ບົດຄວາມສຶກສາ 26
‘ກັບມາຫາເຮົາ’
“ຈົ່ງຫຼົບ [ກັບ] ມາຫາເຮົາແລະເຮົາຈະຄືນມາຫາພວກທ່ານ.”—ມລກີ. 3:7
ເພງ 102 ຊ່ວຍຄົນທີ່ອ່ອນແອ
ໃຈຄວາມສຳຄັນ *
1. ພະເຢໂຫວາຮູ້ສຶກແນວໃດເມື່ອເຫັນວ່າຜູ້ທີ່ເຊົາຄົບຫາກັບປະຊາຄົມໄດ້ກັບມາຫາພະອົງອີກ?
ຄືດັ່ງທີ່ເຮົາຮຽນໃນບົດຄວາມກ່ອນ ພະເຢໂຫວາປຽບພະອົງເປັນຄືກັບຜູ້ລ້ຽງແກະທີ່ດີເຊິ່ງເປັນຫ່ວງແກະຂອງພະອົງທຸກໂຕ ແລະພະອົງກໍຊອກຫາແກະໂຕທີ່ຫຼົງຫາຍ. ພະເຢໂຫວາບອກກັບຊາວອິດສະຣາເອນທີ່ໄດ້ປະຖິ້ມພະອົງວ່າ: “ຈົ່ງຫຼົບ [ກັບ] ມາຫາເຮົາແລະເຮົາຈະຄືນມາຫາພວກທ່ານ.” ເຮົາຮູ້ວ່າພະເຢໂຫວາຍັງຮູ້ສຶກແບບເກົ່າ ເພາະພະອົງບອກວ່າ: “ເຮົາບໍ່ປ່ຽນ.” (ມລກີ. 3:6, 7) ພະເຢຊູບອກວ່າທັງພະເຢໂຫວາແລະທູດສະຫວັນດີໃຈຫຼາຍທີ່ເຫັນວ່າແມ່ນແຕ່ຜູ້ຮັບໃຊ້ຜູ້ດຽວທີ່ເຊົາຄົບຫາກັບປະຊາຄົມໄດ້ກັບມາຫາພະອົງອີກ.—ລກ. 15:10, 32
2. ເຮົາຈະມາເບິ່ງຫຍັງໃນບົດຄວາມນີ້?
2 ໃຫ້ເຮົາມາເບິ່ງຕົວຢ່າງປຽບທຽບຂອງພະເຢຊູ 3 ເລື່ອງເຊິ່ງຊ່ວຍເຮົາໃຫ້ຮູ້ວິທີທີ່ຈະຊ່ວຍຄົນທີ່ຫຼົງອອກໄປຈາກທາງຂອງພະເຢໂຫວາ. ນອກຈາກນັ້ນ ເຮົາຍັງຈະມາເບິ່ງ 3 ຄຸນລັກສະນະທີ່ເຮົາຈຳເປັນຕ້ອງມີເພື່ອທີ່ຈະຊ່ວຍແກະທີ່ຫຼົງຫາຍໃຫ້ກັບມາຫາພະເຢໂຫວາ ແລະເຮົາຈະມາເບິ່ງວ່າເປັນຫຍັງຈຶ່ງຄຸ້ມຄ່າທີ່ຈະຊ່ວຍຄົນທີ່ເຊົາຄົບຫາປະຊາຄົມນັ້ນໃຫ້ກັບມາ.
ຊອກຫາຫຼຽນເງິນທີ່ເຮ່ຍ
3-4. ຕາມລູກາ 15:8-10 ເປັນຫຍັງຜູ້ຍິງທີ່ຢູ່ໃນຕົວຢ່າງປຽບທຽບຈຶ່ງຕັ້ງໃຈທີ່ຈະຊອກຫາຫຼຽນທີ່ລາວເຮັດເຮ່ຍ?
