ບົດຄວາມສຶກສາທີ 51
ເຈົ້າຮູ້ຈັກພະເຢໂຫວາດີສ່ຳໃດ?
“ຄົນທັງຫຼາຍທີ່ຮູ້ຈັກນາມຊື່ຂອງພະອົງກໍຈະປົງໃຈໃນພະອົງ ເຫດວ່າໂອ້ພະເຢໂຫວາພະອົງບໍ່ປະຄົນທັງຫຼາຍທີ່ຊອກຫາພະອົງ.”—ເພງ. 9:10
ເພງ 56 ເຮັດໃຫ້ຄວາມຈິງເປັນຂອງເຈົ້າເອງ
ໃຈຄວາມສຳຄັນ *
1-2. ຕາມປະສົບການຂອງແອນເຈລິໂຕ້ ເຮົາທຸກຄົນຕ້ອງເຮັດຫຍັງ?
ພໍ່ແມ່ຂອງເຈົ້າເປັນພະຍານພະເຢໂຫວາບໍ? ຖ້າແມ່ນ ເຈົ້າຕ້ອງຈື່ໄວ້ວ່າເຈົ້າບໍ່ສາມາດສືບທອດເອົາສາຍສຳພັນທີ່ດີກັບພະເຢໂຫວາຈາກພໍ່ແມ່ຂອງເຈົ້າໄດ້. ບໍ່ວ່າພໍ່ແມ່ຂອງເຮົາຈະຮັບໃຊ້ພະເຢໂຫວາຫຼືບໍ່ ເຮົາທຸກຄົນຕ້ອງສ້າງສາຍສຳພັນທີ່ດີກັບພະເຢໂຫວາດ້ວຍຕົວເອງ.
2 ຂໍໃຫ້ເບິ່ງປະສົບການຂອງພີ່ນ້ອງຊາຍຄົນໜຶ່ງທີ່ຊື່ ແອນເຈລິໂຕ້. ຄອບຄົວຂອງລາວເປັນພະຍານພະເຢໂຫວາ. ຕອນທີ່ລາວອາຍຸນ້ອຍກວ່ານີ້ ລາວບໍ່ໄດ້ຮູ້ສຶກໃກ້ຊິດກັບພະເຈົ້າ. ລາວຍອມຮັບວ່າ: “ຂ້ອຍຮັບໃຊ້ພະເຢໂຫວາກໍຍ້ອນຢາກເຮັດຕາມທີ່ຄອບຄົວພາເຮັດ.” ແຕ່ຕໍ່ມາແອນເຈລິໂຕ້ກໍຕັດສິນໃຈໃຊ້ເວລາຫຼາຍຂຶ້ນໃນການອ່ານຄຳພີໄບເບິນແລະຄິດຕຶກຕອງ ແລະລາວກໍເລີ່ມອະທິດຖານເຖິງພະເຢໂຫວາເລື້ອຍໆ. ຜົນເປັນແນວໃດ? ລາວເວົ້າວ່າ: “ຂ້ອຍໄດ້ຮຽນຮູ້ວ່າວິທີດຽວທີ່ຈະໃກ້ຊິດພະເຢໂຫວາພໍ່ທີ່ຮັກກໍຄື ຂ້ອຍຕ້ອງຮູ້ຈັກພະອົງດ້ວຍຕົວເອງ.” ປະສົບການຂອງແອນເຈລິໂຕ້ເຮັດໃຫ້ເຮົາຄິດເຖິງຄຳຖາມສຳຄັນທີ່ວ່າ: ການຮູ້ຈັກພະເຢໂຫວາຊື່ໆກັບການຮູ້ຈັກພະເຢໂຫວາເປັນຢ່າງດີແຕກຕ່າງກັນແນວໃດ? ແລະເຮົາຕ້ອງເຮັດຫຍັງເພື່ອຈະຮູ້ຈັກພະອົງເປັນຢ່າງດີ?
3. ການຮູ້ຈັກພະເຢໂຫວາຊື່ໆແລະການຮູ້ຈັກພະເຢໂຫວາເປັນຢ່າງດີແຕກຕ່າງກັນແນວໃດ?
