ບົດຄວາມສຶກສາທີ 3
ພະເຢໂຫວາຮັກເຈົ້າແລະເຫັນຄ່າເຈົ້າແທ້ໆ!
“ເມື່ອພວກເຮົາຕົກຕ່ຳ ພະອົງກໍນຶກເຖິງພວກເຮົາ.”—ເພງ. 136:23, ລ.ມ.
ເພງ 33 ມອບພາລະຂອງເຈົ້າໄວ້ກັບພະເຢໂຫວາ
ໃຈຄວາມສຳຄັນ *
1-2. ພະຍານພະເຢໂຫວາຫຼາຍຄົນປະສົບບັນຫາຫຍັງແດ່ ແລະມັນສົ່ງຜົນຕໍ່ພວກເຂົາແນວໃດ?
ຂໍໃຫ້ຄິດເຖິງ 3 ຕົວຢ່າງຕໍ່ໄປນີ້: ພີ່ນ້ອງຊາຍໜຸ່ມຄົນໜຶ່ງເປັນພະຍາດຮ້າຍແຮງທີ່ເຮັດໃຫ້ຊຸດໂຊມລົງເລື້ອຍໆ. ພີ່ນ້ອງຊາຍຄົນໜຶ່ງອາຍຸ 50 ປາຍປີຕົກວຽກ ລາວພະຍາຍາມຊອກຫາວຽກແລ້ວແຕ່ກໍຍັງບໍ່ມີວຽກເຮັດ. ພີ່ນ້ອງຍິງສູງອາຍຸຄົນໜຶ່ງທີ່ສັດຊື່ບໍ່ສາມາດເຮັດວຽກຮັບໃຊ້ພະເຢໂຫວາໄດ້ຫຼາຍຄືແຕ່ກ່ອນ.
2 ຖ້າເຈົ້າປະສົບບັນຫາໃດໜຶ່ງຄືກັບຕົວຢ່າງຂ້າງເທິງນີ້ ເຈົ້າອາດຮູ້ສຶກວ່າຕົວເອງບໍ່ມີຄ່າຫຍັງເລີຍ. ບັນຫາເຫຼົ່ານັ້ນອາດເຮັດໃຫ້ເຈົ້າບໍ່ມີຄວາມສຸກ ຮູ້ສຶກບໍ່ດີຕໍ່ຕົວເອງ ແລະອາດເຮັດໃຫ້ເຈົ້າມີບັນຫາກັບຄົນອື່ນໄດ້ງ່າຍ.
3. ຊາຕານແລະຜູ້ທີ່ໄດ້ຮັບອິດທິພົນຈາກມັນຖືວ່າຊີວິດມະນຸດເປັນແນວໃດ?
3 ໂລກນີ້ສະທ້ອນໃຫ້ເຫັນຄວາມຄິດຂອງຊາຕານກ່ຽວກັບຊີວິດມະນຸດ. ຊາຕານເຮັດຄືກັບວ່າມະນຸດບໍ່ມີຄ່າ. ມັນບອກເອວາບໍ່ໃຫ້ເຊື່ອຟັງພະເຈົ້າເພື່ອຈະມີອິດສະຫຼະແທ້ ທັງໆທີ່ມັນກໍຮູ້ວ່າການເຮັດແບບນັ້ນຈະນຳໄປສູ່ຄວາມຕາຍ. ນອກຈາກນັ້ນ ຊາຕານຍັງຄວບຄຸມລະບົບຕ່າງໆຂອງໂລກນີ້ເຊັ່ນ: ການຄ້າ ການເມືອງ ແລະສາສະໜາ. ດັ່ງນັ້ນຈຶ່ງບໍ່ແປກໃຈທີ່ນັກທຸລະກິດ ນັກການເມືອງ ແລະຜູ້ນຳສາສະໜາຫຼາຍຄົນບໍ່ໄດ້ເຫັນວ່າຊີວິດຄົນມີຄ່າແລະບໍ່ສົນໃຈວ່າໃຜຈະຮູ້ສຶກແນວໃດ.
4. ເຮົາຈະພິຈາລະນາຫຍັງໃນບົດຄວາມນີ້?
