ລົດຮົບແລະມົງກຸດຈະປົກປ້ອງເຈົ້າ
“ການນັ້ນຈະບັງເກີດມາຖ້າພວກທ່ານຟັງຄວາມຂອງພະເຢໂຫວາພະເຈົ້າຂອງທ່ານດ້ວຍໃຈສັດຊື່.”—ຊາກາລີ 6:15
ເພງ: 61, 22
1, 2. ສະພາບການຂອງຊາວຢິວໃນເມືອງເຢຣຶຊາເລມເປັນແນວໃດຫຼັງຈາກທີ່ຊາກາລີເຫັນນິມິດທີ 7?
ຫຼັງຈາກທີ່ຊາກາລີເຫັນນິມິດທີ 7 ລາວມີຫຼາຍສິ່ງຫຼາຍຢ່າງທີ່ຕ້ອງຄິດ. ລາວຕ້ອງໄດ້ຮັບກຳລັງໃຈແທ້ໆທີ່ໄດ້ຍິນພະເຢໂຫວາສັນຍາວ່າຈະລົງໂທດຄົນທີ່ບໍ່ສັດຊື່ ແຕ່ກໍຍັງບໍ່ມີຫຍັງປ່ຽນແປງເລີຍ. ຫຼາຍຄົນຍັງເຮັດຊົ່ວແລະເຮັດສິ່ງທີ່ບໍ່ສັດຊື່ ແລະການສ້າງວິຫານໃນເມືອງເຢຣຶຊາເລມກໍຍັງບໍ່ແລ້ວ. ເປັນຫຍັງຊາວຢິວຈຶ່ງຖິ້ມວຽກທີ່ພະເຢໂຫວາມອບໝາຍໃຫ້ເຮັດ? ເຂົາເຈົ້າກັບມາເມືອງເຢຣຶຊາເລມພຽງເພື່ອຢາກເຮັດໃຫ້ຊີວິດດີຂຶ້ນບໍ?
2 ຊາກາລີຮູ້ວ່າຊາວຢິວທີ່ກັບໄປເມືອງເຢຣຶຊາເລມເປັນຜູ້ນະມັດສະການພະເຢໂຫວາ. ເຂົາເຈົ້າເປັນຄົນທີ່ “ພະເຈົ້າທ່ຽງແທ້ກະຕຸ້ນຄວາມຄິດຈິດໃຈ” ໃຫ້ຖິ້ມບ້ານແລະທຸລະກິດການຄ້າໃນບາບີໂລນ. (ເອເຊດຣາເຊ 1:2, 3, 5, ລ.ມ.) ເຂົາເຈົ້າອອກຈາກບ່ອນທີ່ລຶ້ງເຄີຍເພື່ອຍ້າຍໄປດິນແດນທີ່ເຂົາເຈົ້າສ່ວນຫຼາຍບໍ່ເຄີຍເຫັນ. ຖ້າການສ້າງວິຫານຂອງພະເຢໂຫວາບໍ່ສຳຄັນສຳລັບເຂົາເຈົ້າ ເຂົາເຈົ້າກໍຄົງຈະບໍ່ໄປເພາະຕ້ອງເດີນທາງໄກເຖິງ 1.600 ກິໂລແມັດເຊິ່ງທັງອັນຕະລາຍແລະຍາກລຳບາກ.
3, 4. ຊາວຢິວທີ່ກັບມາບ້ານເກີດມີຂໍ້ທ້າທາຍຫຍັງແດ່?
