ບົດຄວາມສຶກສາທີ 14
ເພງທີ 56 ເຮັດໃຫ້ຄວາມຈິງເປັນຂອງເຈົ້າເອງ
“ພະຍາຍາມກ້າວໜ້າເພື່ອຈະໄດ້ເປັນຜູ້ໃຫຍ່”
“ໃຫ້ພວກເຮົາພະຍາຍາມກ້າວໜ້າເພື່ອຈະໄດ້ເປັນຜູ້ໃຫຍ່.”—ຮຣ. 6:1
ຈຸດສຳຄັນ
ຄົນທີ່ເປັນຜູ້ໃຫຍ່ທາງຄວາມເຊື່ອຈະຄິດແລະເຮັດໃນສິ່ງທີ່ພະເຢໂຫວາພໍໃຈສະເໝີແລະຈະຕັດສິນໃຈຢ່າງສະຫຼາດ. ໃຫ້ເຮົາມາເບິ່ງວ່າເຮົາຈະເປັນຜູ້ໃຫຍ່ທາງຄວາມເຊື່ອໄດ້ແນວໃດ.
1. ພະເຢໂຫວາຢາກໃຫ້ເຮົາເຮັດຫຍັງ?
ສິ່ງໜຶ່ງທີ່ເຮັດໃຫ້ພໍ່ແມ່ດີໃຈທີ່ສຸດແມ່ນຕອນທີ່ລູກເກີດມາ. ເຖິງວ່າພໍ່ແມ່ຈະຮັກລູກຫຼາຍ ແຕ່ເຂົາເຈົ້າກໍບໍ່ຢາກໃຫ້ລູກເປັນແອນ້ອຍຢູ່ຕະຫຼອດ. ທີ່ຈິງ ເຂົາເຈົ້າຈະອຸກໃຈຫຼາຍຖ້າລູກບໍ່ໃຫຍ່ຈັກເທື່ອ. ຄ້າຍຄືກັນ ພະເຢໂຫວາກໍມີຄວາມສຸກເມື່ອເຫັນເຮົາເຂົ້າມາເປັນລູກສິດຂອງພະເຢຊູ ແຕ່ເພິ່ນກໍບໍ່ຢາກໃຫ້ເຮົາຢຸດຢູ່ສ່ຳນັ້ນແລະເປັນຄືກັບແອນ້ອຍທາງຄວາມເຊື່ອ. (1ກຣ. 3:1) ເພິ່ນຢາກໃຫ້ເຮົາກ້າວໜ້າຈົນ “ເປັນຜູ້ໃຫຍ່” ທາງຄວາມເຊື່ອ.—1ກຣ. 14:20
2. ເຮົາຈະຮຽນຫຍັງໃນບົດນີ້?
2 ການເປັນຜູ້ໃຫຍ່ທາງຄວາມເຊື່ອໝາຍຄວາມວ່າແນວໃດ? ເຮົາຈະກ້າວໜ້າຈົນເປັນຜູ້ໃຫຍ່ທາງຄວາມເຊື່ອໄດ້ແນວໃດ? ການມີຄວາມຮູ້ທີ່ເລິກເຊິ່ງໃນພະຄຳພີທີ່ເປັນຄືກັບອາຫານແຂງຈະຊ່ວຍເຮົາໃຫ້ກ້າວໜ້າໄດ້ແນວໃດ? ແລະເປັນຫຍັງເຮົາຕ້ອງລະວັງທີ່ຈະບໍ່ໝັ້ນໃຈໃນໂຕເອງຫຼາຍເກີນໄປ? ໃນບົດນີ້ຈະຕອບຄຳຖາມເຫຼົ່ານີ້.
ການເປັນຜູ້ໃຫຍ່ທາງຄວາມເຊື່ອໝາຍຄວາມວ່າແນວໃດ?
3. ການເປັນຜູ້ໃຫຍ່ທາງຄວາມເຊື່ອໝາຍຄວາມວ່າແນວໃດ?
3 ໃນຄຳພີໄບເບິນ ຄຳພາສາກຣີກທີ່ແປວ່າ “ເປັນຜູ້ໃຫຍ່” ຍັງໝາຍເຖິງການມີຄຸນລັກສະນະແບບຄລິດສະຕຽນ. a (ອຟຊ. 4:13) ຄືກັບແອນ້ອຍທີ່ຄ່ອຍໆໃຫຍ່ຂຶ້ນຈົນກາຍເປັນຜູ້ໃຫຍ່ ເຮົາເອງກໍຕ້ອງເປັນຜູ້ໃຫຍ່ທາງຄວາມເຊື່ອ ເຊິ່ງໝາຍຄວາມວ່າເຮົາຕ້ອງສະໜິດກັບພະເຢໂຫວາຫຼາຍຂຶ້ນ. ນີ້ແຫຼະຄືການເປັນຜູ້ໃຫຍ່ທາງຄວາມເຊື່ອ. ເຖິງວ່າເຮົາເປັນຜູ້ໃຫຍ່ທາງຄວາມເຊື່ອແລ້ວ ເຮົາກໍບໍ່ຄວນຢຸດຢູ່ແຕ່ສ່ຳນັ້ນ. (1ຕມ. 4:15) ເຮົາທຸກຄົນສາມາດເປັນຜູ້ໃຫຍ່ທາງຄວາມເຊື່ອໄດ້ເຖິງວ່າຈະອາຍຸຍັງນ້ອຍ. ແຕ່ເຮົາຈະຮູ້ໄດ້ແນວໃດວ່າເຮົາເປັນຜູ້ໃຫຍ່ທາງຄວາມເຊື່ອແລ້ວ?