3 ເຮົາອາດຄິດວ່າເຮົາຮູ້ຈັກພະເຢໂຫວາເພາະເຮົາຮູ້ຊື່ພະອົງແລະຮູ້ວ່າພະອົງເວົ້າຫຼືເຮັດຫຍັງມາແດ່ແລ້ວ. ແຕ່ການຮູ້ຈັກພະເຢໂຫວາເປັນຢ່າງດີຕ້ອງມີຫຼາຍກວ່າຫັ້ນ. ເຮົາຕ້ອງໃຊ້ເວລາຮຽນຮູ້ກ່ຽວກັບພະເຢໂຫວາແລະຄຸນລັກສະນະທີ່ດີເລີດຂອງພະອົງ ແລ້ວເຮົາກໍຈະເລີ່ມເຂົ້າໃຈເຫດຜົນທີ່ພະອົງເວົ້າແລະເຮັດສິ່ງຕ່າງໆ. ຄວາມເຂົ້າໃຈນີ້ຈະຊ່ວຍເຮົາໃຫ້ຮູ້ວ່າພະອົງພໍໃຈໃນສິ່ງທີ່ເຮົາຄິດ ສິ່ງທີ່ເຮົາຕັດສິນໃຈ ແລະສິ່ງທີ່ເຮົາເຮັດຫຼືບໍ່. ເມື່ອເຮົາຮູ້ວ່າພະເຢໂຫວາຢາກໃຫ້ເຮົາເຮັດຫຍັງ ເຮົາກໍຕ້ອງເຮັດຕາມນັ້ນ.
4. ການຮຽນຮູ້ຕົວຢ່າງຂອງບຸກຄົນໃນຄຳພີໄບເບິນຈະຊ່ວຍເຮົາແນວໃດ?
4 ບາງຄົນອາດເວົ້າເຍາະເຍີ້ຍໃສ່ເຮົາທີ່ເຮົາຢາກຮັບໃຊ້ພະເຢໂຫວາ ແລະພວກເຂົາອາດຕໍ່ຕ້ານເຮົາຫຼາຍຂຶ້ນເມື່ອເຮົາເລີ່ມໄປປະຊຸມ. ແຕ່ຖ້າເຮົາໄວ້ວາງໃຈພະເຢໂຫວາ ພະອົງຈະບໍ່ປະຖິ້ມເຮົາຈັກເທື່ອ. ການໄວ້ວາງໃຈນັ້ນເປັນພື້ນຖານຂອງສາຍສຳພັນລະຫວ່າງເຮົາກັບພະອົງເຊິ່ງຈະຄົງຢູ່ຕະຫຼອດໄປ. ແລ້ວເຮົາຈະຮູ້ຈັກພະເຢໂຫວາດີສ່ຳນັ້ນໄດ້ແທ້ບໍ? ໄດ້ແທ້! ຕົວຢ່າງຂອງໂມເຊແລະກະສັດດາວິດທີ່ເປັນຄົນບໍ່ສົມບູນແບບພິສູດແລ້ວວ່າເລື່ອງນີ້ເປັນໄປໄດ້. ຕອນທີ່ເຮົາຮຽນກ່ຽວກັບສິ່ງທີ່ພວກເຂົາເຮັດ ເຮົາຈະຕອບຄຳຖາມ 2 ຂໍ້ທີ່ວ່າ: ພວກເຂົາຮູ້ຈັກພະເຢໂຫວາເປັນຢ່າງດີໄດ້ແນວໃດ? ແລະເຮົາຈະໄດ້ບົດຮຽນຫຍັງຈາກຕົວຢ່າງຂອງພວກເຂົາ?
ໂມເຊເຫັນ “ພະເຈົ້າທີ່ມະນຸດເບິ່ງບໍ່ເຫັນ”
5. ໂມເຊໄດ້ເລືອກທີ່ຈະເຮັດຫຍັງ?
5 ໂມເຊເລືອກຮັບໃຊ້ພະເຈົ້າ. ຕອນໂມເຊອາຍຸ 40 ປີ ລາວເລືອກຢູ່ກັບຊາວເຮັບເຣີທີ່ເປັນຄົນຂອງພະເຈົ້າແທນທີ່ຈະໃຫ້ຄົນອື່ນຖືວ່າລາວເປັນ “ລູກຂອງລູກສາວຟາໂຣ.” (ຮຣ. 11:24) ໂມເຊຖິ້ມຕຳແໜ່ງທີ່ມີໜ້າມີຕາ. ຕອນທີ່ໂມເຊເລືອກຢູ່ຝ່າຍຄົນອິດສະຣາເອນ ລາວຮູ້ວ່າກະສັດຟາໂຣຕ້ອງໃຈຮ້າຍຫຼາຍ. ຟາໂຣເປັນກະສັດທີ່ມີອຳນາດຫຼາຍແລະຄົນເອຢິບກໍຖືວ່າຟາໂຣເປັນພະເຈົ້າອົງໜຶ່ງ. ນີ້ສະແດງວ່າໂມເຊມີຄວາມເຊື່ອທີ່ເຂັ້ມແຂງແທ້ໆ! ໂມເຊໄວ້ວາງໃຈໃນພະເຢໂຫວາ ແລະນີ້ເປັນເຫດຜົນທີ່ໂມເຊໃກ້ຊິດກັບພະເຢໂຫວາຕະຫຼອດຊີວິດ.—ສຸພາ. 3:5
6. ເຮົາໄດ້ບົດຮຽນຫຍັງຈາກຕົວຢ່າງຂອງໂມເຊ?
