ບົດຄວາມສຶກສາທີ 45
ພະລັງບໍລິສຸດຊ່ວຍເຮົາແນວໃດ?
“ເຮົາອາດກະທຳສັບພະທຸກສິ່ງໄດ້ດ້ວຍພະອົງຜູ້ຊູແຮງຂອງເຮົາ.”—ຟີລິບ 4:13
ເພງ 104 ພະລັງບໍລິສຸດເປັນຂອງຂວັນຈາກພະເຈົ້າ
ໃຈຄວາມສຳຄັນ *
1-2. (ກ) ສິ່ງໃດຈະຊ່ວຍເຮົາໃຫ້ອົດທົນກັບບັນຫາໄດ້ໃນແຕ່ລະມື້? ຂໍອະທິບາຍ. (ຂ) ເຮົາຈະພິຈາລະນາຫຍັງໃນບົດຄວາມນີ້?
ເຈົ້າເຄີຍເວົ້າແບບນີ້ບໍທີ່ວ່າ: “ເມື່ອຄິດເຖິງບັນຫາທີ່ເຄີຍປະສົບ ຂ້ອຍຮູ້ເລີຍວ່າຂ້ອຍຄືຊິບໍ່ມີທາງຜ່ານບັນຫານັ້ນໄດ້ດ້ວຍຕົວເອງ”? ພວກເຮົາຫຼາຍຄົນກໍເຄີຍເວົ້າແບບນີ້. ບາງເທື່ອເຈົ້າອາດເວົ້າແບບນີ້ຫຼັງຈາກທີ່ເຈົ້າສາມາດຮັບມືກັບຄວາມເຈັບປ່ວຍຮ້າຍແຮງຫຼືຄົນທີ່ຮັກຕາຍ. ເມື່ອເບິ່ງຄືນຫຼັງ ເຈົ້າກໍເຫັນວ່າ ທີ່ເຈົ້າສາມາດອົດທົນແລະຜ່ານມັນໄປໄດ້ໃນແຕ່ລະມື້ກໍຍ້ອນພະລັງບໍລິສຸດຂອງພະເຢໂຫວາຊ່ວຍເຈົ້າໃຫ້ມີ “ກຳລັງທີ່ຫຼາຍກວ່າປົກກະຕິ.”—2 ໂກ. 4:7-9, ລ.ມ.
2 ເຮົາຍັງໝາຍເພິ່ງພະລັງບໍລິສຸດໃຫ້ຊ່ວຍເຮົາຮັບມືກັບອິດທິພົນຊົ່ວຂອງໂລກນີ້. (1 ໂຢ. 5:19) ນອກຈາກນັ້ນ ເຮົາຍັງຕ້ອງຕໍ່ສູ້ກັບ “ກອງທັບປີສາດຊົ່ວ.” (ເອເຟ. 6:12, ລ.ມ.) ຕອນນີ້ເຮົາຈະພິຈາລະນາ 2 ວິທີທີ່ພະລັງບໍລິສຸດຈະຊ່ວຍເຮົາໃຫ້ຮັບມືກັບບັນຫາເຫຼົ່ານີ້ ແລະເຮົາຈະພິຈາລະນາສິ່ງທີ່ເຮົາຕ້ອງເຮັດເພື່ອຈະໄດ້ຮັບປະໂຫຍດຢ່າງເຕັມທີຈາກພະລັງບໍລິສຸດ.
ພະລັງບໍລິສຸດຊ່ວຍເຮົາໃຫ້ມີກຳລັງ
3. ວິທີໜຶ່ງທີ່ພະເຢໂຫວາຊ່ວຍເຮົາໃຫ້ອົດທົນກັບບັນຫາໄດ້ແມ່ນຫຍັງ?
3 ພະລັງບໍລິສຸດຂອງພະເຢໂຫວາຊ່ວຍເຮົາໃຫ້ມີກຳລັງທີ່ຈະເຮັດວຽກມອບໝາຍຕ່າງໆໄດ້ສຳເລັດເຖິງວ່າຈະມີບັນຫາຫຼາຍຢ່າງ. ອັກຄະສາວົກໂປໂລຮູ້ວ່າທີ່ລາວສາມາດຮັບໃຊ້ພະເຢໂຫວາຕໍ່ໆໄປໄດ້ເຖິງແມ່ນຈະມີບັນຫາຫຼາຍຢ່າງ ກໍຍ້ອນລາວໝາຍເພິ່ງ “ລິດເດດຂອງພະຄລິດ.” (2 ໂກ. 12:9) ໃນລະຫວ່າງການເດີນທາງໄປປະກາດຢູ່ຕ່າງປະເທດຮອບທີ 2 ໂປໂລບໍ່ພຽງແຕ່ເຮັດວຽກໜັກໃນການປະກາດ ແຕ່ລາວຍັງເຮັດວຽກຫາເງິນລ້ຽງຕົວເອງ. ລາວພັກຢູ່ບ້ານຂອງອາກີລາແລະປຣີສີລາໃນເມືອງໂກລິນໂທ. ພວກເຂົາທັງສອງເປັນຊ່າງຫຍິບເຕັ້ນ. ເນື່ອງຈາກໂປໂລກໍເປັນຊ່າງຫຍິບເຕັ້ນຄືກັນ ບາງມື້ລາວກໍໄປເຮັດວຽກກັບພວກເຂົາ. (ກິດ. 18:1-4) ພະລັງບໍລິສຸດຊ່ວຍໂປໂລໃຫ້ມີກຳລັງທີ່ຈະເຮັດທັງວຽກອາຊີບແລະວຽກຮັບໃຊ້ໃຫ້ສຳເລັດໄດ້.
