ບົດຄວາມສຶກສາທີ 2
ເຈົ້າສາມາດໃຫ້ກຳລັງໃຈຄົນອື່ນໄດ້
“ພວກເຂົາເທົ່ານັ້ນທີ່ເປັນເພື່ອນຮ່ວມງານກັບຂ້ອຍເພື່ອການປົກຄອງຂອງພະເຈົ້າ ພວກເຂົານີ້ແຫຼະທີ່ໃຫ້ກຳລັງໃຈຂ້ອຍຫຼາຍ.”—ກລຊ. 4:11
ເພງ 90 ໃຫ້ກຳລັງໃຈກັນແລະກັນ
ໃຈຄວາມສຳຄັນ *
1. ຜູ້ຮັບໃຊ້ຂອງພະເຢໂຫວາກຳລັງປະສົບກັບສະພາບການແບບໃດແດ່ທີ່ເຮັດໃຫ້ທໍ້ໃຈ?
ທົ່ວໂລກຜູ້ຮັບໃຊ້ພະເຢໂຫວາຫຼາຍຄົນກຳລັງປະສົບກັບສະພາບການທີ່ເຮັດໃຫ້ພວກເຂົາອຸກໃຈແລະທໍ້ໃຈ. ເຈົ້າເຫັນພີ່ນ້ອງໃນປະຊາຄົມຂອງເຈົ້າເປັນແບບນີ້ບໍ? ພີ່ນ້ອງບາງຄົນເປັນພະຍາດຮ້າຍແຮງ ຫຼືໂສກເສົ້າເສຍໃຈຍ້ອນຄົນທີ່ຮັກຕາຍຈາກໄປ. ສ່ວນບາງຄົນກໍກຳລັງເສຍໃຈຍ້ອນຄົນໃນຄອບຄົວຫຼືໝູ່ສະໜິດອອກຈາກຄວາມຈິງ. ນອກຈາກນັ້ນ ບາງຄົນກໍໄດ້ຮັບຄວາມເສຍຫາຍໜັກຈາກໄພທຳມະຊາດ. ພີ່ນ້ອງທັງໝົດເຫຼົ່ານີ້ຈຳເປັນຕ້ອງໄດ້ຮັບກຳລັງໃຈ. ແລ້ວເຮົາຈະຊ່ວຍພວກເຂົາໄດ້ແນວໃດ?
2. ເປັນຫຍັງບາງເທື່ອອັກຄະສາວົກໂປໂລຕ້ອງການກຳລັງໃຈ?
2 ອັກຄະສາວົກໂປໂລປະສົບກັບເຫດການທີ່ເກືອບຕາຍຫຼາຍເທື່ອ. (2 ກຣ. 11:23-28) ລາວຍັງຕ້ອງອົດທົນກັບ “ໜາມຢູ່ໃນຮ່າງກາຍ” ເຊິ່ງອາດຈະເປັນບັນຫາສຸຂະພາບ. (2 ກຣ. 12:7) ແລະລາວຍັງຮູ້ສຶກຜິດຫວັງທີ່ເດມາເຊິ່ງເຄີຍເຮັດວຽກຮັບໃຊ້ນຳລາວໄດ້ຖິ້ມລາວ “ເພາະຮັກໂລກນີ້.” (2 ຕມ. 4:10) ເຖິງວ່າໂປໂລຈະເປັນຄລິດສະຕຽນຜູ້ຖືກເຈີມທີ່ຊ່ວຍເຫຼືອຄົນອື່ນຢ່າງໃຈກວ້າງ ແຕ່ບາງເທື່ອລາວເອງກໍຍັງຮູ້ສຶກທໍ້ໃຈ.—ຣມ. 9:1, 2
3. ໂປໂລໄດ້ຮັບກຳລັງໃຈແລະຄວາມຊ່ວຍເຫຼືອຈາກໃຜແດ່?
3 ໂປໂລໄດ້ຮັບກຳລັງໃຈແລະຄວາມຊ່ວຍເຫຼືອທີ່ຈຳເປັນແນວໃດ? ພະເຢໂຫວາໃຊ້ພະລັງບໍລິສຸດເພື່ອໃຫ້ກຳລັງໃຈລາວ. (2 ກຣ. 4:7; ຟລປ. 4:13) ພະເຢໂຫວາຍັງໃຫ້ກຳລັງໃຈລາວຜ່ານທາງເພື່ອນຄລິດສະຕຽນ. ໂປໂລບອກວ່າ: ເພື່ອນຮ່ວມງານບາງຄົນໄດ້ “ໃຫ້ກຳລັງໃຈ” ລາວຫຼາຍ. (ກລຊ. 4:11) ບັນດາພີ່ນ້ອງເຫຼົ່ານັ້ນທີ່ໂປໂລເວົ້າເຖິງຄື ອາຣິດຕາໂຂ ຕີຂີໂກ ແລະມາຣະໂກ. ພວກເຂົາໃຫ້ກຳລັງໃຈໂປໂລຫຼາຍ ແລະຊ່ວຍລາວໃຫ້ອົດທົນ. ມີຄຸນລັກສະນະຫຍັງແດ່ທີ່ຊ່ວຍໃຫ້ພີ່ນ້ອງຄລິດສະຕຽນ 3 ຄົນນີ້ເປັນຄົນທີ່ໃຫ້ກຳລັງໃຈໄດ້ດີ? ແລະເຮົາຈະເຮັດຕາມຕົວຢ່າງຂອງພວກເຂົາໂດຍພະຍາຍາມໃຫ້ກຳລັງໃຈແລະຊ່ວຍເຫຼືອຄົນອື່ນໄດ້ແນວໃດ?
