ບົດຄວາມສຶກສາທີ 9
ເພງທີ 75 “ຂ້ອຍຢູ່ນີ້ຂໍສົ່ງຂ້ອຍໄປ!”
ເຈົ້າພ້ອມແລ້ວບໍທີ່ຈະອຸທິດໂຕໃຫ້ພະເຢໂຫວາ?
“ຂ້ອຍຈະຕອບແທນພະເຢໂຫວາແນວໃດສຳລັບສິ່ງດີໆທຸກຢ່າງທີ່ເພິ່ນເຮັດເພື່ອຂ້ອຍ?”—ພສ. 116:12
ຈຸດສຳຄັນ
ບົດຄວາມນີ້ຈະຊ່ວຍເຈົ້າໃຫ້ສະໜິດກັບພະເຢໂຫວາເພື່ອເຈົ້າຢາກຈະອຸທິດໂຕໃຫ້ເພິ່ນແລະຮັບບັບເຕມາ.
1-2. ຖ້າຢາກຮັບບັບເຕມາ ເຮົາຕ້ອງເຮັດຫຍັງກ່ອນ?
ໃນໄລຍະ 5 ປີຜ່ານມາມີຫຼາຍກວ່າໜຶ່ງລ້ານຄົນທີ່ຮັບບັບເຕມາແລະເຂົ້າມາເປັນພະຍານພະເຢໂຫວາ. ເຂົາເຈົ້າບາງຄົນເປັນຄືກັບຕີໂມທຽວທີ່ມີຊີວິດຢູ່ໃນສະຕະວັດທຳອິດທີ່ໄດ້ຮຽນຄວາມຈິງຕັ້ງແຕ່ເປັນ “ແອນ້ອຍ.” (2ຕມ. 3:14, 15, ໄຂເງື່ອນ) ບາງຄົນໄດ້ຮູ້ຈັກພະເຢໂຫວາຕອນທີ່ໃຫຍ່ຫຼືຕອນທີ່ເຖົ້າແລ້ວ. ຫຼາຍປີມາແລ້ວ ມີຜູ້ຍິງຄົນໜຶ່ງຮຽນຄຳພີໄບເບິນກັບພະຍານພະເຢໂຫວາແລະຮັບບັບເຕມາຕອນອາຍຸ 97 ປີ.
2 ຖ້າເຈົ້າກຳລັງຮຽນຄຳພີໄບເບິນຫຼືໃຫຍ່ມາໃນຄອບຄົວທີ່ເປັນພະຍານພະເຢໂຫວາ ເຈົ້າກຳລັງຄິດທີ່ຈະຮັບບັບເຕມາບໍ? ຖ້າແມ່ນ ນັ້ນເປັນເປົ້າໝາຍທີ່ດີຫຼາຍ. ແຕ່ກ່ອນຈະຮັບບັບເຕມາ ເຈົ້າຕ້ອງອຸທິດໂຕໃຫ້ພະເຢໂຫວາກ່ອນ. ບົດຄວາມນີ້ຈະຊ່ວຍໃຫ້ຮູ້ວ່າການອຸທິດໂຕແມ່ນຫຍັງ ແລະຍັງຈະຊ່ວຍໃຫ້ເຫັນວ່າເປັນຫຍັງເຈົ້າຈຶ່ງບໍ່ຕ້ອງຢ້ານທີ່ຈະອຸທິດໂຕໃຫ້ພະເຢໂຫວາແລະຮັບບັບເຕມາເມື່ອເຈົ້າພ້ອມທີ່ຈະເຮັດແບບນັ້ນ.
ການອຸທິດໂຕແມ່ນຫຍັງ?
3. ມີຕົວຢ່າງຂອງໃຜແດ່ທີ່ອຸທິດໂຕໃຫ້ພະເຢໂຫວາ?