4. ຕາມ 2 ໂກລິນໂທ 12:7 ສ່ວນ ຂ-9 ໂປໂລຕ້ອງຕໍ່ສູ້ກັບຫຍັງ?
2 ໂກລິນໂທ 12:7 ສ່ວນ ຂ-9. ໃນຂໍ້ເຫຼົ່ານີ້ ໂປໂລໝາຍຄວາມວ່າແນວໃດເມື່ອລາວເວົ້າວ່າລາວຕ້ອງຕໍ່ສູ້ກັບ ‘ສ້ຽນໃນເນື້ອໜັງ’? ຖ້າເຈົ້າມີສ້ຽນປັກຢູ່ຕາມຕົນໂຕ ເຈົ້າຈະເຈັບປວດຫຼາຍແທ້ໆ. ດັ່ງນັ້ນ ໂປໂລໝາຍຄວາມວ່າລາວມີບັນຫາສ່ວນຕົວທີ່ເຮັດໃຫ້ເຈັບປວດຫຼາຍ. ລາວເອີ້ນບັນຫານີ້ວ່າ “ທູດຂອງຊາຕານ” ທີ່ມັກ “ຊົກ [ຫຼື “ສ້າງຄວາມເຈັບປວດ,” ລ.ມ.]” ໃຫ້ລາວ. ບາງເທື່ອຊາຕານຫຼືພວກຜີປີສາດອາດບໍ່ໄດ້ເປັນສາເຫດເຮັດໃຫ້ໂປໂລມີບັນຫາໂດຍກົງເຊິ່ງເປັນຄືກັບວ່າພວກມັນເອົາສ້ຽນມາປັກໃສ່ລາວ. ແຕ່ເມື່ອພວກມັນເຫັນບັນຫາຂອງໂປໂລ ພວກມັນກໍອາດພະຍາຍາມເຮັດໃຫ້ບັນຫານັ້ນຮ້າຍແຮງກວ່າເກົ່າຄືກັບກຳລັງເນັ້ນສ້ຽນໃຫ້ເລິກລົງໄປອີກເພື່ອເພີ່ມຄວາມເຈັບປວດໃຫ້ໂປໂລ. ໂປໂລໄດ້ເຮັດແນວໃດ?
4 ອ່ານ5. ພະເຢໂຫວາຕອບຄຳອະທິດຖານຂອງໂປໂລແນວໃດ?
5 ໃນຕອນທຳອິດໂປໂລຢາກໃຫ້ພະເຢໂຫວາກຳຈັດ “ສ້ຽນ” ອອກໄປ. ລາວບອກວ່າ: “ເຮົາໄດ້ອ້ອນວອນຂໍເຊີນພະອົງເຈົ້າ [ພະເຢໂຫວາ] ເຖິງ 3 ເທື່ອເພື່ອມັນຈະໄປເສຍຈາກເຮົາ.” ເຖິງວ່າໂປໂລຈະອະທິດຖານຫຼາຍເທື່ອ ແຕ່ສ້ຽນນັ້ນກໍຍັງມີຢູ່. ນີ້ສະແດງວ່າພະເຢໂຫວາບໍ່ໄດ້ຕອບຄຳອະທິດຖານຂອງໂປໂລບໍ? ບໍ່ແມ່ນແບບນັ້ນ. ພະເຢໂຫວາຕອບຄຳອະທິດຖານຂອງລາວ. ເຖິງວ່າພະອົງບໍ່ໄດ້ກຳຈັດບັນຫາຂອງໂປໂລ ແຕ່ພະອົງຊ່ວຍໃຫ້ລາວມີກຳລັງທີ່ຈະອົດທົນໄດ້. ພະອົງບອກວ່າ: “ເມື່ອເຈົ້າອ່ອນແອ ພະລັງອຳນາດຂອງເຮົາກໍສະແດງໄດ້ຢ່າງເຕັມທີ.” (2 ໂກ. 12:8, 9, ລ.ມ.) ຍ້ອນພະເຢໂຫວາຊ່ວຍ ໂປໂລຈຶ່ງສາມາດມີຄວາມສຸກແລະສະຫງົບໃຈໄດ້!—ຟີລິບ 4:4-7
6. (ກ) ພະເຢໂຫວາອາດຕອບຄຳອະທິດຖານຂອງເຮົາແນວໃດ? (ຂ) ມີຄຳຮັບຮອງຫຍັງແດ່ໃນຄຳພີໄບເບິນທີ່ອ້າງເຖິງໃນຂໍ້ນີ້ເຮັດໃຫ້ເຈົ້າມີກຳລັງ?
