ບົດຄວາມສຶກສາທີ 1
“ໃຫ້ພວກເຈົ້າໄປຫາຄົນ . . . ແລະສອນພວກເຂົາໃຫ້ເຂົ້າມາເປັນລູກສິດ.”
ຂໍ້ພະຄຳພີປະຈຳປີ 2020: “ໃຫ້ພວກເຈົ້າໄປຫາຄົນ . . . ແລະສອນພວກເຂົາໃຫ້ເຂົ້າມາເປັນລູກສິດ ໃຫ້ພວກເຂົາຮັບບັບເຕມາ.”—ມທ. 28:19
ເພງ 79 ສອນພວກເຂົາໃຫ້ມີຄວາມເຊື່ອທີ່ໝັ້ນຄົງ
ໃຈຄວາມສຳຄັນ *
1-2. ທູດສະຫວັນໄດ້ບອກຫຍັງກັບພວກຜູ້ຍິງທີ່ໄປອຸໂມງຝັງສົບຂອງພະເຢຊູ ແລະພະເຢຊູເອງໄດ້ສັ່ງພວກເຂົາໃຫ້ເຮັດຫຍັງ?
ໃນຕອນເຊົ້າໆຂອງວັນທີ 16 ເດືອນນີຊານ ປີ ຄ.ສ 33 ຜູ້ຍິງທີ່ຢ້ານຢຳພະເຈົ້າກຸ່ມໜຶ່ງໄດ້ໄປອຸໂມງຝັງສົບຂອງພະເຢຊູ ເຊິ່ງເພິ່ນຕາຍໄດ້ຫຼາຍກວ່າ 36 ຊົ່ວໂມງແລ້ວ. ເມື່ອພວກເຂົາໄປຮອດອຸໂມງຝັງສົບແລະຕັ້ງໃຈທີ່ຈະເອົາເຄື່ອງຫອມກັບນ້ຳມັນຫອມມາທາໃຫ້ພະເຢຊູ ພວກເຂົາກໍຕົກໃຈທີ່ບໍ່ເຫັນສົບຂອງເພິ່ນຢູ່ຫັ້ນ! ຈາກນັ້ນກໍມີທູດສະຫວັນອົງໜຶ່ງມາບອກພວກເຂົາວ່າ ພະເຢຊູຖືກປຸກໃຫ້ຄືນມາຈາກຕາຍແລ້ວແລະໄດ້ເວົ້າຕື່ມວ່າ: “ເພິ່ນຈະໄປຖ້າພົບພວກເຈົ້າຢູ່ແຂວງຄາລີເລ ພວກເຈົ້າຈະພົບເພິ່ນຢູ່ຫັ້ນ.”—ມທ. 28:1-7; ລກ. 23:56; 24:10
2 ຫຼັງຈາກພວກຜູ້ຍິງອອກຈາກອຸໂມງຝັງສົບ ພະເຢຊູກໍໄດ້ມາປາກົດຕົວແກ່ພວກເຂົາແລະບອກວ່າ: “ໄປເລົ່າເລື່ອງນີ້ໃຫ້ພີ່ນ້ອງຂອງຂ້ອຍຟັງ ແລະບອກພວກເຂົາໃຫ້ໄປແຂວງຄາລີເລ ແລ້ວຈະພົບຂ້ອຍຢູ່ຫັ້ນ.” (ມທ. 28:10) ເພິ່ນຕ້ອງມີສິ່ງທີ່ສຳຄັນຫຼາຍແທ້ໆທີ່ຈະບອກພວກເຂົາເພາະເປັນສິ່ງທຳອິດທີ່ພະເຢຊູເຮັດຫຼັງຈາກທີ່ເພິ່ນຄືນມາຈາກຕາຍ!
ພະເຢຊູໄດ້ສັ່ງໃຜໃຫ້ໄປສອນຄົນເປັນລູກສິດ?
