ທຸກຄັ້ງທີ່ພະເຈົ້າຕັດສິນລົງໂທດ—ພະອົງໃຫ້ເວລາໃນການເຕືອນພໍບໍ?
ຜູ້ພະຍາກອນອາກາດກວດເບິ່ງສະພາບອາກາດໃນຈໍຣາດາ. ລາວເຫັນພາຍຸທີ່ອັນຕະລາຍກຳລັງເຂົ້າມາໃກ້ພື້ນທີ່ທີ່ມີປະຊາກອນໜາແໜ້ນ. ເນື່ອງຈາກລາວເປັນຫ່ວງຄວາມປອດໄພຂອງປະຊາຊົນຢູ່ຫັ້ນ ລາວຈຶ່ງເຮັດທຸກສິ່ງທຸກຢ່າງທີ່ລາວເຮັດໄດ້ເພື່ອເຕືອນພວກເຂົາກ່ອນທີ່ຈະຊ້າເກີນໄປ.
ຄ້າຍຄືກັນ ຕອນນີ້ພະເຢໂຫວາກໍກຳລັງເຕືອນທຸກຄົນທົ່ວໂລກວ່າມີ “ພາຍຸ” ທີ່ອັນຕະລາຍກວ່າພາຍຸໃດໆເທົ່າທີ່ເຄີຍໄດ້ຍິນໃນພະຍາກອນອາກາດກຳລັງໃກ້ເຂົ້າມາ. ແຕ່ພະອົງເຕືອນເຮົາແນວໃດ? ແລະເປັນຫຍັງເຮົາຈຶ່ງໝັ້ນໃຈໄດ້ວ່າພະອົງໃຫ້ເວລາພຽງພໍທີ່ຜູ້ຄົນຈະເຮັດຕາມຄຳເຕືອນນັ້ນ? ເພື່ອຈະຮູ້ຄຳຕອບ ທຳອິດໃຫ້ເຮົາມາເບິ່ງຄຳເຕືອນບາງຢ່າງທີ່ພະເຢໂຫວາເຄີຍເຕືອນຜູ້ຄົນໃນອະດີດ.
ເມື່ອພະເຈົ້າເຕືອນລ່ວງໜ້າ
ໃນສະໄໝທີ່ຂຽນຄຳພີໄບເບິນ ພະເຢໂຫວາໄດ້ເຕືອນກ່ຽວກັບ “ພາຍຸ” ຕ່າງໆເຊິ່ງກໍຄືການຕັດສິນລົງໂທດທີ່ພະອົງຈະເຮັດຕໍ່ຜູ້ທີ່ຈົງໃຈບໍ່ເຊື່ອຟັງຄຳສັ່ງຂອງພະອົງ. (ສຸພາ. 10:25; ຢເຣ. 30:23) ໃນແຕ່ລະເທື່ອ ພະເຢໂຫວາໄດ້ເຕືອນຜູ້ທີ່ບໍ່ເຊື່ອຟັງໃຫ້ຮູ້ລ່ວງໜ້າ ແລະບອກພວກເຂົາໃຫ້ປ່ຽນແປງຕົວເອງເພື່ອຈະເຊື່ອຟັງພະອົງ. (2 ກະ. 17:12-15; ນເຫ. 9:29, 30) ເພື່ອຈະຊ່ວຍພວກເຂົາໃຫ້ຮູ້ເລື່ອງນີ້ ພະອົງໄດ້ໃຊ້ຜູ້ຮັບໃຊ້ທີ່ສັດຊື່ໃຫ້ໄປປະກາດຄຳຕັດສິນລົງໂທດ ແລະຊ່ວຍຜູ້ຄົນໃຫ້ເຂົ້າໃຈວ່າພວກເຂົາຕ້ອງເຮັດຕາມທີ່ພະອົງບອກທັນທີ.—ອາໂມດ 3:7
ໂນເອກໍເປັນຜູ້ຮັບໃຊ້ທີ່ສັດຊື່ຄົນໜຶ່ງທີ່ພະເຈົ້າໃຊ້. ລາວໄດ້ເຕືອນຜູ້ຄົນໃນສະໄໝນັ້ນທີ່ເຮັດຜິດສິນລະທຳແລະມັກໃຊ້ຄວາມຮຸນແຮງວ່ານ້ຳຈະຖ້ວມໂລກ. (ຕົ້ນ. 6:9-13, 17) ນອກຈາກນັ້ນ ໂນເອຍັງບອກພວກເຂົາວ່າຕ້ອງເຮັດຫຍັງແດ່ຈຶ່ງຈະລອດ ລາວປະກາດເລື່ອງນັ້ນຫຼາຍແທ້ໆຈົນຄຳພີໄບເບິນບອກວ່າລາວເປັນ “ຄົນປ່າວປະກາດຄວາມຊອບທຳ.”—2 ເປ. 2:5