ພັກດີຄືກັບອາຣິດຕາໂຂ
ເຮົາສາມາດເປັນໝູ່ທີ່ພັກດີຄືອາຣິດຕາໂຂໄດ້ໂດຍຢູ່ກັບພີ່ນ້ອງຂອງເຮົາທັງໃນເວລາທີ່ມີຄວາມສຸກແລະໃນ “ເວລາທີ່ຂັດສົນຫຼາຍ” (ເບິ່ງຂໍ້ 4-5) *
4. ອາຣິດຕາໂຂພິສູດໃຫ້ເຫັນແນວໃດວ່າເປັນໝູ່ທີ່ພັກດີຂອງໂປໂລ?
4 ອາຣິດຕາໂຂເປັນຄລິດສະຕຽນຊາວມາເກໂດເນຍເຊິ່ງມາຈາກເມືອງເທຊະໂລນິກພິສູດວ່າລາວເປັນໝູ່ທີ່ພັກດີຂອງໂປໂລ. ຄັ້ງທຳອິດທີ່ຄຳພີໄບເບິນເວົ້າເຖິງອາຣິດຕາໂຂແມ່ນຕອນທີ່ໂປໂລມາຢາມເມືອງເອເຟໂຊໃນການເດີນທາງໄປປະກາດຢູ່ຕ່າງປະເທດຮອບທີ 3. ໃນຂະນະທີ່ອາຣິດຕາໂຂເດີນທາງໄປກັບໂປໂລ ພວກເຂົາກໍຖືກຜູ້ຕໍ່ຕ້ານຈັບ. (ກຈກ. 19:29) ເມື່ອອາຣິດຕາໂຂຖືກປ່ອຍໂຕ ລາວບໍ່ໄດ້ໜີເອົາຕົວລອດ ແຕ່ລາວຍັງພັກດີຕໍ່ໂປໂລ. ຫຼາຍເດືອນຕໍ່ມາຕອນທີ່ຢູ່ປະເທດກຣີກ ອາຣິດຕາໂຂກໍຍັງຢູ່ຄຽງຂ້າງໂປໂລເຖິງແມ່ນວ່າຜູ້ຕໍ່ຕ້ານຍັງຈະພະຍາຍາມຂ້າໂປໂລຢູ່. (ກຈກ. 20:2-4) ໃນປະມານປີ ຄ.ສ 58 ຕອນທີ່ໂປໂລເປັນນັກໂທດແລະຖືກສົ່ງໄປເມືອງໂຣມ ອາຣິດຕາໂຂກໍຮ່ວມເດີນທາງໄລຍະໄກນີ້ນຳ ແລະພວກເຂົາກໍປະສົບກັບເຮືອແຕກນຳກັນ. (ກຈກ. 27:1, 2, 41) ເບິ່ງຄືວ່າຫຼັງຈາກພວກເຂົາມາຮອດເມືອງໂຣມ ອາຣິດຕາໂຂກໍຢູ່ຄຸກກັບໂປໂລໄລຍະໜຶ່ງ. (ກລຊ. 4:10) ເຮົາໝັ້ນໃຈໄດ້ວ່າໂປໂລຄົງຕ້ອງຮູ້ສຶກໄດ້ຮັບກຳລັງໃຈຈາກໝູ່ທີ່ພັກດີຄົນນີ້ຫຼາຍແທ້ໆ!
5. ຕາມສຸພາສິດ 17:17 ເຮົາຈະເປັນໝູ່ທີ່ພັກດີໄດ້ແນວໃດ?