4. ຄົນທີ່ເປັນຜູ້ໃຫຍ່ທາງຄວາມເຊື່ອເປັນແບບໃດ?
4 ຄົນທີ່ເປັນຜູ້ໃຫຍ່ທາງຄວາມເຊື່ອຈະເຮັດທຸກສິ່ງທີ່ພະເຢໂຫວາຢາກໃຫ້ເຮັດ. ລາວຈະບໍ່ເຮັດສິ່ງທີ່ໂຕເອງຢາກເຮັດເທົ່ານັ້ນ. ເຖິງວ່າລາວເປັນຄົນບໍ່ສົມບູນແບບແລະຍັງເຮັດຜິດພາດຢູ່ ແຕ່ລາວສະແດງໃຫ້ເຫັນໃນແຕ່ລະມື້ວ່າລາວຄິດແລະເຮັດໃນສິ່ງທີ່ພະເຢໂຫວາພໍໃຈສະເໝີ. ລາວຈະປູກຝັງນິດໄສໃໝ່ແລະພະຍາຍາມຄິດຄືກັບພະເຢໂຫວາໃຫ້ຫຼາຍຂຶ້ນເລື້ອຍໆ. (ອຟຊ. 4:22-24) ລາວໄດ້ຝຶກໂຕເອງໃຫ້ຕັດສິນໃຈແບບສະຫຼາດໂດຍອາໄສກົດໝາຍແລະຫຼັກການຂອງພະເຢໂຫວາ ລາວຈຶ່ງບໍ່ຕ້ອງມີກົດທີ່ຂຽນເປັນລາຍການຍາວໆວ່າອັນໃດເຮັດໄດ້ອັນໃດເຮັດບໍ່ໄດ້. ເມື່ອຕັດສິນໃຈແລ້ວ ລາວກໍພະຍາຍາມສຸດຂີດທີ່ຈະເຮັດຕາມນັ້ນໃຫ້ໄດ້.—1ກຣ. 9:26, 27
5. ອາດເກີດຫຍັງຂຶ້ນກັບຄົນທີ່ຍັງບໍ່ເປັນຜູ້ໃຫຍ່ທາງຄວາມເຊື່ອ? (ເອເຟໂຊ 4:14, 15)
5 ກົງກັນຂ້າມ ຄົນທີ່ຍັງບໍ່ເປັນຜູ້ໃຫຍ່ທາງຄວາມເຊື່ອຈະຫຼົງເຊື່ອ “ອຸບາຍຫຼອກລວງ” ໄດ້ງ່າຍ ແລະເຊື່ອຂ່າວປອມ ຂ່າວລື ແລະເລື່ອງຕົວະໃນສື່ຕ່າງໆ ຫຼືລາວອາດຖືກຄົນທີ່ທໍລະຍົດພະເຈົ້າຫຼອກລວງ. b (ອ່ານເອເຟໂຊ 4:14, 15) ລາວອາດເປັນຄົນມັກອິດສາ ມັກຜິດຖຽງ ໃຈຮ້າຍງ່າຍ ແລະຍອມແພ້ຕໍ່ການລໍ້ໃຈໄດ້ງ່າຍ.—1ກຣ. 3:3
6. ເປັນຫຍັງຈຶ່ງສົມທຽບການກ້າວໜ້າຈົນເປັນຜູ້ໃຫຍ່ທາງຄວາມເຊື່ອວ່າຄືກັບເດັກນ້ອຍທີ່ໃຫຍ່ເປັນຜູ້ໃຫຍ່? (ເບິ່ງຮູບນຳ)
6 ຄືກັບທີ່ໄດ້ເວົ້າໄປແລ້ວ ຄຳພີໄບເບິນສົມທຽບການກ້າວໜ້າຈົນເປັນຜູ້ໃຫຍ່ທາງຄວາມເຊື່ອວ່າຄືກັບເດັກນ້ອຍທີ່ໃຫຍ່ເປັນຜູ້ໃຫຍ່. ຕາມປົກກະຕິແລ້ວເດັກນ້ອຍຈະບໍ່ມີປະສົບການ ລາວຈຶ່ງຕ້ອງມີຜູ້ໃຫຍ່ປົກປ້ອງແລະຊີ້ນຳ. ໃຫ້ເຮົາເບິ່ງຕົວຢ່າງປຽບທຽບນຳກັນ. ຕອນທີ່ກຳລັງຈະຂ້າມທາງ ແມ່ຊິບອກລູກສາວທີ່ຍັງນ້ອຍໃຫ້ຈັບມືແມ່ໄວ້. ແຕ່ເມື່ອລູກໃຫຍ່ແລ້ວແມ່ອາດຈະປ່ອຍໃຫ້ລູກຂ້າມທາງເອງ ແຕ່ກໍເຕືອນລູກວ່າກ່ອນຈະຂ້າມທາງໃຫ້ແນມຊ້າຍແນມຂວາກ່ອນວ່າມີລົດບໍ່. ເມື່ອລູກສາວເປັນຜູ້ໃຫຍ່ແລ້ວ ລາວກໍຮູ້ວ່າຈະຂ້າມທາງແນວໃດໃຫ້ປອດໄພ. ຄືກັບເດັກນ້ອຍທີ່ຕ້ອງໃຫ້ຜູ້ໃຫຍ່ຊ່ວຍເພື່ອຈະຫຼີກລ່ຽງອັນຕະລາຍໄດ້ ຄົນທີ່ຍັງບໍ່ເປັນຜູ້ໃຫຍ່ທາງຄວາມເຊື່ອກໍຕ້ອງໃຫ້ຄົນທີ່ເປັນຜູ້ໃຫຍ່ທາງຄວາມເຊື່ອຊ່ວຍເພື່ອເຂົາເຈົ້າຈະບໍ່ເຮັດສິ່ງທີ່ທຳລາຍສາຍສຳພັນຂອງເຂົາເຈົ້າກັບພະເຢໂຫວາແລະສາມາດຕັດສິນໃຈໄດ້ຢ່າງສະຫຼາດ. ກົງກັນຂ້າມ ຄົນທີ່ເປັນຜູ້ໃຫຍ່ທາງຄວາມເຊື່ອຈະຕັດສິນໃຈໄດ້ເອງໂດຍຫາເຫດຜົນຈາກຫຼັກການໃນຄຳພີໄບເບິນເພື່ອຈະຮູ້ວ່າພະເຢໂຫວາຄິດແນວໃດໃນເລື່ອງຕ່າງໆ ແລ້ວກໍເຮັດຕາມນັ້ນ.
ຄົນທີ່ຍັງບໍ່ເປັນຜູ້ໃຫຍ່ທາງຄວາມເຊື່ອຕ້ອງຮຽນຮູ້ວິທີທີ່ຈະຕັດສິນໃຈຢ່າງສະຫຼາດໂດຍອາໄສຫຼັກການໃນຄຳພີໄບເບິນ (ເບິ່ງຂໍ້ 6)
7. ຄົນທີ່ເປັນຜູ້ໃຫຍ່ທາງຄວາມເຊື່ອຕ້ອງຂໍຄວາມຊ່ວຍເຫຼືອຈາກຄົນອື່ນບໍ?
7 ນີ້ໝາຍຄວາມວ່າຄົນທີ່ເປັນຜູ້ໃຫຍ່ທາງຄວາມເຊື່ອບໍ່ຕ້ອງການຄວາມຊ່ວຍເຫຼືອຈາກຄົນອື່ນບໍ? ບໍ່ແມ່ນ. ບາງເທື່ອເຂົາເຈົ້າກໍຕ້ອງຂໍໃຫ້ຄົນອື່ນຊ່ວຍຄືກັນ. ຄົນທີ່ຍັງບໍ່ເປັນຜູ້ໃຫຍ່ທາງຄວາມເຊື່ອອາດຢາກໃຫ້ຄົນອື່ນບອກວ່າລາວຕ້ອງເຮັດຫຍັງຫຼືໃຫ້ຄົນອື່ນຕັດສິນໃຈແທນລາວ. ກົງກັນຂ້າມ ເຖິງວ່າຄົນທີ່ເປັນຜູ້ໃຫຍ່ທາງຄວາມເຊື່ອຈະຂໍຄວາມຊ່ວຍເຫຼືອຫຼືຖາມຄົນທີ່ມີສະຕິປັນຍາແລະມີປະສົບການຫຼາຍກວ່າ ແຕ່ລາວຮູ້ວ່າລາວຕ້ອງຕັດສິນໃຈເອົາເອງແລະຮູ້ວ່າພະເຢໂຫວາຄາດໝາຍໃຫ້ລາວ “ແບກຄວາມຮັບຜິດຊອບຂອງໂຕເອງ.”—ຄລຕ. 6:5
8. ຄົນທີ່ເປັນຜູ້ໃຫຍ່ທາງຄວາມເຊື່ອແຕ່ລະຄົນຕ່າງກັນໃນເລື່ອງໃດແດ່?
8 ຜູ້ໃຫຍ່ແຕ່ລະຄົນມີຮູບຮ່າງໜ້າຕາບໍ່ຄືກັນ ຄົນທີ່ເປັນຜູ້ໃຫຍ່ທາງຄວາມເຊື່ອກໍຕ່າງກັນໃນເລື່ອງສະຕິປັນຍາ ຄວາມກ້າຫານ ຄວາມເອື້ອເຟື້ອ ແລະຄວາມເຫັນອົກເຫັນໃຈ. ນອກຈາກນັ້ນ ເມື່ອຄົນທີ່ເປັນຜູ້ໃຫຍ່ທາງຄວາມເຊື່ອ 2 ຄົນເຈິສະຖານະການຄ້າຍຄືກັນ ເຂົາເຈົ້າອາດຕັດສິນໃຈຕ່າງກັນ ແຕ່ການຕັດສິນໃຈທັງສອງແບບເປັນຕາມຫຼັກການໃນຄຳພີໄບເບິນ. ສ່ວນຫຼາຍມັກຈະເປັນແບບນັ້ນເມື່ອການຕັດສິນໃຈກ່ຽວຂ້ອງກັບໃຈຮູ້ຜິດຮູ້ຖືກ. ດັ່ງນັ້ນ ເຂົາເຈົ້າຈະບໍ່ຕຳໜິກັນຖ້າອີກຄົນໜຶ່ງຕັດສິນໃຈບໍ່ຄືກັບລາວ ແຕ່ເຂົາເຈົ້າຈະຮັກສາຄວາມເປັນນ້ຳໜຶ່ງໃຈດຽວກັນໄວ້.—ຣມ. 14:10; 1ກຣ. 1:10
ເຮົາຈະກ້າວໜ້າຈົນເປັນຜູ້ໃຫຍ່ທາງຄວາມເຊື່ອໄດ້ແນວໃດ?
