ບົດຄວາມສຶກສາທີ 13
ເພງທີ 127 ຂ້ອຍຄວນເປັນຄົນແບບໃດ
ເຈົ້າຈະໝັ້ນໃຈໄດ້ແນວໃດວ່າພະເຢໂຫວາພໍໃຈເຈົ້າ?
“ພໍ່ພໍໃຈລູກຫຼາຍ.”—ລກ. 3:22
ຈຸດສຳຄັນ
ອັນໃດຈະຊ່ວຍເຈົ້າໃຫ້ໝັ້ນໃຈວ່າພະເຢໂຫວາພໍໃຈເຈົ້າ?
1. ຜູ້ຮັບໃຊ້ທີ່ສັດຊື່ບາງຄົນຂອງພະເຢໂຫວາອາດສົງໄສເລື່ອງຫຍັງ?
ເຮົາດີໃຈແທ້ໆທີ່ຮູ້ວ່າ “ພະເຢໂຫວາພໍໃຈປະຊາຊົນຂອງເພິ່ນ.” (ພສ. 149:4) ແຕ່ບາງເທື່ອບາງຄົນກໍຮູ້ສຶກບໍ່ໝັ້ນໃຈແລະອາດສົງໄສວ່າ: ‘ພະເຢໂຫວາພໍໃຈເຂົາເຈົ້າແທ້ໆບໍ?’ ຜູ້ຮັບໃຊ້ທີ່ສັດຊື່ຫຼາຍຄົນຂອງພະເຢໂຫວາໃນສະໄໝທີ່ຂຽນຄຳພີໄບເບິນກໍຮູ້ສຶກແບບນີ້.—1ຊມ. 1:6-10; ໂຢບ 29:2, 4; ພສ. 51:11
2. ພະເຢໂຫວາພໍໃຈຄົນແບບໃດ?
2 ຄຳພີໄບເບິນເຮັດໃຫ້ເຫັນແຈ້ງວ່າຄົນທີ່ບໍ່ສົມບູນແບບກໍເຮັດໃຫ້ພະເຢໂຫວາພໍໃຈໄດ້. ເປັນໄປໄດ້ແນວໃດ? ເປັນໄປໄດ້ເມື່ອເຮົາສະແດງຄວາມເຊື່ອໃນພະເຢຊູແລະຮັບບັບເຕມາ. (ຢຮ. 3:16) ດັ່ງນັ້ນ ເຮົາຕ້ອງເຮັດໃຫ້ຄົນອື່ນເຫັນວ່າເຮົາກັບໃຈແທ້ໆຈາກການເຮັດຜິດແລະເຮັດໃຫ້ຄົນອື່ນເຫັນວ່າເຮົາໄດ້ອຸທິດໂຕໃຫ້ພະເຢໂຫວາເພື່ອຈະເຮັດຕາມຄວາມຕ້ອງການຂອງເພິ່ນ. (ກຈກ. 2:38; 3:19) ພະເຢໂຫວາດີໃຈຫຼາຍທີ່ເຮົາເຮັດສິ່ງເຫຼົ່ານີ້ເພື່ອຈະສະໜິດກັບເພິ່ນ. ເມື່ອເຮົາໃຊ້ຊີວິດຕາມການອຸທິດໂຕຕໍ່ໆໄປ ພະເຢໂຫວາຈະພໍໃຈເຮົາແລະຖືວ່າເຮົາເປັນໝູ່ສະໜິດຂອງເພິ່ນ.—ພສ. 25:14
3. ເຮົາຈະຮຽນຫຍັງໃນບົດຄວາມນີ້?
3 ແຕ່ເປັນຫຍັງບາງເທື່ອບາງຄົນຈຶ່ງຮູ້ສຶກວ່າພະເຢໂຫວາບໍ່ພໍໃຈເຂົາເຈົ້າ? ມີວິທີໃດແດ່ທີ່ພະເຢໂຫວາສະແດງໃຫ້ເຫັນວ່າເພິ່ນພໍໃຈເຮົາ? ແລະເຮົາຈະໝັ້ນໃຈຫຼາຍຂຶ້ນໄດ້ແນວໃດວ່າພະເຢໂຫວາພໍໃຈເຮົາ?
ເປັນຫຍັງບາງຄົນຈຶ່ງຮູ້ສຶກວ່າພະເຢໂຫວາບໍ່ພໍໃຈເຂົາເຈົ້າ?
4-5. ເຖິງເຮົາຮູ້ສຶກວ່າໂຕເອງບໍ່ມີຄ່າ ແຕ່ເຮົາໝັ້ນໃຈເລື່ອງຫຍັງ?
