ຢ່າໃຫ້ສິ່ງໃດກໍຕາມມາເຮັດໃຫ້ເຈົ້າພາດລາງວັນ
“ຢ່າໃຫ້ໃຜເຮັດໃຫ້ພວກເຈົ້າພາດລາງວັນ.”—ໂກໂລດ 2:18, ລ.ມ.
ເພງ: 122, 139
1, 2. (ກ) ຜູ້ຮັບໃຊ້ຂອງພະເຢໂຫວາຄອຍຖ້າລາງວັນອັນໃດ? (ຂ) ອັນໃດຈະຊ່ວຍເຮົາໃຫ້ຈົດຈໍ່ຢູ່ທີ່ລາງວັນສະເໝີ? (ເບິ່ງຮູບທຳອິດ)
ຄລິດສະຕຽນຜູ້ຖືກເຈີມມີຄວາມຫວັງທີ່ດີເລີດແທ້ໆ. ເຂົາເຈົ້າຄອຍຖ້າທີ່ຈະມີຊີວິດໃນສະຫວັນ. ອັກຄະສາວົກໂປໂລເອີ້ນຄວາມຫວັງນີ້ວ່າ: “ບຳເໜັດອັນທີ່ພະເຈົ້າໄດ້ເອີ້ນ.” (ຟີລິບ 3:14) ໃນສະຫວັນເຂົາເຈົ້າຈະປົກຄອງຮ່ວມກັບພະເຍຊູຄລິດໃນລາຊະອານາຈັກແລະເຮັດວຽກກັບເພິ່ນໃນການຊ່ວຍມະນຸດໃຫ້ກາຍເປັນຄົນສົມບູນແບບ. (ຄຳປາກົດ 20:6) ນີ້ເປັນຄວາມຫວັງທີ່ດີເລີດແທ້ໆ! ສ່ວນຄົນທີ່ເປັນແກະອື່ນກໍຄອຍຖ້າທີ່ຈະໄດ້ຮັບລາງວັນອີກຢ່າງໜຶ່ງ ນັ້ນຄືມີຊີວິດຕະຫຼອດໄປໃນໂລກທີ່ເປັນອຸທິຍານ ແລະຄວາມຫວັງນີ້ເຮັດໃຫ້ເຂົາເຈົ້າມີຄວາມສຸກແທ້!—2 ເປໂຕ 3:13
2 ໂປໂລຢາກຊ່ວຍເພື່ອນຜູ້ຖືກເຈີມຂອງລາວໃຫ້ຮັກສາຄວາມສັດຊື່ແລະໄດ້ຮັບລາງວັນ. ລາວບອກເຂົາເຈົ້າວ່າ: “ຈົ່ງຄຶດເຖິງສິ່ງທັງຫຼາຍທີ່ຢູ່ທາງເທິງ” ສະເໝີ. (ໂກໂລດ 3:2) ດັ່ງນັ້ນ ເຂົາເຈົ້າຕ້ອງຈົດຈໍ່ກັບຄວາມຫວັງທີ່ດີເລີດໃນສະຫວັນ. (ໂກໂລດ 1:4, 5) ການຄິດກ່ຽວກັບພອນຕ່າງໆທີ່ມາຈາກພະເຢໂຫວາຈະຊ່ວຍຜູ້ຮັບໃຊ້ຂອງພະອົງໃຫ້ຈົດຈໍ່ໄປທີ່ລາງວັນສະເໝີບໍ່ວ່າເຂົາເຈົ້າຈະມີຄວາມຫວັງຢູ່ໃນສະຫວັນຫຼືແຜ່ນດິນໂລກກໍຕາມ.—1 ໂກລິນໂທ 9:24
3. ໂປໂລເຕືອນຄລິດສະຕຽນເລື່ອງຫຍັງ?