3 ລອງນຶກພາບການເດີນທາງທີ່ແສນຍາວໄກຈາກບາບີໂລນໄປເຢຣຶຊາເລມ. ຜູ້ຄົນມີເວລາຫຼາຍທີ່ຈະຄິດແລະລົມກັນກ່ຽວກັບບ້ານໃນອະນາຄົດຂອງເຂົາເຈົ້າ. ຜູ້ເຖົ້າຜູ້ແກ່ຄົງເລົ່າໃຫ້ເຂົາເຈົ້າຟັງວ່າເມືອງເຢຣຶຊາເລມແລະວິຫານຢູ່ທີ່ນັ້ນເຄີຍສວຍງາມສໍ່າໃດ. (ເອເຊດຣາເຊ 3:12) ຖ້າເຈົ້າເດີນທາງໄປກັບເຂົາເຈົ້າ ເຈົ້າຈະຮູ້ສຶກແນວໃດເມື່ອເຫັນເມືອງເຢຣຶຊາເລມຄັ້ງທຳອິດເຊິ່ງເປັນບ້ານໃໝ່ຂອງເຈົ້າ? ເຈົ້າຄົງຈະເສົ້າໃຈເມື່ອເຫັນຊາກອາຄານທີ່ຖືກທຳລາຍຮົກເຮື້ອໄປດ້ວຍປ່າຫຍ້າ ກຳແພງເມືອງຫັກພັງ ປ້ອມທີ່ແຂງແກ່ນແລະປະຕູໃຫຍ່ກໍບໍ່ມີອີກແລ້ວ ເຈົ້າອາດຄິດເຖິງກຳແພງເມືອງທີ່ສູງໃຫຍ່ຂອງບາບີໂລນ. ເຖິງວ່າຈະເປັນແບບນັ້ນ ຊາວຢິວກໍບໍ່ໄດ້ທໍ້ໃຈ. ຍ້ອນຫຍັງ? ຍ້ອນວ່າໃນລະຫວ່າງການເດີນທາງອັນແສນຍາວໄກ ພະເຢໂຫວາໄດ້ຊ່ວຍແລະປົກປ້ອງເຂົາເຈົ້າ. ເມື່ອເຂົາເຈົ້າມາຮອດເມືອງເຢຣຶຊາເລມ ເຂົາເຈົ້າໄດ້ສ້າງແທ່ນບູຊາທີ່ວິຫານແລະໄດ້ຖວາຍເຄື່ອງບູຊາໃຫ້ພະເຢໂຫວາທຸກມື້. (ເອເຊດຣາເຊ 3:1, 2) ເຂົາເຈົ້າກະຕືລືລົ້ນຫຼາຍແລະພ້ອມແລ້ວທີ່ຈະເຮັດວຽກ ເບິ່ງຄືວ່າຈະບໍ່ມີອັນໃດມາເຮັດໃຫ້ເຂົາເຈົ້າທໍ້ໃຈໄດ້.
4 ນອກຈາກວຽກຟື້ນຟູວິຫານແລ້ວ ຊາວຢິວຍັງຕ້ອງໄດ້ສ້າງເມືອງແລະເຮືອນຂອງເຂົາເຈົ້າ. ເຂົາເຈົ້າຕ້ອງປູກພືດເພື່ອຄອບຄົວຈະມີອາຫານກິນ. (ເອເຊດຣາເຊ 2:70) ເບິ່ງຄືວ່າວຽກຂອງເຂົາເຈົ້າມີຫຼາຍແທ້ໆ. ຕໍ່ມາ ພວກສັດຕູກໍມາຕໍ່ຕ້ານ. ການຕໍ່ຕ້ານນີ້ເກີດຂຶ້ນເປັນເວລາ 15 ປີ ແລະຊາວຢິວກໍເລີ່ມຄ່ອຍໆທໍ້ຖອຍໃຈ. (ເອເຊດຣາເຊ 4:1-4) ມີຂໍ້ທ້າທາຍຢ່າງໜຶ່ງອີກທີ່ຕ້ອງຮັບມືຄື ໃນປີ 522 ກະສັດເປເຣເຊໄດ້ສັ່ງໃຫ້ຢຸດການກໍ່ສ້າງໃນເມືອງເຢຣຶຊາເລມແລະເບິ່ງຄືວ່າເມືອງນີ້ຈະບໍ່ໄດ້ຮັບການຟື້ນຟູແລ້ວ.—ເອເຊດຣາເຊ 4:21-24
5. ພະເຢໂຫວາຊ່ວຍປະຊາຊົນຂອງພະອົງແນວໃດ?
5 ພະເຢໂຫວາຮູ້ວ່າປະຊາຊົນຂອງພະອົງຕ້ອງການການເສີມກຳລັງແລະຄວາມກ້າຫານ. ພະອົງຈຶ່ງໃຫ້ນິດມິດສຸດທ້າຍແກ່ຊາກາລີເພື່ອຮັບຮອງກັບປະຊາຊົນວ່າພະອົງຮັກເຂົາເຈົ້າແລະເຫັນຄຸນຄ່າທີ່ເຂົາເຈົ້າພະຍາຍາມຮັບໃຊ້ພະອົງ. ພະອົງສັນຍາວ່າຈະປົກປ້ອງເຂົາເຈົ້າຖ້າເຂົາເຈົ້າກັບມາເຮັດວຽກທີ່ພະອົງມອບໝາຍໃຫ້. ໃນເລື່ອງການສ້າງວິຫານ ພະເຢໂຫວາບອກວ່າ: “ການນັ້ນຈະບັງເກີດມາຖ້າພວກທ່ານຟັງຄວາມຂອງພະເຢໂຫວາພະເຈົ້າຂອງທ່ານດ້ວຍໃຈສັດຊື່.”—ຊາກາລີ 6:15
ກອງທັບທູດສະຫວັນທີ່ມີອຳນາດ
6. (ກ) ນິມິດທີ 8 ຂອງຊາກາລີໄດ້ເລີ່ມຕົ້ນແນວໃດ? (ເບິ່ງຮູບທຳອິດ) (ຂ) ເປັນຫຍັງມ້າຈຶ່ງມີສີແຕກຕ່າງກັນ?
