ເຈົ້າຈື່ໄດ້ບໍ?
ເຈົ້າຕອບຄຳຖາມເຫຼົ່ານີ້ຈາກຫໍສັງເກດການ 2019 ໄດ້ບໍ?
ຄຳສັນຍາຂອງພະເຈົ້າທີ່ວ່າ: “ບໍ່ມີອາວຸດໃດທີ່ສ້າງຂຶ້ນມາຕໍ່ສູ້ເຈົ້າຈະທຳຮ້າຍເຈົ້າໄດ້” ໝາຍຄວາມວ່າແນວໃດ? (ເອຊາ. 54:17, ລ.ມ.)
ເຮົາສາມາດໝັ້ນໃຈໄດ້ວ່າພະເຈົ້າຈະປົກປ້ອງເຮົາຈາກ “ລົມແດງພັດຂອງພວກຜູ້ຂົ່ມເຫງ.” (ເອຊາ 25:4, 5) ພວກສັດຕູຈະບໍ່ມີທາງເຮັດໃຫ້ເຮົາເສຍຫາຍຖາວອນໄດ້.—ຫ19.01 ໜ້າ 6-7.
ພະເຈົ້າໄດ້ເຮັດແນວໃດກັບຊາວການາອານແລະຊາວອິດສະລາແອນທີ່ບໍ່ເຊື່ອຟັງເຊິ່ງສະແດງໃຫ້ເຫັນວ່າພະອົງຍຸຕິທຳ?
ພະເຈົ້າໄດ້ຕັດສິນລົງໂທດຄົນທີ່ເຮັດຜິດສິນລະທຳທາງເພດທີ່ໜ້າລັງກຽດຫຼືເຮັດບໍ່ດີຕໍ່ຜູ້ຍິງແລະເດັກນ້ອຍທີ່ບໍ່ມີທາງສູ້. ພະເຢໂຫວາຈະອວຍພອນເຂົາເຈົ້າ ຖ້າເຂົາເຈົ້າພັກດີຕໍ່ພະອົງແລະປະຕິບັດຕໍ່ກັນຢ່າງຍຸຕິທຳ.—ຫ19.02 ໜ້າ 22-23.
ເຮົາຄວນເຮັດແນວໃດເມື່ອເຮົາຢູ່ໃນສະຖານະການທີ່ຄົນທີ່ມີຄວາມເຊື່ອຕ່າງຈາກເຮົາອະທິດຖານ?
ເຮົາອາດຈະມິດຢູ່ແລະສະແດງຄວາມນັບຖື. ເຮົາຈະບໍ່ມີສ່ວນຮ່ວມໂດຍເວົ້າ “ອາແມນ” ແລະເຮົາຈະບໍ່ຈັບມືກັບຄົນອື່ນຕອນອະທິດຖານເພາະນີ້ສະແດງວ່າເຮົາມີສ່ວນຮ່ວມໃນຄຳອະທິດຖານນັ້ນ. ເຮົາອາດເລືອກອະທິດຖານເອງໃນໃຈ.—ຫ19.03 ໜ້າ 31.
ເປັນຫຍັງການລ່ວງລະເມີດເດັກທາງເພດຈຶ່ງເປັນຄວາມຜິດທີ່ຮ້າຍແຮງ?
ການລ່ວງລະເມີດເດັກທາງເພດເປັນການເຮັດຜິດຕໍ່ຜູ້ທີ່ຕົກເປັນເຫຍື່ອ ຕໍ່ປະຊາຄົມ ຕໍ່ກົດໝາຍບ້ານເມືອງ ແລະຕໍ່ພະເຈົ້າ. ໃນປະເທດທີ່ມີກົດໝາຍກຳນົດໄວ້ວ່າຕ້ອງລາຍງານເລື່ອງນີ້ ຜູ້ເຖົ້າແກ່ກໍຕ້ອງເຮັດຕາມຂໍ້ກຳນົດນັ້ນ.—ຫ19.05 ໜ້າ 9-10.
ເຈົ້າຈະປ່ຽນແປງຄວາມຄິດຈິດໃຈຂອງເຈົ້າໄດ້ແນວໃດ?
ວິທີສຳຄັນຄື: ອະທິດຖານເຖິງພະເຢໂຫວາ ຄິດຕຶກຕອງກ່ຽວກັບຄວາມຄິດແລະຄວາມຮູ້ສຶກທີ່ເຮົາຕ້ອງປ່ຽນ ແລະເລືອກໝູ່ທີ່ດີ.—ຫ19.06 ໜ້າ 11.
ເຮົາຈະເຮັດຫຍັງໄດ້ແດ່ເພື່ອກຽມພ້ອມຮັບມືກັບການຂົ່ມເຫງຕັ້ງແຕ່ຕອນນີ້?
