ບົດຄວາມສຶກສາທີ 10
ເພງທີ 13 ພະຄລິດເປັນແບບຢ່າງຂອງເຮົາ
ຕິດຕາມພະເຢຊູຕໍ່ໆໄປຫຼັງຈາກຮັບບັບເຕມາແລ້ວ
“ຖ້າຜູ້ໃດຢາກຕິດຕາມຂ້ອຍ ກໍໃຫ້ຜູ້ນັ້ນເຊົາໃຊ້ຊີວິດເພື່ອໂຕເອງ ແລະຍອມແບກເສົາທໍລະມານຂອງໂຕເອງທຸກໆມື້ ແລ້ວຕິດຕາມຂ້ອຍຕໍ່ໆໄປ.”—ລກ. 9:23
ຈຸດສຳຄັນ
ບົດຄວາມນີ້ຈະຊ່ວຍເຮົາທຸກຄົນໃຫ້ເຫັນວ່າການອຸທິດໂຕມີຜົນແນວໃດຕໍ່ຊີວິດຂອງເຮົາ ແລະຍັງຈະຊ່ວຍຄົນທີ່ຫາກໍຮັບບັບເຕມາໃຫ້ສັດຊື່ຕໍ່ພະເຢໂຫວາຕໍ່ໆໄປໄດ້.
1-2. ເຮົາໄດ້ຮັບສິ່ງດີໆຫຍັງແດ່ຫຼັງຈາກຮັບບັບເຕມາແລ້ວ?
ເຮົາດີໃຈທີ່ໄດ້ຮັບບັບເຕມາແລະໄດ້ເຂົ້າມາຢູ່ໃນຄອບຄົວຂອງພະເຢໂຫວາ. ເຮົາຮູ້ສຶກເປັນກຽດແທ້ໆທີ່ໄດ້ໃກ້ຊິດກັບພະເຢໂຫວາ. ເຮົາເຫັນດີກັບຄຳເວົ້າຂອງດາວິດຜູ້ຂຽນປຶ້ມເພງສັນລະເສີນທີ່ວ່າ: “ຄົນທີ່ມີຄວາມສຸກແມ່ນຄົນທີ່ [ພະເຢໂຫວາ] ເລືອກແລະຊວນໃຫ້ມາຢູ່ໃກ້ພະອົງ ເພື່ອໃຫ້ມາຢູ່ເດີ່ນວິຫານຂອງພະອົງ.”—ພສ. 65:4
2 ພະເຢໂຫວາບໍ່ໄດ້ໃຫ້ທຸກຄົນເຂົ້າມາໃນຄອບຄົວຂອງເພິ່ນ. ຄືກັບທີ່ເຮົາໄດ້ຮຽນໃນບົດກ່ອນ ມີແຕ່ຄົນທີ່ຢາກຮູ້ຈັກແລະສະໜິດກັບພະເຢໂຫວາເທົ່ານັ້ນເພິ່ນຈຶ່ງໃຫ້ມາໃກ້ຊິດກັບເພິ່ນໄດ້. (ຢກບ. 4:8) ເມື່ອເຈົ້າອຸທິດໂຕແລະຮັບບັບເຕມາ ເຈົ້າກໍຈະມີສາຍສຳພັນທີ່ພິເສດກັບພະເຢໂຫວາ ແລະເຈົ້າກໍໝັ້ນໃຈໄດ້ວ່າຫຼັງຈາກຮັບບັບເຕມາແລ້ວ ພະເຢໂຫວາຈະ “ເທພອນມາໃສ່ເຈົ້າຈົນເຫຼືອເຟືອ.”—ມລກ. 3:10; ຢຣມ. 17:7, 8
3. ຄລິດສະຕຽນທີ່ອຸທິດໂຕແລະຮັບບັບເຕມາແລ້ວມີໜ້າທີ່ສຳຄັນຫຍັງ? (ປັນຍາຈານ 5:4, 5)
3 ການຮັບບັບເຕມາເປັນຈຸດເລີ່ມຕົ້ນຂອງການເປັນຜູ້ຮັບໃຊ້ພະເຢໂຫວາ. ເມື່ອເຈົ້າຮັບບັບເຕມາແລ້ວ ເຈົ້າຕ້ອງພະຍາຍາມເຕັມທີທີ່ຈະໃຊ້ຊີວິດຕາມທີ່ໄດ້ອຸທິດໂຕ ເຖິງວ່າຈະເຈິບັນຫາຫຼືການລໍ້ໃຈ. (ອ່ານປັນຍາຈານ 5:4, 5) ຍ້ອນເຈົ້າເປັນລູກສິດຂອງພະເຢຊູ ເຈົ້າຈະຮຽນແບບເພິ່ນແລະເຊື່ອຟັງຄຳສັ່ງຂອງເພິ່ນໃຫ້ຫຼາຍທີ່ສຸດເທົ່າທີ່ເປັນໄປໄດ້. (ມທ. 28:19, 20; 1ປຕ. 2:21) ບົດຄວາມນີ້ຈະຊ່ວຍເຈົ້າໃຫ້ເຮັດແບບນັ້ນ.