ຕອນທີ່ພະເຢຊູມາພົບກັບພວກລູກສິດແລະຄົນອື່ນໆໃນຄາລີເລຫຼັງຈາກທີ່ເພິ່ນຄືນມາຈາກຕາຍ ເພິ່ນໄດ້ສັ່ງວ່າ “ໃຫ້ພວກເຈົ້າໄປຫາຄົນ . . . ແລະສອນພວກເຂົາໃຫ້ເຂົ້າມາເປັນລູກສິດ” (ເບິ່ງຂໍ້ 3-4)
3-4. ເຮົາຮູ້ໄດ້ແນວໃດວ່າຄຳສັ່ງໃນມັດທາຍ 28:16-20 ບໍ່ໄດ້ບອກພຽງແຕ່ພວກອັກຄະສາວົກເທົ່ານັ້ນ? (ເບິ່ງຮູບໜ້າປົກ)
3 ອ່ານມັດທາຍ 28:16-20. ເມື່ອພະເຢຊູພົບກັບພວກລູກສິດ ເພິ່ນໄດ້ເວົ້າເຖິງວຽກສຳຄັນທີ່ພວກເຂົາຕ້ອງເຮັດໃນຕອນນັ້ນ ເຊິ່ງເປັນວຽກດຽວກັນກັບທີ່ເຮົາກຳລັງເຮັດໃນທຸກມື້ນີ້. ພະເຢຊູບອກວ່າ: “ໃຫ້ພວກເຈົ້າໄປຫາຄົນທຸກຊາດ ແລະສອນພວກເຂົາໃຫ້ເຂົ້າມາເປັນລູກສິດ . . . ສອນພວກເຂົາໃຫ້ເຮັດຕາມທຸກສິ່ງທີ່ຂ້ອຍສັ່ງພວກເຈົ້າໄວ້.”
4 ພະເຢຊູຢາກໃຫ້ພວກລູກສິດຂອງເພິ່ນທຸກຄົນໄປປະກາດ. ເພິ່ນບໍ່ໄດ້ສັ່ງແຕ່ອັກຄະສາວົກທີ່ສັດຊື່ 11 ຄົນເທົ່ານັ້ນ. ເຮົາຮູ້ໄດ້ແນວໃດ? ເພາະຕອນທີ່ພະເຢຊູໃຫ້ຄຳສັ່ງໄປສອນຄົນໃຫ້ເປັນລູກສິດ ບໍ່ໄດ້ມີພຽງແຕ່ພວກອັກຄະສາວົກທີ່ຢູ່ເທິງພູເຂົາໃນຄາລີເລ. ຂໍໃຫ້ນຶກເຖິງສິ່ງທີ່ທູດສະຫວັນເວົ້າກັບພວກຜູ້ຍິງທີ່ວ່າ: “ພວກເຈົ້າ ຈະພົບເພິ່ນຢູ່ [ຄາລີເລ].” ດັ່ງນັ້ນ ເບິ່ງຄືວ່າພວກຜູ້ຍິງທີ່ສັດຊື່ກໍຈະຢູ່ຫັ້ນຄືກັນ. ບໍ່ພຽງແຕ່ເທົ່ານັ້ນ ອັກຄະສາວົກໂປໂລຍັງບອກວ່າພະເຢຊູໄດ້ມາ “ປາກົດຕົວຕໍ່ພີ່ນ້ອງຫຼາຍກວ່າ 500 ຄົນໃນເວລາດຽວກັນ.” (1 ກຣ. 15:6) ແຕ່ໄປພົບກັນຢູ່ໃສ?
5. ເປັນຫຍັງເຮົາມີເຫດຜົນທີ່ຈະເຊື່ອວ່າການພົບກັນຢູ່ຄາລິເລທີ່ໂປໂລເວົ້າໃນ 1 ໂກຣິນໂທ 15:6 ເປັນເຫດການດຽວກັນກັບໃນມັດທາຍບົດ 28?