6 ເຈົ້າເຄີຍຂໍພະເຢໂຫວາໃຫ້ຊ່ວຍເຈົ້າຫຼຸດພົ້ນຈາກບັນຫາຄືກັບໂປໂລບໍ? ຖ້າເຈົ້າອະທິດຖານຢ່າງຈິງຈັງກ່ຽວກັບບັນຫາຫຼາຍເທື່ອແລ້ວ ແຕ່ບັນຫານັ້ນກໍຍັງມີຢູ່ຫຼືເຖິງກັບຮ້າຍແຮງກວ່າເກົ່າ ເຈົ້າກັງວົນວ່າພະເຢໂຫວາອາດບໍ່ພໍໃຈເຈົ້າບໍ? ຖ້າແມ່ນ ຂໍໃຫ້ຄິດເຖິງຕົວຢ່າງຂອງໂປໂລ. ພະເຢໂຫວາໄດ້ຕອບຄຳອະທິດຖານຂອງລາວ ແລະພະອົງກໍຈະຕອບຄຳອະທິດຖານຂອງເຈົ້າແນ່ນອນ! ພະເຢໂຫວາອາດບໍ່ໄດ້ກຳຈັດບັນຫາໃຫ້ໝົດໄປ ແຕ່ພະອົງຈະໃຫ້ພະລັງບໍລິສຸດເພື່ອຊ່ວຍເຈົ້າໃຫ້ມີກຳລັງທີ່ຈະອົດທົນກັບບັນຫານັ້ນໄດ້. (ເພງ. 61:3, 4) ເຈົ້າອາດຈະ “ລົ້ມລົງ” ແຕ່ພະເຢໂຫວາຈະບໍ່ຖິ້ມເຈົ້າ.—2 ໂກ. 4:8, 9; ຟີລິບ 4:13
ພະລັງບໍລິສຸດຊ່ວຍເຮົາໃຫ້ຮັບໃຊ້ພະເຢໂຫວາຕໍ່ໆໄປ
7-8. (ກ) ພະລັງບໍລິສຸດປຽບຄືກັບລົມແນວໃດ? (ຂ) ເປໂຕເວົ້າເຖິງວິທີການເຮັດວຽກຂອງພະລັງບໍລິສຸດແນວໃດ?
7 ພະລັງບໍລິສຸດຍັງຊ່ວຍເຮົາໃນວິທີໃດອີກ? ຄືກັບລົມທີ່ພັດເຮືອໃຫ້ແລ່ນໄປຖືກທິດທາງແລະສາມາດແລ່ນຜ່າພາຍຸໃຫຍ່ໄປຮອດຝັ່ງໄດ້ຢ່າງປອດໄພ ພະລັງບໍລິສຸດກໍຊ່ວຍເຮົາໃຫ້ຜ່ານຜ່າບັນຫາຕ່າງໆແລະຮັບໃຊ້ພະເຢໂຫວາຕໍ່ໆໄປຈົນໄດ້ເຂົ້າໂລກໃໝ່ທີ່ພະເຈົ້າສັນຍາໄວ້.
8 ເນື່ອງຈາກອັກຄະສາວົກເປໂຕເປັນຊາວປະມົງ ລາວຈຶ່ງຮູ້ຈັກການແລ່ນເຮືອເປັນຢ່າງດີ. ນີ້ອາດເປັນເຫດຜົນທີ່ລາວໃຊ້ສຳນວນທີ່ເບິ່ງຄືກ່ຽວຂ້ອງກັບການແລ່ນເຮືອເມື່ອເວົ້າເຖິງວິທີການເຮັດວຽກຂອງພະລັງບໍລິສຸດ. ລາວຂຽນວ່າ: “ຄຳທຳນວາຍບໍ່ໄດ້ມາຈາກນ້ຳໃຈແຫ່ງມະນຸດສັກເທື່ອ ແຕ່ວ່າຄົນບໍລິສຸດທັງຫຼາຍຂອງພະເຈົ້າໄດ້ກ່າວແລ້ວຕາມພະວິນຍານບໍລິສຸດໄດ້ກະທຳ [“ຊີ້ນຳ,” ລ.ມ.] ໃຫ້ເຂົາກ່າວນັ້ນ.”—2 ເປ. 1:21
9. ເປໂຕເຮັດໃຫ້ເຫັນພາບຫຍັງເມື່ອລາວໃຊ້ຄຳວ່າ “ຊີ້ນຳ”?