3 ໂປໂລຍັງເຕືອນຄລິດສະຕຽນກ່ຽວກັບອັນຕະລາຍທີ່ອາດເຮັດໃຫ້ເຂົາເຈົ້າພາດລາງວັນ. ຕົວຢ່າງ: ລາວຂຽນເຖິງພີ່ນ້ອງທີ່ຢູ່ໃນເມືອງໂກໂລດກ່ຽວກັບຄລິດສະຕຽນປອມທີ່ພະຍາຍາມເຮັດໃຫ້ພະເຈົ້າພໍໃຈໂດຍການເຮັດຕາມກົດໝາຍຂອງໂມເຊແທນທີ່ຈະເຊື່ອໃນພະຄລິດ. (ໂກໂລດ 2:16-18) ໂປໂລເວົ້າເຖິງອັນຕະລາຍທີ່ຍັງມີຢູ່ໃນຕອນນີ້ເຊິ່ງອາດເຮັດໃຫ້ເຮົາບໍ່ໄດ້ຮັບລາງວັນ. ລາວອະທິບາຍວິທີຕ້ານທານກັບຄວາມຕ້ອງການທີ່ຈະເຮັດຜິດສິນລະທຳແລະສິ່ງທີ່ເຮົາຈະເຮັດໄດ້ເມື່ອມີບັນຫາໃນຄອບຄົວຫຼືມີບັນຫາກັບພີ່ນ້ອງໃນປະຊາຄົມ. ຄຳແນະນຳທີ່ມີຄ່າຂອງໂປໂລມີປະໂຫຍດກັບພວກເຮົາໃນທຸກມື້ນີ້ແທ້ໆ. ດັ່ງນັ້ນ ໃຫ້ເຮົາມາພິຈາລະນາຄຳເຕືອນດ້ວຍຄວາມຮັກເຊິ່ງເຮົາເຫັນໄດ້ໃນຈົດໝາຍທີ່ໂປໂລຂຽນເຖິງພີ່ນ້ອງໃນເມືອງໂກໂລດ.
ກຳຈັດຄວາມຕ້ອງການທີ່ຈະເຮັດຜິດສິນລະທຳ
4. ເປັນຫຍັງຄວາມຕ້ອງການທີ່ຈະເຮັດຜິດສິນລະທຳອາດເຮັດໃຫ້ເຮົາບໍ່ໄດ້ຮັບລາງວັນ?
4 ຫຼັງຈາກໂປໂລເຕືອນພີ່ນ້ອງໃຫ້ຄິດເຖິງຄວາມຫວັງທີ່ດີເລີດແລ້ວ ລາວຂຽນວ່າ: “ດັ່ງນັ້ນ ໃຫ້ກຳຈັດແນວໂນ້ມແບບໂລກເຊິ່ງຢູ່ໃນອະໄວຍະວະຂອງພວກເຈົ້າ ຄືການຜິດສິນລະທຳທາງເພດ ການກະທຳທີ່ບໍ່ສະອາດ ຄວາມໄຄ່ແບບທີ່ບໍ່ມີການຄວບຄຸມ ຄວາມຕ້ອງການທີ່ກໍ່ຄວາມເສຍຫາຍ ແລະຄວາມໂລບ.” (ໂກໂລດ 3:5, ລ.ມ.) ຄວາມຕ້ອງການທີ່ຈະເຮັດຜິດສິນລະທຳອາດຮຸນແຮງຫຼາຍ ເຊິ່ງສາມາດເຮັດໃຫ້ເຮົາສູນເສຍສາຍສຳພັນກັບພະເຢໂຫວາແລະຄວາມຫວັງໃນອະນາຄົດ. ພີ່ນ້ອງຊາຍຄົນໜຶ່ງທີ່ເຄີຍເຮັດຜິດສິນລະທຳທາງເພດແລະຕໍ່ມາກໍໄດ້ຮັບກັບຄືນມາປະຊາຄົມບອກວ່າ ຄວາມຕ້ອງການນີ້ມີພະລັງຫຼາຍຈົນເຮັດໃຫ້ລາວ “ຖອນໂຕບໍ່ຂຶ້ນແລະຈົນກວ່າຈະຮູ້ຕົວກໍສາຍເກີນໄປແລ້ວ.”
5. ເຮົາຈະເຮັດຫຍັງໄດ້ແດ່ເພື່ອປ້ອງກັນຕົວເອງຈາກສະຖານະການທີ່ອັນຕະລາຍ?
