ປະຕິເສດຄວາມຄິດແບບຄົນທົ່ວໄປໃນໂລກ
“ຈົ່ງລະວັງໃຫ້ດີ ຢ່າໃຫ້ຜູ້ໜຶ່ງຜູ້ໃດທຳລາຍທ່ານທັງຫຼາຍເສຍດ້ວຍມັກປັນຍາ ແລະດ້ວຍຄຳລໍ້ລວງເປົ່າໆ . . . ຕາມທຳນຽມແຫ່ງໂລກ.”—ໂກໂລດ 2:8
ເພງ: 38, 31
1. ໂປໂລໄດ້ຂຽນຫຍັງເຖິງຄລິດສະຕຽນໃນເມືອງໂກໂລດ? (ເບິ່ງຮູບທຳອິດ)
ອັກຄະສາວົກໂປໂລຂຽນເຖິງຄລິດສະຕຽນໃນເມືອງໂກໂລດປະມານປີ ຄ.ສ. 60-61 ຕອນນັ້ນລາວຕິດຄຸກຢູ່ໃນເມືອງໂລມ ລາວອະທິບາຍເຖິງເຫດຜົນທີ່ເຂົາເຈົ້າຕ້ອງມີ “ຄວາມເຂົ້າໃຈຝ່າຍວິນຍານ” ເຊິ່ງກໍຄືຄວາມສາມາດທີ່ຈະເບິ່ງເລື່ອງຕ່າງໆຄືກັບທີ່ພະເຢໂຫວາເບິ່ງ. (ໂກໂລດ 1:9) ໂປໂລເວົ້າວ່າ: “ອັນໜຶ່ງ ເຮົາກ່າວດັ່ງນີ້ເພື່ອບໍ່ໃຫ້ຜູ້ໃດລໍ້ລວງທ່ານທັງຫຼາຍດ້ວຍຖ້ອຍຄຳອ່ອນຫວານຈັບໃຈໃຫ້ຫຼົງຜິດ. ຈົ່ງລະວັງໃຫ້ດີ ຢ່າໃຫ້ຜູ້ໜຶ່ງຜູ້ໃດທຳລາຍທ່ານທັງຫຼາຍເສຍດ້ວຍມັກປັນຍາ ແລະດ້ວຍຄຳລໍ້ລວງເປົ່າໆຕາມຮີດຄອງແຫ່ງມະນຸດທີ່ສືບໆມານັ້ນ ຕາມທຳນຽມແຫ່ງໂລກແລະບໍ່ໃຊ່ຕາມພະຄລິດ.” (ໂກໂລດ 2:4, 8) ຈາກນັ້ນ ໂປໂລກໍອະທິບາຍວ່າເປັນຫຍັງຄວາມຄິດຂອງຄົນສ່ວນໃຫຍ່ຈຶ່ງເປັນຄວາມຄິດທີ່ບໍ່ຖືກຕ້ອງ ແລະເປັນຫຍັງມີຫຼາຍຄົນມັກຄວາມຄິດແບບນີ້. ຕົວຢ່າງ: ຄວາມຄິດບາງຢ່າງເຮັດໃຫ້ຜູ້ຄົນຮູ້ສຶກວ່າຕົວເອງສະຫຼາດຫຼືດີກວ່າຄົນອື່ນ. ດັ່ງນັ້ນ ໂປໂລຈຶ່ງຂຽນຈົດໝາຍເພື່ອຊ່ວຍພີ່ນ້ອງໃຫ້ຫຼີກລ່ຽງຄວາມຄິດແບບຄົນທົ່ວໄປໃນໂລກແລະບໍ່ເຮັດສິ່ງທີ່ຜິດ.—ໂກໂລດ 2:16, 17, 23
2. ເປັນຫຍັງເຮົາຈຶ່ງຈະພິຈາລະນາຕົວຢ່າງຂອງຄວາມຄິດແບບຄົນທົ່ວໄປໃນໂລກ?
2 ຄົນທົ່ວໄປໃນໂລກບໍ່ສົນໃຈຫຼັກການຂອງພະເຢໂຫວາ ແລະຖ້າເຮົາບໍ່ລະວັງ ຄວາມຄິດແບບນັ້ນກໍອາດມີຜົນເຮັດໃຫ້ຄວາມເຊື່ອຂອງເຮົາຄ່ອຍໆອ່ອນລົງແລະເຮົາອາດເລີ່ມບໍ່ເຊື່ອວ່າການເຮັດຕາມຫຼັກການຂອງພະເຈົ້າດີທີ່ສຸດ. ຄວາມຄິດແບບຄົນທົ່ວໄປໃນໂລກມີຢູ່ອ້ອມຕົວເຮົາ ເຮົາທຸກຄົນຕ້ອງໄດ້ຮັບຄວາມຄິດແບບນີ້ຜ່ານທາງໂທລະພາບ ອິນເຕີເນັດ ບ່ອນເຮັດວຽກ ຫຼືໂຮງຮຽນ. ດັ່ງນັ້ນ ເຮົາຈະເຮັດແນວໃດເພື່ອຫຼີກລ່ຽງອິດທິພົນທີ່ບໍ່ດີນີ້ໄດ້? ໃນບົດຄວາມນີ້ ເຮົາຈະພິຈາລະນາ 5 ຢ່າງກ່ຽວກັບຄວາມຄິດແບບຄົນທົ່ວໄປໃນໂລກແລະວິທີທີ່ເຮົາຈະປະຕິເສດຄວາມຄິດເຫຼົ່ານີ້.