4 ບໍ່ຄືກັບຊາຕານ ພະເຢໂຫວາຢາກໃຫ້ເຮົາຮູ້ສຶກດີຕໍ່ຕົວເອງ ແລະພະອົງຈະຊ່ວຍເຮົາເມື່ອເຮົາເຈິສະພາບການທີ່ເຮັດໃຫ້ຮູ້ສຶກວ່າຕົວເອງບໍ່ມີຄ່າ. (ເພງ. 136:23; ຣມ. 12:3) ໃນບົດຄວາມນີ້ ເຮົາຈະພິຈາລະນາວິທີທີ່ພະເຢໂຫວາ ຊ່ວຍເຮົາໃນສະພາບການຕໍ່ໄປນີ້: (1) ເມື່ອເຮົາເຈັບປ່ວຍ (2) ມີບັນຫາທາງການເງິນ (3) ເມື່ອອາຍຸຫຼາຍຂຶ້ນເຮັດໃຫ້ເຮົາຮູ້ສຶກວ່າບໍ່ເປັນປະໂຫຍດຕໍ່ວຽກຮັບໃຊ້ພະເຢໂຫວາ. ທຳອິດໃຫ້ເຮົາມາເບິ່ງເຫດຜົນທີ່ເຮົາສາມາດໝັ້ນໃຈໄດ້ວ່າເຮົາແຕ່ລະຄົນມີຄ່າຕໍ່ພະເຢໂຫວາ.
ພະເຢໂຫວາເຫັນຄ່າເຮົາ
5. ສິ່ງໃດເຮັດໃຫ້ເຈົ້າຄິດວ່າມະນຸດມີຄ່າຕໍ່ພະເຢໂຫວາ?
5 ເຖິງວ່າເຮົາຈະຖືກສ້າງມາຈາກຂີ້ດິນ ແຕ່ສຳລັບພະເຢໂຫວາແລ້ວເຮົາມີຄ່າຫຼາຍກວ່າຂີ້ດິນຕັ້ງຫຼາຍເທົ່າ. (ຕົ້ນ. 2:7) ໃຫ້ເຮົາມາພິຈາລະນາບາງເຫດຜົນວ່າເປັນຫຍັງເຮົາມີຄ່າຕໍ່ພະເຢໂຫວາ. ທຳອິດ ພະອົງສ້າງມະນຸດໃຫ້ຮຽນແບບຄຸນລັກສະນະຂອງພະອົງໄດ້. (ຕົ້ນ. 1:27) ການສ້າງມະນຸດແບບນີ້ສະແດງວ່າ ພະອົງຍົກເຮົາໃຫ້ເໜືອກວ່າສິ່ງຕ່າງໆທີ່ພະອົງສ້າງເທິງໂລກ ແລະຍັງໃຫ້ເຮົາເບິ່ງແຍງແຜ່ນດິນໂລກແລະສັດຕ່າງໆ.—ເພງ. 8:4-8
6. ມີເຫດຜົນຫຍັງອີກທີ່ເຮັດໃຫ້ເຮົາຮູ້ວ່າພະເຢໂຫວາເຫັນຄ່າມະນຸດທີ່ບໍ່ສົມບູນແບບ?
6 ແມ່ນແຕ່ຫຼັງຈາກອາດາມເຮັດບາບ ພະເຢໂຫວາກໍຍັງເຫັນຄ່າມະນຸດຢູ່. ພະອົງເຫັນຄ່າເຮົາຫຼາຍແທ້ໆຈົນໄດ້ໃຫ້ພະເຢຊູລູກຊາຍສຸດທີ່ຮັກຂອງພະອົງລົງມາຕາຍເປັນຄ່າໄຖ່ເພື່ອເຮົາ. (1 ຢຮ. 4:9, 10) ໂດຍທາງຄ່າໄຖ່ ພະເຢໂຫວາຈະປຸກທັງ “ຄົນດີແລະຄົນຊົ່ວ” ທີ່ຕາຍຍ້ອນບາບຂອງອາດາມໃຫ້ຄືນມາຈາກຕາຍ. (ກຈກ. 24:15) ຄຳພີໄບເບິນສະແດງໃຫ້ເຫັນວ່າພະອົງເຫັນຄ່າເຮົາບໍ່ວ່າເຮົາຈະເຈັບປ່ວຍ ມີບັນຫາທາງການເງິນ ຫຼືມີອາຍຸຫຼາຍຂຶ້ນ.—ກຈກ. 10:34, 35
7. ຍັງມີເຫດຜົນຫຍັງອີກທີ່ເຮັດໃຫ້ຜູ້ຮັບໃຊ້ພະເຢໂຫວາເຊື່ອວ່າພະອົງເຫັນຄ່າພວກເຂົາ?