4 ບາງຄົນຮູ້ສຶກວ່າໂຕເອງບໍ່ມີຄ່າຕັ້ງແຕ່ເປັນເດັກນ້ອຍ. (ພສ. 88:15) ພີ່ນ້ອງຊາຍຄົນໜຶ່ງຊື່ເອດຣຽນເວົ້າວ່າ: “ຂ້ອຍຮູ້ສຶກຕະຫຼອດວ່າໂຕເອງບໍ່ມີຄ່າ. ຕອນເປັນເດັກນ້ອຍ ຂ້ອຍຈື່ໄດ້ວ່າຂ້ອຍອະທິດຖານຂໍໃຫ້ຄອບຄົວໄດ້ຢູ່ໃນໂລກໃໝ່. ແຕ່ຂ້ອຍຄິດວ່າໂຕເອງຄືຊິບໍ່ໄດ້ຢູ່ດອກຍ້ອນຂ້ອຍບໍ່ດີພໍ.” ໂທນີ້ທີ່ໃຫຍ່ມາໃນຄອບຄົວທີ່ບໍ່ໄດ້ເປັນພະຍານພະເຢໂຫວາເວົ້າວ່າ: “ພໍ່ແມ່ບໍ່ເຄີຍບອກວ່າເຂົາເຈົ້າຮັກຫຼືພູມໃຈໃນໂຕຂ້ອຍ. ມັນເຮັດໃຫ້ຂ້ອຍຮູ້ສຶກວ່າເຖິງວ່າຈະເຮັດດີສ່ຳໃດ ເຂົາເຈົ້າກໍບໍ່ເຄີຍພໍໃຈ.”
5 ຖ້າບາງເທື່ອເຮົາຮູ້ສຶກວ່າໂຕເອງບໍ່ມີຄ່າ ໃຫ້ຈື່ໄວ້ວ່າພະເຢໂຫວາເປັນຜູ້ຊັກນຳເຮົາໃຫ້ເຂົ້າມາຫາເພິ່ນ. (ຢຮ. 6:44) ເພິ່ນເຫັນຈຸດດີຂອງເຮົາເຖິງວ່າເຮົາອາດເບິ່ງບໍ່ເຫັນ ແລະເພິ່ນເບິ່ງຫົວໃຈຂອງເຮົາ. (1ຊມ. 16:7; 2ຂຄ. 6:30) ດັ່ງນັ້ນ ເຮົາໝັ້ນໃຈໄດ້ແທ້ໆວ່າເມື່ອພະເຢໂຫວາເວົ້າວ່າເຮົາມີຄ່າ ເຮົາກໍມີຄ່າແທ້ໆ.—1ຢຮ. 3:19, 20
6. ໂປໂລຮູ້ສຶກແນວໃດກັບຄວາມຜິດທີ່ລາວເຄີຍເຮັດຜ່ານມາ?
6 ກ່ອນຮຽນຄຳພີໄບເບິນ ພວກເຮົາບາງຄົນອາດເຄີຍເຮັດບໍ່ດີແລະຍັງຮູ້ສຶກຜິດຢູ່. (1ປຕ. 4:3) ແມ່ນແຕ່ຜູ້ຮັບໃຊ້ທີ່ສັດຊື່ຂອງພະເຢໂຫວາກໍຕ້ອງຕໍ່ສູ້ກັບຄວາມຕ້ອງການທີ່ຜິດໆ. ເຈົ້າກໍຕ້ອງຕໍ່ສູ້ຄືກັນບໍ? ບາງເທື່ອເຈົ້າຮູ້ສຶກບໍວ່າພະເຢໂຫວາຍົກໂທດໃຫ້ເຈົ້າບໍ່ໄດ້? ຖ້າເຈົ້າຮູ້ສຶກແບບນັ້ນກໍບໍ່ຕ້ອງອຸກໃຈ. ຜູ້ຮັບໃຊ້ທີ່ສັດຊື່ຂອງພະເຢໂຫວາກໍເຄີຍຮູ້ສຶກແບບນີ້. ຕົວຢ່າງເຊັ່ນ: ໂປໂລຮູ້ສຶກບໍ່ດີຫຼາຍເມື່ອຄິດເຖິງຄວາມບໍ່ສົມບູນແບບຂອງໂຕເອງ. (ຣມ. 7:24) ເຖິງວ່າໂປໂລໄດ້ກັບໃຈຈາກຄວາມຜິດທີ່ລາວເຮັດແລະໄດ້ຮັບບັບເຕມາ ແຕ່ລາວກໍຍັງເວົ້າເຖິງໂຕເອງວ່າເປັນຄົນທີ່ “ຕ່ຳຕ້ອຍທີ່ສຸດໃນພວກອັກຄະສາວົກ” ແລະໃນຄົນບາບ ລາວ “ຊົ່ວທີ່ສຸດ.”—1ກຣ. 15:9; 1ຕມ. 1:15
7. ເຮົາຕ້ອງຈື່ຫຍັງໄວ້ສະເໝີຖ້າເຮົາເຄີຍເຮັດຜິດ?