6 ນິມິດທີ 8 ເຊິ່ງເປັນນິມິດສຸດທ້າຍຂອງຊາກາລີອາດເປັນນິມິດທີ່ເສີມສ້າງຄວາມເຊື່ອຫຼາຍທີ່ສຸດ. (ອ່ານຊາກາລີ 6:1-3) ລອງນຶກພາບວ່າຊາກາລີເຫັນຫຍັງແດ່. ລາວເຫັນລົດຮົບ 4 ຄັນແລ່ນ “ອອກມາຈາກຫວ່າງກາງພູ 2 ໜ່ວຍ” ທີ່ເປັນທອງເຫຼືອງ. ມ້າທີ່ດຶງລົດຮົບນັ້ນມີສີແຕກຕ່າງກັນເຊິ່ງເຮັດໃຫ້ແຍກອອກວ່າລົດຮົບຄັນໃດເປັນຄັນໃດ. ຊາກາລີຖາມວ່າ: “ພວກນີ້ແມ່ນສິ່ງໃດ?” (ຊາກາລີ 6:4) ພວກເຮົາກໍຢາກຮູ້ຄືກັນເພາະນິມິດນີ້ມີຜົນກະທົບກັບເຮົາ.
7, 8. (ກ) ພູເຂົາ 2 ໜ່ວຍໝາຍເຖິງຫຍັງ? (ຂ) ເປັນຫຍັງພູເຂົາຈຶ່ງເຮັດດ້ວຍທອງເຫຼືອງ?
7 ໃນຄຳພີໄບເບິນ ບາງຄັ້ງມີການໃຊ້ຄຳວ່າພູເຂົາເມື່ອກ່າວເຖິງການປົກຄອງຫຼືລັດຖະບານ. ພູເຂົາທີ່ຊາກາລີເຫັນນັ້ນຄ້າຍຄືກັບພູສອງໜ່ວຍທີ່ເຮົາອ່ານໃນຄຳພະຍາກອນດານຽນ. ພູເຂົາໜ່ວຍໜຶ່ງໝາຍເຖິງການປົກຄອງຂອງພະເຢໂຫວາເຊິ່ງເປັນການປົກຄອງທົ່ວທັງເອກະພົບຕະຫຼອດໄປ ແລະອີກໜ່ວຍໜຶ່ງໝາຍເຖິງລາຊະອານາຈັກເມຊີທີ່ມີພະເຍຊູເປັນກະສັດ. (ດານຽນ 2:35, 45) ຕັ້ງແຕ່ລະດູໃບໄມ້ຫຼົ່ນໃນປີ 1914 ຕອນທີ່ພະເຍຊູເປັນກະສັດ ພູເຂົາສອງໜ່ວຍນີ້ມີມາດົນແລ້ວແລະມີບົດບາດພິເສດທີ່ຈະເຮັດໃຫ້ຈຸດປະສົງຂອງພະເຈົ້າທີ່ມີຕໍ່ແຜ່ນດິນໂລກສຳເລັດ.
ພະເຢໂຫວາຍັງໃຊ້ທູດສະຫວັນໃຫ້ປົກປ້ອງແລະເສີມກຳລັງປະຊາຊົນຂອງພະອົງ
8 ເປັນຫຍັງພູເຂົາຈຶ່ງເຮັດດ້ວຍທອງເຫຼືອງ? ທອງເຫຼືອງເປັນໂລຫະທີ່ມີຄ່າຫຼາຍແລະເງົາງາມ. ທີ່ຈິງ ພະເຢໂຫວາບອກໃຫ້ຊາວອິດສະລາແອນໃຊ້ທອງເຫຼືອງເມື່ອສ້າງທັບອາໄສແລະຕອນທີ່ສ້າງວິຫານໃນເມືອງເຢຣຶຊາເລມ. (ອົບພະຍົບ 27:1-3; 1 ກະສັດ 7:13-16) ການທີ່ພູເຂົາເຮັດຈາກທອງເຫຼືອງເປັນການເນັ້ນເຖິງຄຸນລັກສະນະທີ່ດີເລີດຂອງການປົກຄອງສູງສຸດຂອງພະເຢໂຫວາເໜືອເອກະພົບແລະຂອງລາຊະອານາຈັກເມຊີ ເຊິ່ງເຮັດໃຫ້ມະນຸດຮູ້ສຶກປອດໄພແລະເຮັດໃຫ້ເຂົາເຈົ້າໄດ້ຮັບການອວຍພອນ.
