ບົດຄວາມສຶກສາທີ 3
ເພງທີ 35 “ເບິ່ງໃຫ້ອອກວ່າສິ່ງໃດສຳຄັນກວ່າ”
ຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ
“ການຢ້ານຢຳພະເຢໂຫວາເປັນຈຸດເລີ່ມຕົ້ນຂອງສະຕິປັນຍາ ແລະການຮູ້ຈັກພະເຈົ້າອົງບໍລິສຸດຈະຊ່ວຍໃຫ້ເຈົ້າມີຄວາມເຂົ້າໃຈ.”—ສພສ. 9:10
ຈຸດສຳຄັນ
ເຮົາຈະໃຊ້ຄວາມຮູ້ ຄວາມເຂົ້າໃຈ ແລະການຄິດຢ່າງເລິກເຊິ່ງແນວໃດເພື່ອຈະຕັດສິນໃຈຢ່າງສະຫຼາດ?
1. ເຮົາທຸກຄົນເຈິກັບເລື່ອງຫຍັງທີ່ຍາກ?
ໃນແຕ່ລະມື້ເຮົາຕ້ອງໄດ້ຕັດສິນໃຈ. ບາງເລື່ອງກໍຕັດສິນໃຈໄດ້ງ່າຍ ເຊັ່ນ: ຕອນເຊົ້າຊິກິນຫຍັງ? ຫຼືຈະນອນຈັກໂມງ? ແຕ່ກໍມີບາງເລື່ອງທີ່ຕັດສິນໃຈໄດ້ຍາກກວ່າເຊິ່ງອາດສົ່ງຜົນກະທົບຕໍ່ສຸຂະພາບ ຄວາມສຸກ ຄົນທີ່ເຮົາຮັກ ຫຼືການນະມັດສະການພະເຢໂຫວາ. ເຮົາຢາກຕັດສິນໃຈໃນແບບທີ່ເປັນປະໂຫຍດຕໍ່ເຮົາເອງແລະຕໍ່ຄອບຄົວຂອງເຮົາ. ສຳຄັນທີ່ສຸດແມ່ນ ເຮົາຢາກຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ.—ຣມ. 12:1, 2
2. ມີຂັ້ນຕອນຫຍັງແດ່ທີ່ຈະຊ່ວຍເຮົາໃຫ້ຕັດສິນໃຈຢ່າງສະຫຼາດ?
2 ເຈົ້າຈະຕັດສິນໃຈຢ່າງສະຫຼາດຖ້າເຈົ້າເຮັດຕາມ 3 ຂັ້ນຕອນນີ້: (1) ຊອກຂໍ້ມູນ (2) ເບິ່ງວ່າພະເຢໂຫວາຄິດແນວໃດກ່ຽວກັບເລື່ອງນັ້ນ ແລະ (3) ເບິ່ງວ່າທາງເລືອກແບບໃດດີກວ່າ. ໃນບົດນີ້ເຮົາຈະເບິ່ງ 3 ຂັ້ນຕອນນີ້ ແລະເຮົາຍັງຈະເບິ່ງວ່າເຮົາຈະຝຶກໃຊ້ຄວາມສາມາດໃນການຄິດໄດ້ແນວໃດ.—ສພສ. 2:11
ຊອກຂໍ້ມູນ
3. ເປັນຫຍັງການຊອກຂໍ້ມູນກ່ອນຕັດສິນໃຈຈຶ່ງເປັນເລື່ອງສຳຄັນ? ຂໍໃຫ້ຍົກຕົວຢ່າງ.