9 ເມື່ອເປໂຕໃຊ້ຄຳວ່າ “ຊີ້ນຳ” ລາວເຮັດໃຫ້ເຫັນພາບຫຍັງ? ລືກາຜູ້ຂຽນພະທຳກິດຈະການກໍໃຊ້ຄຳດຽວກັນໃນພາສາເກັຣກທີ່ອະທິບາຍວ່າເຮືອລອຍ “ໄປຕາມ” ລົມ. (ກິດ. 27:15) ນັກວິຊາການດ້ານຄຳພີໄບເບິນຄົນໜຶ່ງບອກວ່າ: ເມື່ອເປໂຕຂຽນວ່າຜູ້ຂຽນຄຳພີໄບເບິນຖືກ “ຊີ້ນຳ” ໂດຍພະລັງບໍລິສຸດ ລາວກໍໃຊ້ຕົວຢ່າງປຽບທຽບທີ່ເຮັດໃຫ້ຜູ້ຄົນເຫັນພາບກ່ຽວກັບການແລ່ນເຮືອໃບ. ເປໂຕບອກວ່າຄືກັບລົມທີ່ພາໃຫ້ເຮືອແລ່ນໄປຮອດຈຸດໝາຍ ປາຍທາງ ພະລັງບໍລິສຸດກໍຊີ້ນຳຜູ້ຂຽນຄຳພີໄບເບິນໃຫ້ເຮັດວຽກຂອງພວກເຂົາໄດ້ສຳເລັດ. ນັກວິຊາການຄົນນີ້ຍັງບອກອີກວ່າ: ຜູ້ຂຽນຄຳພີໄບເບິນຕ້ອງ “ພືໃບເຮືອອອກ” ໄວ້ ພະເຢໂຫວາເຮັດສ່ວນຂອງພະອົງໂດຍໃຫ້ “ລົມ” ຫຼືພະລັງບໍລິສຸດກັບພວກເຂົາ ແລະຜູ້ຂຽນຄຳພີໄບເບິນກໍເຮັດສ່ວນຂອງຕົວເອງໂດຍເຮັດຕາມທີ່ພະລັງບໍລິສຸດຊີ້ນຳ.
ສິ່ງທີ 1: ເຮັດກິດຈະກຳຂອງຄລິດສະຕຽນເປັນປະຈຳ
ສິ່ງທີ 2: ເຮັດກິດຈະກຳເຫຼົ່ານັ້ນຢ່າງເຕັມທີແລະສຸດຄວາມສາມາດ (ເບິ່ງຂໍ້ 11) *
10-11. ມີ 2 ສິ່ງຫຍັງແດ່ທີ່ເຮົາຕ້ອງເຮັດເພື່ອຈະແນ່ໃຈວ່າພະລັງບໍລິສຸດຊີ້ນຳເຮົາ? ຂໍຍົກຕົວຢ່າງ.
10 ແນ່ນອນວ່າ ໃນປັດຈຸບັນນີ້ພະເຢໂຫວາບໍ່ໄດ້ໃຊ້ພະລັງບໍລິສຸດຊີ້ນຳຜູ້ຄົນໃຫ້ຂຽນຄຳພີໄບເບິນອີກແລ້ວ. ແຕ່ພະອົງກໍຍັງໃຊ້ພະລັງບໍລິສຸດຊີ້ນຳຜູ້ຮັບໃຊ້ຂອງພະອົງຢູ່ ແລະພະອົງກໍຍັງເຮັດສ່ວນຂອງພະອົງ. ແຕ່ເຮົາຈະໄດ້ຮັບປະໂຫຍດຈາກພະລັງບໍລິສຸດໄດ້ແນວໃດ? ເຮົາຕ້ອງເຮັດໃຫ້ແນ່ໃຈວ່າເຮົາຍັງເຮັດສ່ວນຂອງເຮົາຢູ່. ແລ້ວເຮົາຈະເຮັດແບບນັ້ນໄດ້ແນວໃດ?