ເຮົາຕ້ອງເຊື່ອບໍວ່າມີພະເຈົ້າ?
3. ຄົນທົ່ວໄປມັກຄິດແບບໃດ? ແລະຍ້ອນຫຍັງ?
3 “ເຖິງວ່າບໍ່ເຊື່ອວ່າມີພະເຈົ້າ ຂ້ອຍກໍເປັນຄົນດີໄດ້.” ຄວາມຄິດແບບນີ້ມີຢູ່ທົ່ວໄປໃນຫຼາຍປະເທດທົ່ວໂລກ. ຄົນທີ່ຄິດແລະເວົ້າແບບນີ້ອາດບໍ່ໄດ້ຄິດຢ່າງຈິງຈັງວ່າພະເຈົ້າມີຢູ່ແທ້ຫຼືບໍ່ ເຂົາເຈົ້າອາດພຽງແຕ່ຮູ້ສຶກມັກທີ່ມີຊີວິດທີ່ອິດສະຫຼະເພາະຢາກເຮັດຕາມທີ່ຕົວເອງຕ້ອງການ. (ອ່ານຄຳເພງ 10:4) ແລະຄົນອື່ນໆກໍເວົ້າວ່າ: “ເຖິງຂ້ອຍບໍ່ເຊື່ອວ່າມີພະເຈົ້າ ຂ້ອຍກໍມີຫຼັກການໃນການໃຊ້ຊີວິດ.” ເຂົາເຈົ້າອາດຄິດວ່າຕົວເອງສະຫຼາດທີ່ຈະເວົ້າແບບນີ້.
4. ເຮົາຈະຍົກເຫດຜົນຫຍັງເພື່ອຊ່ວຍຄົນທີ່ບໍ່ເຊື່ອວ່າມີພະເຈົ້າ?
4 ມີເຫດຜົນບໍທີ່ຈະເຊື່ອວ່າບໍ່ມີຜູ້ສ້າງ? ບາງຄົນສັບສົນເມື່ອຊອກຫາຄຳຕອບຈາກວິທະຍາສາດ. ແຕ່ເຮົາສາມາດຄິດເຖິງຄວາມຈິງງ່າຍໆ ເຊັ່ນ: ເຮືອນຈະເກີດຂຶ້ນມາເອງໄດ້ບໍ? ບໍ່ມີທາງ! ມັນຕ້ອງມີຄົນສ້າງ. ແຕ່ສິ່ງມີຊີວິດມີຄວາມຊັບຊ້ອນຫຼາຍກວ່າເຮືອນ. ແມ່ນແຕ່ຈຸລັງທີ່ຮຽບງ່າຍທີ່ສຸດຂອງສິ່ງມີຊີວິດກໍຍັງສາມາດຄັດລອກຫຼືແບ່ງຕົວມັນເອງໄດ້ ແຕ່ເຮືອນເຮັດແບບນັ້ນບໍ່ໄດ້. ນີ້ໝາຍຄວາມວ່າຈຸລັງສາມາດເກັບທັງຂໍ້ມູນແລະສົ່ງຕໍ່ໄປຫາຈຸລັງຕົວທີ່ມັນແບ່ງອອກເພື່ອສ້າງຈຸລັງໃໝ່ຂຶ້ນມາ. ໃຜເປັນຜູ້ສ້າງຈຸລັງພ້ອມກັບໃສ່ຄວາມສາມາດເຫຼົ່ານີ້ໃຫ້ມັນ? ຄຳພີໄບເບິນບອກວ່າ: “ເຫດວ່າເຮືອນທຸກຫຼັງຄົງມີຜູ້ສ້າງ ແຕ່ວ່າຜູ້ໄດ້ສ້າງສັບພະທຸກສິ່ງເປັນພະເຈົ້າ.”—ເຫບເລີ 3:4
5. ເຮົາຈະອະທິບາຍແນວໃດກັບຄົນທີ່ຄິດວ່າເຮົາສາມາດຮູ້ໄດ້ເອງວ່າສິ່ງໃດດີໂດຍບໍ່ຕ້ອງເຊື່ອເລື່ອງພະເຈົ້າ?