6 ເຮົາໄດ້ບົດຮຽນຫຍັງຈາກເລື່ອງນີ້? ຄືກັບໂມເຊ ເຮົາທຸກຄົນຕ້ອງຕັດສິນໃຈເລື່ອງໜຶ່ງຄື: ເຮົາຈະຮັບໃຊ້ພະເຢໂຫວາແລະຢູ່ກັບປະຊາຊົນຂອງພະອົງຫຼືບໍ່? ເພື່ອຈະຮັບໃຊ້ພະເຈົ້າ ເຮົາອາດຕ້ອງເສຍສະລະຫຼາຍຢ່າງ ແລະເຮົາອາດຈະຖືກຕໍ່ຕ້ານຈາກຜູ້ທີ່ບໍ່ຮູ້ຈັກພະເຢໂຫວາ. ແຕ່ຖ້າເຮົາໄວ້ວາງໃຈພະເຢໂຫວາພໍ່ຂອງເຮົາທີ່ຢູ່ໃນສະຫວັນ ເຮົາກໍໝັ້ນໃຈໄດ້ວ່າພະອົງຈະຊ່ວຍເຫຼືອເຮົາ!
7-8. ໂມເຊໄດ້ຮຽນຮູ້ກ່ຽວກັບຫຍັງເລື້ອຍໆ?
7 ໂມເຊໄດ້ຮຽນຮູ້ເລື້ອຍໆກ່ຽວກັບຄຸນລັກສະນະຂອງພະເຢໂຫວາແລະຄວາມຕ້ອງການຂອງພະອົງ. ຕົວຢ່າງເຊັ່ນ: ເມື່ອພະເຢໂຫວາຂໍໃຫ້ໂມເຊນຳພາຊາດອິດສະຣາເອນອອກຈາກເອຢິບ ລາວບໍ່ມີຄວາມໝັ້ນໃຈແລະບອກພະເຢໂຫວາຫຼາຍເທື່ອວ່າລາວບໍ່ມີຄວາມສາມາດ. ວິທີທີ່ພະເຢໂຫວາຕອບໂມເຊຊ່ວຍໃຫ້ລາວເຫັນວ່າພະອົງເຫັນອົກເຫັນໃຈ ແທ້ໆ. (ອົບ. 4:10-16) ຜົນກໍຄື ໂມເຊສາມາດບອກຄຳພິພາກສາຕໍ່ໜ້າຟາໂຣໄດ້. ຈາກນັ້ນ ໂມເຊກໍເຫັນພະເຢໂຫວາໃຊ້ພະລັງອຳນາດ ຂອງພະອົງເມື່ອພະອົງຊ່ວຍຊາດອິດສະຣາເອນໃຫ້ລອດ ແລະທຳລາຍຟາໂຣກັບກອງທັບຂອງພວກເຂົາໃນທະເລແດງ.—ອົບ. 14:26-31; ເພງ. 136:15
8 ຫຼັງຈາກໂມເຊນຳພາຊາດອິດສະຣາເອນອອກຈາກເອຢິບ ພວກເຂົາກໍຈົ່ມເລື່ອງນັ້ນເລື່ອງນີ້ຕະຫຼອດເວລາ. ແຕ່ໂມເຊເຫັນວ່າພະເຢໂຫວາອົດທົນອົດກັ້ນ ກັບປະຊາຊົນທີ່ພະອົງຊ່ວຍຈາກການເປັນທາດ. (ເພງ. 78:40-43) ນອກຈາກນັ້ນ ໂມເຊຍັງເຫັນວ່າພະເຢໂຫວາຖ່ອມຕົວ ຫຼາຍຕອນທີ່ພະອົງປ່ຽນໃຈຕາມທີ່ໂມເຊຮ້ອງຂໍ.—ອົບ. 32:9-14
9. ຕາມເຮັບເຣີ 11:27 ໂມເຊສະໜິດກັບພະເຢໂຫວາຫຼາຍສ່ຳໃດ?
9 ຫຼັງຈາກທີ່ອອກຈາກເອຢິບ ໂມເຊກໍສະໜິດກັບພະເຢໂຫວາຫຼາຍຈົນຮູ້ສຶກວ່າລາວສາມາດເຫັນພະອົງຜູ້ເປັນພໍ່ຢູ່ໃນສະຫວັນ. (ອ່ານເຮັບເຣີ 11:27) ຄຳພີໄບເບິນເວົ້າເຖິງສາຍສຳພັນທີ່ໃກ້ຊິດຂອງໂມເຊກັບພະເຢໂຫວາວ່າ: “ພະເຢໂຫວາໄດ້ປາກກັບທ່ານໂມເຊຕໍ່ໜ້າກັນເໝືອນຄົນຜູ້ໜຶ່ງເວົ້າກັນກັບສ່ຽວແຫ່ງຕົນ.”—ອົບ. 33:11
10. ເຮົາຕ້ອງເຮັດຫຍັງເພື່ອຈະຮູ້ຈັກພະເຢໂຫວາເປັນຢ່າງດີ?
