ບົດຄວາມສຶກສາທີ 4
ເພງທີ 30 ພະອົງເປັນພະເຈົ້າ ເປັນພໍ່ ແລະເພື່ອນຂອງຂ້ອຍ
ພະເຢໂຫວາຮັກເຮົາຫຼາຍ
“ພະເຈົ້າຜູ້ເປັນພໍ່ຮັກພວກເຈົ້າ.”—ຢຮ. 16:27
ຈຸດສຳຄັນ
ຄວາມຮັກຂອງພະເຢໂຫວາຈະເຮັດໃຫ້ເຮົາໃກ້ຊິດກັບເພິ່ນຫຼາຍຂຶ້ນ ຮູ້ສຶກປອດໄພ ໄດ້ຮັບການເບິ່ງແຍງຢ່າງດີ ແລະຮູ້ສຶກສົດຊື່ນ.
1. ເມື່ອເວົ້າເຖິງພະເຢໂຫວາ ເຈົ້ານຶກພາບວ່າເພິ່ນເປັນຈັ່ງໃດ?
ເຈົ້າເຄີຍລອງຈິນຕະນາການບໍວ່າພະເຢໂຫວາເປັນແນວໃດ? ຕອນທີ່ອະທິດຖານ ເຈົ້ານຶກພາບວ່າເພິ່ນເປັນຈັ່ງໃດ? ເຖິງວ່າເຮົາບໍ່ສາມາດເຫັນພະເຢໂຫວາ ແຕ່ຄຳພີໄບເບິນຊ່ວຍເຮົາໃຫ້ຮູ້ວ່າເພິ່ນເປັນແນວໃດ. ຄຳພີໄບເບິນບອກວ່າພະເຢໂຫວາ “ເປັນຕາເວັນແລະເປັນໂລ້” ແລະ “ເປັນຄືກັບໄຟທີ່ເຜົາຜານ.” (ເພງ. 84:11, ລ.ມ; ຮຣ. 12:29) ຄຳພີໄບເບິນຍັງບອກວ່າເພິ່ນເປັນຄືກັບແກ້ວໄພລິນ ເຫຼື້ອມຄືກັບເງິນປະສົມກັບຄຳ ແລະເປັນຄືກັບສາຍຮຸ້ງທີ່ເຫຼື້ອມໆ. (ເອເຊກ. 1:26-28) ຄຳພັນລະນາບາງຢ່າງທີ່ເວົ້າໃນນີ້ອາດເຮັດໃຫ້ເຮົາຮູ້ສຶກຢ້ານແລະບໍ່ກ້າເຂົ້າໃກ້ເພິ່ນ.
2. ເປັນຫຍັງບາງຄົນອາດຮູ້ສຶກວ່າຍາກທີ່ຈະເຂົ້າໃກ້ພະເຢໂຫວາ?
2 ຍ້ອນເຮົາບໍ່ສາມາດເຫັນພະເຢໂຫວາ ເຮົາອາດຮູ້ສຶກວ່າຍາກທີ່ຈະເຊື່ອວ່າເພິ່ນຮັກເຮົາ. ບາງຄົນຄິດວ່າເປັນໄປບໍ່ໄດ້ທີ່ພະເຢໂຫວາຈະຮັກເຂົາເຈົ້າ ຍ້ອນເຂົາເຈົ້າບໍ່ເຄີຍໄດ້ຮັບຄວາມຮັກຈາກຜູ້ໃດເລີຍ ແມ່ນແຕ່ຈາກພໍ່ຂອງໂຕເອງ. ພະເຢໂຫວາເຂົ້າໃຈຄວາມຮູ້ສຶກແບບນັ້ນແລະຮູ້ວ່າມັນສົ່ງຜົນຕໍ່ເຮົາແນວໃດ. ດັ່ງນັ້ນ ເພື່ອຈະຊ່ວຍໃຫ້ຮູ້ວ່າພະເຢໂຫວາຮັກເຮົາ ເພິ່ນຈຶ່ງໃຫ້ຂຽນຄຸນລັກສະນະດີໆຂອງເພິ່ນໄວ້ໃນຄຳພີໄບເບິນ.
3. ເປັນຫຍັງເຮົາຄວນເບິ່ງລະອຽດກ່ຽວກັບຄວາມຮັກຂອງພະເຢໂຫວາ?
3 ຄຳໜຶ່ງທີ່ອະທິບາຍກ່ຽວກັບພະເຢໂຫວາໄດ້ດີທີ່ສຸດແມ່ນຄວາມຮັກ. ຄຳພີໄບເບິນບອກວ່າພະເຈົ້າເປັນຄວາມຮັກ. (1ຢຮ. 4:8) ທຸກສິ່ງທີ່ພະເຢໂຫວາເຮັດແມ່ນມາຈາກຄວາມຮັກ. ຄວາມຮັກຂອງເພິ່ນຍິ່ງໃຫຍ່ຫຼາຍ ຂະໜາດຄົນທີ່ບໍ່ໄດ້ຮັກເພິ່ນ ເພິ່ນກໍຍັງສະແດງຄວາມຮັກຕໍ່ເຂົາເຈົ້າ. (ມທ. 5:44, 45) ໃນບົດຄວາມນີ້ເຮົາຈະມາເບິ່ງລະອຽດກ່ຽວກັບພະເຢໂຫວາແລະຄວາມຮັກຂອງເພິ່ນ. ແຮ່ງເຮົາຮູ້ຈັກພະເຢໂຫວາ ເຮົາກໍແຮ່ງຈະຮັກເພິ່ນຫຼາຍຂຶ້ນ.
