ບົດຄວາມສຶກສາທີ 33
ການຄືນມາຈາກຕາຍສະແດງເຖິງຄວາມຮັກ ສະຕິປັນຍາ ແລະຄວາມອົດທົນຂອງພະເຈົ້າ
“ທັງຄົນດີແລະຄົນຊົ່ວຈະຄືນມາຈາກຕາຍ.”—ກຈກ. 24:15
ເພງ 151 ພະອົງຈະເອີ້ນ
ໃຈຄວາມສຳຄັນ *
1. ເປັນຫຍັງພະເຢໂຫວາຈຶ່ງເລີ່ມສ້າງສິ່ງຕ່າງໆ?
ຕອນທຳອິດພະເຢໂຫວາຢູ່ຜູ້ດຽວ ແຕ່ເພິ່ນກໍບໍ່ໄດ້ເຫງົາແລະບໍ່ຈຳເປັນຕ້ອງໃຫ້ໃຜມາຢູ່ນຳເພື່ອຈະມີຄວາມສຸກ. ຍ້ອນພະເຢໂຫວາຢາກໃຫ້ຜູ້ອື່ນມີຊີວິດແລະມີຄວາມສຸກຄືກັນ ເພິ່ນຈຶ່ງເລີ່ມສ້າງສິ່ງຕ່າງໆ.—ເພງ. 36:9; 1 ຢຮ. 4:19
2. ພະເຢຊູແລະທູດສະຫວັນຮູ້ສຶກແນວໃດຕອນທີ່ເຫັນພະເຢໂຫວາສ້າງສິ່ງຕ່າງໆ?
2 ທຳອິດ ພະເຢໂຫວາໄດ້ສ້າງພະເຢຊູເຊິ່ງເປັນລູກຊາຍຂອງເພິ່ນ. ຈາກນັ້ນ ພະເຢໂຫວາແລະພະເຢຊູກໍໄດ້ “ສ້າງສິ່ງອື່ນໆທັງໝົດ” ເຊິ່ງລວມເຖິງທູດສະຫວັນຫຼາຍລ້ານອົງ. (ກລຊ. 1:16) ພະເຢຊູມີຄວາມສຸກທີ່ໄດ້ເຮັດວຽກຮ່ວມກັບພະເຢໂຫວາພໍ່ຂອງເພິ່ນ. (ສຸພາ. 8:30) ແລະພວກທູດສະຫວັນກໍມີຄວາມສຸກຄືກັນ. ຄຳພີໄບເບິນບອກວ່າທູດສະຫວັນ “ໂຫ່ຮ້ອງດີໃຈ” ຕອນທີ່ເຫັນພະເຢໂຫວາແລະພະເຢຊູສ້າງສະຫວັນແລະໂລກ ແລະຕອນທີ່ພວກເພິ່ນສ້າງສິ່ງຕ່າງໆໂດຍສະເພາະແມ່ນມະນຸດ. (ໂຢບ 38:7, ລ.ມ.; ສຸພາ. 8:31) ແຕ່ລະຢ່າງທີ່ພະເຢໂຫວາສ້າງສະແດງເຖິງຄວາມຮັກແລະສະຕິປັນຍາຂອງເພິ່ນ.—ເພງ. 104:24; ຣມ. 1:20
3. ຕາມ 1 ໂກຣິນໂທ 15:21, 22 ຄ່າໄຖ່ຂອງພະເຢຊູສາມາດເຮັດໃຫ້ສິ່ງໃດເປັນໄປໄດ້?
3 ພະເຢໂຫວາຢາກໃຫ້ມະນຸດທຸກຄົນມີຊີວິດຕະຫຼອດໄປໃນສວນທີ່ສວຍງາມ ແຕ່ອາດາມກັບເອວາພັດບໍ່ເຊື່ອຟັງເພິ່ນ. ເຂົາເຈົ້າຈຶ່ງບໍ່ສາມາດມີຊີວິດຕະຫຼອດໄປແລະໄດ້ເຮັດໃຫ້ໂຕເອງກັບລູກຫຼານທຸກຄົນຕ້ອງຕາຍ. (ຣມ. 5:12) ພະເຢໂຫວາເຮັດແນວໃດ? ເພິ່ນໄດ້ບອກທັນທີກ່ຽວກັບວິທີທີ່ຈະຊ່ວຍມະນຸດ. (ຕົ້ນ. 3:15) ພະເຢໂຫວາໄດ້ຈັດໃຫ້ພະເຢຊູລູກຊາຍຂອງເພິ່ນມາເປັນຄ່າໄຖ່ເພື່ອຊ່ວຍລູກຫຼານຂອງອາດາມກັບເອວາຫຼຸດພົ້ນຈາກບາບແລະຄວາມຕາຍ. ແລ້ວເພິ່ນກໍຈະໃຫ້ຊີວິດຕະຫຼອດໄປກັບຜູ້ທີ່ເລືອກເຊື່ອຟັງເພິ່ນ.—ຢຮ. 3:16; ຣມ. 6:23; ອ່ານ 1 ໂກຣິນໂທ 15:21, 22
4. ເຮົາຈະຕອບຄຳຖາມຫຍັງໃນບົດຄວາມນີ້?