9. ລົດຮົບແລະຄົນຂີ່ມ້າໝາຍເຖິງຫຍັງ ແລະວຽກມອບໝາຍຂອງເຂົາເຈົ້າແມ່ນຫຍັງ?
9 ລົດຮົບແລະຄົນຂີ່ມ້າໝາຍເຖິງຫຍັງ? ລົດຮົບແລະຄົນຂີ່ມ້າໝາຍເຖິງທູດສະຫວັນ ເຊິ່ງອາດເປັນທູດສະຫວັນທີ່ມາຈາກຫຼາຍກຸ່ມ. (ອ່ານຊາກາລີ 6:5-8) ພວກທູດສະຫວັນໄດ້ເຂົ້າໄປ ‘ຕໍ່ໜ້າພະເຈົ້າແຫ່ງບັນດາແຜ່ນດິນໂລກ’ ແລະອອກໄປພ້ອມກັບວຽກມອບໝາຍພິເສດ. ເຂົາເຈົ້າຖືກມອບໝາຍໃຫ້ໄປເຂດຕ່າງໆເພື່ອປົກປ້ອງປະຊາຊົນຂອງພະເຢໂຫວາໂດຍສະເພາະໄປບາບີໂລນເຊິ່ງກໍຄື “ປະເທດທິດອຸດອນ.” ໃນນິມິດນີ້ ພະເຢໂຫວາໃຫ້ປະຊາຊົນຂອງພະອົງຮູ້ວ່າເຂົາເຈົ້າຈະບໍ່ເປັນທາດຂອງບາບີໂລນອີກຕໍ່ໄປ. ລອງນຶກພາບເບິ່ງວ່າປະຊາຊົນທີ່ສ້າງວິຫານໃນສະໄໝຂອງຊາກາລີຈະໄດ້ຮັບກຳລັງໃຈຫຼາຍສໍ່າໃດທີ່ຮູ້ວ່າພວກສັດຕູຈະບໍ່ສາມາດຢຸດຢັ້ງເຂົາເຈົ້າໄດ້.
10. ຄຳພະຍາກອນຂອງຊາກາລີກ່ຽວກັບລົດຮົບແລະຜູ້ຂີ່ມ້າຊ່ວຍເຮົາໃຫ້ໝັ້ນໃຈໃນເລື່ອງຫຍັງ?
10 ໃນທຸກມື້ນີ້ພະເຢໂຫວາຍັງໃຊ້ທູດສະຫວັນໃຫ້ປົກປ້ອງແລະເສີມກຳລັງປະຊາຊົນຂອງພະອົງ. (ມາລາກີ 3:6; ເຫບເລີ 1:7, 14) ຕັ້ງແຕ່ປີ 1919 ເມື່ອປະຊາຊົນຂອງພະເຢໂຫວາຖືກປົດປ່ອຍຈາກບາບີໂລນໃຫຍ່ ສັດຕູຂອງເຂົາເຈົ້າກໍໄດ້ພະຍາຍາມຢ່າງໜັກຫຼາຍທີ່ຈະບໍ່ໃຫ້ການນະມັດສະການແທ້ເຕີບໃຫຍ່ແລະຂະຫຍາຍຕົວ. (ຄຳປາກົດ 18:4) ແຕ່ພວກມັນກໍເຮັດບໍ່ສຳເລັດ. ເນື່ອງຈາກມີທູດສະຫວັນຄອຍປົກປ້ອງອົງການຂອງພະເຢໂຫວາ ພວກເຮົາຈຶ່ງບໍ່ຕ້ອງຢ້ານວ່າປະຊາຊົນຂອງພະເຢໂຫວາຈະຕົກເປັນຊະເລີຍຂອງສາສະໜາປອມອີກ. (ຄຳເພງ 34:7) ເຮົາໝັ້ນໃຈໄດ້ວ່າເຮົາຈະມີຄວາມສຸກແລະມີວຽກມາກມາຍໃຫ້ເຮັດຕໍ່ໆໄປໃນຂະນະທີ່ເຮົານະມັດສະການພະເຢໂຫວາ. ຄຳພະຍາກອນຂອງຊາກາລີຊ່ວຍພວກເຮົາໃຫ້ເຂົ້າໃຈວ່າພວກເຮົາຈະໄດ້ຮັບການຄຸ້ມຄອງໃຫ້ປອດໄພດ້ວຍພູເຂົາສອງໜ່ວຍນີ້.