7 ພະເຢໂຫວາພໍ່ຂອງເຮົາທີ່ຢູ່ໃນສະຫວັນສັນຍາວ່າຈະໃຫ້ອະໄພເຮົາຖ້າເຮົາກັບໃຈ. (ພສ. 86:5) ດັ່ງນັ້ນ ຖ້າເຮົາເສຍໃຈແທ້ໆທີ່ເຮົາເຄີຍເຮັດຜິດ ເຮົາກໍໝັ້ນໃຈໃນຄຳສັນຍາຂອງພະເຢໂຫວາໄດ້ວ່າເພິ່ນຈະໃຫ້ອະໄພເຮົາແທ້ໆ.—ກລຊ. 2:13
8-9. ອັນໃດຈະຊ່ວຍເຮົາໃຫ້ເອົາຊະນະຄວາມຮູ້ສຶກທີ່ວ່າຮັບໃຊ້ສ່ຳໃດກໍບໍ່ພໍເພື່ອຈະເຮັດໃຫ້ພະເຢໂຫວາພໍໃຈ?
8 ເຮົາທຸກຄົນຢາກຮັບໃຊ້ພະເຢໂຫວາໃຫ້ຫຼາຍທີ່ສຸດເທົ່າທີ່ເຮົາເຮັດໄດ້. ແຕ່ບາງຄົນອາດຮູ້ສຶກວ່າຮັບໃຊ້ສ່ຳໃດກໍບໍ່ພໍເພື່ອຈະເຮັດໃຫ້ພະເຢໂຫວາພໍໃຈ. ພີ່ນ້ອງຍິງຄົນໜຶ່ງຊື່ອະແມນດ້າຮູ້ສຶກແບບນັ້ນ. ລາວເວົ້າວ່າ: “ຂ້ອຍມັກຄິດວ່າການໃຫ້ສິ່ງທີ່ດີທີ່ສຸດກັບພະເຢໂຫວາໝາຍຄວາມວ່າຂ້ອຍຕ້ອງເຮັດໃຫ້ຫຼາຍຂຶ້ນເລື້ອຍໆ. ຂ້ອຍຈຶ່ງຄາດໝາຍກັບໂຕເອງຫຼາຍກວ່າທີ່ຂ້ອຍເຮັດໄດ້. ເມື່ອເຮັດບໍ່ໄດ້ທັງໝົດຕາມທີ່ຕັ້ງເປົ້າໝາຍໄວ້ ຂ້ອຍຈຶ່ງຄິດວ່າພະເຢໂຫວາຄືຊິຜິດຫວັງໃນໂຕຂ້ອຍຄືກັບທີ່ຂ້ອຍຜິດຫວັງກັບໂຕເອງ.”
9 ອັນໃດຈະຊ່ວຍເຮົາໃຫ້ເອົາຊະນະຄວາມຮູ້ສຶກທີ່ວ່າຮັບໃຊ້ສ່ຳໃດກໍບໍ່ພໍເພື່ອຈະເຮັດໃຫ້ພະເຢໂຫວາພໍໃຈ? ໃຫ້ຈື່ໄວ້ວ່າພະເຢໂຫວາເປັນພະເຈົ້າທີ່ມີເຫດຜົນ. ເພິ່ນບໍ່ເຄີຍຮຽກຮ້ອງໃນສິ່ງທີ່ເຮົາເຮັດບໍ່ໄດ້. ເພິ່ນເຫັນຄ່າທຸກສິ່ງທີ່ເຮົາເຮັດສຸດຄວາມສາມາດເພື່ອເພິ່ນ. ນອກຈາກນັ້ນ ໃຫ້ຄິດເຖິງຕົວຢ່າງຂອງຄົນໃນຄຳພີໄບເບິນທີ່ຮັບໃຊ້ພະເຢໂຫວາສຸດຫົວໃຈ ເຊັ່ນ ຕົວຢ່າງຂອງໂປໂລ. ໂປໂລຮັບໃຊ້ພະເຢໂຫວາຢ່າງເຕັມທີມາຫຼາຍປີ ເດີນທາງຫຼາຍພັນກິໂລແມັດ ແລະຕັ້ງຫຼາຍປະຊາຄົມ. ແຕ່ເມື່ອລາວຢູ່ໃນສະພາບການທີ່ຮັບໃຊ້ບໍ່ໄດ້ຫຼາຍຄືກັບທີ່ຜ່ານມາ ລາວຄິດວ່າພະເຢໂຫວາບໍ່ພໍໃຈລາວບໍ? ລາວບໍ່ໄດ້ຄິດແບບນັ້ນ ຍ້ອນລາວພະຍາຍາມເຮັດສິ່ງທີ່ເຮັດໄດ້ຕໍ່ໄປ ແລະພະເຢໂຫວາກໍອວຍພອນລາວ. (ກຈກ. 28:30, 31) ຄ້າຍຄືກັນ ສິ່ງທີ່ເຮົາເຮັດເພື່ອພະເຢໂຫວາອາດປ່ຽນໄປຕາມສະພາບການ. ແຕ່ສິ່ງທີ່ສຳຄັນສຳລັບພະເຢໂຫວາແມ່ນເຫດຜົນທີ່ເຮົາຮັບໃຊ້ເພິ່ນຕໍ່ໆໄປ. ເຮົາຈະເບິ່ງວ່າມີວິທີໃດແດ່ທີ່ພະເຢໂຫວາເຮັດໃຫ້ເຫັນວ່າເພິ່ນພໍໃຈເຮົາ.
