ບົດຄວາມສຶກສາທີ 2
ເພງທີ 132 ເຮົາສອງຄົນກາຍເປັນຄົນດຽວກັນ
ຜົວຕ້ອງໃຫ້ກຽດເມຍ
“ໃຫ້ເຈົ້າທີ່ເປັນຜົວ . . . ໃຫ້ກຽດເມຍ.”—1ປຕ. 3:7
ຈຸດສຳຄັນ
ຜົວຈະໃຫ້ກຽດເມຍແນວໃດໂດຍທາງຄຳເວົ້າແລະການກະທຳ.
1. ເປັນຫຍັງພະເຢໂຫວາຈຶ່ງໃຫ້ມີການແຕ່ງດອງ?
ພະເຢໂຫວາເປັນ “ພະເຈົ້າຜູ້ມີຄວາມສຸກ” ແລະເພິ່ນກໍຢາກໃຫ້ເຮົາມີຄວາມສຸກຄືກັນ. (1ຕມ. 1:11) ເພິ່ນໃຫ້ສິ່ງດີໆຫຼາຍຢ່າງກັບເຮົາເພື່ອເຮັດໃຫ້ເຮົາມີຊີວິດທີ່ມີຄວາມສຸກ. (ຢກບ. 1:17) ສິ່ງດີຢ່າງໜຶ່ງກໍຄືເລື່ອງການແຕ່ງດອງ. ເມື່ອຜູ້ຊາຍແລະຜູ້ຍິງແຕ່ງດອງກັນ ເຂົາເຈົ້າສັນຍາວ່າຈະຮັກ ນັບຖື ແລະໃຫ້ກຽດກັນ. ຖ້າຜົວກັບເມຍຮັກກັນແລະມີສາຍສຳພັນທີ່ແໜ້ນແຟ້ນຕໍ່ກັນ ເຂົາເຈົ້າກໍຈະມີຄວາມສຸກ.—ສພສ. 5:18
2. ຊີວິດຄູ່ຂອງຫຼາຍຄົນເປັນແນວໃດໃນທຸກມື້ນີ້?
2 ໜ້າເສົ້າທີ່ຜົວເມຍຫຼາຍຄູ່ໃນທຸກມື້ນີ້ລືມຄຳສັນຍາທີ່ເຂົາເຈົ້າໃຫ້ໄວ້ໃນມື້ແຕ່ງດອງ ຍ້ອນແນວນີ້ຊີວິດຄູ່ຂອງເຂົາເຈົ້າຈຶ່ງບໍ່ມີຄວາມສຸກ. ລາຍງານຫຼ້າສຸດຈາກອົງການອະນາໄມໂລກບອກວ່າ ຜົວຫຼາຍຄົນທຳຮ້າຍເມຍທາງຮ່າງກາຍ ທາງຈິດໃຈ ຫຼືໃຊ້ຄຳເວົ້າທີ່ບໍ່ດີ. ຜົວແບບນີ້ອາດເຮັດດີຕໍ່ເມຍເມື່ອຢູ່ຕໍ່ໜ້າຄົນອື່ນ ແຕ່ຕອນຢູ່ເຮືອນພັດເຮັດບໍ່ດີຕໍ່ເມຍ. ນອກຈາກນັ້ນ ຜົວຫຼາຍຄົນຍັງເບິ່ງສື່ລາມົກເຊິ່ງເຮັດໃຫ້ເມຍຮູ້ສຶກວ່າບໍ່ໄດ້ຮັບຄວາມຮັກແລະທຸກໃຈຫຼາຍ.
3. ເປັນຫຍັງຜົວບາງຄົນຈຶ່ງທຳຮ້າຍເມຍ?
