ບົດຄວາມສຶກສາທີ 2
ເພງທີ 19 ອາຫານຄ່ຳຂອງຜູ້ເປັນນາຍ
ເຈົ້າພ້ອມສຳລັບມື້ທີ່ສຳຄັນທີ່ສຸດຂອງປີບໍ?
“ໃຫ້ເຮັດແບບນີ້ຕໍ່ໆໄປເພື່ອລະນຶກເຖິງຂ້ອຍ.”—ລກ. 22:19
ຈຸດສຳຄັນ
ໃຫ້ເຮົາມາເບິ່ງວ່າການປະຊຸມອະນຸສອນພິເສດແນວໃດ ເຮົາຈະກຽມໂຕແນວໃດໃຫ້ພ້ອມ ແລະເຮົາຈະເຮັດແນວໃດເພື່ອຊ່ວຍຄົນອື່ນໃຫ້ເຂົ້າຮ່ວມການປະຊຸມນີ້.
1. ເປັນຫຍັງການປະຊຸມອະນຸສອນຈຶ່ງເປັນມື້ທີ່ສຳຄັນທີ່ສຸດຂອງປີ? (ລູກາ 22:19, 20)
ສຳລັບພະຍານພະເຢໂຫວາ ການປະຊຸມອະນຸສອນເພື່ອລະນຶກເຖິງການຕາຍຂອງພະເຢຊູເປັນມື້ທີ່ສຳຄັນທີ່ສຸດຂອງປີ. ການປະຊຸມນີ້ເປັນພຽງເຫດການດຽວທີ່ພະເຢຊູສັ່ງພວກລູກສິດຂອງເພິ່ນໃຫ້ເຮັດ. (ອ່ານລູກາ 22:19, 20) ມີຫຼາຍເຫດຜົນທີ່ເຮັດໃຫ້ເຮົາລໍຖ້າການປະຊຸມອະນຸສອນ. ໃຫ້ເຮົາມາເບິ່ງບາງເຫດຜົນນຳກັນ.
2. ເປັນຫຍັງເຮົາຈຶ່ງລໍຖ້າໃຫ້ຮອດການປະຊຸມອະນຸສອນ?
2 ການປະຊຸມອະນຸສອນຊ່ວຍເຮົາໃຫ້ຄິດເຖິງຄວາມສຳຄັນຂອງຄ່າໄຖ່ທີ່ພະເຢຊູສະລະເພື່ອເຮົາ ແລະຊ່ວຍເຮົາໃຫ້ຄິດເຖິງວິທີທີ່ເຮົາຈະສະແດງຄວາມຂອບໃຈຕໍ່ສິ່ງທີ່ເພິ່ນເຮັດ. (2ກຣ. 5:14, 15) ການປະຊຸມອະນຸສອນຍັງເຮັດໃຫ້ເຮົາມີໂອກາດ “ໃຫ້ກຳລັງໃຈກັນແລະກັນ.” (ຣມ. 1:12) ໃນແຕ່ລະປີ ຫຼາຍຄົນທີ່ເຊົາຮັບໃຊ້ພະເຢໂຫວາໄດ້ເຂົ້າຮ່ວມການປະຊຸມອະນຸສອນ. ບາງຄົນກໍຖືກກະຕຸ້ນໃຫ້ກັບມາຫາພະເຢໂຫວາຍ້ອນໄດ້ຮັບການຕ້ອນຮັບຢ່າງອົບອຸ່ນ. ຜູ້ສົນໃຈຫຼາຍຄົນທີ່ເຂົ້າຮ່ວມກໍເລີ່ມສຶກສາຄຳພີໄບເບິນຍ້ອນເຂົາເຈົ້າປະທັບໃຈສິ່ງທີ່ໄດ້ເຫັນແລະໄດ້ຟັງຢູ່ການປະຊຸມນີ້. ດັ່ງນັ້ນ ການປະຊຸມອະນຸສອນຈຶ່ງເປັນການປະຊຸມທີ່ພິເສດຫຼາຍແທ້ໆສຳລັບເຮົາ!