7 ເຮົາຍັງມີເຫດຜົນອື່ນອີກທີ່ຈະເຊື່ອວ່າພະເຢໂຫວາເຫັນຄ່າເຮົາ. ພະອົງຊັກນຳເຮົາໃຫ້ມາຫາພະອົງ ແລະສັງເກດເບິ່ງວ່າເຮົາຕອບຮັບຂ່າວດີແນວໃດ. (ຢຮ. 6:44) ເມື່ອເຮົາຫຍັບເຂົ້າໃກ້ພະເຢໂຫວາ ພະອົງກໍຈະຫຍັບເຂົ້າມາໃກ້ເຮົາ. (ຢກບ. 4:8) ພະເຢໂຫວາຍັງໃຊ້ເວລາແລະອອກຄວາມພະຍາຍາມທີ່ຈະສອນເຮົາ ນີ້ສະແດງວ່າເຮົາມີຄ່າຫຼາຍຕໍ່ພະອົງ. ພະອົງຮູ້ວ່າຕອນນີ້ເຮົາແຕ່ລະຄົນເປັນແບບໃດ ແລະເຮົາສາມາດປັບປຸງຕົວເອງແນວໃດ. ນອກຈາກນັ້ນ ພະອົງຍັງສັ່ງສອນເຮົາດ້ວຍຄວາມຮັກ. (ສຸພາ. 3:11, 12) ຈັ່ງແມ່ນເປັນຫຼັກຖານທີ່ສະແດງໃຫ້ເຫັນວ່າພະເຢໂຫວາເຫັນຄ່າເຮົາຫຼາຍແທ້ໆ!
8. ຄຳເພງ 18:27-29 ຊ່ວຍເຮົາໃຫ້ເບິ່ງບັນຫາທີ່ເຮົາປະສົບແນວໃດ?
8 ບາງຄົນຖືວ່າກະສັດດາວິດເປັນຄົນບໍ່ມີຄ່າ ແຕ່ດາວິດຮູ້ວ່າພະເຢໂຫວາຮັກລາວແລະຊ່ວຍເຫຼືອລາວ. ການຮູ້ແບບນີ້ຊ່ວຍໃຫ້ດາວິດມີຄວາມຄິດທີ່ຖືກຕ້ອງຕໍ່ກັບສະພາບການຂອງລາວ. (2 ຊາມ. 16:5-7) ເມື່ອເຮົາຮູ້ສຶກທໍ້ໃຈຫຼືປະສົບກັບບັນຫາ ພະເຢໂຫວາຈະຊ່ວຍເຮົາໃຫ້ເບິ່ງສິ່ງຕ່າງໆໃນອີກແງ່ມຸມໜຶ່ງແລະເອົາຊະນະອຸປະສັກຕ່າງໆໄດ້. (ອ່ານຄຳເພງ 18:27-29) ເມື່ອພະເຢໂຫວາຊ່ວຍເຮົາ ກໍບໍ່ມີສິ່ງໃດສາມາດຢຸດເຮົາບໍ່ໃຫ້ຮັບໃຊ້ພະອົງຢ່າງມີຄວາມສຸກໄດ້. (ຣມ. 8:31) ຕອນນີ້ໃຫ້ເຮົາມາພິຈາລະນາ 3 ສະພາບການເຫຼົ່ານັ້ນເຊິ່ງເຮົາຕ້ອງຈື່ໄວ້ວ່າພະເຢໂຫວາຮັກແລະເຫັນຄຸນຄ່າເຮົາສະເໝີ.
ເມື່ອເຮົາເຈັບປ່ວຍ
ການອ່ານຖ້ອຍຄຳທີ່ໄດ້ຮັບການດົນໃຈຈາກພະເຈົ້າຈະຊ່ວຍເຮົາໃຫ້ຮັບມືກັບຄວາມຮູ້ສຶກໃນແງ່ລົບຕໍ່ຕົວເອງທີ່ເປັນຜົນມາຈາກຄວາມເຈັບປ່ວຍ (ເບິ່ງຂໍ້ 9-12)
9. ຄວາມເຈັບປ່ວຍອາດເຮັດໃຫ້ເຮົາເບິ່ງຕົວເອງແນວໃດ?