ກ່ອນນ້ຳຖ້ວມໂລກເຖິງວ່າໂນເອຈະພະຍາຍາມປະກາດຫຼາຍສ່ຳໃດ ແຕ່ຜູ້ຄົນກໍບໍ່ສົນໃຈຄຳເຕືອນນີ້ທີ່ມາຈາກພະເຈົ້າ ແລະພວກເຂົາກໍບໍ່ມີຄວາມເຊື່ອ. ສຸດທ້າຍ ພວກເຂົາກໍຕາຍຕອນທີ່ “ນ້ຳມາຖ້ວມແລະກວາດເຂົາໄປເສຍທັງໝົດ.” (ມັດ. 24:39; ເຫບ. 11:7) ຕອນທີ່ນ້ຳໃກ້ຈະຖ້ວມ ພວກເຂົາກໍຕຳໜິພະເຈົ້າບໍ່ໄດ້ວ່າພະອົງບໍ່ເຕືອນລ່ວງໜ້າ.
ແຕ່ບາງເທື່ອ ພະເຢໂຫວາກໍເຕືອນຜູ້ຄົນບໍ່ດົນກ່ອນທີ່ “ພາຍຸ” ເຊິ່ງເປັນການຕັດສິນລົງໂທດຂອງພະອົງຈະເກີດຂຶ້ນ. ເຖິງຈະເປັນແບບນັ້ນ ພະອົງກໍເຮັດໃຫ້ແນ່ໃຈວ່າທຸກຄົນມີເວລາພໍທີ່ຈະເຮັດຕາມຄຳເຕືອນນັ້ນ. ຕົວຢ່າງ: ໃນຕອນທີ່ເອຢິບປະສົບໄພພິບັດ 10 ຢ່າງ ພະເຢໂຫວາໄດ້ເຕືອນລ່ວງໜ້າຕະຫຼອດ ເຊັ່ນ: ກ່ອນທີ່ໄພພິບັດທີ 7 ເຊິ່ງກໍຄືພາຍຸໝາກເຫັບທີ່ກໍ່ຄວາມເສຍຫາຍຢ່າງຮຸນແຮງຈະເກີດຂຶ້ນ ພະເຢໂຫວາໄດ້ສົ່ງໂມເຊກັບອາໂລນໄປເຕືອນຟາໂລແລະຄົນຮັບໃຊ້ຂອງລາວກ່ຽວກັບໄພພິບັດນີ້. ແຕ່ເນື່ອງຈາກພາຍຸນີ້ຈະມາມື້ອື່ນ ພວກເຂົາມີເວລາພຽງພໍທີ່ຈະຊອກບ່ອນຫຼົບແລະໜີໄດ້ບໍ? ຄຳພີໄບເບິນບອກວ່າ: “ຝ່າຍຂ້າລາຊະການທຸກຄົນຂອງກະສັດຟາໂລທີ່ໄດ້ຢ້ານພະຄຳຂອງພະເຢໂຫວາກໍໄດ້ໃຫ້ຂ້າໃຊ້ກັບສັດທັງຫຼາຍຂອງເຂົາເຂົ້າມາໃນເຮືອນໃນບ້ານ ແລະຜູ້ທີ່ບໍ່ໄດ້ເອົາໃຈໃສ່ໃນພະຄຳຂອງພະເຢໂຫວາກໍໄດ້ໃຫ້ຂ້າໃຊ້ກັບສັດທັງຫຼາຍຂອງເຂົາຢູ່ໃນທົ່ງນາ.” (ອົບ. 9:18-21) ເຫັນໄດ້ແຈ້ງວ່າ ພະເຢໂຫວາໃຫ້ເວລາຫຼາຍພໍທີ່ຈະເຊື່ອຟັງພະອົງ ແລະຄົນທີ່ເຮັດຕາມທັນທີກໍບໍ່ຕ້ອງປະສົບກັບຄວາມເສຍຫາຍຄືກັບຄົນທີ່ບໍ່ເຊື່ອຟັງຄຳເຕືອນ.