ເຮົາຕ້ອງເຮັດໃຫ້ສາຍສຳພັນຂອງເຮົາກັບພະເຢໂຫວາເຂັ້ມແຂງຂຶ້ນ. ໝັ້ນໃຈວ່າພະເຢໂຫວາຮັກເຮົາແລະຈະບໍ່ຖິ້ມເຮົາ ອ່ານຄຳພີໄບເບິນທຸກມື້ ອະທິດຖານເປັນປະຈຳ ໝັ້ນໃຈວ່າຄຳສັນຍາຕ່າງໆກ່ຽວກັບລາຊະອານາຈັກຂອງພະເຈົ້າຈະເປັນຈິງ ແລະເຂົ້າຮ່ວມການປະຊຸມຄລິດສະຕຽນເປັນປະຈຳ.—ຫ19.07 ໜ້າ 2-4.
ມີສິ່ງໃດແດ່ທີ່ເຮົາສາມາດເຮັດໄດ້ເພື່ອຈະຊ່ວຍຄົນໃນຄອບຄົວແລະຍາດພີ່ນ້ອງ?
ເປັນເລື່ອງສຳຄັນທີ່ເຮົາຄວນຄິດເຖິງຄວາມຮູ້ສຶກຂອງພວກເຂົາ ໃຫ້ພວກເຂົາເຫັນການປະພຶດທີ່ດີຂອງເຈົ້າ ໃຫ້ອົດທົນແລະໃຫ້ເຮັດດີຕໍ່ພວກເຂົາແຕ່ຕ້ອງໜັກແໜ້ນໃນຄວາມເຊື່ອ.—ຫ19.08 ໜ້າ 15-17.
ເປັນຫຍັງເຮົາຈຶ່ງຮູ້ສຶກສົດຊື່ນຄືກັບທີ່ພະເຍຊູສັນຍາໃນມັດທາຍ 11:28?
ເພາະເຮົາມີຜູ້ດູແລທີ່ດີທີ່ສຸດ ໝູ່ທີ່ດີທີ່ສຸດ ແລະວຽກທີ່ດີທີ່ສຸດ.—ຫ19.09 ໜ້າ 23.
ພະເຈົ້າຈະໃຫ້ເຮົາມີຄວາມຕ້ອງການແລະກຳລັງທີ່ຈະລົງມືເຮັດແນວໃດ? (ຟລປ. 2:13)
ເມື່ອເຮົາອ່ານຄຳພີໄບເບິນແລະຄິດຕຶກຕອງ ພະເຈົ້າກໍຈະໃຫ້ເຮົາມີກຳລັງໂດຍຊ່ວຍເຮົາໃຫ້ມີຄວາມຕ້ອງການແລະກຳລັງທີ່ຈະເຮັດສິ່ງທີ່ພະອົງພໍໃຈ. ພະລັງບໍລິສຸດຂອງພະເຈົ້າຈະຊ່ວຍເຮົາໃຫ້ມີຄວາມສາມາດຫຼາຍຂຶ້ນ.—ຫ19.10 ໜ້າ 21.
ມີຂັ້ນຕອນຫຍັງແດ່ທີ່ຈະຊ່ວຍເຮົາໃຫ້ຕັດສິນໃຈໄດ້ດີທີ່ສຸດ?
ມີ 5 ຂັ້ນຕອນຄື: ຄົ້ນຄວ້າຢ່າງລະອຽດ ອະທິດຖານຂໍສະຕິປັນຍາ ຄິດເຖິງເຫດຜົນຂອງເຈົ້າ ຕັ້ງເປົ້າໝາຍທີ່ຊັດເຈນ ແລະເບິ່ງຕາມຄວາມເປັນຈິງ.—ຫ19.11 ໜ້າ 27-29.
ຄວາມຄິດເລື່ອງວິນຍານອະມະຕະມາຈາກສິ່ງທີ່ຊາຕານເວົ້າກັບເອວາບໍ?
ບໍ່ແມ່ນ. ຊາຕານບອກວ່າເອວາຈະບໍ່ຕາຍ ແຕ່ເບິ່ງຄືຕາຍຊື່ໆບໍ່ໄດ້ຕາຍແທ້. ຄຳສອນຂອງສາສະໜາປອມຕ່າງໆຄົງຈະຖືກກວາດລ້າງໝົດຕອນນ້ຳຖ້ວມໂລກ. ເບິ່ງຄືວ່າຄວາມເຊື່ອເລື່ອງວິນຍານອະມະຕະໜ້າຈະເກີດຂຶ້ນກ່ອນທີ່ພະເຈົ້າຈະເຮັດໃຫ້ຜູ້ຄົນກະຈັດກະຈາຍໄປຕອນທີ່ກຳລັງສ້າງຫໍບາເບນ.—ຫ19.12 ໜ້າ 15.