10 ເຮົາໄດ້ບົດຮຽນຫຍັງຈາກເລື່ອງນີ້? ການຮູ້ຈັກພະເຢໂຫວາເປັນຢ່າງດີບໍ່ພຽງແຕ່ເປັນການຮຽນຮູ້ເລື່ອງຄຸນລັກສະນະຂອງພະອົງ ແຕ່ຕ້ອງເຮັດຕາມສິ່ງທີ່ພະອົງຕ້ອງການນຳ. ໃນທຸກມື້ນີ້ ພະອົງຕ້ອງການ “ໃຫ້ຄົນທຸກຊະນິດລອດແລະໄດ້ຮັບຄວາມຮູ້ທີ່ຖືກຕ້ອງເລື່ອງຄວາມຈິງ.” (1 ຕມ. 2:3, 4) ວິທີໜຶ່ງທີ່ເຮົາຈະເຮັດສິ່ງທີ່ພະເຢໂຫວາຕ້ອງການໄດ້ກໍຄືສອນຄົນອື່ນໃຫ້ຮູ້ຈັກເລື່ອງຂອງພະອົງ.
11. ເມື່ອເຮົາສອນຄົນອື່ນເລື່ອງພະເຢໂຫວາ ເຮົາໄດ້ຮູ້ຈັກພະອົງດີຂຶ້ນແນວໃດ?
11 ເມື່ອເຮົາສອນຄົນອື່ນເລື່ອງພະເຢໂຫວາ ເຮົາກໍຈະຮູ້ຈັກພະອົງດີຂຶ້ນ. ຕົວຢ່າງ: ເຮົາເຫັນຫຼັກຖານທີ່ຈະແຈ້ງວ່າພະເຢໂຫວາເຫັນອົກເຫັນໃຈ ຕອນທີ່ພະອົງຊີ້ນຳເຮົາໃຫ້ພົບຄົນທີ່ຢາກເປັນໝູ່ກັບພະອົງ. (ຢຮ. 6:44; ກຈກ. 13:48) ເຮົາໄດ້ເຫັນພະລັງ ຂອງຄຳພີໄບເບິນເມື່ອຄົນທີ່ເຮົາສອນປ່ຽນແປງຕົວເອງແລະເລີ່ມມີລັກສະນະນິດໄສໃໝ່. (ກລຊ. 3:9, 10) ນອກຈາກນັ້ນ ເຮົາຍັງເຫັນຫຼັກຖານວ່າ ພະເຢໂຫວາອົດທົນອົດກັ້ນ ກັບຜູ້ຄົນຫຼາຍໂດຍໃຫ້ໂອກາດຄົນໃນເຂດປະກາດຂອງເຮົາໄດ້ຮຽນຮູ້ກ່ຽວກັບພະອົງແລະລອດຊີວິດ.—ຣມ. 10:13-15
12. ຕາມອົບພະຍົບ 33:13 ໂມເຊຂໍຫຍັງ ແລະຍ້ອນຫຍັງ?
12 ໂມເຊເຫັນຄຸນຄ່າສາຍສຳພັນທີ່ລາວມີກັບພະເຢໂຫວາ. ເຖິງວ່າພະເຢໂຫວາຈະໃຊ້ໂມເຊໃຫ້ເຮັດການອັດສະຈັນຫຼາຍຢ່າງເຊິ່ງເຮັດໃຫ້ລາວຮູ້ຈັກພະອົງເປັນຢ່າງດີ ແຕ່ລາວກໍຍັງຂໍໃຫ້ພະເຢໂຫວາຊ່ວຍລາວໃຫ້ຮູ້ຈັກຫຼາຍຂຶ້ນອີກ. (ອ່ານອົບພະຍົບ 33:13) ຕອນທີ່ໂມເຊຂໍໃຫ້ພະເຢໂຫວາຊ່ວຍ ລາວອາຍຸຫຼາຍກວ່າ 80 ປີແລ້ວ ແຕ່ລາວກໍຮູ້ວ່າລາວຕ້ອງຮຽນຮູ້ຫຼາຍຢ່າງກ່ຽວກັບພະເຢໂຫວາພໍ່ທີ່ຮັກທີ່ຢູ່ໃນສະຫວັນ.