3 ເຮົາຕ້ອງໃຊ້ຄວາມພະຍາຍາມຫຼາຍເພື່ອຊ່ວຍຄົນທີ່ຢາກກັບມາຫາພະເຢໂຫວາ. ຕົວຢ່າງປຽບທຽບທີ່ບັນທຶກຢູ່ໃນປຶ້ມຂ່າວດີລູກາ ພະເຢຊູໄດ້ເວົ້າເຖິງຜູ້ຍິງຄົນໜຶ່ງທີ່ຊອກຫາຫຼຽນດັກມາທີ່ມີຄ່າຫຼາຍ. ຕົວຢ່າງນີ້ເຮັດໃຫ້ເຮົາເຫັນວ່າລາວຕ້ອງພະຍາຍາມຫຼາຍຂະໜາດໃດເພື່ອຈະຊອກຫາຫຼຽນນັ້ນ.—ອ່ານລູກາ 15:8-10
4 ພະເຢຊູໄດ້ເລົ່າເຖິງຄວາມຮູ້ສຶກຂອງຜູ້ຍິງຄົນນັ້ນເມື່ອພົບຫຼຽນທີ່ເສຍໄປ. ໃນສະໄໝຂອງພະເຢຊູ ແມ່ທີ່ເປັນຊາວຢິວມັກຈະເອົາເງິນຫຼຽນຊຸດໜຶ່ງໃຫ້ລູກສາວໃນມື້ແຕ່ງດອງ ເຊິ່ງເງິນຫຼຽນຊຸດໜຶ່ງນັ້ນມີ 10 ຫຼຽນ. ບາງທີຫຼຽນທີ່ຕົກເຮ່ຍນັ້ນອາດຈະເປັນຫຼຽນໃນຊຸດໜຶ່ງທີ່ແມ່ລາວເອົາໃຫ້. ຜູ້ຍິງຄົນນັ້ນຄົງຈະຄິດວ່າຫຼຽນເຮ່ຍຢູ່ໃນເຮືອນ ດັ່ງນັ້ນ ລາວຈຶ່ງໄດ້ເອົາຕະກຽງມາສ່ອງເບິ່ງເພື່ອຊອກຫຼຽນອ້ອມໆແຖວນັ້ນ ແຕ່ກໍຍັງບໍ່ເຫັນ ແລະແສງຂອງຕະກຽງກໍບໍ່ແຈ້ງປານໃດ. ລາວຈຶ່ງເອົາຟອຍມາກວາດທົ່ວເຮືອນ ໃນທີ່ສຸດລາວກໍເຫັນຫຼຽນທີ່ມີຄ່ານັ້ນເຊິ່ງຕິດຢູ່ນຳກອງຂີ້ຝຸ່ນ. ລາວຈຶ່ງດີໃຈຫຼາຍແລ້ວໄປບອກໝູ່ຄູ່.
5. ເປັນຫຍັງຕ້ອງໃຊ້ຄວາມພະຍາຍາມຫຼາຍເພື່ອຊອກຫາຄົນທີ່ເຊົາຄົບຫາກັບປະຊາຄົມ?
5 ໃນຕົວຢ່າງປຽບທຽບຂອງພະເຢຊູ ເຮົາໄດ້ຮຽນຮູ້ວ່າເມື່ອເຮົາເຮັດບາງສິ່ງເສຍໄປ ເຮົາຕ້ອງພະຍາຍາມຫຼາຍເພື່ອທີ່ຈະຊອກຫາມັນ. ຄ້າຍຄືກັນ ເຮົາຕ້ອງພະຍາຍາມຫຼາຍເພື່ອຈະຊອກຫາຄົນທີ່ເຊົາຄົບຫາກັບປະຊາຄົມ. ເຂົາເຈົ້າອາດເຊົາຄົບຫາກັບປະຊາຄົມເປັນເວລາຫຼາຍປີແລະອາດຈະຍ້າຍໄປຢູ່ບ່ອນໃໝ່ທີ່ພີ່ນ້ອງຂອງເຮົາບໍ່ຮູ້. ແຕ່ຕອນນີ້ ບາງຄົນທີ່ເຊົາຄົບຫາກັບປະຊາຄົມອາດຢາກຈະກັບມາຫາພະເຢໂຫວາ. ເຂົາເຈົ້າຢາກກັບມາຮັບໃຊ້ພະເຢໂຫວາຮ່ວມກັບພີ່ນ້ອງ ແຕ່ເຮົາຕ້ອງຊ່ວຍເຂົາເຈົ້າ.
6. ເຮົາແຕ່ລະຄົນຈະຊ່ວຍຊອກຫາຄົນທີ່ເຊົາຄົບຫາກັບປະຊາຄົມໄດ້ແນວໃດ?