3. ການປະຊຸມອະນຸສອນເຮັດໃຫ້ພວກເຮົາທີ່ຢູ່ທົ່ວໂລກເປັນອັນໜຶ່ງອັນດຽວກັນແນວໃດ? (ເບິ່ງຮູບ)
3 ເຮົາລໍຖ້າໃຫ້ຮອດການປະຊຸມອະນຸສອນຍ້ອນເຮົາຮູ້ວ່າໃນມື້ນັ້ນຈະເຮັດໃຫ້ພວກເຮົາທີ່ຢູ່ທົ່ວໂລກເປັນອັນໜຶ່ງອັນດຽວກັນ. ພະຍານພະເຢໂຫວາຢູ່ທົ່ວໂລກຈະເຂົ້າຮ່ວມການປະຊຸມນີ້ຫຼັງຈາກຕາເວັນຕົກ. ຢູ່ການປະຊຸມນີ້ເຮົາຈະໄດ້ຟັງຄຳບັນລະຍາຍທີ່ເນັ້ນຄວາມສຳຄັນຂອງຄ່າໄຖ່ ຮ້ອງເພງສັນລະເສີນພະເຈົ້ານຳກັນ 2 ເພງ ສົ່ງຕໍ່ເຂົ້າຈີ່ແລະເຫຼົ້າແວງ ແລະອະທິດຖານນຳກັນ 4 ເທື່ອ. ທຸກປະຊາຄົມຢູ່ທົ່ວໂລກຈະເຮັດແບບດຽວກັນນີ້ພາຍໃນ 24 ຊົ່ວໂມງ. ໃຫ້ນຶກພາບວ່າພະເຢໂຫວາແລະພະເຢຊູຈະມີຄວາມສຸກຫຼາຍສ່ຳໃດທີ່ເຫັນພວກເຮົາຢູ່ທົ່ວໂລກເປັນນ້ຳໜຶ່ງໃຈດຽວກັນໃນການປະຊຸມອະນຸສອນ.
ການປະຊຸມອະນຸສອນເຮັດໃຫ້ພວກເຮົາເປັນອັນໜຶ່ງອັນດຽວກັນ (ເບິ່ງຂໍ້ 3) g
4. ໃນບົດຄວາມນີ້ເຮົາຈະລົມກັນເລື່ອງຫຍັງ?
4 ໃນບົດຄວາມນີ້ ເຮົາຈະລົມກັນກ່ຽວກັບຄຳຖາມຕໍ່ໄປນີ້: ເຮົາຈະກຽມຫົວໃຈແນວໃດໃຫ້ພ້ອມສຳລັບການປະຊຸມອະນຸສອນ? ເຮົາຈະຊ່ວຍຄົນອື່ນແນວໃດໃຫ້ໄດ້ຮັບປະໂຫຍດຈາກການປະຊຸມນີ້? ແລະເຮົາຈະຊ່ວຍຄົນທີ່ເຊົາຮັບໃຊ້ພະເຢໂຫວາໄດ້ແນວໃດ? ຄຳຕອບຂອງຄຳຖາມເຫຼົ່ານີ້ຈະຊ່ວຍເຮົາໃຫ້ພ້ອມສຳລັບການປະຊຸມອະນຸສອນ ເຊິ່ງເປັນການປະຊຸມທີ່ສຳຄັນທີ່ສຸດ.
ເຮົາຈະກຽມຫົວໃຈແນວໃດໃຫ້ພ້ອມສຳລັບການປະຊຸມອະນຸສອນ?
5. (ກ) ເປັນຫຍັງເຮົາຄວນຄິດຕຶກຕອງກ່ຽວກັບຄຸນຄ່າຂອງຄ່າໄຖ່? (ຄຳເພງ 49:7, 8) (ຂ) ເຮົາໄດ້ຮຽນຫຍັງຈາກວິດີໂອເປັນຫຍັງພະເຢຊູຈຶ່ງຕາຍ?
5 ວິທີທີ່ສຳຄັນທີ່ສຸດວິທີໜຶ່ງທີ່ເຮົາຈະກຽມຫົວໃຈໃຫ້ພ້ອມສຳລັບການປະຊຸມອະນຸສອນແມ່ນການຄິດຕຶກຕອງວ່າຄ່າໄຖ່ມີຄ່າຫຼາຍສ່ຳໃດ. ເຮົາບໍ່ມີທາງທີ່ຈະໄຖ່ຊີວິດຂອງໂຕເອງໃຫ້ພົ້ນຈາກບາບແລະຄວາມຕາຍໄດ້. (ອ່ານຄຳເພງ 49:7, 8; ເບິ່ງວິດີໂອເປັນຫຍັງພະເຢຊູຈຶ່ງຕາຍ?) a ຍ້ອນແນວນີ້ພະເຢໂຫວາຈຶ່ງໃຫ້ພະເຢຊູມາຕາຍເປັນຄ່າໄຖ່ເພື່ອຊ່ວຍເຮົາໃຫ້ລອດ. ພະເຢໂຫວາແລະພະເຢຊູໄດ້ເສຍສະລະຫຼາຍແທ້ໆ. (ຣມ. 6:23) ແຮ່ງເຮົາຄິດຕຶກຕອງວ່າພະເຢໂຫວາແລະພະເຢຊູເສຍສະລະຫຍັງແດ່ເພື່ອເຮົາ ເຮົາກໍແຮ່ງຈະເຫັນຄ່າຄ່າໄຖ່ຫຼາຍຂຶ້ນ. ໃນບົດຄວາມນີ້ເຮົາຈະເຫັນວ່າພະເຢໂຫວາແລະພະເຢຊູຕ້ອງເສຍສະລະຫຍັງແດ່ເພື່ອຈັດກຽມຄ່າໄຖ່. ແຕ່ທຳອິດເຮົາຈະມາເບິ່ງນຳກັນວ່າຄ່າໄຖ່ແມ່ນຫຍັງ?
