ບົດຄວາມສຶກສາທີ 1
ເພງທີ 2 ຊື່ຂອງພະອົງຄືເຢໂຫວາ
ໃຫ້ສັນລະເສີນພະເຢໂຫວາ
ຂໍ້ພະຄຳພີປະຈຳປີ 2025: “ໃຫ້ສັນລະເສີນພະເຢໂຫວາຍ້ອນຊື່ຂອງເພິ່ນ.”—ພສ. 96:8
ຈຸດສຳຄັນ
ເຮົາຈະຮຽນວ່າເຮົາຈະສັນລະເສີນພະເຢໂຫວາແນວໃດຕາມທີ່ເພິ່ນສົມຄວນໄດ້ຮັບ.
1. ຫຼາຍຄົນໃນທຸກມື້ນີ້ສົນໃຈເລື່ອງຫຍັງ?
ເຈົ້າສັງເກດບໍວ່າໃນທຸກມື້ນີ້ຫຼາຍຄົນສົນໃຈແຕ່ເລື່ອງຂອງໂຕເອງ? ຕົວຢ່າງເຊັ່ນ: ບາງຄົນໃຊ້ສື່ສັງຄົມອອນລາຍເພື່ອໃຫ້ຄົນອື່ນສົນໃຈເຂົາເຈົ້າແລະສິ່ງທີ່ເຂົາເຈົ້າເຮັດ. ແຕ່ກໍມີຄົນຈຳນວນໜຶ່ງທີ່ສັນລະເສີນພະເຢໂຫວາ. ໃນບົດນີ້ເຮົາຈະເບິ່ງວ່າການສັນລະເສີນພະເຢໂຫວາໝາຍເຖິງຫຍັງ ແລະເປັນຫຍັງເຮົາຄວນເຮັດແບບນັ້ນ. ເຮົາຍັງຈະເບິ່ງວ່າເຮົາຈະສັນລະເສີນພະເຢໂຫວາແນວໃດຕາມທີ່ເພິ່ນສົມຄວນໄດ້ຮັບ ແລະໃນອະນາຄົດໃກ້ໆນີ້ພະເຢໂຫວາຈະເຮັດໃຫ້ຊື່ຂອງເພິ່ນໄດ້ຮັບຄຳສັນລະເສີນແນວໃດ.
ການສັນລະເສີນພະເຢໂຫວາໝາຍເຖິງຫຍັງ?
2. ພະເຢໂຫວາເຮັດໃຫ້ເຫັນຄວາມຍິ່ງໃຫຍ່ຂອງເພິ່ນແນວໃດຢູ່ພູຊີນາຍ? (ເບິ່ງຮູບໜ້າປົກນຳ)
2 ຄຳພີໄບເບິນບອກໃຫ້ຮູ້ວ່າພະເຢໂຫວາເປັນພະເຈົ້າທີ່ຍິ່ງໃຫຍ່. ພະເຢໂຫວາເຮັດໃຫ້ເຫັນຄວາມຍິ່ງໃຫຍ່ຂອງເພິ່ນຫຼັງຈາກທີ່ເພິ່ນຊ່ວຍຊາດອິດສະຣາເອນອອກຈາກການເປັນທາດໃນເອຢິບໄດ້ບໍ່ດົນ. ຂໍໃຫ້ນຶກພາບເຫດການຕໍ່ໄປນີ້: ຄົນອິດສະຣາເອນຫຼາຍລ້ານຄົນໄປຢູ່ລວມກັນແຖວຕີນພູຊີນາຍເພື່ອຟັງສິ່ງທີ່ພະເຢໂຫວາຈະບອກເຂົາເຈົ້າ. ຈາກນັ້ນກໍມີຂີ້ເຝື້ອໜາໆຢູ່ເທິງພູນັ້ນ ແລ້ວກໍມີຄວັນປົກຄຸມຢູ່ບໍລິເວນພູນັ້ນນຳ. ທັນໃດນັ້ນກໍມີແຜ່ນດິນໄຫວ ຟ້າຮ້ອງ ຟ້າແມບ ແລະມີສຽງແກດັງກ້ອງໄປທົ່ວ. (ອພຍ. 19:16-18; 24:17; ພສ. 68:8) ເມື່ອເຫັນພະເຢໂຫວາເຮັດສິ່ງເຫຼົ່ານີ້ ຄົນອິດສະຣາເອນຕ້ອງຮູ້ສຶກງຶດຫຼາຍແທ້ໆກັບລິດເດດແລະຄວາມຍິ່ງໃຫຍ່ຂອງເພິ່ນ.
ຢູ່ພູຊີນາຍ ພະເຢໂຫວາໄດ້ໃຫ້ຄົນອິດສະຣາເອນເຫັນລິດເດດແລະຄວາມຍິ່ງໃຫຍ່ຂອງເພິ່ນ (ເບິ່ງຂໍ້ 2)
3. ການສັນລະເສີນພະເຢໂຫວາໝາຍເຖິງຫຍັງ?