3 ຂັ້ນຕອນທຳອິດທີ່ເຮົາຕ້ອງເຮັດເພື່ອຈະຕັດສິນໃຈຢ່າງສະຫຼາດແມ່ນ ເຮົາຕ້ອງຊອກຂໍ້ມູນກ່ອນ. ເປັນຫຍັງເລື່ອງນີ້ຈຶ່ງສຳຄັນ? ສົມມຸດວ່າຄົນທີ່ບໍ່ສະບາຍໄປຫາໝໍຍ້ອນລາວມີບັນຫາສຸຂະພາບຮ້າຍແຮງ. ທ່ານໝໍຊິຕັດສິນໃຈປົວລາວໂດຍບໍ່ຖາມອາການຫຼືບໍ່ກວດເບິ່ງກ່ອນບໍ? ບໍ່ ທ່ານໝໍຈະບໍ່ເຮັດແບບນັ້ນ. ເຈົ້າກໍຄືກັນ ເຈົ້າຈະຕັດສິນໃຈໄດ້ດີກວ່າຖ້າມີຂໍ້ມູນຄົບຖ້ວນກ່ຽວກັບເລື່ອງທີ່ເຈົ້າຕ້ອງຕັດສິນໃຈ. ເຈົ້າຈະເຮັດແບບນັ້ນໄດ້ແນວໃດ?
4. ຕາມສຸພາສິດ 18:13 ເຈົ້າຄວນເຮັດຫຍັງເພື່ອຊອກຂໍ້ມູນ? (ເບິ່ງຮູບນຳ)
4 ເຈົ້າສາມາດຊອກຂໍ້ມູນຈາກການຖາມຄຳຖາມ. ສົມມຸດວ່າເຈົ້າຖືກເຊີນໄປງານລ້ຽງ. ເຈົ້າຄວນຈະໄປບໍ? ຖ້າເຈົ້າບໍ່ຮູ້ຈັກເຈົ້າພາບຫຼືບໍ່ຮູ້ວ່າງານນັ້ນຈະ ເປັນແບບໃດ ເຈົ້າຕ້ອງຖາມຄຳຖາມຕໍ່ໄປນີ້ ເຊັ່ນ: “ງານນັ້ນຈັດຢູ່ໃສແລະຈັດຕອນໃດ? ຊິມີຈັກຄົນ? ມີໃຜມາແດ່? ໃຜເປັນຜູ້ເບິ່ງແຍງງານນັ້ນ? ຢູ່ໃນງານນັ້ນມີກິດຈະກຳຫຍັງແດ່? ມີເຄື່ອງດື່ມມຶນເມົາບໍ່?” ຄຳຕອບຂອງຄຳຖາມເຫຼົ່ານີ້ຈະຊ່ວຍເຈົ້າໃຫ້ຕັດສິນໃຈໄດ້ຢ່າງສະຫຼາດ.—ອ່ານສຸພາສິດ 18:13
5. ເຈົ້າຄວນເຮັດຫຍັງຫຼັງຈາກທີ່ໄດ້ຂໍ້ມູນແລ້ວ?
5 ຫຼັງຈາກໄດ້ຂໍ້ມູນແລ້ວໃຫ້ຄິດເຖິງພາບລວມຢ່າງລະອຽດ. ຕົວຢ່າງເຊັ່ນ: ເຈົ້າຈະເຮັດແນວໃດຖ້າເຈົ້າຮູ້ວ່າຄົນທີ່ມາງານນັ້ນບໍ່ໄດ້ນັບຖືມາດຕະຖານທີ່ຢູ່ໃນຄຳພີໄບເບິນ ຫຼືມີການເຊີບເຄື່ອງດື່ມມຶນເມົາແບບບໍ່ມີການຄວບຄຸມ? ເຈົ້າເຫັນບໍວ່າງານລ້ຽງນີ້ມີໂອກາດຈະກາຍເປັນງານລ້ຽງທີ່ເຮຮາສຸດຂີດຈົນຄວບຄຸມບໍ່ໄດ້ບໍ? (1ປຕ. 4:3) ຫຼືເຈົ້າຈະເຮັດແນວໃດຖ້າງານລ້ຽງນັ້ນເປັນໂມງດຽວກັນກັບເວລາປະຊຸມຫຼືເວລາປະກາດ? ເມື່ອເຈົ້າເຫັນພາບລວມທັງໝົດນີ້ແລ້ວ ເຈົ້າກໍຈະຕັດສິນໃຈໄດ້ດີຂຶ້ນ. ແຕ່ຍັງມີອີກຂັ້ນຕອນໜຶ່ງທີ່ເຈົ້າຕ້ອງເຮັດຄືກັນ. ຕອນນີ້ເຈົ້າຮູ້ກ່ຽວກັບສະພາບການນັ້ນແລ້ວ ແຕ່ພະເຢໂຫວາຄິດແນວໃດ?—ສພສ. 2:6
ໃຫ້ເບິ່ງວ່າພະເຢໂຫວາຄິດແນວໃດ
6. ຕາມຢາໂກໂບ 1:5 ເປັນຫຍັງເຮົາຄວນອະທິດຖານຂໍໃຫ້ພະເຢໂຫວາຊ່ວຍ?