6 ໃຜແດ່ທີ່ຈະຊ່ວຍຊອກຫາຄົນທີ່ເຊົາຄົບຫາກັບປະຊາຄົມ? ເຮົາທຸກຄົນ ເຊິ່ງລວມເຖິງຜູ້ດູແລ ໄພໂອເນຍ ພີ່ນ້ອງໃນປະຊາຄົມ ແລະຄົນໃນຄອບຄົວຂອງລາວ. ເຈົ້າມີໝູ່ຫຼືຍາດພີ່ນ້ອງທີ່ເຊົາຄົບຫາກັບປະຊາຄົມບໍ? ແລ້ວເຈົ້າຈະເຮັດແນວໃດເມື່ອເຈິເຂົາເຈົ້າຕອນທີ່ເຈົ້າໄປປະກາດ? ຖ້າເຂົາເຈົ້າສົນໃຈແລະຢາກໃຫ້ເຮົາຕິດຕໍ່ຫາ ເຮົາກໍຈະບອກເລື່ອງນີ້ກັບຜູ້ດູແລທ້ອງຖິ່ນ.
7. ເຮົາຮຽນຫຍັງໄດ້ຈາກຜູ້ດູແລທີ່ຊື່ໂທມັດສ໌?
7 ຜູ້ດູແລຈະເຮັດແນວໃດເພື່ອຈະຊອກຫາຄົນທີ່ເຊົາຄົບຫາປະຊາຄົມໃຫ້ກັບມາຫາພະເຢໂຫວາ? ພີ່ນ້ອງໂທມັດສ໌ * ທີ່ເປັນຜູ້ດູແລໃນແອັດສະປາຍ ເຊິ່ງໄດ້ຊ່ວຍຫຼາຍກວ່າ 40 ຄົນໃຫ້ກັບມາຫາພະເຢໂຫວາບອກວ່າ: “ທຳອິດ ຂ້ອຍກໍຈະຖາມພີ່ນ້ອງວ່າຕອນນີ້ຄົນທີ່ເຊົາຄົບຫາກັບປະຊາຄົມຢູ່ໃສແດ່? ຫຼືອາດຈະຖາມວ່າຈື່ໄດ້ບໍວ່າໃຜທີ່ບໍ່ໄດ້ມາປະຊຸມດົນແລ້ວ? ພີ່ນ້ອງສ່ວນຫຼາຍໃນປະຊາຄົມກໍຢາກຊ່ວຍຢູ່ແລ້ວ. ຕໍ່ມາ ເມື່ອຂ້ອຍໄປຢາມພີ່ນ້ອງທີ່ເຊົາຄົບຫາກັບປະຊາຄົມ ຂ້ອຍໄດ້ຖາມກ່ຽວກັບຄອບຄົວແລະລູກຂອງເຂົາເຈົ້າ. ເພາະວ່າບາງຄົນກໍເຄີຍພາລູກໄປປະຊຸມນຳ ແລະລູກຂອງເຂົາເຈົ້າອາດເຄີຍເປັນຜູ້ປະກາດມາກ່ອນແລ້ວ ດັ່ງນັ້ນ ຈຶ່ງເປັນໄປໄດ້ທີ່ເຂົາເຈົ້າຈະກັບມາຫາພະເຢໂຫວາ.”
ຊ່ວຍໃຫ້ກັບມາຫາພະເຢໂຫວາ
8. ຕົວຢ່າງປຽບທຽບໃນລູກາ 15:17-24 ພໍ່ໄດ້ເຮັດຫຍັງເມື່ອລູກກັບໃຈ?
8 ເຮົາຕ້ອງມີຄຸນລັກສະນະຫຍັງແດ່ເພື່ອຈະຊ່ວຍຄົນທີ່ຢາກກັບມາຫາພະເຢໂຫວາ? ເຮົາຈະຮຽນເລື່ອງນີ້ຈາກຕົວຢ່າງປຽບທຽບຂອງພະເຢຊູເລື່ອງລູກທີ່ຫຼົງຫາຍ. (ອ່ານລູກາ 15:17-24) ພະເຢຊູອະທິບາຍວ່າ ໃນທີ່ສຸດລູກຊາຍຄົນນັ້ນກໍສຳນຶກໄດ້ແລ້ວກັບມາຫາພໍ່. ພໍ່ໄດ້ແລ່ນໄປຫາແລະກອດລາວຢ່າງອົບອຸ່ນ ເຊິ່ງສະແດງໃຫ້ເຫັນວ່າພໍ່ຍັງຮັກລາວ. ລູກຊາຍຮູ້ສຶກຜິດຫຼາຍແລະຄິດວ່າຕົວເອງບໍ່ສົມຄວນທີ່ຈະເປັນລູກຂອງພໍ່ອີກຕໍ່ໄປ. ພໍ່ຮູ້ສຶກອີ່ຕົນຕອນທີ່ລາວລະບາຍຄວາມຮູ້ສຶກອອກມາ. ພໍ່ໄດ້ເຮັດບາງສິ່ງທີ່ສະແດງໃຫ້ເຫັນວ່າດີໃຈທີ່ເຫັນລູກກັບມາແລະຍັງຮັກລາວຄືລູກແທ້ໆບໍ່ແມ່ນລູກຈ້າງ. ເພື່ອສະແດງໃຫ້ເຫັນວ່າຮັກລູກ ພໍ່ຈຶ່ງໄດ້ຈັດງານລ້ຽງແລະຈັດກຽມເຄື່ອງນຸ່ງດີໆໃຫ້ກັບລູກທີ່ກັບມາ.
