ໃຫ້ຮ້ອງເພງດ້ວຍຄວາມຍິນດີ!
“ຈົ່ງ [ຮ້ອງເພງ] ສັນລະເສີນພະເຢໂຫວາເຫດວ່າເປັນການດີ.”—ຄຳເພງ 147:1
ເພງ: 10, 2
1. ການຮ້ອງເພງເຮັດໃຫ້ເຮົາມີໂອກາດໄດ້ເຮັດຫຍັງ?
ນັກແຕ່ງເພງທີ່ມີຊື່ສຽງຄົນໜຶ່ງບອກວ່າ: “ຖ້ອຍຄຳຊ່ວຍໃຫ້ເຈົ້າເຂົ້າໃຈຄວາມຄິດ ສຽງດົນຕີຊ່ວຍໃຫ້ເຈົ້າເຂົ້າໃຈຄວາມຮູ້ສຶກ ແຕ່ເພງຊ່ວຍໃຫ້ເຈົ້າເຂົ້າໃຈທັງຄວາມຄິດແລະຄວາມຮູ້ສຶກ.” ເພງຂອງເຮົາເຮັດໃຫ້ເຮົາໄດ້ສັນລະເສີນແລະສະແດງຄວາມຮັກຕໍ່ພະເຢໂຫວາພໍ່ຜູ້ຢູ່ໃນສະຫວັນ ແລະຍັງເຮັດໃຫ້ເຮົາຮູ້ສຶກໃກ້ຊິດກັບພະອົງຫຼາຍຂຶ້ນ. ດັ່ງນັ້ນ ເປັນເລື່ອງງ່າຍທີ່ຈະເຂົ້າໃຈວ່າເປັນຫຍັງການຮ້ອງເພງຈຶ່ງມີບົດບາດສຳຄັນໃນການນະມັດສະການບໍລິສຸດບໍ່ວ່າເຮົາຈະຮ້ອງເພງຄົນດຽວຫຼືຮ້ອງກັບພີ່ນ້ອງຂອງເຮົາ.
2, 3. (ກ) ບາງຄົນອາດຮູ້ສຶກແນວໃດກ່ຽວກັບການຮ້ອງເພງໃຫ້ດັງເຕັມສຽງຢູ່ໃນຫໍປະຊຸມ? (ຂ) ຄຳຖາມຫຍັງທີ່ເຮົາຈະພິຈາລະນາໃນບົດຄວາມນີ້?
2 ເຈົ້າຮູ້ສຶກແນວໃດກ່ຽວກັບການຮ້ອງເພງດັງເຕັມສຽງເມື່ອຢູ່ໃນຫໍປະຊຸມ? ນັ້ນເຮັດໃຫ້ເຈົ້າອາຍບໍ? ໃນບາງວັດທະນະທຳຜູ້ຊາຍອາດຮູ້ສຶກອຶດອັດທີ່ຈະຮ້ອງເພງຕໍ່ໜ້າຄົນອື່ນ. ຄວາມຄິດແບບນີ້ສົ່ງຜົນທີ່ບໍ່ດີຕໍ່ທັງປະຊາຄົມໄດ້ ໂດຍສະເພາະຖ້າຜູ້ເຖົ້າແກ່ບໍ່ຄ່ອຍກ້າຮ້ອງເພງ ຫຼືຫຍຸ້ງຢູ່ກັບວຽກອື່ນໃນລະຫວ່າງທີ່ຮ້ອງເພງ.—ຄຳເພງ 30:12
3 ການຮ້ອງເພງເປັນສ່ວນໜຶ່ງຂອງການນະມັດສະການພະເຢໂຫວາ. ແນ່ນອນວ່າເຮົາຄົງບໍ່ຢາກຍ່າງອອກໄປທາງນອກໃນລະຫວ່າງທີ່ຮ້ອງເພງຫຼືພາດສ່ວນນັ້ນຂອງການປະຊຸມ. ດັ່ງນັ້ນ ເຮົາຕ້ອງຖາມຕົວເອງວ່າ: ຂ້ອຍຮູ້ສຶກແນວໃດກ່ຽວກັບການຮ້ອງເພງໃນການປະຊຸມ? ຂ້ອຍຈະເຮັດຫຍັງໄດ້ແດ່ຖ້າຂ້ອຍຮູ້ສຶກວ່າບໍ່ກ້າຮ້ອງເພງຕໍ່ໜ້າຄົນອື່ນ? ແລະຂ້ອຍຈະຮ້ອງເພງຈາກຄວາມຮູ້ສຶກໄດ້ແນວໃດ?