6. ຄ່າໄຖ່ແມ່ນຫຍັງ?
6 ຄ່າໄຖ່ແມ່ນສິ່ງທີ່ຈ່າຍໄປເພື່ອຊື້ບາງຢ່າງຄືນມາ. ອາດາມມະນຸດຄົນທຳອິດຖືກສ້າງໃຫ້ເປັນຄົນສົມບູນແບບ ແຕ່ລາວເຮັດຜິດ. ລາວຈຶ່ງສູນເສຍໂອກາດທີ່ຈະມີຊີວິດຕະຫຼອດໄປ ບໍ່ແມ່ນແຕ່ລາວເທົ່ານັ້ນ ລູກຫຼານຂອງລາວກໍເສຍໂອກາດນັ້ນຄືກັນ. ເພື່ອຈະຊື້ສິ່ງທີ່ອາດາມເຮັດໃຫ້ສູນເສຍໄປກັບຄືນມາ ພະເຢຊູຈຶ່ງຕ້ອງສະລະຊີວິດທີ່ສົມບູນແບບຂອງເພິ່ນເພື່ອເປັນຄ່າໄຖ່. ຕະຫຼອດຊີວິດຂອງພະເຢຊູທີ່ຢູ່ໃນໂລກ ເພິ່ນ “ບໍ່ເຄີຍເຮັດບາບແລະບໍ່ເຄີຍເວົ້າຫຼອກລວງເລີຍ.” (1ປຕ. 2:22) ຕອນທີ່ພະເຢຊູຕາຍ ເພິ່ນກໍຍັງເປັນມະນຸດສົມບູນແບບ. ຍ້ອນແນວນີ້ ເພິ່ນຈຶ່ງສາມາດຊື້ຊີວິດສົມບູນແບບທີ່ອາດາມເຮັດໃຫ້ສູນເສຍໄປກັບຄືນມາໄດ້.—1ກຣ. 15:45; 1ຕມ. 2:6
7. ຕອນທີ່ພະເຢຊູຢູ່ໃນໂລກ ເພິ່ນເຈິການທົດສອບຫຍັງແດ່?
7 ຕອນທີ່ພະເຢຊູຢູ່ໃນໂລກ ເພິ່ນເຈິການທົດສອບຫຼາຍຢ່າງ ແຕ່ເພິ່ນຍັງສັດຊື່ແລະເຊື່ອຟັງພະເຢໂຫວາໃນທຸກສິ່ງ. ຕອນທີ່ພະເຢຊູເປັນເດັກນ້ອຍ ເພິ່ນເຊື່ອຟັງພໍ່ແມ່ທີ່ເປັນຄົນບໍ່ສົມບູນແບບທັງໆທີ່ເພິ່ນເປັນຄົນສົມບູນແບບ. (ລກ. 2:51) ຕອນພະເຢຊູເປັນໄວລຸ້ນ ເພິ່ນຕ້ອງຕ້ານທານຄວາມກົດດັນຈາກຄົນອື່ນທີ່ບໍ່ໃຫ້ເຊື່ອຟັງພໍ່ແມ່ແລະບໍ່ໃຫ້ສັດຊື່ຕໍ່ພະເຢໂຫວາ. ຕອນທີ່ໃຫຍ່ແລ້ວ ເພິ່ນຕ້ອງຕ້ານທານການລໍ້ໃຈຈາກຊາຕານ ມັນເຖິງຂັ້ນບອກເພິ່ນກົງໆວ່າໃຫ້ເຊົາສັດຊື່ຕໍ່ພະເຢໂຫວາ. (ມທ. 4:1-11) ຊາຕານເຮັດແບບນີ້ຍ້ອນມັນຕັ້ງໃຈໃຫ້ພະເຢຊູເຮັດຜິດເພື່ອເພິ່ນຈະບໍ່ສາມາດເປັນຄ່າໄຖ່ໄດ້.