3 ເປັນຫຍັງຜົວບາງຄົນຈຶ່ງໃຊ້ຄວາມຮຸນແຮງກັບເມຍ? ເຂົາເຈົ້າອາດໃຫຍ່ມາໃນຄອບຄົວທີ່ພໍ່ມັກໃຊ້ຄວາມຮຸນແຮງ ເຂົາເຈົ້າຈຶ່ງຄິດວ່າການໃຊ້ຄວາມຮຸນແຮງກັບຄົນອື່ນເປັນເລື່ອງປົກກະຕິ. ຜູ້ຊາຍບາງຄົນອາດໄດ້ຮັບອິດທິພົນຈາກວັດທະນະທຳໃນເຂດທີ່ເຂົາເຈົ້າຢູ່ເຊິ່ງສົ່ງເສີມແນວຄິດຜິດໆທີ່ວ່າ “ລູກຜູ້ຊາຍ” ຕ້ອງໃຊ້ກຳລັງເພື່ອເຮັດໃຫ້ເມຍຮູ້ວ່າໃຜມີອຳນາດໃນເຮືອນ. ຜູ້ຊາຍບາງຄົນບໍ່ໄດ້ຖືກສອນໃຫ້ຄວບຄຸມອາລົມແລະຄວາມໃຈຮ້າຍ. ສ່ວນຜູ້ຊາຍບາງຄົນກໍມັກເບິ່ງສື່ລາມົກຈົນເຮັດໃຫ້ມີຄວາມຄິດທີ່ຜິດພ້ຽນກ່ຽວກັບຜູ້ຍິງແລະເລື່ອງເພດ. ນອກຈາກນັ້ນ ລາຍງານດຽວກັນຍັງບອກອີກວ່າ ຜົນກະທົບຈາກພະຍາດໂຄວິດ-19 ເຮັດໃຫ້ບັນຫາເຫຼົ່ານີ້ຮຸນແຮງຂຶ້ນ. ແຕ່ບໍ່ວ່າຈະຍ້ອນເຫດຜົນຫຍັງ ຜົວກໍບໍ່ຄວນທຳຮ້າຍເມຍ.
4. ຜົວທີ່ເປັນພະຍານພະເຢໂຫວາຕ້ອງລະວັງເລື່ອງຫຍັງ ແລະຍ້ອນຫຍັງຈຶ່ງລະວັງ?
4 ຜົວທີ່ເປັນພະຍານພະເຢໂຫວາຕ້ອງລະວັງທີ່ຈະບໍ່ຮັບເອົາຄວາມຄິດທີ່ຜິດໆທີ່ມີຕໍ່ຜູ້ຍິງ. a ຍ້ອນຫຍັງ? ເຫດຜົນໜຶ່ງແມ່ນ ເຮົາຄິດແນວໃດເຮົາກໍມັກຈະເຮັດແບບນັ້ນ. ໂປໂລເຕືອນຜູ້ຖືກເລືອກໃນເມືອງໂຣມວ່າ: “ໃຫ້ເຊົາຮຽນແບບຄົນໃນໂລກນີ້.” (ຣມ. 12:1, 2) ຕອນທີ່ໂປໂລຂຽນຈົດໝາຍໄປຫາພີ່ນ້ອງຢູ່ເມືອງໂຣມ ພີ່ນ້ອງຢູ່ຫັ້ນເປັນຄລິດສະຕຽນມາຫຼາຍປີແລ້ວ. ແຕ່ສິ່ງທີ່ໂປໂລຂຽນບອກໃຫ້ຮູ້ວ່າພີ່ນ້ອງບາງຄົນຍັງໄດ້ຮັບອິດທິພົນຈາກປະເພນີແລະຄວາມຄິດຂອງຄົນທົ່ວໄປໃນໂລກ. ຍ້ອນແນວນີ້ໂປໂລຈຶ່ງເຕືອນເຂົາເຈົ້າໃຫ້ປ່ຽນຄວາມຄິດແລະການກະທຳ. ຄຳແນະນຳນີ້ກໍໃຊ້ໄດ້ກັບຜົວທີ່ເປັນພະຍານໃນທຸກມື້ນີ້ຄືກັນ. ເປັນຕາໜ້າເສຍດາຍ ບາງຄົນໄດ້ຮັບອິດທິພົນຈາກຄວາມຄິດຂອງຄົນໃນໂລກແລະເຖິງຂັ້ນທຳຮ້າຍເມຍ. b ພະເຢໂຫວາຄາດໝາຍໃຫ້ຜົວປະຕິບັດກັບເມຍແນວໃດ? ຄຳຕອບແມ່ນຢູ່ໃນຂໍ້ພະຄຳພີຫຼັກຂອງບົດນີ້.
5. ຕາມ 1 ເປໂຕ 3:7 ຜົວຄວນປະຕິບັດກັບເມຍແນວໃດ?
5 ອ່ານ 1 ເປໂຕ 3:7. ພະເຢໂຫວາສັ່ງຜົວວ່າຕ້ອງໃຫ້ກຽດເມຍ. ຖ້າເຮົາໃຫ້ກຽດໃຜ ເຮົາກໍຈະປະຕິບັດກັບຜູ້ນັ້ນໃນແບບທີ່ສະແດງຄວາມນັບຖື. ຜົວທີ່ໃຫ້ກຽດເມຍຈະປະຕິບັດກັບເມຍແບບກະລຸນາແລະແບບທີ່ສະແດງຄວາມຮັກ. ໃນບົດນີ້ ເຮົາຈະມາເບິ່ງວ່າຜົວຈະໃຫ້ກຽດເມຍໄດ້ແນວໃດ. ແຕ່ກ່ອນອື່ນເຮົາຈະມາເບິ່ງວ່າການກະທຳແບບໃດທີ່ສະແດງວ່າຜົວບໍ່ໃຫ້ກຽດເມຍ.