5 ຄືກັບອາຣິດຕາໂຂ ເຮົາສາມາດເປັນໝູ່ທີ່ພັກດີໄດ້ໂດຍຢູ່ກັບພີ່ນ້ອງຂອງເຮົາທັງໃນເວລາທີ່ມີຄວາມສຸກແລະໃນ “ເວລາທີ່ຂັດສົນຫຼາຍ.” (ອ່ານສຸພາສິດ 17:17) ເຖິງວ່າບັນຫາຈະຜ່ານພົ້ນໄປແລ້ວ ແຕ່ພີ່ນ້ອງກໍອາດຍັງຕ້ອງການກຳລັງໃຈອີກ. ພີ່ນ້ອງຍິງທີ່ຊື່ຟຣານຊິດ *ເຊິ່ງພໍ່ແມ່ຂອງລາວຕາຍຈາກໄປຍ້ອນເປັນໂລກມະເຮັງ ພໍ່ຕາຍກ່ອນແມ່ສາມເດືອນ. ລາວບອກວ່າ: “ຂ້ອຍຄິດວ່າສະພາບການທີ່ເຮັດໃຫ້ທໍ້ໃຈນີ້ບໍ່ໄດ້ຜ່ານພົ້ນໄປງ່າຍໆ ແລະຂ້ອຍດີໃຈຫຼາຍທີ່ໝູ່ຈື່ວ່າຂ້ອຍຍັງຮູ້ສຶກເສຍໃຈຢູ່ເຖິງວ່າພໍ່ແມ່ໄດ້ຕາຍຈາກຂ້ອຍໄປຫຼາຍປີແລ້ວ.”
6. ຖ້າເຮົາເປັນໝູ່ທີ່ພັກດີ ເຮົາຈະເຮັດຫຍັງ?
6 ໝູ່ທີ່ພັກດີມັກເສຍສະລະຕົວເອງເພື່ອຊ່ວຍເຫຼືອພີ່ນ້ອງຄລິດສະຕຽນ. ຕົວຢ່າງ: ມີການບົ່ງມະຕິວ່າ ພີ່ນ້ອງປີເຕີເປັນພະຍາດທີ່ຮ້າຍແຮງແລະຈະຢູ່ໄດ້ອີກບໍ່ດົນ. ເມຍຂອງລາວຊື່ແຄັດເທີຣີນບອກວ່າ: “ພີ່ນ້ອງຜົວເມຍຄູ່ໜຶ່ງໃນປະຊາຄົມພາພວກເຮົາໄປໂຮງໝໍ ເຊິ່ງພວກເຮົາກໍໄດ້ຮູ້ວ່າປີເຕີເປັນພະຍາດທີ່ຮ້າຍແຮງ. ຕັ້ງແຕ່ຕອນນັ້ນ ພວກເຂົາກໍຕັດສິນໃຈທີ່ຈະບໍ່ປະໃຫ້ພວກເຮົາໄປຫາໝໍດ້ວຍຄວາມໂສກເສົ້າຕາມລຳພັງ ແລະພວກເຂົາກໍຢູ່ຄຽງຂ້າງພວກເຮົາໃນຍາມທີ່ພວກເຮົາຕ້ອງການສະເໝີ.” ເລື່ອງນີ້ເຮັດໃຫ້ເຮົາໄດ້ຮັບກຳລັງໃຈຫຼາຍແທ້ໆທີ່ເຫັນວ່າໝູ່ແທ້ສາມາດຊ່ວຍເຮົາໃຫ້ອົດທົນກັບສະພາບການທີ່ຍາກລຳບາກແບບນີ້!
ເປັນຄົນທີ່ໄວ້ໃຈໄດ້ຄືກັບຕີຂີໂກ
ເມື່ອຄົນອື່ນປະສົບບັນຫາ ເຮົາສາມາດເປັນໝູ່ທີ່ໄວ້ໃຈໄດ້ຄືກັບຕີຂີໂກ (ເບິ່ງຂໍ້ 7-9) *
7-8. ຕາມໂກໂລຊາຍ 4:7-9 ຕີຂີໂກພິສູດແນວໃດວ່າເປັນໝູ່ທີ່ໄວ້ໃຈໄດ້?