3 ໃນຄຳພີໄບເບິນ ການອຸທິດໂຕໝາຍເຖິງການແຍກໄວ້ຕ່າງຫາກເພື່ອຈຸດປະສົງພິເສດ. ຊາດອິດສະຣາເອນເປັນຊາດທີ່ອຸທິດໂຕໃຫ້ພະເຢໂຫວາຢູ່ແລ້ວ ແຕ່ກໍມີບາງຄົນໃນຊາດນີ້ໄດ້ອຸທິດໂຕໃຫ້ພະເຢໂຫວາໃນຮູບແບບພິເສດ ຕົວຢ່າງເຊັ່ນ: ອາໂຣນມີ “ເຄື່ອງໝາຍບໍລິສຸດທີ່ສະແດງເຖິງການອຸທິດໂຕ” ເຊິ່ງກໍຄືແຜ່ນຄຳທີ່ເຫຼື້ອມໆງາມໆຕິດຢູ່ທາງໜ້າຜ້າຄຽນຫົວ. ແຜ່ນຄຳນີ້ເຮັດໃຫ້ຮູ້ວ່າອາໂຣນຖືກແຍກໄວ້ຕ່າງຫາກເພື່ອເຮັດວຽກຮັບໃຊ້ໃນຮູບແບບພິເສດ ເຊິ່ງກໍຄືເປັນປະໂລຫິດໃຫຍ່ຂອງຊາດອິດສະຣາເອນ. (ລລວ. 8:9) ນອກຈາກນັ້ນ ຄົນທີ່ເປັນນາຊີຣີກໍອຸທິດໂຕໃຫ້ພະເຢໂຫວາໃນຮູບແບບພິເສດຄືກັນ. ຄຳວ່າ “ນາຊີຣີ” ມາຈາກຄຳພາສາເຮັບເຣີ “ນາຊີ” ເຊິ່ງໝາຍເຖິງ “ຄົນທີ່ແຍກໂຕຢູ່ຕ່າງຫາກ” ຫຼື “ຄົນທີ່ອຸທິດໂຕໄວ້.” ຄົນທີ່ເປັນນາຊີຣີຕ້ອງເຊື່ອຟັງຂໍ້ຫ້າມພິເສດບາງຂໍ້ທີ່ຢູ່ໃນກົດໝາຍຂອງໂມເຊ.—ຈຊບ. 6:2-8
4. (ກ) ເມື່ອເຈົ້າອຸທິດໂຕໃຫ້ພະເຢໂຫວາ ອັນໃດເປັນສິ່ງສຳຄັນທີ່ສຸດໃນຊີວິດຂອງເຈົ້າ? (ຂ) ການ “ເຊົາໃຊ້ຊີວິດເພື່ອໂຕເອງ” ໝາຍຄວາມວ່າແນວໃດ? (ເບິ່ງຮູບນຳ)
4 ເມື່ອເຈົ້າອຸທິດໂຕໃຫ້ພະເຢໂຫວາກໍໝາຍຄວາມວ່າເຈົ້າເລືອກທີ່ຈະເປັນລູກສິດຂອງພະເຢຊູແລະໃຫ້ຄວາມຕ້ອງການຂອງພະເຢໂຫວາສຳຄັນທີ່ສຸດໃນຊີວິດຂອງເຈົ້າ. ການອຸທິດໂຕຂອງຄລິດສະຕຽນລວມເຖິງຫຍັງອີກ? ພະເຢຊູບອກວ່າ: “ຖ້າຜູ້ໃດຢາກຕິດຕາມຂ້ອຍ ກໍໃຫ້ຜູ້ນັ້ນເຊົາໃຊ້ຊີວິດເພື່ອໂຕເອງ.” (ມທ. 16:24) ຄຳພາສາກຣີກທີ່ບອກວ່າ: “ເຊົາໃຊ້ຊີວິດເພື່ອໂຕເອງ” ຍັງອາດໝາຍຄວາມວ່າ “ໃຫ້ລາວບອກວ່າບໍ່ກັບຄວາມຕ້ອງການຂອງໂຕເອງ.” ເມື່ອເຈົ້າອຸທິດໂຕໃຫ້ພະເຢໂຫວາ ເຈົ້າຕ້ອງບອກວ່າ “ບໍ່” ກັບທຸກສິ່ງທີ່ຂັດກັບຄວາມຕ້ອງການຂອງພະເຢໂຫວາ. (2ກຣ. 5:14, 15) ເລື່ອງນີ້ລວມເຖິງການບໍ່ເຮັດຕາມ “ຄວາມຕ້ອງການຂອງຄົນທີ່ບໍ່ສົມບູນແບບ” ເຊັ່ນ ການເຮັດຜິດສິນລະທຳທາງເພດ. (ຄລຕ. 5:19-21; 1ກຣ. 6:18) ການເຮັດຕາມຄຳສັ່ງເຫຼົ່ານີ້ເຮັດໃຫ້ຊີວິດຂອງເຈົ້າຫຍຸ້ງຍາກບໍ? ບໍ່ຍາກ ຖ້າເຈົ້າຮັກພະເຢໂຫວາແລະໝັ້ນໃຈວ່າກົດໝາຍຂອງເພິ່ນເປັນປະໂຫຍດຕໍ່ເຈົ້າ. (ພສ. 119:97; ອຊຢ. 48:17, 18) ພີ່ນ້ອງນິໂຄລັດສ໌ເວົ້າວ່າ: “ເຈົ້າຈະເບິ່ງວ່າມາດຕະຖານຂອງພະເຢໂຫວາເປັນຄືກັບຄຸກທີ່ຂັງເຈົ້າໄວ້ບໍ່ໃຫ້ເຮັດຕາມໃຈໂຕເອງ ຫຼືເຈົ້າຈະເບິ່ງວ່າມັນເປັນຄືກັບແນວຂັ້ນລະຫວ່າງເຈົ້າກັບໂຕສິງເພື່ອປ້ອງກັນເຈົ້າໄວ້ບໍ່ໃຫ້ສິງກິນ?”