13. ວິທີໜຶ່ງທີ່ສະແດງວ່າເຮົາເຫັນຄຸນຄ່າສາຍສຳພັນທີ່ເຮົາມີກັບພະເຢໂຫວາແມ່ນຫຍັງ?
13 ເຮົາໄດ້ບົດຮຽນຫຍັງຈາກເລື່ອງນີ້? ບໍ່ວ່າເຮົາຈະຮັບໃຊ້ພະເຢໂຫວາມາດົນປານໃດ ເຮົາກໍຕ້ອງສະແດງໃຫ້ເຫັນວ່າເຮົາເຫັນຄຸນຄ່າສາຍສຳພັນທີ່ເຮົາມີກັບພະເຢໂຫວາ. ວິທີໜຶ່ງທີ່ສະແດງວ່າເຮົາເຫັນຄຸນຄ່າກໍໂດຍການລົມກັບພະອົງໃນຄຳອະທິດຖານ.
14. ເປັນຫຍັງການອະທິດຖານຈຶ່ງເປັນສິ່ງສຳຄັນທີ່ຈະຊ່ວຍເຮົາໃຫ້ຮູ້ຈັກພະເຢໂຫວາຫຼາຍຂຶ້ນ?
14 ຖ້າເຈົ້າຢາກເປັນໝູ່ສະໜິດກັບໃຜຄົນໜຶ່ງ ເຈົ້າກໍຈະລົມກັບລາວເລື້ອຍໆ. ດັ່ງນັ້ນ ຖ້າເຈົ້າຢາກເປັນໝູ່ສະໜິດກັບພະເຢໂຫວາ ເຈົ້າກໍຕ້ອງອະທິດຖານເຖິງພະອົງເລື້ອຍໆ ແລະບອກຄວາມຄິດແລະຄວາມຮູ້ສຶກຂອງເຈົ້າກັບພະອົງ. (ອຟຊ. 6:18) ຄຣິດສ໌ຕ້າທີ່ຢູ່ໃນປະເທດຕວກກີບອກວ່າ: “ທຸກເທື່ອຂ້ອຍບອກຄວາມຄິດຂອງຂ້ອຍຕອນທີ່ອະທິດຖານເຖິງພະເຢໂຫວາແລະໄດ້ເຫັນວ່າພະອົງຊ່ວຍຂ້ອຍ ນີ້ເຮັດໃຫ້ຂ້ອຍຮັກແລະໄວ້ວາງໃຈພະອົງຫຼາຍຂຶ້ນ. ແລະເມື່ອຂ້ອຍເຫັນວິທີທີ່ພະເຢໂຫວາຕອບຄຳອະທິດຖານຂອງຂ້ອຍ ຂ້ອຍຮູ້ສຶກວ່າພະເຢໂຫວາເປັນພໍ່ແລະໝູ່ຂອງຂ້ອຍແທ້ໆ.”
ຄົນທີ່ພະເຢໂຫວາພໍໃຈ
15. ພະເຢໂຫວາເວົ້າເຖິງດາວິດແນວໃດ?
15 ຕອນທີ່ກະສັດດາວິດເກີດ ພໍ່ແມ່ຂອງລາວແລະທຸກຄົນທີ່ຢູ່ອ້ອມຂ້າງລາວລ້ວນແຕ່ເປັນຜູ້ທີ່ນະມັດສະການພະເຢໂຫວາ. ແຕ່ດາວິດບໍ່ພຽງແຕ່ນະມັດສະການພະເຢໂຫວາຍ້ອນເປັນປະເພນີຂອງຄອບຄົວ. ລາວມີສາຍສຳພັນກັບພະເຢໂຫວາເປັນສ່ວນຕົວ ແລະພະເຢໂຫວາກໍຮັກລາວເປັນພິເສດ. ພະເຢໂຫວາບອກວ່າດາວິດ “ເປັນຄົນທີ່ເຮົາພໍໃຈ.” (ກຈກ. 13:22) ເປັນຫຍັງດາວິດຈຶ່ງໃກ້ຊິດກັບພະເຢໂຫວາໄດ້ຫຼາຍປານນີ້?
16. ເມື່ອດາວິດເບິ່ງສິ່ງທີ່ພະເຢໂຫວາສ້າງ ລາວໄດ້ຮຽນຮູ້ຫຍັງຈາກພະອົງ?