ພະເຢໂຫວາຮັກເຮົາຫຼາຍ
4. ຄວາມຮັກຂອງພະເຢໂຫວາເຮັດໃຫ້ເຮົາຮູ້ສຶກແນວໃດ? (ເບິ່ງຮູບ)
4 “ພະເຢໂຫວາ . . . ມີຄວາມເຫັນອົກເຫັນໃຈແທ້ໆ.” (ຢກບ. 5:11) ໃນຄຳພີໄບເບິນ ພະເຢໂຫວາສົມທຽບໂຕເອງເປັນຄືກັບແມ່ທີ່ຮັກລູກ. (ອຊຢ. 66:12, 13) ໃຫ້ນຶກພາບວ່າແມ່ຜູ້ໜຶ່ງມີລູກນ້ອຍໆ. ລາວອູ້ມລູກຢູ່ຕັກ ລາວກອດລູກແລະເວົ້າກັບລູກຄ່ອຍໆ. ເມື່ອລູກໄຫ້ຫຼືຮູ້ສຶກເຈັບ ລາວກໍຈະອອຍລູກ. ຄ້າຍຄືກັນ ຕອນທີ່ເຮົາທຸກໃຈຫຼືເຈັບປວດ ເຮົາໝັ້ນໃຈໄດ້ວ່າພະເຢໂຫວາຈະຊ່ວຍເຮົາຍ້ອນເພິ່ນຮັກເຮົາ. ຜູ້ຂຽນຄຳເພງເວົ້າວ່າ: “ເມື່ອລູກອຸກໃຈຫຼາຍ ພະອົງກໍປອບໃຈລູກ.”—ເພງ. 94:19, ລ.ມ
“ເຮົາຈະປອບໂຍນພວກເຈົ້າຕໍ່ໆໄປຄືກັບແມ່ທີ່ອອຍລູກ” (ເບິ່ງຂໍ້ 4)
5. ເຈົ້າຮູ້ສຶກແນວໃດຕໍ່ຄວາມຮັກທີ່ໝັ້ນຄົງຂອງພະເຢໂຫວາ?
5 ພະເຢໂຫວາມີຄວາມຮັກທີ່ໝັ້ນຄົງ. (ເພງ. 103:8) ພະເຢໂຫວາຈະບໍ່ເຊົາຮັກເຮົາເຖິງວ່າເຮົາຈະເຮັດຜິດ. ພວກອິດສະຣາເອນເຮັດໃຫ້ພະເຢໂຫວາຜິດຫວັງຫຼາຍເທື່ອ ແຕ່ເມື່ອເຂົາເຈົ້າກັບໃຈ ເພິ່ນກໍສະແດງຄວາມຮັກທີ່ໝັ້ນຄົງຕໍ່ເຂົາເຈົ້າ. ຕົວຢ່າງເຊັ່ນ: ເພິ່ນບອກເຂົາເຈົ້າວ່າ: “[ພວກ] ເຈົ້າມີຄ່າຕໍ່ເຮົາຫຼາຍ. ເຮົາຮັກແລະໃຫ້ກຽດ [ພວກ] ເຈົ້າ.” (ອຊຢ. 43:4, 5) ໃນທຸກມື້ນີ້ ພະເຢໂຫວາກໍຍັງສະແດງຄວາມຮັກແບບນັ້ນ. ເຮົາໝັ້ນໃຈໃນຄວາມຮັກຂອງເພິ່ນໄດ້ສະເໝີ. ເຖິງວ່າເຮົາເຮັດຜິດຮ້າຍແຮງ ເພິ່ນກໍຈະບໍ່ຖິ້ມເຮົາ. ເມື່ອເຮົາກັບໃຈແລະກັບມາຫາເພິ່ນ ເພິ່ນກໍຍັງຈະຮັກເຮົາຄືເກົ່າ. ເພິ່ນສັນຍາວ່າ: “ເພິ່ນຈະຍົກໂທດໃຫ້ຢ່າງໃຈກວ້າງ.” (ອຊຢ. 55:7, ໄຂເງື່ອນ) ເມື່ອພະເຢໂຫວາຍົກໂທດໃຫ້ເຮົາ ເຮົາກໍຈະຮູ້ສຶກ “ສົດຊື່ນ.”—ກຈກ. 3:19
6. ຊາກາລີ 2:8 ສອນຫຍັງເຮົາກ່ຽວກັບພະເຢໂຫວາ?