ຕິດຕາມພະເຢຊູຕໍ່ໆໄປເຖິງວ່າເຈິບັນຫາແລະການລໍ້ໃຈ
4. ການທີ່ລູກສິດຂອງພະເຢຊູ “ແບກເສົາທໍລະມານ” ໝາຍຄວາມວ່າແນວໃດ? (ລູກາ 9:23)
4 ຫຼັງຈາກທີ່ເຈົ້າຮັບບັບເຕມາແລ້ວ ບໍ່ໄດ້ໝາຍຄວາມວ່າຊີວິດເຈົ້າຈະບໍ່ເຈິບັນຫາ. ທີ່ຈິງ ພະເຢຊູບອກຢ່າງຊັດເຈນວ່າລູກສິດຂອງເພິ່ນຈະຕ້ອງ “ແບກເສົາທໍລະມານຂອງໂຕເອງທຸກໆມື້.” (ອ່ານລູກາ 9:23) ພະເຢຊູເວົ້າແບບນີ້ໝາຍຄວາມວ່າລູກສິດຂອງເພິ່ນຈະເຈິຄວາມຍາກລຳບາກຕະຫຼອດເວລາບໍ? ບໍ່ແມ່ນແບບນັ້ນ. ເພິ່ນພຽງແຕ່ເນັ້ນວ່ານອກຈາກເຂົາເຈົ້າໄດ້ຮັບສິ່ງດີໆແລ້ວ ເຂົາເຈົ້າອາດຈະເຈິບັນຫາໃນຊີວິດນຳ. ບັນຫາບາງຢ່າງອາດໜັກຫຼາຍຈົນເຮັດໃຫ້ຮູ້ສຶກທຸກໃຈແລະໝົດແຮງ.—2ຕມ. 3:12
5. ພະເຢຊູສັນຍາວ່າຄົນທີ່ເສຍສະລະຈະໄດ້ສິ່ງດີໆຫຍັງແດ່?
5 ເຈົ້າອາດເຈິການຕໍ່ຕ້ານຈາກຄົນໃນຄອບຄົວຫຼືເສຍໂອກາດທີ່ຈະຫາເງິນໄດ້ຫຼາຍໆ ຍ້ອນເຈົ້າໃຫ້ການປົກຄອງຂອງພະເຈົ້າເປັນສິ່ງສຳຄັນທີ່ສຸດໃນຊີວິດ. (ມທ. 6:33) ຖ້າເປັນແນວນັ້ນ ຂໍໃຫ້ເຈົ້າໝັ້ນໃຈວ່າພະເຢໂຫວາເຫັນສິ່ງທີ່ເຈົ້າເຮັດເພື່ອເພິ່ນ. (ຮຣ. 6:10) ເຈົ້າອາດໄດ້ເຈິກັບໂຕເອງວ່າຄຳເວົ້າຂອງພະເຢຊູເປັນຈິງທີ່ວ່າ: “ຜູ້ໃດທີ່ໄດ້ສະລະເຮືອນ ຫຼືອ້າຍເອື້ອຍນ້ອງ ຫຼືພໍ່ແມ່ ຫຼືລູກ ຫຼືໄຮ່ນາເພື່ອຕິດຕາມຂ້ອຍແລະເພື່ອຂ່າວດີ ຜູ້ນັ້ນຈະໄດ້ຄືນ 100 ເທົ່າໃນຍຸກນີ້ ບໍ່ວ່າຈະເປັນເຮືອນ ອ້າຍເອື້ອຍນ້ອງ ແມ່ ລູກ ຫຼືໄຮ່ນາ ແລະກໍຈະຖືກຂົ່ມເຫງນຳ ແຕ່ໃນຍຸກໜ້າຈະໄດ້ຊີວິດຕະຫຼອດໄປ.” (ມຣກ. 10:29, 30) ສິ່ງດີໆທີ່ເຈົ້າໄດ້ໃນຕອນນີ້ ມັນຫຼາຍກວ່າສິ່ງທີ່ເຈົ້າເສຍສະລະໄປຫຼາຍເທົ່າ.—ພສ. 37:4
6. ເປັນຫຍັງເຈົ້າຍັງຕ້ອງຕໍ່ສູ້ກັບ “ຄວາມຕ້ອງການຂອງຮ່າງກາຍທີ່ມີບາບ” ຫຼັງຈາກຮັບບັບເຕມາແລ້ວ?