9. ເຮົາຕ້ອງມີຄຸນລັກສະນະຫຍັງແດ່ເພື່ອຈະຊ່ວຍຄົນທີ່ເຊົາຄົບຫາກັບປະຊາຄົມໃຫ້ກັບມາຫາພະເຢໂຫວາ? (ເບິ່ງຂອບ “ ວິທີຊ່ວຍຄົນທີ່ຢາກກັບມາຫາພະເຢໂຫວາ.”)
9 ພະເຢໂຫວາເປັນຄືກັບພໍ່ທີ່ຢູ່ໃນຕົວຢ່າງນັ້ນ. ພະເຢໂຫວາຮັກຄົນທີ່ເຊົາຄົບຫາກັບປະຊາຄົມ ແລະຢາກໃຫ້ເຂົາເຈົ້າກັບມາຫາພະອົງ. ເຮົາກໍສາມາດຊ່ວຍເຂົາເຈົ້າໄດ້ຄືກັນຖ້າເຮົາຮຽນແບບພະເຢໂຫວາໂດຍສະແດງຄວາມອົດທົນ ຄວາມເຫັນອົກເຫັນໃຈ ແລະສະແດງຄວາມຮັກຕໍ່ເຂົາເຈົ້າ. ເປັນຫຍັງເຮົາຄວນສະແດງຄຸນລັກສະນະເຫຼົ່ານີ້? ແລະເຮົາຈະເຮັດແບບນັ້ນໄດ້ແນວໃດ?
10. ເປັນຫຍັງເຮົາຕ້ອງອົດທົນເພື່ອຈະຊ່ວຍບາງຄົນໃຫ້ກັບມາຫາພະເຢໂຫວາ?
10 ເຮົາຕ້ອງອົດທົນຍ້ອນວ່າເຮົາຕ້ອງໃຊ້ເວລາຫຼາຍເພື່ອທີ່ຈະຊ່ວຍຄົນເຫຼົ່ານັ້ນໃຫ້ກັບມາຫາພະເຢໂຫວາ. ຄົນທີ່ເຊົາຄົບຫາກັບປະຊາຄົມຫຼາຍຄົນບອກວ່າຜູ້ດູແລແລະພີ່ນ້ອງໃນປະຊາຄົມໄດ້ມາຢາມເຂົາເຈົ້າຫຼາຍເທື່ອກ່ອນທີ່ເຂົາເຈົ້າຈະກັບມາຮັບໃຊ້ພະເຢໂຫວາອີກ. ພີ່ນ້ອງຍິງທີ່ຊື່ ແນນຊີທີ່ມາຈາກອາຊີເວົ້າວ່າ: “ໝູ່ສະໜິດຂອງຂ້ອຍທີ່ຢູ່ໃນປະຊາຄົມໄດ້ຊ່ວຍຂ້ອຍຫຼາຍ. ລາວຮັກຂ້ອຍຄືກັບເອື້ອຍແທ້ໆ ລາວເວົ້າເຖິງປະສົບການດີໆທີ່ເຮົາເຄີຍມີນຳກັນ. ລາວຕັ້ງໃຈຟັງເມື່ອຂ້ອຍລະບາຍຄວາມຮູ້ສຶກອອກມາ ແລະກໍຍັງພ້ອມທີ່ຈະໃຫ້ຄຳແນະນຳຂ້ອຍ ລາວສະແດງໃຫ້ເຫັນວ່າລາວເປັນໝູ່ແທ້ຂອງຂ້ອຍແລະພ້ອມທີ່ຈະຊ່ວຍເຫຼືອຂ້ອຍສະເໝີ.”
11. ເປັນຫຍັງເຮົາຕ້ອງເຫັນອົກເຫັນໃຈເພື່ອຊ່ວຍຄົນທີ່ເສຍໃຈ?
