ບົດຄວາມສຶກສາທີ 3
ເພງທີ 124 ສັດຊື່ຕະຫຼອດໄປ
ພະເຢໂຫວາຈະຊ່ວຍເຈົ້າຕອນທີ່ເຈິບັນຫາຫຍຸ້ງຍາກ
“ພະເຢໂຫວາເຮັດໃຫ້ຊີວິດຂອງພວກເຈົ້າໝັ້ນຄົງ.”—ອຊຢ. 33:6
ຈຸດສຳຄັນ
ເຮົາຕ້ອງເຮັດຫຍັງເພື່ອຈະໄດ້ຮັບຄວາມຊ່ວຍເຫຼືອຈາກພະເຢໂຫວາຕອນທີ່ເຈິບັນຫາຫຍຸ້ງຍາກ?
1-2. ຜູ້ຮັບໃຊ້ທີ່ສັດຊື່ຂອງພະເຢໂຫວາອາດເຈິບັນຫາຫຍັງແດ່?
ເລື່ອງທີ່ໂຫດຮ້າຍອາດປ່ຽນຊີວິດເຮົາພາຍໃນຄືນດຽວ. ຕົວຢ່າງເຊັ່ນ: ລູອິດສ໌ aພີ່ນ້ອງຊາຍທີ່ສັດຊື່ໄດ້ຮູ້ວ່າລາວເປັນມະເຮັງຊະນິດທີ່ຄົນບໍ່ຄ່ອຍເປັນ ແລະທ່ານໝໍບອກວ່າລາວຊິຢູ່ໄດ້ແຕ່ສອງສາມເດືອນ. ໂມນິກ້າກັບຜົວຮັບໃຊ້ພະເຢໂຫວານຳກັນຢ່າງດຸໝັ່ນ ແຕ່ມີມື້ໜຶ່ງໂມນິກ້າໄດ້ຮູ້ວ່າຜົວຂອງລາວທີ່ເປັນຜູ້ດູແລໄດ້ນອກໃຈລາວມາຫຼາຍປີແລ້ວໂດຍທີ່ລາວບໍ່ຮູ້ເລີຍ. ພີ່ນ້ອງຍິງທີ່ຊື່ໂອລີເວຍຕ້ອງໜີອອກຈາກເຮືອນຍ້ອນພາຍຸເຮີຣິເຄນກຳລັງພັດມາ. ຫຼັງຈາກພາຍຸເຊົາແລ້ວ ລາວກໍກັບເມືອເຮືອນແຕ່ເຮືອນຂອງລາວເຫຼືອແຕ່ຊາກ. ຊີວິດຂອງພີ່ນ້ອງເຫຼົ່ານີ້ປ່ຽນໄປແບບກະທັນຫັນໂດຍບໍ່ທັນຕັ້ງໂຕ. ເຈົ້າເຄີຍເຈິກັບເລື່ອງທີ່ໂຫດຮ້າຍທີ່ປ່ຽນຊີວິດຂອງເຈົ້າແບບບໍ່ຄາດຄິດບໍ?
2 ພວກເຮົາທີ່ເປັນຜູ້ຮັບໃຊ້ທີ່ສັດຊື່ຂອງພະເຢໂຫວາກໍເຈິບັນຫາຫຍຸ້ງຍາກແລະເຈັບປ່ວຍຄືກັບຄົນທົ່ວໄປ. ນອກຈາກນັ້ນ ເຮົາຍັງຕ້ອງອົດທົນກັບການຕໍ່ຕ້ານແລະການຂົ່ມເຫງຈາກຄົນທີ່ຊັງຜູ້ຮັບໃຊ້ຂອງພະເຢໂຫວານຳ. ເຖິງວ່າພະເຢໂຫວາຈະບໍ່ປົກປ້ອງເຮົາຈາກບັນຫາທຸກຢ່າງ ແຕ່ເພິ່ນກໍສັນຍາວ່າຈະຊ່ວຍເຮົາໃຫ້ຮັບມືໄດ້. (ອຊຢ. 41:10) ດ້ວຍຄວາມຊ່ວຍເຫຼືອຈາກພະເຢໂຫວາ ເຮົາສາມາດມີຄວາມສຸກໄດ້ ຕັດສິນໃຈຖືກຕ້ອງ ແລະພັກດີຕໍ່ເພິ່ນໄດ້ເຖິງວ່າຈະເຈິເລື່ອງທີ່ໂຫດຮ້າຍທີ່ສຸດໃນຊີວິດ. ໃນບົດຄວາມນີ້ເຮົາຈະມາເບິ່ງ 4 ວິທີທີ່ພະເຢໂຫວາຊ່ວຍເຮົາຕອນທີ່ເຈິບັນຫາທີ່ໜັກໆແລະເຮົາຈະເບິ່ງນຳວ່າເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຈາກສິ່ງທີ່ເພິ່ນກຽມໄວ້ໃຫ້.