6 ອ່ານຊາກາລີ 2:8. ພະເຢໂຫວາສົມທຽບເຮົາເປັນຄືກັບໜ່ວຍຕາຂອງເພິ່ນ. ຕາເປັນອະໄວຍະວະທີ່ບອບບາງແລະມີຄ່າຫຼາຍ. ດັ່ງນັ້ນ ມັນເປັນຄືກັບພະເຢໂຫວາເວົ້າວ່າ ‘ຜູ້ໃດທີ່ທຳຮ້າຍພວກເຈົ້າທີ່ເປັນປະຊາຊົນຂອງເຮົາ ກໍສ່ຳກັບວ່າທຳຮ້າຍສິ່ງທີ່ມີຄ່າຂອງເຮົາ.’ ຍ້ອນພະເຢໂຫວາຮັກເຮົາຫຼາຍ ເພິ່ນຈຶ່ງເຂົ້າໃຈຄວາມຮູ້ສຶກຂອງເຮົາແລະເພິ່ນພ້ອມທີ່ຈະປົກປ້ອງເຮົາ. ຖ້າເຮົາເຈັບ ເພິ່ນກໍເຈັບຄືກັນ. ເຮົາໝັ້ນໃຈໄດ້ວ່າເພິ່ນຈະຕອບຄຳອະທິດຖານຂອງເຮົາເມື່ອເຮົາອະທິດຖານວ່າ: “ຂໍພະອົງປົກປ້ອງລູກຄືກັບປົກປ້ອງໜ່ວຍຕາຂອງພະອົງ.”—ເພງ. 17:8, ລ.ມ
7. ເປັນຫຍັງເຮົາຕ້ອງເຮັດໃຫ້ໂຕເອງໝັ້ນໃຈວ່າພະເຢໂຫວາຮັກເຮົາ?
7 ພະເຢໂຫວາຢາກໃຫ້ເຮົາໝັ້ນໃຈວ່າເພິ່ນຮັກເຮົາຫຼາຍ. ແຕ່ເພິ່ນກໍຮູ້ວ່າເລື່ອງບໍ່ດີທີ່ເຮົາເຄີຍເຈິຜ່ານມາອາດເຮັດໃຫ້ເຮົາສົງໄສວ່າເພິ່ນຮັກເຮົາແທ້ໆບໍ? ຫຼືບັນຫາທີ່ເຮົາເຈິໃນຕອນນີ້ອາດເຮັດໃຫ້ເຮົາບໍ່ໝັ້ນໃຈວ່າເພິ່ນຮັກເຮົາບໍ່? ຄັນຊັ້ນ ສິ່ງໃດຈະຊ່ວຍເຮົາໃຫ້ໝັ້ນໃຈຫຼາຍຂຶ້ນວ່າພະເຢໂຫວາຮັກເຮົາ? ໃຫ້ເຮົາເບິ່ງວິທີທີ່ພະເຢໂຫວາສະແດງຄວາມຮັກຕໍ່ພະເຢຊູ ຕໍ່ຜູ້ຖືກເລືອກ ແລະຕໍ່ເຮົາທຸກຄົນ.
ພະເຢໂຫວາສະແດງຄວາມຮັກແນວໃດ?
8. ເປັນຫຍັງພະເຢຊູຈຶ່ງໝັ້ນໃຈວ່າພະເຢໂຫວາຮັກເພິ່ນ?
8 ພະເຢໂຫວາກັບພະເຢຊູຢູ່ນຳກັນຫຼາຍພັນລ້ານປີ ທັງສອງຈຶ່ງຮັກແລະໃກ້ຊິດກັນຫຼາຍ. ຄຳເວົ້າຂອງພະເຢໂຫວາໃນມັດທາຍ 17:5 ເຮັດໃຫ້ເຮົາຮູ້ວ່າເພິ່ນຮັກພະເຢຊູຫຼາຍ. ທີ່ຈິງ ພະເຢໂຫວາມີແຕ່ເວົ້າວ່າ ‘ເຮົາພໍໃຈຜູ້ນີ້ຫຼາຍ’ ກະໄດ້ແລ້ວ ແຕ່ເພິ່ນຢາກໃຫ້ເຮົາຮູ້ວ່າເພິ່ນຮັກພະເຢຊູຫຼາຍສ່ຳໃດ. ເພິ່ນຈຶ່ງເວົ້າວ່າ: “ນີ້ຄືລູກຮັກຂອງເຮົາ.” ພະເຢໂຫວາພູມໃຈໃນພະເຢຊູແລະພໍໃຈທີ່ພະເຢຊູຍອມສະລະຊີວິດເປັນຄ່າໄຖ່. (ອຟຊ. 1:7) ພະເຢຊູໝັ້ນໃຈແທ້ໆວ່າພະເຢໂຫວາຮັກເພິ່ນ. ເພິ່ນຈຶ່ງເວົ້າຫຼາຍເທື່ອວ່າພະເຢໂຫວາພໍ່ຂອງເພິ່ນຮັກເພິ່ນ.—ຢຮ. 3:35; 10:17; 17:24
9. ອັນໃດເຮັດໃຫ້ຮູ້ວ່າພະເຢໂຫວາຮັກຜູ້ຖືກເລືອກ? ຂໍໃຫ້ອະທິບາຍ. (ໂຣມ 5:5)