4 ເຮົາອາດມີຄຳຖາມກ່ຽວກັບການຄືນມາຈາກຕາຍທີ່ພະເຈົ້າສັນຍາໄວ້ ເຊັ່ນ: ການຄືນມາຈາກຕາຍຈະເກີດຂຶ້ນແນວໃດ? ເມື່ອຄົນທີ່ເຮົາຮັກຄືນມາຈາກຕາຍ ເຮົາຈະຈື່ເຂົາເຈົ້າໄດ້ບໍ? ການຄືນມາຈາກຕາຍຈະເຮັດໃຫ້ເຮົາມີຄວາມສຸກແນວໃດ? ແລະການຄິດຕຶກຕອງກ່ຽວກັບການຄືນມາຈາກຕາຍສອນຫຍັງເຮົາກ່ຽວກັບຄວາມຮັກ ສະຕິປັນຍາ ແລະຄວາມອົດທົນຂອງພະເຢໂຫວາ? ເຮົາຈະຕອບຄຳຖາມເຫຼົ່ານີ້ໃນບົດຄວາມນີ້.
ການຄືນມາຈາກຕາຍຈະເກີດຂຶ້ນແນວໃດ?
5. ເປັນຫຍັງເຮົາຄາດໝາຍໄດ້ວ່າທຸກຄົນທີ່ຄືນມາຈາກຕາຍຈະບໍ່ໄດ້ຖືກປຸກພ້ອມກັນ?
5 ຕອນທີ່ພະເຢໂຫວາໃຫ້ພະເຢຊູປຸກຫຼາຍລ້ານຄົນໃຫ້ຄືນມາຈາກຕາຍ ເຮົາຄາດໝາຍໄດ້ເລີຍວ່າເຂົາເຈົ້າຈະບໍ່ໄດ້ຖືກປຸກພ້ອມກັນ. ຍ້ອນຫຍັງ? ກໍຍ້ອນວ່າຖ້າປຸກໃຫ້ຄືນມາພ້ອມກັນບາດດຽວຈະເຮັດໃຫ້ສະພາບການວຸ່ນວາຍ. ແຕ່ພະເຢໂຫວາບໍ່ເຄີຍເຮັດຫຍັງໃຫ້ສັບສົນ ເພິ່ນຮູ້ວ່າເພື່ອມະນຸດຈະມີຊີວິດທີ່ສະຫງົບສຸກໄດ້ກໍຕ້ອງມີການຈັດລະບຽບເປັນຢ່າງດີ. (1 ກຣ. 14:33) ຕອນທີ່ພະເຢໂຫວາແລະພະເຢຊູກຽມໂລກໄວ້ກ່ອນຈະສ້າງມະນຸດ ເພິ່ນໄດ້ເຮັດແບບຄ່ອຍເປັນຄ່ອຍໄປເຊິ່ງສະແດງເຖິງສະຕິປັນຍາແລະຄວາມອົດທົນຂອງເພິ່ນ. ໃນໄລຍະການປົກຄອງພັນປີ ພະເຢຊູກໍຈະເຮັດແບບດຽວກັນນີ້ຕອນທີ່ເພິ່ນກຽມໂລກກັບຜູ້ທີ່ລອດຜ່ານສົງຄາມອາມາເຄໂດນສຳລັບຄົນທີ່ຄືນມາຈາກຕາຍ.
ຄົນທີ່ລອດຊີວິດຈາກສົງຄາມອາມາເຄໂດນຈະສອນຄົນທີ່ຄືນມາຈາກຕາຍກ່ຽວກັບການປົກຄອງຂອງພະເຢໂຫວາແລະສິ່ງທີ່ເພິ່ນຕ້ອງການ (ເບິ່ງຂໍ້ 6) *
6. ໃນກິດຈະການ 24:15 ພະເຢໂຫວາຈະປຸກໃຜໃຫ້ຄືນມາຈາກຕາຍ?
