ບົດຄວາມສຶກສາທີ 42
ພະເຢໂຫວາຢາກໃຫ້ເຈົ້າເປັນຫຍັງກໍໄດ້ຕາມທີ່ພະອົງຕ້ອງການ
“ພະເຈົ້າ . . . ກະຕຸ້ນພວກເຈົ້າໃຫ້ມີທັງຄວາມຕ້ອງການແລະກຳລັງເພື່ອຈະເຮັດສິ່ງທີ່ພະອົງພໍໃຈ.”—ຟີລິບ 2:13, ລ.ມ.
ເພງ 104 ພະລັງບໍລິສຸດເປັນຂອງຂວັນຈາກພະເຈົ້າ
ໃຈຄວາມສຳຄັນ *
1. ພະເຢໂຫວາສາມາດເຮັດຫຍັງໄດ້ແດ່ເພື່ອໃຫ້ຈຸດປະສົງຂອງພະອົງສຳເລັດ?
ພະເຢໂຫວາສາມາດເປັນຫຍັງກໍໄດ້ເພື່ອໃຫ້ຈຸດປະສົງຂອງພະອົງສຳເລັດ ເຊັ່ນ: ພະອົງເປັນຄູ ຜູ້ໃຫ້ກຳລັງໃຈ ແລະຜູ້ປະກາດຂ່າວດີ. ນີ້ເປັນພຽງບາງຢ່າງທີ່ພະອົງເປັນ. (ເອຊາ. 48:17; 2 ໂກ. 7:6; ຄລາ. 3:8) ແຕ່ຫຼາຍເທື່ອ ພະອົງກໍໃຊ້ມະນຸດໃຫ້ເຮັດສິ່ງຕ່າງໆທີ່ພະອົງຕ້ອງການ. (ມັດ. 24:14; 28:19, 20; 2 ໂກ. 1:3, 4) ນອກຈາກນັ້ນ ພະເຢໂຫວາຍັງໃຫ້ເຮົາມີສະຕິປັນຍາແລະກຳລັງເພື່ອເຮົາຈະສາມາດເປັນຫຍັງກໍໄດ້ທີ່ຈະເຮັດໃຫ້ຈຸດປະສົງຂອງພະອົງສຳເລັດ. ທັງໝົດນີ້ເປັນຄວາມໝາຍຂອງຊື່ພະເຢໂຫວາຕາມທີ່ນັກວິຊາການຫຼາຍຄົນໄດ້ຄົ້ນຄວ້າ.
2. (ກ) ເປັນຫຍັງບາງເທື່ອເຮົາອາດສົງໄສວ່າພະເຢໂຫວາຍັງໃຊ້ເຮົາຢູ່ຫຼືບໍ່? (ຂ) ເຮົາຈະພິຈາລະນາຫຍັງໃນບົດຄວາມນີ້?
2 ເຮົາທຸກຄົນຢາກເປັນຄົນທີ່ພະເຢໂຫວາໃຊ້ໄດ້ເພື່ອເຮັດຕາມຈຸດປະສົງຂອງພະອົງ. ແຕ່ບາງຄົນອາດສົງໄສວ່າພະເຢໂຫວາຍັງໃຊ້ພວກເຂົາຢູ່ຫຼືບໍ່. ຍ້ອນຫຍັງ? ຍ້ອນພວກເຂົາຮູ້ສຶກວ່າຮັບໃຊ້ພະເຢໂຫວາບໍ່ໄດ້ຫຼາຍເພາະອາຍຸຫຼາຍຂຶ້ນ ສະພາບການໃນຊີວິດ ຫຼືຮູ້ສຶກບໍ່ຄ່ອຍມີຄວາມສາມາດ. ສ່ວນບາງຄົນກໍອາດຮູ້ສຶກວ່າພວກເຂົາຮັບໃຊ້ພະເຢໂຫວາພໍແລ້ວແລະບໍ່ຕ້ອງການເຮັດຫຼາຍກວ່ານັ້ນ. ໃນບົດຄວາມນີ້ ເຮົາຈະພິຈາລະນາວ່າພະເຢໂຫວາສາມາດໃຫ້ສິ່ງທີ່ເຮົາຈຳເປັນຕ້ອງມີແນວໃດເພື່ອໃຫ້ຈຸດປະສົງຂອງພະອົງສຳເລັດ. ຈາກນັ້ນ ເຮົາຈະມາເບິ່ງຕົວຢ່າງຂອງບຸກຄົນໃນຄຳພີໄບເບິນທັງຊາຍແລະຍິງທີ່ພະອົງໃຫ້ພວກເຂົາມີຄວາມຕ້ອງການແລະກຳລັງທີ່ຈະເຮັດສິ່ງທີ່ພະອົງ
ພໍໃຈ. ສຸດທ້າຍ ເຮົາຈະເບິ່ງວ່າເຮົາເອງຈະຍອມໃຫ້ພະເຢໂຫວາໃຊ້ເຮົາແນວໃດ.ພະເຢໂຫວາໃຫ້ສິ່ງທີ່ເຮົາຕ້ອງມີແນວໃດ?
3. ຕາມຟີລິບ 2:13 ພະເຢໂຫວາໃຫ້ເຮົາມີຄວາມຕ້ອງການ ທີ່ຈະລົງມືເຮັດແນວໃດ?