3 ມະນຸດສາມາດສັນລະເສີນພະເຢໂຫວາໄດ້ບໍ? ໄດ້ແທ້. ວິທີໜຶ່ງທີ່ເຮົາສັນລະເສີນພະເຢໂຫວາແມ່ນການບອກຄົນອື່ນກ່ຽວກັບລິດເດດທີ່ຍິ່ງໃຫຍ່ຂອງເພິ່ນແລະຄຸນລັກສະນະທີ່ດີຂອງເພິ່ນ. ເຮົາຍັງສັນລະເສີນພະເຢໂຫວາເມື່ອເຮົາຍົກຍ້ອງເພິ່ນສຳລັບທຸກສິ່ງທີ່ເພິ່ນຊ່ວຍເຮົາໃຫ້ເຮັດໄດ້ສຳເລັດ. (ອຊຢ. 26:12) ກະສັດດາວິດເປັນຕົວຢ່າງທີ່ດີຂອງຄົນທີ່ສັນລະເສີນພະເຢໂຫວາ. ໃນຄຳອະທິດຖານ ດາວິດສັນລະເສີນພະເຢໂຫວາຕໍ່ໜ້າຄົນອິດສະຣາເອນວ່າ: “ພະເຢໂຫວາ ພະອົງຍິ່ງໃຫຍ່ ມີລິດເດດ ມີກຽດຕິຍົດແລະສະຫງ່າລາສີ ຍ້ອນວ່າທຸກສິ່ງທີ່ຢູ່ໃນສະຫວັນແລະຢູ່ໃນໂລກເປັນຂອງພະອົງ.” ຫຼັງຈາກດາວິດອະທິດຖານຈົບແລ້ວ “[ຄົນອິດສະຣາເອນທັງໝົດ] ກໍສັນລະເສີນພະເຢໂຫວາ.”—1ຂຄ. 29:11, 20
4. ພະເຢຊູສັນລະເສີນພະເຢໂຫວາໂດຍວິທີໃດ?
4 ຕອນທີ່ພະເຢຊູຢູ່ໃນໂລກ ເພິ່ນສັນລະເສີນພະເຢໂຫວາພໍ່ຂອງເພິ່ນໂດຍບອກຄົນອື່ນວ່າພະເຢໂຫວາເປັນຜູ້ທີ່ໃຫ້ລິດເດດເພິ່ນເພື່ອເຮັດການອັດສະຈັນ. (ມຣກ. 5:18-20) ພະເຢຊູຍັງສັນລະເສີນພະເຢໂຫວາໂດຍວິທີທີ່ເພິ່ນເວົ້າກ່ຽວກັບພໍ່ຂອງເພິ່ນແລະວິທີທີ່ເພິ່ນປະຕິບັດກັບຄົນອື່ນ. ມີເທື່ອໜຶ່ງພະເຢຊູກຳລັງສອນຢູ່ບ່ອນປະຊຸມຂອງຄົນຢິວ ໃນຄົນທີ່ມາຟັງພະເຢຊູມີຜູ້ຍິງຄົນໜຶ່ງຖືກປີສາດສິງມາໄດ້ 18 ປີແລ້ວ. ປີສາດເຮັດໃຫ້ລາວຫຼັງກົ່ງຈົນຢຽດໂຕຊື່ບໍ່ໄດ້. ລາວຕ້ອງທໍລະມານຫຼາຍແທ້ໆ! ພະເຢຊູອີ່ຕົນຜູ້ຍິງຄົນນັ້ນ ເພິ່ນຈຶ່ງຍ່າງເຂົ້າໄປຫາລາວແລະເວົ້າກັບລາວຢ່າງອ່ອນໂຍນວ່າ: “ຂ້ອຍຈະປົວເຈົ້າໃຫ້ເຊົາເຈັບປ່ວຍ.” ຈາກນັ້ນ ເພິ່ນກໍວາງມືເທິງລາວແລະລາວກໍຢຽດໂຕຊື່ໄດ້ທັນທີ ແລ້ວລາວກໍ “ສັນລະເສີນພະເຈົ້າ.” ລາວຂອບໃຈຫຼາຍທີ່ພະເຢໂຫວາເຮັດໃຫ້ລາວກັບມາມີສຸຂະພາບດີຄືເກົ່າ. (ລກ. 13:10-13) ຜູ້ຍິງຄົນນີ້ມີເຫດຜົນທີ່ດີທີ່ຈະສັນລະເສີນພະເຢໂຫວາ ແລະເຮົາກໍຄືກັນ.
ສິ່ງໃດກະຕຸ້ນເຮົາໃຫ້ສັນລະເສີນພະເຢໂຫວາ?
5. ເຮົາມີເຫດຜົນຫຍັງແດ່ທີ່ຈະສະແດງຄວາມນັບຖືຕໍ່ພະເຢໂຫວາ?