ຢ່າເຮັດສິ່ງທີ່ບໍ່ໃຫ້ກຽດເມຍ
6. ພະເຢໂຫວາຮູ້ສຶກແນວໃດຕໍ່ຜົວທີ່ທຳຮ້າຍເມຍທາງຮ່າງກາຍ? (ໂກໂລຊາຍ 3:19)
6 ການທຳຮ້າຍທາງຮ່າງກາຍ. ພະເຢໂຫວາຊັງຄົນທີ່ມັກໃຊ້ຄວາມຮຸນແຮງ. (ພສ. 11:5) ເພິ່ນບໍ່ມັກແທ້ໆທີ່ຜົວທຳຮ້າຍເມຍ. (ມລກ. 2:16; ອ່ານໂກໂລຊາຍ 3:19) ຕາມ 1 ເປໂຕ 3:7 ທີ່ເປັນຂໍ້ພະຄຳພີຫຼັກຂອງບົດນີ້ ຖ້າຜົວເຮັດບໍ່ດີກັບເມຍ ມັນຈະສົ່ງຜົນຕໍ່ສາຍສຳພັນຂອງລາວກັບພະເຢໂຫວານຳ. ພະເຢໂຫວາອາດເຖິງຂັ້ນບໍ່ຟັງຄຳອະທິດຖານຂອງລາວ.
7. ຕາມເອເຟໂຊ 4:31, 32 ຜົວຕ້ອງຫຼີກລ່ຽງຄຳເວົ້າແບບໃດ? (ເບິ່ງ “ການອະທິບາຍຄຳສັບ” ນຳ)
7 ການໃຊ້ຄຳເວົ້າທີ່ບໍ່ດີ. ຜົວບາງຄົນດ່າເມຍແລະມັກໃຊ້ຄຳເວົ້າແຮງໆທີ່ເຮັດໃຫ້ເມຍເສຍໃຈ. ແຕ່ພະເຢໂຫວາຊັງ “ຄວາມໃຈຮ້າຍ ການຮ້າຍໃສ່ຄົນອື່ນ ການຮ້ອງທັ່ງໃສ່ ແລະການເວົ້າດູຖູກ.” c (ອ່ານເອເຟໂຊ 4:31, 32) ພະເຢໂຫວາໄດ້ຍິນທຸກສິ່ງ. ເພິ່ນສົນໃຈວິທີທີ່ຜົວເວົ້າກັບເມຍແມ່ນແຕ່ຕອນທີ່ຢູ່ໃນເຮືອນຂອງໂຕເອງ. ຜົວທີ່ເວົ້າບໍ່ດີກັບເມຍບໍ່ພຽງແຕ່ທຳລາຍສາຍສຳພັນຂອງລາວກັບເມຍເທົ່ານັ້ນ ແຕ່ຍັງທຳລາຍສາຍສຳພັນຂອງລາວກັບພະເຢໂຫວານຳ.—ຢກບ. 1:26
8. ພະເຢໂຫວາຮູ້ສຶກແນວໃດຕໍ່ສື່ລາມົກ ແລະຍ້ອນຫຍັງເພິ່ນຈຶ່ງຮູ້ສຶກແບບນັ້ນ?
8 ການເບິ່ງສື່ລາມົກ. ພະເຢໂຫວາຮູ້ສຶກແນວໃດຕໍ່ສື່ລາມົກ? ເພິ່ນຊັງສື່ລາມົກ. ສະນັ້ນ ຜົວທີ່ເບິ່ງສື່ລາມົກບໍ່ພຽງແຕ່ທຳລາຍສາຍສຳພັນຂອງລາວກັບພະເຢໂຫວາເທົ່ານັ້ນ ແຕ່ຍັງເປັນການບໍ່ໃຫ້ກຽດເມຍນຳ. d ພະເຢໂຫວາຄາດໝາຍໃຫ້ຜົວສັດຊື່ຕໍ່ເມຍບໍ່ພຽງແຕ່ ທາງດ້ານການກະທຳເທົ່ານັ້ນ ແຕ່ທາງດ້ານຄວາມຄິດນຳ. ພະເຢຊູບອກວ່າ ຜູ້ຊາຍທີ່ແນມເບິ່ງຜູ້ຍິງຈົນເກີດຄວາມຕ້ອງການທາງເພດກໍເປັນຊູ້ “ໃນໃຈ” ກັບຜູ້ຍິງຄົນນັ້ນແລ້ວ. e—ມທ. 5:28, 29
9. ເປັນຫຍັງພະເຢໂຫວາຈຶ່ງຊັງຜົວທີ່ບັງຄັບເມຍໃຫ້ມີເພດສຳພັນນຳໃນແບບທີ່ບໍ່ໃຫ້ກຽດ?
