ຈົ່ງຮູ້ຈັກສັດຕູຂອງເຈົ້າ
“ພວກເຮົາບໍ່ເປັນຜູ້ບໍ່ຮູ້ຈັກອຸບາຍຂອງຊາຕານນັ້ນ.”—2 ໂກລິນໂທ 2:11
1. ຫຼັງຈາກອາດາມແລະເອວາເຮັດບາບ ພະເຢໂຫວາໄດ້ເປີດເຜີຍກ່ຽວກັບສັດຕູຂອງເຮົາແນວໃດ?
ອາດາມຮູ້ດີວ່າງູເວົ້າບໍ່ໄດ້. ດັ່ງນັ້ນ ຕອນທີ່ງູເວົ້າກັບເອວາ ອາດາມກໍຮູ້ວ່າແທ້ໆແລ້ວຜູ້ທີ່ເວົ້າກໍຄືກາຍວິນຍານ. (ຕົ້ນເດີມ 3:1-6) ແຕ່ອາດາມແລະເອວາບໍ່ຮູ້ວ່າກາຍວິນຍານນັ້ນແມ່ນໃຜ. ແນວໃດກໍຕາມ ອາດາມກໍຍັງເລືອກທີ່ຈະຢູ່ຝ່າຍຄົນແປກໜ້າແລະກະບົດຕໍ່ພໍ່ທີ່ຮັກຂອງລາວທີ່ຢູ່ເທິງສະຫວັນ. (1 ຕີໂມເຕ 2:14) ທັນໃດນັ້ນ ພະເຢໂຫວາກໍເລີ່ມເປີດເຜີຍຫຼາຍຂຶ້ນເລື່ອງສັດຕູທີ່ຊົ່ວຮ້າຍແລະສັນຍາວ່າຈະທຳລາຍມັນໃນທີ່ສຸດ. ພະເຢໂຫວາຍັງເຕືອນວ່າກາຍວິນຍານທີ່ເວົ້າຜ່ານທາງງູນັ້ນຈະຕໍ່ຕ້ານທຸກຄົນທີ່ຮັກພະເຈົ້າ.—ຕົ້ນເດີມ 3:15
2, 3. ເປັນຫຍັງພະເຢໂຫວາເປີດເຜີຍເລື່ອງຊາຕານພຽງແຕ່ໜ້ອຍດຽວກ່ອນເມຊີຈະມາ?
2 ພະເຢໂຫວາບໍ່ເຄີຍບອກຊື່ຂອງທູດສະຫວັນທີ່ກະບົດຕໍ່ພະອົງ. * (ເບິ່ງໄຂ ເງື່ອນ) ເກືອບ 2.500 ປີຫຼັງຈາກທີ່ມີການກະບົດໃນສວນເອເດນ ພະເຢໂຫວາກໍໄດ້ເປີດເຜີຍວ່າໃຜເປັນຜູ້ກະບົດ. (ໂຢບ 1:6) ມັນເປັນທີ່ຮູ້ຈັກໃນຊື່ “ຊາຕານ” ເຊິ່ງມີຄວາມໝາຍວ່າ: “ຜູ້ຕໍ່ຕ້ານ.” ໃນພະຄຳພີພາກພາສາເຫບເລີມີພຽງ 3 ພະທຳເທົ່ານັ້ນທີ່ເວົ້າເຖິງຊາຕານເຊິ່ງກໍຄື 1 ຂ່າວຄາວ ໂຢບ ແລະຊາກາລີ. ເປັນຫຍັງຈຶ່ງມີການເປີດເຜີຍກ່ຽວກັບສັດຕູນີ້ພຽງແຕ່ໜ້ອຍດຽວກ່ອນທີ່ເມຊີຈະມາ?
3 ໃນພະຄຳພີພາກພາສາເຫບເລີ ພະເຢໂຫວາບໍ່ໄດ້ບອກລາຍລະອຽດຫຼາຍກ່ຽວກັບຊາຕານແລະສິ່ງທີ່ມັນເຮັດ. ທີ່ຈິງ ຈຸດປະສົງຫຼັກຂອງພະຄຳພີພາກພາສາເຫບເລີກໍຄືເພື່ອຊ່ວຍຜູ້ຄົນໃຫ້ຮູ້ຈັກຜູ້ທີ່ຈະມາເປັນເມຊີແລະຕິດຕາມເພິ່ນ. (ລືກາ 24:44; ຄາລາຊີ 3:24) ເມື່ອເມຊີມາຮອດແລ້ວ ພະເຢໂຫວາໄດ້ໃຊ້ເມຊີແລະລູກສິດຂອງເພິ່ນເປີດເຜີຍໃຫ້ເຮົາຮູ້ຫຼາຍຂຶ້ນກ່ຽວກັບຊາຕານແລະທູດສະຫວັນອົງອື່ນໆທີ່ເຂົ້າຮ່ວມກັບມັນ. * (ເບິ່ງໄຂເງື່ອນ) ນີ້ເປັນເລື່ອງເໝາະສົມເພາະພະເຢໂຫວາຈະໃຊ້ພະເຍຊູແລະຜູ້ຖືກເຈີມທຳລາຍຊາຕານແລະພວກຂອງມັນ.—ໂລມ 16:20; ຄຳປາກົດ 17:14; 20:10
ເຮົາມີພະເຢໂຫວາ ພະເຍຊູ ແລະທູດສະຫວັນທີ່ສັດຊື່ຄອຍຊ່ວຍເຫຼືອເຮົາ
4. ເປັນຫຍັງເຮົາບໍ່ຄວນຢ້ານຊາຕານ?
