ຄຳຖາມຈາກຜູ້ອ່ານ
ຕອນທີ່ຊາຕານບອກເອວາວ່າລາວຈະບໍ່ຕາຍຖ້າລາວກິນໝາກໄມ້ຈາກຕົ້ນໄມ້ແຫ່ງຄວາມຮູ້ການດີແລະຊົ່ວ ຊາຕານກຳລັງສ້າງຄວາມຄິດກ່ຽວກັບວິນຍານອະມະຕະທີ່ຄົນທົ່ວໄປເຊື່ອໃນປັດຈຸບັນບໍ?
ບໍ່ແມ່ນ. ຊາຕານບໍ່ໄດ້ບອກເອວາວ່າຖ້າລາວກິນໝາກໄມ້ທີ່ພະເຈົ້າຫ້າມ ລາວຈະຕາຍພຽງແຕ່ຮ່າງກາຍແຕ່ຍັງມີວິນຍານເຫຼືອຢູ່ (ເຊິ່ງບາງຄົນໃນປັດຈຸບັນເອີ້ນວ່າວິນຍານອະມະຕະ) ທີ່ມີຊີວິດຢູ່ອີກບ່ອນໜຶ່ງ. ຊາຕານເວົ້າຜ່ານທາງງູວ່າ ຖ້າເອວາກິນໝາກໄມ້ຈາກຕົ້ນໄມ້ນັ້ນ ‘ລາວຈະບໍ່ຕາຍດອກ.’ ມັນໝາຍຄວາມວ່າ ເອວາຈະມີຊີວິດຢູ່ຕໍ່ໄປ ແລະຈະມີຄວາມສຸກກັບຊີວິດທີ່ດີກວ່າຢູ່ເທິງແຜ່ນດິນໂລກໂດຍທີ່ບໍ່ຕ້ອງໝາຍເພິ່ງພະເຈົ້າ.—ຕົ້ນ. 2:17; 3:3-5
ຖ້າຄຳສອນຕົວະກ່ຽວກັບວິນຍານອະມະຕະບໍ່ໄດ້ມີຕົ້ນກຳເນີດມາຈາກສວນເອເດນ ແລ້ວຄຳສອນນີ້ກຳເນີດຂຶ້ນເມື່ອໃດ? ເຮົາບໍ່ຮູ້ແຈ້ງ. ແຕ່ເຮົາຮູ້ວ່າການນະມັດສະການປອມທັງໝົດຖືກກວາດລ້າງຕອນນ້ຳຖ້ວມໂລກໃນສະໄໝໂນອາ. ຄວາມເຊື່ອຜິດໆທີ່ມີກ່ອນນ້ຳຖ້ວມໂລກບໍ່ໄດ້ຖືກເຜີຍແຜ່ຕໍ່ໄປເພາະຄົນທີ່ລອດມີແຕ່ໂນອາກັບຄອບຄົວເຊິ່ງເປັນຜູ້ນະມັດສະການແທ້.
ສະນັ້ນ ຄຳສອນເລື່ອງວິນຍານອະມະຕະທີ່ເຊື່ອໃນປັດຈຸບັນຕ້ອງເກີດຂຶ້ນຫຼັງຈາກນ້ຳຖ້ວມໂລກ. ຕອນທີ່ພະເຈົ້າໄດ້ເຮັດໃຫ້ພາສາສັບສົນວຸ່ນວາຍຢູ່ເມືອງບາເບນ ແລະຜູ້ຄົນກໍໄດ້ ‘ພັດພາກຈາກທີ່ນັ້ນໄປທົ່ວເທິງພື້ນແຜ່ນດິນໂລກ’ ພວກເຂົາຄົງຈະເອົາຄວາມເຊື່ອເລື່ອງວິນຍານອະມະຕະໄປນຳ. (ຕົ້ນ. 11:8, 9) ບໍ່ວ່າຄຳສອນຕົວະນີ້ຈະມີຕົ້ນກຳເນີດມາຈາກໃສ ແຕ່ເຮົາກໍໝັ້ນໃຈໄດ້ວ່າຊາຕານມານຮ້າຍ “ພໍ່ຂອງການຕົວະ” ຕ້ອງຢູ່ເບື້ອງຫຼັງຂອງຄວາມເຊື່ອນີ້ແລະມັນດີໃຈທີ່ເຫັນຄວາມເຊື່ອນີ້ຖືກແພ່ລາມໄປທົ່ວໂລກ.—ຢຮ. 8:44