6 ແຕ່ສຳຄັນກວ່າໝູ່ແມ່ນ ຜູ້ທີ່ລອດຜ່ານສົງຄາມອາມາເຄໂດນຕ້ອງໄດ້ສອນຜູ້ທີ່ຄືນມາຈາກຕາຍເລື່ອງການປົກຄອງຂອງພະເຢໂຫວາແລະສິ່ງທີ່ເພິ່ນຕ້ອງການໃຫ້ເຂົາເຈົ້າເຮັດ. ຍ້ອນຫຍັງ? ຍ້ອນວ່າຄົນທີ່ຄືນມາຈາກຕາຍສ່ວນຫຼາຍຈະເປັນຜູ້ທີ່ຄຳພີໄບເບິນເອີ້ນວ່າ “ຄົນຊົ່ວ.” (ອ່ານກິດຈະການ 24:15) ດັ່ງນັ້ນ ເຂົາເຈົ້າຕ້ອງປ່ຽນແປງຫຼາຍຢ່າງເພື່ອຈະໄດ້ຮັບປະໂຫຍດຈາກຄ່າໄຖ່ຂອງພະເຢຊູ. ຂໍໃຫ້ຄິດເບິ່ງດຸ ຕ້ອງໄດ້ເຮັດວຽກຫຼາຍສ່ຳໃດເພື່ອສອນຫຼາຍລ້ານຄົນທີ່ບໍ່ຮູ້ຈັກພະເຢໂຫວາເລີຍກ່ຽວກັບຄວາມຈິງເລື່ອງພະເຈົ້າ. ແຕ່ລະຄົນຈະມີຜູ້ສອນຂອງໃຜຂອງລາວຄືກັບທີ່ເຮົາຮຽນຄຳພີໄບເບິນໃນປັດຈຸບັນນີ້ບໍ? ຄົນທີ່ເລີ່ມຮຽນໃໝ່ໆຈະໄດ້ຢູ່ໃນປະຊາຄົມແລະໄດ້ຮັບການຝຶກເພື່ອຈະສອນຄົນທີ່ຄືນມາຈາກຕາຍລຸ້ນຕໍ່ໄປບໍ? ເຮົາຕ້ອງຖ້າເບິ່ງ. ແຕ່ສິ່ງທີ່ເຮົາຮູ້ກໍຄື ໃນຕອນທ້າຍການປົກຄອງພັນປີຂອງພະຄລິດ “ແຜ່ນດິນຈະເຕັມໄປດ້ວຍຄວາມຮູ້ຈັກພະເຢໂຫວາ.” (ເອຊາ. 11:9) ເຮົາທຸກຄົນຈະມີວຽກທີ່ມ່ວນຫຼາຍໃນໄລຍະພັນປີນັ້ນ.
7. ເປັນຫຍັງປະຊາຊົນຂອງພະເຢໂຫວາຕ້ອງມີຄວາມເຫັນອົກເຫັນໃຈຕອນທີ່ສອນຄົນທີ່ຄືນມາຈາກຕາຍ?
7 ໃນໄລຍະພັນປີທີ່ພະເຢຊູປົກຄອງ ປະຊາຊົນຂອງພະເຢໂຫວາທຸກຄົນຈະຕ້ອງປ່ຽນແປງໂຕເອງເພື່ອເຮັດໃຫ້ເພິ່ນພໍໃຈ. ສະນັ້ນ ເຂົາເຈົ້າຈະຕ້ອງມີຄວາມເຫັນອົກເຫັນໃຈແທ້ໆຕອນທີ່ຊ່ວຍຄົນທີ່ຄືນມາຈາກຕາຍໃຫ້ປ່ຽນແປງຄວາມຄິດ ຄວາມຕ້ອງການ ແລະໃຊ້ຊີວິດຕາມມາດຕະຖານຂອງພະເຢໂຫວາ. (1 ປຕ. 3:8) ຄົນທີ່ຄືນມາຈາກຕາຍຈະເຫັນວ່າປະຊາຊົນຂອງພະເຢໂຫວາເປັນຄົນຖ່ອມແລະໄດ້ປ່ຽນແປງໂຕເອງເພື່ອເຮັດໃຫ້ພະເຢໂຫວາພໍໃຈ. ເລື່ອງນີ້ຈະເຮັດໃຫ້ເຂົາເຈົ້າຢາກມານະມັດສະການພະເຢໂຫວາຄືກັນ.—ຟລປ. 2:12
ເມື່ອຄົນທີ່ເຮົາຮັກຄືນມາຈາກຕາຍ ເຮົາຈະຈື່ເຂົາເຈົ້າໄດ້ບໍ?
8. ເປັນຫຍັງເຮົາຄາດໝາຍວ່າເຮົາຈະຈື່ຄົນທີ່ເຮົາຮັກຕອນທີ່ເຂົາເຈົ້າຄືນມາຈາກຕາຍ?
8 ມີຫຼາຍເຫດຜົນທີ່ເຮົາຄາດໝາຍໄດ້ວ່າ ເຮົາຈະຈື່ຄົນທີ່ເຮົາຮັກທີ່ກັບຄືນມາຈາກຕາຍ. ຕົວຢ່າງເຊັ່ນ: ໃນສະໄໝກ່ອນຕອນທີ່ພະເຢໂຫວາປຸກຄົນໃຫ້ຄືນມາຈາກຕາຍ ເຂົາເຈົ້າຍັງມີໜ້າຕາ ວິທີຄິດ ວິທີເວົ້າຄືກັບຕອນທີ່ເຂົາເຈົ້າຍັງມີຊີວິດຢູ່. ພະເຢຊູສົມທຽບການຕາຍເປັນຄືກັບການນອນຫຼັບ ແລະການຄືນມາຈາກຕາຍເປັນຄືກັບການຕື່ນນອນ. (ມທ. 9:18, 24; ຢຮ. 11:11-13) ເມື່ອເຮົາຕື່ນນອນ ເຮົາຍັງຈະມີໜ້າຕາ ຄຳເວົ້າ ແລະຄວາມຊົງຈຳຄືກັບຕອນທີ່ເຮົາຍັງບໍ່ທັນໄດ້ນອນ. ຕົວຢ່າງເຊັ່ນ: ເລື່ອງຂອງລາຊະໂຣ ລາວຕາຍໄດ້ 4 ມື້ແລ້ວ ແລະຮ່າງກາຍກໍເລີ່ມເນົ່າເປື່ອຍ. ແຕ່ເມື່ອພະເຢຊູປຸກລາວໃຫ້ຄືນມາຈາກຕາຍ ເອື້ອຍຂອງລາວຈື່ລາວໄດ້ແລະລາວກໍຈື່ເຂົາເຈົ້າໄດ້ຄືກັນ.—ຢຮ. 11:38-44; 12:1, 2
9. ເປັນຫຍັງຄົນທີ່ຖືກປຸກໃຫ້ຄືນມາຈາກຕາຍຈະບໍ່ໄດ້ສົມບູນແບບທັນທີ?