5 ເຮົາສັນລະເສີນພະເຢໂຫວາຍ້ອນເຮົານັບຖືເພິ່ນຫຼາຍ. ເຮົາມີຫຼາຍເຫດຜົນທີ່ຈະສະແດງຄວາມນັບຖືຕໍ່ພະເຢໂຫວາ. ເພິ່ນມີລິດເດດສູງສຸດແລະມີລິດເດດທີ່ບໍ່ມີຂີດຈຳກັດ. (ພສ. 96:4-7) ສະຕິປັນຍາທີ່ຫຼັກແຫຼມຂອງເພິ່ນເຫັນໄດ້ຈາກສິ່ງຕ່າງໆທີ່ເພິ່ນສ້າງ. ເພິ່ນເປັນບໍ່ເກີດຂອງຊີວິດ ແລະທຸກສິ່ງມີຊີວິດຢູ່ໄດ້ກໍຍ້ອນເພິ່ນ. (ພນມ. 4:11) ເພິ່ນພັກດີ. (ພນມ. 15:4) ທຸກສິ່ງທີ່ເພິ່ນເຮັດສຳເລັດ ແລະເພິ່ນເຮັດຕາມທີ່ສັນຍາໄວ້ສະເໝີ. (ຢຊ. 23:14) ຍ້ອນແນວນີ້ ຜູ້ພະຍາກອນເຢເຣມີຢາຈຶ່ງເວົ້າເຖິງພະເຢໂຫວາວ່າ: “ພະເຢໂຫວາເອີ້ຍ ບໍ່ມີໃຜຄືກັບພະອົງ. ພະອົງຍິ່ງໃຫຍ່ . . . ພວກຄົນສະຫຼາດຂອງຊາດຕ່າງໆແລະຂອງປະເທດຕ່າງໆກໍບໍ່ມີໃຜທຽບພະອົງໄດ້ເລີຍ.” (ຢຣມ. 10:6, 7) ແນ່ນອນວ່າເຮົາມີເຫດຜົນທີ່ດີຫຼາຍຢ່າງທີ່ຈະສະແດງຄວາມນັບຖືຕໍ່ພະເຢໂຫວາພໍ່ຂອງເຮົາ. ເຮົາບໍ່ພຽງແຕ່ນັບຖືພະເຢໂຫວາເທົ່ານັ້ນ ແຕ່ເຮົາຍັງຮັກເພິ່ນນຳ.
6. ເປັນຫຍັງເຮົາຈຶ່ງຮັກພະເຢໂຫວາ?
6 ເຮົາສັນລະເສີນພະເຢໂຫວາຍ້ອນເຮົາຮັກເພິ່ນຫຼາຍ. ໃຫ້ເຮົາຄິດເຖິງຄຸນລັກສະນະຫຼາຍຢ່າງຂອງພະເຢໂຫວາທີ່ເຮັດໃຫ້ເຮົາຮັກເພິ່ນ. ເພິ່ນມີຄວາມເມດຕາແລະເຫັນອົກເຫັນໃຈ. (ພສ. 103:13; ອຊຢ. 49:15) ເພິ່ນເຂົ້າໃຈຄວາມຮູ້ສຶກຂອງເຮົາ. ເມື່ອເຮົາເຈັບ ເພິ່ນກໍເຈັບຄືກັນ. (ຊຄຢ. 2:8) ເພິ່ນຊ່ວຍເຮົາໃຫ້ໃກ້ຊິດກັບເພິ່ນແລະເປັນໝູ່ຂອງເພິ່ນ. (ພສ. 25:14; ກຈກ. 17:27) ເພິ່ນຖ່ອມໂຕ “ເພິ່ນກົ້ມລົງມາເບິ່ງທ້ອງຟ້າແລະໂລກ. ເພິ່ນຍົກຄົນຕ່ຳຕ້ອຍຂຶ້ນມາຈາກກອງຂີ້ດິນ.” (ພສ. 113:6, 7) ຍ້ອນເຫດຜົນທັງໝົດນີ້ ເຮົາຈຶ່ງຢາກສັນລະເສີນພະເຈົ້າຜູ້ຍິ່ງໃຫຍ່ຂອງເຮົາ.—ພສ. 86:12
7. ເຮົາມີໂອກາດທີ່ຈະເຮັດຫຍັງ?