ເຈົ້າຈະເບິ່ງວ່າມາດຕະຖານຂອງພະເຢໂຫວາເປັນຄືກັບຄຸກທີ່ຂັງເຈົ້າໄວ້ບໍ່ໃຫ້ເຮັດຕາມໃຈໂຕເອງ ຫຼືເຈົ້າຈະເບິ່ງວ່າມັນເປັນຄືກັບແນວຂັ້ນລະຫວ່າງເຈົ້າກັບໂຕສິງເພື່ອປ້ອງກັນເຈົ້າໄວ້ບໍ່ໃຫ້ສິງກິນ? (ເບິ່ງຂໍ້ 4)
5. (ກ) ເຈົ້າຈະອຸທິດໂຕໃຫ້ພະເຢໂຫວາແນວໃດ? (ຂ) ການອຸທິດໂຕແລະການຮັບບັບເຕມາຕ່າງກັນແນວໃດ? (ເບິ່ງຮູບນຳ)
5 ເຈົ້າຈະອຸທິດໂຕໃຫ້ພະເຢໂຫວາແນວໃດ? ເຈົ້າອຸທິດໂຕໂດຍອະທິດຖານສັນຍາວ່າຈະນະມັດສະການພະເຢໂຫວາຜູ້ດຽວແລະສັນຍາວ່າຈະໃຫ້ຄວາມຕ້ອງການຂອງເພິ່ນເປັນສິ່ງສຳຄັນທີ່ສຸດໃນຊີວິດຂອງເຈົ້າ. ເຈົ້າສັນຍາກັບພະເຢໂຫວາວ່າຈະຮັກເພິ່ນ “ສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງຂອງເຈົ້າ.” (ມຣກ. 12:30) ການອຸທິດໂຕແມ່ນການອະທິດຖານເປັນສ່ວນໂຕລະຫວ່າງເຈົ້າກັບພະເຢໂຫວາ. ແຕ່ການຮັບບັບເຕມາແມ່ນການບອກໃຫ້ຄົນອື່ນຮູ້ວ່າເຈົ້າໄດ້ອຸທິດໂຕໃຫ້ພະເຢໂຫວາແລ້ວ. ຕອນທີ່ອຸທິດໂຕ ເຈົ້າໄດ້ເຮັດສັນຍາທີ່ສຳຄັນຫຼາຍກັບພະເຢໂຫວາ. ດັ່ງນັ້ນ ເຈົ້າຕ້ອງຮັກສາສັນຍາ ແລະເພິ່ນກໍຄາດໝາຍໃຫ້ເຈົ້າຮັກສາສັນຍານັ້ນ.—ປຍຈ. 5:4, 5
ການອຸທິດໂຕແມ່ນການອະທິດຖານເປັນສ່ວນໂຕລະຫວ່າງເຈົ້າກັບພະເຢໂຫວາ. ເຈົ້າສັນຍາກັບເພິ່ນວ່າເຈົ້າຈະນະມັດສະການເພິ່ນຜູ້ດຽວແລະຈະໃຫ້ຄວາມຕ້ອງການຂອງເພິ່ນເປັນສິ່ງສຳຄັນທີ່ສຸດໃນຊີວິດຂອງເຈົ້າ. (ເບິ່ງຂໍ້ 5)
ເປັນຫຍັງເຈົ້າຕ້ອງອຸທິດໂຕໃຫ້ພະເຢໂຫວາ?
6. ອັນໃດກະຕຸ້ນເຮົາໃຫ້ອຸທິດໂຕໃຫ້ພະເຢໂຫວາ?
6 ເຫດຜົນສຳຄັນທີ່ສຸດທີ່ເຈົ້າອຸທິດໂຕໃຫ້ພະເຢໂຫວາແມ່ນຍ້ອນເຈົ້າຮັກເພິ່ນ. ຄວາມຮັກນີ້ບໍ່ໄດ້ເປັນພຽງຄວາມຮູ້ສຶກເທົ່ານັ້ນ ແຕ່ມາຈາກ “ຄວາມຮູ້ທີ່ຖືກຕ້ອງ” ແລະ “ຄວາມເຂົ້າໃຈທີ່ເກີດຈາກພະລັງຂອງພະເຈົ້າ.” (ກລຊ. 1:9) ສິ່ງທີ່ເຈົ້າໄດ້ຮຽນກ່ຽວກັບພະເຢໂຫວາເຮັດໃຫ້ເຈົ້າຮັກເພິ່ນຫຼາຍຂຶ້ນເລື້ອຍໆ. ເຈົ້າໄດ້ຮຽນຄຳພີໄບເບິນຈົນໝັ້ນໃຈວ່າ (1) ພະເຢໂຫວາມີຢູ່ແທ້ (2) ຄຳພີໄບເບິນເປັນປຶ້ມທີ່ມາຈາກພະເຈົ້າ ແລະ (3) ພະເຢໂຫວາໃຊ້ອົງການຂອງເພິ່ນເພື່ອເຮັດໃຫ້ຄວາມຕ້ອງການຂອງເພິ່ນເກີດຂຶ້ນແທ້.