7 ຕີຂີໂກເປັນຄລິດສະຕຽນທີ່ມາຈາກແຂວງອາຊີໃນເຂດປົກຄອງຂອງຈັກກະພັດໂຣມ ລາວເປັນຕົວຢ່າງທີ່ດີໃນເລື່ອງການເປັນຄົນທີ່ໄວ້ໃຈໄດ້. (ກຈກ. 20:4) ປະມານປີ ຄ.ສ 55 ຕອນທີ່ໂປໂລລວບລວມເງິນເພື່ອຊ່ວຍເຫຼືອພີ່ນ້ອງຄລິດສະຕຽນໃນຢູດາ ລາວອາດໃຫ້ຕີຂີໂກຊ່ວຍເຮັດວຽກທີ່ສຳຄັນນີ້. (2 ກຣ. 8:18-20) ຕໍ່ມາເມື່ອໂປໂລຖືກກັກບໍລິເວນຢູ່ໃນເມືອງໂຣມເທື່ອທຳອິດ ຕີຂີໂກກໍໄດ້ຮັບໃຊ້ເປັນຜູ້ສົ່ງຂ່າວສ່ວນຕົວຂອງໂປໂລ. ລາວໄດ້ສົ່ງຈົດໝາຍແລະຂ່າວສານທີ່ໃຫ້ກຳລັງໃຈຂອງໂປໂລໄປໃຫ້ພີ່ນ້ອງທີ່ຢູ່ປະຊາຄົມແຂວງອາຊີ.—ກລຊ. 4:7-9
8 ຕີຂີໂກຍັງເປັນໝູ່ທີ່ໂປໂລໄວ້ໃຈໄດ້. (ຕຕ. 3:12) ບໍ່ແມ່ນຄລິດສະຕຽນທຸກຄົນໃນສະໄໝນັ້ນຈະເປັນຄົນທີ່ໄວ້ໃຈໄດ້ຄືກັບຕີຂີໂກ. ປະມານປີ ຄ.ສ 65 ໃນໄລຍະທີ່ໂປໂລຖືກກັກບໍລິເວນເທື່ອທີສອງ ໂປໂລຂຽນວ່າຄລິດສະຕຽນຫຼາຍຄົນໃນແຂວງອາຊີບໍ່ຢາກຄົບຫາກັບລາວອາດເປັນໄປໄດ້ວ່າພວກເຂົາຢ້ານພວກຜູ້ຕໍ່ຕ້ານ. (2 ຕມ. 1:15) ແຕ່ໂປໂລໄວ້ໃຈຕີຂີໂກແລະຍັງໃຫ້ລາວເຮັດວຽກມອບໝາຍອື່ນອີກ. (2 ຕມ. 4:12) ແນ່ນອນວ່າ ໂປໂລຄົງເຫັນຄຸນຄ່າໝູ່ທີ່ດີແບບຕີຂີໂກແທ້ໆ.
9. ເຮົາຈະຮຽນແບບຕີຂີໂກແນວໃດ?
9 ເຮົາສາມາດຮຽນແບບຕີຂີໂກໂດຍເປັນໝູ່ທີ່ໄວ້ໃຈໄດ້. ຕົວຢ່າງ: ເຮົາບໍ່ພຽງແຕ່ຮັບປາກວ່າຈະຊ່ວຍພີ່ນ້ອງ ແຕ່ເຮົາຕ້ອງລົງມືເຮັດພ້ອມ. (ມທ. 5:37; ລກ. 16:10) ເມື່ອຄົນທີ່ຕ້ອງການຄວາມຊ່ວຍເຫຼືອຮູ້ວ່າເຮົາຈະຊ່ວຍພວກເຂົາໄດ້ ພວກເຂົາກໍຮູ້ສຶກອຸ່ນໃຈຫຼາຍແທ້ໆ. ພີ່ນ້ອງຍິງຄົນໜຶ່ງບອກວ່າ: “ເຈົ້າຈະບໍ່ຮູ້ສຶກກັງວົນເລີຍ ເພາະເຈົ້າຮູ້ວ່າຄົນນັ້ນຈະມາຊ່ວຍເຈົ້າຕາມທີ່ໄດ້ຮັບປາກໄວ້.”
10. ຕາມສຸພາສິດ 18:24 ຄົນທີ່ປະສົບກັບບັນຫາຫຼືຮູ້ສຶກຜິດຫວັງຈະໄດ້ຮັບກຳລັງໃຈຈາກໃຜ?
10 ສ່ວນຫຼາຍຜູ້ທີ່ປະສົບບັນຫາຫຼືຮູ້ສຶກຜິດຫວັງມັກໄດ້ຮັບກຳລັງໃຈຈາກການລະບາຍກັບໝູ່ທີ່ໄວ້ໃຈໄດ້. (ອ່ານສຸພາສິດ 18:24) ພີ່ນ້ອງບີຈາຮູ້ສຶກຜິດຫວັງຍ້ອນລູກຊາຍຖືກຕັດສຳພັນ ລາວບອກວ່າ: “ຂ້ອຍຢາກລະບາຍຄວາມຮູ້ສຶກກັບຄົນທີ່ຂ້ອຍໄວ້ໃຈໄດ້.” ພີ່ນ້ອງຄາລອດສ໌ໄດ້ສູນເສຍສິດທິພິເສດໃນປະຊາຄົມຍ້ອນເຮັດຜິດ ລາວບອກວ່າ: “ຂ້ອຍຢາກລົມກັບຄົນທີ່ຂ້ອຍສາມາດບອກຄວາມຮູ້ສຶກໄດ້ທັງໝົດໂດຍທີ່ບໍ່ຕ້ອງຢ້ານວ່າລາວຈະຕຳໜິຂ້ອຍ.” ຄາລອດສ໌ໄດ້ໝູ່ແບບນັ້ນເຊິ່ງກໍຄືພວກຜູ້ດູແລ ພວກເຂົາຊ່ວຍລາວໃຫ້ເອົາຊະນະບັນຫາໄດ້. ລາວຮູ້ສຶກສະບາຍໃຈແທ້ໆທີ່ຜູ້ດູແລບໍ່ໄດ້ເລົ່າເລື່ອງຂອງລາວໃຫ້ໃຜຟັງ.