5 ເຮົາຈະຕ້ອງລະວັງເປັນພິເສດເມື່ອຢູ່ໃນສະຖານະການທີ່ອາດນຳເຮົາໄປສູ່ການບໍ່ເຊື່ອຟັງມາດຕະຖານຂອງພະເຢໂຫວາ. ຕົວຢ່າງ: ເປັນເລື່ອງສຸຂຸມຖ້າຄົນທີ່ກຳລັງຄົບຫາກັນຈະລົມກັນຕັ້ງແຕ່ທຳອິດວ່າຈະເຮັດຫຍັງໄດ້ ຫຼືເຮັດຫຍັງບໍ່ໄດ້ ເຊັ່ນ: ການຈັບມືຖືແຂນ ຈູບ ຫຼືຢູ່ນຳກັນສອງຕໍ່ສອງ. (ສຸພາສິດ 22:3) ສະພາບການຢ່າງອື່ນອີກທີ່ອັນຕະລາຍເຊັ່ນ: ໄປເຮັດວຽກຕ່າງແຂວງຫຼືຕ່າງປະເທດ ຫຼືເຮັດວຽກກັບເພດກົງກັນຂ້າມ. (ສຸພາສິດ 2:10-12, 16) ເຈົ້າຈະປ້ອງກັນຕົວເອງຈາກອັນຕະລາຍນີ້ແນວໃດ? ເຮັດໃຫ້ຄົນອື່ນຮູ້ວ່າເຈົ້າເປັນພະຍານພະເຢໂຫວາ ວາງຕົວໃຫ້ເໝາະສົມ ແລະຈື່ສະເໝີວ່າການຈີບຫຼິ້ນໆຫຼືການຫວ່ານສະເໜ່ຈະເຮັດໃຫ້ເກີດຄວາມເສຍຫາຍຮ້າຍແຮງ. ເຮົາຍັງຕ້ອງລະວັງເມື່ອເຮົາຮູ້ສຶກເສົ້າຫຼືເຫງົາເພາະອາດຮູ້ສຶກວ່າຢາກມີຄົນມາສົນໃຈ. ຄວາມຮູ້ສຶກແບບນີ້ອາດມີຫຼາຍຈົນເຮັດໃຫ້ເຮົາຕອບຮັບໃຜກໍຕາມທີ່ເຂົ້າມາສົນໃຈ ນີ້ອັນຕະລາຍຫຼາຍ. ຖ້າເຈົ້າຮູ້ສຶກແບບນີ້ ໃຫ້ຂໍຄວາມຊ່ວຍເຫຼືອຈາກພະເຢໂຫວາແລະພີ່ນ້ອງຊາຍຍິງ ຢ່າໃຫ້ອັນໃດກໍຕາມມາເຮັດໃຫ້ເຈົ້າພາດລາງວັນ.—ອ່ານຄຳເພງ 34:18; ສຸພາສິດ 13:20
6. ເຮົາຄວນຈື່ຫຍັງໄວ້ສະເໝີເມື່ອເລືອກຄວາມບັນເທີງ?
6 ເພື່ອຈະກຳຈັດຄວາມຕ້ອງການທີ່ຈະເຮັດຜິດສິນລະທຳ ເຮົາຕ້ອງປະຕິເສດຄວາມບັນເທີງທີ່ຜິດສິນລະທຳ. ທຸກມື້ນີ້ຄວາມບັນເທີງໃນຮູບແບບຕ່າງໆເຮັດໃຫ້ເຮົາຄິດເຖິງສິ່ງທີ່ຜູ້ຄົນໃນເມືອງຊໍດົມແລະໂຄໂມລາເຮັດ. (ຢູເດ 7) ຄົນທີ່ຜະລິດຄວາມບັນເທີງເຮັດໃຫ້ການເຮັດຜິດສິນລະທຳທາງເພດເບິ່ງຄືເປັນເລື່ອງທຳມະດາແລະບໍ່ອັນຕະລາຍ. ດັ່ງນັ້ນ ເຮົາຕ້ອງລະວັງຢູ່ສະເໝີ. ເນື່ອງຈາກເຮົາບໍ່ສາມາດຍອມຮັບຄວາມບັນເທີງທຸກຢ່າງທີ່ໂລກນີ້ສະເໜີໃຫ້ໄດ້ ເຮົາຈຶ່ງຕ້ອງເລືອກຄວາມບັນເທີງຢ່າງລະມັດລະວັງ ເພື່ອຈະບໍ່ໃຫ້ສິ່ງນັ້ນມາເຮັດໃຫ້ເຮົາພາດລາງວັນຊີວິດ.—ສຸພາສິດ 4:23
ເອົາຄວາມຮັກແລະຄວາມກະລຸນາມາ “ຫົ່ມຕົວໄວ້”
7. ໃນປະຊາຄົມຄລິດສະຕຽນອາດມີບັນຫາຫຍັງເກີດຂຶ້ນ?