9 ຄວາມເຈັບປ່ວຍສົ່ງຜົນຕໍ່ອາລົມຄວາມຮູ້ສຶກ ມັນເຮັດໃຫ້ເຮົາຮູ້ສຶກວ່າຕົວເອງບໍ່ເປັນປະໂຫຍດກັບໃຜເລີຍ. ເຮົາອາດຮູ້ສຶກອາຍເມື່ອຜູ້ຄົນເບິ່ງວ່າເຮົາມີຂີດຈຳກັດ ຫຼືເມື່ອເຮົາຕ້ອງເພິ່ງຄວາມຊ່ວຍເຫຼືອຈາກຄົນອື່ນ. ເຖິງວ່າຄົນອື່ນຈະບໍ່ຮູ້ວ່າເຮົາເຈັບປ່ວຍ ແຕ່ເຮົາອາດຕ້ອງຕໍ່ສູ້ກັບຄວາມຮູ້ສຶກອັບອາຍເພາະເຮົາບໍ່ສາມາດເຮັດສິ່ງທີ່ເຮົາເຄີຍເຮັດໄດ້. ໃນເວລາທີ່ຍາກລຳບາກແບບນີ້ ພະເຢໂຫວາສາມາດໃຫ້ກຳລັງໃຈເຮົາ. ພະອົງເຮັດແນວໃດ?
10. ຕາມສຸພາສິດ 12:25 ສິ່ງໃດຈະຊ່ວຍເຮົາໄດ້ເມື່ອເຮົາເຈັບປ່ວຍ?
ສຸພາສິດ 12:25) ໃນຄຳພີໄບເບິນ ພະເຢໂຫວາໄດ້ບອກເຮົາກ່ຽວກັບສິ່ງດີໆຫຼາຍຢ່າງທີ່ເຕືອນເຮົາວ່າ ເຮົາມີຄ່າຫຼາຍຕໍ່ພະອົງເຖິງວ່າເຮົາຈະເຈັບປ່ວຍ. (ເພງ. 31:19; 41:3) ຖ້າເຮົາອ່ານຄຳພີໄບເບິນເຊິ່ງໄດ້ຮັບການດົນໃຈຈາກພະເຈົ້າຫຼືເຖິງກັບອ່ານຊ້ຳໄປຊ້ຳມາຫຼາຍເທື່ອ ພະເຢໂຫວາກໍຈະຊ່ວຍເຮົາໃຫ້ຮັບມືກັບຄວາມຮູ້ສຶກໃນແງ່ລົບຕໍ່ຕົວເອງເຊິ່ງເກີດຈາກຄວາມເຈັບປ່ວຍ.
10 ເມື່ອເຮົາເຈັບປ່ວຍ “ຖ້ອຍຄຳດີ” ສາມາດຊ່ວຍເຮົາໃຫ້ມີກຳລັງໃຈ. (ອ່ານ11. ພີ່ນ້ອງຊາຍຄົນໜຶ່ງໄດ້ຮັບຄວາມຊ່ວຍເຫຼືອຈາກພະເຢໂຫວາແນວໃດ?
11 ຂໍໃຫ້ເຮົາມາເບິ່ງປະສົບການຂອງພີ່ນ້ອງຊາຍໜຸ່ມທີ່ຊື່ຮໍເຮ. ຕອນທີ່ລາວຍັງໜຸ່ມລາວເປັນພະຍາດທີ່ເຮັດໃຫ້ຮ່າງກາຍຊຸດໂຊມລົງຢ່າງໄວວາ ລາວຈຶ່ງຮູ້ສຶກວ່າຕົວເອງບໍ່ມີຄ່າ. ລາວບອກວ່າ: “ຂ້ອຍບໍ່ໄດ້ກຽມທີ່ຈະຮັບມືກັບຄວາມເຈັບປ່ວຍ ຂ້ອຍຮູ້ສຶກອາຍເພາະແມ່ນໃຜກໍເບິ່ງແຕ່ຂ້ອຍ. ເມື່ອຂ້ອຍຊຸດໂຊມລົງ ຂ້ອຍບໍ່ຮູ້ວ່າຊີວິດຂ້ອຍຈະປ່ຽນໄປແນວໃດ. ຂ້ອຍເສຍໃຈຫຼາຍແລະໄດ້ອະທິດຖານຂໍຄວາມຊ່ວຍເຫຼືອຈາກພະເຢໂຫວາ.” ພະເຢໂຫວາຊ່ວຍລາວແນວໃດ? ລາວບອກວ່າ: “ຍ້ອນຂ້ອຍບໍ່ມີສະມາທິ ພີ່ນ້ອງຈຶ່ງບອກໃຫ້ອ່ານຂໍ້ຄຳພີສອງສາມຂໍ້ຈາກປຶ້ມຄຳເພງທີ່ບອກວ່າພະເຢໂຫວາເປັນຫ່ວງຜູ້ຮັບໃຊ້ຂອງພະອົງ. ຂ້ອຍອ່ານຂໍ້ຄຳພີເຫຼົ່ານັ້ນທຸກມື້ຊ້ຳໄປຊ້ຳມາຫຼາຍເທື່ອ ແລ້ວຂ້ອຍກໍໄດ້ກຳລັງໃຈແທ້ໆ. ຫຼັງຈາກນັ້ນ ຄົນອື່ນກໍເລີ່ມເຫັນວ່າຂ້ອຍຍິ້ມຫຼາຍຂຶ້ນ. ພວກເຂົາເຖິງກັບບອກວ່າ ການທີ່ຂ້ອຍຄິດໃນແງ່ບວກເຮັດໃຫ້ພວກເຂົາໄດ້ຮັບກຳລັງໃຈ. ພະເຢໂຫວາຕອບຄຳອະທິດຖານຂອງຂ້ອຍແລ້ວ! ພະອົງຊ່ວຍຂ້ອຍໃຫ້ປ່ຽນວິທີທີ່ຂ້ອຍເບິ່ງຕົວເອງ. ຂ້ອຍເລີ່ມສົນໃຈສິ່ງທີ່ຄຳພີໄບເບິນບອກວ່າພະເຢໂຫວາເບິ່ງຂ້ອຍແນວໃດເຖິງວ່າຈະເຈັບປ່ວຍ.”