11 ຄວາມເຫັນອົກເຫັນໃຈເປັນຄືກັບຢາທີ່ຊ່ວຍປິ່ນປົວຄົນທີ່ເສຍໃຈ. ຄົນນັ້ນອາດຈະຮູ້ສຶກຄຽດໃຫ້ກັບບາງຄົນໃນປະຊາຄົມເປັນເວລາຫຼາຍປີ ແລະຄວາມຮູ້ສຶກນີ້ໄດ້ຂັດຂວາງລາວບໍ່ໃຫ້ກັບມາຫາພະເຢໂຫວາ. ຍ້ອນລາວຄິດວ່າເຂົາເຈົ້າປະຕິບັດກັບລາວແບບບໍ່ຍຸຕິທຳ ດັ່ງນັ້ນ ລາວຈຶ່ງຕ້ອງການຄົນທີ່ຕັ້ງໃຈຟັງແລະເຂົ້າໃຈຄວາມຮູ້ສຶກຂອງລາວ. (ຢກບ. 1:19) ມາເຣຍເຊິ່ງເຄີຍເຊົາຄົບຫາກັບປະຊາຄົມບອກວ່າ: “ຂ້ອຍຕ້ອງການຄົນທີ່ຕັ້ງໃຈຟັງຂ້ອຍ ໃຫ້ກຳລັງໃຈຂ້ອຍ ແລະຊ່ວຍເຫຼືອຂ້ອຍ.”
12. ຄວາມຮັກຂອງພະເຢໂຫວາເປັນຄືກັບເຊືອກແນວໃດ?
12 ພະຄຳພີບອກວ່າຄວາມຮັກຂອງພະເຢໂຫວາເປັນຄືກັບເຊືອກເສັ້ນໜຶ່ງ. ແລ້ວມັນເປັນຄືກັບເຊືອກແນວໃດ? ຂໍໃຫ້ຄິດເຖິງຕົວຢ່າງນີ້: ສົມມຸດວ່າເຈົ້າກຳລັງຈະຈົມນ້ຳແລ້ວມີຄົນໜຶ່ງໂຍນເສື້ອຊູຊີບໃຫ້ເຈົ້າ. ແນ່ນອນວ່າເສື້ອຊູຊີບຈະຊ່ວຍເຈົ້າໃຫ້ຟູຢູ່ເທິງນ້ຳ ແຕ່ບໍ່ໄດ້ໝາຍຄວາມວ່າຈະຊ່ວຍເຈົ້າໃຫ້ລອດ. ເພາະນ້ຳເຢັນຫຼາຍ ຖ້າເຮົາບໍ່ອອກຈາກນ້ຳເຮົາກໍອາດຈະຕາຍໄດ້ ດັ່ງນັ້ນ ເຮົາຈຶ່ງຕ້ອງການບາງຄົນທີ່ຈະໂຍນເຊືອກໃຫ້ກັບເຮົາເພື່ອທີ່ຈະດຶງເຮົາອອກຈາກນ້ຳ. ພະເຢໂຫວາເວົ້າກັບຊາວອິດສະຣາເອນທີ່ອອກຈາກທາງຂອງພະອົງວ່າ: “ເຮົາດຶງພວກເຂົາໃຫ້ມາຫາເຮົາໂດຍໃຊ້ຄວາມກະລຸນາກັບຄວາມຮັກ.” (ໂອ. 11:4, ລ.ມ.) ໃນທຸກມື້ນີ້ ພະເຢໂຫວາຍັງຮູ້ສຶກແບບດຽວກັນນີ້ກັບຄົນທີ່ເຊົາຮັບໃຊ້ພະອົງ ແລະຄົນທີ່ກຳລັງຈົມຢູ່ກັບບັນຫາແລະຄວາມກັງວົນໃຈ. ພະເຢໂຫວາຢາກໃຫ້ຄົນເຫຼົ່ານັ້ນຮູ້ວ່າພະອົງຍັງຮັກເຂົາເຈົ້າ ແລະຢາກໃຫ້ເຂົາເຈົ້າກັບມາຫາພະອົງ ດັ່ງນັ້ນ ພະເຢໂຫວາຈຶ່ງໃຊ້ເຈົ້າເພື່ອສະແດງຄວາມຮັກນີ້ຕໍ່ເຂົາເຈົ້າ.
13. ປະສົບການຂອງພາບໂລສະແດງໃຫ້ເຫັນແນວໃດວ່າຄວາມຮັກສາມາດຊ່ວຍຄົນອື່ນໃຫ້ກັບມາຫາພະເຢໂຫວາໄດ້?