6 ຫຼັງຈາກຮັບບັບເຕມາແລ້ວ ເຈົ້າຍັງຕ້ອງຕໍ່ສູ້ກັບ “ຄວາມຕ້ອງການຂອງຮ່າງກາຍທີ່ມີບາບ” ຍ້ອນເຈົ້າຍັງເປັນຄົນທີ່ບໍ່ສົມບູນແບບ. (1ຢຮ. 2:16) ບາງເທື່ອ ເຈົ້າອາດຮູ້ສຶກຄືກັບໂປໂລ. ລາວເວົ້າວ່າ: “ທີ່ຈິງແລ້ວ ໃຈຂ້ອຍມັກກົດໝາຍຂອງພະເຈົ້າຫຼາຍແທ້ໆ ແຕ່ຂ້ອຍເຫັນກົດອີກຢ່າງໜຶ່ງໃນຮ່າງກາຍທີ່ຕໍ່ສູ້ກັບກົດໃນໃຈຂ້ອຍ ແລະເຮັດໃຫ້ຂ້ອຍຕົກຢູ່ໃຕ້ກົດຂອງບາບທີ່ຢູ່ໃນຮ່າງກາຍຂ້ອຍ.” (ຣມ. 7:22, 23) ເຈົ້າອາດຮູ້ສຶກທໍ້ໃຈຍ້ອນຕ້ອງຕໍ່ສູ້ກັບຄວາມຕ້ອງການທີ່ຜິດໆ. ແຕ່ຂໍໃຫ້ເຈົ້າຄິດເຖິງຄຳສັນຍາທີ່ເຈົ້າໄດ້ສັນຍາກັບພະເຢໂຫວາຕອນທີ່ອຸທິດໂຕ. ການຄິດເຖິງເລື່ອງນີ້ຈະຊ່ວຍເຈົ້າໃຫ້ເຂັ້ມແຂງແລະຕໍ່ສູ້ກັບການລໍ້ໃຈໄດ້. ທີ່ຈິງ ການຄິດເຖິງຄຳສັນຍາຕອນອຸທິດໂຕຈະຊ່ວຍໃຫ້ຊີວິດເຈົ້າງ່າຍຂຶ້ນ. ມັນຈະຊ່ວຍເຈົ້າແນວໃດ?
7. ການອຸທິດໂຕໃຫ້ພະເຢໂຫວາຈະຊ່ວຍເຈົ້າແນວໃດໃຫ້ສັດຊື່ຕໍ່ເພິ່ນຕໍ່ໆໄປ?
7 ເມື່ອເຈົ້າອຸທິດໂຕໃຫ້ພະເຢໂຫວາ ເຈົ້າກໍເຊົາໃຊ້ຊີວິດເພື່ອໂຕເອງ. ນີ້ໝາຍຄວາມວ່າເຈົ້າຈະບໍ່ເຮັດຕາມຄວາມຕ້ອງການຂອງໂຕເອງແລະບໍ່ຕັ້ງເປົ້າໝາຍໃນສິ່ງທີ່ພະເຢໂຫວາບໍ່ມັກ. (ມທ. 16:24) ດັ່ງນັ້ນ ເມື່ອເຈົ້າເຈິການລໍ້ໃຈ ເຈົ້າຈະບໍ່ເສຍເວລາມາຄິດວ່າຈະເຮັດແນວໃດ ຍ້ອນເຈົ້າໄດ້ຕັດສິນໃຈໄວ້ແລ້ວວ່າຈະສັດຊື່ຕໍ່ພະເຢໂຫວາຕໍ່ໆໄປ. ເຈົ້າຕັ້ງໃຈແທ້ໆວ່າຈະເຮັດໃຫ້ພະເຢໂຫວາພໍໃຈສະເໝີ. ຖ້າເຈົ້າເຮັດແບບນີ້ ເຈົ້າກໍຈະເປັນຄືກັບໂຢບ. ເຖິງວ່າຈະເຈິການທົດສອບທີ່ໜັກຫຼາຍ ແຕ່ລາວກໍຍັງເວົ້າວ່າ “ຂ້ອຍຈະສັດຊື່ຈົນຮອດມື້ຕາຍ!”—ໂຢບ 27:5
8. ການຄິດເຖິງຄຳອະທິດຖານຕອນອຸທິດໂຕຈະຊ່ວຍເຈົ້າໃຫ້ຕ້ານທານການລໍ້ໃຈໄດ້ແນວໃດ?