5 ເຮົາຈະອະທິບາຍແນວໃດກັບຄົນທີ່ຄິດວ່າເຮົາສາມາດຮູ້ໄດ້ເອງວ່າສິ່ງໃດດີໂດຍບໍ່ຕ້ອງເຊື່ອໃນເລື່ອງພະເຈົ້າ? ເປັນຄວາມຈິງທີ່ຄຳພີໄບເບິນບອກວ່າ ແມ່ນແຕ່ຄົນທີ່ບໍ່ເຊື່ອວ່າມີພະເຈົ້າກໍອາດມີມາດຕະຖານທີ່ດີໃນການໃຊ້ຊີວິດ. (ໂລມ 2:14, 15) ຕົວຢ່າງ: ບາງຄົນອາດນັບຖືແລະຮັກພໍ່ແມ່ ແຕ່ຖ້າລາວບໍ່ໄດ້ເຮັດຕາມມາດຕະຖານຂອງພະເຢໂຫວາ ລາວກໍອາດຕັດສິນໃຈຜິດພາດຮ້າຍແຮງ. (ເອຊາອີ 33:22) ຄົນທີ່ສະຫຼາດຫຼາຍຄົນໃນທຸກມື້ນີ້ເຊື່ອວ່າເຮົາຕ້ອງໃຫ້ພະເຈົ້າຊ່ວຍເພື່ອຈະແກ້ໄຂບັນຫາຂອງໂລກນີ້ໄດ້. (ອ່ານເຢເຣມີ 10:23) ດັ່ງນັ້ນ ເຮົາຕ້ອງບໍ່ຄິດວ່າເຮົາສາມາດຮູ້ວ່າສິ່ງໃດດີໄດ້ໂດຍບໍ່ຕ້ອງເຊື່ອໃນພະເຈົ້າແລະບໍ່ຕ້ອງເຮັດຕາມມາດຕະຖານຂອງພະອົງ.—ຄຳເພງ 146:3
ເຮົາຕ້ອງມີສາສະໜາບໍ?
6. ຫຼາຍຄົນຄິດແນວໃດກ່ຽວກັບສາສະໜາ?
6 “ເຮົາມີຄວາມສຸກໄດ້ໂດຍບໍ່ຕ້ອງມີສາສະໜາ.” ຫຼາຍຄົນຄິດວ່າສາສະໜາເປັນເລື່ອງໜ້າເບື່ອແລະບໍ່ມີປະໂຫຍດ. ນອກຈາກນີ້ ຫຼາຍສາສະໜາສອນເລື່ອງໄຟນະລົກ ບັງຄັບໃຫ້ບໍລິຈາກເງິນ ຫຼືສະໜັບສະໜູນນັກການເມືອງ. ບໍ່ແປກທີ່ມີຄົນຫຼາຍຂຶ້ນເລື້ອຍໆບອກວ່າເຂົາເຈົ້າມີຄວາມສຸກໄດ້ໂດຍບໍ່ຕ້ອງມີສາສະໜາ! ເຂົາເຈົ້າອາດເວົ້າວ່າ: “ຂ້ອຍສົນໃຈໃນພະເຈົ້າຢູ່ ແຕ່ຂ້ອຍບໍຢາກເປັນສ່ວນໜຶ່ງຂອງສາສະໜາ.”
7. ສາສະໜາແທ້ເຮັດໃຫ້ເຈົ້າມີຄວາມສຸກແນວໃດ?
7 ເຮົາມີຄວາມສຸກໄດ້ແທ້ໆໂດຍບໍ່ຕ້ອງມີສາສະໜາບໍ? ແນ່ນອນວ່າຜູ້ຄົນຈະມີຄວາມສຸກຫຼາຍຖ້າບໍ່ມີສາສະໜາປອມ. ແຕ່ບໍ່ມີໃຜຈະສາມາດມີຄວາມສຸກແທ້ໄດ້ຖ້າບໍ່ໄດ້ເປັນເພື່ອນກັບພະເຢໂຫວາ “ພະເຈົ້າຜູ້ມີຄວາມສຸກ.” (1 ຕີໂມເຕ 1:11) ທຸກສິ່ງທີ່ພະເຢໂຫວາເຮັດເປັນປະໂຫຍດຕໍ່ຄົນອື່ນ. ໃນຖານະທີ່ເປັນຜູ້ຮັບໃຊ້ຂອງພະອົງ ເຮົາກໍມີຄວາມສຸກທີ່ໄດ້ພະຍາຍາມຊ່ວຍຄົນອື່ນ. (ກິດຈະການ 20:35) ຕົວຢ່າງ: ຂໍໃຫ້ຄິດເບິ່ງວ່າການນະມັດສະການແທ້ຊ່ວຍໃຫ້ຄອບຄົວມີຄວາມສຸກໄດ້ແນວໃດ ເຮົາຮຽນຮູ້ວ່າຕ້ອງໃຫ້ກຽດແລະສັດຊື່ຕໍ່ຄູ່ສົມລົດຂອງເຮົາ ເຮົາຕ້ອງສອນລູກໃຫ້ຮູ້ຈັກນັບຖືຄົນອື່ນໆ ແລະມີຄວາມຮັກແທ້ໃຫ້ຄົນໃນຄອບຄົວ. ການນະມັດສະການແທ້ຊ່ວຍປະຊາຊົນຂອງພະເຢໂຫວາໃຫ້ເຮັດວຽກຮ່ວມກັນຢ່າງສັນຕິໃນປະຊາຄົມແລະສະແດງຄວາມຮັກແທ້ຕໍ່ພີ່ນ້ອງຊາຍຍິງຂອງເຂົາເຈົ້າ.—ອ່ານເອຊາອີ 65:13, 14
8. ມັດທາຍ 5:3 ຊ່ວຍເຮົາແນວໃດໃຫ້ເຂົ້າໃຈວ່າອັນໃດທີ່ເຮັດໃຫ້ຄົນເຮົາມີຄວາມສຸກແທ້?