5 ເຮົາມີຫຼາຍເຫດຜົນທີ່ຈະເຊື່ອວ່າການພົບກັນຢູ່ຄາລິເລທີ່ໂປໂລເວົ້າໃນ 1 ໂກຣິນໂທ 15:6 ເປັນເຫດການດຽວກັນກັບໃນມັດທາຍບົດ 28. ເຫດຜົນທຳອິດຄື ລູກສິດຂອງພະເຢຊູສ່ວນຫຼາຍຢູ່ຄາລີເລ. ດັ່ງນັ້ນ ຈຶ່ງເປັນເລື່ອງງ່າຍທີ່ຈະປະຊຸມກັນຢູ່ເທິງພູເຂົາໃນຄາລິເລເພາະສາມາດເຕົ້າໂຮມກັນໄດ້ຫຼາຍຄົນ ແທນທີ່ຈະຈັດຢູ່ເຮືອນຂອງບາງຄົນໃນເຢຣູຊາເລັມ. ເຫດຜົນທີສອງກໍຄື ຫຼັງຈາກທີ່ພະເຢຊູຄືນມາຈາກຕາຍ ເພິ່ນໄດ້ມາພົບພວກອັກຄະສາວົກ 11 ຄົນຢູ່ເຮືອນຜູ້ໜຶ່ງໃນເມືອງເຢຣູຊາເລັມ. ຖ້າພະເຢຊູຢາກໃຫ້ພຽງແຕ່ພວກອັກຄະສາວົກໄປປະກາດແລະສອນຄົນໃຫ້ເປັນລູກສິດ ເພິ່ນຄົງຈະບອກພວກເຂົາຕັ້ງແຕ່ຢູ່ຫັ້ນແລ້ວ ແທນທີ່ຈະບອກພວກອັກຄະສາວົກ ພວກຜູ້ຍິງ ແລະພວກລູກສິດຄົນອື່ນໆໃຫ້ໄປພົບເພິ່ນຢູ່ຄາລີເລ.—ລກ. 24:33, 36
6. ມັດທາຍ 28:20 ສະແດງໃຫ້ເຫັນແນວໃດວ່າຄຳສັ່ງທີ່ໃຫ້ສອນຄົນເປັນລູກສິດໄດ້ສັ່ງເຮົາໃນປັດຈຸບັນນຳ ແລະໃນທຸກມື້ນີ້ມີການເຮັດຕາມຄຳສັ່ງນີ້ແນວໃດ?
6 ຂໍໃຫ້ສັງເກດເຫດຜົນສຳຄັນຢ່າງທີສາມ. ຄຳສັ່ງຂອງພະເຢຊູທີ່ໃຫ້ສອນຄົນເປັນລູກສິດບໍ່ໄດ້ພຽງແຕ່ສັ່ງໃຫ້ຄລິດສະຕຽນໃນສະຕະວັດທຳອິດເຮັດເທົ່ານັ້ນ. ເຮົາຮູ້ໄດ້ແນວໃດ? ພະເຢຊູເວົ້າປິດທ້າຍຄຳສັ່ງຂອງເພິ່ນໂດຍບອກພວກລູກສິດວ່າ: “ຂ້ອຍຈະຢູ່ກັບພວກເຈົ້າສະເໝີຈົນຮອດສະໄໝສຸດທ້າຍຂອງໂລກນີ້.” (ມທ. 28:20) ຄືກັບທີ່ພະເຢຊູເວົ້າ ໃນທຸກມື້ນີ້ວຽກສອນຄົນໃຫ້ເປັນລູກສິດກຳລັງກ້າວໜ້າຫຼາຍແທ້ໆ. ລອງຄິດເບິ່ງດຸ ໃນແຕ່ລະປີມີປະມານ 300.000 ຄົນຮັບບັບເຕມາເຂົ້າມາເປັນພະຍານພະເຢໂຫວາແລະເປັນລູກສິດຂອງພະຄລິດ!
7. ຕອນນີ້ເຮົາຈະພິຈາລະນາຫຍັງ ແລະຍ້ອນຫຍັງ?