16 ດາວິດຮຽນຮູ້ກ່ຽວກັບພະເຢໂຫວາຈາກສິ່ງທີ່ພະອົງສ້າງ. ຕອນດາວິດຍັງນ້ອຍ ລາວລ້ຽງແກະໃຫ້ພໍ່ຂອງລາວຕະຫຼອດ ບາງເທື່ອອາດເປັນຕອນນັ້ນທີ່ລາວເລີ່ມຄິດຕຶກຕອງກ່ຽວກັບສິ່ງທີ່ພະເຢໂຫວາສ້າງ. ຕົວຢ່າງ: ເມື່ອດາວິດເບິ່ງທ້ອງຟ້າຕອນກາງຄືນ ລາວບໍ່ພຽງແຕ່ເຫັນດວງດາວຫຼາຍພັນດວງ ແຕ່ລາວຍັງເຫັນຄຸນລັກສະນະຂອງຜູ້ສ້າງດາວເຫຼົ່ານັ້ນນຳ. ລາວຖືກກະຕຸ້ນໃຫ້ຂຽນວ່າ: “ຟ້າສະຫວັນທັງຫຼາຍເລົ່າເລື່ອງລັດສະໝີຂອງພະເຈົ້າ ແລະພື້ນອາກາດປ່າວປະກາດກິດຈະການແຫ່ງມືຂອງພະອົງ.” (ເພງ. 19:1, 2) ເມື່ອດາວິດຄິດຕຶກຕອງກ່ຽວກັບວິທີທີ່ພະເຢໂຫວາສ້າງມະນຸດ ລາວກໍເຫັນສະຕິປັນຍາອັນເລີດລ້ຳຂອງພະເຢໂຫວາ. (ເພງ. 139:14) ເມື່ອດາວິດໄດ້ຄິດຕຶກຕອງເຖິງສິ່ງຕ່າງໆທີ່ພະເຢໂຫວາສ້າງ ລາວກໍແຮ່ງຮູ້ສຶກຖ່ອມຕົວລົງ.—ເພງ. 139:6
17. ເຮົາໄດ້ຮຽນຮູ້ຫຍັງຈາກການຄິດຕຶກຕອງກ່ຽວກັບສິ່ງທີ່ພະເຈົ້າສ້າງ?
17 ເຮົາໄດ້ບົດຮຽນຫຍັງຈາກເລື່ອງນີ້? ເຮົາຕ້ອງສົນໃຈສິ່ງທີ່ພະເຈົ້າສ້າງ. ໃຫ້ໃຊ້ເວລາສັງເກດເບິ່ງສິ່ງທີ່ສວຍງາມທີ່ຢູ່ເທິງໂລກແລະເບິ່ງວ່າສິ່ງເຫຼົ່ານັ້ນມະຫັດສະຈັນຫຼາຍສ່ຳໃດ! ໃນຊີວິດປະຈຳວັນຂອງເຈົ້າໃຫ້ລອງຄິດຕຶກຕອງກ່ຽວກັບຕົ້ນໄມ້ໃບຫຍ້າ ສັດສາວາສິ່ງແລະມະນຸດເຮົາ ເພື່ອຈະເບິ່ງວ່າສິ່ງເຫຼົ່ານີ້ສອນເຈົ້າໃຫ້ຮູ້ຫຍັງກ່ຽວກັບພະເຢໂຫວາ. ເຈົ້າຈະເຫັນວ່າໃນແຕ່ລະມື້ເຈົ້າໄດ້ຮຽນຮູ້ຫຼາຍຢ່າງຈາກພໍ່ທີ່ຮັກ. (ຣມ. 1:20) ແລະເຈົ້າກໍຈະເຫັນຄວາມຮັກທີ່ມີຕໍ່ພະອົງຫຼາຍຂຶ້ນທຸກມື້.
18. ຕາມຄຳເພງບົດ 18 ດາວິດຮູ້ຫຍັງ?
18 ດາວິດຮູ້ວ່າພະເຢໂຫວາຊ່ວຍລາວ. ຕົວຢ່າງ: ເມື່ອດາວິດປົກປ້ອງແກະຂອງພໍ່ຈາກໂຕສິງແລະໝີ ລາວກໍຮູ້ວ່າພະເຢໂຫວາຊ່ວຍລາວໃຫ້ຂ້າສັດປ່າເຫຼົ່ານີ້ໄດ້. ຕອນທີ່ລາວຕໍ່ສູ້ຊະນະຍັກໂຄລີອາດ ລາວກໍເຫັນໄດ້ຢ່າງຈະແຈ້ງວ່າພະເຢໂຫວາຊ່ວຍລາວ. (1 ຊາມ. 17:37) ຕອນທີ່ໜີຈາກກະສັດຊາອືລທີ່ຂີ້ອິດສາ ດາວິດກໍຮູ້ເລີຍວ່າພະເຢໂຫວາເປັນຜູ້ຊ່ວຍຊີວິດລາວ. (ເພງ. 18, ຂໍ້ຄວາມຫົວບົດ) ຄົນຍິ່ງຈະຄິດວ່າຄວາມສຳເລັດທຸກຢ່າງມາຈາກຕົວເອງ ແຕ່ດາວິດເປັນຄົນຖ່ອມຕົວ ລາວຈຶ່ງຮູ້ວ່າພະເຢໂຫວາເປັນຜູ້ທີ່ຊ່ວຍລາວມາຕະຫຼອດ.—ເພງ. 138:6
19. ເຮົາໄດ້ຮຽນຮູ້ຫຍັງຈາກຕົວຢ່າງຂອງດາວິດ?