11. ເປັນຫຍັງເຮົາບໍ່ຕ້ອງຢ້ານຕອນທີ່ປະຊາຊົນຂອງພະເຈົ້າຖືກໂຈມຕີ?
11 ອີກບໍ່ດົນ ອຳນາດທາງການເມືອງຂອງໂລກຊາຕານທັງໝົດຈະລວມຕົວກັນເພື່ອທຳລາຍປະຊາຊົນຂອງພະເຢໂຫວາ. (ເອເຊກຽນ 38:2, 10-12; ດານຽນ 11:40, 44, 45; ຄຳປາກົດ 19:19) ໃນຄຳພະຍາກອນຂອງເອເຊກຽນ ເຮົາເຫັນອຳນາດຕ່າງໆເຫຼົ່ານີ້ເຂົ້າມາໂຈມຕີປະຊາຊົນຂອງພະເຈົ້າຄືກັບເມກທີ່ປົກຄຸມທົ່ວທັງໂລກ. ເຂົາເຈົ້າຂີ່ມ້າມາດ້ວຍຄວາມໂມໂຫຮ້າຍເພື່ອຈະໂຈມຕີປະຊາຊົນຂອງພະເຈົ້າ. (ເອເຊກຽນ 38:15, 16) * (ເບິ່ງໄຂເງື່ອນ) ເຮົາຕ້ອງຢ້ານເຂົາເຈົ້າບໍ? ບໍ່! ກອງທັບຂອງພະເຢໂຫວາຢູ່ຝ່າຍເຮົາ. ໃນໄລຍະຄວາມທຸກລຳບາກຄັ້ງໃຫຍ່ ທູດສະຫວັນຂອງພະເຢໂຫວາຈະປົກປ້ອງປະຊາຊົນຂອງພະອົງແລະຈະທຳລາຍໃຜກໍຕາມທີ່ຕໍ່ຕ້ານການປົກຄອງຂອງພະອົງ. (2 ເທຊະໂລນີກ 1:7, 8) ມື້ນັ້ນຄົງຈະສຸດຍອດແທ້ໆ! ແຕ່ໃຜຈະເປັນຜູ້ນຳກອງທັບທາງພາກສະຫວັນຂອງພະເຢໂຫວາ?
ພະເຢໂຫວາສວມມົງກຸດໃຫ້ກະສັດແລະປະໂລຫິດຂອງພະອົງ
12, 13. (ກ) ພະເຢໂຫວາໄດ້ບອກຊາກາລີໃຫ້ເຮັດຫຍັງ? (ຂ) ເຮົາຮູ້ໄດ້ແນວໃດວ່າ “ໜໍ່” ໝາຍເຖິງພະເຍຊູ?
12 ຊາກາລີເປັນພຽງຄົນດຽວທີ່ເຫັນ 8 ນິມິດເຫຼົ່ານັ້ນ. ຕໍ່ມາ ລາວໄດ້ເຮັດບາງສິ່ງທີ່ຄົນອື່ນຈະເຫັນແລະໜູນກຳລັງໃຈຄົນທີ່ໄປສ້າງວິຫານຂອງພະເຈົ້າ. (ອ່ານຊາກາລີ 6:9-12) ພະເຢໂຫວາບອກຊາກາລີໃຫ້ເກັບເງິນແລະຄຳຈາກເຫນດາຍ ໂຕເບຍ ແລະເຢດາຢາທີ່ຫາກໍກັບມາຈາກບາບີໂລນ ແລະໃຊ້ວັດຖຸເຫຼົ່ານີ້ເຮັດ “ກະໂຈມ [“ມົງກຸດ”, ລ.ມ.].” (ຊາກາລີ 6:11) ຊາກາລີເຮັດມົງກຸດນີ້ໃຫ້ໂຊໂຣບາເບນຜູ້ສຳເລັດລາຊະການທີ່ມາຈາກຕະກູນຢູດາແລະເປັນເຊື້ອສາຍຂອງດາວິດບໍ? ບໍ່ແມ່ນ. ພະເຢໂຫວາບອກຊາກາລີໃຫ້ເອົາມົງກຸດໄປສວມໃຫ້ປະໂລຫິດໃຫຍ່ໂຢຊວຍ. ນີ້ຄົງເຮັດໃຫ້ຄົນທີ່ຢູ່ໃນເຫດການນັ້ນແປກໃຈ.