8. ພະເຢຊູອົດທົນກັບຄວາມລຳບາກຫຍັງອີກ?
8 ຕອນທີ່ພະເຢຊູຮັບໃຊ້ຢູ່ໃນໂລກ ເພິ່ນເຈິຄວາມລຳບາກແນວອື່ນນຳ. ເພິ່ນເຈິການຂົ່ມເຫງແລະມີຄົນພະຍາຍາມຈະຂ້າເພິ່ນ. (ລກ. 4:28, 29; 13:31) ພະເຢຊູຕ້ອງອົດທົນກັບຄວາມບໍ່ສົມບູນແບບຂອງພວກລູກສິດ. (ມຣກ. 9:33, 34) ຕອນທີ່ຖືກພິຈາລະນາຄະດີ ເພິ່ນຖືກເຍາະເຍີ້ຍແລະຖືກທໍລະມານຢ່າງໜັກ. ຈາກນັ້ນ ເພິ່ນກໍຖືກຕັດສິນປະຫານຊີວິດຄືກັບອາດຊະຍາກອນແລະເຈັບປວດທໍລະມານຫຼາຍ. (ຮຣ. 12:1-3) ຕອນໃກ້ຊິຕາຍ ພະເຢຊູຕ້ອງອົດທົນດ້ວຍໂຕເອງໂດຍທີ່ບໍ່ມີພະເຢໂຫວາປົກປ້ອງ. b—ມທ. 27:46
9. ເຮົາຮູ້ສຶກແນວໃດຕໍ່ການເສຍສະລະຂອງພະເຢຊູ? (1 ເປໂຕ 1:8)
9 ເຫັນໄດ້ແຈ້ງວ່າພະເຢຊູຕ້ອງທົນທຸກທໍລະມານຫຼາຍແທ້ໆເພື່ອເປັນຄ່າໄຖ່ໃຫ້ເຮົາ. ເມື່ອຄິດເຖິງທຸກສິ່ງທີ່ພະເຢຊູເຕັມໃຈເຮັດເພື່ອເຮົາ ເຮົາກໍຮັກເພິ່ນຫຼາຍແທ້ໆ!—ອ່ານ 1 ເປໂຕ 1:8
10. ພະເຢໂຫວາຍອມເສຍສະລະຫຍັງໃນເລື່ອງຄ່າໄຖ່?
10 ພະເຢໂຫວາຍອມເສຍສະລະຫຍັງເພື່ອໃຫ້ພະເຢຊູມາເປັນຄ່າໄຖ່? ພະເຢໂຫວາກັບພະເຢຊູເປັນພໍ່ລູກທີ່ສະໜິດກັນຫຼາຍທີ່ສຸດ. (ສຸພາ. 8:30) ລອງຄິດເບິ່ງວ່າພະເຢໂຫວາຈະຮູ້ສຶກເຈັບປວດຫຼາຍສ່ຳໃດທີ່ເຫັນລູກຊາຍຂອງເພິ່ນຖືກຂົ່ມເຫງ ຖືກປະຕິເສດ ແລະທົນທຸກທໍລະມານ.
11. ພະເຢໂຫວາຮູ້ສຶກແນວໃດຕອນທີ່ພະເຢຊູຖືກປະຫານ? ຂໍໃຫ້ຍົກຕົວຢ່າງ.
11 ພໍ່ແມ່ທີ່ລູກຕາຍເຂົ້າໃຈດີວ່າການສູນເສຍລູກເຮັດໃຫ້ເຈັບປວດໃຈຫຼາຍແທ້ໆ. ເຖິງວ່າເຮົາເຊື່ອເລື່ອງການຄືນມາຈາກຕາຍ ແຕ່ເມື່ອຄົນທີ່ເຮົາຮັກຕາຍເຮົາກໍຍັງຮູ້ສຶກເຈັບປວດຢູ່. ເລື່ອງນີ້ເຮັດໃຫ້ເຮົາເຂົ້າໃຈວ່າພະເຢໂຫວາເຈັບປວດຫຼາຍສ່ຳໃດຕອນທີ່ເພິ່ນເຫັນພະເຢຊູລູກຊາຍທີ່ເພິ່ນຮັກຕາຍໃນປີ 33. c—ມທ. 3:17
12. ກ່ອນຈະຮອດການປະຊຸມອະນຸສອນ ເຮົາເຮັດຫຍັງໄດ້ແດ່?