3 ອ່ານຟີລິບ 2:13. * *ພະເຢໂຫວາໃຫ້ເຮົາມີຄວາມຕ້ອງການ ເພື່ອຈະເຮັດສິ່ງທີ່ພະອົງພໍໃຈ. ພະອົງເຮັດແນວໃດ? ບາງເທື່ອເຮົາຮູ້ວ່າມີຄວາມຈຳເປັນໃດໜຶ່ງໃນປະຊາຄົມ ຫຼືຜູ້ດູແລອ່ານຈົດໝາຍຈາກສຳນັກງານສາຂາທີ່ບອກເຮົາໃຫ້ຮູ້ວ່າມີຄວາມຈຳເປັນໃນເຂດຂອງປະຊາຄົມອື່ນ. ໃນກໍລະນີນີ້ເຮົາອາດຖາມຕົວເອງວ່າ: ‘ຂ້ອຍຈະຊ່ວຍຫຍັງໄດ້ບໍ?’ ຫຼືເຮົາອາດຖືກເຊີນໃຫ້ເຮັດວຽກມອບໝາຍທີ່ຍາກ ແຕ່ເຮົາກໍສົງໄສວ່າຈະເຮັດໄດ້ດີບໍ່. ຫຼືເມື່ອເຮົາອ່ານຂໍ້ຄຳພີ ເຮົາອາດຖາມຕົວເອງວ່າ ‘ຂ້ອຍຈະໃຊ້ຂໍ້ນີ້ເພື່ອຊ່ວຍຄົນອື່ນແນວໃດ?’ ພະເຢໂຫວາບໍ່ໄດ້ບັງຄັບເຮົາໃຫ້ເຮັດສິ່ງເຫຼົ່ານີ້. ແຕ່ຖ້າພະອົງເຫັນວ່າເຮົາຄິດຈະເຮັດຫຍັງ ພະອົງກໍຈະໃຫ້ເຮົາມີຄວາມຕ້ອງການທີ່ຈະລົງມືເຮັດ.
4. ພະເຢໂຫວາອາດຊ່ວຍເຮົາແນວໃດໃຫ້ມີກຳລັງ ທີ່ຈະລົງມືເຮັດ?
4 ພະເຢໂຫວາຍັງໃຫ້ກຳລັງ ກັບເຮົາເພື່ອຈະເຮັດສິ່ງທີ່ພະອົງພໍໃຈ. (ເອຊາ. 40:29) ພະອົງໃຫ້ພະລັງບໍລິສຸດເພື່ອຊ່ວຍເຮົາໃຫ້ມີຄວາມສາມາດຫຼາຍຂຶ້ນ. (ອົບ. 35:30-35) ພະເຢໂຫວາອາດສອນເຮົາໃຫ້ຮູ້ວິທີເຮັດວຽກບາງຢ່າງຜ່ານທາງອົງການຂອງພະອົງ. ໃຫ້ເຈົ້າຂໍຄວາມຊ່ວຍເຫຼືອ ຖ້າບໍ່ແນ່ໃຈວ່າຈະເຮັດວຽກມອບໝາຍແນວໃດ. ນອກຈາກນັ້ນ ເຈົ້າຍັງສາມາດຂໍ “ກຳລັງທີ່ຫຼາຍກວ່າປົກກະຕິ” ຈາກພະເຢໂຫວາພໍ່ທີ່ຢູ່ໃນສະຫວັນ. (2 ໂກ. 4:7; ລືກາ 11:13, ລ.ມ.) ໃນຄຳພີໄບເບິນມີຕົວຢ່າງຂອງຫຼາຍຄົນທັງຊາຍແລະຍິງທີ່ພະເຢໂຫວາໄດ້ໃຫ້ພວກເຂົາມີຄວາມຕ້ອງການແລະກຳລັງເພື່ອຈະເຮັດສິ່ງທີ່ພະອົງພໍໃຈ. ຕອນທີ່ເຮົາພິຈາລະນາຕົວຢ່າງເຫຼົ່ານີ້ ຂໍໃຫ້ຄິດວ່າເຈົ້າຈະໃຫ້ພະເຢໂຫວາໃຊ້ເຈົ້າຄືກັບພວກເຂົາແນວໃດ.
ພະເຢໂຫວາຊ່ວຍໃຫ້ຜູ້ຊາຍສາມາດເປັນຫຍັງໄດ້ແດ່?
5. ເຮົາໄດ້ຮຽນຮູ້ຫຍັງຈາກວິທີທີ່ພະເຢໂຫວາໃຊ້ໂມເຊແລະຕອນທີ່ພະອົງເລີ່ມໃຊ້ລາວໃຫ້ຊ່ວຍປະຊາຊົນຂອງພະອົງ?