9 ພະເຢໂຫວາສັນຍາວ່າໃນໂລກໃໝ່ຈະບໍ່ມີໃຜເວົ້າວ່າ: “ຂ້ອຍບໍ່ສຳບາຍ.” (ເອຊາ. 33:24; ຣມ. 6:7) ດັ່ງນັ້ນ ຄົນທີ່ຖືກປຸກໃຫ້ຄືນມາຈາກຕາຍຈະມີສຸຂະພາບທີ່ແຂງແຮງ ແຕ່ເຂົາເຈົ້າຈະບໍ່ໄດ້ເປັນຄົນສົມບູນແບບທັນທີ. ເພາະຖ້າເປັນແບບນັ້ນ ຄອບຄົວແລະໝູ່ຄູ່ອາດຈະຈື່ເຂົາເຈົ້າບໍ່ໄດ້. ເບິ່ງຄືວ່າມະນຸດທຸກຄົນຈະຄ່ອຍໆເປັນຄົນສົມບູນແບບໃນໄລຍະການປົກຄອງພັນປີຂອງພະຄລິດ. ໃນຕອນທ້າຍການປົກຄອງພັນປີ ພະເຢຊູຈະມອບການປົກຄອງນີ້ຄືນໃຫ້ພະເຢໂຫວາພໍ່ຂອງເພິ່ນ ເພາະການປົກຄອງນີ້ໄດ້ເຮັດທຸກຢ່າງໃຫ້ສຳເລັດຕາມທີ່ພະເຢໂຫວາຕ້ອງການ ເຊິ່ງລວມເຖິງການເຮັດໃຫ້ມະນຸດເປັນຄົນສົມບູນແບບ.—1 ກຣ. 15:24-28; ພນມ. 20:1-3
ການຄືນມາຈາກຕາຍຈະເຮັດໃຫ້ເຮົາມີຄວາມສຸກແນວໃດ?
10. ການຄືນມາຈາກຕາຍເຮັດເຈົ້າຮູ້ສຶກແນວໃດ?
10 ສົມມຸດວ່າເຈົ້າໄດ້ເຈິກັບຄົນທີ່ເຈົ້າຮັກອີກທີ່ຄືນມາຈາກຕາຍ ເຈົ້າຈະດີໃຈຈົນຮ້ອງໄຫ້ອອກມາຫຼືເຈົ້າຈະດີໃຈຈົນຮ້ອງເພງສັນລະເສີນພະເຢໂຫວາບໍ? ສິ່ງໜຶ່ງທີ່ເຈົ້າໝັ້ນໃຈໄດ້ກໍຄືເຈົ້າຈະຮັກພະເຢໂຫວາແລະພະເຢຊູຫຼາຍແທ້ໆທີ່ໄດ້ຈັດໃຫ້ມີການຄືນມາຈາກຕາຍ.
11. ຕາມທີ່ພະເຢຊູເວົ້າໃນໂຢຮັນ 5:28, 29 ຄົນທີ່ເຊື່ອຟັງພະເຢໂຫວາຈະເປັນແນວໃດ?
11 ລອງນຶກພາບວ່າເຈົ້າຈະດີໃຈຫຼາຍສ່ຳໃດທີ່ເຫັນຄົນທີ່ຄືນມາຈາກຕາຍໄດ້ປ່ຽນແປງຊີວິດແລະເຊື່ອຟັງພະເຢໂຫວາ. ຜູ້ທີ່ປ່ຽນແປງໂຕເອງຈະມີຊີວິດຕະຫຼອດໄປໃນສວນທີ່ສວຍງາມ ແຕ່ຜູ້ທີ່ບໍ່ຍອມປ່ຽນແປງພະເຢໂຫວາຈະບໍ່ຍອມໃຫ້ເຂົາເຈົ້າມີຊີວິດຕໍ່ໄປໃນສວນນັ້ນ.—ເອຊາ. 65:20; ອ່ານໂຢຮັນ 5:28, 29
12. ທຸກຄົນທີ່ຢູ່ໃນໂລກນີ້ຈະໄດ້ຮັບພອນຫຍັງຈາກພະເຢໂຫວາ?