12. ເມື່ອເຈັບປ່ວຍ ເຈົ້າຕ້ອງເຮັດຫຍັງເພື່ອຈະໄດ້ຮັບການຊ່ວຍເຫຼືອຈາກພະເຢໂຫວາ?
12 ຖ້າເຈົ້າກຳລັງເຈັບປ່ວຍ ຂໍໃຫ້ໝັ້ນໃຈວ່າພະເຢໂຫວາຮູ້ວ່າເຈົ້າກຳລັງປະສົບກັບບັນຫາຫຍັງ. ໃຫ້ຂໍພະເຢໂຫວາຊ່ວຍເຈົ້າເພື່ອທີ່ເຈົ້າຈະສາມາດເບິ່ງສະພາບການຂອງເຈົ້າໄດ້ຢ່າງຖືກຕ້ອງ. ຈາກນັ້ນ ໃຫ້ອ່ານຄຳເວົ້າດີໆໃນຄຳພີໄບເບິນທີ່ພະເຢໂຫວາໄດ້ເກັບຮັກສາໄວ້ໃຫ້ເຈົ້າ. ໃຫ້ເບິ່ງຂໍ້ຄຳພີທີ່ສະແດງວ່າພະເຢໂຫວາເຫັນຄ່າຜູ້ຮັບໃຊ້ຂອງພະອົງຫຼາຍສ່ຳໃດ. ຖ້າເຈົ້າເຮັດແບບນັ້ນ ເຈົ້າກໍຈະເຫັນວ່າພະເຢໂຫວາດີຕໍ່ທຸກຄົນທີ່ຮັບໃຊ້ພະອົງຢ່າງສັດຊື່.—ເມື່ອເຮົາມີບັນຫາທາງການເງິນ
ການຈື່ຄຳສັນຍາຂອງພະເຢໂຫວາທີ່ວ່າພະອົງຈະເບິ່ງແຍງເຮົາຈະຊ່ວຍເຮົາຕອນທີ່ຊອກວຽກເຮັດບໍ່ໄດ້ (ເບິ່ງຂໍ້ 13-15)
13. ຫົວໜ້າຄອບຄົວຄົນໜຶ່ງຮູ້ສຶກແນວໃດເມື່ອລາວຕົກວຽກ?
13 ຫົວໜ້າຄອບຄົວທຸກຄົນຢາກເບິ່ງແຍງຄອບຄົວໃຫ້ມີສິ່ງຈຳເປັນພຽງພໍ. ແຕ່ສົມມຸດວ່າພີ່ນ້ອງຊາຍຄົນໜຶ່ງທີ່ເປັນຫົວໜ້າຄອບຄົວຕົກວຽກທັງໆລາວກໍບໍ່ໄດ້ເຮັດຫຍັງຜິດ. ລາວພະຍາຍາມຊອກຫາວຽກແລ້ວ ແຕ່ກໍບໍ່ມີວຽກເຮັດເລີຍ. ສະພາບການແບບນີ້ອາດເຮັດໃຫ້ລາວຮູ້ສຶກວ່າບໍ່ມີຄ່າ. ແຕ່ການຄິດເຖິງຄຳສັນຍາຂອງພະເຢໂຫວາຈະຊ່ວຍລາວແນວໃດ?
14. ມີເຫດຜົນຫຍັງແດ່ທີ່ພະເຢໂຫວາເຮັດຕາມຄຳສັນຍາຂອງພະອົງ?