5 ພະເຢໂຫວາຊ່ວຍໂມເຊໃຫ້ເປັນຜູ້ຊ່ວຍຊາວອິດສະລາແອນໃຫ້ລອດ. ແຕ່ພະອົງໃຊ້ລາວຕອນໃດ? ຕອນທີ່ໂມເຊຄິດວ່າຕົວເອງພ້ອມແລ້ວເພາະ “ໄດ້ຮຽນຮູ້ວິຊາປັນຍາແຫ່ງຊາວເອຄີບໂຕທັງໝົດ” ບໍ? (ກິດ. 7:22-25) ບໍ່. ພະເຢໂຫວາໃຊ້ໂມເຊຫຼັງຈາກທີ່ພະອົງຊ່ວຍລາວໃຫ້ເປັນຄົນຖ່ອມຕົວແລະອ່ອນໂຍນ. (ກິດ. 7:30, 34-36) ພະເຢໂຫວາຊ່ວຍໂມເຊໃຫ້ກ້າໄປເວົ້າກັບຜູ້ປົກຄອງທີ່ມີອຳນາດຫຼາຍທີ່ສຸດໃນເອຢິບ. (ອົບ. 9:13-19) ເຮົາໄດ້ຮຽນຮູ້ຫຍັງຈາກວິທີທີ່ພະເຢໂຫວາໃຊ້ໂມເຊແລະຕອນທີ່ພະອົງເລີ່ມໃຊ້ລາວ? ພະເຢໂຫວາໃຊ້ຄົນທີ່ພະຍາຍາມຮຽນແບບພະອົງແລະໝາຍເພິ່ງກຳລັງຈາກພະອົງ.—ຟີລິບ 4:13
6. ເຮົາໄດ້ຮຽນຮູ້ຫຍັງຈາກວິທີທີ່ພະເຢໂຫວາໄດ້ໃຊ້ບາເຣຊີລາຍໃຫ້ຊ່ວຍກະສັດດາວິດ?
6 ຫຼາຍຮ້ອຍປີຕໍ່ມາ ພະເຢໂຫວາໄດ້ໃຊ້ບາເຣຊີລາຍໃຫ້ຊ່ວຍກະສັດດາວິດ. ຕອນທີ່ດາວິດແລະຄົນຂອງລາວໜີຈາກອາບຊາໂລມ ພວກເຂົາ “ຢາກກິນເຂົ້າເມື່ອຍຢູ່ແລະຢາກກິນນ້ຳ.” ບາເຣຊີລາຍເຖົ້າແລ້ວ ແຕ່ລາວກໍສ່ຽງຊີວິດກັບຄົນອື່ນໆເພື່ອຊ່ວຍດາວິດກັບຄົນຂອງລາວໃຫ້ມີສິ່ງຈຳເປັນ. ບາເຣຊີລາຍບໍ່ໄດ້ຄິດວ່າ ໂອ້ຂ້ອຍເຖົ້າແລ້ວ ພະເຢໂຫວາບໍ່ໃຊ້ຂ້ອຍດອກ ແທນທີ່ຈະຄິດແບບນັ້ນ ລາວໄດ້ໃຊ້ສິ່ງທີ່ລາວມີເພື່ອຊ່ວຍຜູ້ຮັບໃຊ້ຂອງພະເຈົ້າຢ່າງໃຈກວ້າງ. (2 ຊາມ. 17:27-29) ເຮົາໄດ້ຮຽນຮູ້ຫຍັງຈາກເລື່ອງນີ້? ບໍ່ວ່າເຮົາຈະອາຍຸຫຼາຍສ່ຳໃດກໍຕາມ ພະເຢໂຫວາກໍອາດຈະໃຊ້ເຮົາໃຫ້ ຊ່ວຍເຫຼືອພີ່ນ້ອງຮ່ວມຄວາມເຊື່ອທີ່ຂາດສິ່ງຈຳເປັນບໍ່ວ່າພວກເຂົາຈະຢູ່ໃນຫຼືນອກປະເທດ. (ສຸພາ. 3:27, 28; 19:17) ຖ້າເຮົາບໍ່ສາມາດໄປຊ່ວຍເຫຼືອພີ່ນ້ອງໂດຍກົງ ເຮົາກໍອາດຈະບໍລິຈາກເງິນສຳລັບວຽກງານທົ່ວໂລກເພື່ອຊ່ວຍພີ່ນ້ອງທີ່ຕ້ອງການຄວາມຊ່ວຍເຫຼືອ.—2 ໂກ. 8:14, 15; 9:11
7. ພະເຢໂຫວາໃຊ້ຊີເມໂອນແນວໃດ ແລະເປັນຫຍັງເລື່ອງນີ້ອາດຈະໃຫ້ກຳລັງໃຈເຮົາ?
