ແມຣີ້​ກັບ​ຈອນ a ຜົວ​ຂອງ​ລາວ​ຢູ່​ໃນ​ປະເທດ​ທີ່​ມີ​ຄົນ​ຟີລິບປິນ​ຫຼາຍ​ຄົນ​ມາ​ເຮັດ​ວຽກ​ຢູ່​ຫັ້ນ. ເຂົາເຈົ້າ​ມີ​ຄວາມ​ສຸກ​ຫຼາຍ​ທີ່​ໄດ້​ປະກາດ​ກັບ​ຄົນ​ເຫຼົ່າ​ນັ້ນ. ໃນ​ໄລຍະ​ທີ່​ພະຍາດ​ໂຄວິດ-19 ລະບາດ ແມຣີ້​ໄດ້​ເລີ່ມ​ສຶກສາ​ຄຳພີ​ໄບເບິນ​ກັບ​ຫຼາຍ​ຄົນ​ບໍ່​ພຽງ​ແຕ່​ຄົນ​ທີ່​ຢູ່​ໃນ​ປະເທດ​ຂອງ​ລາວ​ເທົ່າ​ນັ້ນ ແຕ່​ມີ​ຄົນ​ທີ່​ມາ​ຈາກ​ປະເທດ​ອື່ນ​ນຳ. ລາວ​ເຮັດ​ແບບ​ນັ້ນ​ໄດ້​ແນວ​ໃດ?

ແມຣີ້​ຈະ​ຖາມ​ນັກສຶກສາ​ຂອງ​ລາວ​ວ່າ: “ເຈົ້າ​ຮູ້​ຈັກ​ໃຜ​ບໍ​ທີ່​ຢາກ​ຮຽນ​ຄຳພີ​ໄບເບິນ?” ຖ້າ​ເຂົາເຈົ້າ​ຕອບ​ວ່າ​ຮູ້​ຈັກ ລາວ​ຈະ​ຂໍ​ໃຫ້​ນັກສຶກສາ​ແນະນຳ​ໃຫ້​ຮູ້​ຈັກ​ກັບ​ຄົນ​ເຫຼົ່າ​ນັ້ນ. ການ​ຖາມ​ຄຳ​ຖາມ​ງ່າຍໆ​ແບບ​ນີ້​ໄດ້​ຜົນ​ດີ​ຫຼາຍ. ຍ້ອນຫຍັງ? ຍ້ອນ​ວ່າ​ຄົນ​ທີ່​ເຫັນຄ່າ​ຄວາມ​ຮູ້​ໃນ​ຄຳພີ​ໄບເບິນ​ມັກ​ຈະ​ບອກ​ສິ່ງ​ທີ່​ລາວ​ໄດ້​ຮຽນ​ກັບ​ຄົນ​ໃນ​ຄອບຄົວ​ຫຼື​ໝູ່. ການ​ຖາມ​ຄຳ​ຖາມ​ແບບ​ນີ້​ເກີດ​ຜົນ​ແນວ​ໃດ?

ຈັດສະມິນ​ນັກສຶກສາ​ຂອງ​ແມຣີ້​ໄດ້​ແນະນຳ 4 ຄົນ​ທີ່​ຢາກ​ຮຽນ​ຄຳພີ​ໄບເບິນ​ໃຫ້​ແມຣີ້​ຮູ້​ຈັກ. ໜຶ່ງ​ໃນ​ນັ້ນ​ແມ່ນ​ຄຣິດສະຕິນ ລາວ​ມັກ​ສິ່ງ​ທີ່​ໄດ້​ຮຽນ​ຫຼາຍ​ຈົນ​ຂໍ​ສຶກສາ 2 ເທື່ອ​ຕໍ່​ອາທິດ. ເມື່ອ​ແມຣີ້​ຖາມ​ຄຣິດສະຕິນ​ວ່າ​ເຈົ້າ​ຮູ້​ຈັກ​ໃຜ​ບໍ​ທີ່​ຢາກ​ຮຽນ​ຄຳພີ​ໄບເບິນ ຄຣິດສະຕິນ​ຕອບ​ວ່າ: “ຮູ້​ຈັກ ຂ້ອຍ​ຈະ​ແນະນຳ​ໝູ່​ຂ້ອຍ​ໃຫ້​ເຈົ້າ​ຮູ້​ຈັກ​ເດີ້!” ພາຍ​ໃນ​ສອງ​ສາມ​ອາທິດ ຄຣິດສະຕິນ​ໄດ້​ແນະນຳ​ໝູ່ 4 ຄົນ​ທີ່​ຢາກ​ຮຽນ​ຄຳພີ​ໄບເບິນ​ໃຫ້​ແມຣີ້​ຮູ້​ຈັກ. ຕໍ່​ມາ ຄຣິດສະຕິນ​ກໍ​ແນະນຳ​ໝູ່​ຄົນ​ອື່ນໆ​ອີກ​ແລະ​ບາງ​ຄົນ​ໃນ​ນັ້ນ​ກໍ​ແນະນຳ​ໝູ່​ຕໍ່​ອີກ.