12 ພາຍໃຕ້ການປົກຄອງຂອງພະເຢໂຫວາ ຄຳເວົ້າໃນສຸພາສິດ 10:22 (ລ.ມ.) ຈະເປັນຈິງກັບປະຊາຊົນຂອງເພິ່ນເພາະຂໍ້ນັ້ນບອກວ່າ: “ພອນຈາກພະເຢໂຫວາເຮັດໃຫ້ຮັ່ງມີແລະຈະບໍ່ເຮັດໃຫ້ເຈັບປວດໃຈເລີຍ.” ດ້ວຍຄວາມຊ່ວຍເຫຼືອຈາກພະລັງຂອງພະເຢໂຫວາ ເຂົາເຈົ້າຈະຮັ່ງມີ ນັ້ນໝາຍຄວາມວ່າເຂົາເຈົ້າຈະເປັນຄືກັບພະຄລິດຫຼາຍຂຶ້ນແລະຈະສົມບູນແບບຫຼາຍຂຶ້ນ. (ຢຮ. 13:15-17; ອຟຊ. 4:23, 24) ແຕ່ລະມື້ເຂົາເຈົ້າຈະມີຮ່າງກາຍທີ່ແຂງແຮງຂຶ້ນແລະຈະເປັນຄົນທີ່ດີຂຶ້ນ. ຊີວິດໃນຕອນນັ້ນຈະມີຄວາມສຸກແທ້ໆ! (ໂຢບ 33:25) ແຕ່ການຄິດຕຶກຕອງເລື່ອງການຄືນມາຈາກຕາຍຈະຊ່ວຍເຈົ້າແນວໃດໃນຕອນນີ້?
ເຮົາຮຽນຮູ້ຫຍັງກ່ຽວກັບຄວາມຮັກຂອງພະເຢໂຫວາ?
13. ຕາມຄຳເພງ 139:1-4 ການຄືນມາຈາກຕາຍເຮັດໃຫ້ເຫັນແນວໃດວ່າພະເຢໂຫວາຮູ້ຈັກເຮົາດີແທ້ໆ?
13 ຄືກັບທີ່ໄດ້ເວົ້າມາແລ້ວ ເມື່ອພະເຢໂຫວາປຸກຄົນໃຫ້ຄືນມາຈາກຕາຍ ເພິ່ນຈະເຮັດໃຫ້ເຂົາເຈົ້າມີຄວາມຊົງຈຳແລະມີນິດໄສໃຈຄໍແບບເກົ່າ. ນີ້ໝາຍຄວາມວ່າແນວໃດ? ໝາຍຄວາມວ່າພະເຢໂຫວາຮັກເຈົ້າຫຼາຍຈົນສັງເກດເບິ່ງແລະຈື່ສິ່ງທີ່ເຈົ້າຄິດ ຮູ້ສຶກ ເວົ້າ ແລະເຮັດ. ຖ້າເພິ່ນຕ້ອງປຸກເຈົ້າໃຫ້ຄືນມາຈາກຕາຍ ມັນບໍ່ຍາກເລີຍທີ່ເພິ່ນຈະເຮັດໃຫ້ເຈົ້າມີຄວາມຊົງຈຳ ຄວາມຄິດ ແລະມີນິດໄສໃຈຄໍແບບເກົ່າ. ກະສັດດາວິດຮູ້ວ່າພະເຢໂຫວາສົນໃຈເຮົາແຕ່ລະຄົນຫຼາຍແທ້ໆ. (ອ່ານຄຳເພງ 139:1-4) ເຮົາຮູ້ສຶກແນວໃດເມື່ອຮູ້ວ່າພະເຢໂຫວາຮັກເຮົາຫຼາຍປານນີ້? ການຄືນມາຈາກຕາຍເຮັດໃຫ້ເຮົາເຫັນວ່າພະເຢໂຫວາຮູ້ຈັກເຮົາດີແທ້ໆ.
14. ເຮົາຄວນຮູ້ສຶກແນວໃດເມື່ອຮູ້ວ່າພະເຢໂຫວາຮູ້ຈັກເຮົາດີ?
14 ເຮົາບໍ່ຄວນຢ້ານເມື່ອຮູ້ວ່າພະເຢໂຫວາຮູ້ຈັກເຮົາດີ. ຍ້ອນຫຍັງ? ຍ້ອນວ່າພະເຢໂຫວາສົນໃຈເຮົາ. ເພິ່ນຖືວ່າເຮົາແຕ່ລະຄົນມີຄ່າ ເພິ່ນຈື່ທຸກສິ່ງທີ່ເກີດຂຶ້ນໃນຊີວິດຂອງເຮົາ. ເລື່ອງນີ້ໃຫ້ກຳລັງໃຈແທ້ໆ. ເຮົາບໍ່ຄວນຮູ້ສຶກວ່າເຮົາຢູ່ຜູ້ດຽວເພາະພະເຢໂຫວາຢູ່ຄຽງຂ້າງເຮົາທຸກໆມື້ແລະພ້ອມທີ່ຈະຊ່ວຍເຫຼືອເຮົາ.—2 ຂ່າວ. 16:9
ເຮົາຮຽນຮູ້ຫຍັງກ່ຽວກັບສະຕິປັນຍາຂອງພະເຢໂຫວາ?
15. ການຄືນມາຈາກຕາຍສະແດງເຖິງສະຕິປັນຍາຂອງພະເຢໂຫວາແນວໃດ?