13 ການສວມມົງກຸດຂອງປະໂລຫິດໃຫຍ່ໂຢຊວຍໄດ້ເຮັດໃຫ້ລາວກາຍເປັນກະສັດບໍ? ບໍ່. ໂຢຊວຍບໍ່ແມ່ນເຊື້ອສາຍຂອງດາວິດ ດັ່ງນັ້ນ ລາວຈຶ່ງບໍ່ມີຄຸນສົມບັດທີ່ຈະເປັນກະສັດໄດ້. ການສວມມົງກຸດຂອງລາວເປັນພາບສະແດງເຖິງສິ່ງທີ່ຈະເກີດຂຶ້ນກັບຜູ້ທີ່ຈະມາເປັນ “ໜໍ່” ເຊິ່ງຈະເປັນກະສັດແລະປະໂລຫິດຕະຫຼອດໄປໃນອະນາຄົດ. ຄຳພີໄບເບິນບອກວ່າໜໍ່ນັ້ນຄືພະເຍຊູ.—ເອຊາອີ 11:1, ລ.ມ.; ມັດທາຍ 2:23
14. ພະເຍຊູເຮັດຫຍັງໃນຖານະເປັນກະສັດແລະປະໂລຫິດໃຫຍ່?
14 ພະເຍຊູເປັນທັງກະສັດແລະປະໂລຫິດໃຫຍ່. ເພິ່ນຈະເປັນຜູ້ນຳກອງທັບທູດສະຫວັນຂອງພະເຢໂຫວາແລະເພິ່ນເຮັດທຸກຢ່າງທີ່ເຮັດໄດ້ເພື່ອໃຫ້ປະຊາຊົນຂອງພະເຈົ້າຮູ້ສຶກປອດໄພໃນໂລກທີ່ມີແຕ່ຄວາມຮຸນແຮງນີ້. (ເຢເຣມີ 23:5, 6) ອີກບໍ່ດົນ ພະເຍຊູຄລິດຈະເອົາຊະນະຊາດຕ່າງໆເພາະເພິ່ນສະໜັບສະໜູນການປົກຄອງຂອງພະເຈົ້າ ແລະຕໍ່ສູ້ເພື່ອປົກປ້ອງປະຊາຊົນຂອງພະອົງ. (ຄຳປາກົດ 17:12-14; 19:11, 14, 15) ແຕ່ກ່ອນຈະຮອດມື້ນັ້ນ ພະເຍຊູຫຼືໜໍ່ມີວຽກທີ່ຍິ່ງໃຫຍ່ທີ່ຕ້ອງເຮັດ.
ເພິ່ນຈະສ້າງວິຫານ
15, 16. (ກ) ໃຜຊຳຮະແລະຟື້ນຟູປະຊາຊົນຂອງພະເຈົ້າໃນທຸກມື້ນີ້ ແລະເພິ່ນເຮັດແນວໃດ? (ຂ) ໂລກຈະເປັນແນວໃດເມື່ອສິ້ນສຸດການປົກຄອງພັນປີຂອງພະເຍຊູ?
15 ໃນຖານະທີ່ເປັນກະສັດແລະປະໂລຫິດໃຫຍ່ ພະເຍຊູໄດ້ຮັບມອບໝາຍໃຫ້ “ກໍ່ສ້າງວິຫານຂອງພະເຢໂຫວາ.” (ອ່ານຊາກາລີ 6:13) ໃນປີ 1919 ເພິ່ນເລີ່ມເຮັດວຽກກໍ່ສ້າງນີ້ໂດຍປົດປ່ອຍປະຊາຊົນຂອງພະເຈົ້າໃຫ້ເປັນອິດສະຫຼະຈາກອິດທິພົນຂອງສາສະໜາປອມເຊິ່ງກໍຄືບາບີໂລນໃຫຍ່ ແລະຟື້ນຟູປະຊາຄົມ ລວມທັງແຕ່ງຕັ້ງ “ທາດສັດຊື່ແລະສຸຂຸມ” ເຊິ່ງກໍຄືກຸ່ມພີ່ນ້ອງຜູ້ຖືກເຈີມທີ່ຊີ້ນຳການນະມັດສະການທີ່ບໍລິສຸດເທິງໂລກ. (ມັດທາຍ 24:45, ລ.ມ.) ພະເຍຊູຍັງຊຳຮະປະຊາຊົນຂອງພະເຈົ້າໃຫ້ສະອາດແລະຍັງຊ່ວຍເຂົາເຈົ້າໃຫ້ນະມັດສະການໃນວິທີທີ່ສະອາດ.—ມາລາກີ 3:1-3
16 ພະເຍຊູແລະ 144.000 ຄົນທີ່ທັງເປັນກະສັດແລະປະໂລຫິດຈະປົກຄອງເປັນເວລາ 1.000 ປີ. ໃນໄລຍະນັ້ນ ພວກເພິ່ນຈະຊ່ວຍຄົນທີ່ສັດຊື່ໃຫ້ກາຍເປັນຄົນທີ່ສົມບູນແບບ. ເມື່ອວຽກນີ້ສຳເລັດ ມີພຽງແຕ່ຜູ້ນະມັດສະການແທ້ຂອງພະເຢໂຫວາເທົ່ານັ້ນທີ່ຈະເຫຼືອຢູ່ແຜ່ນດິນໂລກ. ໃນທີ່ສຸດ ການນະມັດສະການແທ້ກໍຈະໄດ້ຮັບການຟື້ນຟູຢ່າງເຕັມຮູບແບບແທ້ໆ!