14 ພະເຢໂຫວາເຮັດຕາມຄຳສັນຍາສະເໝີ. (ຢຊວຍ. 21:45; 23:14) ພະອົງມີເຫດຜົນຫຼາຍຢ່າງທີ່ຈະເຮັດແບບນີ້. ເຫດຜົນໜຶ່ງກໍຍ້ອນມັນສົ່ງຜົນຕໍ່ຊື່ສຽງຂອງພະອົງ. ພະເຢໂຫວາໄດ້ສັນຍາໄວ້ໃນຄຳພີໄບເບິນວ່າພະອົງຈະເບິ່ງແຍງຜູ້ຮັບໃຊ້ທີ່ສັດຊື່ຂອງພະອົງ ແລະພະອົງຮູ້ສຶກວ່າຈຳເປັນຕ້ອງເຮັດໃຫ້ຄຳສັນຍານັ້ນສຳເລັດເປັນຈິງ. (ເພງ. 31:1-3) ນອກຈາກນັ້ນ ພະເຢໂຫວາຍັງຮູ້ວ່າເຮົາຈະໂສກເສົ້າແລະຜິດຫວັງຖ້າພະອົງບໍ່ໄດ້ເບິ່ງແຍງຄົນໃນຄອບຄົວຂອງພະອົງ. ພະອົງສັນຍາວ່າຈະໃຫ້ເຮົາມີສິ່ງຈຳເປັນເພື່ອລ້ຽງຊີວິດແລະສິ່ງຈຳເປັນເພື່ອຈະສາມາດຮັບໃຊ້ພະອົງຢ່າງສັດຊື່ຕໍ່ໆໄປ ແລະບໍ່ ມີສິ່ງໃດທີ່ຈະຂັດຂວາງພະອົງບໍ່ໃຫ້ເຮັດຕາມທີ່ສັນຍາໄວ້ໃຫ້ສຳເລັດ!—ມທ. 6:30-33; 24:45
15. (ກ) ຄລິດສະຕຽນໃນສະຕະວັດທຳອິດປະສົບກັບບັນຫາຫຍັງ? (ຂ) ຄຳເພງ 37:18, 19 ຊ່ວຍເຮົາໃຫ້ໝັ້ນໃຈຫຍັງ?
15 ເມື່ອເຮົາຈື່ວ່າເປັນຫຍັງພະເຢໂຫວາຈຶ່ງເຮັດຕາມຄຳສັນຍາ ເຮົາກໍຈະໝັ້ນໃຈວ່າພະອົງຈະຊ່ວຍເຮົາເມື່ອເຮົາປະສົບກັບບັນຫາທາງການເງິນ. ຂໍໃຫ້ເຮົາມາເບິ່ງຕົວຢ່າງຂອງຄລິດສະຕຽນໃນສະຕະວັດທຳອິດ. ເມື່ອປະຊາຄົມໃນເມືອງເຢຣູຊາເລັມຖືກຂົ່ມເຫງຢ່າງຮຸນແຮງ “ລູກສິດທຸກຄົນຍົກເວັ້ນພວກອັກຄະສາວົກກໍກະຈັດກະຈາຍໄປ.” (ກຈກ. 8:1) ລອງນຶກພາບເບິ່ງວ່າຕອນນັ້ນຈະເປັນແນວໃດ ພວກເຂົາຕ້ອງມີບັນຫາທາງການເງິນແນ່ນອນ! ພວກເຂົາຄົງຕ້ອງສູນເສຍເຮືອນແລະທຸລະກິດ. ແຕ່ພະເຢໂຫວາບໍ່ໄດ້ປະຖິ້ມພວກເຂົາແລະພວກເຂົາກໍຍັງມີຄວາມສຸກສະເໝີ. (ກຈກ. 8:4; ຮຣ. 13:5, 6; ຢກບ. 1:2, 3) ຖ້າພະເຢໂຫວາຊ່ວຍຄລິດສະຕຽນທີ່ສັດຊື່ເຫຼົ່ານັ້ນ ພະອົງກໍຈະຊ່ວຍພວກເຮົາໃນທຸກມື້ນີ້ຄືກັນ.—ອ່ານຄຳເພງ 37:18, 19
ເມື່ອເຮົາອາຍຸຫຼາຍຂຶ້ນ
ເຖິງວ່າຈະອາຍຸຫຼາຍແລ້ວ ການສົນໃຈສິ່ງທີ່ເຮົາເຮັດໄດ້ຈະຊ່ວຍເຮົາໃຫ້ໝັ້ນໃຈວ່າພະເຢໂຫວາເຫັນຄ່າເຮົາແລະສິ່ງທີ່ເຮົາເຮັດໄດ້ເພື່ອຮັບໃຊ້ພະອົງ (ເບິ່ງຂໍ້ 16-18)
16. ໃນສະພາບການໃດອາດເຮັດໃຫ້ເຈົ້າຄິດວ່າພະເຢໂຫວາບໍ່ເຫັນຄ່າການນະມັດສະການຂອງເຈົ້າ?