7 ຫຼາຍຄົນທີ່ສຶກສາຄຳພີໄບເບິນໄດ້ກ້າວໜ້າເຖິງຂັ້ນຮັບບັບເຕມາ. ແນວໃດກໍຕາມ ເບິ່ງຄືວ່າບາງຄົນກໍຢ້ານທີ່ຈະເຂົ້າມາເປັນລູກສິດຂອງພະເຢຊູ. ພວກເຂົາມັກສຶກສາຄຳພີໄບເບິນ ແຕ່ບໍ່ຢາກຮັບບັບເຕມາ. ຖ້າເຈົ້າມີນັກສຶກສາ ເຮົາໝັ້ນໃຈວ່າເຈົ້າຢາກຊ່ວຍນັກສຶກສາໃຫ້ນຳໃຊ້ສິ່ງທີ່ໄດ້ຮຽນ ແລະຊ່ວຍລາວໃຫ້ເປັນລູກສິດຂອງພະຄລິດ. ໃນບົດຄວາມນີ້ ເຮົາຈະພິຈາລະນາວິທີທີ່ຈະຊ່ວຍນັກສຶກສາໃຫ້ຮັກພະເຢໂຫວາແລະຊ່ວຍລາວໃຫ້ກ້າວໜ້າທາງຄວາມເຊື່ອ. ເປັນຫຍັງເຮົາຕ້ອງພິຈາລະນາເລື່ອງນີ້? ເພາະເຮົາອາດຕ້ອງຕັດສິນໃຈວ່າເຮົາຈະເຊົາສຶກສາກັບນັກສຶກສາຫຼືບໍ່.
ພະຍາຍາມຊ່ວຍນັກສຶກສາໃຫ້ຮັກພະເຢໂຫວາ
8. ເປັນຫຍັງບາງເທື່ອຈຶ່ງເປັນເລື່ອງຍາກທີ່ຈະຊ່ວຍນັກສຶກສາໃຫ້ຮັກພະເຢໂຫວາ?
8 ພະເຢໂຫວາຢາກໃຫ້ຜູ້ຄົນຮັບໃຊ້ພະອົງຍ້ອນວ່າຮັກພະອົງ. ດັ່ງນັ້ນ ເປົ້າໝາຍຂອງເຮົາຄື ຊ່ວຍນັກສຶກສາໃຫ້ຮູ້ວ່າພະເຢໂຫວາເປັນຫ່ວງພວກເຂົາແຕ່ລະຄົນເປັນສ່ວນຕົວແທ້ໆແລະຮັກພວກເຂົາຫຼາຍອີ່ຫຼີ. ເຮົາຢາກຊ່ວຍພວກເຂົາໃຫ້ເຫັນວ່າພະເຢໂຫວາເປັນຄືກັບ “ພໍ່ຂອງລູກກຳພ້າພໍ່ແລະເປັນຜູ້ປົກປ້ອງແມ່ໝ້າຍ.” (ເພງ. 68:5, ລ.ມ.) ເມື່ອນັກສຶກສາຂອງເຈົ້າຮູ້ວ່າພະເຢໂຫວາຮັກພວກເຂົາຫຼາຍສ່ຳໃດ ພວກເຂົາກໍຈະເລີ່ມ ຮັກພະອົງຄືກັນ. ນັກສຶກສາບາງຄົນອາດຮູ້ສຶກວ່າຍາກທີ່ຈະເບິ່ງພະເຢໂຫວາເປັນຄືກັບພໍ່ ຍ້ອນວ່າພໍ່ແທ້ໆຂອງພວກເຂົາບໍ່ໄດ້ສະແດງຄວາມຮັກຕໍ່ພວກເຂົາເລີຍ. (2 ຕມ. 3:1, 3) ດັ່ງນັ້ນ ເມື່ອເຈົ້ານຳການສຶກສາຄຳພີໄບເບິນ ໃຫ້ເນັ້ນເຖິງຄຸນລັກສະນະຕ່າງໆຂອງພະເຢໂຫວາ. ຊ່ວຍນັກສຶກສາຂອງເຈົ້າໃຫ້ຮູ້ວ່າພະເຢໂຫວາພະເຈົ້າທີ່ມີຄວາມຮັກຢາກ ໃຫ້ພວກເຂົາໄດ້ຮັບຊີວິດຕະຫຼອດໄປ ແລະພະອົງກໍພ້ອມທີ່ຈະຊ່ວຍພວກເຂົາໃຫ້ໄປເຖິງເປົ້າໝາຍນັ້ນ. ຍັງມີສິ່ງໃດອີກທີ່ເຮົາສາມາດເຮັດໄດ້?