11. ເຮົາຕ້ອງເຮັດຫຍັງເພື່ອຈະເປັນໝູ່ທີ່ໄວ້ໃຈໄດ້?
11 ເພື່ອຈະເປັນໝູ່ທີ່ໄວ້ໃຈໄດ້ ເຮົາຕ້ອງມີຄວາມອົດທົນ. ຫຼັງຈາກພີ່ນ້ອງຈານນາຖືກຜົວປະຖິ້ມ ລາວໄດ້ລະບາຍຄວາມຮູ້ສຶກກັບໝູ່ສະໜິດ ແລ້ວລາວກໍຮູ້ສຶກດີຂຶ້ນຫຼາຍ. ລາວບອກວ່າ: “ພວກເຂົາໄດ້ຟັງຂ້ອຍລະບາຍຢ່າງອົດທົນ ເຖິງວ່າຂ້ອຍອາດຈະເວົ້າແນວເກົ່າຫຼາຍເທື່ອ.” ເຈົ້າຈະເປັນໝູ່ທີ່ດີໄດ້ຄືກັນຖ້າຫາກວ່າເຈົ້າເປັນຜູ້ຟັງທີ່ດີ.
ເຕັມໃຈຮັບໃຊ້ຄົນອື່ນຄືກັບມາຣະໂກ
ການເຕັມໃຈຊ່ວຍເຫຼືອຂອງມາຣະໂກຊ່ວຍໂປໂລໃຫ້ອົດທົນໄດ້. ເຮົາກໍສາມາດຊ່ວຍພີ່ນ້ອງໃຫ້ຜ່ານໄລຍະທີ່ຍາກລຳບາກໄດ້ຄືກັນ. (ເບິ່ງຂໍ້ 12-14) *
12. ມາຣະໂກແມ່ນໃຜ ແລະລາວເຕັມໃຈຮັບໃຊ້ຄົນອື່ນແນວໃດ?
12 ມາຣະໂກເປັນຄລິດສະຕຽນຄົນຢິວທີ່ມາຈາກເມືອງເຢຣູຊາເລັມ. ລາວເປັນລູກອ້າຍລູກນ້ອງກັບບາຣະນາບາເຊິ່ງເປັນມິດຊັນນາຣີທີ່ຫຼາຍຄົນຮູ້ຈັກດີ. (ກລຊ. 4:10) ເບິ່ງຄືວ່າຄອບຄົວຂອງມາຣະໂກຮັ່ງມີ ແຕ່ລາວກໍບໍ່ໄດ້ໃຫ້ເງິນແລະຊັບສົມບັດມາເປັນສິ່ງສຳຄັນທີ່ສຸດໃນຊີວິດ. ຕະຫຼອດຊີວິດ ມາຣະໂກສະແດງໃຫ້ເຫັນວ່າລາວມີນ້ຳໃຈຮັບໃຊ້ຄົນອື່ນ ເຊິ່ງເຮັດໃຫ້ລາວມີຄວາມສຸກຫຼາຍ. ຕົວຢ່າງ: ມີຫຼາຍເທື່ອທີ່ລາວໄດ້ຮັບໃຊ້ອັກຄະສາວົກໂປໂລແລະເປໂຕຕອນທີ່ພວກເຂົາເຮັດວຽກມອບໝາຍ. ລາວອາດຈະຊ່ວຍຊື້ອາຫານ ຈັດຫາບ່ອນພັກແລະຊ່ວຍໃນເລື່ອງອື່ນໆ. (ກຈກ. 13:2-5; 1 ປຕ. 5:13) ໂປໂລບອກວ່າ ມາຣະໂກເປັນ “ເພື່ອນຮ່ວມງານກັບຂ້ອຍເພື່ອການປົກຄອງຂອງພະເຈົ້າ” ແລະເປັນຜູ້ທີ່ “ໃຫ້ກຳລັງໃຈຂ້ອຍຫຼາຍ.”—ກລຊ. 4:10, 11
13. ໃນ 2 ຕີໂມທຽວ 4:11 ສະແດງໃຫ້ເຫັນແນວໃດວ່າໂປໂລເຫັນຄ່າການຮັບໃຊ້ທີ່ສັດຊື່ຂອງມາຣະໂກ?