ຄ້າຍຄືກັນ ຟາໂລກັບຄົນຮັບໃຊ້ຂອງລາວກໍໄດ້ຮັບຄຳເຕືອນກ່ອນໄພພິບັດທີ 10 ຈະເກີດຂຶ້ນ ແຕ່ພວກເຂົາໂງ່ຫຼາຍທີ່ບໍ່ສົນໃຈຄຳເຕືອນນີ້. (ອົບ. 4:22, 23) ຜົນກໍຄືລູກຊາຍກົກຂອງພວກເຂົາຕ້ອງຕາຍ ໜ້າເສຍດາຍແທ້ໆ! (ອົບ. 11:4-10; 12:29) ແຕ່ພວກເຂົາມີເວລາພໍທີ່ຈະເຮັດຕາມຄຳເຕືອນນັ້ນບໍ? ພໍແທ້! ໂມເຊໄດ້ໄປເຕືອນຊາວອິດສະລາແອນນຳວ່າໄພພິບັດທີ 10 ກຳລັງຈະເກີດຂຶ້ນ ແລະບອກພວກເຂົາວ່າຕ້ອງເຮັດຫຍັງແດ່ເພື່ອຈະຊ່ວຍຄອບຄົວໃຫ້ລອດ. (ອົບ. 12:21-28) ມີຈັກຄົນທີ່ເຊື່ອຟັງຄຳເຕືອນຂອງໂມເຊ? ມີປະມານ 3 ລ້ານຄົນທີ່ລວມທັງຄົນ ອິດສະລາແອນແລະ “ຄົນອື່ນໆຈຳນວນຫຼາຍ” ເຊິ່ງເປັນຄົນເອຢິບແລະຄົນຊາດອື່ນ ພວກເຂົາທັງໝົດນີ້ໄດ້ຖືກລະເວັ້ນຈາກການຕັດສິນລົງໂທດຂອງພະເຢໂຫວາແລະໄດ້ອອກຈາກເອຢິບ.—ອົບ. 12:38, ລ.ມ.
ຈາກຕົວຢ່າງເຫຼົ່ານີ້ສະແດງໃຫ້ເຫັນວ່າ ພະເຢໂຫວາເຮັດໃຫ້ແນ່ໃຈສະເໝີວ່າຜູ້ຄົນມີເວລາພໍທີ່ຈະເຮັດຕາມຄຳເຕືອນຂອງພະອົງ. (ບັນຍັດ. 32:4) ເປັນຫຍັງພະເຢໂຫວາຈຶ່ງເຮັດແບບນັ້ນ? ອັກຄະສາວົກເປໂຕບອກວ່າ ພະເຢໂຫວາ “ບໍ່ຢາກໃຫ້ຄົນໜຶ່ງຄົນໃດຈິບຫາຍ ແຕ່ວ່າຈະໃຫ້ຄົນທັງປວງປະໃຈເກົ່າເອົາໃຈໃໝ່.” (2 ເປ. 3:9) ພະອົງຮັກແລະຫ່ວງໃຍຜູ້ຄົນ. ພະອົງຢາກໃຫ້ພວກເຂົາກັບໃຈແລະເຮັດຕາມສິ່ງທີ່ພະອົງບອກກ່ອນທີ່ການຕັດສິນລົງໂທດຈະມາຮອດ.—ເອຊາ. 48:17, 18; ໂລມ 2:4
ເຮັດຕາມຄຳເຕືອນຂອງພະເຈົ້າໃນປັດຈຸບັນ
ປັດຈຸບັນນີ້ກໍຄືກັນ ທຸກຄົນຕ້ອງເຊື່ອຟັງຄຳເຕືອນທີ່ກຳລັງປະກາດໄປທົ່ວໂລກ. ຕອນທີ່ພະເຍຊູຢູ່ເທິງແຜ່ນດິນໂລກ ເພິ່ນໄດ້ເຕືອນວ່າລະບົບຊົ່ວນີ້ຈະຖືກທຳລາຍໃນໄລຍະ “ຄວາມທຸກຍາກລຳບາກຄັ້ງໃຫຍ່.” (ມັດ. 24:21, ລ.