9-10. ມີປຶ້ມຫຍັງແດ່ທີ່ເຮົາຄວນໃຊ້ເມື່ອນຳການສຶກສາຄຳພີໄບເບິນ ແລະເປັນຫຍັງຈຶ່ງໃຊ້ປຶ້ມນັ້ນ?
9 ໃຊ້ປຶ້ມ “ຄຳພີໄບເບິນສອນແນວໃດແທ້ໆ?” ແລະ “ຮັກສາຕົວໄວ້ໃນຄວາມຮັກຂອງພະເຈົ້າ.” * ປຶ້ມເຫຼົ່ານີ້ຖືກອອກແບບມາເພື່ອຊ່ວຍນັກສຶກສາໃຫ້ຮັກພະເຢໂຫວາ. ຕົວຢ່າງ: ບົດທີ 1 ຂອງປຶ້ມໄບເບິນສອນ ຈະຕອບຄຳຖາມທີ່ວ່າ: ພະເຈົ້າບໍ່ມີຄວາມຫ່ວງໃຍແລະຂາດຄວາມເຫັນອົກເຫັນໃຈບໍ? ພະເຈົ້າຮູ້ສຶກແນວໃດຕໍ່ ຄວາມບໍ່ຍຸຕິທຳທີ່ເຮົາປະສົບ? ແລະເຮົາສາມາດເຂົ້າໃກ້ພະເຢໂຫວາໄດ້ບໍ? ສ່ວນປຶ້ມຮັກຂອງພະເຈົ້າ ຈະຊ່ວຍນັກສຶກສາໃຫ້ຮູ້ວິທີເອົາຫຼັກການໃນຄຳພີໄບເບິນມາປັບປຸງຊີວິດຂອງລາວແລະໃກ້ຊິດກັບພະເຢໂຫວາຫຼາຍຂຶ້ນ. ເຖິງວ່າເຈົ້າຈະສຶກສາປຶ້ມເຫຼົ່ານີ້ກັບນັກສຶກສາຫຼາຍຄົນແລ້ວ ແຕ່ເຈົ້າກໍຕ້ອງກຽມຕົວຢ່າງດີເພື່ອທີ່ເຈົ້າຈະສາມາດຊ່ວຍນັກສຶກສາແຕ່ລະຄົນຕາມຄວາມຈຳເປັນຂອງພວກເຂົາ.
10 ເຈົ້າຄວນເຮັດແນວໃດຖ້ານັກສຶກສາສົນໃຈເລື່ອງອື່ນທີ່ບໍ່ກ່ຽວຂ້ອງກັບປຶ້ມທີ່ຢູ່ໃນກ່ອງເຄື່ອງມືການສອນຂອງເຮົາ? ເຈົ້າອາດສະໜັບສະໜູນໃຫ້ລາວອ່ານປຶ້ມນັ້ນດ້ວຍຕົວເອງເພື່ອເຈົ້າຈະສາມາດນຳການສຶກສາຕໍ່ໃນປຶ້ມໄບເບິນສອນ ຫຼືປຶ້ມຮັກຂອງພະເຈົ້າໄດ້.
ເລີ່ມການສຶກສາດ້ວຍການອະທິດຖານ (ເບິ່ງຂໍ້ 11)
11. ເຮົາຄວນເລີ່ມອະທິດຖານຕອນນຳການສຶກສາເມື່ອໃດ ແລະເຮົາອາດຊ່ວຍນັກສຶກສາໃຫ້ເຂົ້າໃຈເຫດຜົນທີ່ສຳຄັນນີ້ແນວໃດ?