6 ໃຫ້ອະທິດຖານຂໍໃຫ້ພະເຢໂຫວາຊ່ວຍເຈົ້າໃຫ້ເຂົ້າໃຈຄວາມຄິດຂອງເພິ່ນ. ພະເຢໂຫວາສັນຍາວ່າຈະໃຫ້ສະຕິປັນຍາກັບເຮົາເພື່ອຊ່ວຍເຮົາໃຫ້ຮູ້ວ່າເຮົາຄວນຕັດສິນໃຈແບບໃດຈຶ່ງຈະເຮັດໃຫ້ເພິ່ນພໍໃຈ. ເພິ່ນໃຫ້ສະຕິ ປັນຍາແບບນີ້ “ກັບທຸກຄົນຢ່າງໃຈກວ້າງແລະບໍ່ເຄີຍຕຳໜິ.”—ອ່ານຢາໂກໂບ 1:5
7. ເຈົ້າຈະຮູ້ໄດ້ແນວໃດວ່າພະເຢໂຫວາຄິດຈັ່ງໃດ? ຂໍໃຫ້ຍົກຕົວຢ່າງ.
7 ເມື່ອເຈົ້າອະທິດຖານຂໍການຊີ້ນຳຈາກພະເຢໂຫວາແລ້ວ ໃຫ້ຕັ້ງໃຈສັງເກດເບິ່ງວ່າເພິ່ນຕອບເຈົ້າແນວໃດ. ໃຫ້ຄິດເຖິງຕົວຢ່າງນີ້: ຖ້າເຈົ້າຫຼົງທາງຕອນທີ່ໄປທ່ຽວ ເຈົ້າອາດຈະຖາມທາງຈາກຄົນທ້ອງຖິ່ນທີ່ຢູ່ແຖວນັ້ນ. ແຕ່ເມື່ອຖາມແລ້ວ ເຈົ້າຈະຍ່າງໜີໂດຍທີ່ບໍ່ຟັງລາວຕອບບໍ? ເຈົ້າຈະບໍ່ເຮັດແບບນັ້ນແນ່ນອນ. ເຈົ້າຈະຖ້າຟັງຄຳຕອບຈາກລາວກ່ອນ. ຄ້າຍຄືກັນ ຫຼັງຈາກທີ່ເຈົ້າອະທິດຖານຂໍສະຕິປັນຍາຈາກພະເຢໂຫວາແລ້ວ ໃຫ້ເຈົ້າພະຍາຍາມເບິ່ງວ່າເພິ່ນຕອບເຈົ້າແນວໃດໂດຍຄົ້ນຄວ້າເບິ່ງວ່າກົດໝາຍແລະຫຼັກການທີ່ຢູ່ໃນຄຳພີໄບເບິນຂໍ້ໃດທີ່ໃຊ້ໄດ້ກັບສະຖານະການຂອງເຈົ້າ. ຕົວຢ່າງເຊັ່ນ: ຕອນທີ່ເຈົ້າກຳລັງຕັດສິນໃຈວ່າຈະໄປງານລ້ຽງນັ້ນຫຼືບໍ່ ເຈົ້າອາດລອງຄົ້ນຄວ້າເບິ່ງວ່າຄຳພີໄບເບິນເວົ້າແນວໃດກ່ຽວກັບການກິນລ້ຽງເຮຮາຈົນສຸດຂີດ ການຄົບຫາທີ່ບໍ່ດີ ແລະການໃຫ້ການປົກຄອງຂອງພະເຈົ້າມາກ່ອນຄວາມມັກສ່ວນໂຕ.—ມທ. 6:33; ຣມ. 13:13; 1ກຣ. 15:33