4 ອັກຄະສາວົກເປໂຕພັນລະນາວ່າຊາຕານພະຍາມານເປັນ “ສິງຕົວໜຶ່ງທີ່ຮ້ອງຫະນາດ” ແລະໂຢຮັນເອີ້ນມັນວ່າ: “ງູ” ຫຼື “ມັງກອນໃຫຍ່.” (1 ເປໂຕ 5:8; ຄຳປາກົດ 12:9) ແຕ່ເຮົາບໍ່ຄວນຢ້ານຊາຕານ ເພາະມັນມີພະລັງອຳນາດຈຳກັດ. (ອ່ານຢາໂກໂບ 4:7) ເຮົາມີພະເຢໂຫວາ ພະເຍຊູ ແລະທູດສະຫວັນທີ່ສັດຊື່ປົກປ້ອງເຮົາ. ເຮົາສາມາດຕ້ານທານສັດຕູຂອງເຮົາໄດ້. ແຕ່ເຮົາຕ້ອງຮູ້ຄຳຕອບຂອງ 3 ຄຳຖາມທີ່ສຳຄັນຄື: ຊາຕານມີອິດທິພົນຫຼາຍສໍ່າໃດ? ຊາຕານພະຍາຍາມຊັກຈູງຜູ້ຄົນແນວໃດ? ແລະມີສິ່ງໃດແດ່ທີ່ຊາຕານເຮັດບໍ່ໄດ້? ໃຫ້ເຮົາມາຕອບຄຳຖາມເຫຼົ່ານີ້ແລະເບິ່ງວ່າເຮົາໄດ້ບົດຮຽນຫຍັງແດ່.
ຊາຕານມີອິດທິພົນຫຼາຍສໍ່າໃດ?
5, 6. ເປັນຫຍັງລັດຖະບານຂອງມະນຸດຈຶ່ງບໍ່ສາມາດເຮັດໃຫ້ເກີດການປ່ຽນແປງໃນແບບທີ່ມະນຸດຕ້ອງການຫຼາຍທີ່ສຸດໄດ້?
5 ທູດສະຫວັນຫຼາຍອົງຮ່ວມມືກັບຊາຕານໃນການກະບົດຕໍ່ພະເຈົ້າ. ກ່ອນນໍ້າຖ້ວມໂລກ ຊາຕານໄດ້ລໍ້ລວງທູດສະຫວັນເຫຼົ່ານັ້ນໃຫ້ມີເພດສຳພັນກັບຜູ້ຍິງ. ຄຳພີໄບເບິນພັນລະນາເລື່ອງນີ້ໃນຮູບແບບສັນຍາລັກເມື່ອບອກວ່າ ຕອນທີ່ມັງກອນຖືກໄລ່ລົງມາຈາກສະຫວັນ ມັນໄດ້ພາດາວ 1 ໃນ 3 ສ່ວນລົງໄປກັບມັນນຳ. (ຕົ້ນເດີມ 6:1-4; ຢູເດ 6; ຄຳປາກົດ 12:3, 4) ເມື່ອທູດສະຫວັນເຫຼົ່ານັ້ນຖືກຕັດຂາດຈາກຄອບຄົວຂອງພະເຈົ້າ ພວກມັນເລືອກໃຫ້ຊາຕານປົກຄອງ. ເຮົາບໍ່ຄວນຄິດວ່າທູດສະຫວັນທີ່ກະບົດເຫຼົ່ານີ້ເປັນກຸ່ມທີ່ບໍ່ມີລະບົບລະບຽບ. ໃນບ່ອນຢູ່ຂອງຊາຕານແລະພວກຜີປີສາດເຊິ່ງເປັນບ່ອນທີ່ເຮົາເບິ່ງບໍ່ເຫັນ ຊາຕານໄດ້ຕັ້ງລັດຖະບານຂອງຕົນເອງຂຶ້ນເພື່ອຮຽນແບບລັດຖະບານຂອງພະເຈົ້າ. ມັນແຕ່ງຕັ້ງຕົວເອງເປັນກະສັດ ແລະຈັດລະບົບລະບຽບໃຫ້ພວກຜີປີສາດ ໃຫ້ ອຳນາດພວກມັນ ແລະໃຫ້ພວກມັນປົກຄອງໂລກ.