13 ເປັນເລື່ອງສຳຄັນທີ່ເຮົາຈະເຮັດໃຫ້ຄົນທີ່ເຊົາຄົບຫາກັບປະຊາຄົມໝັ້ນໃຈວ່າພະເຢໂຫວາຮັກເຂົາເຈົ້າແລະເຮົາເອງກໍຮັກເຂົາເຈົ້າຄືກັນ. ພາບໂລທີ່ເວົ້າເຖິງໃນບົດຄວາມກ່ອນເຊິ່ງເຊົາຮັບໃຊ້ພະເຢໂຫວາຫຼາຍກວ່າ 30 ປີບອກວ່າ: “ຕອນເຊົ້າມື້ໜຶ່ງ ຕອນທີ່ຂ້ອຍກຳລັງຈະອອກຈາກເຮືອນ ພີ່ນ້ອງຍິງຄົນໜຶ່ງທີ່ເປັນແມ່ຕູ້ທີ່ໜ້າຮັກຫຼາຍມາຫາຂ້ອຍແລ້ວກໍເວົ້າກັບຂ້ອຍດ້ວຍຄວາມອົບອຸ່ນ ຂ້ອຍຮູ້ສຶກຊາບຊຶ້ງໃຈຫຼາຍຈົນຮ້ອງໄຫ້ອອກມາ. ຂ້ອຍຮູ້ສຶກວ່າພະເຢໂຫວາສົ່ງລາວມາຫາຂ້ອຍ ເພື່ອທີ່ຈະມາເວົ້າກັບຂ້ອຍ. ຂ້ອຍຈຶ່ງຕັດສິນໃຈທີ່ຈະກັບມາຫາພະເຢໂຫວາໃນຕອນນັ້ນເລີຍ.”
ຊ່ວຍຄົນທີ່ອ່ອນແອດ້ວຍຄວາມຮັກ
14. ໃນຕົວຢ່າງປຽບທຽບທີ່ຢູ່ໃນລູກາ 15:4, 5 ຜູ້ລ້ຽງແກະໄດ້ເຮັດຫຍັງເມື່ອພົບແກະທີ່ຫຼົງຫາຍແລ້ວ?
14 ເຮົາຕ້ອງຊ່ວຍເຫຼືອຄົນທີ່ເຊົາຄົບຫາກັບປະຊາຄົມຕໍ່ໆໄປ. ຄືກັບລູກທີ່ຫຼົງຫາຍໃນຕົວຢ່າງປຽບທຽບຂອງພະເຢຊູ ເຂົາເຈົ້າອາດຈະມີແຜທາງໃຈ ແລະອາດຈະມີຄວາມເຊື່ອທີ່ອ່ອນແອ ເນື່ອງຈາກເຂົາເຈົ້າປະສົບຫຼາຍຢ່າງໃນໂລກຂອງຊາຕານ. ດັ່ງນັ້ນ ເຮົາຕ້ອງຊ່ວຍເຂົາເຈົ້າໃຫ້ກັບມາມີຄວາມເຊື່ອທີ່ເຂັ້ມແຂງໃນພະເຢໂຫວາອີກ. ໃນຕົວຢ່າງປຽບທຽບເລື່ອງແກະທີ່ຫຼົງຫາຍ ພະເຢຊູໄດ້ອະທິບາຍວ່າ ເມື່ອຜູ້ລ້ຽງແກະພົບແກະແລ້ວ ລາວໄດ້ອູ້ມມັນແບກໃສ່ບ່າແລ້ວເອົາມາຫາຝູງ. ທີ່ຈິງ ຜູ້ລ້ຽງແກະໃຊ້ເວລາແລະກຳລັງຫຼາຍພໍຢູ່ແລ້ວເພື່ອຊອກຫາແກະ ແຕ່ລາວຮູ້ວ່າຖ້າບໍ່ຊ່ວຍແກະ ມັນກໍບໍ່ສາມາດທີ່ຈະກັບໄປຫາຝູງຂອງມັນໄດ້ ເພາະມັນບໍ່ມີແຮງພໍທີ່ຈະໄປຫາຝູງດ້ວຍຕົວເອງໄດ້.—ອ່ານລູກາ 15:4, 5
15. ເຮົາຈະຊ່ວຍຄົນທີ່ອ່ອນແອທີ່ຢາກກັບມາຫາພະເຢໂຫວາໄດ້ແນວໃດ? (ເບິ່ງຂອບ “ ເຄື່ອງມືທີ່ສຳຄັນ.”)