8 ການຄິດເຖິງຄຳອະທິດຖານຕອນອຸທິດໂຕຈະຊ່ວຍເຈົ້າໃຫ້ຕ້ານທານການລໍ້ໃຈໄດ້. ຕົວຢ່າງເຊັ່ນ: ເຈົ້າຈະຈີບຜົວຫຼືເມຍຂອງຄົນອື່ນບໍ? ເຈົ້າບໍ່ເຮັດເດັດຂາດ ຍ້ອນເຈົ້າໄດ້ສັນຍາກັບພະເຢໂຫວາແລ້ວວ່າຈະບໍ່ເຮັດແບບນັ້ນ. ຖ້າເຈົ້າບໍ່ປ່ອຍໃຫ້ໂຕເອງມີຄວາມຮູ້ສຶກຈັ່ງຊັ້ນ ເຈົ້າກໍບໍ່ຕ້ອງເມື່ອຍກັບການກຳຈັດຄວາມຄິດທີ່ບໍ່ດີແນວນັ້ນອອກໄປ ແລະເຈົ້າຈະບໍ່ເຂົ້າໄປໃນ “ທາງຂອງຄົນຊົ່ວ.”—ສພສ. 4:14, 15
9. ການຄິດເຖິງຄຳອະທິດຖານຕອນອຸທິດໂຕຈະຊ່ວຍເຈົ້າແນວໃດໃຫ້ເອົາການນະມັດສະການພະເຢໂຫວາເປັນສິ່ງສຳຄັນທີ່ສຸດໃນຊີວິດ?
9 ຖ້າມີຄົນສະເໜີວຽກໃຫ້ເຈົ້າ ແຕ່ວຽກນັ້ນເຮັດໃຫ້ເຈົ້າໄປປະຊຸມເປັນປະຈຳບໍ່ໄດ້ເດ? ເຈົ້າຈະປະຕິເສດວຽກນັ້ນແນ່ນອນ ຍ້ອນເຈົ້າໄດ້ຕັດສິນໃຈໄວ້ແລ້ວວ່າຈະບໍ່ຮັບເອົາວຽກທີ່ເຮັດໃຫ້ເຈົ້າຂາດການປະຊຸມ. ເມື່ອເຮັດແບບນີ້ ເຈົ້າກໍບໍ່ຕ້ອງມານັ່ງອຸກໃຈວ່າເຮັດແນວໃດຈຶ່ງຈະບໍ່ເສຍວຽກນີ້ແລະໃນເວລາດຽວກັນກໍຕ້ອງໄປປະຊຸມນຳ. ພະເຢຊູຕັ້ງໃຈແທ້ໆທີ່ຈະເຮັດໃຫ້ພໍ່ຂອງເພິ່ນພໍໃຈສະເໝີ. ຄ້າຍຄືກັນ ຍ້ອນເຈົ້າອຸທິດໂຕໃຫ້ພະເຢໂຫວາແລ້ວ ຖ້າເຈົ້າຮູ້ວ່າມີຫຍັງທີ່ເຮັດໃຫ້ພະເຢໂຫວາບໍ່ມັກ ເຈົ້າກໍຈະເຮັດຄືກັບພະເຢຊູໂດຍປະຕິເສດທັນທີແລະບໍ່ລັງເລ.—ມທ. 4:10; ຢຮ. 8:29
10. ເພື່ອເຈົ້າຈະຕິດຕາມພະເຢຊູຕໍ່ໆໄປ ພະເຢໂຫວາຈະຊ່ວຍເຈົ້າແນວໃດຫຼັງຈາກຮັບບັບເຕມາແລ້ວ?
10 ທີ່ຈິງ ເມື່ອເຈິບັນຫາຫຼືການລໍ້ໃຈ ນັ້ນເປັນໂອກາດທີ່ເຈົ້າຈະສະແດງໃຫ້ເຫັນວ່າເຈົ້າຕັ້ງໃຈທີ່ຈະຕິດຕາມພະເຢຊູຕໍ່ໆໄປ. ເມື່ອເຮັດແບບນີ້ ເຈົ້າໝັ້ນໃຈໄດ້ວ່າພະເຢໂຫວາຈະຊ່ວຍເຈົ້າ. ຄຳພີໄບເບິນບອກວ່າ: “ພະເຈົ້າສັດຊື່ ເພິ່ນຈະບໍ່ປ່ອຍໃຫ້ເຈົ້າຖືກລໍ້ໃຈຈົນອົດທົນບໍ່ໄດ້ ແລະເມື່ອເຈົ້າຖືກລໍ້ໃຈ ເພິ່ນຈະຊ່ວຍເຈົ້າໃຫ້ມີທາງອອກເພື່ອຈະອົດທົນໄດ້.”—1ກຣ. 10:13
ເຈົ້າຈະຕິດຕາມພະເຢຊູຕໍ່ໆໄປໄດ້ແນວໃດ?