6 ຊາຕານໃຊ້ອົງການຂອງມັນຄວບຄຸມລັດຖະບານລືກາ 4:5, 6) ເຖິງວ່າຈະມີຫຼາຍລັດຖະບານທີ່ໄດ້ເຮັດສິ່ງດີໆເພື່ອພົນລະເມືອງຂອງຕົນເອງ ແລະຜູ້ປົກຄອງທີ່ຈິງໃຈບາງຄົນກໍຢາກຊ່ວຍປະຊາຊົນແທ້ໆ ແຕ່ກໍບໍ່ມີຜູ້ປົກຄອງຄົນໃດສາມາດເຮັດໃຫ້ເກີດການປ່ຽນແປງໃນແບບທີ່ມະນຸດຕ້ອງການຫຼາຍທີ່ສຸດໄດ້.—ຄຳເພງ 146:3, 4; ຄຳປາກົດ 12:12
ທັງໝົດຂອງມະນຸດ. ເຮົາໝັ້ນໃຈໃນເລື່ອງນີ້ໄດ້ ເພາະຕອນທີ່ຊາຕານໄດ້ໃຫ້ພະເຍຊູເບິ່ງ “ປະເທດທັງປວງແຫ່ງແຜ່ນດິນໂລກ” ມັນກໍເວົ້າກັບເພິ່ນວ່າ: “ອຳນາດຄຸ້ມຄອງອັນນີ້ທັງໝົດແລະລັດສະໝີແຫ່ງແຜ່ນດິນທັງຫຼາຍນີ້ເຮົາຈະໃຫ້ແກ່ພະອົງ ເຫດວ່າເປັນທີ່ມອບໄວ້ແກ່ເຮົາ ແລະເຮົາຢາກປະທານໃຫ້ແກ່ຜູ້ໃດ ເຮົາປະທານໃຫ້ແກ່ຜູ້ນັ້ນ.” (7. ນອກຈາກລັດຖະບານຂອງມະນຸດແລ້ວຊາຕານຍັງໃຊ້ສາສະໜາປອມແລະໂລກທຸລະກິດແນວໃດ? (ເບິ່ງຮູບທຳອິດ)
7 ຊາຕານແລະພວກຜີປີສາດໄດ້ໃຊ້ສາສະໜາປອມແລະໂລກທຸລະກິດລໍ້ລວງ “ທົ່ວແຜ່ນດິນໂລກ” ຫຼືມະນຸດທຸກຄົນ. (ຄຳປາກົດ 12:9) ຊາຕານໃຊ້ສາສະໜາປອມເຜີຍແຜ່ເລື່ອງຕົວະກ່ຽວກັບພະເຢໂຫວາ ແລະມັນເຖິງກັບພະຍາຍາມປົກປິດຊື່ຂອງພະເຈົ້າ. (ເຢເຣມີ 23:26, 27) ຜົນກໍຄື ຜູ້ຄົນທີ່ສັດທາໃນພະເຈົ້າຄິດວ່າເຂົາເຈົ້າກຳລັງນະມັດສະການພະເຈົ້າ ແຕ່ແທ້ໆແລ້ວເຂົາເຈົ້າກຳລັງນະມັດສະການພວກຜີປີສາດ. (1 ໂກລິນໂທ 10:20; 2 ໂກລິນໂທ 11:13-15) ຊາຕານຍັງໃຊ້ໂລກທຸລະກິດເຜີຍແຜ່ຄຳຕົວະ ເຊັ່ນ: ຕົວະວ່າເງິນແລະວັດຖຸສິ່ງຂອງເຮັດໃຫ້ຜູ້ຄົນມີຄວາມສຸກ. (ສຸພາສິດ 18:11) ຄົນທີ່ເຊື່ອຄຳຕົວະນີ້ຈະໃຊ້ຊີວິດເພື່ອສະແຫວງຫາ “ເຂົ້າຂອງເງິນຄຳ” ຫຼາຍກວ່າພະເຈົ້າ. (ມັດທາຍ 6:24) ເຖິງວ່າເຂົາເຈົ້າຈະເຄີຍຮັກພະເຈົ້າ ແຕ່ຄວາມຮັກທີ່ເຂົາເຈົ້າມີຕໍ່ວັດຖຸສິ່ງຂອງກໍແຮງກ້າຫຼາຍຈົນເຮັດໃຫ້ຄວາມຮັກທີ່ມີຕໍ່ພະເຈົ້າໝົດໄປ.—ມັດທາຍ 13:22; 1 ໂຢຮັນ 2:15, 16
ເຮົາຕ້ອງເລືອກວ່າຈະຢູ່ຝ່າຍພະເຢໂຫວາ ຫຼືຝ່າຍຊາຕານ
8, 9. (ກ) ບົດຮຽນສອງຢ່າງອັນໃດທີ່ເຮົາຮຽນໄດ້ຈາກການກະທຳຂອງອາດາມ ເອວາ ແລະທູດສະຫວັນທີ່ກະບົດ? (ຂ) ເປັນຫຍັງຈຶ່ງເປັນເລື່ອງທີ່ດີທີ່ເຮົາໄດ້ຮູ້ວ່າຊາຕານຄວບຄຸມໂລກນີ້?