8 ຄົນເຮົາຈະມີຄວາມສຸກໄດ້ແທ້ໆບໍຖ້າບໍ່ໄດ້ຮັບໃຊ້ພະເຢໂຫວາ? ບາງຄົນອາດມີຄວາມສຸກກັບການເຮັດວຽກ ກິລາ ຫຼືສິ່ງທີ່ມັກເຮັດໃນຍາມຫວ່າງ. ສ່ວນຄົນອື່ນໆກໍຮູ້ສຶກດີທີ່ໄດ້ເບິ່ງແຍງຄອບຄົວແລະໝູ່ເພື່ອນ. ເຖິງວ່າການເຮັດສິ່ງເຫຼົ່ານີ້ຈະເຮັດໃຫ້ມີຄວາມສຸກ ແຕ່ຊີວິດຄົນເຮົາມີຫຼາຍກວ່ານັ້ນອີກ. ເຮົາຕ່າງຈາກສັດ ເຮົາໄດ້ຮູ້ຈັກພະເຈົ້າທີ່ສ້າງເຮົາແລະໄດ້ນະມັດສະການພະອົງ ພະອົງສ້າງເຮົາໃຫ້ມີຄວາມສຸກທີ່ໄດ້ເຮັດສິ່ງເຫຼົ່ານັ້ນ. (ອ່ານມັດທາຍ 5:3) ຕົວຢ່າງ: ເຮົາຮູ້ສຶກມີຄວາມສຸກແລະມີກຳລັງໃຈເມື່ອໄດ້ພົບກັບພີ່ນ້ອງຊາຍຍິງຂອງເຮົາແລະໄດ້ນະມັດສະການພະເຢໂຫວາຮ່ວມກັນ. (ຄຳເພງ 133:1) ເຮົາຍັງມີຄວາມສຸກທີ່ໄດ້ເປັນສ່ວນໜຶ່ງຂອງສັງຄົມພີ່ນ້ອງທົ່ວໂລກ ມີສິນລະທຳທີ່ດີ ແລະມີຄວາມຫວັງທີ່ດີເລີດເລື່ອງອະນາຄົດ.
ເຮົາຕ້ອງມີມາດຕະຖານດ້ານສິນລະທຳບໍ?
9. (ກ) ຄົນທົ່ວໄປມັກຄິດແນວໃດໃນເລື່ອງການມີເພດສຳພັນ? (ຂ) ເປັນຫຍັງຄຳພີໄບເບິນຈຶ່ງບອກວ່າການມີເພດສຳພັນກັບຄົນທີ່ບໍ່ແມ່ນຄູ່ສົມລົດເປັນເລື່ອງຜິດ?
9 “ການມີເພດສຳພັນກັບຄົນທີ່ບໍ່ແມ່ນຄູ່ສົມລົດຜິດບ່ອນໃດ?” ຜູ້ຄົນອາດເວົ້າວ່າ: “ເປັນຫຍັງເຈົ້າຄືເຄັ່ງຄັດແທ້? ຢາກເຮັດຫຍັງກໍເຮັດໂລດ.” ແຕ່ຄຳພີໄບເບິນຫ້າມການເຮັດຜິດສິນລະທຳທາງເພດ. * (ເບິ່ງໄຂເງື່ອນ) (ອ່ານ 1 ເທຊະໂລນີກ 4:3-8) ເນື່ອງຈາກພະເຢໂຫວາເປັນຜູ້ສ້າງເຮົາ ພະອົງຈຶ່ງມີສິດທີ່ຈະຕັ້ງກົດໝາຍໃຫ້ເຮົາ. ພະອົງບອກວ່າສະເພາະຊາຍແລະຍິງທີ່ແຕ່ງງານກັນແລ້ວເທົ່ານັ້ນຈຶ່ງຈະມີເພດສຳພັນໄດ້. ພະເຢໂຫວາໃຫ້ກົດໝາຍກັບເຮົາເພາະພະອົງຮັກເຮົາ. ພະອົງຮູ້ວ່າຖ້າເຮົາເຮັດຕາມ ຊີວິດຂອງເຮົາກໍຈະດີຂຶ້ນ. ຄອບຄົວທີ່ເຊື່ອຟັງກົດໝາຍຂອງພະເຈົ້າຈະຮັກແລະໃຫ້ກຽດກັນຫຼາຍຂຶ້ນ ແລະຈະຮູ້ສຶກໝັ້ນຄົງປອດໄພ. ສ່ວນຄົນທີ່ຮູ້ຈັກກົດໝາຍຂອງພະເຢໂຫວາແລ້ວບໍ່ເຮັດຕາມພະອົງກໍຈະລົງໂທດເຂົາເຈົ້າ.—ເຫບເລີ 13:4.