13 ມາຣະໂກກາຍມາເປັນໝູ່ສະໜິດຂອງໂປໂລ. ຕົວຢ່າງ: ຕອນທີ່ໂປໂລຖືກກັກຂັງຄັ້ງສຸດທ້າຍຢູ່ໃນເມືອງໂຣມປະມານປີ ຄ.ສ 65 ລາວໄດ້ຂຽນຈົດໝາຍສະບັບທີ 2 ເຖິງຕີໂມທຽວ. ໃນຈົດໝາຍນັ້ນ ໂປໂລໄດ້ຂໍໃຫ້ຕີໂມທຽວມາເມືອງໂຣມແລະພາມາຣະໂກມານຳ. (2 ຕມ. 4:11) ໂປໂລຄົງຕ້ອງເຫັນຄຸນຄ່າມາຣະໂກແທ້ໆທີ່ເຮັດວຽກຮັບໃຊ້ຢ່າງສັດຊື່ ດັ່ງນັ້ນ ໂປໂລຈຶ່ງຂໍໃຫ້ມາຣະໂກຢູ່ນຳລາວໃນເວລາທີ່ສຳຄັນນີ້. ມາຣະໂກລົງມືເຮັດສິ່ງທີ່ຊ່ວຍໂປໂລໄດ້ແທ້ໆ ເຊັ່ນ: ລາວອາດຈັດຫາອາຫານ ຫຼືມ້ວນໜັງສືແລະນ້ຳມຶກໃຫ້ໂປໂລ. ການຊ່ວຍເຫຼືອແລະກຳລັງໃຈທີ່ໂປໂລໄດ້ຮັບຄົງຈະຊ່ວຍລາວໃຫ້ອົດທົນຈົນຮອດມື້ສຸດທ້າຍທີ່ຖືກປະຫານຊີວິດ.
14-15. ມັດທາຍ 7:12 ຊ່ວຍເຮົາແນວໃດໃຫ້ຮູ້ວິທີທີ່ຈະຊ່ວຍເຫຼືອຄົນອື່ນ?
14 ອ່ານມັດທາຍ 7:12. ໃນໄລຍະທີ່ເຮົາປະສົບກັບຄວາມທຸກແລະບັນຫາ ເຮົາຮູ້ສຶກເຫັນຄຸນຄ່າຄົນທີ່ມາຊ່ວຍເຫຼືອເຮົາແທ້ໆ! ໄຣອັນເຊິ່ງພໍ່ຂອງລາວໄດ້ຕາຍຍ້ອນອຸບັດຕິເຫດບອກວ່າ: “ຕອນທີ່ທຸກໃຈ ແມ່ນແຕ່ເລື່ອງທຳມະດາທີ່ເຮັດຢູ່ທຸກມື້ກໍບໍ່ມີແຮງທີ່ຈະເຮັດ. ດັ່ງນັ້ນ ເມື່ອມີຄົນມາຊ່ວຍເຫຼືອເຮົາເຖິງວ່າຈະເປັນສິ່ງເລັກໆນ້ອຍໆກໍເຮັດໃຫ້ມີກຳລັງໃຈຫຼາຍແທ້ໆ.”
15 ຖ້າເຮົາສັງເກດແລະໃສ່ໃຈຄົນອື່ນ ເຮົາອາດຮູ້ວິທີທີ່ຈະຊ່ວຍເຫຼືອພວກເຂົາໄດ້. ຕົວຢ່າງ: ຜົວເມຍຄູ່ໜຶ່ງທີ່ຕັດສິນໃຈຊ່ວຍປີເຕີແລະແຄັດເທີຣີນເຊິ່ງເວົ້າເຖິງກ່ອນໜ້ານີ້ ຜູ້ເປັນເມຍໄດ້ຄິດຫາວິທີໃຫ້ມີຄົນພາປີເຕີແລະແຄັດເທີຣີນໄປໂຮງໝໍຕາມນັດທຸກຄັ້ງ. ເນື່ອງຈາກປີເຕີກັບແຄັດເທີຣີນກໍຂັບລົດບໍ່ໄດ້ແລ້ວ ລາວຈຶ່ງເຮັດຕາຕະລາງເພື່ອໃຫ້ພີ່ນ້ອງໃນປະຊາຄົມອາສາສະໝັກຮັບສົ່ງພວກເຂົາ. ການເຮັດແບບນີ້ເກີດຜົນແນວໃດ? ພີ່ນ້ອງແຄັດເທີຣີນບອກວ່າ: “ພວກເຮົາຮູ້ສຶກຄືກັບວ່າຂອງໜັກຖືກຍົກອອກຈາກບ່າແລ້ວ.” ຂໍໃຫ້ຈື່ໄວ້ສະເໝີວ່າແມ່ນແຕ່ການເຮັດສິ່ງທີ່ເລັກໆນ້ອຍໆ ເຈົ້າກໍສາມາດໃຫ້ກຳລັງໃຈຄົນອື່ນໄດ້ຫຼາຍ.
16. ເຮົາໄດ້ບົດຮຽນທີ່ສຳຄັນຫຍັງຈາກຕົວຢ່າງຂອງມາຣະໂກກ່ຽວກັບການໃຫ້ກຳລັງໃຈ?