ຄຣິດສະຕິນ​ຢາກ​ໃຫ້​ຄອບຄົວ​ຂອງ​ລາວ​ທີ່​ຢູ່​ຟີລິບປິນ​ຮຽນ​ຄຳພີ​ໄບເບິນ​ຄື​ກັນ. ສະນັ້ນ ລາວ​ຈຶ່ງ​ເວົ້າ​ເລື່ອງ​ພະ​ເຢໂຫວາ​ກັບ​ແອນເດຣຍ​ລູກ​ສາວ​ຂອງ​ລາວ. ຕອນ​ທຳອິດ ແອນເດຣຍ​ຄິດ​ວ່າ: ‘ພະຍານ​ພະ​ເຢໂຫວາ​ເປັນ​ສາສະໜາ​ທີ່​ແປກ ເຂົາເຈົ້າ​ບໍ່​ເຊື່ອ​ໃນ​ພະ​ເຢຊູ​ແລະ​ໃຊ້​ແຕ່​ພະຄຳພີ​ພາກ​ພັນທະ​ສັນຍາ​ເກົ່າ.’ ແຕ່​ຫຼັງ​ຈາກ​ແອນເດຣຍ​ສຶກສາ​ໄດ້​ເທື່ອ​ໜຶ່ງ ລາວ​ກໍ​ເຂົ້າໃຈ​ວ່າ​ສິ່ງ​ທີ່​ລາວ​ຄິດ​ກ່ຽວກັບ​ພະຍານ​ພະ​ເຢໂຫວາ​ບໍ່​ຖືກຕ້ອງ. ທຸກ​ເທື່ອ​ທີ່​ໄດ້​ຮຽນ​ສິ່ງ​ໃໝ່ໆ​ຈາກ​ຄຳພີ​ໄບເບິນ ລາວ​ຈະ​ເວົ້າ​ວ່າ: “ຖ້າ​ຄຳພີ​ໄບເບິນ​ເວົ້າ​ແນວ​ນັ້ນ ມັນ​ກະ​ຕ້ອງ​ເປັນ​ຄວາມ​ຈິງ.”

ຫຼັງ​ຈາກ​ນັ້ນ ແອນເດຣຍ​ກໍ​ແນະນຳ​ໝູ່ 2 ຄົນ​ໃຫ້​ແມຣີ້​ຮູ້​ຈັກ​ແລະ​ໝູ່​ຄົນ​ໜຶ່ງ​ຢູ່​ບ່ອນ​ເຮັດ​ວຽກ​ໄດ້​ເລີ່ມ​ຮຽນ​ຄຳພີ​ໄບເບິນ. ແອນເດຣຍ​ມີ​ອາ​ຜູ້​ໜຶ່ງ​ຊື່​ແອງເຈລ້າ​ເຊິ່ງ​ເປັນ​ຄົນ​ຕາບອດ. ຕອນ​ທີ່​ແມຣີ້​ມາ​ສຶກສາ​ໃຫ້​ແອນເດຣຍ ແອງເຈລ້າ​ໄດ້​ຟັງ​ຕະຫຼອດ​ໂດຍ​ທີ່​ແມຣີ້​ບໍ່​ຮູ້. ມີ​ມື້​ໜຶ່ງ ແອງເຈລ້າ​ໄດ້​ບອກ​ແອນເດຣຍ​ວ່າ​ໃຫ້​ແມຣີ້​ມາ​ສຶກສາ​ຄຳພີ​ໄບເບິນ​ໃຫ້​ລາວ​ແດ່. ແອງເຈລ້າ​ມັກ​ສິ່ງ​ທີ່​ໄດ້​ຮຽນ​ຫຼາຍ. ພາຍ​ໃນ 1 ເດືອນ ລາວ​ຈື່​ຂໍ້​ພະຄຳພີ​ໄດ້​ຫຼາຍ​ຂໍ້​ແລະ​ຢາກ​ຮຽນ 4 ເທື່ອ​ຕໍ່​ອາທິດ. ຍ້ອນ​ແອນເດຣຍ​ຊ່ວຍ ແອງເຈລ້າ​ຈຶ່ງ​ເຂົ້າ​ຮ່ວມ​ການ​ປະຊຸມ​ທາງ​ຊູມ​ໄດ້​ເປັນ​ປະຈຳ.