9. ເຮົາຈະກ້າວໜ້າເປັນຜູ້ໃຫຍ່ທາງຄວາມເຊື່ອໂດຍອັດຕະໂນມັດໄດ້ບໍ? ຂໍໃຫ້ອະທິບາຍ.
9 ເມື່ອເວລາຜ່ານໄປ ເຮົາທຸກຄົນກໍຈະໃຫຍ່ຂຶ້ນຕາມທຳມະຊາດ ແຕ່ການເປັນຜູ້ໃຫຍ່ທາງຄວາມເຊື່ອບໍ່ແມ່ນສິ່ງທີ່ຈະໄດ້ໂດຍອັດຕະໂນມັດ. ຕົວຢ່າງເຊັ່ນ: ພີ່ນ້ອງໃນເມືອງໂກຣິນໂທຍອມຮັບເອົາຂ່າວດີ ຮັບບັບເຕມາ ໄດ້ຮັບພະລັງບໍລິສຸດ ແລະໄດ້ຮັບປະໂຫຍດຈາກຄຳແນະນຳຫຼາຍຢ່າງຂອງໂປໂລ. (ກຈກ. 18:8-11) ແຕ່ເຂົາເຈົ້າຫຼາຍຄົນກໍບໍ່ໄດ້ເປັນຜູ້ໃຫຍ່ທາງຄວາມເຊື່ອເຖິງວ່າຈະຮັບບັບເຕມາໄດ້ຫຼາຍປີແລ້ວ. (1ກຣ. 3:2) ເຮົາຈະເຮັດແນວໃດຈຶ່ງຊິບໍ່ເປັນຄືກັບເຂົາເຈົ້າ?
10. ເຮົາຕ້ອງເຮັດຫຍັງເພື່ອຈະເປັນຜູ້ໃຫຍ່ທາງຄວາມເຊື່ອ? (ຢູດາ 20)
10 ເພື່ອຈະເປັນຜູ້ໃຫຍ່ທາງຄວາມເຊື່ອ ເຮົາຕ້ອງມີຄວາມຕ້ອງການທີ່ຈະເປັນແບບນັ້ນກ່ອນ. ຄົນຂາດປະສົບການທີ່ພໍໃຈກັບສິ່ງທີ່ໂຕເອງເປັນຢູ່ຈະບໍ່ມີທາງເປັນຜູ້ໃຫຍ່ທາງຄວາມເຊື່ອໄດ້ເລີຍ. (ສພສ. 1:22) ເຮົາບໍ່ຢາກເປັນຄົນທີ່ໃຫຍ່ແຕ່ໂຕທີ່ຍັງໃຫ້ພໍ່ແມ່ຕັດສິນໃຈແທນຕະຫຼອດ ແຕ່ເຮົາຢາກສ້າງຄວາມເຊື່ອຂອງເຮົາໃຫ້ເຂັ້ມແຂງດ້ວຍໂຕເອງ. (ອ່ານຢູດາ 20) ຖ້າເຈົ້າກຳລັງພະຍາຍາມຈະເປັນຜູ້ໃຫຍ່ທາງຄວາມເຊື່ອ ໃຫ້ອະທິດຖານຂໍພະເຢໂຫວາຊ່ວຍເຈົ້າໃຫ້ “ມີທັງຄວາມຕ້ອງການແລະກຳລັງ” ເພື່ອຈະເຮັດສິ່ງທີ່ເພິ່ນພໍໃຈ.—ຟລປ. 2:13
11. ພະເຢໂຫວາໃຫ້ມີຫຍັງແດ່ເພື່ອຊ່ວຍເຮົາໃຫ້ກ້າວໜ້າຈົນເປັນຜູ້ໃຫຍ່ທາງຄວາມເຊື່ອ? (ເອເຟໂຊ 4:11-13)
11 ພະເຢໂຫວາບໍ່ໄດ້ຄາດໝາຍໃຫ້ເຮົາພະຍາຍາມເປັນຜູ້ໃຫຍ່ທາງຄວາມເຊື່ອດ້ວຍໂຕເອງ ແຕ່ເພິ່ນໃຫ້ເຮົາມີຜູ້ເບິ່ງແຍງແລະຜູ້ສອນໃນປະຊາຄົມເພື່ອຊ່ວຍເຮົາໃຫ້ເປັນຜູ້ໃຫຍ່ທາງຄວາມເຊື່ອ “ຈົນເປັນຜູ້ໃຫຍ່ຄືກັບພະຄລິດ.” (ອ່ານເອເຟໂຊ 4:11-13) ພະເຢໂຫວາຍັງໃຫ້ພະລັງບໍລິສຸດເພື່ອຊ່ວຍເຮົາໃຫ້ “ຄິດຄືກັບພະຄລິດ.” (1ກຣ. 2:14-16) ນອກຈາກນັ້ນ ພະເຢໂຫວາຍັງໃຫ້ຂຽນປຶ້ມຂ່າວດີ 4 ຫົວເພື່ອຊ່ວຍເຮົາໃຫ້ຮູ້ວ່າພະເຢຊູຄິດ ເວົ້າ ແລະເຮັດຫຍັງຕອນທີ່ເພິ່ນເຮັດວຽກຮັບໃຊ້ຢູ່ໃນໂລກ. ຖ້າເຈົ້າຮຽນແບບສິ່ງທີ່ພະເຢຊູຄິດແລະເຮັດ ເຈົ້າກໍຈະເປັນຜູ້ໃຫຍ່ທາງຄວາມເຊື່ອໄດ້.