8. ເຈົ້າຈະເຮັດແນວໃດຖ້າຕ້ອງການຄວາມຊ່ວຍເຫຼືອເພື່ອຈະໄດ້ຂໍ້ມູນທີ່ກຳລັງຊອກຫາ? (ເບິ່ງຮູບນຳ)
8 ບາງເທື່ອເຈົ້າກໍຕ້ອງການຄວາມຊ່ວຍເຫຼືອເພື່ອຈະໄດ້ຂໍ້ມູນທີ່ເຈົ້າກຳລັງຊອກຫາ. ເຈົ້າອາດຖາມພີ່ນ້ອງທີ່ມີປະສົບການທີ່ສາມາດໃຫ້ຄຳແນະນຳເຈົ້າໄດ້. ແຕ່ເຈົ້າ ຈະໄດ້ຮັບປະໂຫຍດຄືກັນຈາກການຄົ້ນຄວ້າດ້ວຍໂຕເອງ. ມີຂໍ້ມູນຫຼາຍຢ່າງທີ່ເປັນປະໂຫຍດໃນເຄື່ອງມືຄົ້ນຄວ້າຂອງເຮົາ ເຊັ່ນ: ຄູ່ມືຄົ້ນຄວ້າສຳລັບພະຍານພະເຢໂຫວາແລະຂໍ້ຄຳພີສຳລັບການໃຊ້ຊີວິດຂອງຄລິດສະຕຽນ. ຂໍໃຫ້ຈື່ໄວ້ວ່າເປົ້າໝາຍຂອງເຈົ້າແມ່ນຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ.
9. ເຮົາຈະໝັ້ນໃຈໄດ້ແນວໃດວ່າການຕັດສິນໃຈຂອງເຮົາຈະເຮັດໃຫ້ພະເຢໂຫວາພໍໃຈ? (ເອເຟໂຊ 5:17)
9 ເຮົາຈະແນ່ໃຈໄດ້ແນວໃດວ່າການຕັດສິນໃຈຂອງເຮົາຈະເຮັດໃຫ້ພະເຢໂຫວາພໍໃຈ? ທຳອິດ ເຮົາຕ້ອງຮູ້ຈັກພະເຢໂຫວາໃຫ້ດີໆກ່ອນ. ຄຳພີໄບເບິນບອກວ່າ: “ການຮູ້ຈັກພະເຈົ້າອົງບໍລິສຸດຈະຊ່ວຍໃຫ້ເຈົ້າມີຄວາມເຂົ້າໃຈ.” (ສພສ. 9:10) ຄວາມເຂົ້າໃຈແທ້ມາຈາກການຮູ້ຈັກຄຸນລັກສະນະຕ່າງໆຂອງພະເຢໂຫວາ ຄວາມຕ້ອງການຂອງເພິ່ນ ແລະສິ່ງທີ່ເພິ່ນມັກຫຼືສິ່ງທີ່ເພິ່ນຊັງ. ໃຫ້ຖາມໂຕເອງວ່າ: ‘ການຮູ້ຈັກພະເຢໂຫວາຈະຊ່ວຍຂ້ອຍແນວໃດໃຫ້ຕັດສິນໃຈໃນແບບທີ່ເຮັດໃຫ້ເພິ່ນພໍໃຈ?’—ອ່ານເອເຟໂຊ 5:17
10. ເປັນຫຍັງຫຼັກການໃນຄຳພີໄບເບິນຈຶ່ງສຳຄັນກວ່າປະເພນີຂອງຄອບຄົວຫຼືວັດທະນະທຳທ້ອງຖິ່ນ?