7 ພວກເຮົາມີຄວາມສຸກຫຼາຍແທ້ໆທີ່ໄດ້ເປັນສ່ວນໜຶ່ງຂອງປະຊາຄົມຄລິດສະຕຽນ. ການທີ່ເຮົາໄດ້ຮຽນຄຳພີໄບເບິນຢູ່ການປະຊຸມແລະໄດ້ຊ່ວຍເຫຼືອຄົນອື່ນດ້ວຍຄວາມຮັກເຮັດໃຫ້ເຮົາຈົດຈໍ່ຢູ່ທີ່ລາງວັນສະເໝີ. ແຕ່ບາງເທື່ອກໍອາດມີການເຂົ້າໃຈຜິດເຊິ່ງເຮັດໃຫ້ມີບັນຫາກັບພີ່ນ້ອງ. ຖ້າເຮົາບໍ່ຮີບແກ້ໄຂບັນຫາກໍເປັນເລື່ອງງ່າຍທີ່ຈະເຮັດໃຫ້ເກີດຄວາມຂຸ່ນເຄືອງຕໍ່ກັນ.—ອ່ານ 1 ເປໂຕ 3:8, 9
8, 9. (ກ) ຄຸນລັກສະນະອັນໃດແດ່ຈະຊ່ວຍເຮົາໃຫ້ໄດ້ຮັບລາງວັນ? (ຂ) ອັນໃດຈະຊ່ວຍເຮົາໃຫ້ຮັກສາສັນຕິສຸກຖ້າພີ່ນ້ອງເຮັດໃຫ້ເຮົາຂຸ່ນເຄືອງໃຈ?
8 ເຮົາຕ້ອງບໍ່ຍອມໃຫ້ຄວາມຂຸ່ນເຄືອງເຮັດໃຫ້ເຮົາບໍ່ໄດ້ຮັບລາງວັນ. ໂປໂລເວົ້າເຖິງສິ່ງທີ່ຄລິດສະຕຽນຕ້ອງເຮັດວ່າ: “ເໝືອນດັ່ງພວກທີ່ພະເຈົ້າໄດ້ເລືອກໄວ້ ທີ່ເປັນບໍລິສຸດແລະທີ່ຮັກ ທ່ານທັງຫຼາຍ ຈົ່ງເອົາຄວາມອີ່ດູ ຄວາມດີ [“ຄວາມກະລຸນາ,” ລ.ມ.] ຄວາມຖ່ອມຕົວລົງ ຄວາມອ່ອນຫວານ ຄວາມອົດທົນໄວ້ມາຫົ່ມຕົວໄວ້. ຈົ່ງອົດກັ້ນໄວ້ກັນແລະກັນ ແລະຍົກໂທດໃຫ້ກັນແລະກັນຖ້າແມ່ນຜູ້ໃດມີຂໍ້ຄວາມຟ້ອງຕໍ່ຄົນອື່ນ. ພະຄລິດທັງມວນໄດ້ໂຜດຍົກໂທດຂອງທ່ານທັງຫຼາຍຢ່າງໃດ ທ່ານຈົ່ງກະທຳຢ່າງນັ້ນດ້ວຍ. ແລະຈົ່ງເອົາຄວາມຮັກຫົ່ມທາງເທິງສິ່ງທັງປວງນີ້ ຄວາມຮັກນັ້ນເປັນເຄື່ອງມັດໄວ້ແຫ່ງຄວາມດີສຳເລັດແລ້ວ.”—ໂກໂລດ 3:12-14
9 ຄວາມຮັກແລະຄວາມກະລຸນາຈະຊ່ວຍເຮົາໃຫ້ອະໄພຄົນອື່ນ. ຖ້າເຮົາຮູ້ສຶກເຈັບໃຈຈາກສິ່ງທີ່ຄົນອື່ນເວົ້າຫຼືເຮັດ ໃຫ້ເຮົາຄິດເຖິງຕອນທີ່ເຮົາເວົ້າແລະເຮັດບາງສິ່ງທີ່ບໍ່ກະລຸນາຕໍ່ຄົນອື່ນແຕ່ກໍຍັງໄດ້ຮັບການໃຫ້ອະໄພ. ເຮົາຮູ້ສຶກຂອບໃຈແທ້ໆທີ່ເຂົາເຈົ້າສະແດງຄວາມຮັກແລະຄວາມກະລຸນາຕໍ່ເຮົາ! (ອ່ານຜູ້ເທສະໜາປ່າວປະກາດ 7:21, 22) ເຮົາຂອບໃຈຄວາມກະລຸນາຂອງພະຄລິດທີ່ຊ່ວຍໃຫ້ການນະມັດສະການແທ້ເປັນໜຶ່ງດຽວ. (ໂກໂລດ 3:15) ພວກເຮົາທຸກຄົນຮັກພະເຈົ້າອົງດຽວກັນ ປະກາດຂ່າວສານດຽວກັນ ແລະມີບັນຫາຫຼາຍຢ່າງຄືກັນ. ຖ້າເຮົາສະແດງຄວາມຮັກ ຄວາມກະລຸນາແລະໃຫ້ອະໄພກັນ ປະຊາຄົມກໍຈະສາມັກຄີກັນຫຼາຍຂຶ້ນແລະເຮົາຈະສາມາດຈົດຈໍ່ກັບລາງວັນໄດ້ຕໍ່ໆໄປ.