16 ມາຣະໂກເປັນລູກສິດໃນສະຕະວັດທຳອິດທີ່ເຮັດວຽກຮັບໃຊ້ຫຼາຍແທ້ໆ. ລາວໄດ້ເຮັດສິ່ງສຳຄັນຫຼາຍຢ່າງເພື່ອພະເຢໂຫວາ ລວມເຖິງການຂຽນປຶ້ມຂ່າວດີຫົວໜຶ່ງທີ່ໃຊ້ຊື່ຂອງລາວເອງ. ເຖິງຢ່າງນັ້ນມາຣະໂກກໍຍັງຈັດເວລາໄປໃຫ້ກຳລັງໃຈໂປໂລ ແລະໂປໂລຮູ້ສຶກສະດວກໃຈທີ່ຈະຂໍຄວາມຊ່ວຍເຫຼືອຈາກລາວ. ພີ່ນ້ອງແອງເຈລາທີ່ກຳລັງໂສກເສົ້າຍ້ອນແມ່ຕູ້ຂອງລາວຖືກຄາດຕະກຳໄດ້ເຫັນຄຸນຄ່າຄົນທີ່ມາໃຫ້ກຳລັງໃຈລາວ ລາວບອກວ່າ: “ໝູ່ທີ່ເຕັມໃຈຊ່ວຍແທ້ໆຈະເປັນຄົນທີ່ເຂົ້າຫາໄດ້ງ່າຍ ແລະພວກເຂົາບໍ່ໄດ້ຢ້ານຫຼືລັງເລທີ່ຈະຊ່ວຍ.” ແລ້ວເຮົາເດ ເຮົາມີຊື່ສຽງວ່າເປັນຄົນທີ່ມັກລົງມືຊ່ວຍເຫຼືອພີ່ນ້ອງຮ່ວມຄວາມເຊື່ອບໍ?
ພະຍາຍາມໃຫ້ກຳລັງໃຈຄົນອື່ນ
17. ການຄິດຕຶກຕອງໃນ 2 ໂກຣິນໂທ 1:3, 4 ກະຕຸ້ນເຮົາໃຫ້ຢາກໃຫ້ກຳລັງໃຈຄົນອື່ນແນວໃດ?
17 ເຫັນໄດ້ແຈ້ງວ່າພີ່ນ້ອງຫຼາຍຄົນຕ້ອງການກຳລັງໃຈ. ເຮົາສາມາດໃຫ້ກຳລັງໃຈຄົນອື່ນໂດຍໃຊ້ສິ່ງທີ່ຄົນອື່ນເຄີຍໃຫ້ກຳລັງໃຈເຮົາໄດ້. ພີ່ນ້ອງນີໂນເຊິ່ງແມ່ຕູ້ຂອງລາວໄດ້ຕາຍຈາກໄປບອກວ່າ: “ພະເຢໂຫວາໃຫ້ກຳລັງໃຈຄົນອື່ນຜ່ານທາງເຮົາໄດ້ ຖ້າເຮົາຍອມໃຫ້ພະອົງໃຊ້ເຮົາ.” (ອ່ານ 2 ໂກຣິນໂທ 1:3, 4) ພີ່ນ້ອງຟຣານຊິດທີ່ເວົ້າເຖິງກ່ອນໜ້ານີ້ບອກວ່າ: “2 ໂກຣິນໂທ 1:4 ເປັນຄວາມຈິງທີ່ວ່າ ເຮົາສາມາດເອົາສິ່ງທີ່ຄົນອື່ນເຄີຍໃຫ້ກຳລັງໃຈເຮົາໄປໃຫ້ກຳລັງໃຈຄົນອື່ນຕໍ່ໄດ້.”
18. (ກ) ເປັນຫຍັງບາງຄົນອາດຮູ້ສຶກຢ້ານທີ່ຈະໃຫ້ກຳລັງໃຈຄົນອື່ນ? (ຂ) ແລ້ວເຮົາຈະໃຫ້ກຳລັງໃຈຄົນອື່ນໄດ້ແນວໃດ? ຂໍໃຫ້ຍົກຕົວຢ່າງ.