ພະເຢໂຫວາຈະປົກປ້ອງເຈົ້າ
3. ຕອນທີ່ເຮົາເຈິເລື່ອງທີ່ໂຫດຮ້າຍ ເຮົາອາດຮູ້ສຶກແນວໃດ?
3 ບັນຫາ: ຕອນທີ່ເຮົາເຈິເລື່ອງທີ່ໂຫດຮ້າຍ ເຮົາອາດຄິດຫຍັງບໍ່ອອກແລະຕັດສິນໃຈບໍ່ໄດ້ຍ້ອນເຮົາອາດຕົກໃຈ ເຈັບປວດໃຈຫຼາຍ ແລະອາດຮູ້ສຶກສັບສົນຈົນບໍ່ຮູ້ວ່າຊິເຮັດແນວໃດ. ໃຫ້ເບິ່ງວ່າພີ່ນ້ອງຍິງ 2 ຄົນທີ່ເວົ້າເຖິງກ່ອນໜ້ານີ້ຮູ້ສຶກແນວໃດຕອນທີ່ເຈິບັນຫາໜັກໆໃນຊີວິດ. ໂອລີເວຍເວົ້າວ່າ: “ຫຼັງຈາກພາຍຸເຮີຣິເຄນທຳລາຍເຮືອນຂອງຂ້ອຍຈົນເຫຼືອແຕ່ຊາກ ຂ້ອຍເກືອບເປັນລົມແລະບໍ່ຮູ້ວ່າຊິເຮັດແນວໃດຕໍ່ໄປ. ໂມນິກ້າທີ່ຮູ້ວ່າຜົວນອກໃຈເວົ້າວ່າ: “ຂ້ອຍເຈັບປວດໃຈຫຼາຍຄືກັບມີຄົນເອົາມີດມາແທງ. ມັນຍາກຫຼາຍແທ້ໆທີ່ຈະໃຊ້ຊີວິດໃນແຕ່ລະມື້. ຂ້ອຍບໍ່ຢາກເຊື່ອເລີຍວ່າເລື່ອງແບບນີ້ເກີດຂຶ້ນກັບຂ້ອຍ.” ພະເຢໂຫວາສັນຍາວ່າຈະຊ່ວຍເຮົາແນວໃດເມື່ອເຮົາຮູ້ສຶກແບບນີ້?
4. ຕາມຟີລິບປອຍ 4:6, 7 ພະເຢໂຫວາສັນຍາວ່າຈະເຮັດຫຍັງ?
4 ພະເຢໂຫວາຈະເຮັດຫຍັງ? ຄຳພີໄບເບິນບອກວ່າພະເຢໂຫວາສັນຍາວ່າຈະໃຫ້ເຮົາມີ “ສັນຕິສຸກຂອງພະເຈົ້າ.” (ອ່ານຟີລິບປອຍ 4:6, 7) ສັນຕິສຸກນີ້ໝາຍເຖິງຄວາມສະຫງົບໃຈຍ້ອນເຮົາໃກ້ຊິດກັບພະເຢໂຫວາ. ສັນຕິສຸກນີ້ເປັນສິ່ງທີ່ “ເກີນຄວາມເຂົ້າໃຈທຸກຢ່າງ” ແລະມັນດີເກີນກວ່າທີ່ເຮົາຈະນຶກພາບອອກໄດ້. ເຈົ້າເຄີຍອະທິດຖານຫາພະເຢໂຫວາຢ່າງຈິງຈັງບໍ ແລະເມື່ອອະທິດຖານແລ້ວເຈົ້າກໍຮູ້ສຶກສະຫງົບໃຈຫຼາຍແທ້ໆ. ເຈົ້າຮູ້ສຶກແບບນັ້ນຍ້ອນພະເຢໂຫວາໃຫ້ເຈົ້າມີ “ສັນຕິສຸກຂອງພະເຈົ້າ.”
5. ສັນຕິສຸກຂອງພະເຈົ້າຈະປົກປ້ອງຫົວໃຈແລະຄວາມຄິດຂອງເຮົາແນວໃດ?