9 ບັງຄັບໃຫ້ມີເພດສຳພັນໃນແບບທີ່ບໍ່ໃຫ້ກຽດ. ຜົວບາງຄົນບັງຄັບເມຍໃຫ້ມີເພດສຳພັນນຳໃນແບບທີ່ບໍ່ໃຫ້ກຽດ ເຊິ່ງເຮັດໃຫ້ເມຍຮູ້ສຶກວ່າບໍ່ສະອາດ ບໍ່ສະບາຍໃຈ ແລະເປັນການບໍ່ສະແດງຄວາມຮັກຕໍ່ເມຍ. ພະເຢໂຫວາຊັງການກະທຳທີ່ເຫັນແກ່ໂຕແລະບໍ່ຄິດເຖິງຄວາມຮູ້ສຶກຂອງຄົນອື່ນ. ພະເຢໂຫວາຄາດໝາຍໃຫ້ຜົວຮັກ ທະນຸຖະໜອມ ແລະນັບຖືຄວາມຮູ້ສຶກຂອງເມຍ. (ອຟຊ. 5:28, 29) ຖ້າຜົວທີ່ເປັນພະຍານພະເຢໂຫວາມັກບັງຄັບເມຍໃຫ້ມີເພດສຳພັນນຳໃນແບບທີ່ບໍ່ໃຫ້ກຽດ ຫຼືທຳຮ້າຍເມຍ ຫຼືເບິ່ງສື່ລາມົກເດ ລາວຈະປ່ຽນແປງຄວາມຄິດແລະການກະທຳຂອງໂຕເອງໄດ້ແນວໃດ?
ຜົວຈະເຊົາເຮັດສິ່ງທີ່ບໍ່ໃຫ້ກຽດເມຍໄດ້ແນວໃດ?
10. ຜົວຈະໄດ້ຮັບປະໂຫຍດຫຍັງຈາກຕົວຢ່າງຂອງພະເຢຊູ?
10 ອັນໃດຈະຊ່ວຍຜົວໃຫ້ເຊົາທຳຮ້າຍເມຍແລະເຊົາເຮັດສິ່ງທີ່ບໍ່ໃຫ້ກຽດເມຍ? ສິ່ງທີ່ຈະຊ່ວຍໄດ້ແມ່ນການພະຍາຍາມຮຽນແບບພະເຢຊູ. ເຖິງວ່າພະເຢຊູບໍ່ເຄີຍແຕ່ງດອງ ແຕ່ວິທີທີ່ເພິ່ນປະຕິບັດກັບພວກລູກສິດກໍເປັນຕົວຢ່າງທີ່ດີທີ່ຜົວຄວນປະຕິບັດກັບເມຍ. (ອຟຊ. 5:25) ຕົວຢ່າງເຊັ່ນ: ໃຫ້ເຮົາມາເບິ່ງວ່າຜົວສາມາດຮຽນຫຍັງຈາກວິທີທີ່ພະເຢຊູປະຕິບັດແລະເວົ້າກັບພວກລູກສິດ.
11. ພະເຢຊູປະຕິບັດກັບພວກລູກສິດແນວໃດ?
11 ພະເຢຊູປະຕິບັດກັບພວກລູກສິດແບບອ່ອນໂຍນແລະໃຫ້ກຽດເຂົາເຈົ້າສະເໝີ. ເພິ່ນບໍ່ເຄີຍດ່າຫຼືຂົ່ມເຂົາເຈົ້າ. ເຖິງວ່າເພິ່ນເປັນນາຍເຂົາເຈົ້າ ແຕ່ເພິ່ນກໍບໍ່ເຄີຍໃຊ້ອຳນາດນັ້ນເພື່ອເຮັດໃຫ້ເຂົາເຈົ້າຮູ້ສຶກວ່າດ້ອຍກວ່າເພິ່ນຫຼືຮູ້ສຶກຢ້ານເພິ່ນ. ແຕ່ເພິ່ນຮັບໃຊ້ເຂົາເຈົ້າດ້ວຍຄວາມຖ່ອມ. (ຢຮ. 13:12-17) ເພິ່ນບອກພວກລູກສິດວ່າ: “ຮຽນຈາກຂ້ອຍ ຍ້ອນຂ້ອຍເປັນຄົນອ່ອນໂຍນແລະຖ່ອມໂຕ ແລ້ວພວກເຈົ້າຈະສົດຊື່ນ.” (ມທ. 11:28-30) ຈາກຂໍ້ຄຳພີນີ້ເຮົາເຫັນວ່າພະເຢຊູເປັນຄົນອ່ອນໂຍນ. ຄົນອ່ອນໂຍນບໍ່ແມ່ນຄົນທີ່ອ່ອນແອ ແຕ່ເປັນຄົນທີ່ເຂັ້ມແຂງຍ້ອນສາມາດຄວບຄຸມໂຕເອງໄດ້. ເມື່ອຄົນອ່ອນໂຍນຖືກຍົວະໃຫ້ໃຈຮ້າຍ ລາວກໍຈະໃຈເຢັນແລະຄວບຄຸມອາລົມໄດ້ສະເໝີ.