10, 11. (ກ) ເປັນຫຍັງຄວາມອິດສາຈຶ່ງອັນຕະລາຍແທ້? (ຂ) ເຮົາຈະເຮັດຫຍັງໄດ້ແດ່ເພື່ອຈະບໍ່ໃຫ້ຄວາມອິດສາມາເຮັດໃຫ້ເຮົາພາດລາງວັນ?
10 ຄວາມອິດສາເຮັດໃຫ້ເຮົາພາດລາງວັນໄດ້. ຕົວຢ່າງໃນຄຳພີໄບເບິນສະແດງໃຫ້ເຫັນວ່າຄວາມອິດສາອັນຕະລາຍຫຼາຍສໍ່າໃດ ເຊັ່ນ: ກາອີນອິດສາອາເບນຈົນລົງມືຂ້າລາວ. ໂກເຣ ດາຖານ ແລະອາບີຣາມອິດສາໂມເຊຈົນຕໍ່ຕ້ານລາວ. ກະສັດຊາອຶລອິດສາດາວິດຈົນພະຍາຍາມຂ້າລາວ. ສິ່ງທີ່ພະຄຳຂອງພະເຈົ້າບອກເປັນຄວາມຈິງແທ້ໆທີ່ວ່າ: “ເຫດວ່າມີຄວາມຫຶງສາ [“ອິດສາລິດສະຫຍາ,” ລ.ມ.] ແລະການຖຽງກັນໃນທີ່ໃດ ມີການວຸ່ນວາຍແລະການຊົ່ວຮ້າຍຕ່າງໆໃນທີ່ນັ້ນ.”—ຢາໂກໂບ 3:16
11 ຖ້າເຮົາພະຍາຍາມສະແດງຄວາມຮັກແທ້ແລະກະລຸນາ ເຮົາກໍຈະບໍ່ອິດສາຄົນອື່ນ. ຄຳພີໄບເບິນບອກວ່າ: “ຄວາມຮັກອົດກັ້ນແລະເມດຕາກະລຸນາ ຄວາມຮັກບໍ່ອິດສາລິດສະຫຍາ.” (1 ໂກລິນໂທ 13:4, ລ.ມ.) ເພື່ອເຮົາຈະບໍ່ເປັນຄົນມັກອິດສາ ເຮົາຕ້ອງພະຍາຍາມເບິ່ງສິ່ງຕ່າງໆແບບທີ່ພະເຢໂຫວາເບິ່ງ. ເຮົາຕ້ອງເບິ່ງພີ່ນ້ອງຊາຍຍິງຂອງເຮົາວ່າເປັນອະໄວຍະວະຕ່າງໆໃນຮ່າງກາຍດຽວກັນເຊິ່ງຮ່າງກາຍນັ້ນກໍຄືປະຊາຄົມຄລິດສະຕຽນ. ຄຳພີໄບເບິນບອກວ່າ: “ຖ້າອະໄວຍະວະສ່ວນໜຶ່ງໄດ້ຮັບກຽດ ອະໄວຍະວະສ່ວນອື່ນໆທັງໝົດກໍດີອົກດີໃຈຮ່ວມກັນ.” (1 ໂກລິນໂທ 12:16-18, 26, ທ.ປ.) ຖ້າພີ່ນ້ອງຂອງເຮົາໄດ້ຮັບສິ່ງດີໆ ເຮົາຈະຍິນດີກັບລາວບໍ່ແມ່ນອິດສາລາວ. ໃຫ້ຄິດເຖິງຕົວຢ່າງທີ່ດີຂອງໂຢນາທານລູກຊາຍຂອງກະສັດຊາອຶລ. ໂຢນາທານບໍ່ໄດ້ອິດສາເມື່ອດາວິດຖືກເລືອກໃຫ້ເປັນກະສັດແທນທີ່ຈະເປັນລາວ ແຕ່ລາວໃຫ້ກຳລັງໃຈແລະຊ່ວຍເຫຼືອດາວິດ. (1 ຊາເມືອນ 23:16-18) ເຮົາຈະເປັນຄົນທີ່ມີຄວາມຮັກແລະກະລຸນາຄືກັບໂຢນາທານໄດ້ບໍ?