10. ຄລິດສະຕຽນຈະຕ້ານທານການເຮັດຜິດສິນລະທຳທາງເພດໄດ້ແນວໃດ?
10 ຄຳພີໄບເບິນສອນໃຫ້ເຮົາຮູ້ວິທີຫຼີກລ່ຽງການເຮັດຜິດສິນລະທຳທາງເພດ. ເຮົາຕ້ອງຄວບຄຸມສິ່ງທີ່ເຮົາເບິ່ງ. ພະເຍຊູບອກວ່າ: “ຄົນທຸກຄົນທີ່ເບິ່ງຍິງຜູ້ໜຶ່ງດ້ວຍໃຈຄຶດຢາກໄດ້ໃນຍິງນັ້ນ ຜູ້ນັ້ນໄດ້ຫຼິ້ນຊູ້ສູ່ໃນໃຈເອງກັບຍິງນັ້ນແລ້ວໆ. ແຕ່ວ່າຖ້າຕາເບື້ອງຂວາຂອງທ່ານກະທຳໃຫ້ທ່ານຕົກໃນບາບ ຈົ່ງຄວັດຕານັ້ນອອກແລະຖິ້ມໄກຈາກຕົວເສຍເຖີ້ນ.” (ມັດທາຍ 5:28, 29) ດັ່ງນັ້ນ ເຮົາຕ້ອງບໍ່ເບິ່ງສື່ລາມົກແລະບໍ່ຟັງເພງທີ່ກ່ຽວກັບການເຮັດຜິດສິນລະທຳທາງເພດ. ໂປໂລບອກວ່າ: “ໃຫ້ກຳຈັດແນວໂນ້ມແບບໂລກເຊິ່ງຢູ່ໃນອະໄວຍະວະຂອງພວກເຈົ້າ ຄືການຜິດສິນລະທຳທາງເພດ.” (ໂກໂລດ 3:5, ລ.ມ.) ເຮົາຍັງຕ້ອງຄວບຄຸມສິ່ງທີ່ເຮົາຄິດແລະເລື່ອງທີ່ເຮົາເວົ້ານຳ.—ເອເຟດ 5:3-5
ເຮົາຄວນທຸ່ມເທໃຫ້ກັບວຽກອາຊີບໃນໂລກນີ້ບໍ?
11. ເປັນຫຍັງເຮົາອາດຢາກມີວຽກອາຊີບທີ່ດີ?
11 “ວຽກອາຊີບທີ່ດີຈະເຮັດໃຫ້ເຮົາມີຄວາມສຸກ.” ອາດມີຄົນບອກໃຫ້ເຮົາທຸ່ມເທເວລາແລະກຳລັງໃຫ້ກັບວຽກອາຊີບໃນໂລກ ໂດຍສະເພາະຖ້າວຽກນັ້ນເຮັດໃຫ້ເຈົ້າມີຊື່ສຽງ ອຳນາດແລະຮັ່ງມີ. ເນື່ອງຈາກຫຼາຍຄົນຄິດວ່າວຽກອາຊີບທີ່ດີເປັນເຄັດລັບທີ່ເຮັດໃຫ້ມີຄວາມສຸກ ນັ້ນອາດເຮັດໃຫ້ເຮົາເລີ່ມຄິດແບບນັ້ນຄືກັນ.
12. ການປະສົບຄວາມສຳເລັດໃນວຽກອາຊີບເຮັດໃຫ້ເຈົ້າມີຄວາມສຸກແທ້ໆບໍ?
12 ວຽກອາຊີບທີ່ເຮັດໃຫ້ມີອຳນາດຫຼືຊື່ສຽງຈະເຮັດໃຫ້ເຈົ້າມີຄວາມສຸກແທ້ໆບໍ? ບໍ່. ລອງຄິດເບິ່ງ ຊາຕານຢາກມີອຳນາດແລະຊື່ສຽງ ແລະມັນກໍໄດ້ໃນສິ່ງທີ່ມັນຕ້ອງການ ແຕ່ມັນພັດໃຈຮ້າຍແລະບໍ່ມີຄວາມສຸກ. (ມັດທາຍ 4:8, 9; ຄຳປາກົດ 12:12) ໃນທາງກົງກັນຂ້າມ ຂໍໃຫ້ຄິດວ່າເຮົາມີຄວາມສຸກຫຼາຍສໍ່າໃດເມື່ອຊ່ວຍຄົນອື່ນໃຫ້ຮຽນຮູ້ເລື່ອງພະເຈົ້າແລະຄວາມຫວັງທີ່ດີເລີດທີ່ພະອົງສັນຍາໄວ້. ບໍ່ມີວຽກໃດໃນໂລກນີ້ຈະເຮັດໃຫ້ເຈົ້າມີຄວາມສຸກແບບນັ້ນໄດ້. ນອກຈາກນັ້ນ ເພື່ອຈະປະສົບຄວາມສຳເລັດໃນວຽກອາຊີບ ຫຼາຍຄົນໃນໂລກນີ້ຕ້ອງກາຍເປັນຄົນມັກແຂ່ງຂັນ ຕໍ່ສູ້ກັນ ຫຼືອິດສາຄົນອື່ນ. ແຕ່ສຸດທ້າຍແລ້ວເຂົາເຈົ້າກໍຮູ້ສຶກວ່າຊີວິດຫວ່າງເປົ່າ. ຄຳພີໄບເບິນບອກວ່າການເຮັດແບບນີ້ເປັນການ “ໄລ່ຕິດຕາມລົມ.”—ຜູ້ເທສະໜາປ່າວປະກາດ 4:4
13. (ກ) ເຮົາຄວນຄິດແນວໃດກ່ຽວກັບວຽກອາຊີບ? (ຂ) ອັນໃດເຮັດໃຫ້ໂປໂລມີຄວາມສຸກແທ້?