ຄວາມຮູ້ທີ່ເລິກເຊິ່ງໃນພະຄຳພີທີ່ເປັນຄືກັບອາຫານແຂງ
12. “ຫຼັກຄຳສອນເບື້ອງຕົ້ນກ່ຽວກັບພະຄລິດ” ແມ່ນຫຍັງ?
12 ເພື່ອຈະກ້າວໜ້າຈົນເປັນຜູ້ໃຫຍ່ທາງຄວາມເຊື່ອ ເຮົາຕ້ອງ “ຜ່ານຫຼັກຄຳສອນເບື້ອງຕົ້ນກ່ຽວກັບພະຄລິດມາແລ້ວ” ເຊິ່ງກໍຄືຄຳສອນພື້ນຖານຂອງຄລິດສະຕຽນ ເຊັ່ນ: ການກັບໃຈ ຄວາມເຊື່ອ ການຮັບບັບເຕມາ ແລະການຟື້ນຄືນມາຈາກຕາຍ. (ຮຣ. 6:1, 2) ຄຳສອນເຫຼົ່ານີ້ເປັນຄຳສອນພື້ນຖານທີ່ຄລິດສະຕຽນທຸກຄົນຕ້ອງເຊື່ອ. ຍ້ອນແນວນີ້ ເປໂຕຈຶ່ງເວົ້າເຖິງຄຳສອນເຫຼົ່ານີ້ຕອນທີ່ລາວປະກາດກັບຄົນກຸ່ມໃຫຍ່ໃນວັນເພັນເຕກອດ. (ກຈກ. 2:32-35, 38) ເຮົາຕ້ອງຍອມຮັບຄຳສອນພື້ນຖານເຫຼົ່ານີ້ເພື່ອຈະເປັນລູກສິດຂອງພະເຢຊູ. ໂປໂລເຕືອນວ່າຖ້າຜູ້ໃດບໍ່ເຊື່ອຄຳສອນເລື່ອງການຟື້ນຄືນມາຈາກຕາຍ ລາວກໍບໍ່ແມ່ນຄລິດສະຕຽນແທ້. (1ກຣ. 15:12-14) ເຮົາຕ້ອງບໍ່ພໍໃຈແຕ່ກັບການຮູ້ຈັກຄຳສອນພື້ນຖານເທົ່ານັ້ນ.
13. ເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຈາກອາຫານແຂງທີ່ເວົ້າເຖິງໃນເຮັບເຣີ 5:14? (ເບິ່ງຮູບນຳ)
13 ຄວາມຮູ້ທີ່ເລິກເຊິ່ງໃນພະຄຳພີທີ່ເປັນຄືກັບອາຫານແຂງຕ່າງຈາກຄຳສອນພື້ນຖານ. ອາຫານແຂງບໍ່ໄດ້ມີແຕ່ກົດໝາຍຂອງພະເຢໂຫວາເທົ່ານັ້ນ ແຕ່ລວມເຖິງຫຼັກການຕ່າງໆຂອງພະເຢໂຫວານຳເຊິ່ງຈະຊ່ວຍເຮົາໃຫ້ເຂົ້າໃຈຄວາມຄິດຂອງເພິ່ນ. ເພື່ອຈະໄດ້ຮັບປະໂຫຍດຈາກຄວາມຮູ້ທີ່ເລິກເຊິ່ງເຫຼົ່ານີ້ ເຮົາຕ້ອງອ່ານ ຄົ້ນຄວ້າ ຄິດຕຶກຕອງ ແລະເອົາສິ່ງທີ່ໄດ້ຮຽນໄປໃຊ້. ຖ້າເຮັດແບບນີ້ ເຮົາກໍກຳລັງຝຶກໂຕເອງໃຫ້ຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ. c—ອ່ານເຮັບເຣີ 5:14
ຄວາມຮູ້ທີ່ເລິກເຊິ່ງໃນພະຄຳພີທີ່ເປັນຄືກັບອາຫານແຂງສອນເຮົາໃຫ້ຮູ້ວ່າຈະຕັດສິນໃຈແນວໃດເພື່ອເຮັດໃຫ້ພະເຢໂຫວາພໍໃຈ (ເບິ່ງຂໍ້ 13) d
14. ໂປໂລຊ່ວຍຄລິດສະຕຽນໃນເມືອງໂກຣິນໂທແນວໃດໃຫ້ກ້າວໜ້າຈົນເປັນຜູ້ໃຫຍ່ທາງຄວາມເຊື່ອ?