7 ພະເຢໂຫວາສັນຍາກັບຊີເມໂອນຊາຍສູງອາຍຸທີ່ພັກດີໃນເຢຣຶຊາເລມວ່າ ລາວຈະບໍ່ຕາຍກ່ອນທີ່ຈະເຫັນເມຊີ. ຄຳສັນຍານັ້ນຕ້ອງເຮັດໃຫ້ລາວມີກຳລັງໃຈຫຼາຍແທ້ໆ ເພາະລາວລໍຖ້າມາຫຼາຍປີເພື່ອຈະເຫັນເມຊີ. ໃນທີ່ສຸດພະເຢໂຫວາກໍຕອບແທນຄວາມເຊື່ອແລະຄວາມອົດທົນຂອງຊີເມໂອນ. ມື້ໜຶ່ງ “ພະວິນຍານ [“ພະລັງຂອງພະເຈົ້າ,” ລ.ມ.]” ກໍພາລາວມາວິຫານ ແລ້ວລາວກໍເຫັນແອນ້ອຍເຍຊູ ແລະພະເຢໂຫວາໄດ້ໃຊ້ລາວໃຫ້ພະຍາກອນວ່າແອນ້ອຍຄົນນີ້ຈະເປັນພະຄລິດ. (ລືກາ 2:25-35) ເຖິງວ່າຊີເມໂອນອາດຈະຕາຍກ່ອນທີ່ພະຄລິດເລີ່ມເຮັດວຽກຮັບໃຊ້ ແຕ່ລາວກໍດີໃຈຫຼາຍທີ່ພະເຢໂຫວາໃຊ້ລາວແບບນັ້ນ ແລະລາວຈະໄດ້ຮັບສິ່ງດີໆຫຼາຍຢ່າງໃນອະນາຄົດ! ໃນໂລກໃໝ່ ຜູ້ຮັບໃຊ້ທີ່ສັດຊື່ຈະເຫັນວິທີທີ່ທຸກຄົນທົ່ວໂລກຈະໄດ້ຮັບພອນຕ່າງໆຈາກການປົກຄອງຂອງພະເຍຊູ. (ຕົ້ນ. 22:18) ເຮົາເອງກໍດີໃຈຄືກັນສຳລັບສິດທິພິເສດຕ່າງໆທີ່ພະເຢໂຫວາໃຫ້ເຮົາເຮັດ.
8. ພະເຢໂຫວາອາດໃຊ້ເຮົາຄືກັບທີ່ພະອົງໃຊ້ບານາບາແນວໃດ?
8 ໃນສະຕະວັດທຳອິດ ມີຊາຍໃຈກວ້າງຄົນໜຶ່ງທີ່ພ້ອມໃຫ້ພະເຢໂຫວາໃຊ້ລາວ ລາວຊື່ໂຢເຊບ. (ກິດ. 4:36, 37, ລ.ມ.) ອາດເປັນຍ້ອນໂຢເຊບມັກໃຫ້ກຳລັງໃຈຄົນອື່ນ ພວກອັກຄະສາວົກຈຶ່ງເອີ້ນລາວວ່າ ບານາບາ ເຊິ່ງມີຄວາມໝາຍວ່າ: “ຜູ້ໃຫ້ກຳລັງໃຈ.” ຕົວຢ່າງ: ເມື່ອໂຊໂລເຂົ້າມາເປັນຄລິດສະຕຽນ ພີ່ນ້ອງຫຼາຍຄົນໄດ້ຢ້ານລາວເພາະລາວເຄີຍຂົ່ມເຫງຄົນທີ່ເຊື່ອໃນພະເຍຊູ. ແຕ່ບານາບາເຊິ່ງເປັນຄົນອົບອຸ່ນໄດ້ໄປຊ່ວຍໂຊໂລແລະໃຫ້ກຳລັງໃຈລາວ. ໂຊໂລຄົງຕ້ອງຮູ້ສຶກຂອບໃຈບານາບາຫຼາຍແທ້ໆ. (ກິດ. 9:21, 26-28) ຕໍ່ມາເມື່ອຜູ້ດູແລໃນເມືອງເຢຣຶຊາເລມເຫັນວ່າຈຳເປັນຕ້ອງໃຫ້ກຳລັງໃຈພີ່ນ້ອງທີ່ຢູ່ເມືອງອັນຕີອົກໃນແຂວງຊີລີເຊິ່ງຢູ່ຫ່າງໄກ ພວກເຂົາໄດ້ສົ່ງໃຜໄປ? ບານາບາ. ພວກເຂົາເລືອກຖືກແລ້ວ! ຄຳພີໄບເບິນບອກວ່າ ບານາບາ “ໃຫ້ກຳລັງໃຈທຸກຄົນ ແລະບອກພວກເຂົາໃຫ້ພັກດີຕໍ່ຜູ້ເປັນນາຍຢ່າງສຸດຫົວໃຈຕໍ່ໆໄປ.” (ກິດ. 11:22-24, ລ.ມ.) ໃນທຸກມື້ນີ້ກໍຄືກັນ ພະເຢໂຫວາສາມາດໃຊ້ເຮົາໃຫ້ເປັນ “ຜູ້ໃຫ້ກຳລັງໃຈ” ພີ່ນ້ອງຄລິດສະຕຽນ. ຕົວຢ່າງ: ພະອົງອາດໃຊ້ເຮົາໃຫ້ປອບໃຈຜູ້ທີ່ສູນເສຍຄົນທີ່ຮັກເຊິ່ງຕາຍຈາກໄປ ຫຼືພະອົງອາດກະຕຸ້ນເຮົາໃຫ້ໄປຢາມຫຼືໂທລະສັບຫາຜູ້ທີ່ເຈັບປ່ວຍ ຫຼືຜູ້ທີ່ຊຶມເສົ້າ. ເຈົ້າຈະຍອມໃຫ້ພະເຢໂຫວາໃຊ້ເຈົ້າຄືກັບທີ່ພະອົງໃຊ້ບານາບາບໍ?—1 ເທ. 5:14
9. ເຮົາໄດ້ຮຽນຮູ້ຫຍັງຈາກວິທີທີ່ພະເຢໂຫວາຊ່ວຍພີ່ນ້ອງວາຊິລີໃຫ້ເປັນຜູ້ດູແລທີ່ດີ?