11 ເລີ່ມການສຶກສາດ້ວຍການອະທິດຖານ. ຕາມປົກກະຕິແລ້ວຄວນຈະເລີ່ມອະທິດຖານກັບນັກສຶກສາໃຫ້ໄວທີ່ສຸດເທົ່າທີ່ເປັນໄປໄດ້ທັງຕອນເລີ່ມແລະຕອນຈົບການສຶກສາ ເຊິ່ງອາດເປັນພາຍໃນ 2-3 ອາທິດຫຼັງຈາກທີ່ສຶກສາກັບລາວເປັນປະຈຳ. ເຮົາຕ້ອງຊ່ວຍນັກສຶກສາໃຫ້ຮູ້ວ່າການເຂົ້າໃຈຄຳພີໄບເບິນຕ້ອງໄດ້ຮັບການຊ່ວຍເຫຼືອຈາກພະລັງບໍລິສຸດຂອງພະເຈົ້າເທົ່ານັ້ນ. ຜູ້ສອນຄຳພີໄບເບິນບາງຄົນອະທິບາຍເຫດຜົນທີ່ເຮົາອະທິດຖານຈາກປຶ້ມຢາໂກໂບ 1:5 ທີ່ວ່າ: “ຖ້າຜູ້ໃດໃນພວກເຈົ້າຂາດສະຕິປັນຍາ ໃຫ້ລາວພະຍາຍາມຂໍຈາກພະເຈົ້າຕໍ່ໆໄປ.” ຜູ້ນຳການສຶກສາອາດຖາມນັກສຶກສາວ່າ “ເຮົາຈະຂໍສະຕິປັນຍາຈາກພະເຈົ້າໄດ້ແນວໃດ?” ຈາກນັ້ນ ນັກສຶກສາອາດຈະຍອມຮັບວ່າເຮົາຄວນອະທິດຖານເຖິງພະເຈົ້າ.
12. ເຈົ້າຈະໃຊ້ຄຳເພງ 139:2-4 ເພື່ອຊ່ວຍນັກສຶກສາຂອງເຈົ້າໃຫ້ເວົ້າກັບພະເຢໂຫວາແບບເປີດໃຈແນວໃດ?
12 ສອນນັກສຶກສາໃຫ້ຮູ້ວິທີອະທິດຖານ. ອະທິບາຍໃຫ້ລາວເຂົ້າໃຈວ່າພະເຢໂຫວາຢາກໄດ້ຍິນຄຳອະທິດຖານຈາກໃຈຂອງລາວ. ໃນຄຳອະທິດຖານສ່ວນຕົວຂອງເຮົາ ເຮົາສາມາດບອກພະເຢໂຫວາວ່າເຮົາຮູ້ສຶກແນວໃດແລະລະບາຍກັບພະອົງໃນເລື່ອງທີ່ເຮົາບໍ່ກ້າບອກໃຫ້ຄົນອື່ນຮູ້. ຂໍໃຫ້ຈື່ໄວ້ວ່າພະເຢໂຫວາຮູ້ຈັກເຮົາດີທີ່ສຸດ. (ອ່ານຄຳເພງ 139:2-4) ເຮົາຍັງສາມາດກະຕຸ້ນນັກສຶກສາຂອງເຮົາໃຫ້ຂໍຄວາມຊ່ວຍເຫຼືອຈາກພະເຈົ້າໃຫ້ປ່ຽນຄວາມຄິດທີ່ຜິດໆແລະນິດໄສທີ່ບໍ່ດີ. ຕົວຢ່າງ: ສົມມຸດວ່ານັກສຶກສາຄົນໜຶ່ງອາດມັກການສະເຫຼີມສະຫຼອງທີ່ຄລິດສະຕຽນບໍ່ຄວນເຂົ້າຮ່ວມ ລາວຮູ້ແລ້ວວ່າມັນຜິດ ແຕ່ກໍຍັງມັກບາງແງ່ມຸມຂອງມັນ. ຂໍໃຫ້ເຈົ້າສະໜັບສະໜູນນັກສຶກສາອະທິດຖານບອກພະເຢໂຫວາວ່າລາວຮູ້ສຶກແນວໃດແລະໃຫ້ລາວຂໍຄວາມຊ່ວຍເຫຼືອຈາກພະອົງເພື່ອຈະຮັກສິ່ງທີ່ພະອົງຮັກ.—ເພງ. 97:10
ຊວນນັກສຶກສາເຂົ້າຮ່ວມການປະຊຸມ (ເບິ່ງຂໍ້ 13)
13. (ກ) ເປັນຫຍັງເຮົາຄວນຊວນນັກສຶກສາໄປປະຊຸມໃຫ້ໄວເທົ່າທີ່ເປັນໄປໄດ້? (ຂ) ເຮົາຈະຊ່ວຍນັກສຶກສາໃຫ້ຮູ້ສຶກສະດວກໃຈເມື່ອມາຫໍປະຊຸມໄດ້ແນວໃດ?