14 ເມື່ອຄົນທີ່ຍັງບໍ່ເປັນຜູ້ໃຫຍ່ທາງຄວາມເຊື່ອເຈິສະຖານະການທີ່ບໍ່ມີກົດຕາຍໂຕບອກໄວ້ໃນຄຳພີໄບເບິນ ເຂົາເຈົ້າກໍບໍ່ຮູ້ວ່າຈະຕັດສິນໃຈແນວໃດ. ເຂົາເຈົ້າອາດເລືອກເຮັດຕາມໃຈໂຕເອງຫຼືອາດຢາກໃຫ້ມີຄົນມາຕັ້ງກົດໃຫ້. ຄລິດສະຕຽນໃນເມືອງໂກຣິນໂທອາດເປັນແບບນັ້ນ. ເບິ່ງຄືວ່າເຂົາເຈົ້າຂໍໃຫ້ໂປໂລຕັ້ງກົດເລື່ອງກິນຂອງກິນທີ່ເອົາໄປບູຊາຮູບບູຊາ. ແທນທີ່ໂປໂລຈະເຮັດແບບນັ້ນ ລາວຊ່ວຍເຂົາເຈົ້າໃຫ້ເຫັນວ່າແຕ່ລະຄົນມີ “ສິດ” ເລືອກເອງວ່າຈະກິນຫຼືບໍ່ກິນ ແລ້ວແຕ່ໃຈຮູ້ຜິດຮູ້ຖືກຂອງເຂົາເຈົ້າ. ໂປໂລຫາເຫດຜົນຈາກຫຼັກການໃນຄຳພີໄບເບິນເພື່ອຊ່ວຍເຂົາເຈົ້າໃຫ້ຕັດສິນໃຈໃນແບບທີ່ບໍ່ຮູ້ສຶກຜິດແລະບໍ່ເຮັດໃຫ້ຄົນອື່ນບໍ່ສະບາຍໃຈ. (1ກຣ. 8:4, 7-9) ສິ່ງທີ່ໂປໂລເຮັດເປັນການສອນຄລິດສະຕຽນໃນເມືອງໂກຣິນໂທໃຫ້ຝຶກໃຊ້ຄວາມຄິດໂດຍອາໄສຄຳພີໄບເບິນເພື່ອຈະຕັດສິນໃຈເອົາເອງ ແທນທີ່ຈະເພິ່ງຄົນອື່ນຫຼືຊອກເບິ່ງວ່າມີກົດຫຍັງແດ່.
15. ໂປໂລຊ່ວຍຄລິດສະຕຽນຄົນເຮັບເຣີແນວໃດໃຫ້ກ້າວໜ້າຈົນເປັນຜູ້ໃຫຍ່ທາງຄວາມເຊື່ອ?
15 ເຮົາໄດ້ຮຽນເລື່ອງທີ່ສຳຄັນອີກເລື່ອງໜຶ່ງຈາກຈົດໝາຍທີ່ໂປໂລຂຽນໄປຫາຄລິດສະຕຽນຄົນເຮັບເຣີ. ເຂົາເຈົ້າບາງຄົນມີຄວາມເຊື່ອບໍ່ເຂັ້ມແຂງ ເຂົາເຈົ້າຈຶ່ງ “ກັບໄປເປັນຄືຄົນທີ່ຕ້ອງກິນນ້ຳນົມ ບໍ່ແມ່ນອາຫານແຂງ.” (ຮຣ. 5:12) ເຂົາເຈົ້າບໍ່ໄດ້ຮຽນຮູ້ແລະບໍ່ຍອມຮັບເລື່ອງໃໝ່ໆທີ່ພະເຢໂຫວາສອນຜ່ານທາງປະຊາຄົມ. (ສພສ. 4:18) ຕົວຢ່າງເຊັ່ນ: ຄລິດສະຕຽນຄົນເຮັບເຣີຫຼາຍຄົນຍັງສະໜັບສະໜູນກົດໝາຍຂອງໂມເຊທັງໆທີ່ກົດໝາຍນີ້ຖືກຍົກເລີກໄດ້ 30 ປີແລ້ວຫຼັງຈາກພະເຢຊູມາຕາຍເປັນຄ່າໄຖ່. (ຣມ. 10:4; ຕຕ. 1:10) ທີ່ຈິງ ຄລິດສະຕຽນເຫຼົ່ານີ້ມີເວລາຕັ້ງ 30 ປີເພື່ອຈະປັບຄວາມຄິດຂອງໂຕເອງ! ຈົດໝາຍທີ່ໂປໂລຂຽນໄປຫາເຂົາເຈົ້າມີຄວາມຮູ້ທີ່ເລິກເຊິ່ງທີ່ຊ່ວຍເຂົາເຈົ້າໃຫ້ເຫັນວ່າການນະມັດສະການພະເຢໂຫວາຮູບແບບໃໝ່ໂດຍຜ່ານທາງພະເຢຊູແມ່ນດີກວ່າ. ຈົດໝາຍນີ້ຍັງຊ່ວຍເຂົາເຈົ້າໃຫ້ກ້າປະກາດຕໍ່ໆໄປເຖິງວ່າຈະຖືກຕໍ່ຕ້ານ.—ຮຣ. 10:19-23
ລະວັງທີ່ຈະບໍ່ໝັ້ນໃຈໃນໂຕເອງຫຼາຍເກີນໄປ
16. ເມື່ອເຮົາກ້າວໜ້າຈົນເປັນຜູ້ໃຫຍ່ທາງຄວາມເຊື່ອແລ້ວ ເຮົາຕ້ອງເຮັດຫຍັງອີກ?