ການຮ້ອງເພງເປັນສ່ວນສຳຄັນຂອງການນະມັດສະການແທ້
4, 5. ໃນສະໄໝອິດສະລາແອນບູຮານມີການຈັດກຽມຫຍັງແດ່ເພື່ອຮ້ອງເພງຢູ່ວິຫານ?
4 ຕະຫຼອດປະຫວັດສາດທີ່ຜ່ານມາ ຜູ້ຄົນທີ່ນະມັດສະການພະເຢໂຫວາໃຊ້ດົນຕີເພື່ອສັນລະເສີນພະອົງ. ໜ້າສົນໃຈ ຕອນທີ່ຊາວອິດສະລາແອນສັດຊື່ຕໍ່ພະເຢໂຫວາເຂົາເຈົ້າໄດ້ໃຫ້ການຮ້ອງເພງເປັນສ່ວນສຳຄັນໃນການນະມັດສະການ. ຕົວຢ່າງເຊັ່ນ: ຕອນທີ່ດາວິດກຽມການໄວ້ເພື່ອສ້າງວິຫານ ລາວໃຫ້ພວກເລວີ 4.000 ຄົນສັນລະເສີນພະເຢໂຫວາດ້ວຍການຫຼິ້ນດົນຕີ ແລະໃນຈຳນວນນີ້ມີ 288 ຄົນທີ່ “ຝຶກຫຼິ້ນດົນຕີສັນລະເສີນພະເຢໂຫວາຈົນຊຳນານແລ້ວ.”—1 ຂ່າວຄາວ 23:5; 25:7, ລ.ມ.
5 ການຫຼິ້ນດົນຕີແລະການຮ້ອງເພງຍັງເປັນສ່ວນສຳຄັນຂອງການອຸທິດວິຫານ. ຄຳພີໄບເບິນບອກວ່າ: ‘ເມື່ອພວກເປົ່າແກທັງຫຼາຍກັບພວກລຳເພງພາກັນຍົກສຽງຄືຄົນດຽວສັນລະເສີນແລະໂມທະນາພະເດດພະຄຸນພະເຢໂຫວາ ແລະເຂົາໄດ້ຍົກສຽງປາກດ້ວຍກັນກັບແກ ກັບແສ່ງ ກັບເຄື່ອງດົນຕີຕ່າງໆສັນລະເສີນພະເຢໂຫວາ . . . ລັດສະໝີຂອງພະເຢໂຫວາກໍຢູ່ເຕັມວິຫານຂອງພະເຈົ້າ.’ ເຫດການນີ້ຄົງຕ້ອງເສີມຄວາມເຊື່ອຂອງຊາວອິດສະລາແອນໃຫ້ເຂັ້ມແຂງແທ້ໆ!—2 ຂ່າວຄາວ 5:13, 14; 7:6
6. ຕອນທີ່ເນເຫມີເປັນຜູ້ສຳເລັດລາຊະການ ລາວໄດ້ຈັດໃຫ້ມີການຫຼິ້ນດົນຕີແລະຮ້ອງເພງແນວໃດ?
6 ເນເຫມີໄດ້ເບິ່ງແຍງແລະຈັດລະບຽບໃຫ້ຊາວອິດສະແອນສ້າງກຳແພງເມືອງເຢຣຶຊາເລມຂຶ້ນໃໝ່ ແລະຍັງໄດ້ຈັດໃຫ້ຊາວເລວີຮ້ອງເພງແລະຫຼິ້ນດົນຕີ. ການສະແດງຂອງເຂົາເຈົ້າເຮັດໃຫ້ງານສະຫຼອງການອຸທິດກຳແພງມີຄວາມມ່ວນຊື່ນຫຼາຍຂຶ້ນ. ເນເຫມີໄດ້ຈັດໃຫ້ມີ ‘ພວກລຳສັນລະເສີນ 2 ກຸ່ມ.’ ທັງ 2 ກຸ່ມຍ່າງຢູ່ເທິງກຳແພງແຍກກັນຄົນລະຟາກແລ້ວກໍຍ່າງມາພົບກັນຢູ່ເທິງກຳແພງໃນສ່ວນທີ່ຢູ່ໃກ້ກັບວິຫານຫຼາຍທີ່ສຸດ. ສຽງເພງທີ່ເຂົາເຈົ້າຮ້ອງນັ້ນດັງໄປໄກຈົນຄົນທີ່ຢູ່ໄກໆກໍຍັງໄດ້ຍິນ. (ເນເຫມີ 12:27, 28, 31, 38, 40, 43) ດັ່ງນັ້ນ ເຮົາໝັ້ນໃຈໄດ້ວ່າພະເຢໂຫວາມີຄວາມສຸກທີ່ໄດ້ຍິນຜູ້ນະມັດສະການພະອົງຮ້ອງເພງຢ່າງສຸດຫົວໃຈເພື່ອສັນລະເສີນພະອົງ.