15 ການຂູ່ວ່າຈະຂ້າເປັນອາວຸດທີ່ມີພະລັງຫຼາຍ. ຄົນທີ່ຢູ່ພາຍໃຕ້ການຄວບຄຸມຂອງຊາຕານໃຊ້ການຂົ່ມຂູ່ນີ້ເພື່ອບັງຄັບຄົນເຮົາໃຫ້ຫັກຫຼັງໝູ່ຄູ່ຂອງໂຕເອງຫຼືໃຫ້ຍອມແພ້. ແຕ່ການຂົ່ມຂູ່ນີ້ບໍ່ມີຜົນຕໍ່ພວກເຮົາ ເຮົາຮູ້ວ່າຖ້າພວກສັດຕູຂ້າເຮົາ ພະເຢໂຫວາກໍຈະປຸກເຮົາໃຫ້ກັບມາມີຊີວິດອີກ. (ພນມ. 2:10) ເຮົາໝັ້ນໃຈວ່າບໍ່ມີຫຍັງທີ່ເຂົາເຈົ້າສາມາດເຮັດໄດ້ເພື່ອຈະໃຫ້ເຮົາເຊົາຮັບໃຊ້ພະເຢໂຫວາ. (ຣມ. 8:35-39) ຄວາມຫວັງເລື່ອງການຄືນມາຈາກຕາຍທີ່ພະເຢໂຫວາໃຫ້ເຮົາພິສູດວ່າເພິ່ນສະຫຼາດແທ້ໆ! ຄວາມຫວັງນີ້ທຳລາຍອາວຸດຂອງຊາຕານແລະເຮັດໃຫ້ເຮົາເປັນຄົນກ້າຫານຫຼາຍຂຶ້ນເພື່ອຈະພັກດີຕໍ່ພະເຢໂຫວາຕໍ່ໆໄປ.
ການຕັດສິນໃຈຂອງເຮົາສະແດງໃຫ້ເຫັນບໍວ່າເຮົາເຊື່ອທີ່ພະເຢໂຫວາສັນຍາວ່າຈະຈັດໃຫ້ເຮົາມີສິ່ງຈຳເປັນໃນແຕ່ລະມື້? (ເບິ່ງຂໍ້ 16) *
16. ມີຄຳຖາມຫຍັງແດ່ທີ່ເຈົ້າຄວນຖາມໂຕເອງ ແລະຄຳຕອບຈະຊ່ວຍເຈົ້າແນວໃດໃຫ້ຮູ້ວ່າເຈົ້າໄວ້ວາງໃຈພະເຢໂຫວາຫຼາຍສ່ຳໃດ?
16 ຖ້າຜູ້ທີ່ເປັນສັດຕູຂອງພະເຢໂຫວາຂູ່ວ່າຈະຂ້າເຈົ້າ ເຈົ້າຈະເຊື່ອແທ້ໆບໍວ່າພະເຢໂຫວາຈະປຸກເຈົ້າໃຫ້ຄືນມາຈາກຕາຍ? ວິທີໜຶ່ງທີ່ຈະຮູ້ກໍໂດຍຖາມໂຕເອງວ່າ ‘ການຕັດສິນໃຈເລື່ອງເລັກໆນ້ອຍໆທີ່ຂ້ອຍເຮັດໃນແຕ່ລະມື້ສະແດງໃຫ້ເຫັນວ່າຂ້ອຍໄວ້ວາງໃຈພະເຢໂຫວາບໍ?’ (ລກ. 16:10) ອີກຄຳຖາມໜຶ່ງກໍຄື ‘ການໃຊ້ຊີວິດຂອງຂ້ອຍສະແດງໃຫ້ເຫັນບໍວ່າຂ້ອຍເຊື່ອທີ່ພະເຢໂຫວາຈະຈັດໃຫ້ຂ້ອຍມີສິ່ງຈຳເປັນໃນແຕ່ລະມື້ຖ້າຂ້ອຍຊອກຫາການປົກຄອງຂອງເພິ່ນກ່ອນ?’ (ມທ. 6:31-33) ຖ້າເຈົ້າຕອບຄຳຖາມທັງສອງຂໍ້ວ່າແມ່ນ ນັ້ນກໍສະແດງວ່າເຈົ້າໄວ້ວາງໃຈພະເຢໂຫວາແລະເຈົ້າກໍພ້ອມທີ່ຈະເຈິກັບການທົດສອບຕ່າງໆທີ່ຈະເກີດຂຶ້ນ.—ສຸພາ. 3:5, 6
ເຮົາຮຽນຮູ້ຫຍັງກ່ຽວກັບຄວາມອົດທົນຂອງພະເຢໂຫວາ?
17. (ກ) ການຄືນມາຈາກຕາຍສະແດງໃຫ້ເຫັນແນວໃດວ່າພະເຢໂຫວາອົດທົນ? (ຂ) ເຮົາຈະສະແດງໃຫ້ເຫັນແນວໃດວ່າເຮົາເຫັນຄຸນຄ່າຄວາມອົດທົນຂອງພະເຢໂຫວາ?