11 ຂໍໃຫ້ຄິດເຖິງຕົວຢ່າງນີ້. ເພື່ອຈະໄດ້ຮັບປະໂຫຍດຈາກລົມ ນັກແລ່ນເຮືອໃບຕ້ອງເຮັດ 2 ສິ່ງ. ທຳອິດ ລາວຕ້ອງເອົາເຮືອຂອງລາວໃຫ້ຢູ່ໃນທິດທາງຂອງກະແສລົມ ເພາະເຮືອຈະໄປໃສບໍ່ໄດ້ຖ້າເຮືອຍັງຈອດຢູ່ທ່າເຮືອເຊິ່ງບໍ່ມີລົມ. ທີສອງ ລາວຕ້ອງຍົກໃບເຮືອຂຶ້ນແລະພືອອກໃຫ້ສຸດເທົ່າທີ່ຈະເຮັດໄດ້. ເຫັນໄດ້ແຈ້ງວ່າ ເຖິງວ່າຈະມີລົມພັດ ແຕ່ເຮືອຂອງລາວຈະໄປທາງໜ້າໄດ້ຖ້າໃບເຮືອນັ້ນຮັບລົມ. ຄ້າຍຄືກັນ ເຮົາຈະສາມາດຮັບໃຊ້ພະເຢໂຫວາຕໍ່ໆໄປໄດ້ຖ້າເຮົາມີພະລັງບໍລິສຸດຂອງພະອົງຊ່ວຍ. ເພື່ອຈະໃຫ້ພະລັງບໍລິສຸດຊີ້ນຳເຮົາ ເຮົາຕ້ອງເຮັດ 2 ສິ່ງຄື: ທຳອິດ ເຮົາຕ້ອງໃຫ້ໂຕເຮົາຢູ່ໃນທິດທາງຂອງພະລັງບໍລິສຸດໂດຍເຮັດກິດຈະກຳຕ່າງໆທີ່ພະລັງຂອງພະເຈົ້າຊີ້ນຳ. ທີສອງ ເຮົາຕ້ອງ “ພືໃບເຮືອ” ອອກໃຫ້ສຸດເທົ່າທີ່ຈະເຮັດໄດ້ໂດຍເຮັດກິດຈະກຳເຫຼົ່ານັ້ນຢ່າງເຕັມທີແລະສຸດຄວາມສາມາດ. (ເພງ. 119:32) ເມື່ອເຮົາເຮັດຕາມ 2 ສິ່ງນີ້ ພະລັງບໍລິສຸດກໍຈະຊ່ວຍເຮົາໃຫ້ມີກຳລັງທີ່ຈະຮັບໃຊ້ພະເຢໂຫວາຢ່າງສັດຊື່ຕໍ່ໆໄປຈົນເຂົ້າໂລກໃໝ່.
12. ຕອນນີ້ເຮົາຈະພິຈາລະນາຫຍັງ?
12 ຈົນຮອດຕອນນີ້ ເຮົາໄດ້ພິຈາລະນາໄປແລ້ວກ່ຽວກັບ 2 ວິທີທີ່ພະລັງບໍລິສຸດຊ່ວຍເຮົາ. ວິທີທຳອິດ ພະລັງບໍລິສຸດຊ່ວຍເຮົາໃຫ້ມີກຳລັງແລະຮັກສາຄວາມສັດຊື່ໄດ້
ເມື່ອປະສົບບັນຫາ. ວິທີທີສອງ ພະລັງບໍລິສຸດຍັງຊ່ວຍເຮົາໃຫ້ຮັບໃຊ້ພະເຢໂຫວາຕໍ່ໆໄປແລະຊ່ວຍເຮົາໃຫ້ຢູ່ໃນເສັ້ນທາງທີ່ຈະໄດ້ຮັບຊີວິດຕະຫຼອດໄປ. ຕອນນີ້ເຮົາຈະພິຈາລະນາ 4 ຢ່າງທີ່ເຮົາຕ້ອງເຮັດເພື່ອຈະໄດ້ຮັບປະໂຫຍດຈາກພະລັງບໍລິສຸດຢ່າງເຕັມທີ.ວິທີທີ່ຈະໄດ້ຮັບປະໂຫຍດຢ່າງເຕັມທີຈາກພະລັງບໍລິສຸດ
13. ຕາມ 2 ຕີໂມເຕ 3:16, 17 ຄຳພີໄບເບິນສົ່ງຜົນຕໍ່ເຮົາແນວໃດ ແຕ່ເຮົາຕ້ອງເຮັດຫຍັງ?
13 ທຳອິດ ສຶກສາຄຳພີໄບເບິນ. (ອ່ານ 2 ຕີໂມເຕ 3:16, 17) * ໃນພາສາເກັຣກຄຳທີ່ແປວ່າ “ພະເຈົ້າດົນໃຈ” ມີຄວາມໝາຍຕາມຕົວອັກສອນວ່າ “ພະເຈົ້າເປົ່າລົມໃສ່.” ພະເຈົ້າໃຊ້ພະລັງບໍລິສຸດ “ເປົ່າ” ຄວາມຄິດຂອງພະອົງເຂົ້າໄປໃນຄວາມຄິດຜູ້ຂຽນຄຳພີໄບເບິນ. ເມື່ອເຮົາອ່ານຄຳພີໄບເບິນແລະຄິດຕຶກຕອງ ຄຳສອນຂອງພະເຈົ້າກໍຈະເຂົ້າໄປໃນຄວາມຄິດແລະຈິດໃຈຂອງເຮົາ. ຄວາມຄິດທີ່ໄດ້ຮັບການດົນໃຈເຫຼົ່ານັ້ນຈະເຮັດໃຫ້ເຮົາປ່ຽນແປງຊີວິດເພື່ອເຮັດໃຫ້ພະເຢໂຫວາພໍໃຈ. (ເຫບ. 4:12) ແຕ່ເພື່ອຈະໄດ້ຮັບປະໂຫຍດຢ່າງເຕັມທີຈາກພະລັງບໍລິສຸດ ເຮົາຕ້ອງຈັດເວລາສຶກສາຄຳພີໄບເບິນເປັນປະຈຳ ແລະຄິດຕຶກຕອງຢ່າງເລິກເຊິ່ງໃນສິ່ງທີ່ອ່ານ ແລ້ວພະຄຳຂອງພະເຈົ້າຈະສົ່ງຜົນຕໍ່ທຸກສິ່ງທີ່ເຮົາເວົ້າແລະເຮັດ.