10 ເພື່ອຈະເຮັດໃຫ້ພະເຢໂຫວາພໍໃຈ ບາງເທື່ອເຮົາຕ້ອງເຮັດໃຫ້ຄົນໃກ້ຊິດຜິດຫວັງ. ຕົວຢ່າງເຊັ່ນ: ພໍ່ແມ່ບາງຄົນທີ່ຫວັງດີຕໍ່ລູກສາວອາດພະຍາຍາມບອກລູກໃຫ້ແຕ່ງດອງກັບຜູ້ຊາຍທີ່ຮັ່ງຫຼືຜູ້ຊາຍທີ່ສາມາດຈ່າຍຄ່າດອງໄດ້ຫຼາຍໆເຖິງວ່າຄວາມເຊື່ອຂອງລາວບໍ່ເຂັ້ມແຂງປານໃດກໍຕາມ. ພໍ່ແມ່ເຮັດແບບນີ້ຍ້ອນຢາກໃຫ້ລູກສາວມີຊີວິດທີ່ສະດວກສະບາຍ. ແຕ່ຖ້າລູກສາວເຮັດແບບນັ້ນໃຜຈະຊ່ວຍລາວໃຫ້ມີຄວາມເຊື່ອເຂັ້ມແຂງ? ພະເຢໂຫວາເບິ່ງເລື່ອງນີ້ແນວໃດ? ເຮົາໄດ້ຄຳຕອບຈາກມັດທາຍ 6:33. ໃນຂໍ້ນັ້ນພະເຢຊູບອກເຮົາໃຫ້ເອົາ “ການປົກຄອງຂອງພະເຈົ້າ . . . ເປັນສິ່ງສຳຄັນທີ່ສຸດໃນຊີວິດສະເໝີ.” ດັ່ງນັ້ນ ເຖິງວ່າເຮົາໃຫ້ກຽດພໍ່ແມ່ແລະນັບຖືຄົນໃນເຂດທີ່ເຮົາຢູ່ ແຕ່ສິ່ງທີ່ສຳຄັນທີ່ສຸດສຳລັບເຮົາແມ່ນເຮັດໃຫ້ພະເຢໂຫວາພໍໃຈ.
ເບິ່ງວ່າທາງເລືອກແບບໃດດີກວ່າ
11. ຄຸນລັກສະນະຫຍັງທີ່ເວົ້າເຖິງໃນສຸພາສິດ 2:11 ທີ່ຈະຊ່ວຍເຈົ້າໃຫ້ເບິ່ງອອກວ່າອັນໃດເປັນທາງເລືອກທີ່ດີກວ່າ?
11 ຫຼັງຈາກທີ່ໄດ້ຄົ້ນຄວ້າຫຼັກການຕ່າງໆໃນຄຳພີໄບເບິນແລ້ວ ເຈົ້າຕ້ອງເບິ່ງວ່າມີທາງເລືອກແບບໃດແດ່ແລະທາງເລືອກໃດດີກວ່າ. ຄຸນລັກສະນະຫຍັງຈະຊ່ວຍເຈົ້າໄດ້? ເຈົ້າຕ້ອງມີຄວາມສາມາດໃນການຄິດ. (ອ່ານສຸພາສິດ 2:11) ຄຸນລັກສະນະນີ້ຈະຊ່ວຍເຈົ້າໃຫ້ຄິດຢ່າງເລິກເຊິ່ງ ເຊິ່ງຈະຊ່ວຍເຈົ້າໃຫ້ເບິ່ງອອກວ່າແຕ່ລະທາງເລືອກອາດສົ່ງຜົນແນວໃດ. ບາງເທື່ອການຕັດສິນໃຈໃນບາງເລື່ອງກໍງ່າຍ ແຕ່ກໍບໍ່ແມ່ນທຸກເລື່ອງຈະຕັດສິນໃຈໄດ້ງ່າຍຕະຫຼອດ. ການຄິດຢ່າງເລິກເຊິ່ງຈະຊ່ວຍເຈົ້າໃຫ້ຕັດສິນໃຈໄດ້ຢ່າງສະຫຼາດແມ່ນແຕ່ໃນສະຖານະການທີ່ຫຍຸ້ງຍາກ.