ໄດ້ຮັບລາງວັນໝົດທັງຄອບຄົວ
12. ຄຳພີໄບເບິນມີຄຳແນະນຳຫຍັງທີ່ຊ່ວຍຄອບຄົວຂອງເຮົາໃຫ້ໄດ້ຮັບລາງວັນ?
12 ເມື່ອທຸກຄົນໃນຄອບຄົວຂອງເຮົາໃຊ້ຫຼັກການໃນຄຳພີໄບເບິນ ຄອບຄົວຂອງເຮົາກໍຈະມີຄວາມສະຫງົບແລະຄວາມສຸກ ແລະຈະໄດ້ຮັບລາງວັນອີກດ້ວຍ. ໂປໂລໃຫ້ຄຳແນະນຳທີ່ສຸຂຸມກັບຄອບຄົວວ່າ: “ຍິງທັງຫຼາຍຜູ້ເປັນເມຍ ຈົ່ງມີໃຈອ່ອນນ້ອມຟັງຜົວແຫ່ງຕົນຕາມສົມຄວນໃນພະອົງເຈົ້າເຖີ້ນ. ທ່ານທັງຫຼາຍຜູ້ເປັນຜົວ ຈົ່ງຮັກເມຍແຫ່ງຕົນ ຢ່າມີໃຈເຜັດຮ້ອນຕໍ່ເຂົາ. ລູກທັງຫຼາຍ ຈົ່ງຟັງພໍ່ແມ່ແຫ່ງຕົນໃນສັບພະທຸກສິ່ງ ເພາະການນີ້ເປັນທີ່ຊອບໃຈພະອົງເຈົ້າ. ທ່ານທັງຫຼາຍຜູ້ເປັນພໍ່ ຢ່າກະທຳລູກທັງຫຼາຍແຫ່ງຕົນໃຫ້ເຄືອງໃຈຢ້ານວ່າເຂົາຈະເສຍໃຈ.” (ໂກໂລດ 3:18-21) ເຈົ້າເຫັນບໍວ່າຄຳແນະນຳນີ້ຊ່ວຍຄອບຄົວເຈົ້າແນວໃດ?
13. ພີ່ນ້ອງຍິງຈະຊ່ວຍຜົວແນວໃດໃຫ້ຢາກເຂົ້າມາເປັນພະຍານພະເຢໂຫວາ?
13 ເຈົ້າອາດເປັນພີ່ນ້ອງຍິງທີ່ຜົວບໍ່ໄດ້ເປັນພະຍານພະເຢໂຫວາ. ເຈົ້າຈະເຮັດແນວໃດຖ້າຮູ້ສຶກວ່າຜົວເຈົ້າບໍ່ໄດ້ປະຕິບັດກັບເຈົ້າໃນແບບທີ່ຄວນຈະເຮັດ? ຖ້າເຈົ້າໃຈຮ້າຍແລະຖຽງກັບລາວຈະເຮັດໃຫ້ສະຖານະການດີຂຶ້ນບໍ? ເຖິງວ່າເຈົ້າຈະຖຽງຊະນະ ແຕ່ນັ້ນຈະເຮັດໃຫ້ລາວຢາກຮັບໃຊ້ພະເຢໂຫວາບໍ? ຄົງບໍ່ມີທາງ. ຖ້າເຈົ້າສະແດງຄວາມນັບຖືຕໍ່ລາວໃນຖານະຫົວໜ້າຄອບຄົວ ເຈົ້າກໍຈະຊ່ວຍໃຫ້ຄອບຄົວມີຄວາມສະຫງົບສຸກຫຼາຍຂຶ້ນແລະເຮັດໃຫ້ພະເຢໂຫວາໄດ້ຮັບກຽດ. ຕົວຢ່າງທີ່ດີຂອງເຈົ້າອາດເຮັດໃຫ້ຜົວຢາກເຂົ້າມາເປັນພະຍານພະເຢໂຫວາ ແລະໃນທີ່ສຸດ ເຈົ້າທັງສອງກໍຈະໄດ້ຮັບລາງວັນນຳກັນ.—ອ່ານ 1 ເປໂຕ 3:1, 2
14. ພີ່ນ້ອງຊາຍຈະເຮັດແນວໃດຖ້າເມຍທີ່ບໍ່ໄດ້ເປັນພະຍານພະເຢໂຫວາບໍ່ນັບຖືລາວ?