8 ເຮົາໄດ້ຮຽນ 2 ບົດຮຽນທີ່ສຳຄັນຈາກການກະທຳຂອງອາດາມ ເອວາ ແລະທູດສະຫວັນທີ່ກະບົດຄື: ທຳອິດ ເຮົາໄດ້ຮຽນວ່າມີພຽງ 2 ຝ່າຍເທົ່ານັ້ນໃຫ້ເລືອກແລະເຮົາຕ້ອງເລືອກພຽງຝ່າຍດຽວ. ເຮົາຕ້ອງເລືອກວ່າຈະຢູ່ຝ່າຍພະເຢໂຫວາ ຫຼືຝ່າຍຊາຕານ. (ມັດທາຍ 7:13) ສອງ ເຮົາຮຽນວ່າຄົນທີ່ເຂົ້າຮ່ວມກັບຊາຕານເກືອບຈະບໍ່ໄດ້ຮັບຜົນດີຫຍັງເລີຍ. ອາດາມແລະເອວາໄດ້ມີໂອກາດຕັດສິນໃຈເອງວ່າອັນໃດຖືກແລະອັນໃດຜິດ ແລະພວກຜີປີສາດກໍມີອຳນາດຫຼາຍກວ່າລັດຖະບານມະນຸດ. (ຕົ້ນເດີມ 3:22) ແຕ່ການເລືອກຢູ່ຝ່າຍຊາຕານຈະໄດ້ຮັບຜົນເສຍຢູ່ສະເໝີ. ນັ້ນບໍ່ແມ່ນຜົນປະໂຫຍດທີ່ແທ້ຈິງ!—ໂຢບ 21:7-17; ຄາລາຊີ 6:7, 8
9 ເປັນຫຍັງຈຶ່ງເປັນເລື່ອງທີ່ດີທີ່ເຮົາໄດ້ຮູ້ວ່າຊາຕານຄວບຄຸມໂລກນີ້? ເພາະຊ່ວຍເຮົາໃຫ້ມີຄວາມຄິດທີ່ຖືກຕ້ອງໃນເລື່ອງລັດຖະບານແລະກະຕຸ້ນເຮົາໃຫ້ປະກາດຂ່າວດີ. ເຮົາຮູ້ວ່າພະເຢໂຫວາຢາກໃຫ້ເຮົານັບຖືລັດຖະບານ. (1 ເປໂຕ 2:17) ພະອົງຄາດໝາຍໃຫ້ເຮົາເຊື່ອຟັງກົດໝາຍບ້ານເມືອງຖ້າກົດໝາຍນັ້ນບໍ່ຂັດກັບຫຼັກການຂອງພະອົງ. (ໂລມ 13:1-4) ເຮົາຍັງຮູ້ວ່າເຮົາຕ້ອງຮັກສາຄວາມເປັນກາງແລະບໍ່ສະໜັບສະໜູນພັກ ການເມືອງຫຼືຜູ້ນຳຄົນໃດ. (ໂຢຮັນ 17:15, 16; 18:36) ເຮົາຮູ້ວ່າຊາຕານພະຍາຍາມປົກປິດຊື່ຂອງພະເຢໂຫວາແລະຢາກທຳລາຍຊື່ສຽງຂອງພະອົງ. ດັ່ງນັ້ນ ຂໍໃຫ້ເຮົາເຮັດທຸກສິ່ງທີ່ເຮົາສາມາດເຮັດໄດ້ເພື່ອສອນຄວາມຈິງກ່ຽວກັບພະເຈົ້າຂອງເຮົາ. ເຮົາພູມໃຈທີ່ຖືກເອີ້ນຕາມນາມຊື່ຂອງພະອົງແລະໃຊ້ຊື່ຂອງພະອົງ. ຄວາມຮັກທີ່ເຮົາມີຕໍ່ພະເຈົ້າເປັນສິ່ງທີ່ມີຄ່າຫຼາຍກວ່າການຮັກເງິນຄຳຫຼືວັດຖຸສິ່ງຂອງ.—ເອຊາອີ 43:10; 1 ຕີໂມເຕ 6:6-10
ຊາຕານພະຍາຍາມຊັກຈູງຄົນອື່ນແນວໃດ?