7. ກ່ອນຈະອຸທິດໂຕໃຫ້ພະເຢໂຫວາ ເຮົາຕ້ອງເຮັດຫຍັງ?
7 ຄົນທີ່ອຸທິດໂຕໃຫ້ພະເຢໂຫວາຕ້ອງເຂົ້າໃຈຄຳສອນພື້ນຖານໃນຄຳພີໄບເບິນແລະຕ້ອງໃຊ້ຊີວິດຕາມມາດຕະຖານຂອງພະເຢໂຫວາ. ນອກຈາກນັ້ນ ເຂົາເຈົ້າພະຍາຍາມເຕັມທີທີ່ຈະບອກຄົນອື່ນກ່ຽວກັບສິ່ງທີ່ໄດ້ຮຽນໃນຄຳພີໄບເບິນ. (ມທ. 28:19, 20) ແຮ່ງເຂົາເຈົ້າຮັກພະເຢໂຫວາ ເຂົາເຈົ້າກໍແຮ່ງຈະນະມັດສະການເພິ່ນຜູ້ດຽວ. ເຈົ້າຮູ້ສຶກແບບນີ້ຄືກັນບໍ? ຖ້າເຈົ້າຮັກພະເຢໂຫວາສຸດຫົວໃຈ ເຈົ້າຈະບໍ່ອຸທິດໂຕແລະຮັບບັບເຕມາເພື່ອເຮັດໃຫ້ຜູ້ສອນຫຼືພໍ່ແມ່ຂອງເຈົ້າດີໃຈ ຫຼືເຮັດຕາມທີ່ໝູ່ເຮັດຊື່ໆ.
8. ຄວາມຮູ້ຄຸນຄ່າຊ່ວຍເຈົ້າແນວໃດໃຫ້ຢາກອຸທິດໂຕໃຫ້ພະເຢໂຫວາ? (ເພງສັນລະເສີນ 116:12-14)
8 ເມື່ອເຈົ້າຄິດເຖິງທຸກສິ່ງທີ່ພະເຢໂຫວາເຮັດເພື່ອເຈົ້າ ເຈົ້າກໍຮູ້ສຶກເຫັນຄ່າແລະຢາກອຸທິດໂຕໃຫ້ເພິ່ນ. (ອ່ານເພງສັນລະເສີນ 116:12-14) ຄຳພີໄບເບິນບອກວ່າ ພະເຢໂຫວາໃຫ້ “ສິ່ງດີໆແລະຂອງຂວັນພິເສດທຸກຢ່າງ.” (ຢກບ. 1:17) ຂອງຂວັນທີ່ມີຄ່າທີ່ສຸດທີ່ພະເຢໂຫວາໃຫ້ເຈົ້າແມ່ນ ເພິ່ນໃຫ້ພະເຢຊູລູກຊາຍຂອງເພິ່ນມາເປັນຄ່າໄຖ່. ໃຫ້ຄິດເບິ່ງວ່າຂອງຂວັນນີ້ພິເສດຫຼາຍສ່ຳໃດ. ຄ່າໄຖ່ຊ່ວຍເຈົ້າໃຫ້ໃກ້ຊິດກັບພະເຢໂຫວາແລະຊ່ວຍເຈົ້າໃຫ້ມີຄວາມຫວັງທີ່ຈະມີຊີວິດຕະຫຼອດໄປ. (1ຢຮ. 4:9, 10, 19) ດັ່ງນັ້ນ ການອຸທິດໂຕໃຫ້ພະເຢໂຫວາຈຶ່ງເປັນວິທີໜຶ່ງທີ່ດີທີ່ສຸດທີ່ສະແດງວ່າເຈົ້າຢາກຂອບໃຈເພິ່ນທີ່ເພິ່ນຮັກແລະໃຫ້ສິ່ງດີໆຫຼາຍຢ່າງກັບເຈົ້າ. (ພບຍ. 16:17; 2ກຣ. 5:15) ມີການເວົ້າເຖິງເລື່ອງນີ້ໃນປຶ້ມຊີວິດທີ່ມີຄວາມສຸກຕະຫຼອດໄປ! ບົດ 46 ຂໍ້ 4 ເຊິ່ງມີວິດີໂອທີ່ຊື່ວ່າໃຫ້ຂອງຂວັນທີ່ເຈົ້າມີກັບພະເຈົ້າ.