14. (ກ) ເປັນຫຍັງເຮົາຈຶ່ງເວົ້າໄດ້ວ່າການປະຊຸມຄລິດສະຕຽນເປັນບ່ອນທີ່ມີພະລັງບໍລິສຸດຂອງພະເຢໂຫວາ? (ຂ) ສິ່ງໃດຈະຊ່ວຍເຮົາໃຫ້ຮັບປະໂຫຍດຢ່າງເຕັມທີຈາກພະລັງບໍລິສຸດຢູ່ທີ່ການປະຊຸມ?
14 ທີສອງ ນະມັດສະການພະເຈົ້ານຳກັນ. (ເພງ. 22:22) ການປະຊຸມຄລິດສະຕຽນເປັນບ່ອນທີ່ມີພະລັງບໍລິສຸດຂອງພະເຢໂຫວາ. (ຄຳປ. 2:29) ເປັນຫຍັງຈຶ່ງເວົ້າແບບນັ້ນ? ກໍເພາະວ່າຕອນທີ່ເຮົາປະຊຸມຮ່ວມກັບພີ່ນ້ອງຄລິດສະຕຽນ ເຮົາອະທິດຖານຂໍພະລັງບໍລິສຸດ ເຮົາຮ້ອງເພງສັນລະເສີນພະເຈົ້າທີ່ມີເນື້ອໃນຈາກຄຳພີໄບເບິນ ເຮົາຟັງຄຳສອນໃນຄຳພີໄບເບິນທີ່ບັນລະຍາຍໂດຍພີ່ນ້ອງຊາຍທີ່ໄດ້ຮັບການແຕ່ງຕັ້ງຈາກພະລັງບໍລິສຸດ. ນອກຈາກນັ້ນ ພະລັງບໍລິສຸດກໍຍັງຊ່ວຍພີ່ນ້ອງຍິງໃຫ້ກຽມຕົວແລະເຮັດສ່ວນຂອງພວກເຂົາ. ແຕ່ເພື່ອເຮົາຈະໄດ້ຮັບປະໂຫຍດຢ່າງເຕັມທີຈາກພະລັງບໍລິສຸດ ເຮົາຕ້ອງກຽມຕົວຢ່າງດີເພື່ອຈະມີສ່ວນຮ່ວມໃນການປະຊຸມ. ໂດຍວິທີນີ້ ເມື່ອເຮົາເຂົ້າຮ່ວມການປະຊຸມ ເຮົາກໍພ້ອມທີ່ຈະຮັບປະໂຫຍດຢ່າງເຕັມທີຈາກພະລັງບໍລິສຸດຄືກັບເຮືອທີ່ພືໃບເຮືອອອກໄວ້ພ້ອມທີ່ຈະຮັບລົມ.
15. ເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຢ່າງເຕັມທີຈາກພະລັງບໍລິສຸດຕອນໄປປະກາດ?
15 ທີສາມ ປະກາດ. ເມື່ອເຮົາໃຊ້ຄຳພີໄບເບິນໃນການປະກາດແລະການສອນ ເຮົາກໍໃຫ້ພະລັງບໍລິສຸດຊ່ວຍເຮົາ. (ໂລມ 15:18, 19) ເພື່ອຈະໄດ້ຮັບປະໂຫຍດຢ່າງເຕັມທີຈາກພະລັງຂອງພະເຈົ້າ ເຮົາຕ້ອງໄປປະກາດເປັນປະຈຳແລະໃຊ້ຄຳພີໄບເບິນທຸກຄັ້ງທີ່ເປັນໄປໄດ້. ວິທີໜຶ່ງທີ່ຊ່ວຍເຈົ້າໃຫ້ສົນທະນາກັບຜູ້ຄົນໄດ້ດີເມື່ອໄປປະກາດຄື ໂດຍໃຊ້ຕົວຢ່າງການສົນທະນາຈາກຄູ່ມືການປະຊຸມ ຊີວິດຄລິດສະຕຽນແລະວຽກຮັບໃຊ້.