ມີວິທີໃດແດ່ທີ່ພະເຢໂຫວາສະແດງໃຫ້ເຫັນວ່າເພິ່ນພໍໃຈເຮົາ?
10. ເຮົາຈະໄດ້ຍິນສຽງຂອງພະເຢໂຫວາແນວໃດທີ່ບອກວ່າເພິ່ນພໍໃຈເຮົາ? (ໂຢຮັນ 16:27)
10 ໂດຍທາງຄຳພີໄບເບິນ. ພະເຢໂຫວາມັກສະແດງອອກວ່າເພິ່ນຮັກແລະພໍໃຈຜູ້ຮັບໃຊ້ຂອງເພິ່ນ. ຄຳພີໄບເບິນເວົ້າເຖິງ 2 ເຫດການທີ່ພະເຢໂຫວາບອກວ່າພະເຢຊູເປັນລູກທີ່ເພິ່ນຮັກ ແລະເພິ່ນພໍໃຈພະເຢຊູຫຼາຍ. (ມທ. 3:17; 17:5) ເຈົ້າຢາກໄດ້ຍິນພະເຢໂຫວາເວົ້າກັບເຈົ້າແບບນີ້ບໍ? ເຖິງວ່າພະເຢໂຫວາບໍ່ໄດ້ເວົ້າແບບນີ້ກັບເຮົາໂດຍກົງ ແຕ່ເພິ່ນເວົ້າກັບເຮົາຜ່ານທາງຄຳພີໄບເບິນ. ເຮົາຈະໄດ້ຍິນສຽງຂອງພະເຢໂຫວາເວົ້າວ່າເພິ່ນພໍໃຈເຮົາເມື່ອເຮົາອ່ານຄຳເວົ້າຂອງພະເຢຊູໃນປຶ້ມຂ່າວດີ 4 ຫົວ. (ອ່ານໂຢຮັນ 16:27) ພະເຢຊູຮຽນແບບພະເຢໂຫວາໄດ້ຢ່າງຄົບຖ້ວນ. ດັ່ງນັ້ນ ເມື່ອເຮົາອ່ານເລື່ອງຂອງພະເຢຊູທີ່ເພິ່ນສະແດງໃຫ້ເຫັນວ່າເພິ່ນພໍໃຈພວກລູກສິດເຖິງວ່າເຂົາເຈົ້າບໍ່ສົມບູນແບບ ເຮົາກໍນຶກພາບອອກເລີຍວ່າພະເຢໂຫວາກໍຮູ້ສຶກແບບນີ້ກັບເຮົາຄືກັນ.—ຢຮ. 15:9, 15
ມີຫຼາຍວິທີທີ່ພະເຢໂຫວາສະແດງໃຫ້ເຫັນວ່າເພິ່ນພໍໃຈເຮົາ (ເບິ່ງຂໍ້ 10)
11. ເປັນຫຍັງເມື່ອເຮົາເຈິຄວາມຍາກລຳບາກບໍ່ໄດ້ໝາຍຄວາມວ່າພະເຢໂຫວາບໍ່ພໍໃຈເຮົາແລ້ວ? (ຢາໂກໂບ 1:12)
11 ໂດຍທາງການກະທຳ. ພະເຢໂຫວາພ້ອມຈະຊ່ວຍເຮົາສະເໝີ ເຊັ່ນ ເພິ່ນຊ່ວຍເຮົາໃຫ້ມີສິ່ງຈຳເປັນໃນຊີວິດ. ແຕ່ບາງເທື່ອພະເຢໂຫວາຍອມໃຫ້ສິ່ງທີ່ບໍ່ດີເກີດຂຶ້ນກັບເຮົາຄືກັບທີ່ເພິ່ນຍອມໃຫ້ເກີດຂຶ້ນກັບໂຢບ. (ໂຢບ 1:8-11) ເມື່ອເຮົາເຈິເລື່ອງແບບນີ້ບໍ່ໄດ້ໝາຍຄວາມວ່າພະເຢໂຫວາບໍ່ພໍໃຈເຮົາແລ້ວ. ແຕ່ເປັນໂອກາດທີ່ເຮົາຈະສະແດງໃຫ້ເຫັນວ່າເຮົາຮັກພະເຢໂຫວາແລະໄວ້ໃຈເພິ່ນຫຼາຍສ່ຳໃດ. (ອ່ານຢາໂກໂບ 1:12) ເມື່ອເຮົາເຈິຄວາມຍາກລຳບາກ ເຮົາຈະເຫັນວ່າພະເຢໂຫວາເບິ່ງແຍງແລະຊ່ວຍເຫຼືອເຮົາໃຫ້ອົດທົນຕໍ່ໆໄປໄດ້.
12. ເຮົາຮຽນຫຍັງຈາກເລື່ອງຂອງດິມິຕຣີ?