9 ພະເຢໂຫວາຍັງສະແດງຄວາມຮັກຕໍ່ຜູ້ຖືກເລືອກນຳ. (ອ່ານໂຣມ 5:5) ໃນພາສາດັ້ງເດີມ ຂໍ້ຄຳພີນີ້ຖ່າຍທອດຄວາມໝາຍໃຫ້ເຂົ້າໃຈວ່າພະເຢໂຫວາຮັກຜູ້ຖືກເລືອກຫຼາຍແທ້ໆ. ຄວາມຮັກນີ້ສົມທຽບວ່າເປັນຄືກັບສາຍນ້ຳທີ່ໄຫຼບໍ່ຂາດ. ຜູ້ຖືກເລືອກກໍຮູ້ຄືກັນວ່າ “[ພະເຈົ້າ] ຮັກ” ເຂົາເຈົ້າ. (ຢດ. 1) ໂຢຮັນເວົ້າເຖິງຄວາມຮູ້ສຶກຂອງຜູ້ຖືກເລືອກວ່າ: “ເບິ່ງແມ້ ພະເຈົ້າຜູ້ເປັນພໍ່ສະແດງຄວາມຮັກຕໍ່ພວກເຮົາຫຼາຍສ່ຳໃດ ພະອົງເຖິງຂັ້ນຍອມໃຫ້ພວກເຮົາຖືກເອີ້ນວ່າລູກຂອງພະເຈົ້າ.” (1ຢຮ. 3:1) ພະເຢໂຫວາຮັກແຕ່ຜູ້ຖືກເລືອກບໍ? ບໍ່ແມ່ນ. ພະເຢໂຫວາຮັກເຮົາທຸກຄົນ.
10. ສິ່ງໃດສະແດງໃຫ້ເຫັນວ່າພະເຢໂຫວາຮັກເຈົ້າ?
10 ສິ່ງໃດທີ່ສະແດງໃຫ້ເຫັນວ່າພະເຢໂຫວາຮັກທຸກຄົນ? ສິ່ງນັ້ນແມ່ນຄ່າໄຖ່. (ຢຮ. 3:16; ຣມ. 5:8) ໂດຍທາງຄ່າໄຖ່ ພະເຢໂຫວາເຮັດໃຫ້ເຫັນວ່າບໍ່ມີໃຜໃນໂລກນີ້ເຄີຍສະແດງຄວາມຮັກຫຼາຍປານນີ້. ພະເຢໂຫວາຍອມໃຫ້ລູກຊາຍທີ່ເພິ່ນຮັກຫຼາຍທີ່ສຸດມາຕາຍເພື່ອມະນຸດທຸກຄົນ ເພື່ອເຮົາຈະໄດ້ຮັບການຍົກໂທດບາບແລະສາມາດເປັນໝູ່ກັບເພິ່ນໄດ້. (1ຢຮ. 4:10) ແຮ່ງເຮົາຄິດຕຶກຕອງວ່າພະເຢໂຫວາກັບພະເຢຊູເສຍສະລະເພື່ອເຮົາຫຼາຍສ່ຳໃດ ເຮົາກໍແຮ່ງຮູ້ວ່າພວກເພິ່ນຮັກເຮົາທຸກຄົນຫຼາຍແທ້ໆ. (ຄລຕ. 2:20) ຄ່າໄຖ່ບໍ່ແມ່ນສິ່ງທີ່ພະເຢໂຫວາກຽມເພື່ອຄວາມຍຸຕິທຳ ແຕ່ເພິ່ນກຽມໃຫ້ເປັນຂອງຂວັນໃຫ້ເຮົາຍ້ອນເພິ່ນຮັກເຮົາ. ພະເຢໂຫວາເຮັດໃຫ້ເຫັນວ່າເພິ່ນຮັກເຮົາຫຼາຍແທ້ໆໂດຍຍອມສະລະສິ່ງທີ່ມີຄ່າທີ່ສຸດສຳລັບເພິ່ນເຊິ່ງກໍຄືພະເຢຊູ. ພະເຢໂຫວາຍອມໃຫ້ພະເຢຊູລູກຊາຍຂອງເພິ່ນທົນທຸກທໍລະມານແລະຕາຍເພື່ອເຮົາ.
11. ເຮົາໄດ້ຮຽນຫຍັງຈາກເຢເຣມີ 31:3?
11 ຄືກັບທີ່ເຮົາໄດ້ຮຽນມາແລ້ວ ພະເຢໂຫວາບໍ່ພຽງແຕ່ຮູ້ສຶກຮັກເຮົາ ແຕ່ເພິ່ນຍັງສະແດງຄວາມຮັກອອກມານຳ. (ອ່ານເຢເຣມີ 31:3) ຍ້ອນພະເຢໂຫວາຮັກເຮົາ ເພິ່ນຈຶ່ງເຮັດໃຫ້ເຮົາເຂົ້າມາໃກ້ເພິ່ນ. (ສົມທຽບກັບພະບັນຍັດ 7:7, 8) ບໍ່ມີຫຍັງທີ່ຈະຂັດຂວາງຄວາມຮັກທີ່ພະເຢໂຫວາສະແດງຕໍ່ເຮົາໄດ້. (ຣມ. 8:38, 39) ຄວາມຮັກຂອງພະເຢໂຫວາເຮັດໃຫ້ເຈົ້າຮູ້ສຶກແນວໃດ? ໃຫ້ອ່ານຄຳເພງບົດ 23 ແລະເບິ່ງວ່າຄວາມຮັກແລະການເບິ່ງແຍງຈາກພະເຢໂຫວາສົ່ງຜົນຕໍ່ດາວິດແນວໃດ ແລະຄວາມຮັກແບບດຽວກັນນັ້ນສົ່ງຜົນແນວໃດຕໍ່ເຮົາທຸກຄົນ.