9 ພະເຢໂຫວາຊ່ວຍພີ່ນ້ອງຊາຍທີ່ຊື່ວາຊິລີໃຫ້ເປັນຜູ້ດູແລທີ່ດີ. ວາຊິລີຖືກແຕ່ງຕັ້ງໃຫ້ເປັນຜູ້ດູແລຕອນລາວອາຍຸ 26 ປີ ແຕ່ລາວຢ້ານວ່າບໍ່ມີປະສົບການພຽງພໍທີ່ຈະຊ່ວຍປະຊາຄົມທາງດ້ານຄວາມເຊື່ອ ໂດຍສະເພາະຄົນທີ່ປະສົບບັນຫາ. ແຕ່ລາວກໍໄດ້ຮັບການຝຶກອົບຮົມທີ່ດີຈາກປະສົບການຂອງຜູ້ດູແລແລະຈາກໂຮງຮຽນພະລາຊະກິດ. ວາຊິລີໄດ້ອອກຄວາມພະຍາຍາມຫຼາຍເຊັ່ນ: ລາວຕັ້ງເປົ້າໝາຍນ້ອຍໆໄວ້ຫຼາຍຢ່າງ. ເມື່ອລາວເຮັດຕາມເປົ້າໝາຍແຕ່ລະຢ່າງໄດ້ ລາວກໍມີຄວາມໝັ້ນໃຈຫຼາຍຂຶ້ນ. ຕອນນີ້ລາວບອກວ່າ: “ສິ່ງທີ່ຂ້ອຍຢ້ານໃນຕອນນັ້ນພັດເຮັດໃຫ້ຂ້ອຍມີຄວາມສຸກຫຼາຍໃນຕອນນີ້. ເວລາທີ່ພະເຢໂຫວາຊ່ວຍຂ້ອຍໃຫ້ພົບຂໍ້ຄຳພີທີ່ໃຫ້ກຳລັງໃຈພີ່ນ້ອງໃນປະຊາຄົມ ນັ້ນເຮັດໃຫ້ຂ້ອຍມີຄວາມສຸກຫຼາຍແທ້ໆ.” ພີ່ນ້ອງຊາຍທັງຫຼາຍເອີຍ ຖ້າເຈົ້າຮຽນແບບວາຊິລີແລະເຕັມໃຈໃຫ້ພະເຢໂຫວາໃຊ້ເຈົ້າ ພະອົງກໍຈະຊ່ວຍເຈົ້າໃຫ້ມີຄວາມສາມາດທີ່ຈະເຮັດວຽກໃນປະຊາຄົມຫຼາຍຂຶ້ນໄດ້.
ພະເຢໂຫວາຊ່ວຍໃຫ້ຜູ້ຍິງສາມາດເປັນຫຍັງໄດ້ແດ່?
10. ອາບີຄາລີໄດ້ເຮັດຫຍັງ ແລະເຈົ້າໄດ້ຮຽນຮູ້ຫຍັງຈາກຕົວຢ່າງຂອງລາວ?
10 ດາວິດແລະຄົນຂອງລາວກຳລັງຖືກກະສັດຊາອຶລໄລ່ຂ້າ ແລະຕ້ອງການຄວາມຊ່ວຍເຫຼືອ. ຄົນຂອງດາວິດໄປຂໍອາຫານຈາກນາບາລເຊິ່ງເປັນຄົນອິດສະລາແອນທີ່ຮັ່ງມີ. ທີ່ພວກເຂົາກ້າໄປຂໍຄວາມຊ່ວຍເຫຼືອ ກໍຍ້ອນວ່າພວກເຂົາໄດ້ປົກປ້ອງຝູງແກະຂອງນາບາລໃນຖິ່ນທຸລະກັນດານ. ແຕ່ນາບາລເຫັນແກ່ຕົວແລະບໍ່ໃຫ້ຫຍັງພວກເຂົາເລີຍ. ດາວິດໃຈຮ້າຍແຮງແລະຢາກຂ້ານາບາລກັບຜູ້ຊາຍທຸກຄົນໃນເຮືອນຂອງລາວ. (1 ຊາມ. 25:3-13, 22) ແຕ່ນາງອາບີຄາລີເມຍຂອງນາບາລທີ່ທັງງາມແລະສະຫຼາດໄດ້ສະແດງຄວາມກ້າຫານໂດຍໄປຫາດາວິດ ໝູບລົງຕີນ ແລະໂນ້ມນ້າວດາວິດບໍ່ໃຫ້ຂ້າຄົນຍ້ອນຢາກແກ້ແຄ້ນ. ລາວບອກດາວິດໃຫ້ຝາກເລື່ອງນີ້ໄວ້ກັບພະເຢໂຫວາ. ດາວິດປະທັບໃຈຄຳເວົ້າທີ່ສະແດງຄວາມຖ່ອມແລະການກະທຳທີ່ສຸຂຸມຮອບຄອບຂອງອາບີຄາລີ. ດາວິດຮູ້ເລີຍວ່າພະເຢໂຫວາໄດ້ສົ່ງລາວມາຫາ. (1 ຊາມ. 25:23-28, 32-34) ອາບີຄາລີພັດທະນາຄຸນລັກສະນະທີ່ເຮັດໃຫ້ພະເຢໂຫວາສາມາດໃຊ້ລາວໄດ້. ຄ້າຍຄືກັນ ພະເຢໂຫວາກໍໃຊ້ພີ່ນ້ອງຍິງຄລິດສະຕຽນທີ່ຮູ້ຈັກຜ່ອນສັ້ນຜ່ອນຍາວແລະສຸຂຸມຮອບຄອບເພື່ອຊ່ວຍຄອບຄົວຂອງພວກເຂົາແລະຄົນອື່ນໆໃນປະຊາຄົມ.—ສຸພາ. 24:3; ຕິໂຕ 2:3-5
11. ພວກລູກສາວຂອງຊາລຶມໄດ້ເຮັດຫຍັງ ແລະໃຜກຳລັງຮຽນແບບເຂົາເຈົ້າໃນທຸກມື້ນີ້?