7 ເຮົາສັນລະເສີນພະເຢໂຫວາຍ້ອນເຮົາຢາກໃຫ້ຄົນອື່ນຮູ້ຈັກເພິ່ນ. ຫຼາຍຄົນບໍ່ຮູ້ຈັກຄວາມຈິງກ່ຽວກັບພະເຢໂຫວາ. ຍ້ອນຫຍັງ? ຍ້ອນຊາຕານແຜ່ຄຳຕົວະທີ່ຊົ່ວຮ້າຍກ່ຽວກັບເພິ່ນ ແລະຄົນກໍເຊື່ອຄຳຕົວະເຫຼົ່ານັ້ນ. (2ກຣ. 4:4) ຊາຕານເຮັດໃຫ້ຄົນເຊື່ອວ່າພະເຢໂຫວາເປັນພະເຈົ້າທີ່ອາຄາດແຄ້ນ ບໍ່ມີຄວາມຫ່ວງໃຍ ແລະເປັນຕົ້ນເຫດຂອງຄວາມທຸກລຳບາກຫຼາຍຢ່າງໃນໂລກນີ້. ແຕ່ເຮົາຮູ້ຄວາມຈິງກ່ຽວກັບພະເຢໂຫວາພະເຈົ້າຂອງເຮົາ. ເຮົາມີໂອກາດທີ່ຈະບອກຄົນອື່ນໃຫ້ຮູ້ວ່າເພິ່ນເປັນພະເຈົ້າແບບໃດແທ້ໆແລະຊ່ວຍເຂົາເຈົ້າໃຫ້ມາສັນລະເສີນເພິ່ນຄືກັນກັບເຮົາ. (ອຊຢ. 43:10) ເພງສັນລະເສີນບົດ 96 ເນັ້ນເລື່ອງການສັນລະເສີນພະເຢໂຫວາ. ເຮົາຈະຮຽນຈາກເພງສັນລະເສີນບົດນີ້ກ່ຽວກັບວິທີທີ່ເຮົາສາມາດສັນລະເສີນພະເຢໂຫວາຕາມທີ່ເພິ່ນສົມຄວນໄດ້ຮັບ.
ເຮົາຈະສັນລະເສີນພະເຢໂຫວາແນວໃດຕາມທີ່ເພິ່ນສົມຄວນໄດ້ຮັບ?
8. ວິທີໜຶ່ງທີ່ເຮົາສາມາດສັນລະເສີນພະເຢໂຫວາໄດ້ແມ່ນຫຍັງ? (ເພງສັນລະເສີນ 96:1-3)
8 ອ່ານເພງສັນລະເສີນ 96:1-3. ເຮົາສາມາດສັນລະເສີນພະເຢໂຫວາໂດຍຄຳເວົ້າຂອງເຮົາ. ຂໍ້ພະຄຳພີເຫຼົ່ານີ້ບອກເຮົາໃຫ້ “ຮ້ອງເພງສັນລະເສີນພະເຢໂຫວາ” “ຍົກຍ້ອງຊື່ຂອງເພິ່ນ” “ປະກາດຂ່າວດີເລື່ອງການຊ່ວຍໃຫ້ລອດຂອງເພິ່ນ” ແລະ “ໄປບອກທຸກປະເທດໃຫ້ຮູ້ວ່າເພິ່ນຍິ່ງໃຫຍ່ສ່ຳໃດ.” ທັງໝົດນີ້ແມ່ນວິທີທີ່ເຮົາສາມາດສັນລະເສີນພະເຢໂຫວາໂດຍທາງຄຳເວົ້າຂອງເຮົາ. ຜູ້ຮັບໃຊ້ຂອງພະເຢໂຫວາໃນສະໄໝແຕ່ກີ້ກະຕືລືລົ້ນທີ່ຈະປົກປ້ອງຊື່ສຽງທີ່ດີຂອງເພິ່ນ ແລະບອກຄົນອື່ນກ່ຽວກັບສິ່ງດີໆທຸກຢ່າງທີ່ເພິ່ນໄດ້ເຮັດສຳລັບເຂົາເຈົ້າ. (ດນອ. 3:16-18; ກຈກ. 4:29) ເຮົາຈະເຮັດແບບດຽວກັນນັ້ນໄດ້ແນວໃດ?
9-10. ເຮົາຮຽນຫຍັງຈາກເລື່ອງຂອງແອງເຈເລນ້າ? (ເບິ່ງຮູບນຳ)
9 ຂໍໃຫ້ເບິ່ງເລື່ອງຂອງພີ່ນ້ອງຍິງຄົນໜຶ່ງຊື່ແອງເຈເລນ້າ aຢູ່ປະເທດອາເມຣິກາ. ລາວປົກປ້ອງຊື່ສຽງຂອງພະເຢໂຫວາຢ່າງກ້າຫານຢູ່ບ່ອນເຮັດວຽກ. ຍ້ອນເປັນພະນັກງານໃໝ່ ແອງເຈເລນ້າຈຶ່ງຖືກເຊີນໃຫ້ເຂົ້າຮ່ວມປະຊຸມກັບພະນັກງານຄົນອື່ນທີ່ຫາກໍເລີ່ມເຮັດວຽກຢູ່ຫັ້ນຄືກັນ. ເພື່ອທຸກຄົນຈະມີໂອກາດບອກໃຫ້ຄົນອື່ນຮູ້ກ່ຽວກັບໂຕເອງ ແອງເຈເລນ້າກຽມຮູບຕ່າງໆທີ່ສະແດງເຖິງຄວາມສຸກຂອງລາວທີ່ໄດ້ເປັນພະຍານພະເຢໂຫວາ. ແຕ່ກ່ອນຈະຮອດຜຽນລາວເວົ້າ ເພື່ອນຮ່ວມງານຜູ້ໜຶ່ງໄດ້ແນະນຳໂຕເອງວ່າລາວໃຫຍ່ມາໃນຄອບຄົວທີ່ພໍ່ແມ່ເປັນພະຍານພະເຢໂຫວາ. ລາວເລີ່ມເວົ້າເຍາະເຍີ້ຍກ່ຽວກັບຄວາມເຊື່ອຂອງແອງເຈເລນ້າ. ແອງເຈເລນ້າເວົ້າວ່າ: “ໃຈຂ້ອຍເຕັ້ນຕຸບໆ ແຕ່ຂ້ອຍຄິດໃນໃຈວ່າ ‘ຂ້ອຍຊິຍອມໃຫ້ບາງຄົນເວົ້າຕົວະເລື່ອງພະເຢໂຫວາບໍຫຼືວ່າຂ້ອຍຈະປົກປ້ອງຊື່ສຽງຂອງເພິ່ນ?’”