7. ພະເຍຊູເຮັດໃຫ້ເຫັນແນວໃດວ່າການຮ້ອງເພງສຳຄັນຕໍ່ການນະມັດສະການຂອງຄລິດສະຕຽນ?
7 ໃນສະໄໝຂອງພະເຍຊູ ດົນຕີຍັງເປັນສ່ວນສຳຄັນຂອງການນະມັດສະການແທ້. ຂໍໃຫ້ຄິດເຖິງວັນສຳຄັນທີ່ສຸດໃນປະຫວັດສາດຂອງມະນຸດ. ຫຼັງຈາກທີ່ພະເຍຊູຈັດໃຫ້ມີການສະຫຼອງອາຫານແລງຂອງພະຄລິດກັບພວກລູກສິດແລ້ວ ເພິ່ນກັບພວກລູກສິດກໍຮ້ອງເພງສັນລະເສີນພະເຢໂຫວານຳກັນ.—ອ່ານມັດທາຍ 26:30
8. ຄລິດສະຕຽນໃນສະຕະວັດທຳອິດວາງຕົວຢ່າງທີ່ດີແນວໃດໃນການຮ້ອງເພງສັນລະເສີນພະເຈົ້າ?
8 ຄລິດສະຕຽນໃນສະຕະວັດທຳອິດໄດ້ວາງຕົວຢ່າງທີ່ດີໃນການຮ້ອງເພງສັນລະເສີນພະເຈົ້າ. ເຂົາເຈົ້າບໍ່ຕ້ອງໄປວິຫານເພື່ອນະມັດສະການພະເຢໂຫວາຄືກັບຊາວອິດສະລາແອນ ເຂົາເຈົ້າພົບກັນຢູ່ເຮືອນສ່ວນຕົວ ເຖິງວ່າເຮືອນຂອງເຂົາເຈົ້າຈະບໍ່ງາມບໍ່ໜ້າປະທັບໃຈເທົ່າກັບວິຫານ ແຕ່ເຂົາເຈົ້າກໍຮ້ອງເພງອອກມາຈາກຫົວໃຈ. ທີ່ຈິງອັກຄະສາວົກໂປໂລບອກພີ່ນ້ອງຊາຍວ່າ: “ໃຫ້ພວກເຈົ້າໝັ່ນສອນແລະໃຫ້ກຳລັງໃຈກັນສະເໝີດ້ວຍເພງສະດຸດີ ເພງສັນລະເສີນພະເຈົ້າ ແລະເພງນະມັດສະການທີ່ຮ້ອງດ້ວຍຄວາມສຳນຶກບຸນຄຸນ ໃຫ້ຮ້ອງເພງຈາກໃຈໃຫ້ກັບພະເຢໂຫວາສະເໝີ.” (ໂກໂລດ 3:16, ລ.ມ.) ເຮົາຄວນຮ້ອງເພງຈາກປຶ້ມເພງຂອງເຮົາ “ດ້ວຍຄວາມສຳນຶກບຸນຄຸນ” ເພາະເພງເຫຼົ່ານີ້ເປັນສ່ວນໜຶ່ງຂອງ ‘ອາຫານຕາມເວລາທີ່ເໝາະສົມ’ ເຊິ່ງ “ທາດທີ່ສັດຊື່ແລະສຸຂຸມ” ຈັດກຽມໄວ້ໃຫ້ເຮົາ.—ມັດທາຍ 24:45, ລ.ມ.
ເຈົ້າຈະຮ້ອງເພງດ້ວຍຄວາມໝັ້ນໃຈໄດ້ແນວໃດ?