12 ກ່ອນຈະຮອດການປະຊຸມອະນຸສອນ ໃຫ້ລອງສຶກສາສ່ວນໂຕຫຼືສຶກສາປະຈຳຄອບຄົວກ່ຽວກັບເລື່ອງຄ່າໄຖ່ໃຫ້ເລິກເຊິ່ງຫຼາຍຂຶ້ນໂດຍໃຊ້ປຶ້ມຄູ່ມືຄົ້ນຄວ້າສຳລັບພະຍານພະເຢໂຫວາຫຼືປຶ້ມອື່ນໆຂອງອົງການ. d ນອກຈາກນັ້ນ ໃຫ້ອ່ານຂໍ້ຄຳພີທີ່ຢູ່ໃນຕາຕະລາງການອ່ານຄຳພີໄບເບິນໃນໄລຍະການປະຊຸມອະນຸສອນທີ່ຢູ່ໃນຊີວິດຄລິດສະຕຽນແລະວຽກຮັບໃຊ້—ຄູ່ມືການປະຊຸມ. ໃຫ້ເບິ່ງວິດີໂອການນະມັດສະການຕອນເຊົ້າສຳລັບວັນປະຊຸມອະນຸສອນນຳ. ເມື່ອເຮົາກຽມຫົວໃຈໃຫ້ພ້ອມສຳລັບການປະຊຸມອະນຸສອນ ເຮົາກໍຈະຊ່ວຍຄົນອື່ນໃຫ້ໄດ້ຮັບປະໂຫຍດຈາກການປະຊຸມນີ້ຄືກັນ.—ອຊຣ. 7:10
ຊ່ວຍຄົນອື່ນໃຫ້ໄດ້ຮັບປະໂຫຍດ
13. ເພື່ອຊ່ວຍຄົນອື່ນໃຫ້ໄດ້ຮັບປະໂຫຍດຈາກການປະຊຸມອະນຸສອນ ສິ່ງທຳອິດທີ່ເຮົາຕ້ອງເຮັດແມ່ນຫຍັງ?
13 ເຮົາຈະຊ່ວຍຄົນອື່ນແນວໃດໃຫ້ໄດ້ຮັບປະໂຫຍດຈາກການປະຊຸມອະນຸສອນ? ທຳອິດ ເຮົາຕ້ອງເຊີນເຂົາເຈົ້າ. ນອກຈາກເຊີນຄົນທີ່ເຮົາເຈິໃນເຂດປະກາດແລ້ວ ເຮົາອາດເຮັດລາຍຊື່ຄົນທີ່ເຮົາຮູ້ຈັກທີ່ເຮົາຢາກເຊີນເຂົາເຈົ້າຄືກັນ ເຊັ່ນ: ຍາດຕິພີ່ນ້ອງ ໝູ່ຢູ່ບ່ອນເຮັດວຽກ ໝູ່ຢູ່ໂຮງຮຽນ ແລະຄົນອື່ນໆ. ຖ້າເຮົາມີໃບເຊີນບໍ່ພໍ ເຮົາສາມາດສົ່ງລິ້ງໃຫ້ເຂົາເຈົ້າໄດ້. ເມື່ອເຮັດແບບນີ້ ອາດຈະມີຄົນມາເຂົ້າຮ່ວມການປະຊຸມອະນຸສອນຫຼາຍກວ່າທີ່ເຮົາຄິດກໍໄດ້!—ຜູ້ປ. 11:6
14. ເປັນຫຍັງການເຊີນເປັນສ່ວນໂຕຈຶ່ງສຳຄັນ? ຂໍໃຫ້ເລົ່າປະສົບການ.
14 ການເຊີນຜູ້ໃດຜູ້ໜຶ່ງເປັນສ່ວນໂຕເປັນເລື່ອງທີ່ສຳຄັນຫຼາຍ. ໃຫ້ເຮົາເບິ່ງປະສົບການຕໍ່ໄປນີ້. ພີ່ນ້ອງຍິງຄົນໜຶ່ງທີ່ຜົວຂອງລາວບໍ່ໄດ້ເປັນພະຍານພະເຢໂຫວາ ມື້ໜຶ່ງລາວຕົກໃຈຫຼາຍທີ່ຜົວຂອງລາວບອກວ່າຢາກໄປປະຊຸມອະນຸສອນນຳ. ເປັນຫຍັງລາວຈຶ່ງຕົກໃຈ? ຍ້ອນຫຼາຍປີຜ່ານມາລາວເຄີຍຊວນຜົວໄປປະຊຸມອະນຸສອນນຳ ແຕ່ກໍບໍ່ເຄີຍໄປ. ເປັນຫຍັງປີນີ້ຈຶ່ງຢາກໄປ? ຜົວຂອງລາວບອກວ່າ: “ກະຍ້ອນຂ້ອຍໄດ້ຮັບການເຊີນເປັນສ່ວນໂຕ.” ແລ້ວລາວກໍເລົ່າໃຫ້ເມຍຟັງວ່າຜູ້ດູແລຄົນໜຶ່ງທີ່ລາວຮູ້ຈັກໃນປະຊາຄົມມາຊວນລາວໄປປະຊຸມອະນຸສອນເປັນສ່ວນໂຕ. ຕັ້ງແຕ່ນັ້ນມາ ລາວກໍເຂົ້າຮ່ວມການປະຊຸມອະນຸສອນເປັນປະຈຳ.