18 ເຖິງວ່າເຮົາຈະຮູ້ສຶກຢ້ານ ແຕ່ເຮົາກໍຕ້ອງພະຍາຍາມຊອກຫາໂອກາດທີ່ຈະໃຫ້ກຳລັງໃຈຄົນອື່ນ. ຕົວຢ່າງ: ເຮົາອາດຢ້ານວ່າບໍ່ຮູ້ຈະເວົ້າຫຍັງຫຼືເຮັດແນວໃດເພື່ອໃຫ້ກຳລັງໃຈຄົນທີ່ທໍ້ໃຈ. ຜູ້ດູແລຄົນໜຶ່ງຊື່ ພໍລ໌ຈື່ຄວາມພະຍາຍາມຂອງພີ່ນ້ອງທີ່ໃຫ້ກຳລັງໃຈລາວຫຼັງຈາກທີ່ພໍ່ຂອງລາວຕາຍ ລາວບອກວ່າ: “ຂ້ອຍຮູ້ວ່າມັນບໍ່ງ່າຍທີ່ພວກເຂົາຈະມາລົມນຳຂ້ອຍ ພວກເຂົາບໍ່ຮູ້ວ່າຈະເວົ້າຫຍັງ. ແຕ່ຂ້ອຍກໍຮູ້ຄຸນຄ່າຄວາມພະຍາຍາມຂອງພວກເຂົາທີ່ຈະໃຫ້ກຳລັງໃຈແລະຊ່ວຍເຫຼືອຂ້ອຍ.” ຄ້າຍຄືກັນ ພີ່ນ້ອງແທຈອນທີ່ປະສົບກັບແຜ່ນດິນໄຫວໃຫຍ່ບອກວ່າ: “ຫຼັງຈາກແຜ່ນດິນໄຫວຂ້ອຍຈື່ບໍ່ໄດ້ເລີຍວ່າພີ່ນ້ອງສົ່ງຂໍ້ຄວາມຫຍັງມາແດ່ ຂ້ອຍຈື່ໄດ້ແຕ່ວ່າພວກເຂົາເປັນຫ່ວງຂ້ອຍຫຼາຍແລະຢາກແນ່ໃຈວ່າຂ້ອຍປອດໄພ.” ເຮົາຈະໃຫ້ກຳລັງໃຈຄົນອື່ນໄດ້ດີຖ້າເຮົາສະແດງຄວາມເປັນຫ່ວງເປັນໃຍຢ່າງແທ້ຈິງ.
19. ເປັນຫຍັງເຈົ້າຈຶ່ງພະຍາຍາມເປັນຄົນທີ່ “ໃຫ້ກຳລັງໃຈ” ຄົນອື່ນ?
19 ເນື່ອງຈາກໃກ້ຈະເຖິງຈຸດຈົບຂອງລະບົບນີ້ ສະພາບການຂອງໂລກກໍຊົ່ວຂຶ້ນແລະຊີວິດກໍຫຍຸ້ງຍາກຫຼາຍຂຶ້ນ. (2 ຕມ. 3:13) ແລະຍ້ອນບາບທີ່ເຮົາໄດ້ຮັບເປັນມໍລະດົກເຮັດໃຫ້ເຮົາເປັນຄົນບໍ່ສົມບູນແບບແລະເຮັດຜິດພາດເລື້ອຍໆ ເຮົາຈຶ່ງຈຳເປັນຕ້ອງໄດ້ຮັບກຳລັງໃຈຕໍ່ໆໄປ. ເຫດຜົນໜຶ່ງທີ່ອັກຄະສາວົກໂປໂລສາມາດຮັກສາຄວາມສັດຊື່ຈົນຕາຍໄດ້ກໍຍ້ອນລາວໄດ້ຮັບກຳລັງໃຈຈາກເພື່ອນຄລິດສະຕຽນ. ຂໍໃຫ້ເຮົາເປັນຄົນພັກດີຄືກັບອາຣິດຕາໂຂ ເປັນຄົນທີ່ໄວ້ໃຈໄດ້ຄືກັບຕີຂີໂກ ແລະເຕັມໃຈຮັບໃຊ້ຄົນອື່ນຄືກັບມາຣະໂກ. ຖ້າເຮົາເຮັດແບບນັ້ນ ເຮົາກໍຈະຊ່ວຍພີ່ນ້ອງໃຫ້ຮັກສາຄວາມສັດຊື່ໄດ້ຕໍ່ໆໄປ.—1 ທຊ. 3:2, 3
^ ຂໍ້ 5 ອັກຄະສາວົກໂປໂລປະສົບຫຼາຍບັນຫາໃນຊີວິດ. ໃນໄລຍະທີ່ຫຍຸ້ງຍາກນັ້ນ ລາວໄດ້ຮັບກຳລັງໃຈຫຼາຍຈາກເພື່ອນຮ່ວມຮັບໃຊ້ຂອງລາວ. ເຮົາຈະພິຈາລະນາຄຸນລັກສະນະ 3 ຢ່າງທີ່ເຮັດໃຫ້ເພື່ອນຮ່ວມຮັບໃຊ້ຂອງໂປໂລສາມາດໃຫ້ກຳລັງໃຈຄົນອື່ນໄດ້ດີ ແລະເຮົາຍັງຈະມາເບິ່ງວ່າເຮົາສາມາດຮຽນແບບຕົວຢ່າງຂອງພວກເຂົາໄດ້ແນວໃດ.
^ ຂໍ້ 5 ບາງຊື່ໃນບົດຄວາມນີ້ເປັນຊື່ສົມມຸດ.
ເພງ 111 ສິ່ງທີ່ເຮັດໃຫ້ພວກເຮົາມີຄວາມຍິນດີ