ຄວາມຮັກຂອງພະເຢໂຫວາເຮັດໃຫ້ເຈົ້າຮູ້ສຶກແນວໃດ?
12. ຄຳເພງບົດ 23 ເວົ້າເຖິງຫຍັງ?
12 ອ່ານຄຳເພງ 23:1-6. ໃນຄຳເພງບົດ 23 ສະແດງເຖິງຄວາມໝັ້ນໃຈ ຄວາມຮັກ ແລະການເບິ່ງແຍງຂອງພະເຢໂຫວາ. ດາວິດເປັນຜູ້ຂຽນຄຳເພງບົດນີ້. ລາວເວົ້າວ່າລາວກັບພະເຢໂຫວາທີ່ເປັນຜູ້ລ້ຽງແກະສະໜິດກັນຫຼາຍແທ້ໆ. ດາວິດບອກວ່າລາວຮູ້ສຶກປອດໄພທີ່ພະເຢໂຫວາຊີ້ນຳລາວແລະລາວກໍໄວ້ໃຈພະເຢໂຫວາເຕັມຮ້ອຍ. ດາວິດຮູ້ວ່າພະເຢໂຫວາຈະສະແດງຄວາມຮັກຕໍ່ລາວທຸກມື້ຕະຫຼອດຊີວິດຂອງລາວ. ເປັນຫຍັງດາວິດຈຶ່ງໝັ້ນໃຈແບບນັ້ນ?
13. ເປັນຫຍັງດາວິດຈຶ່ງໝັ້ນໃຈວ່າພະເຢໂຫວາຈະເບິ່ງແຍງລາວ?
13 “ຂ້ອຍຈະບໍ່ຂາດເຂີນຫຍັງ.” ດາວິດເຫັນວ່າພະເຢໂຫວາເບິ່ງແຍງລາວໃຫ້ມີສິ່ງຈຳເປັນບໍ່ເຄີຍຂາດ ແລະລາວຍັງຮູ້ວ່າພະເຢໂຫວາເປັນໝູ່ລາວແລະພໍໃຈລາວ. ເລື່ອງນີ້ເຮັດໃຫ້ລາວໝັ້ນໃຈວ່າ ບໍ່ວ່າຈະເກີດຫຍັງຂຶ້ນໃນອະນາຄົດ ພະເຢໂຫວາຈະເບິ່ງແຍງລາວໃຫ້ມີສິ່ງຈຳເປັນສະເໝີ. ຍ້ອນດາວິດໝັ້ນໃຈວ່າພະເຢໂຫວາຮັກແລະຈະເບິ່ງແຍງລາວ ລາວຈຶ່ງດີໃຈ ມີຄວາມສຸກ ແລະບໍ່ກັງວົນຫຍັງ.—ເພງ. 16:11
14. ພະເຢໂຫວາເບິ່ງແຍງເຮົາແນວໃດ?
14 ພະເຢໂຫວາຮັກແລະເບິ່ງແຍງເຮົາສະເໝີ ໂດຍສະເພາະຕອນທີ່ເຮົາເຈິບັນຫາໜັກໆໃນຊີວິດ. ໃຫ້ເຮົາມາເບິ່ງປະສົບການຂອງພີ່ນ້ອງຍິງທີ່ຊື່ແຄລ. a ລາວຮັບໃຊ້ຢູ່ເບເທນຫຼາຍກວ່າ 20 ປີ. ຕອນທີ່ຄອບຄົວຂອງລາວເຈິບັນຫາທີ່ໜັກໆຫຼາຍຢ່າງ ລາວບໍ່ຮູ້ວ່າຈະຊ່ວຍເຂົາເຈົ້າແນວໃດ. ພໍ່ຂອງລາວເສັ້ນເລືອດໃນສະໝອງແຕກ ນ້ອງສາວຂອງລາວຖືກຕັດສຳພັນ ທຸລະກິດນ້ອຍໆຂອງຄອບຄົວກໍໄປບໍ່ລອດ. ຊ້ຳບໍ່ໜຳເຮືອນກໍຖືກຍຶດ. ພະເຢໂຫວາເບິ່ງແຍງຄອບຄົວຂອງລາວແນວໃດ? ແຄລເວົ້າວ່າ: “ພະເຢໂຫວາເບິ່ງແຍງຄອບຄົວຂອງຂ້ອຍໃຫ້ມີສິ່ງຈຳເປັນໃນແຕ່ລະມື້. ມີຫຼາຍເທື່ອຂ້ອຍເຫັນວ່າພະເຢໂຫວາໃຫ້ສິ່ງຈຳເປັນກັບເຮົາຫຼາຍກວ່າທີ່ເຮົາຄິດໄວ້ຊ້ຳ. ຂ້ອຍມັກຄິດເຖິງສິ່ງດີໆທີ່ພະເຢໂຫວາເຮັດເພື່ອຂ້ອຍແລະຄອບຄົວຂອງຂ້ອຍ ເຊິ່ງຂ້ອຍຈະບໍ່ມີວັນລືມເລີຍ. ເມື່ອຄິດເຖິງເລື່ອງເຫຼົ່ານີ້ກໍຊ່ວຍຂ້ອຍໃຫ້ຮັບໃຊ້ພະເຢໂຫວາຢ່າງມີຄວາມສຸກຕໍ່ໆໄປໄດ້ເຖິງວ່າຈະເຈິບັນຫາໃນຊີວິດ.”