10 ເມື່ອຜູ້ຊາຍຄົນນັ້ນເວົ້າຈົບ ແອງເຈເລນ້າກໍຟ້າວອະທິດຖານໃນໃຈ. ຈາກນັ້ນ ລາວກໍເວົ້າກັບຜູ້ຊາຍຄົນນັ້ນດີໆວ່າ: “ພູມຫຼັງຂອງຂ້ອຍກໍຄ້າຍຄືກັບເຈົ້າ. ຂ້ອຍໃຫຍ່ມາໃນຄອບຄົວທີ່ພໍ່ແມ່ເປັນພະຍານພະເຢໂຫວາຄືກັນ ແລະຂ້ອຍຍັງເປັນພະຍານຈົນຮອດທຸກມື້ນີ້.” ເຖິງວ່າສະຖານະການຈະເຄັ່ງຕຶງ ແຕ່ແອງເຈເລນ້າກໍມີທ່າທີທີ່ສະຫງົບໃຈ. ລາວໃຫ້ໝູ່ຢູ່ບ່ອນເຮັດວຽກເບິ່ງຮູບຕ່າງໆທີ່ລາວກັບໝູ່ຮັບໃຊ້ພະເຢໂຫວາຢ່າງມີຄວາມສຸກ ແລະລາວອະທິບາຍຄວາມເຊື່ອຂອງໂຕເອງແບບທີ່ສະແດງຄວາມນັບຖື. (1ປຕ. 3:15) ຜົນເປັນແນວໃດ? ເມື່ອແອງເຈເລນ້າເວົ້າຈົບ ທ່າທີຂອງຜູ້ຊາຍຄົນນັ້ນກໍອ່ອນລົງ. ລາວເຖິງຂັ້ນຍອມຮັບວ່າລາວກໍມີຄວາມຊົງຈຳດີໆທີ່ໃຫຍ່ມາໃນຄອບຄົວທີ່ເປັນພະຍານພະເຢໂຫວາ. ແອງເຈເລນ້າເວົ້າວ່າ: “ພະເຢໂຫວາສົມຄວນໄດ້ຮັບການປົກປ້ອງ. ຂ້ອຍຮູ້ສຶກເປັນກຽດຫຼາຍແທ້ໆທີ່ໄດ້ບອກຄົນອື່ນໃຫ້ຮູ້ຄວາມຈິງກ່ຽວກັບເພິ່ນ.” ເຮົາກໍໄດ້ຮັບກຽດຄືກັນທີ່ຈະສັນລະເສີນແລະຍົກຍ້ອງພະເຢໂຫວາເມື່ອມີຄົນເວົ້າແບບທີ່ບໍ່ໄດ້ສະແດງຄວາມນັບຖືຕໍ່ເພິ່ນ.
ເຮົາສາມາດສັນລະເສີນພະເຢໂຫວາໂດຍທາງຄຳເວົ້າ ດ້ວຍສິ່ງທີ່ມີຄ່າ ແລະການປະພຶດຂອງເຮົາ (ເບິ່ງຂໍ້ 9-10) b
11. ຜ່ານມາຜູ້ຮັບໃຊ້ຂອງພະເຢໂຫວາເຮັດຕາມຫຼັກການທີ່ຢູ່ໃນເພງສັນລະເສີນ 96:8 ແນວໃດ?
11 ອ່ານເພງສັນລະເສີນ 96:8. ເຮົາສາມາດສັນລະເສີນພະເຢໂຫວາດ້ວຍສິ່ງທີ່ມີຄ່າຂອງເຮົາ. ຜູ້ນະມັດສະການຂອງພະເຢໂຫວາສັນລະເສີນເພິ່ນໂດຍວິທີນີ້ສະເໝີ. (ສພສ. 3:9) ຕົວຢ່າງເຊັ່ນ: ຄົນອິດສະຣາເອນບໍລິຈາກເງິນແລະສິ່ງທີ່ມີຄ່າເພື່ອຊ່ວຍສ້າງແລະເບິ່ງແຍງວິຫານ. (2ກສ. 12:4, 5; 1ຂຄ. 29:3-9) ລູກສິດບາງຄົນຂອງພະເຢຊູໄດ້ໃຊ້ “ຊັບສິນຂອງໂຕເອງ” ເພື່ອຊ່ວຍພະເຢຊູແລະພວກອັກຄະສາວົກໃຫ້ມີສິ່ງຈຳເປັນ. (ລກ. 8:1-3) ຄລິດສະຕຽນໃນສະຕະວັດທຳອິດຍັງໄດ້ບໍລິຈາກເງິນເພື່ອຊ່ວຍພີ່ນ້ອງຮ່ວມຄວາມເຊື່ອຢູ່ບ່ອນອື່ນທີ່ເຈິກັບຄວາມອຶດຢາກ. (ກຈກ. 11:27-29) ໃນທຸກມື້ນີ້ ເຮົາກໍສັນລະເສີນພະເຢໂຫວາໄດ້ຄືກັນໂດຍບໍລິຈາກດ້ວຍຄວາມສະໝັກໃຈ.