16 ເມື່ອເຮົາກ້າວໜ້າຈົນເປັນຜູ້ໃຫຍ່ທາງຄວາມເຊື່ອແລ້ວ ເຮົາກໍຕ້ອງພະຍາຍາມທີ່ຈະເປັນແບບນັ້ນຕໍ່ໆໄປ. ເຮົາຕ້ອງລະວັງທີ່ຈະບໍ່ໝັ້ນໃຈໃນໂຕເອງຫຼາຍເກີນໄປ. (1ກຣ. 10:12) ເຮົາຕ້ອງ “ກວດເບິ່ງໂຕເອງຢູ່ສະເໝີ” ເພື່ອແນ່ໃຈວ່າເຮົາກຳລັງກ້າວໜ້າຕໍ່ໆໄປ.—2ກຣ. 13:5
17. ຈົດໝາຍທີ່ໂປໂລຂຽນໄປຫາພີ່ນ້ອງຢູ່ເມືອງໂກໂລຊາຍສະແດງໃຫ້ເຫັນແນວໃດວ່າເຂົາເຈົ້າຕ້ອງເປັນຜູ້ໃຫຍ່ທາງຄວາມເຊື່ອຕໍ່ໆໄປ?
17 ໃນຈົດໝາຍທີ່ໂປໂລຂຽນໄປຫາພີ່ນ້ອງຢູ່ເມືອງໂກໂລຊາຍ ລາວເນັ້ນອີກເທື່ອໜຶ່ງວ່າເປັນເລື່ອງສຳຄັນທີ່ຕ້ອງເປັນຜູ້ໃຫຍ່ທາງຄວາມເຊື່ອສະເໝີ. ເຖິງວ່າເຂົາເຈົ້າເປັນຜູ້ໃຫຍ່ທາງຄວາມເຊື່ອຢູ່ແລ້ວ ແຕ່ໂປໂລກໍເຕືອນເຂົາເຈົ້າໃຫ້ລະວັງແລະຢ່າຖືກຫຼອກລວງດ້ວຍແນວຄິດຕ່າງໆຂອງໂລກ. (ກລຊ. 2:6-10) ເອປາຟາຮູ້ຈັກພີ່ນ້ອງຢູ່ເມືອງໂກໂລຊາຍດີແລະລາວເປັນຫ່ວງເຂົາເຈົ້າຫຼາຍ ລາວຈຶ່ງອະທິດຖານເລື້ອຍໆເພື່ອເຂົາເຈົ້າຈະ “ເປັນຜູ້ໃຫຍ່ໃນທຸກດ້ານ.” (ກລຊ. 4:12) ເຮົາຮຽນຫຍັງຈາກເລື່ອງນີ້? ທັງໂປໂລແລະເອປາຟາຮູ້ດີວ່າຖ້າຢາກເປັນຜູ້ໃຫຍ່ທາງຄວາມເຊື່ອຕໍ່ໆໄປ ຕ້ອງໄດ້ພະຍາຍາມຫຼາຍແລະຕ້ອງໃຫ້ພະເຢໂຫວາຊ່ວຍ. ໂປໂລກັບເອປາຟາຢາກໃຫ້ພີ່ນ້ອງໃນເມືອງໂກໂລຊາຍເປັນຜູ້ໃຫຍ່ທາງຄວາມເຊື່ອຕໍ່ໆໄປເຖິງວ່າຈະເຈິຄວາມຍາກລຳບາກແບບໃດກໍຕາມ.