14 ເຈົ້າອາດເປັນພີ່ນ້ອງຊາຍທີ່ມີເມຍບໍ່ໄດ້ເປັນພະຍານພະເຢໂຫວາ. ເຈົ້າຈະເຮັດແນວໃດຖ້າຮູ້ສຶກວ່າເມຍບໍ່ໄດ້ນັບຖືເຈົ້າ? ຖ້າເຈົ້າພະຍາຍາມສະແດງໃຫ້ລາວເຫັນວ່າໃຜເປັນຫົວໜ້າໂດຍຮ້ອງຂຶ້ນສຽງໃສ່ລາວ ນັ້ນຈະເຮັດໃຫ້ລາວຢາກນັບຖືເຈົ້າບໍ? ແນ່ນອນວ່າບໍ່! ພະເຢໂຫວາຄາດໝາຍໃຫ້ເຈົ້າເປັນຜົວທີ່ມີຄວາມຮັກທີ່ຮຽນແບບພະເຍຊູ. (ເອເຟດ 5:23) ພະເຍຊູເປັນຫົວຂອງປະຊາຄົມ ເພິ່ນມີຄວາມຮັກແລະອົດທົນສະເໝີ. (ລືກາ 9:46-48) ຖ້າເຈົ້າຮຽນແບບພະເຍຊູ ເມື່ອເວລາຜ່ານໄປເມຍຂອງເຈົ້າກໍອາດຢາກຮັບໃຊ້ພະເຢໂຫວາຄືກັນ.
15. ພີ່ນ້ອງຊາຍຈະສະແດງໃຫ້ເມຍເຫັນແນວໃດວ່າລາວຮັກເມຍ?
15 ພະເຢໂຫວາສັ່ງຜູ້ເປັນຜົວວ່າ: ‘ຈົ່ງຮັກເມຍແຫ່ງຕົນ ແລະຢ່າມີໃຈເຜັດຮ້ອນຕໍ່ລາວ.’ (ໂກໂລດ 3:19) ຜົວທີ່ຮັກເມຍຈະໃຫ້ກຽດເມຍ. ຈະໃຫ້ກຽດໂດຍວິທີໃດ? ລາວຈະຟັງຄວາມຄິດເຫັນແລະເຮັດໃຫ້ເມຍຮູ້ວ່າລາວໃຫ້ຄວາມສຳຄັນກັບສິ່ງທີ່ເມຍເວົ້າ. (1 ເປໂຕ 3:7) ເຖິງວ່າລາວຈະບໍ່ສາມາດເຮັດທຸກຢ່າງທີ່ເມຍຂໍໄດ້ ແຕ່ການຟັງເມຍຈະຊ່ວຍໃຫ້ຕັດສິນໃຈໄດ້ດີຂຶ້ນ. (ສຸພາສິດ 15:22) ຜົວທີ່ຮັກເມຍຈະບໍ່ສັ່ງໃຫ້ເມຍນັບຖື ແຕ່ລາວຈະພະຍາຍາມປະພຶດຕົວໃຫ້ເມຍຢາກນັບຖືລາວຈາກໃຈ. ຖ້າຜົວຮັກເມຍແລະລູກ ທັງຄອບຄົວກໍຈະມີຄວາມສຸກໃນການຮັບໃຊ້ພະເຢໂຫວາແລະຈະໄດ້ຮັບລາງວັນຊີວິດນຳກັນ.
ເຮົາຈະປ້ອງກັນບໍ່ໃຫ້ບັນຫາຕ່າງໆໃນຄອບຄົວມາເຮັດໃຫ້ເຮົາພາດຈາກລາງວັນໄດ້ແນວໃດ? (ເບິ່ງຂໍ້ 13-15)
ໜຸ່ມສາວທັງຫຼາຍຢ່າໃຫ້ສິ່ງໃດມາເຮັດໃຫ້ເຈົ້າພາດລາງວັນ!
16, 17. ໄວໜຸ່ມຈະບໍ່ຮູ້ສຶກຫງຸດຫງິດຫຼາຍເກີນໄປກັບພໍ່ແມ່ໄດ້ແນວໃດ?
16 ເຈົ້າອາດເປັນໄວໜຸ່ມແລະຮູ້ສຶກວ່າພໍ່ແມ່ບໍ່ເຂົ້າໃຈເຈົ້າຫຼືເຂັ້ມງວດກັບເຈົ້າຫຼາຍໂພດ. ນີ້ອາດເຮັດໃຫ້ເຈົ້າບໍ່ພໍໃຈຫຼາຍຈົນເລີ່ມບໍ່ແນ່ໃຈວ່າຈະເປັນພະຍານພະເຢໂຫວາດີບໍ່. ແຕ່ຖ້າເຈົ້າເຊົາຮັບໃຊ້ພະເຢໂຫວາ ເຈົ້າກໍຈະພົບວ່າບໍ່ມີຜູ້ໃດໃນໂລກນີ້ອີກແລ້ວທີ່ຮັກເຈົ້າຫຼາຍເທົ່າກັບພໍ່ແມ່ທີ່ເປັນພະຍານພະເຢໂຫວາແລະໝູ່ໃນປະຊາຄົມ.