12. ພະເຢຊູເວົ້າກັບຄົນອື່ນແນວໃດ?
12 ພະເຢຊູມັກເວົ້າໃຫ້ກຳລັງໃຈແລະເຮັດໃຫ້ຄົນອື່ນສົດຊື່ນ. ເພິ່ນບໍ່ໄດ້ເວົ້າຮ້າຍກັບພວກລູກສິດ. (ລກ. 8:47, 48) ແມ່ນແຕ່ຕອນທີ່ພວກຜູ້ຕໍ່ຕ້ານດ່າເພິ່ນແລະພະຍາຍາມເຮັດໃຫ້ເພິ່ນໃຈຮ້າຍ “ເພິ່ນກໍບໍ່ໄດ້ດ່າຄືນ.” (1ປຕ. 2:21-23) ບາງເທື່ອເພິ່ນກໍເລືອກທີ່ຈະມິດຢູ່ ແທນທີ່ຈະຕອບກັບຄືນແບບແຮງໆ. (ມທ. 27:12-14) ພະເຢຊູເປັນຕົວຢ່າງທີ່ດີຫຼາຍແທ້ໆສຳລັບຜູ້ທີ່ເປັນຜົວ!
13. ຕາມມັດທາຍ 19:4-6 ຜົວຈະ “[ຜູກພັນໃກ້ຊິດ] ກັບເມຍ” ໄດ້ແນວໃດ? (ເບິ່ງຮູບນຳ)
13 ພະເຢຊູສັ່ງຜົວໃຫ້ສັດຊື່ຕໍ່ເມຍ. ເພິ່ນເວົ້າແບບນີ້ຕາມທີ່ພະເຢໂຫວາພໍ່ຂອງເພິ່ນບອກໄວ້ວ່າຜົວຕ້ອງ “[ຜູກພັນໃກ້ຊິດ] ກັບເມຍ.” (ອ່ານມັດທາຍ 19:4-6) ຄຳພາສາກຣີກທີ່ແປວ່າ “ຜູກພັນໃກ້ຊິດ” ມີຄວາມໝາຍຕາມໂຕວ່າ “ຕິດກາວ.” ສະນັ້ນ ສາຍສຳພັນລະຫວ່າງຜົວກັບເມຍຕ້ອງແໜ້ນແຟ້ນເປັນອັນໜຶ່ງອັນດຽວກັນຄືກັບຕິດກາວໄວ້. ຖ້າມີການແຍກຈາກກັນມັນກໍຈະເຮັດໃຫ້ເກີດຄວາມເສຍຫາຍທັງສອງຝ່າຍ. ຜົວຄວນເຮັດແນວໃດເພື່ອຮັກສາສາຍສຳພັນທີ່ແໜ້ນແຟ້ນກັບເມຍ? ລາວຈະບໍ່ເບິ່ງສື່ລາມົກທຸກຮູບແບບ. ລາວຈະປິ່ນໜ້າໜີທັນທີຈາກ “ສິ່ງທີ່ບໍ່ມີຄ່າ.” (ພສ. 119:37) ລາວຈະຮຽນແບບໂຢບ ໂດຍເຮັດສັນຍາກັບຕາໂຕເອງວ່າຈະບໍ່ແນມເບິ່ງຜູ້ຍິງຄົນອື່ນແບບທີ່ມີຄວາມຕ້ອງການທີ່ບໍ່ຖືກຕ້ອງ.—ໂຢບ 31:1
14. ຜົວທີ່ທຳຮ້າຍເມຍທາງຮ່າງກາຍຫຼືໃຊ້ຄຳເວົ້າທີ່ບໍ່ດີກັບເມຍຕ້ອງເຮັດຕາມຂັ້ນຕອນຫຍັງແດ່ເພື່ອຈະຟື້ນຟູສາຍສຳພັນຂອງລາວກັບພະເຢໂຫວາແລະກັບເມຍ?