18. ອາດເກີດຫຍັງຂຶ້ນກັບຄົນທີ່ເປັນຜູ້ໃຫຍ່ທາງຄວາມເຊື່ອ? (ເບິ່ງຮູບນຳ)
18 ໂປໂລເຕືອນຄລິດສະຕຽນຄົນເຮັບເຣີວ່າ ເຖິງວ່າຈະເປັນຜູ້ໃຫຍ່ທາງຄວາມເຊື່ອແລ້ວ ແຕ່ກໍຕ້ອງລະວັງໂຕໃຫ້ດີ ຍ້ອນພະເຢໂຫວາອາດບໍ່ຍອມຮັບຄົນຫົວແຂງທີ່ບໍ່ຍອມກັບໃຈແລະບໍ່ຍອມຮັບການຍົກໂທດຈາກເພິ່ນ. ເປັນຕາດີໃຈແທ້ໆທີ່ຄລິດສະຕຽນຄົນເຮັບເຣີບໍ່ໄດ້ເປັນເຖິງຂັ້ນນັ້ນ. (ຮຣ. 6:4-9) ໃນທຸກມື້ນີ້ເດ? ຖ້າມີບາງຄົນເຊົາຮັບໃຊ້ພະເຢໂຫວາຫຼືຖືກຕັດສຳພັນແຕ່ຕໍ່ມາໄດ້ກັບໃຈ ເຂົາເຈົ້າຈະເປັນແນວໃດ? ຖ້າເຂົາເຈົ້າຖ່ອມໂຕແລະກັບໃຈແທ້ໆ ເຂົາເຈົ້າກໍບໍ່ໄດ້ເປັນຄົນແບບທີ່ໂປໂລເວົ້າເຖິງ. ເຖິງຈະເປັນແນວນັ້ນ ເຂົາເຈົ້າກໍຍັງຕ້ອງໄດ້ຮັບຄວາມຊ່ວຍເຫຼືອເມື່ອກັບມາຫາພະເຢໂຫວາ. (ອຊກ. 34:15, 16) ຜູ້ເບິ່ງແຍງອາດຂໍໃຫ້ພີ່ນ້ອງທີ່ເປັນຜູ້ໃຫຍ່ທາງຄວາມເຊື່ອຊ່ວຍເຂົາເຈົ້າໃຫ້ມີຄວາມເຊື່ອເຂັ້ມແຂງແລະສະໜິດກັບພະເຢໂຫວາອີກເທື່ອໜຶ່ງ.
ພະເຢໂຫວາກຽມວິທີທີ່ຈະຊ່ວຍຄົນທີ່ອ່ອນແອໃຫ້ກັບມາມີຄວາມເຊື່ອເຂັ້ມແຂງແລະສະໜິດກັບເພິ່ນອີກເທື່ອໜຶ່ງ (ເບິ່ງຂໍ້ 18)
19. ເຮົາຄວນມີເປົ້າໝາຍຫຍັງ?
19 ຖ້າເຈົ້າກຳລັງພະຍາຍາມກ້າວໜ້າເພື່ອຈະເປັນຜູ້ໃຫຍ່ທາງຄວາມເຊື່ອ ຂໍໃຫ້ໝັ້ນໃຈວ່າເຈົ້າເຮັດໄດ້ແນ່ນອນ! ໃຫ້ຮັບເອົາຄວາມຮູ້ທີ່ເລິກເຊິ່ງທີ່ເປັນຄືກັບອາຫານແຂງຕໍ່ໆໄປ ແລະພະຍາຍາມທີ່ຈະຄິດຄືກັບພະເຢໂຫວາໃຫ້ຫຼາຍຂຶ້ນເລື້ອຍໆ. ເມື່ອເຈົ້າເປັນຜູ້ໃຫຍ່ທາງຄວາມເຊື່ອແລ້ວ ກໍໃຫ້ພະຍາຍາມເປັນແບບນັ້ນຕໍ່ໆໄປ.
ເຈົ້າຈະຕອບແນວໃດ?
-
ການເປັນຜູ້ໃຫຍ່ທາງຄວາມເຊື່ອໝາຍຄວາມວ່າແນວໃດ?
-
ເຮົາຈະກ້າວໜ້າຈົນເປັນຜູ້ໃຫຍ່ທາງຄວາມເຊື່ອໄດ້ແນວໃດ?
-
ເປັນຫຍັງເຮົາຕ້ອງລະວັງທີ່ຈະບໍ່ໝັ້ນໃຈໃນໂຕເອງຫຼາຍເກີນໄປ?
ເພງທີ 65 ກ້າວໜ້າຕໍ່ຕໍ່ໄປ!
a ເຖິງວ່າພະຄຳພີພາກພາສາເຮັບເຣີບໍ່ໄດ້ໃຊ້ຄຳວ່າ “ເປັນຜູ້ໃຫຍ່” ແລະ “ບໍ່ເປັນຜູ້ໃຫຍ່” ແຕ່ກໍມີແນວຄິດກ່ຽວກັບເລື່ອງນີ້ຢູ່. ຕົວຢ່າງເຊັ່ນ: ໃນປຶ້ມສຸພາສິດມີການສົມທຽບຄວາມແຕກຕ່າງລະຫວ່າງຄົນທີ່ຍັງໜຸ່ມແລະຂາດປະສົບການກັບຄົນສະຫຼາດແລະຮູ້ຈັກຄິດ.—ສພສ. 1:4, 5
b ເບິ່ງບົດຄວາມ “ເຈົ້າຈະບໍ່ຫຼົງເຊື່ອຂໍ້ມູນຜິດໆໄດ້ແນວໃດ?” ໃນສ່ວນ “ເລື່ອງອື່ນໆ” ທີ່ຢູ່ໃນສ່ວນບົດຄວາມຊຸດໃນເວັບໄຊ jw.org ແລະໃນແອັບ JW Library®. (ພາສາໄທ)
c ເບິ່ງຫົວຂໍ້ “ເລື່ອງສຳລັບໃຊ້ສຶກສາ” ໃນສະບັບນີ້.
d ຄຳອະທິບາຍຮູບ: ພີ່ນ້ອງຊາຍຄົນໜຶ່ງໃຊ້ຫຼັກການທີ່ໄດ້ຮຽນໃນຄຳພີໄບເບິນຕອນທີ່ລາວເລືອກເບິ່ງໜັງ.