16 ເມື່ອເຮົາອາຍຸຫຼາຍຂຶ້ນ ເຮົາອາດເລີ່ມຮູ້ສຶກວ່າເຮົາໃຫ້ພະເຢໂຫວາໄດ້ໜ້ອຍລົງ. ກະສັດດາວິດອາດຮູ້ສຶກອຸກໃຈແບບນີ້ຄືກັນເມື່ອລາວເຖົ້າລົງ. (ເພງ. 71:9) ພະເຢໂຫວາສາມາດຊ່ວຍເຮົາແນວໃດ?
17. ເຮົາໄດ້ຮຽນຮູ້ຫຍັງຈາກປະສົບການຂອງພີ່ນ້ອງເຈຣີ?
17 ຂໍໃຫ້ພິຈາລະນາປະສົບການຂອງພີ່ນ້ອງຍິງຄົນໜຶ່ງຊື່ເຈຣີ. ລາວຖືກເຊີນໃຫ້ເຂົ້າຮ່ວມການຝຶກອົບຮົມບຳລຸງຮັກສາຫໍປະຊຸມຢູ່ຫໍປະຊຸມລາຊະອານາຈັກ ແຕ່ລາວບໍ່ຢາກໄປ. ລາວເວົ້າວ່າ: “ຂ້ອຍອາຍຸເກີນແລ້ວ ເປັນແມ່ໝ້າຍ ແລະກໍບໍ່ມີຄວາມສາມາດຫຍັງເລີຍທີ່ພະເຢໂຫວາຈະໃຊ້ໄດ້. ຂ້ອຍບໍ່ມີປະໂຫຍດແລ້ວ.” ໃນ
ຄືນກ່ອນມື້ທີ່ຈະຝຶກອົບຮົມ ລາວໄດ້ອະທິດຖານລະບາຍຄວາມຮູ້ສຶກກັບພະເຢໂຫວາ. ຕອນທີ່ລາວມາຮອດຫໍປະຊຸມໃນມື້ຕໍ່ມາ ລາວກໍຍັງສົງໄສວ່າລາວຄວນມາບ່ອນນີ້ແທ້ໆບໍ. ໃນລະຫວ່າງການຝຶກອົບຮົມນັ້ນ ຜູ້ບັນລະຍາຍຄົນໜຶ່ງເນັ້ນວ່າທັກສະທີ່ສຳຄັນທີ່ສຸດຄືການເຕັມໃຈຮັບເອົາການຝຶກຝົນຈາກພະເຢໂຫວາ. ເຈຣີບອກວ່າ: “ຂ້ອຍຄິດວ່າ ‘ຂ້ອຍມີທັກສະນີ້!’ ຂ້ອຍເລີ່ມຮ້ອງໄຫ້ເມື່ອຮູ້ວ່າພະເຢໂຫວາຕອບຄຳອະທິດຖານຂອງຂ້ອຍ. ພະອົງເຮັດໃຫ້ຂ້ອຍໝັ້ນໃຈວ່າຂ້ອຍຍັງມີປະໂຫຍດຕໍ່ວຽກຂອງພະອົງ ແລະພະອົງກໍຈະສອນຂ້ອຍໃຫ້ເຮັດວຽກນັ້ນໄດ້!” ເມື່ອຄິດຄືນຫຼັງ ເຈຣີບອກວ່າ: “ຕອນນັ້ນຂ້ອຍຮູ້ສຶກອຸກໃຈ ທໍ້ໃຈ ແລະບໍ່ມີຄ່າ ແຕ່ຕອນນີ້ຂ້ອຍຮູ້ສຶກໝັ້ນໃຈ ມີກຳລັງໃຈ ແລະມີຄ່າຫຼາຍຂຶ້ນ!”18. ຄຳພີໄບເບິນສະແດງໃຫ້ເຫັນແນວໃດວ່າພະເຢໂຫວາເຫັນຄ່າການນະມັດສະການຂອງເຮົາເຖິງວ່າເຮົາອາຍຸຫຼາຍຂຶ້ນ?