10-12. (ກ) ຊາຕານໃຊ້ຫຍັງເປັນເຫຍື່ອລໍ້ທູດສະຫວັນ? (ຂ) ເຮົາຮຽນຫຍັງໄດ້ຈາກສິ່ງທີ່ທູດສະຫວັນຊົ່ວເຮັດ?
10 ຊາຕານໃຊ້ວິທີທີ່ໄດ້ຜົນໃນການຊັກຈູງຄົນອື່ນ. ເພື່ອຈະໃຫ້ຜູ້ຄົນເຮັດໃນສິ່ງທີ່ມັນຕ້ອງການ ມັນໄດ້ໃຊ້ເຫຍື່ອລໍ້ແລະບາງເທື່ອກໍໃຊ້ການຂົ່ມເຫງ.
11 ຊາຕານໃຊ້ເຫຍື່ອລໍ້ທູດສະຫວັນຫຼາຍອົງ. ມັນອາດສັງເກດເຂົາເຈົ້າມາດົນແລ້ວເພື່ອຈະຮູ້ວ່າຕ້ອງໃຊ້ເຫຍື່ອແບບໃດລໍ້ເຂົາເຈົ້າ. ທູດສະຫວັນບາງອົງໄດ້ຕິດກັບດັກແລະມີເພດສຳພັນກັບຜູ້ຍິງ. ລູກຂອງເຂົາເຈົ້າເປັນຄົນຮ່າງຍັກທີ່ມັກໃຊ້ຄວາມຮຸນແຮງເພື່ອທຳຮ້າຍຄົນອື່ນ. (ຕົ້ນເດີມ 6:1-4) ນອກຈາກຈະໃຊ້ການຜິດສິນລະທຳທາງເພດເພື່ອລໍ້ພວກທູດສະຫວັນແລ້ວ ຊາຕານຍັງສັນຍາກັບເຂົາເຈົ້າວ່າຈະໃຫ້ມີອຳນາດເໜືອມະນຸດ. ໂດຍວິທີນີ້ ຊາຕານອາດເຄີຍພະຍາຍາມຂັດຂວາງບໍ່ໃຫ້ຄຳພະຍາກອນຂອງພະເຢໂຫວາເລື່ອງ “ເຊື້ອສາຍຂອງຜູ້ຍິງ” ສຳເລັດເປັນຈິງ. (ຕົ້ນເດີມ 3:15) ແຕ່ພະເຢໂຫວາບໍ່ຍອມໃຫ້ມັນເຮັດໄດ້ສຳເລັດ. ພະອົງເຮັດໃຫ້ນໍ້າຖ້ວມໂລກເຊິ່ງທຳລາຍແຜນການຂອງຊາຕານແລະພວກຜີປີສາດ.
ຊາຕານພະຍາຍາມລໍ້ໃຈເຮົາໂດຍໃຊ້ການເຮັດຜິດສິນລະທຳທາງເພດ ຄວາມຍິ່ງ ແລະເລື່ອງທີ່ເໜືອທຳມະຊາດ (ເບິ່ງຂໍ້ 12,13)
12 ເຮົາຮຽນໄດ້ຫຍັງຈາກເລື່ອງນີ້? ການຜິດສິນລະທຳທາງເພດແລະຄວາມຍິ່ງເປັນເຫຍື່ອລໍ້ທີ່ໃຊ້ໄດ້ຜົນຫຼາຍແທ້ໆ. ທູດສະຫວັນທີ່ເຂົ້າຮ່ວມກັບຊາຕານເຄີຍໃຊ້ຊີວິດຢູ່ກັບພະເຈົ້າໃນສະຫວັນເປັນເວລາຫຼາຍປີ! ເຖິງຢ່າງນັ້ນ ພວກມັນກໍຍັງຍອມໃຫ້ຄວາມຕ້ອງການທີ່ຜິດໆພັດທະນາຂຶ້ນໃນຫົວໃຈແລະປ່ອຍໃຫ້ຄວາມຕ້ອງການນັ້ນຮຸນແຮງຂຶ້ນເລື້ອຍໆ. ເຮົາຕ້ອງຈື່ໄວ້ສະເໝີວ່າບໍ່ສຳຄັນວ່າເຮົາຈະຮັບໃຊ້ພະເຢໂຫວາມາດົນສໍ່າໃດ ຄວາມຕ້ອງການທີ່ຜິດໆສາມາດເກີດຂຶ້ນໃນຫົວໃຈຂອງເຮົາໄດ້. (1 ໂກລິນໂທ 10:12) ນີ້ເປັນເຫດຜົນທີ່ເຮົາຕ້ອງກວດສອບຫົວໃຈຂອງເຮົາຢູ່ສະເໝີແລະກຳຈັດຄວາມຄິດທີ່ຜິດສິນລະທຳທາງເພດແລະ ຄວາມຍິ່ງທຸກຢ່າງອອກໄປ!—ຄາລາຊີ 5:26; ອ່ານໂກໂລດ 3:5
13. ເຫຍື່ອອີກຢ່າງໜຶ່ງທີ່ຊາຕານໃຊ້ແມ່ນຫຍັງ ແລະເຮົາຈະຫຼີກລ່ຽງໄດ້ແນວໃດ?