19 ເຮົາໄດ້ບົດຮຽນຫຍັງຈາກເລື່ອງນີ້? ເຮົາຕ້ອງບໍ່ພຽງແຕ່ຂໍໃຫ້ພະເຢໂຫວາຊ່ວຍ ແຕ່ເຮົາຕ້ອງຮູ້ວ່າພະເຢໂຫວາຈະຊ່ວຍເຮົາຕອນໃດແລະໂດຍວິທີໃດ. ຖ້າເຮົາຖ່ອມຕົວແລະຮູ້ວ່າຕົວເອງມີຂີດຈຳກັດ ເຮົາກໍຈະເຫັນໄດ້ແຈ້ງວ່າພະເຢໂຫວາຊ່ວຍເຮົາໃນສິ່ງທີ່ເຮົາເຮັດບໍ່ໄດ້ ແລະທຸກເທື່ອທີ່ເຮົາເຫັນວ່າພະເຢໂຫວາຊ່ວຍ ສາຍສຳພັນຂອງເຮົາກັບພະອົງກໍຈະເຂັ້ມແຂງຫຼາຍຂຶ້ນ. ພີ່ນ້ອງຊາຍຄົນໜຶ່ງທີ່ຊື່ ໄອແຊັກເຊິ່ງຮັບໃຊ້ພະເຢໂຫວາຢູ່ເກາະຟິຈິເປັນເວລາຫຼາຍປີກໍເຫັນວ່ານີ້ເປັນເລື່ອງຈິງ. ລາວບອກວ່າ: “ເມື່ອຄິດຄືນຫຼັງ ຂ້ອຍກໍເຫັນວ່າພະເຢໂຫວາໄດ້ຊ່ວຍຂ້ອຍແນວໃດແດ່ຕັ້ງແຕ່ຕອນທີ່ເລີ່ມຮຽນຄຳພີໄບເບິນຈົນມາຮອດຕອນນີ້. ນັ້ນເຮັດໃຫ້ພະເຢໂຫວາເປັນຈິງສຳລັບຂ້ອຍ.”
20. ເຮົາໄດ້ຮຽນຮູ້ຫຍັງຈາກສາຍສຳພັນທີ່ດາວິດມີກັບພະເຢໂຫວາ?
20 ດາວິດຮຽນແບບຄຸນລັກສະນະຂອງພະເຢໂຫວາ. ພະເຢໂຫວາສ້າງເຮົາໃຫ້ສາມາດຮຽນແບບຄຸນລັກສະນະຂອງພະອົງ. (ຕົ້ນ. 1:26) ແຮ່ງເຮົາຮຽນຮູ້ກ່ຽວກັບຄຸນລັກສະນະຂອງພະເຢໂຫວາ ເຮົາກໍແຮ່ງຈະຮຽນແບບພະອົງໄດ້ຫຼາຍຂຶ້ນ. ດາວິດຮູ້ຈັກຄຸນລັກສະນະຂອງພໍ່ທີ່ຢູ່ໃນສະຫວັນເປັນຢ່າງດີ ລາວຈຶ່ງຮຽນແບບພະອົງເມື່ອຕິດຕໍ່ພົວພັນກັບຄົນອື່ນ. ເຖິງວ່າດາວິດໄດ້ເຮັດບາບຕໍ່ພະເຢໂຫວາຕອນທີ່ເຮັດຜິດສິນລະທຳທາງເພດກັບນາງບາດເຊບາ ແລ້ວຂ້າຜົວຂອງລາວ ແຕ່ພະເຢໂຫວາເລືອກທີ່ຈະເມດຕາດາວິດ. (2 ຊາມ. 11:1-4, 15) ນີ້ກໍເພາະດາວິດຮຽນແບບພະເຢໂຫວາແລະເຄີຍເມດຕາຄົນອື່ນ. ຍ້ອນດາວິດມີສາຍສຳພັນທີ່ດີກັບພະເຢໂຫວາ ລາວຈຶ່ງເປັນກະສັດອົງໜຶ່ງທີ່ຊາດອິດສະຣາເອນຮັກຫຼາຍ ແລະພະເຢໂຫວາໄດ້ຍົກດາວິດໃຫ້ເປັນຕົວຢ່າງແກ່ກະສັດອິດສະຣາເອນອົງອື່ນໆ.—1 ກະ. 15:11; 2 ກະ. 14:1-3
21. ຕາມເອເຟໂຊ 4:24 ແລະ 5:1 ເມື່ອເຮົາ “ຮຽນແບບພະເຈົ້າ” ຜົນຈະເປັນແນວໃດ?