15. ເຮົາຄວນຈື່ຫຍັງໄວ້ຕອນທີ່ເຊີນຄົນມາການປະຊຸມອະນຸສອນ?
15 ໃຫ້ຈື່ໄວ້ວ່າຄົນທີ່ເຮົາເຊີນມາອາດຈະມີຄຳຖາມ ໂດຍສະເພາະຖ້າເຂົາເຈົ້າບໍ່ເຄີຍມາປະຊຸມຈັກເທື່ອ. ໃຫ້ເຮົາກຽມໂຕລ່ວງໜ້າເພື່ອຕອບຄຳຖາມທີ່ເຂົາເຈົ້າອາດຈະຖາມ. (ກລຊ. 4:6) ບາງຄົນອາດຢາກຮູ້ວ່າການປະຊຸມອະນຸສອນເປັນແນວໃດ? ການປະຊຸມນີ້ດົນປານໃດ? ຕ້ອງນຸ່ງເຄື່ອງຈັ່ງໃດ? ໄດ້ເສຍເງິນຄ່າເຂົ້າບໍ່? ມີການແຜ່ເງິນບໍ່? ເມື່ອເຮົາເຊີນຄົນມາຮ່ວມການປະຊຸມອະນຸສອນ ເຮົາອາດຖາມວ່າ: “ເຈົ້າມີຫຍັງຢາກຖາມບໍ?” ຖ້າເຂົາເຈົ້າມີຄຳຖາມກໍໃຫ້ເຈົ້າຕອບຄຳຖາມຂອງເຂົາເຈົ້າ. ເຮົາອາດໃຊ້ວິດີໂອລະນຶກເຖິງການເສຍຊີວິດຂອງພະເຢຊູ ແລະພວກເຮົາເຮັດຫຍັງຢູ່ຫໍປະຊຸມລາຊະອານາຈັກ? ເພື່ອຊ່ວຍເຂົາເຈົ້າໃຫ້ເຂົ້າໃຈວ່າການປະຊຸມຂອງເຮົາເປັນແນວໃດ. ນອກຈາກນັ້ນ ປຶ້ມຊີວິດທີ່ມີຄວາມສຸກຕະຫຼອດໄປ! ບົດທີ 28 ກໍມີຫຼາຍຈຸດທີ່ດີທີ່ເຮົາໃຊ້ໄດ້ເພື່ອອະທິບາຍໃຫ້ເຂົາເຈົ້າຮູ້ກ່ຽວກັບການປະຊຸມອະນຸສອນ.
16. ຄົນທີ່ມາປະຊຸມອະນຸສອນອາດມີຄຳຖາມຫຍັງຕື່ມອີກ?
16 ຫຼັງຈາກເຂົ້າຮ່ວມການປະຊຸມອະນຸສອນແລ້ວ ຜູ້ສົນໃຈອາດມີຄຳຖາມຕື່ມອີກ. ເຂົາເຈົ້າອາດຢາກຮູ້ວ່າເປັນຫຍັງຈຶ່ງບໍ່ມີໃຜກິນເຂົ້າຈີ່ແລະເຫຼົ້າແວງ ຫຼືເປັນຫຍັງຈຶ່ງມີຄົນແຕ່ໜ້ອຍດຽວທີ່ກິນ. ເຂົາເຈົ້າອາດຢາກຮູ້ວ່າເຮົາຈັດການປະຊຸມອະນຸສອນເລື້ອຍປານໃດ ແລະການປະຊຸມອື່ນໆຂອງພະຍານພະເຢໂຫວາກໍຈັດແບບດຽວກັນບໍ່. ເຖິງວ່າຈະມີການອະທິບາຍເລື່ອງເຫຼົ່ານີ້ແລ້ວໃນຄຳບັນລະຍາຍຢູ່ການປະຊຸມອະນຸສອນ ແຕ່ຜູ້ສົນໃຈອາດຢາກຮູ້ຕື່ມອີກ. ບົດຄວາມໃນເວັບໄຊ jw.org ທີ່ຊື່ວ່າ “ເປັນຫຍັງພະຍານພະເຢໂຫວາສະຫຼອງອາຫານແລງຂອງພະຄລິດຕ່າງຈາກສາສະໜາອື່ນ?” e ຊ່ວຍເຮົາໃຫ້ຕອບຄຳຖາມເຫຼົ່ານີ້ໄດ້. ເຮົາຢາກເຮັດທຸກສິ່ງທີ່ເຮັດໄດ້ທັງກ່ອນ ໃນລະຫວ່າງ ແລະຫຼັງຈາກການປະຊຸມອະນຸສອນເພື່ອຊ່ວຍຄົນທີ່ “ເຕັມໃຈຕອບຮັບຄວາມຈິງ” ໃຫ້ໄດ້ຮັບປະໂຫຍດຈາກການປະຊຸມນີ້.—ກຈກ. 13:48