17 ພະເຢໂຫວາມີວັນເວລາທີ່ແນ່ນອນທີ່ຈະທຳລາຍລະບົບຊົ່ວນີ້. (ມທ. 24:36) ເພິ່ນຈະອົດທົນຕໍ່ໆໄປຈົນຮອດເວລານັ້ນ ເພິ່ນຢາກປຸກຄົນທີ່ຕາຍໄປແລ້ວໃຫ້ຟື້ນຄືນມາ ແຕ່ເພິ່ນກໍຍັງຕ້ອງອົດທົນ. (ໂຢບ 14:14, 15) ເພິ່ນຖ້າຈົນຮອດເວລາທີ່ເໝາະສົມເພື່ອຈະປຸກເຂົາເຈົ້າໃຫ້ກັບມາມີຊີວິດອີກ. (ຢຮ. 5:28) ເຮົາຮຽນຮູ້ຫຍັງກ່ຽວກັບຄວາມອົດທົນຂອງພະເຢໂຫວາ? ເຮົາຮຽນຮູ້ວ່າຍ້ອນພະເຢໂຫວາອົດທົນ ຫຼາຍຄົນເຊິ່ງລວມເຖິງເຮົານຳຈຶ່ງມີໂອກາດທີ່ຈະ “ກັບໃຈ.” (2 ປຕ. 3:9) ພະເຢໂຫວາຢາກໃຫ້ຫຼາຍຄົນມີໂອກາດທີ່ຈະໄດ້ຊີວິດຕະຫຼອດໄປ. ດັ່ງນັ້ນ ໃຫ້ເຮົາເຫັນຄຸນຄ່າຄວາມອົດທົນຂອງເພິ່ນໂດຍໄປຊອກຫາຄົນທີ່ “ເຕັມໃຈຕອບຮັບຄວາມຈິງ” ແລະຊ່ວຍເຂົາເຈົ້າໃຫ້ຮັກພະເຢໂຫວາແລະຮັບໃຊ້ເພິ່ນ. (ກຈກ. 13:48) ແລ້ວເຂົາເຈົ້າກໍຈະໄດ້ຮັບປະໂຫຍດຈາກຄວາມອົດທົນຂອງພະເຢໂຫວາຄືກັບທີ່ເຮົາໄດ້ຮັບ.
18. ເປັນຫຍັງເຮົາຄວນອົດທົນກັບຄົນອື່ນ?
18 ພະເຢໂຫວາຈະຖ້າດ້ວຍຄວາມອົດທົນຈົນຮອດຕອນທ້າຍໜຶ່ງພັນປີ ແລ້ວເພິ່ນຈຶ່ງຈະຄາດໝາຍໃຫ້ເຮົາເປັນຄົນສົມບູນແບບ. ຈົນກວ່າຈະຮອດຕອນນັ້ນ ພະເຢໂຫວາພ້ອມທີ່ເບິ່ງຂ້າມຄວາມຜິດຂອງເຮົາ. ພວກເຮົາກໍຄືກັນຄວນຈະອົດທົນກັບຄົນອື່ນແລະເບິ່ງຈຸດດີຂອງເຂົາເຈົ້າ. ຂໍໃຫ້ເບິ່ງຕົວຢ່າງຂອງພີ່ນ້ອງຍິງຄົນໜຶ່ງທີ່ຜົວຂອງລາວເລີ່ມມີຄວາມວຸ່ນວາຍທາງດ້ານອາລົມຈົນກັງວົນໜັກແລະເຊົາໄປປະຊຸມ. ພີ່ນ້ອງຜູ້ນີ້ເວົ້າວ່າ: “ເລື່ອງນີ້ເຮັດໃຫ້ຂ້ອຍເສຍໃຈຫຼາຍເພາະຊີວິດຂອງເຮົາປີ້ນຈາກໜ້າມືເປັນຫຼັງມື ແລະບໍ່ສາມາດເຮັດຕາມທີ່ວາງແຜນໄວ້.” ຕະຫຼອດເວລາທີ່ຜ່ານມາພີ່ນ້ອງຜູ້ນີ້ສະແດງຄວາມຮັກໂດຍອົດທົນກັບຜົວ. ລາວເພິ່ງພະເຢໂຫວາແລະບໍ່ຍອມແພ້. ຄືກັບພະເຢໂຫວາ ລາວເບິ່ງຂ້າມບັນຫາທີ່ຜົວເປັນແລະເບິ່ງຈຸດດີຂອງຜົວ. ລາວເວົ້າວ່າ: “ຜົວຂ້ອຍມີຈຸດດີຫຼາຍຢ່າງແລະລາວກຳລັງພະຍາຍາມເອົາຊະນະຄວາມກັງວົນນັ້ນເຖິງວ່າຈະເຮັດໄດ້ເທື່ອລະເລັກລະໜ້ອຍ.” ເປັນເລື່ອງສຳຄັນແທ້ໆທີ່ເຮົາຈະອົດທົນກັບຄົນໃນຄອບຄົວຫຼືພີ່ນ້ອງໃນປະຊາຄົມທີ່ກຳລັງພະຍາຍາມເອົາຊະນະບັນຫາຕ່າງໆ.
19. ເຮົາຄວນຕັ້ງໃຈທີ່ຈະເຮັດຫຍັງ?