16. ວິທີທີ່ກົງທີ່ສຸດທີ່ຈະໄດ້ຮັບພະລັງບໍລິສຸດແມ່ນຫຍັງ?
16 ທີສີ່ ອະທິດຖານເຖິງພະເຢໂຫວາ. (ມັດ. 7:7-11; ລືກາ 11:13) ວິທີທີ່ກົງທີ່ສຸດທີ່ຈະໄດ້ຮັບພະລັງບໍລິສຸດກໍຄືການອະທິດຖານຂໍຈາກພະເຢໂຫວາ. ບໍ່ມີສິ່ງໃດທີ່ຈະສາມາດຂັດຂວາງຄຳອະທິດຖານຂອງເຮົາບໍ່ໃຫ້ໄປຫາພະເຢໂຫວາຫຼືຂັດຂວາງພະລັງບໍລິສຸດຂອງພະເຢໂຫວາບໍ່ໃຫ້ມາຫາເຮົາ ບໍ່ວ່າຈະເປັນຄຸກຫຼືແມ່ນແຕ່ຊາຕານກໍບໍ່ສາມາດຂັດຂວາງໄດ້. (ຢໂກ. 1:17) ເຮົາຄວນອະທິດຖານແນວໃດເພື່ອຈະໄດ້ຮັບປະໂຫຍດຈາກພະລັງບໍລິສຸດຢ່າງເຕັມທີ? ເພື່ອຈະໄດ້ຄຳຕອບ ໃຫ້ເຮົາມາພິຈາລະນາຄຳອະທິດຖານຈາກຕົວຢ່າງປຽບທຽບທີ່ມີແຕ່ໃນພະທຳກິດຕິຄຸນລືກາ. *
ອະທິດຖານເລື້ອຍໆ
17. ເຮົາໄດ້ບົດຮຽນຫຍັງໃນເລື່ອງການອະທິດຖານຈາກຕົວຢ່າງປຽບທຽບຂອງພະເຍຊູໃນລືກາ 11:5-9, 13?
17 ອ່ານລືກາ 11:5-9, 13. ຕົວຢ່າງປຽບທຽບຂອງພະເຍຊູສະແດງໃຫ້ເຫັນວ່າ ເຮົາຄວນອະທິດຖານຂໍພະລັງບໍລິສຸດແນວໃດ. ໃນຕົວຢ່າງປຽບທຽບ ຊາຍຄົນໜຶ່ງໄດ້ຮັບສິ່ງທີ່ຈຳເປັນ “ເພາະເຫດການກວນຂອງສ່ຽວນັ້ນ.” ລາວບໍ່ໄດ້ຢ້ານທີ່ຈະຂໍຄວາມຊ່ວຍເຫຼືອຈາກໝູ່ຂອງລາວເຖິງວ່າຈະເດິກຫຼາຍແລ້ວ. * ພະເຍຊູໃຊ້ຕົວຢ່າງນີ້ເຂົ້າໃນການອະທິດຖານແນວໃດ? ເພິ່ນບອກວ່າ: “ຈົ່ງຂໍແລະເຂົາຈະປະທານໃຫ້ແກ່ທ່ານ ຈົ່ງຊອກຫາແລະທ່ານຈະພົບ ຈົ່ງເຄາະແລະເຂົາຈະໄຂໃຫ້ທ່ານ.” ຈາກເລື່ອງນີ້ເຮົາໄດ້ບົດຮຽນຫຍັງ? ເພື່ອຈະໄດ້ຮັບການຊ່ວຍເຫຼືອຈາກພະລັງບໍລິສຸດ ເຮົາຕ້ອງອະທິດຖານເລື້ອຍໆ.
18. ໃນຕົວຢ່າງປຽບທຽບຂອງພະເຍຊູ ເປັນຫຍັງເຮົາໝັ້ນໃຈໄດ້ວ່າພະເຢໂຫວາຈະໃຫ້ພະລັງບໍລິສຸດກັບເຮົາ?