5 ຟີລິບປອຍ 4:7 ຍັງບອກອີກວ່າສັນຕິສຸກຂອງພະເຈົ້າຈະ “ປົກປ້ອງຫົວໃຈແລະຄວາມຄິດ” ຂອງເຮົາ. ໃນພາສາດັ້ງເດີມ ຄຳວ່າ “ປົກປ້ອງ” ເປັນຄຳທີ່ທະຫານໃຊ້ເມື່ອເວົ້າເຖິງກອງທະຫານທີ່ປົກປ້ອງເມືອງບໍ່ໃຫ້ສັດຕູມາໂຈມຕີ. ເມື່ອມີທະຫານເຝົ້າປະຕູເມືອງ ຄົນໃນເມືອງກໍຮູ້ສຶກປອດໄພແລະນອນຫຼັບໄດ້. ຄ້າຍຄືກັນ ເມື່ອສັນຕິສຸກຂອງພະເຈົ້າປົກປ້ອງຫົວໃຈແລະຄວາມຄິດຂອງເຮົາ ເຮົາກໍຮູ້ສຶກສະຫງົບໃຈແລະປອດໄພ. (ເພງ. 4:8) ຄືກັບຮັນນາ ເຖິງວ່າບັນຫາຂອງເຮົາຍັງມີຢູ່ ແຕ່ເຮົາກໍສະຫງົບໃຈໄດ້. (1ຊມ. 1:16-18) ເມື່ອເຮົາສະຫງົບໃຈ ເຮົາກໍຄິດແລະຕັດສິນໃຈເລື່ອງຕ່າງໆໄດ້ຢ່າງຖືກຕ້ອງ.
ໃຫ້ອະທິດຖານຈົນກວ່າເຈົ້າຈະຮູ້ສຶກວ່າ “ສັນຕິສຸກຂອງພະເຈົ້າ” ປົກປ້ອງຫົວໃຈແລະຄວາມຄິດຂອງເຈົ້າ (ເບິ່ງຂໍ້ 4-6)
6. ເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຈາກສັນຕິສຸກຂອງພະເຈົ້າ? (ເບິ່ງຮູບ)
6 ເຮົາຕ້ອງເຮັດຫຍັງ? ຕອນທີ່ເຈົ້າຮູ້ສຶກທໍ້ໃຈຫຼາຍ ໃຫ້ອະທິດຖານຂໍສັນຕິສຸກຂອງພະເຈົ້າ ແລະອະທິດຖານເລື້ອຍໆຈົນກວ່າເຈົ້າຮູ້ສຶກດີຂຶ້ນ. (ລກ. 11:9; 1ທຊ. 5:17) ລູອິດສ໌ທີ່ເວົ້າເຖິງກ່ອນໜ້ານີ້ເລົ່າວ່າ ລາວກັບແອນນາເມຍຂອງລາວຮັບມືແນວໃດຕອນທີ່ຮູ້ວ່າລູອິດສ໌ມີເວລາຢູ່ໄດ້ແຕ່ສອງສາມເດືອນ? ລູອິດສ໌ບອກວ່າ: “ຕອນທີ່ໄດ້ຍິນຂ່າວຮ້າຍນີ້ ມັນຍາກຫຼາຍທີ່ຈະຕັດສິນໃຈເລື່ອງການປິ່ນປົວແລະເລື່ອງອື່ນໆ. ແຕ່ການອະທິດຖານຊ່ວຍໄດ້ແທ້ໆ. ມັນເຮັດໃຫ້ເຮົາສະຫງົບໃຈໄດ້.” ລູອິດສ໌ກັບເມຍບອກວ່າ ເຂົາເຈົ້າອະທິດຖານຢ່າງຈິງຈັງແລະອະທິດຖານຫຼາຍເທື່ອຂໍພະເຢໂຫວາຊ່ວຍເຂົາເຈົ້າໃຫ້ສະຫງົບໃຈ ແລະຂໍສະຕິປັນຍາເພື່ອຈະຕັດສິນໃຈໄດ້ຢ່າງຖືກຕ້ອງ. ເຂົາເຈົ້າກໍຮູ້ສຶກວ່າພະເຢໂຫວາຊ່ວຍເຂົາເຈົ້າແທ້ໆ. ຖ້າເຈົ້າເຈິບັນຫາໜັກທີ່ເກືອບຈະຮັບມືບໍ່ໄຫວ ໃຫ້ອະທິດຖານເລື້ອຍໆແລ້ວພະເຢໂຫວາຈະໃຫ້ເຈົ້າມີສັນຕິສຸກທີ່ຈະປົກປ້ອງຫົວໃຈແລະຄວາມຄິດຂອງເຈົ້າ.—ຣມ. 12:12
ພະເຢໂຫວາຈະເຮັດໃຫ້ເຈົ້າໝັ້ນຄົງ
7. ເມື່ອເຈິບັນຫາທີ່ໜັກໆເຮົາອາດຮູ້ສຶກແນວໃດ?