19 ພະເຢຊູແລະພວກທູດສະຫວັນດີໃຈຫຼາຍຕອນທີ່ພະເຈົ້າສ້າງໂລກນີ້. ແຕ່ເຂົາເຈົ້າແຮ່ງຊິດີໃຈເມື່ອເຫັນໂລກນີ້ມີແຕ່ຄົນທີ່ສົມບູນແບບເຊິ່ງຮັກແລະຮັບໃຊ້ພະເຢໂຫວາ. ຜູ້ທີ່ຂຶ້ນໄປສະຫວັນເພື່ອຮ່ວມປົກຄອງກັບພະຄລິດກໍຈະດີໃຈຄືກັນທີ່ເຫັນມະນຸດໄດ້ຮັບປະໂຫຍດຈາກວຽກທີ່ເຂົາເຈົ້າໄດ້ເຮັດ. (ພນມ. 4:4, 9-11; 5:9, 10) ຄິດເບິ່ງດຸວ່າຊີວິດຈະມີຄວາມສຸກຫຼາຍສ່ຳໃດ ເມື່ອບໍ່ມີຄວາມເຈັບປວດ ຄວາມໂສກເສົ້າ ຄວາມເຈັບປ່ວຍ ແລະຄວາມຕາຍຕະຫຼອດໄປ. (ພນມ. 21:4) ຈົນກວ່າຈະຮອດຕອນນັ້ນ ໃຫ້ເຮົາຕັ້ງໃຈທີ່ຈະຮຽນແບບພະເຢໂຫວາພໍ່ຂອງເຮົາທີ່ມີຄວາມຮັກ ມີສະຕິປັນຍາ ແລະມີຄວາມອົດທົນ. ຖ້າເຈົ້າເຮັດແບບນັ້ນ ເຈົ້າຈະມີຄວາມສຸກຕໍ່ໆໄປເຖິງວ່າຈະເຈິບັນຫາຫຍັງກໍຕາມ. (ຢກບ. 1:2-4) ເຮົາຂອບໃຈແທ້ໆທີ່ພະເຢໂຫວາສັນຍາວ່າຈະໃຫ້ມີການ “ຄືນມາຈາກຕາຍ.”—ກຈກ. 24:15
ເພງ 141 ຊີວິດເປັນສິ່ງມະຫັດສະຈັນ
^ ຂໍ້ 5 ພະເຢໂຫວາເປັນພໍ່ທີ່ມີຄວາມຮັກ ສະຫຼາດ ແລະອົດທົນ. ເຮົາເຫັນຄຸນລັກສະນະເຫຼົ່ານີ້ໄດ້ຈາກວິທີທີ່ເພິ່ນສ້າງສິ່ງຕ່າງໆແລະໃນຄຳສັນຍາທີ່ຈະປຸກຄົນຕາຍໃຫ້ກັບມາມີຊີວິດອີກ. ໃນບົດຄວາມນີ້ ເຮົາຈະເບິ່ງບາງຄຳຖາມທີ່ເຮົາອາດສົງໄສກ່ຽວກັບການຄືນມາຈາກຕາຍ ແລະເຮົາຍັງຈະເບິ່ງວ່າການຄືນມາຈາກຕາຍສອນຫຍັງເຮົາກ່ຽວກັບຄວາມຮັກ ສະຕິປັນຍາ ແລະຄວາມອົດທົນຂອງພະເຢໂຫວາ ແລະເຮົາຄວນຈະຮູ້ສຶກແນວໃດໃນເລື່ອງນີ້.
^ ຂໍ້ 59 ຄຳອະທິບາຍຮູບ: ຜູ້ຊາຍຄົນພື້ນເມືອງອາເມຣິກາທີ່ຕາຍໄດ້ຫຼາຍຮ້ອຍປີແລ້ວຖືກປຸກໃຫ້ຄືນມາຈາກຕາຍໃນໄລຍະການປົກຄອງພັນປີຂອງພະຄລິດ. ພີ່ນ້ອງຄົນໜຶ່ງທີ່ລອດຊີວິດຈາກສົງຄາມອາມາເຄໂດນພ້ອມທີ່ຈະສອນຜູ້ຊາຍຄົນນີ້ໃຫ້ຮູ້ສິ່ງທີ່ລາວຕ້ອງເຮັດເພື່ອຈະໄດ້ຮັບປະໂຫຍດຈາກຄ່າໄຖ່ຂອງພະຄລິດ.
^ ຂໍ້ 61 ຄຳອະທິບາຍຮູບ: ພີ່ນ້ອງຊາຍຄົນໜຶ່ງບອກຫົວໜ້າຂອງລາວວ່າ ມີຫຼາຍມື້ໃນແຕ່ລະອາທິດທີ່ລາວບໍ່ສາມາດເຮັດວຽກກາຍໂມງໄດ້ເພາະລາວຈັດຕອນແລງຂອງມື້ເຫຼົ່ານັ້ນໄວ້ເພື່ອນະມັດສະການພະເຢໂຫວາ. ແຕ່ຖ້າຫົວໜ້າຢາກໃຫ້ລາວເຮັດວຽກກາຍໂມງໃນວັນອື່ນ ລາວພ້ອມທີ່ຈະເຮັດ.