12. ເງິນບໍລິຈາກຂອງເຮົາເຮັດໃຫ້ພະເຢໂຫວາໄດ້ຮັບຄຳສັນລະເສີນແນວໃດ? (ເບິ່ງຮູບນຳ)
12 ໃຫ້ມາເບິ່ງປະສົບການໜຶ່ງທີ່ສະແດງໃຫ້ເຫັນວ່າການບໍລິຈາກຂອງເຮົາເຮັດໃຫ້ພະເຢໂຫວາໄດ້ຮັບຄຳສັນລະເສີນແນວໃດ. ໃນປີ 2020 ຢູ່ປະເທດຊິມບັບເວເກີດຄວາມແຫ້ງແລ້ງເປັນເວລາດົນ. ຫຼາຍລ້ານຄົນອຶດຢາກຍ້ອນບໍ່ມີອາຫານກິນ ເຊິ່ງລວມເຖິງພີ່ນ້ອງຍິງຊື່ປຣິສະກ້ານຳ. ເຖິງວ່າຢູ່ໃນສະພາບທີ່ລຳບາກແບບນັ້ນ ປຣິສະກ້າກໍຍັງໄປປະກາດທຸກໆວັນພຸດແລະວັນສຸກທັງໆທີ່ເປັນຍາມໄຖນາ. ເພື່ອນບ້ານພາກັນເວົ້າເຍາະເຍີ້ຍລາວທີ່ອອກໄປປະກາດແທນທີ່ຈະໄປໄຖນາ. ເຂົາເຈົ້າເວົ້າວ່າ: “ຈັກໜ້ອຍກໍຫິວຕາຍແຫຼະຍ້ອນບໍ່ມີແນວກິນ.” ປຣິສະກ້າຕອບແບບໝັ້ນໃຈວ່າ: “ພະເຢໂຫວາບໍ່ເຄີຍປະຖິ້ມຜູ້ຮັບໃຊ້ຂອງເພິ່ນ.” ຈາກນັ້ນບໍ່ດົນ ລາວກໍໄດ້ຮັບອາຫານແລະສິ່ງຈຳເປັນອື່ນໆຈາກອົງການຂອງເຮົາ. ປຣິສະກ້າແລະຄົນອື່ນໆໄດ້ຮັບການຊ່ວຍເຫຼືອແບບນີ້ກໍຍ້ອນເງິນບໍລິຈາກຂອງເຮົາແຕ່ລະຄົນ. ເພື່ອນບ້ານຂອງປຣິສະກ້າປະທັບໃຈຫຼາຍແລະເວົ້າກັບລາວວ່າ: “ພະເຈົ້າບໍ່ເຄີຍປະຖິ້ມເຈົ້າ. ພວກເຮົາຢາກຮຽນຮູ້ຫຼາຍຂຶ້ນກ່ຽວກັບເພິ່ນ.” ເພື່ອນບ້ານຂອງລາວ 7 ຄົນທັງຜູ້ຊາຍແລະຜູ້ຍິງກໍເລີ່ມເຂົ້າຮ່ວມການປະຊຸມ.
ເຮົາສາມາດສັນລະເສີນພະເຢໂຫວາດ້ວຍສິ່ງທີ່ມີຄ່າຂອງເຮົາ (ເບິ່ງຂໍ້ 12) c
13. ຕາມເພງສັນລະເສີນ 96:9 ເຮົາຄວນເຮັດຫຍັງເພື່ອພະເຢໂຫວາຈະໄດ້ຮັບຄຳສັນລະເສີນ?