15. ເປັນຫຍັງດາວິດຈຶ່ງຮູ້ສຶກສົດຊື່ນ? (ເບິ່ງຮູບ)
15 “ເພິ່ນເຮັດໃຫ້ຂ້ອຍສົດຊື່ນຂຶ້ນ.” ບາງເທື່ອດາວິດຮູ້ສຶກທຸກໃຈຍ້ອນເຈິບັນຫາຫຼາຍຢ່າງ. (ເພງ. 18:4-6) ແຕ່ລາວກໍຮູ້ສຶກສົດຊື່ນຍ້ອນໄດ້ຮັບຄວາມຮັກແລະການເບິ່ງແຍງຈາກພະເຢໂຫວາ. ພະເຢໂຫວາໄດ້ພາດາວິດໝູ່ຂອງເພິ່ນທີ່ຮູ້ສຶກໝົດແຮງໄປຢູ່ບ່ອນທີ່ມີ “ທົ່ງຫຍ້າທີ່ຂຽວງາມ” ແລະພາ “ໄປເຊົາເມື່ອຍຢູ່ແຄມນ້ຳ.” ຍ້ອນແນວນີ້ ດາວິດຈຶ່ງມີແຮງຂຶ້ນມາອີກແລະຮັບໃຊ້ພະເຢໂຫວາຕໍ່ໆໄປໄດ້ຢ່າງມີຄວາມສຸກ.—ເພງ. 18:28-32, ລ.ມ
ເຖິງວ່າດາວິດຈະທຸກໃຈ ແຕ່ລາວກໍຮູ້ສຶກສົດຊື່ນຍ້ອນຮູ້ວ່າພະເຢໂຫວາຮັກລາວ (ເບິ່ງຂໍ້ 15)
16. ຄວາມຮັກຂອງພະເຢໂຫວາເຮັດໃຫ້ເຈົ້າສົດຊື່ນແນວໃດ?
16 ໃນທຸກມື້ນີ້ກໍຄືກັນ ເມື່ອເຮົາເຈິຄວາມຍາກລຳບາກໃນຊີວິດ “ຍ້ອນຄວາມຮັກທີ່ໝັ້ນຄົງຂອງພະເຢໂຫວາ ພວກເຮົາຈຶ່ງບໍ່ເຈິຈຸດຈົບ.” (ຮ່ຳໄຮ. 3:22; ກລຊ. 1:11) ໃຫ້ເຮົາມາເບິ່ງຕົວຢ່າງຂອງເຣໂຊ. ລາວຮູ້ສຶກເຈັບປວດໃຈຫຼາຍຍ້ອນຜົວຖິ້ມລາວແລະຖິ້ມພະເຢໂຫວາຕອນພະຍາດໂຄວິດ-19 ລະບາດ. ພະເຢໂຫວາໄດ້ຊ່ວຍເຣໂຊແນວໃດ? ລາວບອກວ່າ: “ພະເຢໂຫວາເຮັດໃຫ້ຂ້ອຍໝັ້ນໃຈວ່າເພິ່ນຮັກຂ້ອຍ. ເພິ່ນໃຫ້ຂ້ອຍມີໝູ່ທີ່ມາໃຊ້ເວລານຳກັນ ເອົາຂອງກິນມາໃຫ້ ສົ່ງຂໍ້ຄວາມແລະຂໍ້ຄຳພີທີ່ໃຫ້ກຳລັງໃຈ ຍິ້ມໃຫ້ຂ້ອຍ ແລະເຕືອນຂ້ອຍເລື້ອຍໆວ່າພະເຢໂຫວາກຳລັງເບິ່ງແຍງຂ້ອຍຢູ່. ຂ້ອຍຂອບໃຈພະເຢໂຫວາຕະຫຼອດທີ່ໃຫ້ຂ້ອຍໄດ້ຢູ່ໃນຄອບຄົວໃຫຍ່ທີ່ໜ້າຮັກແບບນີ້.”
17. ເປັນຫຍັງດາວິດຈຶ່ງບໍ່ຢ້ານ?