ເຈົ້າພ້ອມແລ້ວບໍທີ່ຈະອຸທິດໂຕແລະຮັບບັບເຕມາ?
9. ເປັນຫຍັງເຮົາບໍ່ຄວນຮູ້ສຶກວ່າຖືກກົດດັນໃຫ້ອຸທິດໂຕ?
9 ເຈົ້າອາດຄິດວ່າຍັງບໍ່ພ້ອມທີ່ຈະອຸທິດໂຕແລະຮັບບັບເຕມາ. ບາງເທື່ອເຈົ້າອາດຮູ້ສຶກວ່າຍັງຕ້ອງປ່ຽນແປງໂຕເອງເພື່ອຈະເຮັດຕາມມາດຕະຖານຂອງພະເຢໂຫວາ ຫຼືເຈົ້າອາດຕ້ອງການເວລາຕື່ມອີກເພື່ອຈະເຮັດໃຫ້ຄວາມເຊື່ອເຂັ້ມແຂງຂຶ້ນ. (ກລຊ. 2:6, 7) ນັກສຶກສາຄຳພີໄບເບິນແຕ່ລະຄົນກ້າວໜ້າບໍ່ເທົ່າກັນ. ເດັກນ້ອຍແລະໄວລຸ້ນແຕ່ລະຄົນກໍບໍ່ໄດ້ພ້ອມທີ່ຈະອຸທິດໂຕແລະຮັບບັບເຕມາຕອນອາຍຸສ່ຳກັນ. ດັ່ງນັ້ນ ໃຫ້ເຈົ້າສັງເກດເບິ່ງວ່າໂຕເອງກ້າວໜ້າຮອດໃສແລ້ວ ແລະມີຫຍັງອີກທີ່ເຈົ້າຕ້ອງປັບປຸງ ແລະບໍ່ຕ້ອງສົມທຽບໂຕເອງກັບຄົນອື່ນ.—ຄລຕ. 6:4, 5
10. ຖ້າເຈົ້າເຫັນວ່າໂຕເອງຍັງບໍ່ພ້ອມທີ່ຈະອຸທິດໂຕແລະຮັບບັບເຕມາ ເຈົ້າຄວນເຮັດຫຍັງ? (ເບິ່ງຂອບ “ ສຳລັບຄົນທີ່ໃຫຍ່ມາໃນຄອບຄົວທີ່ເປັນພະຍານພະເຢໂຫວາ” ນຳ)
10 ເຖິງວ່າເຈົ້າເຫັນແລ້ວວ່າໂຕເອງບໍ່ພ້ອມແທ້ໆທີ່ຈະອຸທິດໂຕໃຫ້ພະເຢໂຫວາ ແຕ່ຢ່າຟ້າວໝົດຄວາມຕັ້ງໃຈ. ໃຫ້ເຈົ້າຕັ້ງເປົ້າໝາຍຕໍ່ໆໄປ ໃຫ້ອະທິດຖານຂໍໃຫ້ພະເຢໂຫວາຊ່ວຍເຈົ້າໃນຈຸດທີ່ເຈົ້າຕ້ອງປັບປຸງ. (ຟລປ. 2:13; 3:16) ເຈົ້າໝັ້ນໃຈໄດ້ເລີຍວ່າພະເຢໂຫວາຈະຟັງຄຳອະທິດຖານຂອງເຈົ້າແລະຈະຊ່ວຍເຈົ້າແທ້ໆ.—1ຢຮ. 5:14
ເປັນຫຍັງບາງຄົນຈຶ່ງຢ້ານທີ່ຈະອຸທິດໂຕແລະຮັບບັບເຕມາ?
11. ພະເຢໂຫວາຈະຊ່ວຍເຮົາແນວໃດໃຫ້ຮັກສາຄວາມສັດຊື່ຕໍ່ໆໄປ?