12-13. ການຄິດຢ່າງເລິກເຊິ່ງຈະຊ່ວຍເຈົ້າແນວໃດໃຫ້ຕັດສິນໃຈຢ່າງສະຫຼາດກ່ຽວກັບເລື່ອງວຽກ?
12 ໃຫ້ມາເບິ່ງເຫດການສົມມຸດຕໍ່ໄປນີ້. ເຈົ້າກຳລັງຊອກວຽກເຮັດເພື່ອຫາລ້ຽງຄອບຄົວ ແລະມີ 2 ວຽກທີ່ເຮັດໄດ້. ເຈົ້າໄດ້ຂໍ້ມູນທຸກຢ່າງກ່ຽວກັບວຽກນັ້ນ ເຊັ່ນ: ເປັນວຽກແບບໃດ ເຮັດວຽກມື້ໃດແດ່ ເວລາທີ່ໃຊ້ເດີນທາງໄປເຮັດວຽກແລະອື່ນໆ. ວຽກທັງສອງຢ່າງນີ້ເຈົ້າເຮັດໄດ້ເຊິ່ງບໍ່ຂັດກັບຫຼັກການໃນຄຳພີໄບເບິນ. ບາງເທື່ອເຈົ້າອາດມັກວຽກໜຶ່ງຫຼາຍກວ່າອີກວຽກໜຶ່ງຍ້ອນປະເພດຂອງວຽກຫຼືຍ້ອນໄດ້ເງິນເດືອນຫຼາຍກວ່າ. ແຕ່ເຖິງຈະເປັນແນວນັ້ນກໍຍັງມີຢ່າງອື່ນອີກທີ່ເຈົ້າຕ້ອງຄິດເຖິງກ່ອນຕັດສິນໃຈ.
13 ຕົວຢ່າງເຊັ່ນ: ວຽກນັ້ນກົງກັບເວລາປະຊຸມແລະເຮັດໃຫ້ເຈົ້າໄປປະຊຸມບໍ່ໄດ້ບໍ? ວຽກນັ້ນຈະຍາດເອົາເວລາທີ່ເຈົ້າຕ້ອງໃຊ້ເພື່ອເບິ່ງແຍງຄອບຄົວທາງດ້ານອາລົມແລະທາງດ້ານຄວາມເຊື່ອບໍ? ການຖາມໂຕເອງແບບນີ້ຈະຊ່ວຍເຈົ້າໃຫ້ເບິ່ງອອກວ່າອັນໃດເປັນ “ສິ່ງສຳຄັນກວ່າ” ນັ້ນກໍຄືການນະມັດສະການພະເຢໂຫວາແລະຄວາມຈຳເປັນຂອງຄອບຄົວແທນທີ່ຈະຫາເງິນໃຫ້ໄດ້ຫຼາຍໆ. (ຟລປ. 1:10) ເມື່ອເຈົ້າຄິດເຖິງສິ່ງເຫຼົ່າ ນີ້ແລ້ວ ເຈົ້າກໍຈະສາມາດຕັດສິນໃຈໃນແບບທີ່ພະເຢໂຫວາຈະອວຍພອນ.
14. ການຄິດເລິກເຊິ່ງແລະການສະແດງຄວາມຮັກຈະຊ່ວຍເຮົາແນວໃດບໍ່ໃຫ້ເປັນອຸປະສັກຂັດຂວາງຄວາມເຊື່ອຂອງຄົນອື່ນ?