17 “ລູກບໍ່ຢ້ານຫຍັງ ເພາະພະອົງຢູ່ກັບລູກ.” ດາວິດຕົກຢູ່ໃນອັນຕະລາຍເລື້ອຍໆແລະຕ້ອງເຈິກັບສັດຕູທີ່ມີອຳນາດແລະແຂງແຮງຫຼາຍກວ່າລາວ. ແຕ່ຄວາມຮັກຂອງພະເຢໂຫວາເຮັດໃຫ້ດາວິດຮູ້ສຶກປອດໄພ. ລາວຮູ້ສຶກວ່າພະເຢໂຫວາຢູ່ກັບລາວໃນທຸກສະຖານະການ. ຍ້ອນແນວນີ້ລາວຈຶ່ງໝັ້ນໃຈວ່າລາວຈະໄດ້ຮັບການປົກປ້ອງຈາກພະເຢໂຫວາ. ລາວຮ້ອງເພງວ່າ: “[ພະເຢໂຫວາ] ຊ່ວຍຂ້ອຍໃຫ້ເອົາຊະນະຄວາມຢ້ານທຸກຢ່າງ.” (ເພງ. 34:4, ລ.ມ) ເຖິງວ່າບາງເທື່ອດາວິດຮູ້ສຶກຢ້ານຫຼາຍ ແຕ່ລາວກໍເອົາຊະນະຄວາມຢ້ານໄດ້ ຍ້ອນຮູ້ວ່າພະເຢໂຫວາຮັກລາວ.
18. ຄວາມຮັກຂອງພະເຢໂຫວາຈະຊ່ວຍເຈົ້າແນວໃດຕອນທີ່ຮູ້ສຶກຢ້ານ?
18 ຍ້ອນຮູ້ວ່າພະເຢໂຫວາຮັກເຮົາ ມັນຊ່ວຍເຮົາແນວໃດຕອນທີ່ເຈິກັບສະຖານະການທີ່ເຮັດໃຫ້ຮູ້ສຶກຢ້ານ? ໄພໂອເນຍທີ່ຊື່ຊູຊີ້ເລົ່າວ່າ ລາວກັບຜົວຮູ້ສຶກແນວໃດຕອນທີ່ລູກຊາຍຂ້າໂຕຕາຍ. ລາວເວົ້າວ່າ: “ເຫດການຮ້າຍແຮງທີ່ເກີດຂຶ້ນແບບບໍ່ທັນຕັ້ງໂຕເຮັດໃຫ້ເຮົາບໍ່ຮູ້ວ່າຈະເຮັດແນວໃດ. ເຮົາຢ້ານວ່າຈະມີເລື່ອງທີ່ບໍ່ດີແບບນີ້ເກີດຂຶ້ນອີກ. ແຕ່ເຮົາຮູ້ວ່າພະເຢໂຫວາຮັກເຮົາ ເຮົາຈຶ່ງຮູ້ສຶກປອດໄພ. ເຣໂຊທີ່ເວົ້າເຖິງກ່ອນໜ້ານີ້ບອກວ່າ: “ມີຄືນໜຶ່ງຂ້ອຍຮູ້ສຶກເສົ້າ ກັງວົນ ແລະຢ້ານຫຼາຍ. ຂ້ອຍຈຶ່ງຮ້ອງໄຫ້ແລະອະທິດຖານຂໍໃຫ້ພະເຢໂຫວາຊ່ວຍ. ບໍ່ດົນຂ້ອຍກໍຮູ້ສຶກວ່າພະເຢໂຫວາກຳລັງປອບໃຈຂ້ອຍຄືກັບແມ່ປອບໃຈລູກນ້ອຍ. ຂ້ອຍຈຶ່ງສະຫງົບໃຈແລ້ວກໍນອນຫຼັບໄດ້. ຂ້ອຍບໍ່ເຄີຍລືມຄືນນັ້ນເລີຍ.” ຜູ້ດູແລຄົນໜຶ່ງທີ່ຊື່ທາໂຊຕ້ອງຕິດຄຸກ 4 ປີຍ້ອນບໍ່ຍອມເປັນທະຫານ. ລາວໄດ້ຮັບຄວາມຮັກແລະການເບິ່ງແຍງຈາກພະເຢໂຫວາແນວໃດ? ລາວເລົ່າວ່າ: “ພະເຢໂຫວາເບິ່ງແຍງຂ້ອຍໃຫ້ມີສິ່ງຈຳເປັນແລະເພິ່ນໃຫ້ຂ້ອຍຫຼາຍກວ່າທີ່ຂ້ອຍຂໍຊ້ຳ. ເລື່ອງນີ້ເຮັດໃຫ້ຂ້ອຍສາມາດໄວ້ໃຈພະເຢໂຫວາໄດ້ເຕັມຮ້ອຍ. ນອກຈາກນັ້ນ ພະເຢໂຫວາຍັງໃຫ້ພະລັງບໍລິສຸດກັບຂ້ອຍ ເຊິ່ງເຮັດໃຫ້ຂ້ອຍມີຄວາມສຸກໄດ້ເຖິງວ່າຈະຢູ່ໃນສະພາບແວດລ້ອມທີ່ບໍ່ດີແບບນີ້. ເລື່ອງນີ້ເຮັດໃຫ້ຂ້ອຍເຫັນວ່າ ແຮ່ງຂ້ອຍໄວ້ວາງໃຈພະເຢໂຫວາ ຂ້ອຍກໍແຮ່ງຮູ້ວ່າເພິ່ນຮັກຂ້ອຍ. ດັ່ງນັ້ນ ຂ້ອຍຈຶ່ງເລີ່ມເປັນໄພໂອເນຍປະຈຳຕັ້ງແຕ່ຕອນຢູ່ໃນຄຸກ.”
ເຂົ້າມາໃກ້ຊິດກັບພະເຈົ້າທີ່ຮັກເຈົ້າ
19. (ກ) ເມື່ອເຮົາຮູ້ວ່າພະເຢໂຫວາຮັກເຮົາ ເຮົາຈະອະທິດຖານແບບໃດ? (ຂ) ຂໍ້ຄຳພີທີ່ກ່ຽວຂ້ອງກັບຄວາມຮັກຂອງພະເຢໂຫວາທີ່ເຈົ້າມັກເປັນພິເສດແມ່ນຂໍ້ໃດ? (ເບິ່ງຂອບ “ ຂໍ້ຄຳພີທີ່ຊ່ວຍໃຫ້ຮູ້ວ່າພະເຢໂຫວາຮັກເຮົາ.”)
19 ປະສົບການທີ່ເຮົາໄດ້ເວົ້າເຖິງກ່ອນໜ້ານີ້ເຮັດໃຫ້ເຫັນວ່າພະເຢໂຫວາທີ່ເປັນ “ພະເຈົ້າຜູ້ມີຄວາມຮັກ” ຢູ່ກັບເຮົາ. (2ກຣ. 13:11) ເພິ່ນສົນໃຈເຮົາແຕ່ລະຄົນເປັນສ່ວນໂຕແລະເຮົາໝັ້ນໃຈວ່າເຮົາຈະໄດ້ຮັບ “ຄວາມຮັກທີ່ໝັ້ນຄົງຈາກເພິ່ນ.” (ເພງ. 32:10, ລ.ມ) ແຮ່ງເຮົາຄິດຕຶກຕອງກ່ຽວກັບວິທີທີ່ພະເຢໂຫວາສະແດງຄວາມຮັກຕໍ່ເຮົາ ເຮົາກໍແຮ່ງໝັ້ນໃຈຫຼາຍຂຶ້ນວ່າເພິ່ນເປັນຫ່ວງເຮົາແລະເຮັດໃຫ້ເຮົາສະໜິດກັບເພິ່ນຫຼາຍຂຶ້ນ. ເຮົາສາມາດອະທິດຖານລົມກັບພະເຢໂຫວາໄດ້ທຸກເລື່ອງ ບອກເພິ່ນວ່າເຮົາຕ້ອງການຄວາມຮັກຈາກເພິ່ນຫຼາຍແທ້ໆ. ບອກເພິ່ນວ່າເຮົາກັງວົນເລື່ອງຫຍັງ ແລະໝັ້ນໃຈໄດ້ວ່າພະເຢໂຫວາເຂົ້າໃຈຄວາມຮູ້ສຶກຂອງເຮົາແລະຢາກຊ່ວຍເຮົາແທ້ໆ.—ເພງ. 145:18, 19
20. ເປັນຫຍັງເຮົາຈຶ່ງຢາກໄດ້ຮັບຄວາມຮັກຈາກພະເຢໂຫວາ?
20 ໃນມື້ທີ່ອາກາດໜາວໆເຮົາຄືຊິຢາກຢູ່ໃກ້ໆກອງໄຟເພື່ອໃຫ້ຮ່າງກາຍອຸ່ນ. ຄ້າຍຄືກັນ ໃນມື້ທີ່ຊີວິດຂອງເຮົາມີບັນຫາແລະເຈິຄວາມລຳບາກ ເຮົາກໍຢາກຢູ່ໃກ້ພະເຢໂຫວາເພື່ອໃຫ້ເພິ່ນຊ່ວຍເຮົາ. ດັ່ງນັ້ນ ຂໍໃຫ້ເຈົ້າມີຄວາມສຸກທີ່ພະເຢໂຫວາມອບຄວາມຮັກທີ່ອົບອຸ່ນໃຫ້ເຈົ້າ. ຂໍໃຫ້ເຮົາທຸກຄົນຕອບຮັບຄວາມຮັກນີ້ໂດຍເວົ້າວ່າ: “ຂ້ອຍຮັກພະເຢໂຫວາ”!—ເພງ. 116:1, ລ.ມ
ເຈົ້າຈະຕອບແນວໃດ?
-
ເຈົ້າຈະອະທິບາຍຄວາມຮັກຂອງພະເຢໂຫວາແນວໃດ?
-
ເປັນຫຍັງເຈົ້າຈຶ່ງໝັ້ນໃຈວ່າພະເຢໂຫວາຮັກເຈົ້າຫຼາຍ?
-
ຄວາມຮັກຂອງພະເຢໂຫວາເຮັດໃຫ້ເຈົ້າຮູ້ສຶກແນວໃດ?
ເພງທີ 108 ຄວາມຮັກທີ່ໝັ້ນຄົງຂອງພະເຈົ້າ
a ຊື່ສົມມຸດ.