ຊ່ວຍຄົນທີ່ເຊົາຮັບໃຊ້ພະເຢໂຫວາ
17. ຜູ້ດູແລຈະຊ່ວຍຄົນທີ່ເຊົາຮັບໃຊ້ພະເຢໂຫວາໄດ້ແນວໃດ? (ເອເຊກຽນ 34:12, 16)
17 ໃນໄລຍະການປະຊຸມອະນຸສອນ ຜູ້ດູແລຈະຊ່ວຍຄົນທີ່ເຊົາຮັບໃຊ້ພະເຢໂຫວາໄດ້ແນວໃດ? ຂໍໃຫ້ເຈົ້າເຮັດໃຫ້ເຂົາເຈົ້າເຫັນວ່າເຈົ້າຮັກແລະເປັນຫ່ວງເຂົາເຈົ້າ. (ອ່ານເອເຊກຽນ 34:12, 16) ກ່ອນຈະຮອດການປະຊຸມອະນຸສອນ ໃຫ້ເຈົ້າຕິດຕໍ່ກັບເຂົາເຈົ້າຫຼາຍທີ່ສຸດເທົ່າທີ່ຈະເຮັດໄດ້ ແລະເຮັດໃຫ້ເຂົາເຈົ້າໝັ້ນໃຈວ່າເຈົ້າຢາກຊ່ວຍເຂົາເຈົ້າແທ້ໆ. ຈາກນັ້ນ ໃຫ້ຊວນເຂົາເຈົ້າມາການປະຊຸມອະນຸສອນ ແລະຖ້າເຂົາເຈົ້າມາກໍໃຫ້ຕ້ອນຮັບຢ່າງອົບອຸ່ນ. ຫຼັງຈາກການປະຊຸມອະນຸສອນ ໃຫ້ຕິດຕໍ່ກັບພີ່ນ້ອງເຫຼົ່ານີ້ເລື້ອຍໆເພື່ອຊ່ວຍເຂົາເຈົ້າໃຫ້ມີຄວາມເຊື່ອເຂັ້ມແຂງແລະກັບມາຫາພະເຢໂຫວາ.—1ປຕ. 2:25
18. ເຮົາທຸກຄົນຈະຊ່ວຍຄົນທີ່ເຊົາຮັບໃຊ້ພະເຢໂຫວາໄດ້ແນວໃດ? (ໂຣມ 12:10)
18 ເຮົາທຸກຄົນກໍສາມາດຊ່ວຍຄົນທີ່ເຊົາຮັບໃຊ້ພະເຢໂຫວາໄດ້. ເຮົາຈະຊ່ວຍແນວໃດ? ເຮົາຊ່ວຍໄດ້ໂດຍສະແດງຄວາມຮັກ ຄວາມອ່ອນໂຍນ ແລະຄວາມນັບຖືຕໍ່ເຂົາເຈົ້າ. (ອ່ານໂຣມ 12:10) ໃຫ້ຈື່ໄວ້ວ່າເຂົາເຈົ້າອາດບໍ່ກ້າທີ່ຈະກັບມາປະຊຸມຍ້ອນຢ້ານພີ່ນ້ອງບໍ່ຕ້ອນຮັບ. f ດັ່ງນັ້ນ ຢ່າຖາມຄຳຖາມທີ່ເຮັດໃຫ້ເຂົາເຈົ້າອາຍຫຼືເວົ້າສິ່ງທີ່ເຮັດໃຫ້ເຂົາເຈົ້າເສຍໃຈ. (1ທຊ. 5:11) ເຂົາເຈົ້າເປັນພີ່ນ້ອງຂອງເຮົາ ແລະເຮົາດີໃຈທີ່ໄດ້ນະມັດສະການພະເຢໂຫວານຳກັນກັບເຂົາເຈົ້າອີກ.—ເພງ. 119:176; ກຈກ. 20:35
19. ເຮົາໄດ້ຮັບປະໂຫຍດຫຍັງຈາກການລະນຶກເຖິງການຕາຍຂອງພະເຢຊູ?