12 ໃຫ້ເຮົາເບິ່ງເລື່ອງຂອງພີ່ນ້ອງຊາຍຄົນໜຶ່ງຊື່ດິມິຕຣີທີ່ຢູ່ອາຊີ. ລາວຕົກວຽກແລະຊອກວຽກບໍ່ໄດ້ຫຼາຍເດືອນ. ລາວຈຶ່ງຕັດສິນໃຈວ່າຈະເຮັດວຽກປະກາດຫຼາຍຂຶ້ນເພື່ອສະແດງວ່າລາວໄວ້ໃຈພະເຢໂຫວາ. ຫຼາຍເດືອນຜ່ານໄປລາວກໍຍັງຊອກວຽກບໍ່ໄດ້. ແລ້ວຕໍ່ມາລາວກໍບໍ່ສະບາຍແຮງຈົນລຸກໄປໃສບໍ່ໄດ້. ລາວເລີ່ມຄິດວ່າໂຕເອງບໍ່ໄດ້ເປັນຜົວແລະບໍ່ໄດ້ເປັນພໍ່ທີ່ດີ ແລະເລີ່ມສົງໄສວ່າພະເຢໂຫວາຍັງພໍໃຈລາວຢູ່ບໍ? ຕອນແລງມື້ໜຶ່ງ ລູກສາວຂອງລາວໄດ້ພິມຂໍ້ຄຳພີໃນເອຊາຢາ 30:15 ໃສ່ເຈ້ຍ ຂໍ້ນັ້ນເວົ້າວ່າ: “ຖ້າພວກເຈົ້າເຮັດໃຈໃຫ້ສະຫງົບແລະໄວ້ວາງໃຈເຮົາ ພວກເຈົ້າຈະເຂັ້ມແຂງ.” ລູກສາວເອົາເຈ້ຍໃບນັ້ນໄວ້ຢູ່ຂ້າງຕຽງລາວແລ້ວເວົ້າວ່າ: “ພໍ່ ຕອນທີ່ພໍ່ຮູ້ສຶກບໍ່ດີ ໃຫ້ຈື່ຂໍ້ຄຳພີນີ້ໄວ້ເດີ້!” ດິມິຕຣີກໍຄິດໄດ້ວ່າລາວຕ້ອງຂອບໃຈພະເຢໂຫວາຍ້ອນຄອບຄົວຂອງລາວຍັງມີເຂົ້າກິນ ມີເຄື່ອງນຸ່ງໃສ່ ແລະມີເຮືອນຢູ່. ລາວເວົ້າວ່າ: “ສິ່ງທີ່ຂ້ອຍຕ້ອງເຮັດແມ່ນສະຫງົບໃຈແລະໄວ້ວາງໃຈພະເຢໂຫວາຕໍ່ໆໄປ.” ຖ້າເຈົ້າກຳລັງເຈິບັນຫາຄ້າຍຄືກັນນີ້ ໃຫ້ໝັ້ນໃຈວ່າພະເຢໂຫວາຫ່ວງໃຍເຈົ້າແລະຈະຊ່ວຍເຈົ້າໃຫ້ອົດທົນໄດ້.
ມີຫຼາຍວິທີທີ່ພະເຢໂຫວາສະແດງໃຫ້ເຫັນວ່າເພິ່ນພໍໃຈເຮົາ (ເບິ່ງຂໍ້ 12) a
13. ພະເຢໂຫວາອາດໃຊ້ໃຜແລະໂດຍວິທີໃດເພື່ອຊ່ວຍເຮົາໃຫ້ໝັ້ນໃຈວ່າເພິ່ນຍັງພໍໃຈເຮົາຢູ່?
13 ໂດຍທາງພີ່ນ້ອງ. ພະເຢໂຫວາໃຊ້ພີ່ນ້ອງເພື່ອສະແດງໃຫ້ເຫັນວ່າເພິ່ນພໍໃຈເຮົາ. ຕົວຢ່າງເຊັ່ນ: ພະເຢໂຫວາອາດກະຕຸ້ນພີ່ນ້ອງໃຫ້ເວົ້າໃຫ້ກຳລັງໃຈເຮົາຕອນທີ່ເຮົາຕ້ອງການພໍດີ. ພີ່ນ້ອງຍິງຄົນໜຶ່ງຢູ່ອາຊີເຈິເລື່ອງນີ້ດ້ວຍໂຕເອງຕອນທີ່ລາວເຄັ່ງຕຶງຫຼາຍ. ລາວຕົກວຽກແລະທັງບໍ່ສະບາຍແຮງ. ຕໍ່ມາ ຜົວຂອງລາວກໍໄດ້ເຮັດຜິດຮ້າຍແຮງແລະກໍບໍ່ໄດ້ເປັນຜູ້ເບິ່ງແຍງອີກຕໍ່ໄປ. ລາວເວົ້າວ່າ: “ຂ້ອຍບໍ່ເຂົ້າໃຈວ່າເປັນຫຍັງເລື່ອງນີ້ຈຶ່ງເກີດຂຶ້ນກັບຂ້ອຍ? ຂ້ອຍຄິດວ່າຂ້ອຍຄືຊິເຮັດຜິດບາງຢ່າງແລະເຮັດໃຫ້ພະເຢໂຫວາບໍ່ພໍໃຈ.” ພີ່ນ້ອງຍິງຄົນນີ້ຈຶ່ງອະທິດຖານຂໍພະເຢໂຫວາຊ່ວຍລາວໃຫ້ໝັ້ນໃຈວ່າເພິ່ນຍັງພໍໃຈລາວຢູ່. ພະເຢໂຫວາເຮັດແນວໃດ? ລາວເວົ້າວ່າ: “ຜູ້ເບິ່ງແຍງໃນປະຊາຄົມມາລົມກັບຂ້ອຍ ແລະຊ່ວຍຂ້ອຍໃຫ້ເຫັນວ່າພະເຢໂຫວາຍັງຮັກຂ້ອຍຢູ່.” ຜ່ານໄປໄລຍະໜຶ່ງ ລາວອະທິດຖານຫາພະເຢໂຫວາອີກເພື່ອຂໍເພິ່ນຊ່ວຍລາວໃຫ້ໝັ້ນໃຈວ່າເພິ່ນຍັງຮັກລາວຢູ່. ລາວເລົ່າຕໍ່ວ່າ: “ໃນມື້ດຽວກັນນັ້ນ ຂ້ອຍໄດ້ຮັບຈົດໝາຍຈາກພີ່ນ້ອງໃນປະຊາຄົມ. ຕອນທີ່ຂ້ອຍອ່ານຈົດໝາຍຂອງເຂົາເຈົ້າ ຂ້ອຍຮູ້ສຶກເລີຍວ່າພະເຢໂຫວາຟັງຄຳອະທິດຖານຂອງຂ້ອຍແທ້ໆ.” ຈາກເລື່ອງນີ້ເຮົາເຫັນໄດ້ວ່າພະເຢໂຫວາໃຊ້ພີ່ນ້ອງໃຫ້ກຳລັງໃຈເຮົາເພື່ອຊ່ວຍເຮົາໃຫ້ໝັ້ນໃຈວ່າເພິ່ນຍັງພໍໃຈເຮົາຢູ່.—ພສ. 10:17
ມີຫຼາຍວິທີທີ່ພະເຢໂຫວາສະແດງໃຫ້ເຫັນວ່າເພິ່ນພໍໃຈເຮົາ (ເບິ່ງຂໍ້ 13) b
14. ອີກວິທີໜຶ່ງທີ່ພະເຢໂຫວາເຮັດໃຫ້ເຫັນວ່າເພິ່ນພໍໃຈເຮົາແມ່ນຫຍັງ?
14 ອີກວິທີໜຶ່ງທີ່ພະເຢໂຫວາເຮັດໃຫ້ເຫັນວ່າເພິ່ນພໍໃຈເຮົາແມ່ນເພິ່ນໃຊ້ພີ່ນ້ອງເພື່ອໃຫ້ຄຳແນະນຳເຮົາຕອນທີ່ເຮົາຈຳເປັນຕ້ອງໄດ້ຮັບ. ຕົວຢ່າງເຊັ່ນ: ໃນສະຕະວັດທຳອິດ ພະເຢໂຫວາໄດ້ໃຊ້ໂປໂລໃຫ້ຂຽນຈົດໝາຍ 14 ສະບັບໄປຫາພີ່ນ້ອງ. ຈົດໝາຍເຫຼົ່ານັ້ນມີຄຳແນະນຳທີ່ກົງໆ ແຕ່ກໍສະແດງເຖິງຄວາມຮັກ. ເປັນຫຍັງພະເຢໂຫວາຈຶ່ງໃຫ້ໂປໂລຂຽນຈົດໝາຍເຫຼົ່ານັ້ນ? ຍ້ອນພະເຢໂຫວາເປັນພໍ່ທີ່ດີ ແລະເພິ່ນສອນລູກຂອງເພິ່ນ “ຄືກັບພໍ່ຕັກເຕືອນລູກທີ່ຮັກ.” (ສພສ. 3:11, 12) ດັ່ງນັ້ນ ຖ້າເຮົາໄດ້ຮັບຄຳແນະນຳທີ່ມາຈາກຄຳພີໄບເບິນບໍ່ໄດ້ໝາຍຄວາມວ່າພະເຢໂຫວາບໍ່ພໍໃຈເຮົາ ແຕ່ສະແດງໃຫ້ເຫັນວ່າເພິ່ນຮັກເຮົາ. (ຮຣ. 12:6) ຍັງມີຫຍັງອີກທີ່ສະແດງວ່າພະເຢໂຫວາພໍໃຈເຮົາ?
ຫຼັກຖານອີກຢ່າງໜຶ່ງທີ່ສະແດງວ່າພະເຢໂຫວາພໍໃຈເຮົາ
15. ພະເຢໂຫວາໃຫ້ພະລັງບໍລິສຸດກັບໃຜ? ແລະການທີ່ເພິ່ນເຮັດແບບນີ້ເຮັດໃຫ້ເຮົາໝັ້ນໃຈໃນເລື່ອງໃດ?