17 ລອງຄິດເບິ່ງວ່າ: ຖ້າພໍ່ແມ່ຂອງເຈົ້າບໍ່ເຄີຍສັ່ງສອນເຈົ້າເລີຍ ເຈົ້າຄິດວ່າເພິ່ນຈະເປັນຫ່ວງເຈົ້າແທ້ໆບໍ? (ເຫບເລີ 12:8) ແນ່ນອນວ່າພວກເພິ່ນບໍ່ແມ່ນຄົນສົມບູນແບບ ດັ່ງນັ້ນ ວິທີທີ່ພວກເພິ່ນສອນອາດບໍ່ຖືກໃຈເຈົ້າ ແຕ່ຢ່າເບິ່ງວິທີທີ່ເພິ່ນໃຊ້. ແທນທີ່ຈະຈົດຈໍ່ຢູ່ທີ່ວິທີ ໃຫ້ພະຍາຍາມເຂົ້າໃຈວ່າເປັນຫຍັງພວກເພິ່ນຈຶ່ງເວົ້າແລະເຮັດແບບນັ້ນ. ໃຫ້ເຈົ້າໃຈເຢັນໆແລະຢ່າຟ້າວຫງຸດຫງິດຫຼືໃຊ້ອາລົມ. ຄຳພີໄບເບິນບອກໄວ້ວ່າ: “ຄົນທີ່ມີຄວາມຮູ້ກໍອຳຖ້ອຍຄຳແຫ່ງຕົນໄວ້ແລະຜູ້ທີ່ມີຄວາມເຂົ້າໃຈກໍມີວິນຍານສະຫງັດງຽບ.” (ສຸພາສິດ 17:27) ຂໍໃຫ້ຕັ້ງເປົ້າໝາຍທີ່ຈະພັດທະນາຕົວເອງໃຫ້ເປັນຜູ້ໃຫຍ່ຫຼາຍຂຶ້ນ ໂດຍຍອມຮັບຄຳແນະນຳແລະເຕັມໃຈຮຽນຮູ້ບໍ່ວ່າຄົນທີ່ສອນຈະໃຊ້ວິທີໃດກໍຕາມ. (ສຸພາສິດ 1:8) ຢ່າລືມວ່າການມີພໍ່ແມ່ທີ່ຮັກພະເຢໂຫວາເປັນຂອງຂວັນທີ່ມີຄ່າຫຼາຍແທ້ໆ ເພາະພວກເພິ່ນຢາກຊ່ວຍເຈົ້າໃຫ້ໄດ້ຮັບຊີວິດຕະຫຼອດໄປ.
18. ເປັນຫຍັງເຈົ້າຕັ້ງໃຈທີ່ຈະຈົດຈໍ່ຢູ່ທີ່ລາງວັນ?
18 ບໍ່ວ່າເຮົາຈະມີຄວາມຫວັງທີ່ຈະມີຊີວິດຕະຫຼອດໄປໃນສະຫວັນຫຼືໃນໂລກທີ່ເປັນອຸທິຍານ ເຮົາທຸກຄົນກໍຄອຍຖ້າອະນາຄົດທີ່ດີເລີດ. ຄວາມຫວັງຂອງເຮົາຈະເປັນຈິງຢ່າງແນ່ນອນ ເພາະນີ້ເປັນຄຳສັນຍາຂອງຜູ້ສ້າງເອກະພົບ ພະອົງບອກວ່າ: “ແຜ່ນດິນຈະເຕັມໄປດ້ວຍຄວາມຮູ້ຈັກພະເຢໂຫວາ.” (ເອຊາອີ 11:9) ອີກບໍ່ດົນທຸກຄົນທີ່ຢູ່ເທິງໂລກຈະໄດ້ຮັບການສອນຈາກພະເຈົ້າ. ນີ້ເປັນລາງວັນທີ່ຄຸ້ມຄ່າແທ້ໆ ດັ່ງນັ້ນ ຂໍໃຫ້ຈື່ສິ່ງທີ່ພະເຢໂຫວາສັນຍາກັບເຈົ້າໄວ້ສະເໝີ ແລະຢ່າໃຫ້ອັນໃດກໍຕາມມາເຮັດໃຫ້ເຈົ້າພາດລາງວັນ!