 ຕອນ​ທີ່​ແມຣີ້​ສຶກສາ​ໃຫ້​ຄຣິດສະຕິນ ໂຈຊົວ​ຜົວ​ຂອງ​ຄຣິດສະຕິນ​ມັກ​ຈະ​ຢູ່​ໃກ້ໆ​ຫັ້ນ ແມຣີ້​ຈຶ່ງ​ຊວນ​ລາວ​ໃຫ້​ມາ​ນັ່ງ​ຟັງ​ນຳ. ໂຈຊົວ​ເວົ້າ​ວ່າ: “ຂ້ອຍ​ຊິ​ນັ່ງ​ຟັງ​ຊື່ໆ​ເດີ້ ເຈົ້າ​ຫ້າມ​ຖາມ​ຫຍັງ​ຂ້ອຍ. ຖ້າ​ເຈົ້າ​ຖາມ ຂ້ອຍ​ຊິ​ຍ່າງ​ໜີ​ໂລດ!” ແຕ່​ເມື່ອ​ເລີ່ມ​ສຶກສາ​ໄດ້ 5 ນາທີ ລາວ​ພັດ​ຖາມ​ຫຼາຍ​ກວ່າ​ຄຣິດສະຕິນ​ຊ້ຳ ແລະ​ຢາກ​ລົມ​ເລື່ອງ​ຄຳພີ​ໄບເບິນ​ຕໍ່.

ການ​ໃຊ້​ຄຳ​ຖາມ​ງ່າຍໆ​ເຮັດ​ໃຫ້​ແມຣີ້​ໄດ້​ສຶກສາ​ກັບ​ຫຼາຍ​ຄົນ. ລາວ​ໄດ້​ແບ່ງ​ນັກສຶກສາ​ຈຳນວນ​ໜຶ່ງ​ໃຫ້​ພີ່ນ້ອງ​ໃນ​ປະຊາຄົມ​ສຶກສາ​ຊ່ວຍ. ສະຫຼຸບ​ແລ້ວ ລາວ​ໄດ້​ສຶກສາ​ກັບ 28 ຄົນ​ຈາກ 4 ປະເທດ.

ຈັດສະມິນ​ນັກສຶກສາ​ຄົນ​ທຳອິດ​ທີ່​ເວົ້າ​ເຖິງ​ໃນ​ປະສົບການ​ນີ້​ຮັບ​ບັບເຕມາ​ໃນ​ເດືອນ​ເມສາ ປີ 2021. ຄຣິດສະຕິນ​ຮັບ​ບັບເຕມາ​ໃນ​ເດືອນ​ພຶດສະພາ ປີ 2022 ແລະ​ລາວ​ໄດ້​ກັບ​ໄປ​ຫາ​ຄອບຄົວ​ຢູ່​ຟີລິບປິນ. ນັກສຶກສາ​ອີກ 2 ຄົນ​ທີ່​ຄຣິດສະຕິນ​ແນະນຳ​ໃຫ້​ຮູ້​ຈັກ​ກໍ​ຮັບ​ບັບເຕມາ​ຄື​ກັນ. ສອງ​ສາມ​ເດືອນ​ຕໍ່​ມາ​ແອງເຈລ້າ​ກໍ​ຮັບ​ບັບເຕມາ​ແລະ​ຕອນນີ້​ລາວ​ເປັນ​ໄພໂອເນຍ​ປະຈຳ. ໂຈຊົວ​ຜົວ​ຂອງ​ຄຣິດສະຕິນ​ແລະ​ແອນເດຣຍ​ລູກ​ສາວ​ຂອງ​ເຂົາເຈົ້າ​ແລະ​ນັກສຶກສາ​ຄົນ​ອື່ນໆ​ກໍ​ກ້າວໜ້າ​ດີ​ຫຼາຍ.

ໃນ​ສະຕະວັດ​ທຳອິດ ຫຼາຍ​ຄົນ​ໄດ້​ບອກ​ຂ່າວ​ດີ​ທີ່​ເຂົາເຈົ້າ​ໄດ້​ຮຽນ​ກັບ​ຄົນ​ໃນ​ຄອບຄົວ​ແລະ​ໝູ່​ຂອງ​ເຂົາເຈົ້າ. (ຢຮ. 1:41, 42ກ; ກຈກ. 10:24, 27, 48; 16:25-33) ໃຫ້​ຖາມ​ນັກສຶກສາ​ຂອງ​ເຈົ້າ​ຫຼື​ຄົນ​ທີ່​ສົນໃຈ​ຮຽນ​ຄຳພີ​ໄບເບິນ​ວ່າ: “ເຈົ້າ​ຮູ້​ຈັກ​ໃຜ​ບໍ​ທີ່​ຢາກ​ຮຽນ​ຄຳພີ​ໄບເບິນ?” ບໍ່​ແນ່​ໄດ໋ ການ​ຖາມ​ຄຳ​ຖາມ​ງ່າຍໆ​ແບບ​ນີ້​ອາດ​ເຮັດ​ໃຫ້​ເຈົ້າ​ເຈິ​ຫຼາຍ​ຄົນ​ທີ່​ຢາກ​ຮຽນ​ຄຳພີ​ໄບເບິນ​ກະ​ໄດ້.