13 ເຫຍື່ອລໍ້ອີກຢ່າງໜຶ່ງທີ່ຊາຕານໃຊ້ຄືຄວາມຢາກຮູ້ຢາກເຫັນກ່ຽວກັບເລື່ອງເລິກລັບ. ທຸກມື້ນີ້ ຊາຕານພະຍາຍາມເຮັດໃຫ້ຜູ້ຄົນສົນໃຈເລື່ອງຜີປີສາດໂດຍໃຊ້ສາສະໜາປອມແລະຄວາມບັນເທີງ. ໃນພາບພະຍົນ ວິດີໂອເກມ ແລະຄວາມບັນເທີງຕ່າງໆເຮັດໃຫ້ເບິ່ງຄືວ່າສິ່ງເລິກລັບເປັນເລື່ອງທີ່ໜ້າຕື່ນເຕັ້ນແລະໜ້າຄົ້ນຫາ. ເຮົາຈະຫຼີກລ່ຽງເຫຍື່ອລໍ້ນີ້ໄດ້ແນວໃດ? ເຮົາບໍ່ຄວນຄາດໝາຍວ່າອົງການຂອງພະເຈົ້າຈະມີລາຍຊື່ຄວາມບັນເທີງທີ່ດີແລະບໍ່ດີໃຫ້ເຮົາ. ເຮົາຕ້ອງຝຶກສະຕິຮູ້ສຶກຜິດຊອບຂອງເຮົາເພື່ອຈະສາມາດຕັດສິນໃຈເລືອກໄດ້ຢ່າງຖືກຕ້ອງຕາມຫຼັກການຂອງພະເຢໂຫວາ. (ເຫບເລີ 5:14) ແລະຖ້າຄວາມຮັກຂອງເຮົາທີ່ມີຕໍ່ພະເຢໂຫວາ “ປາສະຈາກໜ້າຊື່ໃຈຄົດ” ເຮົາກໍຈະເລືອກຢ່າງສະຫຼາດ. (ໂລມ 12:9) ຄົນໜ້າຊື່ໃຈຄົດມັກເວົ້າຢ່າງໜຶ່ງແຕ່ເຮັດອີກຢ່າງໜຶ່ງ. ດັ່ງນັ້ນ ເມື່ອເຮົາເລືອກຄວາມບັນເທີງເຮົາອາດຖາມຕົວເອງວ່າ: ‘ຂ້ອຍໄດ້ເຮັດຕາມຫຼັກການດຽວກັນກັບທີ່ຂ້ອຍສອນຄົນອື່ນບໍ? ນັກສຶກສາຂອງຂ້ອຍຫຼືຄົນທີ່ຂ້ອຍກັບໄປຢາມຈະຄິດແນວໃດກ່ຽວກັບໜັງທີ່ຂ້ອຍເບິ່ງຫຼືເພງທີ່ຂ້ອຍຟັງ?’ ເມື່ອເຮົາເຮັດຕາມຫຼັກການທີ່ເຮົາສອນຄົນອື່ນ ມັນຈະກໍງ່າຍຂຶ້ນທີ່ເຮົາຈະປະຕິເສດເຫຍື່ອລໍ້ຂອງຊາຕານ.—1 ໂຢຮັນ 3:18
ຊາຕານພະຍາຍາມຂົ່ມເຫງເຮົາໂດຍທາງການສັ່ງຫ້າມຈາກລັດຖະບານ ຄວາມກົດດັນຈາກໝູ່ຢູ່ໂຮງຮຽນ ການຕໍ່ຕ້ານຈາກຄອບຄົວ (ເບິ່ງຂໍ້ 14)
14. ຊາຕານພະຍາຍາມຂົ່ມເຫງເຮົາແນວໃດ ແລະເຮົາຈະຢືນຢັນໝັ້ນຄົງໄດ້ແນວໃດ?