21 ເຮົາໄດ້ບົດຮຽນຫຍັງຈາກເລື່ອງນີ້? ເຮົາຕ້ອງ “ຮຽນແບບພະເຈົ້າ.” ການເຮັດແບບນີ້ບໍ່ພຽງແຕ່ເປັນປະໂຫຍດຕໍ່ເຮົາ ແຕ່ຍັງຊ່ວຍໃຫ້ເຮົາຮູ້ຈັກພະເຈົ້າຫຼາຍຂຶ້ນ. ເມື່ອເຮົາຮຽນແບບຄຸນລັກສະນະຂອງພະເຈົ້າ ເຮົາກໍກຳລັງພິສູດວ່າເຮົາເປັນລູກຂອງພະອົງ.—ອ່ານເອເຟໂຊ 4:24; 5:1
ພະຍາຍາມຮູ້ຈັກພະເຢໂຫວາໃຫ້ຫຼາຍຂຶ້ນ
22-23. ຖ້າເຮົາເຮັດຕາມສິ່ງທີ່ໄດ້ຮຽນຮູ້ກ່ຽວກັບພະເຢໂຫວາ ຜົນຈະເປັນແນວໃດ?
22 ເຮົາໄດ້ເຫັນແລ້ວວ່າ ພະເຢໂຫວາເປີດເຜີຍໃຫ້ເຮົາຮູ້ຈັກພະອົງໂດຍທາງສິ່ງທີ່ພະອົງສ້າງແລະຄຳພີໄບເບິນ. ຄຳພີໄບເບິນມີຕົວຢ່າງຂອງຜູ້ຮັບໃຊ້ພະເຈົ້າທີ່ສັດຊື່ຫຼາຍຄົນທີ່ເຮົາສາມາດຮຽນແບບໄດ້ ເຊັ່ນ: ໂມເຊແລະດາວິດ. ພະເຢໂຫວາເຮັດສ່ວນຂອງພະອົງແລ້ວເພື່ອໃຫ້ເຮົາຮູ້ຈັກພະອົງ. ດັ່ງນັ້ນ ມັນກໍຂຶ້ນກັບເຮົາວ່າຈະເປີດຫູ ເປີດຕາ ແລະເປີດໃຈເພື່ອຈະຮູ້ຈັກພະເຢໂຫວາໃຫ້ດີທີ່ສຸດບໍ?
23 ເຮົາຈະບໍ່ເຊົາຮຽນຮູ້ກ່ຽວກັບພະເຢໂຫວາ. (ຜູ້ປ. 3:11) ສິ່ງທີ່ສຳຄັນບໍ່ແມ່ນວ່າເຮົາຮູ້ເລື່ອງຂອງພະເຢໂຫວາຫຼາຍສ່ຳໃດ ແຕ່ສິ່ງສຳຄັນຄືເຮົາໄດ້ເຮັດຫຍັງກັບຄວາມຮູ້ນັ້ນ. ຖ້າເຮົາເຮັດຕາມສິ່ງທີ່ເຮົາຮຽນຮູ້ແລະພະຍາຍາມຮຽນແບບພະເຢໂຫວາພໍ່ທີ່ຮັກຂອງເຮົາ ພະອົງກໍຈະຫຍັບເຂົ້າມາໃກ້ເຮົາ. (ຢກບ. 4:8) ພະອົງຮັບຮອງກັບເຮົາໂດຍທາງຄຳພີໄບເບິນວ່າ ພະອົງຈະບໍ່ມີວັນຖິ້ມຄົນທີ່ພະຍາຍາມຮູ້ຈັກພະອົງ.
ເພງ 80 “ລອງຊີມແລ້ວຈະຮູ້ວ່າພະເຢໂຫວາດີ”
^ ຂໍ້ 5 ຫຼາຍຄົນເຊື່ອວ່າມີພະເຈົ້າ ແຕ່ພວກເຂົາບໍ່ຮູ້ຈັກພະເຈົ້າແທ້ໆ. ການຮູ້ຈັກພະເຢໂຫວາໝາຍເຖິງຫຍັງ ແລະເຮົາຈະໄດ້ຮຽນຮູ້ຫຍັງຈາກຕົວຢ່າງຂອງໂມເຊແລະກະສັດດາວິດກ່ຽວກັບວິທີທີ່ຈະມີສາຍສຳພັນທີ່ແໜ້ນແຟ້ນກັບພະເຢໂຫວາ? ເຮົາຈະຕອບຄຳຖາມເຫຼົ່ານັ້ນໃນບົດຄວາມນີ້.