7 ບັນຫາ: ເມື່ອເຮົາເຈິບັນຫາທີ່ໜັກໆເຮົາອາດມີຄວາມຄິດທີ່ບໍ່ສົມດຸນ ຮູ້ສຶກບໍ່ໝັ້ນຄົງ ແລະອາດເຮັດບາງຢ່າງທີ່ບໍ່ເຄີຍເຮັດ. ເຮົາອາດມີຄວາມຮູ້ສຶກຫຼາຍຢ່າງທີ່ເປັນຄືກັບເຮືອທີ່ຖືກຄື້ນຫຼາຍຄື້ນຊັດໃສ່. ແອນນາທີ່ເວົ້າເຖິງກ່ອນໜ້ານີ້ບອກວ່າຫຼັງຈາກທີ່ຜົວຂອງລາວຕາຍ ລາວຕ້ອງຮັບມືກັບຄວາມຮູ້ສຶກຫຼາຍຢ່າງ. ລາວບອກວ່າ: “ຂ້ອຍຮູ້ສຶກວ່າງເປົ່າ ຊຶມເສົ້າ ແລະອີ່ຕົນໂຕເອງ. ບາງເທື່ອກໍຮູ້ສຶກໃຈຮ້າຍທີ່ລາວຈາກຂ້ອຍໄປແບບນີ້.” ນອກຈາກນັ້ນ ແອນນາຍັງຮູ້ສຶກໂດດດ່ຽວແລະຫງຸດຫງິດທີ່ຕ້ອງຕັດສິນໃຈເລື່ອງຕ່າງໆເຊິ່ງປົກກະຕິແລ້ວລູອິດສ໌ຈະເປັນຜູ້ຕັດສິນໃຈ. ບາງເທື່ອລາວກໍນຶກພາບວ່າໂຕເອງກຳລັງລອຍຢູ່ໃນທະເລຕອນທີ່ມີພາຍຸ. ຖ້າເຮົາຮູ້ສຶກແບບນີ້ ພະເຢໂຫວາຈະຊ່ວຍເຮົາແນວໃດ?
8. ຕາມເອຊາຢາ 33:6 ພະເຢໂຫວາຮັບຮອງຫຍັງກັບເຮົາ?
8 ພະເຢໂຫວາຈະເຮັດຫຍັງ? ພະເຢໂຫວາຮັບຮອງກັບເຮົາວ່າເພິ່ນຈະເຮັດໃຫ້ເຮົາໝັ້ນຄົງ. (ອ່ານເອຊາຢາ 33:6) ຄືກັບຕອນທີ່ເຮືອເຈິພາຍຸ ມັນອາດໂຍກໄປໂຍກມາຈົນເກືອບຫຼົ້ມ. ເພື່ອຈະບໍ່ເປັນແບບນີ້ ເຮືອຫຼາຍລຳຈະມີຄີຢູ່ກ້ອງເຮືອທັງສອງຂ້າງ. ຄີເຫຼົ່ານີ້ຈະຊ່ວຍເຮືອບໍ່ໃຫ້ໂຍກໄປໂຍກມາເມື່ອຖືກຄື້ນຊັດໃສ່ ແລະຈະເຮັດໃຫ້ຜູ້ໂດຍສານທີ່ຢູ່ໃນເຮືອຮູ້ສຶກປອດໄພຫຼາຍຂຶ້ນແລະບໍ່ເມົາເຮືອ. ແຕ່ເພື່ອຄີເຫຼົ່ານີ້ຈະເຮັດວຽກໄດ້ດີ ເຮືອກໍຕ້ອງແລ່ນໄປທາງໜ້າເລື້ອຍໆ. ຄ້າຍຄືກັນ ພະເຢໂຫວາຈະເຮັດໃຫ້ເຮົາໝັ້ນຄົງຖ້າເຮົາຮັບໃຊ້ເພິ່ນຢ່າງສັດຊື່ຕໍ່ໆໄປເຖິງວ່າຈະເຈິບັນຫາ.
ໃຊ້ເຄື່ອງມືຄົ້ນຄວ້າຕ່າງໆຂອງອົງການເພື່ອຊ່ວຍເຈົ້າໃຫ້ໝັ້ນຄົງ (ເບິ່ງຂໍ້ 8-9)
9. ເຄື່ອງມືຄົ້ນຄວ້າຈະຊ່ວຍເຮົາໃຫ້ມີຄວາມຄິດທີ່ສົມດຸນໄດ້ແນວໃດ? (ເບິ່ງຮູບ)