15 ເຮົາຕ້ອງເຮັດຄືກັບຜູ້ລ້ຽງແກະໂດຍໃຊ້ເວລາແລະກຳລັງເພື່ອຊ່ວຍຄົນທີ່ເຊົາຄົບຫາກັບປະຊາຄົມໃຫ້ເອົາຊະນະບັນຫາຕ່າງໆແລ້ວກັບມາຮັບໃຊ້ພະເຢໂຫວາອີກ. ການໃຊ້ຄຳພີໄບເບິນແລະປຶ້ມຕ່າງໆຂອງອົງການ ພ້ອມກັບການຊ່ວຍເຫຼືອຈາກພະລັງບໍລິສຸດຂອງພະເຢໂຫວາຈະຊ່ວຍໃຫ້ຄົນເຫຼົ່ານີ້ກັບມາມີສາຍສຳພັນທີ່ດີກັບພະເຢໂຫວາອີກ. (ຣມ. 15:1) ແລ້ວເຮົາຈະເຮັດແບບນັ້ນໄດ້ແນວໃດ? ປະສົບການຂອງຜູ້ດູແລຄົນໜຶ່ງບອກວ່າ: “ຄົນທີ່ເຊົາຄົບຫາກັບປະຊາຄົມທີ່ຕ້ອງການຈະກັບມາຫາພະເຢໂຫວາສ່ວນຫຼາຍແລ້ວຕ້ອງໄດ້ສຶກສາຄຳພີໄບເບິນອີກ.” * ຖ້າເຈົ້າຖືກຂໍໃຫ້ຊ່ວຍສຶກສາກັບຄົນເຫຼົ່ານັ້ນ ເຈົ້າຈະຖືວ່າເປັນສິດທິພິເສດບໍ່ແມ່ນບໍ? ຜູ້ດູແລນັ້ນຍັງເວົ້າຕື່ມວ່າ: “ຜູ້ທີ່ຈະໄປຊ່ວຍສຶກສາໃຫ້ລາວຕ້ອງເປັນໝູ່ທີ່ດີກັບລາວ ເຮັດໃຫ້ລາວໝັ້ນໃຈ ແລະກ້າທີ່ຈະເວົ້າໄດ້ຢ່າງເປີດໃຈ.”
ມີຄວາມສຸກທັງໃນສະຫວັນແລະໂລກ
16. ເຮົາຮູ້ໄດ້ແນວໃດວ່າທູດສະຫວັນໄດ້ຊ່ວຍເຮົາໃຫ້ຊອກຫາຄົນທີ່ເຊົາຄົບຫາກັບປະຊາຄົມ?
16 ຫຼາຍປະສົບການສະແດງໃຫ້ເຫັນວ່າທູດສະຫວັນໄດ້ຊ່ວຍເຮົາໃຫ້ຊອກຫາຄົນທີ່ເຊົາຄົບຫາກັບປະຊາຄົມທີ່ຢາກກັບມາຫາພະເຢໂຫວາ. (ພນມ. 14:6) ປະສົບການໜຶ່ງໃນເອກົວເຕີ ພີ່ນ້ອງທີ່ຊື່ ຊິນວີໂອໄດ້ອະທິດຖານຂໍໃຫ້ພະເຢໂຫວາສົ່ງບາງຄົນມາຫາລາວ. ໃນຂະນະທີ່ລາວກຳລັງອະທິດຖານຢູ່ນັ້ນ ມີຜູ້ດູແລ 2 ຄົນໄດ້ມາເຮືອນລາວ. ເຂົາເຈົ້າໄດ້ເລີ່ມຊ່ວຍລາວເພື່ອໃຫ້ລາວກັບມາຫາພະເຢໂຫວາ.
17. ເຮົາຈະຮູ້ສຶກແນວໃດເມື່ອຊ່ວຍຄົນທີ່ເຊົາຄົບຫາກັບປະຊາຄົມໃຫ້ກັບມາ?