9. (ກ) ເປັນຫຍັງບາງຄົນຮູ້ສຶກບໍ່ກ້າຮ້ອງເພງສັນລະເສີນພະເຢໂຫວາຢູ່ຫໍປະຊຸມຫຼືການປະຊຸມໃຫຍ່? (ຂ) ເຮົາຄວນຮ້ອງເພງສັນລະເສີນພະເຢໂຫວາແນວໃດ ແລະໃຜຄວນນຳໜ້າໃນເລື່ອງນີ້? (ເບິ່ງຮູບທຳອິດ)
9 ມີເຫດຜົນຫຍັງແດ່ທີ່ອາດເຮັດໃຫ້ເຈົ້າບໍ່ກ້າຮ້ອງເພງ? ບາງເທື່ອອາດເປັນຍ້ອນວັດທະນະທຳຫຼືຄອບຄົວຂອງເຈົ້າບໍ່ຄ່ອຍມັກຮ້ອງເພງ. ບາງເທື່ອເຈົ້າອາດສົມທຽບສຽງຂອງເຈົ້າກັບນັກຮ້ອງມືອາຊີບໃນວິທະຍຸຫຼືໂທລະທັດ ແລ້ວເຈົ້າກໍຮູ້ສຶກອາຍແລະຜິດຫວັງກັບສຽງຕົວເອງ. ແຕ່ເຮົາທຸກຄົນມີໜ້າທີ່ຮັບຜິດຊອບໃນການຮ້ອງເພງສັນລະເສີນພະເຢໂຫວາ. ດັ່ງນັ້ນ ເຈົ້າຕ້ອງຍົກປຶ້ມຂຶ້ນ ເງີຍໜ້າຂຶ້ນ ແລະຮ້ອງອອກມາດ້ວຍຄວາມຮູ້ສຶກຈາກຫົວໃຈ! (ເອເຊດຣາເຊ 3:11; ອ່ານຄຳເພງ 147:1) ຫໍປະຊຸມຫຼາຍແຫ່ງໃນທຸກມື້ນີ້ມີຈໍພາບສະແດງເນື້ອເພງເຊິ່ງຊ່ວຍໃຫ້ເຮົາຮ້ອງເພງໄດ້ດັງຂຶ້ນ. ໜ້າສົນໃຈທີ່ມີການຮ້ອງເພງລາຊະອານາຈັກໃນໂຮງຮຽນພະລາຊະກິດສຳລັບຜູ້ເຖົ້າແກ່. ນີ້ເນັ້ນໃຫ້ເຫັນວ່າເປັນເລື່ອງສຳຄັນທີ່ຜູ້ເຖົ້າແກ່ຈະນຳໜ້າໃນການຮ້ອງເພງຢູ່ຫໍປະຊຸມ.
10. ເຮົາຄວນຈື່ຫຍັງໄວ້ສະເໝີຖ້າເຮົາຢ້ານທີ່ຈະຮ້ອງເພງໃຫ້ດັງເຕັມສຽງ?
10 ຫຼາຍຄົນຢ້ານທີ່ຈະຮ້ອງເພງອອກມາໃຫ້ດັງເຕັມສຽງ ຍ້ອນເຂົາເຈົ້າຄິດວ່າສຽງຕົວເອງບໍ່ມ່ວນຫຼືຢ້ານວ່າສຽງຈະດັງໂພດ. ຂໍໃຫ້ເຮົາຈື່ໄວ້ວ່າ ຕອນທີ່ເຮົາທຸກຄົນເວົ້າກໍ “ຜິດພາດຢູ່ເລື້ອຍໆ” ແຕ່ນັ້ນກໍບໍ່ໄດ້ເຮັດໃຫ້ເຮົາເຊົາເວົ້າ. (ຢາໂກໂບ 3:2, ທ.ປ.) ດັ່ງນັ້ນ ເຖິງວ່າເຮົາຈະຮູ້ສຶກວ່າສຽງເຮົາບໍ່ດີ ແຕ່ເຮົາກໍບໍ່ຄວນໃຫ້ເລື່ອງນີ້ມາເຮັດໃຫ້ເຮົາບໍ່ກ້າຮ້ອງເພງສັນລະເສີນພະເຢໂຫວາ.
11, 12. ເຮົາຈະຮ້ອງເພງໃຫ້ດີຂຶ້ນໄດ້ແນວໃດ?