13 ແນ່ນອນວ່າເຮົາຕ້ອງຫາລ້ຽງຊີວິດແລະບໍ່ຜິດທີ່ເຮົາຈະເລືອກວຽກທີ່ເຮົາມັກ ແຕ່ວຽກຂອງເຮົາບໍ່ຄວນເປັນສິ່ງສຳຄັນທີ່ສຸດໃນຊີວິດ. ພະເຍຊູບອກວ່າ: “ບໍ່ມີຜູ້ໃດອາດເປັນຂ້າໃຊ້ຂອງເຈົ້ານາຍ 2 ທ່ານໄດ້ ເຫດວ່າເພິ່ນຈະຊັງນາຍຜູ້ນີ້ແລະຮັກນາຍຜູ້ນັ້ນ ຫຼືຈະຕິດພັນກັບນາຍຜູ້ນີ້ແລະປະໝາດນາຍຜູ້ນັ້ນ. ທ່ານທັງຫຼາຍອາດເປັນຂ້າໃຊ້ຂອງພະເຈົ້າແລະຂ້າໃຊ້ຂອງເຂົ້າຂອງເງິນຄຳກໍບໍ່ໄດ້.” (ມັດທາຍ 6:24) ການຮັບໃຊ້ພະເຢໂຫວາແລະການສອນຄຳພີໄບເບິນໃຫ້ຄົນອື່ນ ເຮັດໃຫ້ເຮົາມີຄວາມສຸກຫຼາຍແທ້ໆ. ອັກຄະສາວົກໂປໂລກໍມີປະສົບການກ່ຽວກັບເລື່ອງນີ້. ຕອນລາວຍັງໜຸ່ມ ລາວທຸ່ມເທທີ່ຈະປະສົບຜົນສຳເລັດໃນວຽກອາຊີບ. ແຕ່ຕໍ່ມາລາວກໍພົບວ່າຄວາມສຸກທີ່ແທ້ຈິງຄືການໄດ້ເຫັນວິທີທີ່ຂ່າວສານຂອງພະເຈົ້າປ່ຽນແປງຊີວິດຄົນທີ່ລາວປະກາດນຳ. (ອ່ານ 1 ເທຊະໂລນີກ 2:13, 19, 20) ບໍ່ມີວຽກອາຊີບໃດໃນໂລກນີ້ຈະເຮັດໃຫ້ເຮົາມີຄວາມສຸກເທົ່າກັບການຮັບໃຊ້ພະເຢໂຫວາແລະສອນຄົນອື່ນໃຫ້ຮູ້ຈັກພະອົງ!
ເຮົາມີຄວາມສຸກເມື່ອໄດ້ຊ່ວຍຄົນອື່ນໃຫ້ຮຽນຮູ້ກ່ຽວກັບພະເຈົ້າ (ເບິ່ງຂໍ້ 12, 13)
ເຮົາແກ້ໄຂບັນຫາຂອງໂລກນີ້ໄດ້ບໍ?
14. ເປັນຫຍັງຜູ້ຄົນມັກຄິດວ່າມະນຸດສາມາດແກ້ໄຂບັນຫາຂອງຕົວເອງໄດ້?
14 “ມະນຸດແກ້ໄຂບັນຫາຂອງຕົວເອງໄດ້.” ຫຼາຍຄົນມັກຄິດແບບນີ້. ຍ້ອນຫຍັງ? ຖ້າຄວາມຄິດນີ້ເປັນເລື່ອງຈິງ ນັ້ນກໍໝາຍຄວາມວ່າເຮົາບໍ່ຈຳເປັນຕ້ອງໄດ້ຮັບການຊີ້ນຳຈາກພະເຈົ້າແລະເຮົາສາມາດເຮັດສິ່ງໃດກໍຕາມທີ່ເຮົາຢາກເຮັດ. ເຈົ້າອາດໄດ້ຍິນຄົນເວົ້າວ່າບັນຫາເລື່ອງສົງຄາມ ອາຊະຍາກຳ ພະຍາດ ແລະຄວາມທຸກຍາກກຳລັງຫຼຸດລົງ. ລາຍງານໜຶ່ງບອກວ່າ: “ສາເຫດທີ່ສັງຄົມມະນຸດດີຂຶ້ນກໍເປັນຍ້ອນວ່າເຂົາເຈົ້າຕັດສິນໃຈຈະເຮັດໃຫ້ໂລກນີ້ໜ້າຢູ່ຂຶ້ນ.” ນີ້ເປັນຄວາມຈິງບໍ? ແລ້ວມະນຸດຫາທາງແກ້ໄຂບັນຫາຂອງໂລກໄດ້ແທ້ໆບໍ? ໃຫ້ເຮົາມາເບິ່ງຂໍ້ເທັດຈິງນຳກັນ.