9 ເຮົາຕ້ອງເຮັດຫຍັງ? ຕອນທີ່ເຈົ້າກຳລັງຈົມຢູ່ກັບຄວາມຮູ້ສຶກບໍ່ດີຫຼາຍຢ່າງ ໃຫ້ພະຍາຍາມທີ່ຈະເຮັດກິດຈະກຳຂອງຄລິດສະຕຽນເປັນປະຈຳ ເຊັ່ນ: ການອະທິດຖານ ການເຂົ້າຮ່ວມປະຊຸມ ແລະການປະກາດ. ແມ່ນຢູ່ວ່າເຈົ້າອາດເຮັດບໍ່ໄດ້ຫຼາຍຄືແຕ່ກີ້ ແຕ່ໃຫ້ຈື່ໄວ້ວ່າພະເຢໂຫວາເປັນພະເຈົ້າທີ່ມີເຫດຜົນ. (ສົມທຽບກັບລູກາ 21:1-4) ນອກຈາກນັ້ນ ຂໍໃຫ້ເຈົ້າຈັດເວລາສຳລັບສຶກສາສ່ວນໂຕແລະຄິດຕຶກຕອງ. ພະເຢໂຫວາໃຊ້ອົງການຂອງເພິ່ນເພື່ອຈັດກຽມຄຳແນະນຳດີໆຈາກຄຳພີໄບເບິນທີ່ຊ່ວຍເຮົາໃຫ້ມີຄວາມຄິດທີ່ສົມດຸນ. ມີເຄື່ອງມືຫຼາຍຢ່າງໃນພາສາຂອງເຈົ້າທີ່ຊ່ວຍເຈົ້າໃຫ້ຄົ້ນຄວ້າໄດ້ ເຊັ່ນ ແອັບ JW Library® ແລະຄູ່ມືຄົ້ນຄວ້າສຳລັບພະຍານພະເຢໂຫວາ. ໂມນິກ້າບອກວ່າລາວໃຊ້ເຄື່ອງມືຄົ້ນຄວ້າເພື່ອຊອກຄຳແນະນຳຕອນທີ່ຕ້ອງຮັບມືກັບຄວາມຮູ້ສຶກຫຼາຍຢ່າງ. ຕົວຢ່າງເຊັ່ນ: ລາວຈະຊອກຄຳວ່າ “ໃຈຮ້າຍ” “ທໍລະຍົດ” ຫຼື “ພັກດີ.” ແລ້ວລາວກໍອ່ານບົດຄວາມທີ່ລາວຊອກເຫັນຈົນກວ່າຈະຮູ້ສຶກດີຂຶ້ນ. ໂມນິກ້າບອກວ່າ: “ຕອນທີ່ຂ້ອຍກຳລັງຊອກຂ້ອຍຮູ້ສຶກບໍ່ດີເອົາແທ້ເອົາວ່າ ແຕ່ເມື່ອເຈິບົດຄວາມແລ້ວອ່ານໄປເລື້ອຍໆຂ້ອຍກໍເລີ່ມຮູ້ສຶກຄືກັບວ່າພະເຢໂຫວາກຳລັງກອດແລະປອບໃຈຂ້ອຍ. ຂ້ອຍຮູ້ເລີຍວ່າພະເຢໂຫວາເຂົ້າໃຈຂ້ອຍແທ້ໆວ່າຂ້ອຍຮູ້ສຶກແນວໃດ ແລະກຳລັງຊ່ວຍຂ້ອຍຢູ່.” ຄວາມຊ່ວຍເຫຼືອແບບນີ້ຈາກພະເຢໂຫວາຈະຊ່ວຍເຈົ້າໃຫ້ໝັ້ນຄົງແລະມີຄວາມຄິດທີ່ສົມດຸນຂຶ້ນ ຈົນໃນທີ່ສຸດກໍສາມາດສະຫງົບໃຈໄດ້.—ເພງ. 119:143, 144
ພະເຢໂຫວາຈະຊ່ວຍເຈົ້າ
10. ເຮົາອາດຮູ້ສຶກແນວໃດຫຼັງຈາກເຈິເລື່ອງໜັກໆທີ່ກະທົບຈິດໃຈ?
10 ບັນຫາ: ເມື່ອເຈິເລື່ອງໜັກໆທີ່ກະທົບຈິດໃຈ ບາງມື້ເຮົາອາດຮູ້ສຶກທໍ້ຈົນໝົດແຮງແລະບໍ່ຢາກເຮັດຫຍັງ. ເຮົາອາດຮູ້ສຶກຄືກັບນັກແລ່ນທີ່ໄດ້ຮັບບາດເຈັບ ເຊິ່ງກ່ອນໜ້ານີ້ເຄີຍແລ່ນໄດ້ໄວແຕ່ຕອນນີ້ພັດຍ່າງຂາເຢັກໆ. ບາງເລື່ອງທີ່ກ່ອນໜ້ານີ້ເຄີຍເຮັດໄດ້ແບບສະບາຍໆແຕ່ຕອນນີ້ພັດເຮັດບໍ່ໄດ້ ຫຼືບາງຢ່າງທີ່ເຮົາມັກເຮັດແຕ່ຕອນນີ້ພັດບໍ່ຢາກເຮັດ. ເຮົາອາດເປັນຄືກັບເອລີຢາທີ່ໝົດແຮງຈົນບໍ່ຢາກເຮັດຫຍັງ ມີແຕ່ຢາກນອນ. (1ກສ. 19:5-7) ຖ້າເປັນແບບນີ້ ພະເຢໂຫວາສັນຍາວ່າຈະຊ່ວຍເຮົາແນວໃດ?