11 ບາງເທື່ອທີ່ເຮົາບໍ່ກ້າຮ້ອງເພງອາດເປັນຍ້ອນເຮົາຮ້ອງບໍ່ເປັນຫຼືບໍ່ຮູ້ວິທີຮ້ອງ. ແຕ່ມີຄຳແນະນຳງ່າຍໆທີ່ຈະຊ່ວຍເຮົາໃຫ້ຮ້ອງເພງໄດ້ດີຂຶ້ນ. *—ເບິ່ງໄຂເງື່ອນ
12 ວິທີໜຶ່ງທີ່ຈະຊ່ວຍໃຫ້ເຈົ້າຮ້ອງເພງດ້ວຍສຽງທີ່ມີພະລັງແລະຮ້ອງໃຫ້ດັງເຕັມສຽງໄດ້ຄື ການຫາຍໃຈຢ່າງຖືກຕ້ອງ. ຄືກັບໄຟຟ້າທີ່ໃຫ້ພະລັງງານດອກໄຟ ລົມຫາຍໃຈກໍໃຫ້ພະລັງກັບສຽງຂອງເຈົ້າຕອນທີ່ເຈົ້າເວົ້າຫຼືຮ້ອງເພງ. ເຈົ້າຄວນຮ້ອງໃຫ້ດັງຄືກັບທີ່ເຈົ້າເວົ້າຫຼືດັງກວ່ານັ້ນກໍໄດ້. (ເບິ່ງຄຳແນະນຳໃນປຶ້ມການຮັບປະໂຫຍດຈາກໂຮງຮຽນການຮັບໃຊ້ຕາມລະບອບຂອງພະເຈົ້າ (ບໍ່ມີໃນພາສາລາວ) ໜ້າ 181-184 ໃນຫົວຂໍ້ຍ່ອຍ “ຫາຍໃຈໃຫ້ຖືກຕ້ອງ.”) ທີ່ຈິງ ບາງເທື່ອຄຳພີໄບເບິນກໍບອກໃຫ້ຜູ້ນະມັດສະການພະເຢໂຫວາ ‘ໂຫ່ຮ້ອງດ້ວຍຄວາມຍິນດີ’ ເມື່ອຮ້ອງເພງສັນລະເສີນພະອົງ.—ຄຳເພງ 33:1-3, ລ.ມ.
13. ຂໍໃຫ້ອະທິບາຍວິທີທີ່ເຮົາຈະຮ້ອງເພງດ້ວຍຄວາມໝັ້ນໃຈຫຼາຍຂຶ້ນ.
13 ໃນລະຫວ່າງການນະມັດສະການປະຈຳຄອບຄົວຫຼືສຶກສາສ່ວນຕົວ ລອງເຮັດຕາມຄຳແນະນຳນີ້: ທຳອິດໃຫ້ເລືອກເພງທີ່ເຈົ້າມັກທີ່ສຸດໃນປຶ້ມເພງ ອ່ານເນື້ອເພງນັ້ນໃຫ້ດັງເຕັມສຽງຢ່າງມີພະລັງແລະດ້ວຍຄວາມໝັ້ນໃຈ. ຈາກນັ້ນ ພະຍາຍາມອ່ານທ່ອນໜຶ່ງບາດດຽວຈົບໂດຍບໍ່ຢຸດຫາຍໃຈດ້ວຍຄວາມດັງສໍ່າເກົ່າ. ສຸດທ້າຍກໍລອງຮ້ອງທ່ອນນັ້ນດ້ວຍສຽງທີ່ມີພະລັງໃນແບບດຽວກັນ. (ເອຊາອີ 24:14) ຖ້າເຮັດຕາມນີ້ ສຽງຮ້ອງຂອງເຈົ້າຈະມີພະລັງຫຼາຍຂຶ້ນ ເຊິ່ງເປັນເລື່ອງທີ່ດີຫຼາຍ. ດັ່ງນັ້ນ ຢ່າໃຫ້ສຽງຂອງເຈົ້າມາເຮັດໃຫ້ເຈົ້າຢ້ານຫຼືອາຍຈົນບໍ່ກ້າຮ້ອງເພງ!
14. (ກ) ເຮົາຕ້ອງເຮັດຫຍັງອີກເພື່ອຈະມີພະລັງສຽງເວລາຮ້ອງເພງ? (ເບິ່ງຂອບ “ວິທີຮ້ອງເພງໃຫ້ດີຂຶ້ນ”) (ຂ) ເຈົ້າຄິດວ່າຄຳແນະນຳຫຍັງກ່ຽວກັບເລື່ອງສຽງທີ່ມີປະໂຫຍດສຳລັບເຈົ້າ?