11 ບາງຄົນພ້ອມແລ້ວແຕ່ຍັງບໍ່ກ້າທີ່ຈະອຸທິດໂຕແລະຮັບບັບເຕມາ. ເຂົາເຈົ້າອາດຢ້ານວ່າ ‘ຫຼັງຈາກຮັບບັບເຕມາແລ້ວ ຖ້າຂ້ອຍເຮັດຜິດຮ້າຍແຮງແລະຖືກຕັດສຳພັນເດ ຂ້ອຍຊິເຮັດແນວໃດ?’ ຖ້າເຈົ້າຢ້ານແບບນັ້ນ ຂໍໃຫ້ໝັ້ນໃຈວ່າພະເຢໂຫວາຈະໃຫ້ທຸກສິ່ງທີ່ເຈົ້າຈຳເປັນຕ້ອງມີເພື່ອຊ່ວຍເຈົ້າໃຫ້ “ໃຊ້ຊີວິດໃຫ້ສົມກັບການເປັນຜູ້ຮັບໃຊ້ [ເພິ່ນ] ເພື່ອຈະເຮັດໃຫ້ເພິ່ນພໍໃຈສະເໝີ.” (ກລຊ. 1:10) ນອກຈາກນັ້ນ ພະເຢໂຫວາຈະໃຫ້ກຳລັງເຈົ້າເພື່ອຊ່ວຍເຈົ້າໃຫ້ເຮັດສິ່ງທີ່ຖືກຕ້ອງ. ເພິ່ນໄດ້ຊ່ວຍຫຼາຍຄົນແລ້ວໃຫ້ເຮັດແບບນັ້ນໄດ້. (1ກຣ. 10:13) ນີ້ເປັນເຫດຜົນໜຶ່ງທີ່ຫຼາຍຄົນບໍ່ຖືກຕັດສຳພັນ. ພະເຢໂຫວາຊ່ວຍປະຊາຊົນຂອງເພິ່ນຮັກສາຄວາມສັດຊື່ຕໍ່ໆໄປໄດ້.
12. ສິ່ງໃດຈະຊ່ວຍເຮົາບໍ່ໃຫ້ເຮັດຜິດຮ້າຍແຮງ?
12 ທຸກຄົນທີ່ເປັນຄົນບໍ່ສົມບູນແບບຖືກລໍ້ໃຈໃຫ້ເຮັດຜິດ. (ຢກບ. 1:14) ເຖິງຈະເປັນແບບນັ້ນ ເຈົ້າກໍເລືອກໄດ້ວ່າຈະເຮັດແນວໃດຕອນທີ່ຖືກລໍ້ໃຈ. ເຈົ້າສາມາດຮຽນຮູ້ທີ່ຈະຄວບຄຸມຄວາມຕ້ອງການທີ່ຈະເຮັດສິ່ງທີ່ບໍ່ດີໄດ້ ເຊິ່ງຄົນທົ່ວໄປເວົ້າວ່າຄວບຄຸມບໍ່ໄດ້. ເຖິງວ່າເຈົ້າຖືກລໍ້ໃຈໃຫ້ເຮັດຜິດ ແຕ່ເຈົ້າກໍເລືອກໄດ້ວ່າຈະບໍ່ເຮັດສິ່ງນັ້ນ. ນອກຈາກນັ້ນຍັງມີສິ່ງອື່ນອີກທີ່ຊ່ວຍເຈົ້າບໍ່ໃຫ້ເຮັດຜິດ ນັ້ນຄື: ອະທິດຖານທຸກມື້ ສຶກສາສ່ວນໂຕ ອ່ານຄຳພີໄບເບິນເປັນປະຈຳ ໄປປະຊຸມ ແລະໄປປະກາດ. ການເຮັດສິ່ງເຫຼົ່ານີ້ເປັນປະຈຳຈະຊ່ວຍເຈົ້າໃຫ້ມີຄວາມເຊື່ອເຂັ້ມແຂງແລະສາມາດໃຊ້ຊີວິດຕາມທີ່ໄດ້ອຸທິດໂຕ. ໃຫ້ຈື່ໄວ້ວ່າພະເຢໂຫວາຈະຊ່ວຍເຈົ້າໃຫ້ເຮັດແບບນີ້ໄດ້.—ຄລຕ. 5:16
13. ໂຢເຊັບເປັນຕົວຢ່າງທີ່ດີແນວໃດໃຫ້ເຮົາ?
13 ເຈົ້າຈະໃຊ້ຊີວິດຕາມການອຸທິດໂຕໄດ້ງ່າຍຂຶ້ນຖ້າເຈົ້າຄິດໄວ້ລ່ວງໜ້າວ່າຈະເຮັດແນວໃດຕອນທີ່ຖືກລໍ້ໃຈ. ຄຳພີໄບເບິນເວົ້າເຖິງຫຼາຍຄົນທີ່ເຮັດແບບນັ້ນໄດ້ທັງໆທີ່ເຂົາເຈົ້າກໍເປັນຄົນບໍ່ສົມບູນແບບ. ໃຫ້ເຮົາເບິ່ງຕົວຢ່າງຂອງໂຢເຊັບ. ເຖິງວ່າເມຍຂອງໂປຕີຟາພະຍາຍາມຊວນລາວຫຼາຍເທື່ອໃຫ້ນອນນຳ ແຕ່ໂຢເຊັບຮູ້ຢູ່ແລ້ວວ່າຕ້ອງເຮັດແນວໃດ. ຄຳພີໄບເບິນບອກວ່າ: “ໂຢເຊັບປະຕິເສດ.” ລາວເວົ້າວ່າ: “ຂ້ອຍຈະເຮັດຊົ່ວແບບນີ້ແລະເຮັດບາບຕໍ່ພະເຈົ້າບໍ່ໄດ້.” (ປຖກ. 39:8-10) ເຫັນໄດ້ແຈ້ງວ່າໂຢເຊັບຄິດໄວ້ລ່ວງໜ້າວ່າຈະເຮັດແນວໃດຖ້າເມຍຂອງໂປຕີຟາພະຍາຍາມຊວນລາວໃຫ້ນອນນຳ. ການຄິດລ່ວງໜ້າແບບນີ້ເຮັດໃຫ້ງ່າຍຂຶ້ນສຳລັບລາວເມື່ອຖືກລໍ້ໃຈໃຫ້ເຮັດຜິດ.