15. ເປັນຫຍັງເຮົາຈຶ່ງເວົ້າໄດ້ວ່າບັນຫາໃນໂລກນີ້ຮຸນແຮງຫຼາຍ?
15 ເຄີຍມີມະນຸດຄົນໃດແກ້ບັນຫາເລື່ອງສົງຄາມໄດ້ບໍ? ສົງຄາມໂລກຄັ້ງທີ 1 ແລະ 2 ມີຫຼາຍກວ່າ 60 ລ້ານຄົນເສຍຊີວິດ. ໃນລະຫວ່າງປີ 2015 ປີດຽວ ມີ 12,4 ລ້ານຄົນຕ້ອງໄດ້ອອກຈາກເຮືອນຍ້ອນສົງຄາມຫຼືການຂົ່ມເຫງ. ສິ່ງນີ້ເຮັດໃຫ້ຈຳນວນຜູ້ລີ້ໄພທັງໝົດເພີ່ມຂຶ້ນເປັນ 65 ລ້ານຄົນ. ກ່ຽວກັບອາຊະຍາກຳເດ? ໃນບາງບ່ອນອາຊະຍາກຳບາງປະເພດອາດຫຼຸດລົງ ແຕ່ໃນຂະນະດຽວກັນອາຊະຍາກຳປະເພດອື່ນໆກຳລັງເພີ່ມຂຶ້ນເລື້ອຍໆ ເຊັ່ນ: ອາຊະຍາກຳທາງຄອມພິວເຕີ ຄວາມຮຸນແຮງໃນຄອບຄົວ ການກໍ່ການຮ້າຍ ແລະການສໍ້ໂກງ. ຈະວ່າແນວໃດກ່ຽວກັບພະຍາດ? ເປັນເລື່ອງຈິງທີ່ວ່າມະນຸດພົບວິທີປິ່ນປົວພະຍາດບາງຢ່າງ. ແຕ່ໃນປີ 2013 ມີລາຍງານວ່າ ແຕ່ລະປີມີ 9 ລ້ານຄົນທີ່ມີອາຍຸຕໍ່າກວ່າ 60 ປີຕາຍຍ້ອນພະຍາດຫົວໃຈ ຫຼອດເລືອດໃນສະໝອງ ມະເຮັງ ລະບົບທາງເດີນຫາຍໃຈ ແລະເບົາຫວານ. ແລ້ວຈະວ່າແນວໃດກັບເລື່ອງຄວາມທຸກຍາກ? ທະນາຄານໂລກລາຍງານວ່າຈຳນວນຄົນທີ່ມີຊີວິດຢ່າງທຸກຍາກໃນອາຝຼິກກາເພີ່ມຂຶ້ນຈາກ 280 ລ້ານຄົນໃນປີ 1990 ເປັນ 330 ລ້ານຄົນໃນປີ 2012.
16. (ກ) ເປັນຫຍັງຈຶ່ງມີພຽງລາຊະອານາຈັກຂອງພະເຈົ້າເທົ່ານັ້ນທີ່ຈະແກ້ໄຂບັນຫາຂອງໂລກນີ້ໄດ້? (ຂ) ທັງເອຊາອີແລະຜູ້ຂຽນຄຳເພງເວົ້າແນວໃດກ່ຽວກັບສິ່ງທີ່ລາຊະອານາຈັກຂອງພະເຈົ້າຈະເຮັດ?
16 ຂໍ້ເທັດຈິງເຫຼົ່ານີ້ບໍ່ໄດ້ເຮັດໃຫ້ເຮົາແປກໃຈ. ທຸກມື້ນີ້ເສດຖະກິດແລະອົງການທາງການເມືອງຖືກຄວບຄຸມໂດຍຄົນທີ່ເຫັນແກ່ຕົວ. ຄົນເຫຼົ່ານັ້ນບໍ່ສາມາດຢຸດສົງຄາມ ອາຊະຍາກຳ ພະຍາດ ແລະຄວາມທຸກຍາກໄດ້. ມີພຽງລາຊະອານາຈັກຂອງພະເຈົ້າເທົ່ານັ້ນທີ່ຈະເຮັດໄດ້. ລອງຄິດເຖິງສິ່ງທີ່ພະເຢໂຫວາຈະເຮັດເພື່ອມະນຸດຊາດ. ລາຊະອານາຈັກຂອງພະອົງຈະກຳຈັດຕົ້ນເຫດທັງໝົດຂອງສົງຄາມ ເຊັ່ນ: ຄວາມເຫັນແກ່ຕົວ ການສໍ້ໂກງ ຊາດນິຍົມ ສາສະໜາປອມ ແລະຊາຕານ. (ຄຳເພງ 46:8, 9) ລາຊະອານາຈັກຂອງພະເຈົ້າຈະເຮັດໃຫ້ອາຊະຍາກຳໝົດໄປ. ແມ່ນແຕ່ໃນທຸກມື້ນີ້ ລາຊະອານາຈັກນີ້ກໍສອນຫຼາຍລ້ານຄົນໃຫ້ຮັກແລະໄວ້ໃຈເຊິ່ງກັນແລະກັນ. ບໍ່ມີການປົກຄອງໃດທີ່ຈະສາມາດເຮັດແບບນີ້ໄດ້. (ເອຊາອີ 11:9) ອີກບໍ່ດົນ ພະເຢໂຫວາຈະເຮັດໃຫ້ພະຍາດຕ່າງໆໝົດໄປ ແລະຈະເຮັດໃຫ້ມະນຸດທຸກຄົນມີສຸຂະພາບສົມບູນແຂງແຮງ. (ເອຊາອີ 35:5, 6) ພະເຢໂຫວາຈະກຳຈັດຄວາມທຸກຍາກແລະເຮັດໃຫ້ທຸກຄົນມີຄວາມສຸກແລະມີສາຍສຳພັນທີ່ໃກ້ຊິດກັບພະອົງ. ສິ່ງນີ້ມີຄ່າຫຼາຍກວ່າເງິນ ບໍ່ວ່າເງິນນັ້ນຈະມີຈຳນວນຫຼາຍສໍ່າໃດ.—ຄຳເພງ 72:12, 13
“ຮູ້ວ່າຄວນຕອບແຕ່ລະຄົນຢ່າງໃດ”
17. ເຈົ້າຈະປະຕິເສດຄວາມຄິດແບບຄົນທົ່ວໄປໃນໂລກໄດ້ແນວໃດ?
17 ຖ້າເຈົ້າໄດ້ຍິນຄວາມຄິດຂອງຄົນສ່ວນໃຫຍ່ທີ່ບໍ່ຄືກັບຄວາມເຊື່ອຂອງເຈົ້າ ຂໍໃຫ້ເຈົ້າສຶກສາຄົ້ນຄວ້າເບິ່ງວ່າໃນຄຳພີໄບເບິນບອກແນວໃດແລະລົມກັບພີ່ນ້ອງທີ່ມີຄວາມເປັນຜູ້ໃຫຍ່ດ້ານຄວາມເຊື່ອ. ຫາເຫດຜົນວ່າເປັນຫຍັງຜູ້ຄົນຈຶ່ງມັກຄິດແບບນັ້ນ ແລ້ວເປັນຫຍັງຄວາມຄິດແບບນັ້ນຈຶ່ງບໍ່ຖືກຕ້ອງ ແລະເຈົ້າຈະປະຕິເສດຄວາມຄິດແບບນັ້ນໄດ້ແນວໃດ. ເຮົາສາມາດປ້ອງກັນຕົວເອງຈາກຄວາມຄິດແບບຄົນທົ່ວໄປໃນໂລກໄດ້ໂດຍເຮັດຕາມສິ່ງທີ່ໂປໂລບອກໄວ້ວ່າ: “ໃຫ້ພວກເຈົ້າໃຊ້ສະຕິປັນຍາເມື່ອຕິດຕໍ່ກ່ຽວຂ້ອງກັບຄົນນອກປະຊາຄົມຄລິດສະຕຽນ . . . ຈະໄດ້ຮູ້ວ່າຄວນຕອບແຕ່ລະຄົນຢ່າງໃດ.”—ໂກໂລດ 4:5, 6, ລ.ມ.
^ ຂໍ້ 9 ຄຳພີໄບເບິນສະບັບແປບາງສະບັບມີໂຢຮັນ 7:53–8:11 ເຊິ່ງທີ່ຈິງແລ້ວບໍ່ໄດ້ເປັນສ່ວນໜຶ່ງຂອງຂໍ້ຄວາມຕົ້ນສະບັບຂອງຄຳພີໄບເບິນ. ບາງຄົນໄດ້ອ່ານຂໍ້ເຫຼົ່ານີ້ທີ່ເພີ່ມເຂົ້າມາແລະຕີຄວາມໝາຍຜິດວ່າສະເພາະຄົນທີ່ບໍ່ມີບາບເທົ່ານັ້ນທີ່ຕັດສິນໄດ້ວ່າໃຜເຮັດຜິດຫຼືບໍ່ໄດ້ເຮັດຜິດສິນລະທຳທາງເພດ. ແຕ່ກົດໝາຍທີ່ພະເຈົ້າໃຫ້ຊາວອິດສະລາແອນບອກວ່າ: “ຖ້າເຂົາພົບຊາຍຜູ້ໜຶ່ງນອນນຳຍິງທີ່ມີຜົວແລ້ວ ເຂົາຕ້ອງຖືກໂທດປະຫານຊີວິດທັງສອງ.”—ພະບັນຍັດ 22:22