14 ເພື່ອຈະເຮັດໃຫ້ສຽງມີພະລັງ ເຈົ້າຕ້ອງອ້າປາກໃຫ້ມີຊ່ອງຫວ່າງກວ້າງໆ. ດັ່ງນັ້ນ ຕອນທີ່ເຈົ້າຮ້ອງເພງ ຄວນອ້າປາກໃຫ້ກວ້າງກວ່າທີ່ເຈົ້າເວົ້າປົກກະຕິ. ແຕ່ເຈົ້າຄວນເຮັດແນວໃດຖ້າເຈົ້າຮູ້ສຶກວ່າສຽງເຈົ້າບໍ່ມີພະລັງ? ເພື່ອປັບປຸງຄຸນນະພາບສຽງໃຫ້ມີພະລັງຫຼາຍຂຶ້ນ ເຈົ້າຕ້ອງປັບປຸງຄວາມກ້ອງກັງວານຂອງສຽງ. ເຈົ້າຮຽນຮູ້ວິທີຜ່ອນຄາຍທຸກສ່ວນຂອງຮ່າງກາຍ ການຕັ້ງໃຈຜ່ອນຄາຍຮ່າງກາຍພ້ອມກັບການຝຶກຮໍ່າສຽງກໍອາດຊ່ວຍໄດ້. ຖ້າສຽງຂອງເຈົ້າແຫຼມສູງເກີນໄປເດ? ໃຫ້ຜ່ອນຄາຍກ້າມເນື້ອລຳຄໍ ເພື່ອຫຼຸດຄວາມຕຶງໃນສາຍສຽງນັ້ນ ເຈົ້າກໍຈະສາມາດຫຼຸດລະດັບສຽງໃຫ້ທຸ້ມຕໍ່າລົງໄປ.
ການສັນລະເສີນຈາກຫົວໃຈ
15. (ກ) ໃນການປະຊຸມປະຈຳປີ 2016 ໄດ້ມີຄຳປະກາດຫຍັງ? (ຂ) ມີເຫດຜົນຫຍັງແດ່ທີ່ຈະຕ້ອງມີປຶ້ມເພງໃໝ່?
15 ທຸກຄົນທີ່ເຂົ້າຮ່ວມການປະຊຸມປະຈຳປີ 2016 ຕ່າງກໍຕື່ນເຕັ້ນຫຼາຍ ເມື່ອພີ່ນ້ອງສະຕີເວັນ ເລັດ ຄະນະກຳມະການປົກຄອງປະກາດວ່າມີປຶ້ມເພງໃໝ່ອອກມາຊື່ຮ້ອງເພງສັນລະເສີນພະເຢໂຫວາຢ່າງສຸດຫົວໃຈ. ພີ່ນ້ອງເລັດອະທິບາຍເຫດຜົນທີ່ຕ້ອງມີປຶ້ມເພງໃໝ່ ເຫດຜົນໜຶ່ງກໍຄືເພາະມີການປັບປຸງຄຳພີໄບເບິນສະບັບແປໂລກໃໝ່ ຈຶ່ງຕ້ອງໄດ້ປັບເນື້ອເພງເພື່ອເອົາຄຳບາງຄຳອອກເພາະຄຳເຫຼົ່ານັ້ນບໍ່ມີຢູ່ໃນສະບັບແປໂລກໃໝ່ ແລ້ວ ແລະຍັງມີການເພີ່ມເພງໃໝ່ໆທີ່ກ່ຽວກັບວຽກປະກາດແລະຄ່າໄຖ່ເຂົ້າໄປອີກ. ນອກຈາກນັ້ນ ເນື່ອງຈາກການຮ້ອງເພງເປັນສ່ວນສຳຄັນຂອງການນະມັດສະການຂອງເຮົາ ຄະນະກຳມະການປົກຄອງຈຶ່ງຢາກຜະລິດປຶ້ມໃຫ້ມີຄຸນນະພາບດີ. ດັ່ງນັ້ນ ໜ້າປົກແລະຂອບຂອງປຶ້ມເພງຈຶ່ງຄືກັບສະບັບແປໂລກໃໝ່.
16, 17. ມີຫຍັງອີກທີ່ຖືກປັບປ່ຽນໃນປຶ້ມເພງໃໝ່?
