃຈໃນໂຕເຮົາ.—ສຸພາ. 27:11
ຄຳພີໄບເບິນເປັນຂອງຂວັນທີ່ມີຄ່າ
15. ຄຳພີໄບເບິນເປັນຂອງຂວັນທີ່ສະແດງໃຫ້ເຫັນແນວໃດວ່າພະເຢໂຫວາຮັກມະນຸດ?
15 ຄຳພີໄບເບິນເປັນຂອງຂວັນທີ່ສະແດງເຖິງຄວາມຮັກຈາກພະເຈົ້າ. ພະເຢໂຫວາພໍ່ຂອງເຮົາໃນສະຫວັນໄດ້ດົນໃຈມະນຸດໃຫ້ຂຽນພະຄຳພີນີ້ກໍຍ້ອນວ່າ ພະອົງຮັກແລະເປັນຫ່ວງເຮົາຫຼາຍແທ້ໆ. ໃນຄຳພີໄບເບິນ ພະເຢໂຫວາໄດ້ຕອບຄຳຖາມທີ່ສຳຄັນທີ່ສຸດ ທີ່ເຮົາອາດຢາກຮູ້ ເຊັ່ນ: ເຮົາມາຈາກໃສ? ເຮົາເກີດມາເຮັດຫຍັງ? ແລະອະນາຄົດຈະເປັນແນວໃດ? ພະເຢໂຫວາຢາກໃຫ້ເຮົາທຸກຄົນຮູ້ຄຳຕອບສຳລັບຄຳຖາມເຫຼົ່ານີ້ ດັ່ງນັ້ນຕະຫຼອດຫຼາຍສະຕະວັດ ພະອົງຈຶ່ງໄດ້ກະຕຸ້ນມະນຸດໃຫ້ແປຄຳພີໄບເບິນອອກເປັນຫຼາຍພາສາ. ຕອນນີ້ ພະຄຳພີແບບຄົບຊຸດແລະບໍ່ຄົບຊຸດມີທັງໝົດຫຼາຍກວ່າ 3.000 ພາສາ! ຄຳພີໄບເບິນເປັນປຶ້ມທີ່ມີການແປແລະແຈກຢາຍຢ່າງກວ້າງຂວາງຫຼາຍທີ່ສຸດໃນປະຫວັດສາດ. ບໍ່ວ່າຜູ້ຄົນຈະຢູ່ໃສຫຼືໃຊ້ພາສາໃດ ພວກເຂົາກໍມີໂອກາດໄດ້ອ່ານຄຳພີໄບເບິນໃນພາສາຂອງຕົວເອງ.—ເບິ່ງຂອບ “ ການເຮັດໃຫ້ຄຳພີໄບເບິນຊອກຫາໄດ້ງ່າຍໃນພາສາຕ່າງໆຂອງອາຝຼິກກາ.”
16. ຕາມມັດທາຍ 28:19, 20 ເຮົາຈະສະແດງໃຫ້ເຫັນແນວໃດວ່າເຮົາເຫັນຄ່າຄຳພີໄບເບິນ?
16 ເຮົາຈະສະແດງໃຫ້ເຫັນວ່າເຮົາເຫັນຄ່າຄຳພີໄບເບິນທີ່ພະເຢໂຫວາໃຫ້ເຮົາ ໂດຍອ່ານຄຳພີໄບເບິນທຸກມື້ ຄິດຕຶກຕອງສິ່ງທີ່ອ່ານ ແລະພະຍາຍາມສຸດຄວາມສາມາດທີ່ຈະເອົາໄປໃຊ້ໃນຊີວິດ. ນອກຈາກນັ້ນ ເຮົາສະແດງວ່າເຮົາຂອບໃຈພະເຢໂຫວາໂດຍເຮັດທຸກສິ່ງທີ່ເຮົາເຮັດໄດ້ເພື່ອປະກາດຂ່າວສານໃນຄຳພີໄບເບິນກັບຜູ້ຄົນໃຫ້ຫຼາຍທີ່ສຸດ.—ເພງ. 1:1-3; ມທ. 24:14; ອ່ານມັດທາຍ 28:19, 20
17. ໃນບົດຄວາມນີ້ເຮົາໄດ້ຮຽນຮູ້ກ່ຽວກັບຂອງຂວັນຫຍັງແດ່ທີ່ພະເຢໂຫວາໃຫ້ເຮົາ ແລະເຮົາຈະຮຽນຫຍັງໃນບົດຄວາມຕໍ່ໄປ?
17 ໃນບົດຄວາມນີ້ເຮົາໄດ້ຮຽນຮູ້ກ່ຽວກັບຂອງຂວັນທີ່ພະເຈົ້າໃຫ້ເຮົາ ເຊັ່ນ: ໜ່ວຍໂລກເຊິ່ງເປັນບ້ານຂອງເຮົາ ສະໝອງຂອງເຮົາທີ່ໜ້າງຶດງໍ້ ແລະຄຳພີໄບເບິນທີ່ໄດ້ຮັບການດົນໃຈຈາກພະເຈົ້າ. ແຕ່ກໍຍັງມີຂອງຂວັນອື່ນໆອີກທີ່ພະເຢໂຫວາໃຫ້ເຮົາເຊິ່ງເຮົາເບິ່ງບໍ່ເຫັນ. ເຮົາຈະມາຮຽນກ່ຽວກັບຂອງຂວັນທີ່ເບິ່ງບໍ່ເຫັນເຫຼົ່ານີ້ໃນບົດຄວາມຕໍ່ໄປ.
ເພງ 12 ພະເຢໂຫວາພະເຈົ້າອົງຍິ່ງໃຫຍ່
^ ຂໍ້ 5 ບົດຄວາມນີ້ຈະຊ່ວຍເຮົາໃຫ້ສຳນຶກບຸນຄຸນພະເຢໂຫວາແລະເຫັນຄ່າຂອງຂວັນ 3 ຢ່າງທີ່ພະອົງໃຫ້ເຮົາ. ນອກຈາກນັ້ນ ບົດຄວາມນີ້ຍັງຈະຊ່ວຍເຮົາໃຫ້ຫາເຫດຜົນກັບຄົນທີ່ບໍ່ເຊື່ອເລື່ອງພະເຈົ້າ.
^ ຂໍ້ 1 ຄຳເພງ 40:5 (ລ.ມ.) “ພະເຢໂຫວາພະເຈົ້າຂອງຂ້ອຍ ພະອົງເຮັດສິ່ງມະຫັດສະຈັນຫຼາຍຢ່າງແລະມີໂຄງການຫຼາຍຢ່າງສຳລັບພວກເຮົາ. ບໍ່ມີໃຜທຽບພະອົງໄດ້ ຖ້າຂ້ອຍຈະເວົ້າເຖິງສິ່ງເຫຼົ່ານີ້ກໍຄົງເວົ້າໄດ້ບໍ່ໝົດ.”
^ ຂໍ້ 65 ຄຳອະທິບາຍຮູບພາບ: ພີ່ນ້ອງຍິງຄົນໜຶ່ງກຳລັງຮຽນພາສາຕ່າງປະເທດເພື່ອສອນຄຳພີໄບເບິນໃຫ້ກັບຄົນທີ່ອົບພະຍົບ.