14. ເຮົາຈະຝຶກໂຕເອງແນວໃດເພື່ອປະຕິເສດການລໍ້ໃຈ?
14 ເຈົ້າຈະຮຽນແບບໂຢເຊັບໄດ້ແນວໃດ? ໂດຍຄິດລ່ວງໜ້າຕັ້ງແຕ່ຕອນນີ້ວ່າຈະເຮັດແນວໃດເມື່ອເຈິການລໍ້ໃຈ. ຝຶກທີ່ຈະປະຕິເສດທັນທີເມື່ອເຈິສິ່ງທີ່ພະເຢໂຫວາຊັງແລະບໍ່ຄິດຫາມັນເລີຍ. (ພສ. 97:10; 119:165) ການເຮັດແບບນີ້ຈະເຮັດໃຫ້ເຈົ້າບໍ່ຫວັ່ນໄຫວເມື່ອເຈິການລໍ້ໃຈຍ້ອນເຈົ້າຮູ້ຢູ່ແລ້ວວ່າຈະເຮັດແນວໃດ ແລະທັງຈະເຮັດໃຫ້ເຈົ້າໝັ້ນຄົງ.
15. ເຮົາຈະສະແດງໃຫ້ເຫັນແນວໃດວ່າ ເຮົາ “ຊອກຫາ [ພະເຢໂຫວາ] ຢ່າງຈິງຈັງ”? (ເຮັບເຣີ 11:6)
15 ເຈົ້າອາດຮູ້ຢູ່ແລ້ວວ່າເຈົ້າໄດ້ເຈິຄວາມຈິງແລະຢາກຮັບໃຊ້ພະເຢໂຫວາສຸດຫົວໃຈ ແຕ່ເຈົ້າຮູ້ສຶກວ່າຍັງບໍ່ພ້ອມທີ່ຈະອຸທິດໂຕແລະຮັບບັບເຕມາ. ຖ້າເປັນແບບນັ້ນ ໃຫ້ເຈົ້າເຮັດຄືກັບດາວິດໂດຍອະທິດຖານຂໍກັບພະເຢໂຫວາວ່າ: “ພະເຈົ້າເອີ້ຍ ຂໍພະອົງກວດເບິ່ງຫົວໃຈຂອງລູກແລະເບິ່ງວ່າລູກເປັນຄົນແນວໃດແທ້ໆ. ຂໍພະອົງກວດເບິ່ງລູກແລະເບິ່ງວ່າລູກມີຄວາມອຸກໃຈຫຍັງແດ່. ຂໍພະອົງເບິ່ງວ່າລູກມີແນວບໍ່ດີຫຍັງບໍ່. ຂໍພະອົງພາລູກໄປໃນທາງທີ່ຈະມີຢູ່ຕະຫຼອດໄປ.” (ພສ. 139:23, 24) ພະເຢໂຫວາອວຍພອນຄົນທີ່ “ຊອກຫາເພິ່ນຢ່າງຈິງຈັງ.” ການທີ່ເຈົ້າພະຍາຍາມເຮັດຕາມເປົ້າໝາຍທີ່ຈະອຸທິດໂຕແລະຮັບບັບເຕມາກໍສະແດງໃຫ້ພະເຢໂຫວາເຫັນວ່າເຈົ້າກຳລັງຊອກຫາເພິ່ນຢ່າງຈິງຈັງ.—ອ່ານເຮັບເຣີ 11:6
ໃຫ້ໃກ້ຊິດກັບພະເຢໂຫວາຕໍ່ໆໄປ
16-17. ສຳລັບຄົນທີ່ໃຫຍ່ມາໃນຄອບຄົວທີ່ເປັນພະຍານພະເຢໂຫວາ ພະເຢໂຫວາຊັກນຳເຂົາເຈົ້າແນວໃດໃຫ້ເຂົ້າມາຫາເພິ່ນ? (ໂຢຮັນ 6:44)
16 ພະເຢຊູບອກລູກສິດຂອງເພິ່ນວ່າພະເຢໂຫວາເປັນຜູ້ຊັກນຳເຂົາເຈົ້າເຂົ້າມາ. (ອ່ານໂຢຮັນ 6:44) ໃຫ້ຄິດເບິ່ງວ່າເລື່ອງນີ້ພິເສດສ່ຳໃດແລະມີຄວາມໝາຍແນວໃດສຳລັບເຈົ້າ. ພະເຢໂຫວາເຫັນສິ່ງທີ່ດີໃນຄົນທີ່ເພິ່ນຊັກນຳເຂົ້າມາຫາເພິ່ນ. ເພິ່ນເບິ່ງແຕ່ລະຄົນເປັນຄືກັບ “ຊັບສົມບັດພິເສດ” ຫຼື “ຊັບສົມບັດທີ່ມີຄ່າ.” (ພບຍ. 7:6, ໄຂເງື່ອນ) ພະເຢໂຫວາເບິ່ງເຈົ້າແບບນີ້ຄືກັນ.