11. ມີວິທີໃດອີກທີ່ພະເຢໂຫວາຊ່ວຍເຮົາ? (ຄຳເພງ 94:18)
11 ພະເຢໂຫວາຈະເຮັດຫຍັງ? ພະເຢໂຫວາສັນຍາວ່າຈະຊ່ວຍເຮົາ. (ອ່ານຄຳເພງ 94:18) ຄືກັບນັກແລ່ນທີ່ໄດ້ຮັບບາດເຈັບແລະຕ້ອງມີຄົນມາຊ່ວຍໂຈມຕອນທີ່ລາວຍ່າງ ເຮົາກໍຕ້ອງໄດ້ຮັບຄວາມຊ່ວຍເຫຼືອເພື່ອຈະຮັບໃຊ້ພະເຢໂຫວາຕໍ່ໄປໄດ້. ຕອນທີ່ເຮົາເຈິເລື່ອງໜັກໆພະເຢໂຫວາຮັບຮອງກັບເຮົາວ່າ: “ເຮົາເຢໂຫວາພະເຈົ້າຂອງເຈົ້າກຳລັງຈັບມືຂວາຂອງເຈົ້າໄວ້. ເຮົາເປັນຜູ້ທີ່ເວົ້າກັບເຈົ້າວ່າ ‘ບໍ່ຕ້ອງຢ້ານ ເຮົາຈະຊ່ວຍເຈົ້າ.’” (ອຊຢ. 41:13) ກະສັດດາວິດກໍໄດ້ຮັບຄວາມຊ່ວຍເຫຼືອແບບນີ້. ຕອນທີ່ລາວເຈິບັນຫາໜັກແລະຖືກສັດຕູໄລ່ລ່າ ລາວເວົ້າກັບພະເຢໂຫວາວ່າ: “ມືຂວາຂອງພະອົງໄດ້ໂຈມລູກໄວ້.” (ເພງ. 18:35, ລ.ມ) ພະເຢໂຫວາຊ່ວຍເຮົາແນວໃດ?
ຍອມຮັບຄວາມຊ່ວຍເຫຼືອຈາກຄອບຄົວ ໝູ່ ແລະຜູ້ດູແລ (ເບິ່ງຂໍ້ 11-13)
12. ເມື່ອເຮົາອ່ອນແອ ພະເຢໂຫວາອາດໃຊ້ໃຜໃຫ້ຊ່ວຍເຮົາ?
12 ຫຼາຍເທື່ອພະເຢໂຫວາມັກຈະກະຕຸ້ນຄົນອື່ນໃຫ້ຊ່ວຍເຮົາ. ຕົວຢ່າງເຊັ່ນ: ຕອນທີ່ດາວິດຮູ້ສຶກອ່ອນແອ ໂຢນາທານກໍມາຫາເພື່ອໃຫ້ກຳລັງໃຈລາວ. (1ຊມ. 23:16, 17) ພະເຢໂຫວາຍັງໄດ້ໃຊ້ເອລີຊາໃຫ້ຊ່ວຍເອລີຢາ. (1ກສ. 19:16, 21; 2ກສ. 2:2) ໃນທຸກມື້ນີ້ ພະເຢໂຫວາອາດຈະໃຊ້ຄົນໃນຄອບຄົວ ໝູ່ ຫຼືຜູ້ດູແລໃຫ້ຊ່ວຍເຮົາ. ແຕ່ບາງເທື່ອຕອນທີ່ເຮົາເສຍໃຈ ເຮົາອາດຮູ້ສຶກວ່າບໍ່ຢາກເຈິໃຜແລະຢາກຢູ່ຄົນດຽວ ການຮູ້ສຶກແບບນັ້ນເປັນເລື່ອງປົກກະຕິ. ເຮົາຕ້ອງເຮັດຫຍັງເພື່ອຈະໄດ້ຮັບຄວາມຊ່ວຍເຫຼືອຈາກພະເຢໂຫວາ?
13. ເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຈາກຄວາມຊ່ວຍເຫຼືອທີ່ມາຈາກພະເຢໂຫວາ? (ເບິ່ງຮູບ)
13 ເຮົາຕ້ອງເຮັດຫຍັງ? ຢ່າຢູ່ຄົນດຽວເຖິງວ່າເຮົາຢາກເຮັດແບບນັ້ນ ຍ້ອນວ່າຖ້າເຮົາຢູ່ຄົນດຽວ ເຮົາອາດຈະຄິດໃນແງ່ລົບ ຄິດເຖິງແຕ່ໂຕເອງ ແລະຄິດເຖິງບັນຫາທີ່ກຳລັງເຈິຢູ່. ການຄິດແບບນີ້ອາດເຮັດໃຫ້ເຮົາຕັດສິນໃຈບໍ່ຖືກຕ້ອງ. (ສຸພາ. 18:1) ແມ່ນຢູ່ວ່າບາງເທື່ອເຮົາຢາກຢູ່ຄົນດຽວ ໂດຍສະເພາະຕອນທີ່ເຮົາເຈິບັນຫາໜັກໆ. ແຕ່ຖ້າເຮົາຢູ່ຄົນດຽວດົນໆແລະບໍ່ຢາກເຈິໃຜ ເຮົາອາດຈະບໍ່ໄດ້ຮັບຄວາມຊ່ວຍເຫຼືອຈາກຄົນທີ່ພະເຢໂຫວາໃຊ້ໃຫ້ມາຊ່ວຍເຮົາ. ດັ່ງນັ້ນ ໃຫ້ຍອມຮັບຄວາມຊ່ວຍເຫຼືອຈາກຄົນໃນຄອບຄົວ ໝູ່ ແລະຜູ້ດູແລ ເຖິງວ່າເຮົາຮູ້ສຶກວ່າມັນຍາກທີ່ຈະຮັບເອົາຄວາມຊ່ວຍເຫຼືອນັ້ນ. ໃຫ້ເບິ່ງວ່ານັ້ນເປັນວິທີທີ່ພະເຢໂຫວາໃຊ້ເພື່ອຊ່ວຍເຮົາ.—ສຸພາ. 17:17; ອຊຢ. 32:1, 2
ພະເຢໂຫວາຈະປອບໃຈເຈົ້າ
14. ມີສະຖານະການຫຍັງແດ່ທີ່ອາດເຮັດໃຫ້ເຮົາຢ້ານ?
14 ບັນຫາ: ບາງເທື່ອເຮົາອາດເຈິເຫດການທີ່ເຮັດໃຫ້ຮູ້ສຶກຢ້ານ. ໃນຄຳພີໄບເບິນ ຜູ້ຮັບໃຊ້ທີ່ສັດຊື່ຂອງພະເຈົ້າບາງຄົນກໍເຈິຄວາມທຸກແລະຮູ້ສຶກຢ້ານຍ້ອນຖືກສັດຕູຕໍ່ຕ້ານແລະເຈິຄວາມກົດດັນອື່ນໆ. (ເພງ. 18:4; 55:1, 5) ຄ້າຍຄືກັນ ເຮົາອາດເຈິການຕໍ່ຕ້ານຢູ່ໂຮງຮຽນ ຢູ່ບ່ອນເຮັດວຽກ ຈາກຄົນໃນຄອບຄົວ ຈາກອຳນາດການປົກຄອງ ຫຼືເຮົາອາດຢ້ານຕາຍຍ້ອນບໍ່ສະບາຍແຮງ. ຕອນທີ່ເຈິສະຖານະການແບບນີ້ ເຮົາອາດເປັນຄືກັບເດັກນ້ອຍທີ່ບໍ່ຮູ້ຊິເຮັດແນວໃດ. ພະເຢໂຫວາຈະຊ່ວຍເຮົາແນວໃດ?
15. ຕາມຄຳເພງ 94:19 ພະເຢໂຫວາຈະເຮັດຫຍັງ?
15 ພະເຢໂຫວາຈະເຮັດຫຍັງ? ພະເຢໂຫວາຈະປອບໃຈເຮົາແລະເຮັດໃຫ້ເຮົາສະບາຍໃຈຂຶ້ນ. (ອ່ານຄຳເພງ 94:19) ຄຳເວົ້າຂອງຜູ້ຂຽນຄຳເພງອາດເຮັດໃຫ້ເຮົາຄິດເຖິງເດັກນ້ອຍຜູ້ຍິງທີ່ສະດຸ້ງຕື່ນໃນຕອນກາງຄືນຍ້ອນຢ້ານສຽງຟ້າຮ້ອງຟ້າຜ່າຈົນນອນຕໍ່ບໍ່ໄດ້. ຕອນນັ້ນພໍ່ຂອງລາວໄດ້ເຂົ້າມາຫາ ກອດແລະປອບໃຈລາວຈົນລາວຮູ້ສຶກດີຂຶ້ນແລະນອນຫຼັບຕໍ່ໄດ້. ເຖິງວ່າສຽງຟ້າຮ້ອງຍັງດັງຢູ່ ແຕ່ການທີ່ພໍ່ກອດລາວຄືຊິເຮັດໃຫ້ລາວຮູ້ສຶກປອດໄພ. ຄ້າຍຄືກັນ ຕອນທີ່ເຮົາເຈິເລື່ອງໜັກໆໃນຊີວິດ ເຮົາອາດຕ້ອງການໃຫ້ພະເຢໂຫວາພໍ່ຂອງເຮົາກອດເຮົາຈົນເຮົາຮູ້ສຶກດີຂຶ້ນ. ເຮົາຈະໃຫ້ເພິ່ນປອບໃຈເຮົາແບບນີ້ໄດ້ແນວໃດ?