13 ອ່ານເພງສັນລະເສີນ 96:9. ເຮົາສາມາດສັນລະເສີນພະເຢໂຫວາໂດຍການປະພຶດທີ່ບໍລິສຸດແລະສະອາດ. ພວກປະໂລຫິດຕ້ອງລ້າງຕີນລ້າງມືໃຫ້ສະອາດເມື່ອຮັບໃຊ້ຢູ່ວິຫານຂອງພະເຢໂຫວາ. (ອພຍ. 40:30-32) ເຮົາກໍຕ້ອງເປັນຄົນສະອາດຄືກັນ ບໍ່ແມ່ນແຕ່ທາງດ້ານຮ່າງກາຍເທົ່ານັ້ນ ແຕ່ທາງດ້ານການປະພຶດນຳ. (ພສ. 24:3, 4; 1ປຕ. 1:15, 16) ຄຳພີໄບເບິນບອກວ່າເຮົາຕ້ອງຖິ້ມ “ນິດໄສເກົ່າ” ແລ້ວປ່ຽນ “ນິດໄສໃໝ່.” ນີ້ໝາຍຄວາມວ່າເຮົາຕ້ອງຖິ້ມຄວາມຄິດທີ່ບໍ່ດີແລະການປະພຶດທີ່ບໍ່ສະອາດທີ່ພະເຢໂຫວາບໍ່ມັກ ແລ້ວຮຽນຮູ້ທີ່ຈະຄິດແລະປະພຶດໃນແບບທີ່ສະແດງໃຫ້ເຫັນວ່າເຮົາກຳລັງຮຽນແບບພະເຢໂຫວາແລະຄຸນລັກສະນະທີ່ດີຂອງເພິ່ນ. (ກລຊ. 3:9, 10) ດ້ວຍຄວາມຊ່ວຍເຫຼືອຈາກພະເຢໂຫວາ ແມ່ນແຕ່ຄົນທີ່ຊົ່ວທີ່ສຸດແລະໂຫດຮ້າຍທີ່ສຸດກໍສາມາດປ່ຽນແປງໂຕເອງແລະມີນິດໄສໃຈຄໍໃໝ່ໄດ້.
14. ເຮົາຮຽນຫຍັງຈາກເລື່ອງຂອງແຈ໋ກ? (ເບິ່ງຮູບນຳ)
14 ໃຫ້ມາເບິ່ງເລື່ອງຂອງຜູ້ຊາຍຄົນໜຶ່ງຊື່ແຈ໋ກ. ລາວເປັນຄົນໂຫດຮ້າຍແລະອັນຕະລາຍຫຼາຍຈົນມີສາຍາວ່າຈອມໂຫດ. ຍ້ອນຄວາມຜິດຮ້າຍແຮງທີ່ແຈ໋ກເຮັດ ລາວຈຶ່ງຖືກຕັດສິນປະຫານຊີວິດ. ໃນໄລຍະທີ່ລໍຖ້າໃຫ້ຮອດມື້ທີ່ຈະຖືກປະຫານຊີວິດ ແຈ໋ກໄດ້ຕົກລົງຮຽນຄຳພີໄບເບິນກັບພີ່ນ້ອງຊາຍຄົນໜຶ່ງທີ່ໄປປະກາດຢູ່ຄຸກບ່ອນທີ່ແຈ໋ກຖືກຂັງ. ເຖິງວ່າແຈ໋ກໄດ້ເຮັດບໍ່ດີຫຼາຍຢ່າງ ແຕ່ລາວໄດ້ປະຖິ້ມນິດໄສເກົ່າແລະຕໍ່ມາລາວກໍມີຄຸນສົມບັດທີ່ຈະຮັບບັບເຕມາ. ແຈ໋ກໄດ້ປ່ຽນແປງໂຕເອງຫຼາຍແທ້ຫຼາຍວ່າຈົນຄົນຍາມຄຸກບາງຄົນພາກັນໄຫ້ຕອນທີ່ເຂົາເຈົ້າລາແຈ໋ກໃນມື້ທີ່ລາວຖືກປະຫານ. ທະຫານຄົນໜຶ່ງທີ່ເຮັດວຽກຢູ່ຄຸກເວົ້າວ່າ: “ແຈ໋ກເຄີຍເປັນນັກໂທດທີ່ຊົ່ວທີ່ສຸດຢູ່ນີ້ ແຕ່ຕອນນີ້ລາວເປັນຜູ້ໜຶ່ງທີ່ດີທີ່ສຸດ.” ອາທິດຕໍ່ມາຫຼັງຈາກທີ່ແຈ໋ກຖືກປະຫານ ພວກພີ່ນ້ອງຊາຍກັບໄປຈັດການປະຊຸມປະຈຳອາທິດຢູ່ຄຸກນັ້ນແລະເຫັນນັກໂທດຜູ້ໜຶ່ງເຂົ້າຮ່ວມການປະຊຸມເປັນເທື່ອທຳອິດ. ອັນໃດກະຕຸ້ນລາວໃຫ້ເຂົ້າຮ່ວມການປະຊຸມ? ລາວປະທັບໃຈທີ່ແຈ໋ກປ່ຽນແປງໂຕເອງແລະຢາກຮູ້ວ່າລາວຕ້ອງເຮັດແນວໃດເພື່ອຈະນະມັດສະການພະເຢໂຫວາ. ເຫັນໄດ້ແຈ້ງວ່າການປະພຶດຂອງເຮົາເຮັດໃຫ້ພະເຢໂຫວາພໍ່ຂອງເຮົາໄດ້ຮັບຄຳສັນລະເສີນ!—1ປຕ. 2:12
ເຮົາສາມາດສັນລະເສີນພະເຢໂຫວາໂດຍການປະພຶດຂອງເຮົາ (ເບິ່ງຂໍ້ 14) d
ໃນອະນາຄົດໃກ້ໆນີ້ ພະເຢໂຫວາຈະເຮັດໃຫ້ຊື່ຂອງເພິ່ນໄດ້ຮັບການສັນລະເສີນແນວໃດ?