11 ໃນຫຼາຍຮ້ອຍປີຕໍ່ມາ ພະເຢໂຫວາໄດ້ໃຊ້ພວກລູກສາວຂອງຊາລຶມໃຫ້ເຮັດວຽກສ້ອມແປງກຳແພງເມືອງເຢຣຶຊາເລມ. (ນເຫ. 2:20; 3:12) ເຖິງວ່າພວກເຂົາຈະເປັນລູກເຈົ້າລູກນາຍ ແຕ່ພວກເຂົາກໍຍັງເຕັມໃຈເຮັດວຽກທີ່ຍາກແລະອັນຕະລາຍ. (ນເຫ. 4:15-18) ກົງກັນຂ້າມ ພວກຄົນສຳຄັນຊາວເມືອງເທໂກອີດ “ບໍ່ຍອມລົດຕົວລົງມາ” ເຮັດວຽກນີ້! (ນເຫ. 3:5, ລ.ມ.) ລອງຄິດເບິ່ງວ່າພວກລູກສາວຂອງຊາລຶມຈະມີຄວາມສຸກຫຼາຍສ່ຳໃດທີ່ໄດ້ສ້າງກຳແພງແລ້ວພາຍໃນເວລາພຽງແຕ່ 52 ມື້! (ນເຫ. 6:15) ໃນສະໄໝຂອງເຮົາ ພີ່ນ້ອງຍິງຫຼາຍຄົນເຕັມໃຈເຮັດວຽກຮັບໃຊ້ທີ່ສັກສິດໃນຮູບແບບພິເສດບໍ່ວ່າຈະເປັນວຽກກໍ່ສ້າງຫຼືສ້ອມແປງຕຶກອາຄານຕ່າງໆທີ່ອຸທິດໃຫ້ພະເຢໂຫວາ. ວຽກເຫຼົ່ານີ້ສຳເລັດຍ້ອນຄວາມສາມາດ ຄວາມຫ້າວຫັນ ແລະຄວາມພັກດີຂອງພວກເຂົາ.
12. ພະເຢໂຫວາສາມາດໃຊ້ເຮົາຄືກັບທີ່ໃຊ້ທາບີທາແນວໃດ?
12 ພະເຢໂຫວາໄດ້ກະຕຸ້ນທາບີທາໃຫ້ “ເຮັດສິ່ງດີໆຫຼາຍຢ່າງແລະຊ່ວຍເຫຼືອຄົນທຸກຍາກ” ໂດຍສະເພາະແມ່ໝ້າຍ. (ກິດ. 9:36, ລ.ມ.) ເນື່ອງຈາກລາວມີຊື່ສຽງວ່າເປັນຄົນເອື້ອເຟື້ອແລະມັກຊ່ວຍເຫຼືອຄົນອື່ນ ເມື່ອລາວຕາຍ ພີ່ນ້ອງຫຼາຍຄົນໄດ້ໂສກເສົ້າເສຍໃຈຫຼາຍ. ແລະຕອນທີ່ເປໂຕປຸກລາວໃຫ້ຟື້ນຄືນຈາກຕາຍ ພີ່ນ້ອງກໍພາກັນດີໃຈຫຼາຍ. (ກິດ. 9:39-41) ເຮົາໄດ້ຮຽນຮູ້ຫຍັງຈາກທາບີທາ? ບໍ່ວ່າຈະອາຍຸໜ້ອຍຫຼືຫຼາຍ ຊາຍຫຼືຍິງ ເຮົາກໍສາມາດເຮັດຫຼາຍຢ່າງທີ່ເຮົາເຮັດໄດ້ເພື່ອຊ່ວຍພີ່ນ້ອງຂອງເຮົາ.—ເຫບ. 13:16
13. ພະເຢໂຫວາໃຊ້ຣູດເຊິ່ງເປັນຄົນຂີ້ອາຍແນວໃດ ແລະຣູດໄດ້ເວົ້າແນວໃດກ່ຽວກັບເລື່ອງນີ້?