13 ຊວນນັກສຶກສາໄປປະຊຸມໃຫ້ໄວເທົ່າທີ່ເປັນໄປໄດ້. ສິ່ງທີ່ນັກສຶກສາຂອງເຈົ້າໄດ້ຍິນແລະສັງເກດເຫັນຢູ່ການປະຊຸມຄລິດສະຕຽນຈະເຮັດໃຫ້ລາວຢາກຮັບໃຊ້ພະເຢໂຫວາ. ເປີດວິດີໂອພວກເຮົາເຮັດຫຍັງຢູ່ທີ່ຫໍປະຊຸມລາຊະອານາຈັກ? ແລ້ວຊວນລາວໄປປະຊຸມກັບເຈົ້າ. ສະເໜີທີ່ຈະໄປຮັບໄປສົ່ງລາວຖ້າເປັນໄປໄດ້. ເປັນເລື່ອງທີ່ດີທີ່ຈະຊວນພີ່ນ້ອງຄົນອື່ນໆໄປຮ່ວມສຶກສາກັບເຈົ້າ. ໂດຍວິທີນີ້ນັກສຶກສາຂອງເຈົ້າກໍຈະລຶ້ງເຄີຍກັບພີ່ນ້ອງໃນປະຊາຄົມ ແລະລາວກໍຈະຮູ້ສຶກສະດວກໃຈເມື່ອເຂົ້າຮ່ວມການປະຊຸມ.
ຊ່ວຍນັກສຶກສາໃຫ້ກ້າວໜ້າທາງຄວາມເຊື່ອ
14. ສິ່ງໃດທີ່ຊ່ວຍກະຕຸ້ນນັກສຶກສາໃຫ້ກ້າວໜ້າທາງຄວາມເຊື່ອ?
14 ເປົ້າໝາຍຂອງເຮົາຄື ຊ່ວຍນັກສຶກສາໃຫ້ກ້າວໜ້າທາງຄວາມເຊື່ອ. (ອຟຊ. 4:13) ເມື່ອຄົນໜຶ່ງຍອມສຶກສາຄຳພີໄບເບິນກັບເຮົາ ລາວອາດສົນໃຈແຕ່ວ່າລາວຈະໄດ້ປະໂຫຍດຫຍັງ. ແຕ່ເມື່ອລາວຮັກພະເຢໂຫວາ ຫຼາຍຂຶ້ນ ລາວອາດຈະເລີ່ມຄິດກ່ຽວກັບວິທີທີ່ຈະຊ່ວຍຄົນອື່ນໆເຊິ່ງລວມເຖິງພີ່ນ້ອງໃນປະຊາຄົມນຳ. (ມທ. 22:37-39) ເມື່ອເຫັນວ່າເໝາະສົມ ຢ່າລັງເລທີ່ຈະບອກນັກສຶກສາຂອງເຈົ້າວ່າເຮົາມີໂອກາດທີ່ຈະບໍລິຈາກເພື່ອສະໜັບສະໜູນວຽກຂອງອົງການພະເຈົ້າ.
ສອນນັກສຶກສາໃຫ້ຮູ້ວ່າຄວນເຮັດຫຍັງເມື່ອປະສົບບັນຫາ (ເບິ່ງຂໍ້ 15)
15. ເຮົາຈະຊ່ວຍນັກສຶກສາຄຳພີໄບເບິນແນວໃດໃຫ້ເຮັດສິ່ງທີ່ຖືກຕ້ອງເມື່ອປະສົບບັນຫາ?