15 ພະເຢໂຫວາໃຫ້ພະລັງບໍລິສຸດກັບຄົນທີ່ເພິ່ນພໍໃຈ. (ມທ. 12:18) ໃຫ້ຖາມໂຕເອງວ່າ: ‘ຂ້ອຍໄດ້ສະແດງຜົນທີ່ເກີດຈາກພະລັງຂອງພະເຈົ້າໃນຊີວິດບໍ?’ ເຈົ້າສັງເກດບໍວ່າເຈົ້າອົດທົນກັບຄົນອື່ນໄດ້ຫຼາຍກວ່າຕອນທີ່ເຈົ້າບໍ່ຮູ້ຈັກພະເຢໂຫວາ? ທີ່ຈິງ ແຮ່ງເຈົ້າສະແດງຜົນທີ່ເກີດຈາກພະລັງຂອງພະເຈົ້າຫຼາຍສ່ຳໃດ ມັນກໍແຮ່ງເປັນຫຼັກຖານທີ່ສະແດງໃຫ້ເຫັນວ່າພະເຢໂຫວາພໍໃຈເຈົ້າ! ເບິ່ງຂອບ “ ຜົນທີ່ເກີດຈາກພະລັງຂອງພະເຈົ້າແມ່ນ . . . ”
ເຈົ້າເຫັນຫຼັກຖານຫຍັງທີ່ສະແດງວ່າພະເຢໂຫວາພໍໃຈເຈົ້າ? (ເບິ່ງຂໍ້ 15)
16. ພະເຢໂຫວາໃຊ້ໃຜໃຫ້ປະກາດຂ່າວດີ? ແລະເລື່ອງນີ້ເຮັດໃຫ້ເຈົ້າຮູ້ສຶກແນວໃດ? (1 ເທຊະໂລນິກ 2:4)
16 ພະເຢໂຫວາໃຫ້ຄົນທີ່ເພິ່ນພໍໃຈໄດ້ປະກາດຂ່າວດີ. (ອ່ານ 1 ເທຊະໂລນິກ 2:4) ພີ່ນ້ອງຍິງຄົນໜຶ່ງຊື່ໂຈເຊລິນໄດ້ຮັບປະໂຫຍດແນວໃດຈາກການປະກາດຂ່າວດີກັບຄົນອື່ນ. ມີມື້ໜຶ່ງ ໂຈເຊລິນຕື່ນຂຶ້ນມາແລ້ວຮູ້ສຶກເສົ້າຫຼາຍ. ລາວເວົ້າວ່າ: “ຂ້ອຍຮູ້ສຶກຄືກັບວ່າບໍ່ມີຫຍັງທີ່ຈະໃຫ້ພະເຢໂຫວາເລີຍ! ແຕ່ຂ້ອຍເປັນໄພໂອເນຍ ແລະມື້ນັ້ນເປັນມື້ທີ່ຂ້ອຍຕ້ອງອອກໄປປະກາດ. ຂ້ອຍຈຶ່ງອະທິດຖານແລ້ວກໍອອກໄປປະກາດ.” ຕອນເຊົ້າມື້ນັ້ນໂຈເຊລິນເຈິກັບຜູ້ຍິງທີ່ໃຈດີຄົນໜຶ່ງຊື່ແມຣີ້ ແລະລາວຕົກລົງຮຽນຄຳພີໄບເບິນກັບໂຈເຊລິນ. ຫຼາຍເດືອນຕໍ່ມາແມຣີ້ເວົ້າວ່າ ລາວກຳລັງອະທິດຖານຂໍໃຫ້ພະເຈົ້າຊ່ວຍຕອນທີ່ໂຈເຊລິນມາເຄາະປະຕູເຮືອນ. ເມື່ອຄິດເຖິງປະສົບການນີ້ ໂຈເຊລິນເວົ້າວ່າ: “ຂ້ອຍຮູ້ສຶກຄືກັບພະເຢໂຫວາກຳລັງບອກຂ້ອຍວ່າ: ‘ເຮົາພໍໃຈເຈົ້າ.’ ” ກະແມ່ນຢູ່ວ່າບໍ່ແມ່ນທຸກຄົນຈະຟັງເລື່ອງທີ່ເຮົາປະກາດ ແຕ່ເຮົາໝັ້ນໃຈໄດ້ວ່າພະເຢໂຫວາພໍໃຈເຮົາເມື່ອເຮົາພະຍາຍາມສຸດຄວາມສາມາດທີ່ຈະບອກຄົນອື່ນເລື່ອງຂ່າວດີ.