11. ວິທີໜຶ່ງທີ່ດີທີ່ສຸດສຳລັບເຈົ້າທີ່ຈະຕິດຕາມພະເຢຊູຕໍ່ໆໄປແມ່ນຫຍັງ? (ເບິ່ງຮູບນຳ)
11 ພະເຢຊູໝັ່ນປະກາດແລະເພິ່ນໃກ້ຊິດກັບພະເຢໂຫວາສະເໝີໂດຍການອະທິດຖານ. (ລກ. 6:12) ທີ່ຈິງ ວິທີໜຶ່ງທີ່ດີທີ່ສຸດສຳລັບເຈົ້າທີ່ຈະຕິດຕາມພະເຢຊູຕໍ່ໆໄປຫຼັງຈາກຮັບບັບເຕມາແລ້ວແມ່ນ ເຈົ້າຕ້ອງເຮັດສິ່ງທີ່ຈະຊ່ວຍເຈົ້າໃຫ້ສະໜິດກັບພະເຢໂຫວາຫຼາຍຂຶ້ນ. ຄຳພີໄບເບິນບອກວ່າ: “ບໍ່ວ່າພວກເຮົາຈະກ້າວໜ້າຫຼາຍສ່ຳໃດ ກໍຂໍໃຫ້ພວກເຮົາກ້າວໜ້າແບບນັ້ນຕໍ່ໄປເລື້ອຍໆ.” (ຟລປ. 3:16) ບາງເທື່ອເຈົ້າໄດ້ຍິນວ່າພີ່ນ້ອງຫຼາຍຄົນພະຍາຍາມຮັບໃຊ້ພະເຢໂຫວາຫຼາຍຂຶ້ນ ເຊັ່ນ: ເຂົາເຈົ້າເຂົ້າໂຮງຮຽນສຳລັບຜູ້ປະກາດລາຊະອານາຈັກ ຫຼືຍ້າຍໄປບ່ອນທີ່ຕ້ອງການຜູ້ປະກາດຫຼາຍກວ່າ. ຖ້າເຈົ້າສາມາດຕັ້ງເປົ້າໝາຍແບບນັ້ນໄດ້ ກໍໃຫ້ເຮັດໂລດ. ຜູ້ຮັບໃຊ້ຂອງພະເຢໂຫວາຢາກຮັບໃຊ້ເພິ່ນຫຼາຍຂຶ້ນ. (ກຈກ. 16:9) ແຕ່ຖ້າຕອນນີ້ເຈົ້າຍັງເຮັດແບບນັ້ນບໍ່ໄດ້ເດ? ຢ່າຄິດວ່າເຈົ້າເຮັດບໍ່ໄດ້ດີຫຼືດ້ອຍກວ່າພີ່ນ້ອງຄົນອື່ນ. ສິ່ງສຳຄັນທີ່ສຸດສຳລັບຄລິດສະຕຽນແມ່ນຄວາມອົດທົນ. (ມທ. 10:22) ໃຫ້ຈື່ໄວ້ວ່າພະເຢໂຫວາມີຄວາມສຸກຫຼາຍເມື່ອເຈົ້າເຮັດໃນສິ່ງທີ່ເຮັດໄດ້ຕາມຄວາມສາມາດແລະສະພາບການຂອງເຈົ້າ. ນີ້ເປັນວິທີທີ່ສຳຄັນທີ່ເຈົ້າຈະຕິດຕາມພະເຢຊູຕໍ່ໆໄປຫຼັງຈາກຮັບບັບເຕມາແລ້ວ.—ພສ. 26:1
ຫຼັງຈາກຮັບບັບເຕມາແລ້ວ ໃຫ້ເຈົ້າຕັ້ງເປົ້າໝາຍທີ່ຈະເຮັດສິ່ງທີ່ຈະຊ່ວຍເຈົ້າໃຫ້ສະໜິດກັບພະເຢໂຫວາຫຼາຍຂຶ້ນ (ເບິ່ງຂໍ້ 11)
12-13. ຖ້າຄວາມກະຕືລືລົ້ນຂອງເຈົ້າເລີ່ມຫຼຸດລົງ ອັນໃດຈະຊ່ວຍເຈົ້າໄດ້? (1 ໂກຣິນໂທ 9:16, 17) (ເບິ່ງຂອບ “ ຢູ່ໃນການແລ່ນແຂ່ງຕໍ່ໆໄປ” ນຳ)
12 ເຈົ້າຈະເຮັດແນວໃດຖ້າຮູ້ສຶກວ່າເຈົ້າບໍ່ໄດ້ອະທິດຖານຈາກໃຈຫຼືບໍ່ມ່ວນກັບວຽກປະກາດ? ຫຼືຕອນນີ້ເຈົ້າບໍ່ມັກອ່ານຄຳພີໄບເບິນຄືກັບແຕ່ກີ້? ຖ້າເຈົ້າເລີ່ມຮູ້ສຶກແບບນີ້ຫຼັງຈາກຮັບບັບເຕມາແລ້ວ ຢ່າຟ້າວສະຫຼຸບວ່າພະລັງບໍລິສຸດຂອງພະເຢໂຫວາບໍ່ຢູ່ກັບເຈົ້າແລ້ວ. ເຮົາເປັນຄົນບໍ່ສົມບູນແບບ ບາງເທື່ອຄວາມຮູ້ສຶກຂອງເຮົາກໍຂຶ້ນໆລົງໆ. ຖ້າເຈົ້າເລີ່ມຮູ້ສຶກວ່າຄວາມກະຕືລືລົ້ນຂອງເຈົ້າຫຼຸດລົງ ຂໍໃຫ້ຄິດເຖິງຕົວຢ່າງຂອງໂປໂລ. ເຖິງວ່າລາວພະຍາຍາມຮຽນແບບພະເຢຊູ ແຕ່ລາວຮູ້ວ່າບາງເທື່ອລາວກໍຮູ້ສຶກວ່າບໍ່ມີຄວາມກະຕືລືລົ້ນທີ່ຈະເຮັດ. (ອ່ານ 1 ໂກຣິນໂທ 9:16, 17) ລາວເວົ້າວ່າ: “ເຖິງຂ້ອຍຈະບໍ່ເຕັມໃຈ ຂ້ອຍກໍຍັງຕ້ອງເຮັດຍ້ອນເປັນໜ້າທີ່ທີ່ຂ້ອຍໄດ້ຮັບມອບໝາຍ.” ເວົ້າອີກຢ່າງໜຶ່ງແມ່ນ ໂປໂລຕັ້ງໃຈທີ່ຈະເຮັດວຽກປະກາດໃຫ້ສຳເລັດເຖິງວ່າບໍ່ຢາກເຮັດ.
13 ຢ່າໃຫ້ອາລົມຄວາມຮູ້ສຶກເປັນສິ່ງກຳນົດວ່າເຈົ້າຈະເຮັດຫຍັງຫຼືບໍ່ເຮັດຫຍັງ. ໃຫ້ເຈົ້າຕັ້ງໃຈເຮັດສິ່ງທີ່ຖືກຕ້ອງຕໍ່ໆໄປເຖິງວ່າເຈົ້າອາດຈະບໍ່ຢາກເຮັດ. ຖ້າເຈົ້າພະຍາຍາມເຮັດສິ່ງທີ່ຖືກຕ້ອງຕໍ່ໆໄປ ເມື່ອເວລາຜ່ານໄປເຈົ້າຈະມີຄວາມສຸກກັບມັນຫຼາຍຂຶ້ນ. ໃຫ້ເຈົ້າເຮັດກິດຈະກຳຂອງຄລິດສະຕຽນເປັນປະຈຳ ເຊັ່ນ: ສຶກສາສ່ວນໂຕ ອະທິດຖານ ໄປປະຊຸມ ແລະໄປປະກາດ. ການເຮັດສິ່ງເຫຼົ່ານີ້ຈະຊ່ວຍເຈົ້າໃຫ້ຕິດຕາມພະເຢຊູຕໍ່ໆໄປຫຼັງຈາກຮັບບັບເຕມາແລ້ວ. ເມື່ອພີ່ນ້ອງເຫັນເຈົ້າພະຍາຍາມຮັບໃຊ້ພະເຢໂຫວາຕໍ່ໆໄປ ເຂົາເຈົ້າກໍໄດ້ກຳລັງໃຈ.—1ທຊ. 5:11
ໃຫ້ “ກວດເບິ່ງໂຕເອງຢູ່ສະເໝີ”
14. ເຈົ້າຄວນກວດເບິ່ງຫຍັງຢູ່ສະເໝີແລະຍ້ອນຫຍັງ? (2 ໂກຣິນໂທ 13:5)
14 ຫຼັງຈາກຮັບບັບເຕມາແລ້ວ ເປັນສິ່ງສຳຄັນທີ່ເຈົ້າຈະກວດເບິ່ງໂຕເອງຢູ່ສະເໝີ. (ອ່ານ 2 ໂກຣິນໂທ 13:5) ໃຫ້ເຈົ້າສັງເກດເບິ່ງໂຕເອງເປັນໄລຍະໆວ່າເຈົ້າເຮັດສິ່ງເຫຼົ່ານີ້ເປັນປະຈຳບໍ່ ເຊັ່ນ: ອະທິດຖານ ອ່ານແລະຄົ້ນຄວ້າຄຳພີໄບເບິນ ໄປປະຊຸມ ແລະໄປປະກາດ. ໃຫ້ພະຍາຍາມຊອກວິທີທີ່ເຈົ້າຈະມ່ວນແລະໄດ້ຮັບປະໂຫຍດຫຼາຍຂຶ້ນຈາກສິ່ງເຫຼົ່ານີ້. ໃຫ້ຖາມໂຕເອງວ່າ: ‘ຂ້ອຍອະທິບາຍຄຳສອນພື້ນຖານໃນຄຳພີໄບເບິນໃຫ້ຄົນອື່ນໄດ້ບໍ? ຂ້ອຍຈະເຮັດຫຍັງໄດ້ແດ່ເພື່ອຈະມ່ວນກັບວຽກປະກາດຫຼາຍຂຶ້ນ? ຄຳອະທິດຖານຂອງຂ້ອຍເປັນແບບເຈາະຈົງແລະສະແດງໃຫ້ເຫັນບໍວ່າຂ້ອຍໄວ້ວາງໃຈພະເຢໂຫວາແທ້ໆ? ຂ້ອຍໄປປະຊຸມເປັນປະຈຳບໍ? ຂ້ອຍຈະຕັ້ງໃຈຟັງແລະອອກຄຳຄິດເຫັນຫຼາຍຂຶ້ນຢູ່ການປະຊຸມໄດ້ແນວໃດ?’