13 ຣູດເຊິ່ງເປັນພີ່ນ້ອງຍິງທີ່ຂີ້ອາຍຢາກເປັນມິດຊັນນາລີ. ຕອນຍັງນ້ອຍ ລາວມັກແລ່ນໄປແຈກແຜ່ນພັບຢູ່ເຮືອນຫຼັງນັ້ນຫຼັງນີ້. ລາວບອກວ່າ: “ຂ້ອຍມັກວຽກນີ້ແທ້ໆ.” ແຕ່ການເວົ້າເລື່ອງລາຊະອານາຈັກຂອງພະເຈົ້າກັບເຈົ້າຂອງເຮືອນແລະລົມແບບເຊິ່ງໆໜ້າກັບຄົນອື່ນເປັນເລື່ອງຍາກຫຼາຍສຳລັບລາວ. ເຖິງວ່າລາວຈະຂີ້ອາຍ ແຕ່ລາວກໍເປັນໄພໂອເນຍປະຈຳຕັ້ງແຕ່ອາຍຸ 18 ປີ. ໃນປີ 1946 ລາວໄດ້ເຂົ້າໂຮງຮຽນກິລຽດ ແລະຕໍ່ມາກໍຮັບໃຊ້ຢູ່ຮາວາຍແລະຍີ່ປຸ່ນ. ພະເຢໂຫວາໃຊ້ລາວເຕັມທີໃນການປະກາດຂ່າວດີກັບຜູ້ຄົນໃນປະເທດເຫຼົ່ານັ້ນ. ຫຼັງຈາກເຮັດວຽກຮັບໃຊ້ມາເກືອບ 80 ປີ ຣູດບອກວ່າ: “ພະເຢໂຫວາເສີມກຳລັງຂ້ອຍໃຫ້ເຂັ້ມແຂງສະເໝີ. ພະອົງຊ່ວຍຂ້ອຍໃຫ້ເອົາຊະນະຄວາມອາຍ. ຂ້ອຍເຊື່ອໝັ້ນວ່າພະເຢໂຫວາສາມາດໃຊ້ໃຜກໍໄດ້ທີ່ໄວ້ວາງໃຈພະອົງ.”
ຍອມໃຫ້ພະເຢໂຫວາໃຊ້ເຈົ້າ
14. ຕາມໂກໂລດ 1:29 ເຮົາຕ້ອງເຮັດຫຍັງຖ້າຢາກໃຫ້ພະເຢໂຫວາໃຊ້ເຮົາ?
14 ຕະຫຼອດປະຫວັດສາດ ພະເຢໂຫວາເຮັດໃຫ້ຜູ້ຮັບໃຊ້ພະອົງເປັນຫຍັງກໍໄດ້. ແລ້ວພະອົງຈະເຮັດໃຫ້ເຈົ້າເປັນຫຍັງໄດ້ແດ່? ຫຼັກໆແລ້ວແມ່ນຂຶ້ນຢູ່ກັບຄວາມເຕັມໃຈແລະຄວາມພະຍາຍາມຂອງເຈົ້າ. (ອ່ານໂກໂລດ 1:29) ຖ້າເຈົ້າພ້ອມທີ່ຈະໃຫ້ພະເຢໂຫວາໃຊ້ເຈົ້າ ພະອົງກໍຈະສາມາດຊ່ວຍເຈົ້າໃຫ້ເປັນຜູ້ປະກາດທີ່ດຸໝັ່ນຫ້າວຫັນ ເປັນຄູສອນທີ່ມີປະສິດທິພາບ ເປັນຄົນທີ່ໃຫ້ກຳລັງໃຈໄດ້ດີ ເປັນຄົນເຮັດວຽກເກັ່ງ ເປັນໝູ່ທີ່ມັກຊ່ວຍເຫຼືອຫຼືເປັນຫຍັງກໍໄດ້ເພື່ອເຮັດໃຫ້ຈຸດປະສົງຂອງພະອົງສຳເລັດ.
15. ຕາມ 1 ຕີໂມເຕ 4:12, 15 ພີ່ນ້ອງຊາຍໜຸ່ມຄວນຂໍໃຫ້ພະເຢໂຫວາຊ່ວຍພວກເຂົາໃຫ້ເຮັດຫຍັງ?