17 ສຳລັບເດັກນ້ອຍຫຼືໄວລຸ້ນທີ່ໃຫຍ່ມາໃນຄອບຄົວທີ່ເປັນພະຍານພະເຢໂຫວາ ເຈົ້າອາດຄິດວ່າເຈົ້າຮັບໃຊ້ພະເຢໂຫວາຍ້ອນເຮັດຕາມພໍ່ແມ່ຊື່ໆ ບໍ່ແມ່ນຍ້ອນພະເຢໂຫວາຊັກນຳເຈົ້າໃຫ້ເຂົ້າມາຫາເພິ່ນ. ແຕ່ຄຳພີໄບເບິນບອກວ່າ: “ໃຫ້ໃກ້ຊິດກັບພະເຈົ້າ ແລ້ວເພິ່ນຈະໃກ້ຊິດກັບພວກເຈົ້າ.” (ຢກບ. 4:8; 1ຂຄ. 28:9) ເມື່ອເຈົ້າເປັນຝ່າຍເລີ່ມເຂົ້າໄປໃກ້ຊິດກັບພະເຢໂຫວາ ເພິ່ນກໍຈະເຂົ້າມາໃກ້ຊິດກັບເຈົ້າຄືກັນ. ພະເຢໂຫວາບໍ່ໄດ້ເບິ່ງວ່າເຈົ້າເຮັດຕາມຄົນອື່ນຊື່ໆ. ເພິ່ນຊັກນຳແຕ່ລະຄົນເປັນສ່ວນໂຕເຊິ່ງລວມເຖິງຄົນທີ່ໃຫຍ່ມາໃນຄອບຄົວທີ່ເປັນພະຍານພະເຢໂຫວານຳ. ເມື່ອແຕ່ລະຄົນເປັນຝ່າຍເລີ່ມເຂົ້າໄປຫາພະເຢໂຫວາ ເພິ່ນກໍຈະເຮັດຄືກັບທີ່ຂຽນໄວ້ໃນຢາໂກໂບ 4:8.—ສົມທຽບກັບ 2 ເທຊະໂລນິກ 2:13
18. ເຮົາຈະຮຽນຫຍັງໃນບົດຄວາມຕໍ່ໄປ? (ເພງສັນລະເສີນ 40:8)
18 ເມື່ອເຈົ້າອຸທິດໂຕໃຫ້ພະເຢໂຫວາແລະຮັບບັບເຕມາ ເຈົ້າກໍຄິດແລະເຮັດຄືກັບພະເຢຊູ. ເພິ່ນເຕັມໃຈເຮັດທຸກສິ່ງທີ່ພະເຢໂຫວາຢາກໃຫ້ເພິ່ນເຮັດ. (ອ່ານເພງສັນລະເສີນ 40:8; ຮຣ. 10:7) ໃນບົດຄວາມຕໍ່ໄປ ເຮົາຈະມາເບິ່ງວ່າສິ່ງໃດຈະຊ່ວຍເຮົາໃຫ້ຮັບໃຊ້ພະເຢໂຫວາຢ່າງສັດຊື່ຕໍ່ໆໄປຫຼັງຈາກຮັບບັບເຕມາແລ້ວ.
ເຈົ້າຈະຕອບແນວໃດ?
-
ການອຸທິດໂຕໃຫ້ພະເຢໂຫວາໝາຍຄວາມວ່າແນວໃດ?
-
ການຮູ້ຄຸນຄ່າກ່ຽວຂ້ອງແນວໃດກັບການອຸທິດໂຕ?
-
ສິ່ງໃດຈະຊ່ວຍເຈົ້າບໍ່ໃຫ້ເຮັດຜິດຮ້າຍແຮງ?
ເພງທີ 38 ພະອົງຈະເຮັດໃຫ້ເຈົ້າເຂັ້ມແຂງ
a ພາສາໄທ