ມ.) ນອກຈາກນັ້ນ ພະເຍຊູຍັງໃຫ້ຄຳພະຍາກອນເລື່ອງໜຶ່ງແລະບອກລາຍລະອຽດນຳວ່າ ຜູ້ທີ່ຕິດຕາມເພິ່ນຈະຕ້ອງເຫັນແລະປະສົບກັບເຫດການຫຍັງແດ່ກ່ອນທີ່ການຕັດສິນລົງໂທດນັ້ນຈະເກີດຂຶ້ນ. ພະເຍຊູໄດ້ເວົ້າເຖິງເຫດການສຳຄັນຫຼາຍຢ່າງທີ່ເຮົາເຫັນວ່າກຳລັງເກີດຂຶ້ນໃນທຸກມື້ນີ້.—ມັດ. 24:3-12; ລືກາ 21:10-13
ຕາມຄຳພະຍາກອນນັ້ນ ພະເຢໂຫວາກຳລັງຊວນທຸກຄົນໃຫ້ເລືອກຮັບໃຊ້ແລະເຊື່ອຟັງພະອົງ. ພະອົງຢາກໃຫ້ຄົນທີ່ມີໃຈເຊື່ອຟັງມີຊີວິດທີ່ດີຂຶ້ນໃນຕອນນີ້ ແລະໄດ້ຮັບພອນຫຼາຍຢ່າງຢູ່ໂລກໃໝ່ໃນອະນາຄົດ. (2 ເປ. 3:13) ເພື່ອຈະມີຄວາມເຊື່ອໃນຄຳສັນຍາຕ່າງໆຂອງພະເຢໂຫວາ ພະອົງຈຶ່ງໃຫ້ຮູ້ຈັກຂ່າວສານທີ່ຊ່ວຍໃຫ້ລອດຊີວິດເຊິ່ງກໍຄື “ຄຳປະເສີດນີ້ [“ຂ່າວດີ,” ລ.ມ.] ແຫ່ງແຜ່ນດິນຂອງພະເຈົ້າ” ທີ່ພະເຍຊູບອກໄວ້ລ່ວງໜ້າວ່າ “ຈະເປັນທີ່ເທສະໜາປ່າວປະກາດໄປທົ່ວແຜ່ນດິນໂລກ ເພື່ອຈະເປັນພິຍານແກ່ພວກຕ່າງປະເທດທັງປວງ.” (ມັດ. 24:14) ພະເຈົ້າໃຫ້ຜູ້ນະມັດສະການແທ້ຂອງພະອົງໄປບອກຄຳ “ພິຍານ” ຫຼືປະກາດຂ່າວສານຈາກພະເຈົ້າໃນຫຼາຍກວ່າ 240 ດິນແດນ. ພະເຢໂຫວາຢາກໃຫ້ມີຜູ້ຄົນຫຼາຍທີ່ສຸດເທົ່າທີ່ເປັນໄປໄດ້ເຮັດຕາມຄຳເຕືອນແລະໜີໃຫ້ພົ້ນຈາກ “ພາຍຸ” ເຊິ່ງເປັນການຕັດສິນລົງໂທດອັນຊອບທຳຂອງພະອົງ.—ຊໂຟ. 1:14, 15; 2:2, 3
ປະເດັນບໍ່ໄດ້ຢູ່ທີ່ວ່າພະເຢໂຫວາໃຫ້ເວລາພຽງພໍທີ່ຜູ້ຄົນຈະເຮັດຕາມຄຳເຕືອນຫຼືບໍ່ ເພາະຫຼັກຖານສະແດງໃຫ້ເຫັນພໍແຮງແລ້ວວ່າພະເຢໂຫວາໃຫ້ເວລາພຽງພໍມາຕະຫຼອດ. ແຕ່ປະເດັນທີ່ສຳຄັນກໍຄື: ຜູ້ຄົນຈະເຮັດຕາມຄຳເຕືອນຕອນທີ່ຍັງມີເວລາຢູ່ບໍ? ຂໍໃຫ້ເຮົາທຸກຄົນທີ່ເປັນຄົນສົ່ງຂ່າວຂອງພະເຈົ້າພະຍາຍາມຕໍ່ໆໄປທີ່ຈະຊ່ວຍຜູ້ຄົນໃຫ້ຫຼາຍທີ່ສຸດເທົ່າທີ່ຊ່ວຍໄດ້ໃຫ້ລອດຜ່ານຈຸດຈົບຂອງລະບົບຊົ່ວນີ້.