15-16. ເຈົ້າໄດ້ຮຽນຫຍັງຈາກເລື່ອງຂອງພີ່ນ້ອງຊາຍຄົນໜຶ່ງກ່ຽວກັບການຕ້ານທານການລໍ້ໃຈ?
15 ເຈົ້າຕ້ອງກວດເບິ່ງໂຕເອງແບບກົງໄປກົງມາວ່າເຈົ້າຍັງມີຈຸດອ່ອນຫຍັງ. ເຮົາເຫັນເລື່ອງນີ້ຈາກປະສົບການຂອງພີ່ນ້ອງໂຣເບີດ. ລາວເລົ່າວ່າ: “ຕອນຂ້ອຍອາຍຸປະມານ 20 ປີ ຂ້ອຍເຮັດວຽກບໍ່ເຕັມເວລາ. ມື້ໜຶ່ງຫຼັງຈາກເລີກວຽກ ໝູ່ຜູ້ຍິງທີ່ເຮັດວຽກນຳກັນຊວນຂ້ອຍໄປເຮືອນລາວ. ລາວເວົ້າວ່າ: ‘ຊິມີແຕ່ເຮົາ 2 ຄົນຢູ່ເຮືອນແລະພວກເຮົາຈະມີຄວາມສຸກນຳກັນ.’ ທຳອິດຂ້ອຍບໍ່ກ້າບອກກົງໆ ແລະຊອກເຫດຜົນມາອ້າງ ແຕ່ສຸດທ້າຍຂ້ອຍກໍປະຕິເສດແລະອະທິບາຍວ່າເປັນຫຍັງຂ້ອຍຈຶ່ງບໍ່ໄປ.” ເປັນຕາຊົມເຊີຍແທ້ໆທີ່ໂຣເບີດຕ້ານທານການລໍ້ໃຈໄດ້. ແຕ່ຕໍ່ມາເມື່ອລາວຄິດຄືນກ່ຽວກັບເລື່ອງນັ້ນ ລາວຄິດວ່າໜ້າຈະເຮັດໄດ້ດີກວ່ານັ້ນ. ລາວຍອມຮັບວ່າ: “ຂ້ອຍຄວນປະຕິເສດທັນທີແລະໃຫ້ໜັກແໜ້ນຄືກັບທີ່ໂຢເຊັບເວົ້າກັບເມຍຂອງໂປຕີຟາ. (ປຖກ. 39:7-9) ຂ້ອຍແປກໃຈວ່າເປັນຫຍັງຄືຍາກແທ້ທີ່ຈະປະຕິເສດຜູ້ຍິງຄົນນັ້ນ. ເລື່ອງນີ້ຊ່ວຍຂ້ອຍໃຫ້ເຫັນວ່າຂ້ອຍຕ້ອງເຮັດໃຫ້ສາຍສຳພັນຂອງຂ້ອຍກັບພະເຢໂຫວາແໜ້ນແຟ້ນຂຶ້ນ.”
16 ຕົວຢ່າງຂອງໂຣເບີດເຮັດໃຫ້ເຫັນວ່າ ເຈົ້າຈະໄດ້ຮັບປະໂຫຍດຈາກການກວດເບິ່ງໂຕເອງ. ເຖິງວ່າເຈົ້າຕ້ານທານການລໍ້ໃຈໄດ້ສຳເລັດ ແຕ່ໃຫ້ຖາມໂຕເອງວ່າ: ‘ຂ້ອຍໃຊ້ເວລາດົນບໍຈຶ່ງປະຕິເສດໄດ້?’ ຖ້າເຫັນວ່າຕ້ອງປັບປຸງໂຕເອງ ກໍຢ່າຟ້າວທໍ້ໃຈ ແຕ່ໃຫ້ດີໃຈທີ່ຕອນນີ້ເຈົ້າເຫັນຈຸດອ່ອນຂອງໂຕເອງທີ່ຕ້ອງປັບປຸງ. ໃຫ້ອະທິດຖານຫາພະເຢໂຫວາກ່ຽວກັບເລື່ອງນັ້ນ ແລະພະຍາຍາມເຮັດສິ່ງທີ່ຈະຊ່ວຍເຈົ້າໃຫ້ໃຊ້ຊີວິດຕາມມາດຕະຖານດ້ານສິນລະທຳຂອງພະເຢໂຫວາ.—ພສ. 139:23, 24
17. ເລື່ອງຂອງໂຣເບີດກ່ຽວຂ້ອງແນວໃດກັບຊື່ສຽງຂອງພະເຢໂຫວາ?