15. ໃນອະນາຄົດໃກ້ໆນີ້ ພະເຢໂຫວາຈະເຮັດໃຫ້ຊື່ຂອງເພິ່ນໄດ້ຮັບການສັນລະເສີນແນວໃດ? (ເພງສັນລະເສີນ 96:10-13)
15 ອ່ານເພງສັນລະເສີນ 96:10-13. ຂໍ້ພະຄຳພີເຫຼົ່ານີ້ເວົ້າເຖິງພະເຢໂຫວາວ່າເປັນກະສັດແລະເປັນຜູ້ຕັດສິນທີ່ຍຸຕິທຳ. ໃນອະນາຄົດໃກ້ໆນີ້ ພະເຢໂຫວາຈະເຮັດໃຫ້ຊື່ຂອງເພິ່ນໄດ້ຮັບການສັນລະເສີນແນວໃດ? ໂດຍການຕັດສິນທີ່ຍຸຕິທຳ. ອີກບໍ່ດົນ ພະເຢໂຫວາຈະທຳລາຍບາບີໂລນໃຫຍ່ເຊິ່ງກໍຄືສາສະໜາປອມທັງໝົດທີ່ໄດ້ເຮັດສິ່ງທີ່ຊົ່ວຮ້າຍຫຼາຍແລະສອນເລື່ອງຕົວະກ່ຽວກັບເພິ່ນ. (ພນມ. 17:5, 16; 19:1, 2) ບາງຄົນທີ່ເຫັນບາບີໂລນໃຫຍ່ຖືກທຳລາຍອາດຈະເຂົ້າມາຮ່ວມນະມັດສະການພະເຢໂຫວານຳກັນກັບເຮົາ. ໃນສົງຄາມອາມາເຄໂດນ ພະເຢໂຫວາຈະທຳລາຍລະບົບທັງໝົດຂອງຊາຕານ ກຳຈັດຄົນທີ່ຕໍ່ຕ້ານເພິ່ນແລະເວົ້າຕົວະກ່ຽວກັບເພິ່ນ ແຕ່ເພິ່ນຈະປົກປ້ອງຄົນທີ່ຮັກແລະເຊື່ອຟັງເພິ່ນແລະສັນລະເສີນຊື່ຂອງເພິ່ນ. (ມຣກ. 8:38; 2ທຊ. 1:6-10) ຫຼັງຈາກການທົດສອບຂັ້ນສຸດທ້າຍໃນຕອນທ້າຍຂອງການປົກຄອງ 1.000 ປີຂອງພະເຢຊູ ພະເຢໂຫວາຈະເຮັດໃຫ້ຊື່ຂອງເພິ່ນໄດ້ຮັບຄວາມນັບຖືຕະຫຼອດໄປ. (ພນມ. 20:7-10) ໃນຕອນນັ້ນ “ຄວາມຮູ້ກ່ຽວກັບຄວາມຍິ່ງໃຫຍ່ຂອງພະເຢໂຫວາຈະເຕັມໂລກຄືກັບນ້ຳເຕັມທະເລ.”—ຮບກ. 2:14
16. ເຈົ້າຕັ້ງໃຈທີ່ຈະເຮັດຫຍັງ? (ເບິ່ງຮູບນຳ)
16 ເປັນຕາໜ້າຕື່ນເຕັ້ນແທ້ໆເມື່ອທຸກຄົນໃນໂລກນີ້ຈະສັນລະເສີນພະເຢໂຫວາຕາມທີ່ເພິ່ນສົມຄວນໄດ້ຮັບ. ແຕ່ກ່ອນຈະຮອດມື້ນັ້ນ ໃຫ້ເຮົາພະຍາຍາມເຕັມທີທີ່ຈະສັນລະເສີນພະເຢໂຫວາໃນທຸກໂອກາດ. ເພື່ອເນັ້ນກ່ຽວກັບໜ້າທີ່ຮັບຜິດຊອບທີ່ສຳຄັນນີ້ ຄະນະກຳມະການປົກຄອງໄດ້ເລືອກເພງສັນລະເສີນ 96:8 ໃຫ້ເປັນຂໍ້ພະຄຳພີປະຈຳປີ 2025 ທີ່ບອກວ່າ: “ໃຫ້ສັນລະເສີນພະເຢໂຫວາຍ້ອນຊື່ຂອງເພິ່ນ.”
ໃນທີ່ສຸດ ທຸກຄົນໃນໂລກນີ້ຈະສັນລະເສີນພະເຢໂຫວາຕາມທີ່ເພິ່ນສົມຄວນໄດ້ຮັບ (ເບິ່ງຂໍ້ 16)
ເພງທີ 12 ພະເຢໂຫວາພະເຈົ້າອົງຍິ່ງໃຫຍ່
a ຊື່ສົມມຸດ.