16 ເພື່ອຈະໃຫ້ພີ່ນ້ອງໃຊ້ປຶ້ມເພງໄດ້ງ່າຍຂຶ້ນ ມີການຈັດເພງເປັນໝວດໝູ່ຕາມຫົວເລື່ອງ. ຕົວຢ່າງເຊັ່ນ: ຫົວເລື່ອງທຳອິດມີ 12 ເພງເປັນເພງທີ່ກ່ຽວຂ້ອງກັບພະເຢໂຫວາ ຫົວເລື່ອງຕໍ່ມາມີ 8 ເພງເປັນເພງທີ່ກ່ຽວຂ້ອງກັບພະເຍຊູແລະຄ່າໄຖ່ ແລະໃນຕອນຕົ້ນຂອງປຶ້ມຈະມີດັດຊະນີຫົວເລື່ອງເຊິ່ງເປັນຫົວເລື່ອງທັງໝົດທີ່ມີໃນປຶ້ມເພງ. ການຈັດໝວດໝູ່ແບບນີ້ເປັນປະໂຫຍດຫຼາຍ ເຊັ່ນ ພີ່ນ້ອງຊາຍສາມາດເລືອກເພງທີ່ລາວຈະໃຊ້ໃນຄຳບັນລະຍາຍໄດ້ງ່າຍຂຶ້ນ.
17 ເພື່ອຊ່ວຍໃຫ້ທຸກຄົນຮ້ອງເພງຢ່າງສຸດຫົວໃຈ ຈຶ່ງມີການປັບປ່ຽນເນື້ອເພງບາງສ່ວນໃຫ້ເຂົ້າໃຈງ່າຍຂຶ້ນ ແລະໄດ້ພະຍາຍາມເຮັດໃຫ້ສຳນວນຂອງເນື້ອເພງເຂົ້າເຖິງອາລົມຄວາມຮູ້ສຶກແລະເຂົ້າເຖິງຫົວໃຈຂອງຜູ້ຮ້ອງ ຕົວຢ່າງເຊັ່ນ: ເນື້ອໃນຂອງເພງ “ນະມັດສະການພະເຢໂຫວາຕັ້ງແຕ່ຍັງນ້ອຍ” ໄດ້ຈັດລຽງໃໝ່ເພື່ອຖ່າຍທອດຄວາມຮູ້ສຶກຂອງໜຸ່ມສາວໃນອົງການ. ບາງເພງກໍຍັງມີການປັບປ່ຽນໃຫ້ເຂົ້າກັບການປະຊຸມແລະການປະກາດ ຕົວຢ່າງເຊັ່ນ: ເພງ “ອີ່ມໃຈກັບຂອງປະທານອັນດີຈາກພະເຈົ້າ” ປ່ຽນເປັນ “ສອນຄຳສອນຂອງພະເຈົ້າ.” ນອກຈາກນັ້ນຍັງມີການປັບປ່ຽນເນື້ອເພງ “ເຮັດໃຫ້ລາຊະອານາຈັກຂອງພະເຈົ້າເປັນທີ່ຮູ້ຈັກ” ເຊິ່ງຕອນນີ້ເພງນີ້ບໍ່ໄດ້ເວົ້າເຖິງຄວາມຮູ້ທີ່ເຮົາແຕ່ລະຄົນໄດ້ຮັບຕອນທີ່ຮຽນຄວາມຈິງເທົ່ານັ້ນ ແຕ່ເວົ້າເຖິງການທີ່ພະເຈົ້າຊ່ວຍປະຊາຊົນຊົນຂອງພະອົງໂດຍລວມໃຫ້ເຂົ້າໃຈຄວາມຈິງຫຼາຍຂຶ້ນ.