17 ເລື່ອງຂອງໂຣເບີດຍັງບໍ່ຈົບ. ລາວເລົ່າຕໍ່ວ່າ: “ຫຼັງຈາກທີ່ຂ້ອຍປະຕິເສດຜູ້ຍິງຄົນນັ້ນ ລາວກໍເວົ້າວ່າ: ‘ເຈົ້າຜ່ານການທົດສອບແລ້ວ!’ ຂ້ອຍຖາມລາວວ່າ: ‘ເຈົ້າໝາຍຄວາມວ່າແນວໃດ?’ ລາວບອກວ່າໝູ່ຂອງລາວທີ່ເຄີຍເປັນພະຍານພະເຢໂຫວາບອກວ່າ ພະຍານພະເຢໂຫວາທຸກຄົນທີ່ເປັນໄວລຸ້ນໃຊ້ຊີວິດແບບຕີສອງໜ້າ. ເຂົາເຈົ້າຈະລັກເຮັດຜິດຖ້າມີໂອກາດ. ຜູ້ຍິງຄົນນັ້ນຈຶ່ງບອກໝູ່ວ່າລາວຈະທົດສອບເບິ່ງວ່າຂ້ອຍເປັນແບບນັ້ນບໍ່. ເມື່ອໄດ້ຍິນຈັ່ງຊັ້ນ ຂ້ອຍກໍດີໃຈແທ້ໆທີ່ບໍ່ໄດ້ເຮັດໃຫ້ພະເຢໂຫວາເສຍຊື່ສຽງ!”
18. ເຈົ້າຕັ້ງໃຈຈະເຮັດຫຍັງຫຼັງຈາກຮັບບັບເຕມາແລ້ວ? (ເບິ່ງຂອບ “ ບົດຄວາມຊຸດທີ່ເຈົ້າຈະມັກ” ນຳ)
18 ເມື່ອເຈົ້າອຸທິດໂຕແລະຮັບບັບເຕມາ ເຈົ້າໄດ້ສະແດງໃຫ້ເຫັນວ່າເຈົ້າຢາກໃຫ້ຊື່ຂອງພະເຢໂຫວາໄດ້ຮັບຄວາມນັບຖືຫຼາຍທີ່ສຸດຕະຫຼອດໄປ ບໍ່ວ່າຈະເກີດຫຍັງຂຶ້ນ. ເຈົ້າໝັ້ນໃຈໄດ້ວ່າພະເຢໂຫວາຮູ້ວ່າເຈົ້າກຳລັງເຈິກັບບັນຫາຫຍັງແລະຕ້ອງຕ້ານທານກັບການລໍ້ໃຈແບບໃດ. ເພິ່ນຈະອວຍພອນເຈົ້າທີ່ພະຍາຍາມຮັກສາຄວາມສັດຊື່. ເຈົ້າໝັ້ນໃຈໄດ້ວ່າເພິ່ນຈະໃຫ້ພະລັງບໍລິສຸດກັບເຈົ້າເພື່ອຊ່ວຍເຈົ້າໃຫ້ມີກຳລັງທີ່ຈະຮັກສາຄວາມສັດຊື່ຕໍ່ໆໄປ. (ລກ. 11:11-13) ພະເຢໂຫວາຈະຊ່ວຍເຈົ້າໃຫ້ຕິດຕາມພະເຢຊູຕໍ່ໆໄປໄດ້ຫຼັງຈາກຮັບບັບເຕມາແລ້ວ.
ເຈົ້າຈະຕອບແນວໃດ?
-
ການທີ່ຄລິດສະຕຽນ “ແບກເສົາທໍລະມານຂອງໂຕເອງທຸກໆມື້” ໝາຍຄວາມວ່າແນວໃດ?
-
ເຈົ້າຈະຕິດຕາມພະເຢຊູຕໍ່ໆໄປໄດ້ແນວໃດຫຼັງຈາກຮັບບັບເຕມາແລ້ວ?
-
ການຄິດເຖິງຄຳອະທິດຖານຕອນອຸທິດໂຕຊ່ວຍເຈົ້າແນວໃດໃຫ້ຮັກສາຄວາມສັດຊື່ຕໍ່ພະເຢໂຫວາຕໍ່ໆໄປ?
ເພງທີ 89 ຟັງ ເຮັດຕາມ ແລ້ວຈະໄດ້ພອນ
a ພາສາໄທ