14 ການຄິດຢ່າງເລິກເຊິ່ງຍັງຊ່ວຍເຮົາໃຫ້ຄິດວ່າການຕັດສິນໃຈຂອງເຮົາອາດສົ່ງຜົນຕໍ່ຄົນອື່ນແນວໃດເພື່ອເຮົາຈະບໍ່ເປັນ “ອຸປະສັກຂັດຂວາງຄວາມເຊື່ອຂອງຄົນອື່ນ.” (ຟລປ. 1:10) ເລື່ອງນີ້ສຳຄັນຫຼາຍໂດຍສະເພາະເມື່ອເຮົາຕ້ອງຕັດສິນໃຈໃນເລື່ອງສ່ວນໂຕ ເຊັ່ນ: ການເລືອກເຄື່ອງນຸ່ງແລະການແຕ່ງໂຕ. ເຮົາອາດມັກເຄື່ອງນຸ່ງຫຼືການແຕ່ງໂຕແບບໃດແບບໜຶ່ງ. ແຕ່ເຮົາຈະເຮັດແນວໃດຖ້າພີ່ນ້ອງໃນປະຊາຄົມຫຼືຄົນທົ່ວໄປຮູ້ສຶກບໍ່ສະບາຍໃຈກັບການແຕ່ງໂຕຂອງເຮົາ? ການຄິດຢ່າງເລິກເຊິ່ງຈະຊ່ວຍເຮົາໃຫ້ຄິດເຖິງຄວາມຮູ້ສຶກຂອງເຂົາເຈົ້າ. ຄວາມຮັກຈະກະຕຸ້ນເຮົາໃຫ້ “ຄິດເຖິງປະໂຫຍດຂອງຄົນອື່ນ” ແລະແຕ່ງໂຕແບບສຸພາບຮຽບຮ້ອຍ. (1ກຣ. 10:23, 24, 32; 1ຕມ. 2:9, 10) ຖ້າເຮົາຄິດເຖິງຈຸດ ເຫຼົ່ານີ້ ເຮົາກໍຈະຕັດສິນໃຈໃນແບບທີ່ສະແດງໃຫ້ເຫັນວ່າເຮົາຮັກແລະນັບຖືຄົນອື່ນ.
15. ກ່ອນຈະຕັດສິນໃຈເລື່ອງທີ່ສຳຄັນ ເຈົ້າຄວນຄິດເຖິງຫຍັງແດ່?
15 ຖ້າເຈົ້າກຳລັງຕັດສິນໃຈເລື່ອງທີ່ສຳຄັນ ໃຫ້ຄິດເບິ່ງວ່າມີຫຍັງແດ່ທີ່ເຈົ້າຕ້ອງເຮັດເພື່ອຈະເຮັດຕາມການຕັດສິນໃຈນັ້ນ. ພະເຢຊູສອນເຮົາໃຫ້ “ຄິດໄລ່ເບິ່ງຄ່າໃຊ້ຈ່າຍກ່ອນ.” (ລກ. 14:28) ສະນັ້ນ ໃຫ້ຄິດເບິ່ງວ່າຖ້າຈະເຮັດຕາມການຕັດສິນໃຈນັ້ນເຈົ້າຕ້ອງໃຊ້ເວລາຫຼາຍປານໃດ ຕ້ອງໃຊ້ຊັບສິນເງິນຄຳແລະຄວາມພະຍາຍາມຫຼາຍໜ້ອຍສ່ຳໃດ. ບາງເທື່ອເຈົ້າອາດຕ້ອງລົມກັບແຕ່ລະຄົນໃນຄອບຄົວວ່າເຂົາເຈົ້າຈະຊ່ວຍຫຍັງໄດ້ແດ່ເພື່ອໃຫ້ການຕັດສິນໃຈຂອງເຈົ້າອອກມາດີ. ເປັນຫຍັງການລົມກັບຄອບຄົວຈຶ່ງສຳຄັນ? ຍ້ອນມັນອາດຈະຊ່ວຍເຈົ້າໃຫ້ເຫັນວ່າເຈົ້າຕ້ອງປັບປ່ຽນບາງຢ່າງຫຼືຊ່ວຍເຈົ້າໃຫ້ເຫັນວ່າອາດມີທາງເລືອກອື່ນທີ່ດີກວ່າ. ຖ້າເຈົ້າຖາມແລະຟັງຄວາມຄິດເຫັນຂອງຄົນໃນຄອບຄົວ ເຂົາເຈົ້າກໍພ້ອມທີ່ຈະຊ່ວຍເຈົ້າເພື່ອໃຫ້ການຕັດສິນໃຈນັ້ນອອກມາດີ.—ສພສ. 15:22
ຕັດສິນໃຈໄດ້ຢ່າງສະຫຼາດ
16. ເຈົ້າຕ້ອງເຮັດຕາມຂັ້ນຕອນຫຍັງແດ່ເພື່ອຈະຕັດສິນໃຈອອກມາດີ? (ເບິ່ງຂອບ “ ເຮົາຈະຕັດສິນໃຈຢ່າງສະຫຼາດໄດ້ແນວໃດ?” ນຳ)
16 ຖ້າເຈົ້າເຮັດຕາມຂັ້ນຕອນທີ່ເວົ້າມານີ້ ເຈົ້າກໍຈະຕັດສິນໃຈໄດ້ຢ່າງສະຫຼາດ. ເຈົ້າໄດ້ຊອກຂໍ້ມູນຄົບຖ້ວນແລ້ວ ແລະໄດ້ເບິ່ງຫຼັກການທີ່ຈະຊ່ວຍເຈົ້າໃຫ້ຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ. ຕອນນີ້ເຈົ້າກໍສາມາດອະທິດຖານຂໍໃຫ້ພະເຢໂຫວາຊ່ວຍເຈົ້າໃຫ້ຕັດສິນໃຈໄດ້ດີ.
17. ອັນໃດເປັນສິ່ງສຳຄັນທີ່ຈະຊ່ວຍເຈົ້າໃຫ້ຕັດສິນໃຈຢ່າງສະຫຼາດ?
17 ເຖິງວ່າຜ່ານມາເຈົ້າເຄີຍຕັດສິນໃຈໄດ້ດີຫຼາຍເທື່ອແລ້ວ ແຕ່ຂໍໃຫ້ຈື່ໄວ້ວ່າສິ່ງທີ່ສຳຄັນທີ່ຈະຊ່ວຍໃຫ້ຕັດສິນໃຈຢ່າງສະຫຼາດແມ່ນຕ້ອງເພິ່ງສະຕິປັນຍາທີ່ມາຈາກພະເຢໂຫວາ ບໍ່ແມ່ນເພິ່ງສະຕິປັນຍາຫຼືປະສົບການຂອງໂຕເອງ. ພະເຢໂຫວາຜູ້ດຽວເທົ່ານັ້ນທີ່ສາມາດຊ່ວຍເຈົ້າໃຫ້ມີຄວາມຮູ້ແທ້ ມີຄວາມເຂົ້າໃຈ ແລະຮູ້ຈັກຄິດຢ່າງເລິກເຊິ່ງ ເຊິ່ງສິ່ງເຫຼົ່ານີ້ເປັນສ່ວນສຳຄັນຂອງສະຕິປັນຍາ. (ສພສ. 2:1-5) ພະເຢໂຫວາສາມາດຊ່ວຍເຈົ້າໃຫ້ຕັດສິນໃຈໃນແບບທີ່ເຮັດໃຫ້ເພິ່ນພໍໃຈ.—ພສ. 23:2, 3
ເພງທີ 28 ໄດ້ເປັນເພື່ອນກັບພະເຢໂຫວາ