18 ເຖິງວ່າເຮົາຈະອາຍຸຫຼາຍຂຶ້ນ ເຮົາກໍສາມາດໝັ້ນໃຈໄດ້ວ່າພະເຢໂຫວາຍັງຈະໃຊ້ເຮົາຢູ່. (ເພງ. 92:12-15) ພະເຢຊູສອນວ່າ ເຖິງແມ່ນສິ່ງທີ່ເຮົາເຮັດອາດເບິ່ງຄືວ່າບໍ່ສຳຄັນສຳລັບເຮົາ ແຕ່ພະເຢໂຫວາກໍເຫັນຄ່າທຸກສິ່ງທີ່ເຮົາສາມາດເຮັດໄດ້ໃນວຽກຮັບໃຊ້ພະອົງ. (ລກ. 21:2-4) ດັ່ງນັ້ນ ໃຫ້ເບິ່ງໄປທີ່ສິ່ງທີ່ເຈົ້າສາມາດເຮັດໄດ້. ຕົວຢ່າງ: ເຈົ້າສາມາດລົມເລື່ອງພະເຢໂຫວາໃຫ້ຄົນອື່ນຟັງ ອະທິດຖານເພື່ອພີ່ນ້ອງ ແລະຊ່ວຍພວກເຂົາໃຫ້ຮັກສາຄວາມສັດຊື່. ພະເຢໂຫວາຖືວ່າເຈົ້າເປັນເພື່ອນຮ່ວມງານຂອງພະອົງບໍ່ແມ່ນຍ້ອນເຈົ້າເຮັດວຽກໄດ້ສຳເລັດ ແຕ່ຍ້ອນເຈົ້າເຕັມໃຈເຊື່ອຟັງພະອົງ.—1 ກຣ. 3:5-9
19. ໂຣມ 8:38, 39 ຊ່ວຍເຮົາໃຫ້ໝັ້ນໃຈຫຍັງ?
19 ຈັ່ງແມ່ນເປັນສິດທິພິເສດຫຼາຍແທ້ໆທີ່ເຮົາໄດ້ນະມັດສະການພະເຢໂຫວາພະເຈົ້າທີ່ເຫັນຄ່າຜູ້ຮັບໃຊ້ຂອງພະອົງ! ພະເຢໂຫວາສ້າງເຮົາໃຫ້ສາມາດເຮັດຕາມຄວາມຕ້ອງການຂອງພະອົງ ດັ່ງນັ້ນຈຶ່ງບໍ່ແປກທີ່ເຮົາມີຊີວິດທີ່ອີ່ມໃຈພໍໃຈຫຼາຍຂຶ້ນເມື່ອໄດ້ນະມັດສະການພະອົງ. (ພນມ. 4:11) ເຖິງໂລກນີ້ຈະເບິ່ງວ່າເຮົາບໍ່ມີຄ່າ ແຕ່ພະເຢໂຫວາບໍ່ໄດ້ເບິ່ງເຮົາແບບນັ້ນ. (ຮຣ. 11:16, 38) ເມື່ອເຮົາຮູ້ສຶກທໍ້ໃຈຍ້ອນຄວາມເຈັບປ່ວຍ ບັນຫາທາງການເງິນ ຫຼືອາຍຸຫຼາຍຂຶ້ນ ຂໍໃຫ້ເຮົາຈື່ໄວ້ວ່າບໍ່ມີສິ່ງໃດທີ່ຈະຂັດຂວາງເຮົາຈາກຄວາມຮັກຂອງພໍ່ທີ່ຢູ່ໃນສະຫວັນໄດ້.—ອ່ານໂຣມ 8:38, 39
^ ຂໍ້ 5 ເຈົ້າເຄີຍເຈິສະພາບການທີ່ເຮັດໃຫ້ຮູ້ສຶກວ່າຕົວເອງບໍ່ມີຄ່າບໍ? ບົດຄວາມນີ້ຈະຊ່ວຍເຈົ້າໃຫ້ຮູ້ວ່າພະເຢໂຫວາເຫັນຄ່າເຈົ້າຫຼາຍແທ້ໆ ແລະຍັງຈະພິຈາລະນາວ່າເຈົ້າຈະສາມາດຮູ້ສຶກດີກັບຕົວເອງຕໍ່ໆໄປໄດ້ແນວໃດບໍ່ວ່າຈະມີຫຍັງເກີດຂຶ້ນໃນຊີວິດກໍຕາມ.
ເພງ 30 ພະອົງເປັນພະເຈົ້າ ເປັນພໍ່ ແລະເພື່ອນຂອງຂ້ອຍ