ຝຶກຊ້ອມຮ້ອງເພງໃນລະຫວ່າງການນະມັດສະການປະຈຳຄອບຄົວ (ເບິ່ງຂໍ້ 18)
18. ເປັນຫຍັງເຮົາຄວນຝຶກຮ້ອງເພງໃນປຶ້ມເພງໃໝ່? (ເບິ່ງໄຂເງື່ອນ)
18 ຫຼາຍເພງໃນປຶ້ມຮ້ອງເພງສັນລະເສີນພະເຢໂຫວາຢ່າງສຸດຫົວໃຈ ເປັນຄືກັບຄຳອະທິດຖານ. ເພງເຫຼົ່ານີ້ຊ່ວຍເຈົ້າໃຫ້ບອກຄວາມຮູ້ສຶກທີ່ເຈົ້າມີຕໍ່ພະເຢໂຫວາ. ສ່ວນເພງອື່ນໆກໍຊ່ວຍກະຕຸ້ນເຮົາໃຫ້ “ຮັກກັນແລະກັນແລະກະທຳການດີ.” (ເຫບເລີ 10:24) ເພື່ອຈະຮ້ອງເພງໃນປຶ້ມເພງໃໝ່ນີ້ໄດ້ ເຮົາຕ້ອງລຶ້ງກັບທຳນອງ ຈັງຫວະ ແລະເນື້ອເພງຢ່າງດີ. ດັ່ງນັ້ນ ວິທີໜຶ່ງທີ່ຈະຊ່ວຍເຮົາໄດ້ແມ່ນການຟັງເພງທີ່ພີ່ນ້ອງຮ້ອງຢູ່ໃນເວັບໄຊ jw.org. ເມື່ອເຈົ້າຝຶກຮ້ອງເພງຢູ່ເຮືອນ ເຈົ້າກໍສາມາດຮ້ອງເພງຢ່າງໝັ້ນໃຈແລະຮ້ອງອອກມາຈາກຄວາມຮູ້ສຶກ *—ເບິ່ງໄຂເງື່ອນ
19. ທຸກຄົນໃນປະຊາຄົມສາມາດນະມັດສະການພະເຢໂຫວາໂດຍວິທີໃດ?
19 ຂໍໃຫ້ຈື່ໄວ້ວ່າການຮ້ອງເພງເປັນສ່ວນສຳຄັນໃນການນະມັດການຂອງເຮົາ ແລະເປັນວິທີທີ່ສະແດງໃຫ້ພະເຢໂຫວາເຫັນວ່າເຮົາຮັກແລະເຫັນຄຸນຄ່າທຸກສິ່ງທີ່ພະອົງເຮັດເພື່ອເຮົາ. (ອ່ານເອຊາອີ 12:5) ຕອນທີ່ເຈົ້າຮ້ອງເພງອອກມາດ້ວຍຄວາມຮູ້ສຶກຈາກຫົວໃຈ ເຈົ້າກໍກຳລັງກະຕຸ້ນຄົນອື່ນໃຫ້ເຮັດແບບດຽວກັນ. ທຸກຄົນໃນປະຊາຄົມ ບໍ່ວ່າຈະອາຍຸນ້ອຍຫຼືຫຼາຍ ຫຼືຄົນທີ່ເລີ່ມຮຽນຄວາມຈິງກໍສາມາດນະມັດສະການພະເຢໂຫວາໃນວິທີນີ້ໄດ້. ດັ່ງນັ້ນ ບໍ່ຕ້ອງຢ້ານທີ່ຈະຮ້ອງເພງດ້ວຍຄວາມຮູ້ສຶກຈາກຫົວໃຈ ແລະຂໍໃຫ້ເຮົາເຊື່ອຟັງຄຳແນະນຳຂອງຜູ້ຂຽນຄຳເພງທີ່ບອກວ່າ: “ຈົ່ງລຳເພງສຳລັບພະເຢໂຫວາ” ແມ່ນແລ້ວ ໃຫ້ຮ້ອງເພງດ້ວຍຄວາມຍິນດີ!—ຄຳເພງ 96:1
^ ຂໍ້ 11 ສຳລັບຄຳແນະນຳເພີ່ມເຕີມກ່ຽວກັບວິທີຮ້ອງເພງໃຫ້ດີຂຶ້ນ ເບິ່ງລາຍການໂທລະທັດ JW ເດືອນທັນວາ 2014 [ໄປທີ່ເລືອກເບິ່ງວິດີໂອ > ຈາກຫ້ອງສົ່ງ (ບໍ່ມີໃນພາສາລາວ)].
^ ຂໍ້ 18 ໃນຕອນເຊົ້າແລະຕອນສວຍຂອງການປະຊຸມພາກແລະໝວດຈະເລີ່ມຕົ້ນດ້ວຍດົນຕີບັນເລງ 10 ນາທີ. ດົນຕີນີ້ຊ່ວຍເຮົາໃຫ້ກຽມຫົວໃຈເພື່ອຮັບປະໂຫຍດຕ່າງໆຈາກການປະຊຸມບໍ່ວ່າຈະເປັນການຮ້ອງເພງຫຼືການຟັງການປະຊຸມ. ດັ່ງນັ້ນ ເຮົາທຸກຄົນຄວນນັ່ງປະຈຳບ່ອນແລະກຽມພ້ອມທີ່ຈະຟັງຕອນທີ່ດົນຕີເລີ່ມບັນເລງ.