14 ຜົວທີ່ທຳຮ້າຍເມຍທາງຮ່າງກາຍຫຼືໃຊ້ຄຳເວົ້າທີ່ບໍ່ດີກັບເມຍຕ້ອງເຮັດຕາມຂັ້ນຕອນຕໍ່ໄປນີ້ເພື່ອຟື້ນຟູສາຍສຳພັນຂອງລາວກັບພະເຢໂຫວາແລະກັບເມຍ. ຂັ້ນຕອນທຳອິດ: ລາວຕ້ອງຍອມຮັບວ່າສິ່ງທີ່ລາວກຳລັງເຮັດມັນບໍ່ດີ. ພະເຢໂຫວາເຫັນທຸກສິ່ງທີ່ລາວເຮັດແລະໄດ້ຍິນທຸກຢ່າງທີ່ລາວເວົ້າ. (ພສ. 44:21; ປຍຈ. 12:14; ຮຣ. 4:13) ຂັ້ນຕອນທີ 2: ລາວຕ້ອງເຊົາທຳຮ້າຍເມຍແລະປ່ຽນແປງການກະທຳຂອງໂຕເອງ. (ສພສ. 28:13) ຂັ້ນຕອນທີ 3: ລາວຕ້ອງຂໍໂທດເມຍແລະຂໍໂທດພະເຢໂຫວາ ແລະຂໍໃຫ້ເມຍແລະພະເຢໂຫວາຍົກໂທດໃຫ້ລາວ. (ກຈກ. 3:19) ນອກຈາກນັ້ນ ລາວຄວນອະທິດຖານຂໍໃຫ້ພະເຢໂຫວາຊ່ວຍລາວໃຫ້ມີຄວາມຕ້ອງການທີ່ຈະປ່ຽນແປງໂຕເອງແລະໃຫ້ສາມາດຄວບຄຸມຄວາມຄິດ ຄຳເວົ້າ ແລະການກະທຳໄດ້. (ພສ. 51:10-12; 2ກຣ. 10:5; ຟລປ. 2:13) ຂັ້ນຕອນທີ 4: ລາວຕ້ອງເຮັດສອດຄ່ອງກັບຄຳອະທິດຖານຂອງລາວໂດຍຝຶກໂຕເອງໃຫ້ຊັງຄວາມຮຸນແຮງທຸກຮູບແບບແລະຊັງການໃຊ້ຄຳເວົ້າທີ່ບໍ່ດີ. (ພສ. 97:10) ຂັ້ນຕອນທີ 5: ລາວຕ້ອງຟ້າວຂໍໃຫ້ຜູ້ເບິ່ງແຍງໃນປະຊາຄົມຊ່ວຍ. (ຢກບ. 5:14-16) ຂັ້ນຕອນທີ 6: ລາວຕ້ອງກຳນົດມາດຕະການທີ່ຈະຊ່ວຍລາວບໍ່ໃຫ້ກັບໄປເຮັດຜິດຊ້ຳອີກ. ຜົວທີ່ເບິ່ງສື່ລາມົກກໍຕ້ອງເຮັດຕາມຂັ້ນຕອນເຫຼົ່ານີ້ຄືກັນ. ພະເຢໂຫວາຈະຊ່ວຍລາວໃຫ້ປ່ຽນແປງການປະພຶດຂອງໂຕເອງ. (ພສ. 37:5) ນອກຈາກເຮັດຕາມຂັ້ນຕອນເຫຼົ່ານີ້ແລ້ວ ຜົວຍັງຕ້ອງຮຽນຮູ້ທີ່ຈະໃຫ້ກຽດເມຍນຳ. ລາວຈະເຮັດແບບນັ້ນໄດ້ແນວໃດ?
ໃຫ້ກຽດເມຍ
15. ຜົວຈະສະແດງຄວາມຮັກຕໍ່ເມຍແນວໃດ?