19 ເຮົາຮູ້ສຶກຂອບໃຈແທ້ໆທີ່ພະເຢຊູບອກເຮົາໃຫ້ຈັດການປະຊຸມອະນຸສອນທຸກປີ! ເຮົາຮູ້ວ່າການປະຊຸມນີ້ສຳຄັນຫຼາຍ ແລະເມື່ອເຮົາເຂົ້າຮ່ວມເຮົາກໍຈະໄດ້ຮັບປະໂຫຍດແລະຄົນອື່ນກໍຈະໄດ້ຮັບປະໂຫຍດຄືກັນ. (ອຊຢ. 48:17, 18) ເຮົາຮັກພະເຢໂຫວາແລະພະເຢຊູຫຼາຍຂຶ້ນ. ເຮົາເຫັນຄ່າໃນສິ່ງທີ່ພວກເພິ່ນເຮັດເພື່ອເຮົາ. ເຮົາສະໜິດກັບພີ່ນ້ອງຫຼາຍຂຶ້ນ ແລະເຮົາໄດ້ຊ່ວຍຄົນອື່ນໃຫ້ຮຽນຮູ້ວ່າເຂົາເຈົ້າຈະໄດ້ຮັບປະໂຫຍດຈາກຄ່າໄຖ່ຄືກັບເຮົາໄດ້ແນວໃດ. ໃຫ້ເຮົາພະຍາຍາມເຮັດສຸດຄວາມສາມາດເພື່ອກຽມໂຕໃຫ້ພ້ອມສຳລັບການປະຊຸມອະນຸສອນປີນີ້ ເຊິ່ງເປັນມື້ທີ່ສຳຄັນທີ່ສຸດຂອງປີ!
ເຈົ້າຈະຕອບແນວໃດ?
-
ເຮົາຈະກຽມຫົວໃຈແນວໃດໃຫ້ພ້ອມສຳລັບການປະຊຸມອະນຸສອນ?
-
ເຮົາຈະຊ່ວຍຄົນອື່ນແນວໃດໃຫ້ໄດ້ຮັບປະໂຫຍດຈາກການປະຊຸມອະນຸສອນ?
-
ເຮົາຈະຊ່ວຍຄົນທີ່ເຊົາຮັບໃຊ້ພະເຢໂຫວາໄດ້ແນວໃດ?
ເພງທີ 18 ຂອບໃຈສຳລັບຄ່າໄຖ່
a ໃຊ້ປ່ອງຄົ້ນຫາໃນເວັບໄຊ jw.org ເພື່ອຊອກຫາບົດຄວາມແລະວິດີໂອຕ່າງໆທີ່ເວົ້າເຖິງໃນບົດຄວາມນີ້.
b ເບິ່ງບົດຄວາມ “ຄຳຖາມຈາກຜູ້ອ່ານ” ໃນຫໍສັງເກດການເດືອນເມສາ 2021.
c ເບິ່ງປຶ້ມຫຍັບເຂົ້າໃກ້ພະເຢໂຫວາ ບົດ 23 ຂໍ້ 8-9.
d ເບິ່ງຂອບ “ ຄຳແນະນຳສຳລັບການຄົ້ນຄວ້າ.”
e (ພາສາໄທ)
f ເບິ່ງຮູບແລະຂອບ “ ພີ່ນ້ອງຕ້ອນຮັບແນວໃດ?” ພີ່ນ້ອງຊາຍທີ່ເຊົາຮັບໃຊ້ພະເຢໂຫວາຮູ້ສຶກບໍ່ກ້າທີ່ຈະເຂົ້າໄປໃນຫໍປະຊຸມ ແຕ່ລາວກໍເອົາຊະນະຄວາມຢ້ານໄດ້ແລ້ວຍ່າງເຂົ້າໄປ. ລາວໄດ້ຮັບການຕ້ອນຮັບຢ່າງອົບອຸ່ນແລະມີຄວາມສຸກທີ່ໄດ້ຢູ່ກັບພີ່ນ້ອງ.
g ຄຳອະທິບາຍຮູບ ໜ້າ 9: ຕອນທີ່ພະຍານພະເຢໂຫວາຢູ່ປະເທດໜຶ່ງກຳລັງປະຊຸມອະນຸສອນ ພະຍານພະເຢໂຫວາທີ່ຢູ່ປະເທດອື່ນກໍກຳລັງກຽມໂຕສຳລັບການປະຊຸມອະນຸສອນ.