15 ແລ້ວເຈົ້າເດພີ່ນ້ອງຊາຍໜຸ່ມ? ຕອນນີ້ເຮົາຕ້ອງການຄົນທີ່ມີກຳລັງຫຼາຍຄືເຈົ້າໃຫ້ມາເຮັດໜ້າທີ່ເປັນຜູ້ຊ່ວຍວຽກຮັບໃຊ້. ໃນຫຼາຍປະຊາຄົມມີຜູ້ດູແລຫຼາຍຄົນ ແຕ່ບໍ່ຄ່ອຍມີຜູ້ຊ່ວຍວຽກຮັບໃຊ້. ເຈົ້າຈະເຮັດໃຫ້ຕົວເອງມີຄວາມຕ້ອງການຫຼາຍຂຶ້ນທີ່ຈະເຮັດໜ້າທີ່ຮັບຜິດຊອບໃນປະຊາຄົມໄດ້ບໍ? ພີ່ນ້ອງຊາຍບາງຄົນບອກວ່າ: “ຂ້ອຍເປັນພຽງແຕ່ຜູ້ປະກາດລ້າໆກໍພໍໃຈແລ້ວ.” ຖ້າຫາກວ່າເຈົ້າຄິດແບບນັ້ນຄືກັນ ກໍຂໍໃຫ້ພະເຢໂຫວາຊ່ວຍເຈົ້າໃຫ້ມີຄວາມຕ້ອງການທີ່ຈະເປັນຜູ້ຊ່ວຍວຽກຮັບໃຊ້ ແລະຊ່ວຍເຈົ້າໃຫ້ມີກຳລັງທີ່ຈະເຮັດທຸກສິ່ງທີ່ເຈົ້າເຮັດໄດ້ເພື່ອຮັບໃຊ້ພະອົງ. (ຜູ້ປ. 12:1) ພີ່ນ້ອງຊາຍໜຸ່ມເອີຍ ເຮົາຕ້ອງການຄວາມຊ່ວຍເຫຼືອຈາກເຈົ້າ!—ອ່ານ 1 ຕີໂມເຕ 4:12, 15
16. ເຮົາຄວນຂໍຫຍັງຈາກພະເຢໂຫວາແລະຍ້ອນຫຍັງ?
16 ພະເຢໂຫວາສາມາດຊ່ວຍເຈົ້າໃຫ້ເປັນຫຍັງກໍໄດ້ເພື່ອເຮັດໃຫ້ຈຸດປະສົງຂອງພະອົງສຳເລັດ. ດັ່ງນັ້ນ ໃຫ້ຂໍພະອົງຊ່ວຍເຈົ້າໃຫ້ມີຄວາມຕ້ອງການ ທີ່ຈະເຮັດວຽກຂອງພະອົງແລະຈາກນັ້ນກໍຂໍພະອົງໃຫ້ກຳລັງ ທີ່ເຈົ້າຈຳເປັນຕ້ອງມີ. ບໍ່ວ່າເຈົ້າຈະໜຸ່ມຫຼືເຖົ້າແລ້ວ ກໍຂໍໃຫ້ເຈົ້າໃຊ້ເວລາ ກຳລັງ ແລະສິ່ງທີ່ເຈົ້າມີເຊັ່ນ: ຄວາມສາມາດແລະຊັບສິນເງິນຄຳເພື່ອຍົກຍ້ອງສັນລະເສີນພະເຢໂຫວາ. (ຜູ້ປ. 9:10) ຖ້າເຈົ້າໄດ້ຮັບໂອກາດທີ່ມີຄ່າໃນການເຮັດວຽກຮັບໃຊ້ພະເຢໂຫວາຫຼາຍຂຶ້ນ ຂໍຢ່າຟ້າວປະຕິເສດເພາະຄິດວ່າຕົວເອງບໍ່ມີຄວາມສາມາດ. ເປັນສິດທິພິເສດແທ້ໆທີ່ຈະເຮັດສິ່ງໃດກໍຕາມທີ່ເຮົາສາມາດເຮັດໄດ້ເຖິງວ່າຈະເປັນສິ່ງນ້ອຍໆເພື່ອຍົກຍ້ອງສັນລະເສີນພະເຢໂຫວາພໍ່ທີ່ຮັກຂອງເຮົາໃນສະຫວັນເຊິ່ງພະອົງສົມຄວນໄດ້ຮັບ!
ເພງ 127 ຂ້ອຍຄວນເປັນຄົນແບບໃດ
^ ຂໍ້ 5 ເຈົ້າຮູ້ສຶກວ່າຮັບໃຊ້ພະເຢໂຫວາບໍ່ໄດ້ຫຼາຍເທົ່າທີ່ຢາກເຮັດບໍ? ເຈົ້າສົງໄສບໍວ່າພະເຢໂຫວາຍັງໃຊ້ເຈົ້າຢູ່ຫຼືບໍ່? ຫຼືເຈົ້າຮູ້ສຶກວ່າບໍ່ຈຳເປັນຕ້ອງເຮັດຫຼາຍກວ່ານີ້ກໍໄດ້? ໃນບົດຄວາມນີ້ຈະພິຈາລະນາຫຼາຍວິທີທີ່ພະເຢໂຫວາຊ່ວຍເຈົ້າໃຫ້ມີຄວາມຕ້ອງການແລະກຳລັງທີ່ຈະເປັນຫຍັງກໍໄດ້ເພື່ອເຮັດໃຫ້ຈຸດປະສົງຂອງພະອົງສຳເລັດ.
^ ຂໍ້ 3 ເຖິງວ່າຈະເປັນຈົດໝາຍທີ່ໂປໂລຂຽນເຖິງຄລິດສະຕຽນໃນສະຕະວັດທຳອິດ ແຕ່ຂໍ້ນີ້ກໍໃຊ້ໄດ້ກັບຜູ້ຮັບໃຊ້ຂອງພະເຢໂຫວາທຸກຄົນ.
^ ຂໍ້ 3 ຟີລິບ 2:13 (ລ.ມ.): “ພະເຈົ້າເປັນຜູ້ທີ່ກະຕຸ້ນພວກເຈົ້າໃຫ້ມີທັງຄວາມຕ້ອງການແລະກຳລັງເພື່ອຈະເຮັດສິ່ງທີ່ພະອົງພໍໃຈ.”