ມີສ່ວນຮ່ວມໃນວຽກກໍ່ສ້າງ
17. ພະເຢໂຫວາໃຫ້ຄວາມໝັ້ນໃຈຫຍັງກັບຊາວຢິວ ແລະສິ່ງນັ້ນສົ່ງຜົນຕໍ່ເຂົາເຈົ້າແນວໃດ?
17 ຂ່າວສານຂອງຊາກາລີສົ່ງຜົນຕໍ່ຊາວຢິວໃນຕອນນັ້ນແນວໃດ? ພະເຢໂຫວາໄດ້ສັນຍາວ່າຈະຊ່ວຍແລະປົກປ້ອງເຂົາເຈົ້າເພື່ອໃຫ້ເຂົາເຈົ້າສ້າງວິຫານສຳເລັດ. ຄຳສັນຍານີ້ໄດ້ເຮັດໃຫ້ເຂົາເຈົ້າມີຄວາມຫວັງ. ແຕ່ເຂົາເຈົ້າກໍຍັງສົງໄສວ່າຄົນໜ້ອຍດຽວຈະສາມາດເຮັດວຽກຢ່າງຫຼວງຫຼາຍນີ້ໄດ້ແນວໃດ? ດັ່ງນັ້ນ ຊາກາລີໄດ້ບອກເຂົາເຈົ້າກ່ຽວກັບບາງສິ່ງທີ່ຈະກຳຈັດຄວາມຢ້ານແລະຄວາມສົງໄສອອກໄປ. ຄືກັບເຫນດາຍ ໂຕເບຍ ແລະເຢດາຢາໄດ້ມາຊ່ວຍເຂົາເຈົ້າ ພະເຢໂຫວາບອກວ່າ: ຄົນອື່ນໆກໍຍັງຈະ “ມາແລະຊ່ອຍກໍ່ສ້າງວິຫານຂອງພະເຢໂຫວາ.” (ອ່ານຊາກາລີ 6:15) ຊາວຢິວໝັ້ນໃຈວ່າພະເຢໂຫວາຈະສະໜັບສະໜູນວຽກຂອງເຂົາເຈົ້າ. ເຂົາເຈົ້າຈຶ່ງກ້າຫານກັບໄປສ້າງວິຫານຂຶ້ນໃໝ່ ເຖິງວ່າກະສັດເປເຣເຊໄດ້ສັ່ງຫ້າມວຽກນີ້ເປັນທາງການແລ້ວ. ການສັ່ງຫ້າມນີ້ເປັນເໝືອນພູເຂົາໃຫຍ່ທີ່ຂວາງທາງເຂົາເຈົ້າ ແຕ່ພະເຢໂຫວາກໍກຳຈັດມັນ. ໃນທີ່ສຸດ ວິຫານກໍສ້າງສຳເລັດໃນປີ 515 ກ່ອນ ຄ.ສ. (ເອເຊດຣາເຊ 6:22; ຊາກາລີ 4:6, 7) ນອກຈາກນັ້ນ ສິ່ງທີ່ພະເຢໂຫວາບອກຍັງໝາຍເຖິງສິ່ງທີ່ຍິ່ງໃຫຍ່ກວ່ານັ້ນເຊິ່ງກຳລັງເກີດຂຶ້ນໃນສະໄໝຂອງເຮົາ.
ພະເຢໂຫວາບໍ່ມີວັນລືມຄວາມຮັກທີ່ເຮົາສະແດງຕໍ່ພະອົງ (ເບິ່ງຂໍ້ 18, 19)
18. ຊາກາລີ 6:15 ກຳລັງສຳເລັດເປັນຈິງແນວໃດໃນທຸກມື້ນີ້?