17 ເຮົາມີຄວາມສຸກຫຼາຍທີ່ໄດ້ຊ່ວຍຄົນທີ່ອ່ອນແອໃຫ້ກັບມາຫາພະເຢໂຫວາ. ພີ່ນ້ອງໄພໂອເນຍຄົນໜຶ່ງທີ່ຊື່ ເຊົາວາດໍ ລາວໄດ້ເອົາໃຈໃສ່ຊ່ວຍຄົນທີ່ເຊົາຄົບຫາກັບປະຊາຄົມເປັນພິເສດເວົ້າວ່າ: “ບາງຄັ້ງ ເມື່ອຂ້ອຍຄິດເຖິງຄົນທີ່ເຊົາຮັບໃຊ້ພະເຢໂຫວາແລ້ວກັບມາຫາພະອົງ ເຮັດໃຫ້ຂ້ອຍມີຄວາມສຸກຫຼາຍ. ຂ້ອຍມີຄວາມສຸກທີ່ເຫັນພະເຢໂຫວາຊ່ວຍຄົນທີ່ຫຼົງທາງກັບມາແລະຂ້ອຍກໍມີສ່ວນຮ່ວມໃນການຊ່ວຍຜູ້ຮັບໃຊ້ທີ່ມີຄ່າຂອງພະອົງໃຫ້ອອກຈາກໂລກຂອງຊາຕານ ແລະກັບມາຫາປະຊາຄົມ.”—ກຈກ. 20:35
18. ຖ້າເຈົ້າໄດ້ເຊົາຄົບຫາກັບປະຊາຄົມ ເຈົ້າສາມາດໝັ້ນໃຈໃນເລື່ອງຫຍັງ?
18 ຖ້າເຈົ້າໄດ້ເຊົາຄົບຫາກັບປະຊາຊົນຂອງພະເຢໂຫວາ ຂໍໃຫ້ໝັ້ນໃຈວ່າພະເຢໂຫວາຍັງຮັກເຈົ້າ ແລະພະອົງຕ້ອງການໃຫ້ເຈົ້າກັບມາຫາພະອົງ. ແຕ່ເຈົ້າຕ້ອງເຮັດບາງຢ່າງເພື່ອເຈົ້າຈະກັບມາຫາພະອົງໄດ້. ຄືກັບພໍ່ທີ່ຢູ່ໃນຕົວຢ່າງປຽບທຽບຂອງພະເຢຊູ ພະເຢໂຫວາຄອຍຖ້າເຈົ້າທີ່ຈະກັບມາຫາພະອົງ ແລະພະອົງກໍຍິນດີຕ້ອນຮັບເຈົ້າສະເໝີ.
ເພງ 103 ຜູ້ບຳລຸງລ້ຽງຂອງຂວັນທີ່ເປັນມະນຸດ
^ ຂໍ້ 5 ພະເຢໂຫວາຢາກໃຫ້ຄົນທີ່ເຊົາຄົບຫາກັບປະຊາຄົມກັບມາຫາພະອົງ. ເຮົາສາມາດຊ່ວຍຄົນເຫຼົ່ານັ້ນໃຫ້ຮັບເອົາຄຳເຊີນຂອງພະເຢໂຫວາທີ່ວ່າ: “ກັບມາຫາເຮົາ.” ໃນບົດຄວາມນີ້ເຮົາຈະມາເບິ່ງວ່າເຮົາຈະເຮັດຫຍັງໄດ້ແດ່ເພື່ອຊ່ວຍເຂົາເຈົ້າ.
^ ຂໍ້ 7 ບາງຊື່ເປັນຊື່ສົມມຸດ
^ ຂໍ້ 15 ບາງຄົນທີ່ເຊົາຄົບຫາກັບປະຊາຄົມອາດຈະໄດ້ຮັບການຊ່ວຍເຫຼືອໂດຍການສຶກສາປຶ້ມຈົ່ງຮັກສາຕົວໄວ້ໃນຄວາມຮັກຂອງພະເຈົ້າ ຫຼືຄົນອື່ນໆອາດຈະໃຊ້ປຶ້ມຫຍັບເຂົ້າໃກ້ພະເຢໂຫວາ. ຄະນະກຳມະການການຮັບໃຊ້ຂອງປະຊາຄົມຈະເປັນຜູ້ຕັດສິນໃຈວ່າຈະໃຫ້ໃຜໄປສຶກສາກັບລາວ.
^ ຂໍ້ 68 ຄຳອະທິບາຍຮູບພາບ: ພີ່ນ້ອງຊາຍສາມຄົນໄດ້ຊ່ວຍເຫຼືອຄົນທີ່ຢາກກັບມາຫາພະເຢໂຫວາ. ເຂົາເຈົ້າເຮັດແບບນັ້ນໂດຍຕິດຕໍ່ຫາລາວເປັນປະຈຳ ເຮັດໃຫ້ລາວໝັ້ນໃຈວ່າເຂົາເຈົ້າຍັງຮັກລາວ ແລະຕັ້ງໃຈຟັງລາວດ້ວຍຄວາມເຂົ້າໃຈ.