14 ຊາຕານຍັງພະຍາຍາມຂົ່ມເຫງແລະເຮັດໃຫ້ເຮົາຢ້ານ ເພື່ອເຮົາຈະເຊົາພັກດີຕໍ່ພະເຢໂຫວາ. ຕົວຢ່າງ: ມັນອາດກະຕຸ້ນລັດຖະບານໃຫ້ສັ່ງຫ້າມວຽກປະກາດຂອງເຮົາ. ມັນຍັງເຮັດໃຫ້ໝູ່ຢູ່ບ່ອນເຮັດວຽກຫຼືໝູ່ຢູ່ໂຮງຮຽນເຍາະເຍີ້ຍເຮົາທີ່ເຮົາເຮັດຕາມມາດຕະຖານຂອງຄຳພີໄບເບິນ. (1 ເປໂຕ 4:4) ຊາຕານຍັງກະຕຸ້ນຄົນທີ່ບໍ່ມີຄວາມເຊື່ອໃນຄອບຄົວເຊິ່ງອາດຫວັງດີມາຫ້າມເຮົາບໍ່ໃຫ້ໄປປະຊຸມ. (ມັດທາຍ 10:36) ເຮົາສາມາດເຮັດຫຍັງໄດ້ແດ່ເພື່ອຈະຢືນຢັດຕໍ່ສູ້ກັບການຂົ່ມເຫງຂອງຊາຕານ? ເຮົາບໍ່ຄວນແປກໃຈເມື່ອຖືກຂົ່ມເຫງ ເພາະເຮົາຮູ້ວ່າຊາຕານກຳລັງຕໍ່ສູ້ກັບເຮົາ. (ຄຳປາກົດ 2:10; 12:17) ນອກຈາກນັ້ນ ເຮົາຕ້ອງຈື່ວ່າປະເດັນສຳຄັນທີ່ຢູ່ເບື້ອງຫຼັງເລື່ອງນີ້ຄື: ຊາຕານກ່າວຫາວ່າເຮົາຈະຮັບໃຊ້ພະເຢໂຫວາກໍຕໍ່ເມື່ອຢູ່ໃນສະພາບການ ທີ່ສະດວກສະບາຍ ແຕ່ຖ້າເຮົາມີບັນຫາເຮົາກໍຈະເຊົາຮັບໃຊ້ພະອົງ. (ໂຢບ 1:9-11; 2:4, 5) ສະນັ້ນ ເຮົາຕ້ອງຂໍພະເຢໂຫວາຊ່ວຍເຮົາໃຫ້ເຂັ້ມແຂງ ແລະຂໍຈື່ໄວ້ວ່າພະເຢໂຫວາຈະບໍ່ມີວັນປະຖິ້ມເຮົາ.—ເຫບເລີ 13:5
ສິ່ງທີ່ຊາຕານເຮັດບໍ່ໄດ້
15. ຊາຕານສາມາດບັງຄັບເຮົາໃຫ້ເຮັດສິ່ງທີ່ເຮົາບໍ່ຢາກເຮັດໄດ້ບໍ? ຂໍອະທິບາຍ.
15 ຊາຕານບໍ່ສາມາດບັງຄັບຜູ້ຄົນໃຫ້ເຮັດສິ່ງທີ່ເຂົາເຈົ້າບໍ່ຢາກເຮັດໄດ້. (ຢາໂກໂບ 1:14) ຫຼາຍຄົນໃນໂລກນີ້ບໍ່ຮູ້ວ່າຕົວເອງກຳລັງຢູ່ຝ່າຍຊາຕານ. ແຕ່ຄົນທີ່ຮຽນຮູ້ຄວາມຈິງຈະຕ້ອງເລືອກວ່າຈະຢູ່ຝ່າຍພະເຢໂຫວາຫຼືຝ່າຍຊາຕານ. (ກິດຈະການ 3:17; 17:30) ຖ້າເຮົາຕັດສິນໃຈເຊື່ອຟັງພະເຢໂຫວາ ຊາຕານກໍບໍ່ສາມາດທຳລາຍຄວາມພັກດີຂອງເຮົາໄດ້.—ໂຢບ 2:3; 27:5
16, 17. (ກ) ມີຫຍັງອີກທີ່ຊາຕານກັບພວກຜີປີສາດເຮັດບໍ່ໄດ້? (ຂ) ເປັນຫຍັງເຮົາບໍ່ຄວນຢ້ານທີ່ຈະອະທິດຖານເຖິງພະເຢໂຫວາດ້ວຍສຽງດັງ?