ໃຫ້ພະເຢໂຫວາພໍ່ທີ່ຢູ່ໃນສະຫວັນປອບໃຈເຈົ້າຜ່ານທາງຄຳພີໄບເບິນ (ເບິ່ງຂໍ້ 15-16)
16. ເຮົາຕ້ອງເຮັດຫຍັງເພື່ອຈະໄດ້ຮັບການປອບໃຈຈາກພະເຢໂຫວາ? (ເບິ່ງຮູບ)
16 ເຮົາຕ້ອງເຮັດຫຍັງ? ໃຫ້ໃຊ້ເວລາກັບພະເຢໂຫວາເປັນປະຈຳໂດຍອະທິດຖານແລະອ່ານຄຳພີໄບເບິນ. (ເພງ. 77:1, 12-14) ຖ້າເຈົ້າເຮັດແບບນີ້ເປັນປະຈຳ ຕອນທີ່ເຈົ້າຮູ້ສຶກເຄັ່ງຕຶງ ສິ່ງທຳອິດທີ່ເຈົ້າຈະເຮັດແມ່ນຂໍໃຫ້ພະເຢໂຫວາພໍ່ທີ່ຢູ່ໃນສະຫວັນຊ່ວຍ. ເລົ່າໃຫ້ເພິ່ນຟັງວ່າເຈົ້າຢ້ານແລະອຸກໃຈເລື່ອງຫຍັງ. ແລ້ວເພິ່ນຈະເວົ້າກັບເຈົ້າແລະປອບໃຈເຈົ້າຜ່ານທາງຄຳພີໄບເບິນ. (ເພງ. 119:28) ເຈົ້າອາດເຈິຂໍ້ຄຳພີບາງຂໍ້ທີ່ໃຫ້ກຳລັງໃຈເຈົ້າຕອນທີ່ຮູ້ສຶກຢ້ານ. ຕົວຢ່າງເຊັ່ນ: ເຈົ້າອາດໄດ້ກຳລັງໃຈຕອນທີ່ອ່ານປຶ້ມໂຢບ ປຶ້ມຄຳເພງ ປຶ້ມສຸພາສິດ ແລະຄຳເວົ້າຂອງພະເຢຊູທີ່ຢູ່ໃນປຶ້ມມັດທາຍບົດ 6. ເມື່ອເຈົ້າອະທິດຖານຫາພະເຢໂຫວາແລະອ່ານຄຳພີໄບເບິນ ເຈົ້າຈະຮູ້ສຶກໄດ້ວ່າເພິ່ນກຳລັງປອບໃຈເຈົ້າ.
17. ເຮົາສາມາດໝັ້ນໃຈໃນເລື່ອງໃດ?
17 ເຮົາໝັ້ນໃຈໄດ້ວ່າພະເຢໂຫວາຈະຊ່ວຍເຮົາຕອນທີ່ເຮົາເຈິເລື່ອງທີ່ໂຫດຮ້າຍທີ່ສຸດໃນຊີວິດ. ເຮົາຈະບໍ່ມີວັນຢູ່ຄົນດຽວ. (ເພງ. 23:4; 94:14) ພະເຢໂຫວາສັນຍາວ່າເພິ່ນຈະປົກປ້ອງເຮົາ ເຮັດໃຫ້ເຮົາໝັ້ນຄົງ ຊ່ວຍເຫຼືອເຮົາແລະປອບໃຈເຮົາ. ເອຊາຢາ 26:3 ບອກວ່າ: “ພະອົງຈະປົກປ້ອງຜູ້ທີ່ໄວ້ວາງໃຈພະອົງ. ພະອົງຈະໃຫ້ເຂົາເຈົ້າມີຄວາມສະຫງົບສຸກຕໍ່ໆໄປຍ້ອນເຂົາເຈົ້າໄວ້ວາງໃຈພະອົງ.” ດັ່ງນັ້ນ ຂໍໃຫ້ໄວ້ວາງໃຈພະເຢໂຫວາແລະຮັບປະໂຫຍດຈາກສິ່ງທີ່ເພິ່ນກຽມໄວ້ເພື່ອຊ່ວຍເຈົ້າ. ຖ້າເຈົ້າເຮັດແບບນີ້ເຈົ້າກໍຈະເຂັ້ມແຂງໄດ້ ເຖິງວ່າກຳລັງເຈິບັນຫາທີ່ໜັກໆໃນຊີວິດ.
ເຈົ້າຈະຕອບແນວໃດ?
-
ຕອນໃດທີ່ເຮົາຕ້ອງໃຫ້ພະເຢໂຫວາຊ່ວຍເປັນພິເສດ?
-
ສີ່ວິທີທີ່ພະເຢໂຫວາຊ່ວຍເຮົາຕອນທີ່ເຈິບັນຫາໜັກໆມີຫຍັງແດ່?
-
ເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຈາກສິ່ງທີ່ພະເຢໂຫວາກຽມໄວ້?
ເພງທີ 12 ພະເຢໂຫວາພະເຈົ້າອົງຍິ່ງໃຫຍ່
a ຊື່ສົມມຸດ.