18 ໃນທຸກມື້ນີ້ມີຫຼາຍລ້ານຄົນນະມັດສະການພະເຢໂຫວາ. ເຂົາເຈົ້າມີຄວາມສຸກທີ່ໄດ້ໃຫ້ “ຂອງທີ່ມີຄ່າ” ກັບພະເຢໂຫວາເຊັ່ນ: ເວລາ ກຳລັງ ແລະຊັບສິນຂອງເຂົາເຈົ້າ. ໂດຍວິທີນີ້ ເຂົາເຈົ້າໄດ້ສະໜັບສະໜູນການນະມັດສະການທີ່ບໍລິສຸດ. (ສຸພາສິດ 3:9, ລ.ມ.) ເຮົາໝັ້ນໃຈໄດ້ວ່າພະເຢໂຫວາເຫັນຄຸນຄ່າການສະໜັບສະໜູນທີ່ພັກດີຂອງເຮົາ. ຂໍໃຫ້ນຶກເຖິງເຫນດາຍ ໂຕເບຍ ແລະເຢດາຢາທີ່ໄດ້ນຳເງິນແລະຄຳມາໃຫ້ຊາກາລີເຮັດມົງກຸດ. ມົງກຸດນັ້ນເປັນ “ທີ່ລະນຶກຄຶດຮອດ” ຫຼື ເຮັດໃຫ້ຄິດເຖິງການບໍລິຈາກຂອງເຂົາເຈົ້າເພື່ອການນະມັດສະການແທ້. (ຊາກາລີ 6:14) ພະເຢໂຫວາຈະບໍ່ມີວັນລືມວຽກທີ່ເຮົາເຮັດແລະຄວາມຮັກທີ່ເຮົາສະແດງຕໍ່ພະອົງ.—ເຫບເລີ 6:10
ພວກເຮົາມີຄວາມສຸກແທ້ໆ ທີ່ໄດ້ເປັນສ່ວນໜຶ່ງຂອງອົງການທີ່ໝັ້ນຄົງປອດໄພແລະຈະຄົງຢູ່ຕະຫຼອດໄ
19. ນິມິດຂອງຊາກາລີສົ່ງຜົນຕໍ່ເຈົ້າແນວໃດ?
19 ໃນສະໄໝສຸດທ້າຍ ປະຊາຊົນຂອງພະເຈົ້າກໍສາມາດເຮັດວຽກໃຫຍ່ນີ້ໄດ້. ນີ້ເປັນໄປໄດ້ເພາະພະເຢໂຫວາອວຍພອນແລະມີພະເຍຊູຄລິດເປັນຜູ້ຊີ້ນຳ. ພວກເຮົາມີຄວາມສຸກແທ້ໆທີ່ໄດ້ເປັນສ່ວນໜຶ່ງຂອງອົງການທີ່ໝັ້ນຄົງປອດໄພແລະຈະຄົງຢູ່ຕະຫຼອດໄປ ເຮົາຮູ້ວ່າຄວາມຕ້ອງການຂອງພະເຢໂຫວາເລື່ອງການນະມັດສະການບໍລິສຸດຈະເປັນຈິງ. ດັ່ງນັ້ນ ຂໍໃຫ້ເຫັນຄຸນຄ່າທີ່ເຈົ້າໄດ້ຢູ່ໃນທ່າມກາງປະຊາຊົນຂອງພະເຈົ້າ ແລະຂໍໃຫ້ ‘ຟັງຄວາມຂອງພະເຢໂຫວາພະເຈົ້າຂອງເຈົ້າ.’ ແລ້ວເຈົ້າຈະໄດ້ຮັບການປົກປ້ອງຈາກຜູ້ທີ່ເປັນກະສັດແລະປະໂລຫິດໃຫຍ່ຂອງເຮົາ ແລະຈະໄດ້ຮັບການປົກປ້ອງຈາກທູດສະຫວັນນຳ. ຂໍໃຫ້ເຮັດທຸກສິ່ງທີ່ເຮັດໄດ້ເພື່ອສະໜັບສະໜູນການນະມັດສະການແທ້. ພະເຢໂຫວາຈະຊ່ວຍເຈົ້າໃຫ້ປອດໄພຈາກລະບົບຊົ່ວຂອງໂລກນີ້ທັງໃນຕອນນີ້ແລະຕະຫຼອດໄປ!
^ ຂໍ້ 11 ສຳລັບຂໍ້ມູນເພີ່ມຕື່ມເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການ 15 ພຶດສະພາ 2015 ໜ້າ 27-28.