16 ຍັງມີສິ່ງອື່ນໆອີກທີ່ຊາຕານແລະພວກຜີປີສາດເຮັດບໍ່ໄດ້. ຕົວຢ່າງເຊັ່ນ: ຄຳພີໄບເບິນບໍ່ເຄີຍບອກວ່າພວກມັນສາມາດຮູ້ຄວາມຄິດຫຼືສິ່ງທີ່ຢູ່ໃນໃຈຂອງເຮົາ. ມີພຽງແຕ່ພະເຢໂຫວາແລະພະເຍຊູເທົ່ານັ້ນທີ່ຮູ້. (1 ຊາເມືອນ 16:7; ມາລະໂກ 2:8) ແລ້ວເຮົາຄວນຢ້ານວ່າຊາຕານກັບຜີປີສາດຈະໄດ້ຍິນສິ່ງທີ່ເຮົາເວົ້າ ຫຼືອະທິດຖານອອກສຽງ ແລ້ວໃຊ້ເລື່ອງເຫຼົ່ານີ້ມາຈັດການເຮົາບໍ? ບໍ່! ຍ້ອນຫຍັງ? ຂໍຄິດເຖິງຕົວຢ່າງປຽບທຽບນີ້ ເຮົາບໍ່ຢ້ານທີ່ຈະຮັບໃຊ້ພະເຢໂຫວາເພາະຢ້ານວ່າຊາຕານຈະເຫັນ. ດັ່ງນັ້ນ ເຮົາກໍບໍ່ຄວນຢ້ານທີ່ຈະອະທິດຖານອອກສຽງເພາະຢ້ານວ່າຊາຕານຈະໄດ້ຍິນ. ຄຳພີໄບເບິນບອກຫຼາຍເທື່ອວ່າຜູ້ຮັບໃຊ້ຂອງພະເຈົ້າອະທິດຖານດ້ວຍສຽງດັງ ແລະເຮົາກໍບໍ່ເຄີຍອ່ານເຈິວ່າເຂົາເຈົ້າຢ້ານວ່າຊາຕານຈະໄດ້ຍິນ. (1 ກະສັດ 8:22, 23; ໂຢຮັນ 11:41, 42; ກິດຈະການ 4:23, 24) ຖ້າເຮົາເວົ້າແລະເຮັດໃນສິ່ງທີ່ພະເຈົ້າຕ້ອງການຢ່າງສຸດຄວາມສາມາດ ເຮົາໝັ້ນໃຈໄດ້ເລີຍວ່າພະເຢໂຫວາຈະບໍ່ປ່ອຍໃຫ້ຊາຕານມາເຮັດໃຫ້ເຮົາບໍ່ໄດ້ຮັບຊີວິດຕະຫຼອດໄປ.—ອ່ານຄຳເພງ 34:7
17 ເຮົາຕ້ອງຮູ້ຈັກສັດຕູຂອງເຮົາ ແຕ່ເຮົາບໍ່ຄວນຢ້ານມັນ. ເຖິງວ່າເຮົາຈະບໍ່ສົມບູນແບບ ແຕ່ດ້ວຍການຊ່ວຍເຫຼືອຈາກພະເຢໂຫວາເຮົາສາມາດເອົາຊະນະຊາຕານໄດ້! (1 ໂຢຮັນ 2:14) ຖ້າເຮົາຕໍ່ສູ້ຊາຕານ ມັນກໍຈະປົບໜີໄປຈາກເຮົາ. (ຢາໂກໂບ 4:7; 1 ເປໂຕ 5:9) ໃນທຸກມື້ນີ້ ເບິ່ງຄືວ່າຊາຕານຈະໂຈມຕີໄວຮຸ່ນເປັນພິເສດ. ແລ້ວຄົນທີ່ເປັນໄວຮຸ່ນຈະຕ້ານທານການໂຈມຕີຂອງຊາຕານໄດ້ແນວໃດ? ເຮົາຈະພິຈາລະນາເລື່ອງນີ້ໃນບົດຄວາມຕໍ່ໄປ.
^ ຂໍ້ 2 ຄຳພີໄບເບິນເປີດເຜີຍຊື່ຂອງທູດສະຫວັນບາງອົງ. (ຜູ້ຕັດສິນ 13:18; ດານຽນ 8:16; ລືກາ 1:19; ຄຳປາກົດ 12:7) ນອກຈາກນັ້ນ ພະເຢໂຫວາຍັງຕັ້ງຊື່ດາວແຕ່ລະດວງນຳອີກ. (ຄຳເພງ 147:4) ດັ່ງນັ້ນຈຶ່ງມີເຫດຜົນທີ່ເຮົາຈະຄິດວ່າພະເຢໂຫວາຕັ້ງຊື່ໃຫ້ກັບທູດສະຫວັນທັງໝົດ ລວມເຖິງທູດສະຫວັນທີ່ພາຍຫຼັງໄດ້ກາຍມາເປັນຊາຕານ.
^ ຂໍ້ 3 ຄຳວ່າ “ຊາຕານ” ມີພຽງ 18 ຄັ້ງໃນພະຄຳພີພາກພາສາເຫບເລີ ແຕ່ພະຄຳພີພາກພາສາເກັຣກມີຫຼາຍກວ່າ 30 ຄັ້ງ.