18 ຕົວຢ່າງປຽບທຽບຂອງພະເຍຊູຍັງຊ່ວຍໃຫ້ເຮົາເຫັນວ່າ ເປັນຫຍັງພະເຢໂຫວາຈະໃຫ້ພະລັງບໍລິສຸດກັບເຮົາ. ຜູ້ຊາຍທີ່ຢູ່ໃນຕົວຢ່າງປຽບທຽບຢາກເປັນເຈົ້າພາບທີ່ດີ. ລາວຈຶ່ງຮູ້ສຶກວ່າຕ້ອງລ້ຽງອາຫານແຂກຕອນເດິກ ແຕ່ວ່າລາວກໍບໍ່ມີຫຍັງໃຫ້ແຂກກິນເລີຍ. ພະເຍຊູບອກວ່າເພື່ອນບ້ານໃຫ້ເຂົ້າຈີ່ກັບຊາຍຄົນນັ້ນຍ້ອນລາວຊູຊີຂໍບໍ່ເລີກບໍ່ແລ້ວ. ພະເຍຊູກຳລັງສອນຫຍັງເຮົາ? ຖ້າມະນຸດທີ່ບໍ່ສົມບູນແບບຍັງເຕັມໃຈຊ່ວຍເຫຼືອເພື່ອນບ້ານຢ່າງອົດທົນ ແລ້ວພະເຢໂຫວາພໍ່ທີ່ຢູ່ໃນສະຫວັນເດຈະແຮ່ງຢາກຊ່ວຍເຫຼືອເຮົາຫຼາຍສ່ຳໃດເມື່ອເຮົາອະທິດຖານຂໍພະລັງບໍລິສຸດຂອງພະອົງຢ່າງອົດທົນ! ດັ່ງນັ້ນ ເຮົາສາມາດໝັ້ນໃຈໄດ້ວ່າ ເມື່ອເຮົາອະທິດຖານຂໍພະລັງບໍລິສຸດຈາກພະເຢໂຫວາ ພະອົງຈະໃຫ້ກັບເຮົາແນ່ນອນ.—ເພງ. 10:17; 66:19
19. ເປັນຫຍັງເຮົາຈຶ່ງໝັ້ນໃຈໄດ້ວ່າເຮົາຈະຊະນະຊາຕານໄດ້?
19 ເຮົາສາມາດໝັ້ນໃຈໄດ້ວ່າ ເຖິງແມ່ນຊາຕານຈະໂຈມຕີເຮົາຢ່າງບໍ່ຢຸດຢ່ອນ ແຕ່ເຮົາກໍຈະຊະນະມັນແນ່ນອນ. ຍ້ອນຫຍັງ? ຍ້ອນພະລັງບໍລິສຸດຊ່ວຍເຮົາໃນສອງວິທີ. ທຳອິດ ພະລັງບໍລິສຸດຊ່ວຍເຮົາໃຫ້ມີກຳລັງທີ່ຈະອົດທົນກັບບັນຫາ. ທີສອງ ພະລັງບໍລິສຸດຊ່ວຍເຮົາໃຫ້ຮັບໃຊ້ພະເຢໂຫວາຕໍ່ໆໄປຈົນເຂົ້າໂລກໃໝ່. ຂໍໃຫ້ເຮົາຕັ້ງໃຈແນ່ວແນ່ທີ່ຈະໄດ້ຮັບປະໂຫຍດຢ່າງເຕັມທີຈາກການຊ່ວຍເຫຼືອຂອງພະລັງບໍລິສຸດ!
ເພງ 41 ຂໍຟັງຄຳອະທິດຖານຂອງເຮົາ
^ ຂໍ້ 5 ບົດຄວາມນີ້ຈະອະທິບາຍວ່າພະລັງບໍລິສຸດຈະຊ່ວຍເຮົາໃຫ້ອົດທົນກັບບັນຫາແນວໃດ ແລະຍັງບອກວ່າເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຢ່າງເຕັມທີຈາກພະລັງບໍລິສຸດ.
^ ຂໍ້ 13 2 ຕີໂມເຕ 3:16, 17 (ລ.ມ.): “ພະຄຳພີທຸກຕອນພະເຈົ້າດົນໃຈໃຫ້ຂຽນຂຶ້ນມາ ມີປະໂຫຍດສຳລັບສອນ ຕັກເຕືອນ ແກ້ໄຂສິ່ງຕ່າງໆໃຫ້ຮຽບຮ້ອຍ ແລະສັ່ງສອນຄົນໃຫ້ເຮັດສິ່ງທີ່ຖືກຕ້ອງ ເພື່ອຄົນຂອງພະເຈົ້າຈະມີຄວາມສາມາດພຽງພໍ ແລະມີຄວາມພ້ອມສຳລັບວຽກທີ່ດີທຸກຢ່າງ.”
^ ຂໍ້ 61 ຄຳອະທິບາຍຮູບພາບ: ສິ່ງທີ 1: ພີ່ນ້ອງຄູ່ໜຶ່ງມາຫໍປະຊຸມ. ພວກເຂົາມາປະຊຸມຮ່ວມກັນກັບພີ່ນ້ອງຮ່ວມຄວາມເຊື່ອເຊິ່ງເປັນບ່ອນທີ່ມີພະລັງບໍລິສຸດຂອງພະເຢໂຫວາ. ສິ່ງທີ 2: ພວກເຂົາອອກຄວາມຄິດເຫັນໃນການປະຊຸມ. ສອງສິ່ງນີ້ກ່ຽວຂ້ອງກັບກິດຈະກຳອື່ນໆທີ່ພິຈາລະນາໃນບົດຄວາມນີ້ ເຊັ່ນ: ການສຶກສາຄຳພີໄບເບິນ ການປະກາດ ແລະການອະທິດຖານ.