15 ສະແດງຄວາມຮັກ. ພີ່ນ້ອງຊາຍບາງຄົນເຮັດບາງຢ່າງໃນແຕ່ລະມື້ເພື່ອເຮັດໃຫ້ເມຍເຫັນວ່າລາວຮັກເມຍຫຼາຍ. (1ຢຮ. 3:18) ລາວອາດສະແດງຄວາມຮັກຕໍ່ເມຍໂດຍວິທີງ່າຍໆ ເຊັ່ນ: ຈັບມືຫຼືກອດເມຍຢ່າງອົບອຸ່ນ ຫຼືສົ່ງຂໍ້ຄວາມຫາເມຍແລະບອກວ່າ “ຄິດຮອດເດີ້” ຫຼືຖາມເມຍວ່າ “ມື້ນີ້ເປັນແນວໃດ?” ນອກຈາກນັ້ນ ລາວອາດສະແດງຄວາມຮັກຕໍ່ເມຍໂດຍຊື້ດອກໄມ້ຫຼືຊື້ຂອງຂວັນໃຫ້ເມຍ. ເມື່ອຜົວເຮັດສິ່ງເຫຼົ່ານີ້ກໍສະແດງວ່າລາວໃຫ້ກຽດເມຍແລະເຮັດໃຫ້ຊີວິດຄູ່ຂອງເຂົາເຈົ້າແໜ້ນແຟ້ນຫຼາຍຂຶ້ນ.
16. ເປັນຫຍັງຜົວຄວນຊົມເຊີຍເມຍ?
16 ສະແດງຄວາມຮູ້ຄຸນຄ່າ. ຜົວທີ່ໃຫ້ກຽດເມຍຈະຊົມເຊີຍແລະໃຫ້ກຳລັງໃຈເມຍ. ວິທີໜຶ່ງທີ່ຜົວເຮັດແບບນີ້ໄດ້ແມ່ນຂອບໃຈເມຍສຳລັບທຸກສິ່ງທີ່ເມຍເຮັດເພື່ອຊ່ວຍລາວ. (ກລຊ. 3:15) ເມື່ອຜົວຊົມເຊີຍເມຍຈາກໃຈ ເມຍກໍຈະຮູ້ສຶກວ່າຜົວຮັກ ໃຫ້ກຽດ ຮູ້ສຶກອົບອຸ່ນໃຈ ແລະໝັ້ນໃຈໃນໂຕເອງ.—ສພສ. 31:28
17. ຜົວຈະສະແດງຄວາມນັບຖືຕໍ່ເມຍແນວໃດ?
17 ສະແດງຄວາມກະລຸນາແລະຄວາມນັບຖື. ຜົວທີ່ຮັກເມຍຈະເຫັນຄ່າແລະທະນຸຖະໜອມເມຍ. ລາວຖືວ່າເມຍເປັນຂອງຂວັນທີ່ມີຄ່າຈາກພະເຢໂຫວາ. (ສພສ. 18:22; 31:10) ເມື່ອລາວຄິດແບບນີ້ ລາວກໍຈະປະຕິບັດກັບເມຍແບບກະລຸນາແລະສະແດງຄວາມນັບຖືແມ່ນແຕ່ຕອນທີ່ມີເພດສຳພັນກັນ. ລາວຈະບໍ່ບັງຄັບເມຍໃຫ້ເຮັດສິ່ງທີ່ຮູ້ສຶກບໍ່ສະບາຍໃຈ ຮູ້ສຶກວ່າຖືກທາລຸນ ຫຼືລົບກວນໃຈຮູ້ຜິດຮູ້ຖືກຂອງເມຍຕອນທີ່ມີເພດສຳພັນກັນ. f ຜົວກໍຄືກັນບໍ່ຄວນເຮັດສິ່ງທີ່ລົບກວນໃຈຮູ້ຜິດຮູ້ຖືກຂອງໂຕເອງຕອນທີ່ມີເພດສຳພັນກັບເມຍ.—ກຈກ. 24:16
18. ຜົວຄວນຕັ້ງໃຈທີ່ຈະເຮັດຫຍັງ? (ເບິ່ງຂອບ “ ສີ່ວິທີທີ່ຈະຊ່ວຍໃຫ້ເປັນຜົວທີ່ໃຫ້ກຽດເມຍ” ນຳ)
18 ຜູ້ເປັນຜົວສາມາດໝັ້ນໃຈໄດ້ວ່າພະເຢໂຫວາເຫັນແລະຮູ້ຄຸນຄ່າທີ່ເຈົ້າພະຍາຍາມໃຫ້ກຽດເມຍໃນທຸກສິ່ງທີ່ເຈົ້າເວົ້າແລະເຮັດ. ໃຫ້ຕັ້ງໃຈທີ່ຈະໃຫ້ກຽດເມຍໂດຍບໍ່ເຮັດສິ່ງທີ່ຈະເຮັດໃຫ້ເມຍເສຍໃຈ ສະແດງຄວາມກະລຸນາ ຄວາມນັບຖື ແລະສະແດງຄວາມຮັກຕໍ່ເມຍ. ຖ້າເຮັດແບບນີ້ ເຈົ້າກໍເຮັດໃຫ້ເມຍເຫັນວ່າເຈົ້າຮັກແລະເຫັນຄ່າລາວ. ເມື່ອເຈົ້າໃຫ້ກຽດເມຍ ເຈົ້າກໍຈະປົກປ້ອງສາຍສຳພັນທີ່ມີຄ່າທີ່ສຸດຂອງເຈົ້າ ນັ້ນກໍຄືສາຍສຳພັນຂອງເຈົ້າກັບພະເຢໂຫວາ.—ພສ. 25:14
ເພງທີ 131 “ພະເຈົ້າໄດ້ເຮັດໃຫ້ຜູກພັນກັນແລ້ວ”
a ຄົນທີ່ເປັນຜົວຈະໄດ້ຮັບປະໂຫຍດຈາກການອ່ານບົດຄວາມ “ເຈົ້າຮຽນແບບພະເຢໂຫວາບໍໃນການປະຕິບັດກັບພີ່ນ້ອງຍິງ?” ໃນຫໍສັງເກດການເດືອນມັງກອນ ປີ 2024.