ເຈົ້າເຫັນຫຼັກຖານຫຍັງທີ່ສະແດງວ່າພະເຢໂຫວາພໍໃຈເຈົ້າ? (ເບິ່ງຂໍ້ 16) c
17. ເຈົ້າຮຽນຫຍັງຈາກຄຳເວົ້າຂອງວິກກີ້ກ່ຽວກັບຄ່າໄຖ່? (ເພງສັນລະເສີນ 5:12)
17 ພະເຢໂຫວາໃຊ້ຄຸນຄ່າຂອງຄ່າໄຖ່ກັບຜູ້ທີ່ເພິ່ນພໍໃຈ. (1ຕມ. 2:5, 6) ແຕ່ຖ້າໃຈເຮົາຍັງບໍ່ເຊື່ອເດວ່າພະເຢໂຫວາພໍໃຈເຮົາທັງໆທີ່ເຮົາມີຄວາມເຊື່ອໃນຄ່າໄຖ່ແລະຮັບບັບເຕມາແລ້ວ? ໃຫ້ຈື່ໄວ້ວ່າເຮົາໄວ້ໃຈຄວາມຮູ້ສຶກຂອງໂຕເອງບໍ່ໄດ້ຕະຫຼອດ ແຕ່ເຮົາໄວ້ໃຈພະເຢໂຫວາໄດ້. ເພິ່ນຖືວ່າຄົນທີ່ເຊື່ອໃນຄ່າໄຖ່ເປັນຄົນທີ່ເຮັດສິ່ງທີ່ຖືກຕ້ອງ ແລະເພິ່ນສັນຍາວ່າຈະອວຍພອນເຂົາເຈົ້າ. (ອ່ານເພງສັນລະເສີນ 5:12; ຣມ. 3:26) ພີ່ນ້ອງຍິງຄົນໜຶ່ງຊື່ວິກກີ້ເຫັນວ່າການຄິດເຖິງເລື່ອງຄ່າໄຖ່ຊ່ວຍລາວໄດ້ຫຼາຍ. ມື້ໜຶ່ງ ຫຼັງຈາກທີ່ຄິດຕຶກຕອງຢ່າງເລິກເຊິ່ງກ່ຽວກັບຄ່າໄຖ່ ລາວເວົ້າວ່າ: “ພະເຢໂຫວາອົດທົນກັບຂ້ອຍມາຕະຫຼອດ. . . . ແຕ່ຂ້ອຍພັດບອກເພິ່ນວ່າ: ‘ຄວາມຮັກທີ່ພະອົງໃຫ້ຂ້ອຍຍັງບໍ່ຫຼາຍພໍ. ຄ່າໄຖ່ຂອງລູກຊາຍພະອົງທີ່ໃຫ້ຂ້ອຍກໍຍັງບໍ່ພໍຈະລົບລ້າງຄວາມຜິດທີ່ຂ້ອຍເຮັດ.’ ” ການຄິດຕຶກຕອງກ່ຽວກັບຄ່າໄຖ່ເຮັດໃຫ້ວິກກີ້ເລີ່ມຮູ້ສຶກວ່າພະເຢໂຫວາຮັກລາວ. ເຮົາກໍຄືກັນ ເມື່ອເຮົາຄິດຕຶກຕອງກ່ຽວກັບຄ່າໄຖ່ ເຮົາກໍຈະຮູ້ສຶກວ່າພະເຢໂຫວາຮັກແລະພໍໃຈເຮົາ.
ເຈົ້າເຫັນຫຼັກຖານຫຍັງທີ່ສະແດງວ່າພະເຢໂຫວາພໍໃຈເຈົ້າ? (ເບິ່ງຂໍ້ 17)
18. ຖ້າເຮົາຮັກພະເຢໂຫວາຕໍ່ໆໄປ ເຮົາໝັ້ນໃຈໄດ້ໃນເລື່ອງໃດ?
18 ເຖິງວ່າເຮົາພະຍາຍາມຫຼາຍແລ້ວທີ່ຈະເຮັດຕາມສິ່ງທີ່ໄດ້ຮຽນໃນບົດຄວາມນີ້ ແຕ່ບາງເທື່ອເຮົາອາດຮູ້ສຶກທໍ້ໃຈແລະສົງໄສວ່າພະເຢໂຫວາພໍໃຈເຮົາຢູ່ບໍ? ຖ້າຮູ້ສຶກແບບນັ້ນ ຂໍໃຫ້ຈື່ໄວ້ວ່າພະເຢໂຫວາພໍໃຈ “ຄົນທີ່ຮັກເພິ່ນ.” (ຢກບ. 1:12) ດັ່ງນັ້ນ ໃຫ້ເຈົ້າພະຍາຍາມທີ່ຈະສະໜິດກັບພະເຢໂຫວາ ແລະໃຫ້ສັງເກດເບິ່ງວ່າເພິ່ນສະແດງໃຫ້ເຫັນແນວໃດວ່າເພິ່ນພໍໃຈເຈົ້າ. ໃຫ້ຈື່ໄວ້ວ່າພະເຢໂຫວາ “ບໍ່ໄດ້ຢູ່ໄກຈາກພວກເຮົາແຕ່ລະຄົນ.”—ກຈກ. 17:27
ເຈົ້າຈະຕອບແນວໃດ?
-
ເປັນຫຍັງບາງຄົນຈຶ່ງຮູ້ສຶກວ່າພະເຢໂຫວາບໍ່ພໍໃຈເຂົາເຈົ້າ?
-
ມີວິທີໃດແດ່ທີ່ສະແດງໃຫ້ເຫັນວ່າພະເຢໂຫວາພໍໃຈເຮົາ?
-
ອັນໃດເຮັດໃຫ້ເຮົາໝັ້ນໃຈວ່າພະເຢໂຫວາພໍໃຈເຮົາ?
ເພງທີ 88 ຂໍໃຫ້ເຮົາຮູ້ທາງຂອງພະອົງ