b ຄົນທີ່ຖືກທຳຮ້າຍຮ່າງກາຍຈາກຄູ່ຂອງໂຕເອງຈະໄດ້ຮັບປະໂຫຍດຈາກການອ່ານບົດຄວາມ “ຈະຊ່ວຍຄົນທີ່ຖືກທຳຮ້າຍໃນຄອບຄົວໄດ້ແນວໃດ?” ໃນສ່ວນທີ່ຊື່ວ່າ “ເລື່ອງອື່ນໆ” ທີ່ຢູ່ໃນບົດຄວາມຊຸດໃນເວັບໄຊ jw.org ແລະໃນແອັບ JW Library®. (ພາສາໄທ)
c ການອະທິບາຍຄຳສັບ: ຄຳວ່າ “ການເວົ້າດູຖູກ” ລວມເຖິງການເອີ້ນຜູ້ໃດຜູ້ໜຶ່ງແບບດູຖູກ ໃຊ້ຄຳເວົ້າທີ່ເຮັດໃຫ້ຮູ້ສຶກບໍ່ມີຄ່າ ແລະເວົ້າຕະຫຼອດກ່ຽວກັບຈຸດເສຍຂອງລາວ. ສະນັ້ນ ຄຳເວົ້າແບບໃດກໍຕາມທີ່ຜົວເວົ້າເຊິ່ງເຮັດໃຫ້ເມຍເສຍໃຈຫຼືດ່າເມຍຖືວ່າເປັນການເວົ້າດູຖູກ.
d ເບິ່ງບົດຄວາມ “ສື່ລາມົກທຳລາຍຊີວິດຄູ່ຂອງເຈົ້າໄດ້” ໃນເວັບໄຊ jw.org ແລະໃນແອັບ JW Library. (ພາສາໄທ)
e ເມຍທີ່ຜົວເບິ່ງສື່ລາມົກຈະໄດ້ຮັບປະໂຫຍດຈາກການອ່ານບົດຄວາມ “ຖ້າຄູ່ຂອງເຈົ້າເບິ່ງສິ່ງລາມົກ ເຈົ້າຈະເຮັດແນວໃດ?” ໃນຫໍສັງເກດການເດືອນສິງຫາ ປີ 2023.
f ຄຳພີໄບເບິນບໍ່ໄດ້ໃຫ້ລາຍລະອຽດວ່າການມີເພດສຳພັນແບບໃດຖືກແລະແບບໃດຜິດລະຫວ່າງຜົວກັບເມຍ. ຜົວກັບເມຍຕ້ອງລົມກັນແລະຕັດສິນໃຈເອົາເອງວ່າສິ່ງທີ່ເຂົາເຈົ້າເລືອກເປັນການໃຫ້ກຽດພະເຢໂຫວາ ເຮັດໃຫ້ຄູ່ຂອງໂຕເອງພໍໃຈ ແລະບໍ່ມີຫຍັງມາລົບກວນໃຈ. ຕາມປົກກະຕິແລ້ວ ຜົວກັບເມຍຈະບໍ່ລົມເລື່ອງສ່ວນໂຕແບບນີ້ກັບຄົນອື່ນ.
g ຄຳອະທິບາຍຮູບ: ຜູ້ຊາຍຄົນໜຶ່ງທີ່ເປັນໝູ່ຢູ່ບ່ອນເຮັດວຽກແລະບໍ່ໄດ້ເປັນພະຍານພະເຢໂຫວາພະຍາຍາມຊວນພີ່ນ້ອງຊາຍຄົນໜຶ່ງໃຫ້ເບິ່ງປຶ້ມທີ່ມີຮູບໂປ້.