15 ສອນນັກສຶກສາໃຫ້ຮູ້ວ່າຄວນເຮັດຫຍັງເມື່ອປະສົບບັນຫາ. ສົມມຸດວ່ານັກສຶກສາຂອງເຈົ້າເປັນຜູ້ປະກາດທີ່ຍັງບໍ່ໄດ້ຮັບບັບເຕມາບອກເຈົ້າວ່າ ມີພີ່ນ້ອງໃນປະຊາຄົມເຮັດໃຫ້ລາວຮູ້ສຶກບໍ່ດີ. ແທນທີ່ຈະເຂົ້າຂ້າງຝ່າຍໃດຝ່າຍໜຶ່ງ ແຕ່ໃຫ້ອະທິບາຍສິ່ງທີ່ຄຳພີໄບເບິນບອກວ່າລາວຄວນເຮັດຫຍັງ. ລາວສາມາດໃຫ້ອະໄພພີ່ນ້ອງ ຫຼືຖ້າລາວບໍ່ສາມາດປ່ອຍເລື່ອງນັ້ນໄປໄດ້ ກໍໃຫ້ລາວໄປລົມກັບພີ່ນ້ອງຄົນນັ້ນດ້ວຍຄວາມຮັກແລະຄວາມກະລຸນາໂດຍມີເປົ້າໝາຍ “ຊ່ວຍລາວໃຫ້ເຮັດສິ່ງທີ່ຖືກຕ້ອງ.” (ສົມທຽບກັບມັດທາຍ 18:15) ຊ່ວຍນັກສຶກສາໃຫ້ກຽມສິ່ງທີ່ຈະເວົ້າ. ຊ່ວຍລາວໃຫ້ຮູ້ວິທີໃຊ້ແອັບ JW Library® ຄູ່ມືຄົ້ນຄວ້າສຳລັບພະຍານພະເຢໂຫວາ ແລະເວັບໄຊ jw.org® ເພື່ອແກ້ໄຂບັນຫາທີ່ລາວປະສົບ. ຖ້າລາວຮຽນຮູ້ວິທີແກ້ໄຂບັນຫາກ່ອນຮັບບັບເຕມາ ລາວກໍຈະເຂົ້າກັບພີ່ນ້ອງໃນປະຊາຄົມໄດ້ດີຫຼັງຈາກທີ່ຮັບບັບເຕມາແລ້ວ.
16. ເປັນຫຍັງເປັນເລື່ອງທີ່ດີທີ່ຈະຊວນພີ່ນ້ອງຄົນອື່ນໆມາຮ່ວມສຶກສາກັບເຈົ້າ?
16 ຊວນຄົນອື່ນໆໃນປະຊາຄົມຫຼືຜູ້ດູແລໝວດໄປຮ່ວມສຶກສານຳ. ຍ້ອນຫຍັງ? ນອກຈາກເຫດຜົນທີ່ເວົ້າຜ່ານມາ ພີ່ນ້ອງໃນປະຊາຄົມອາດຈະຊ່ວຍນັກສຶກສາຂອງເຮົາໃນບັນຫາທີ່ເຮົາຊ່ວຍບໍ່ໄດ້ເຊັ່ນ: ສົມມຸດນັກສຶກສາຂອງເຮົາພະຍາຍາມເຊົາສູບຢາແຕ່ລາວກໍເຊົາບໍ່ໄດ້ຈັກເທື່ອ ຂໍໃຫ້ເຈົ້າຊວນພີ່ນ້ອງທີ່ໄດ້ພະຍາຍາມຫຼາຍເທື່ອໃນການເອົາຊະນະນິດໄສທີ່ບໍ່ດີນີ້ຮ່ວມສຶກສານຳ. ຖ້າເຈົ້າບໍ່ສະດວກໃຈນຳການສຶກສາເມື່ອພີ່ນ້ອງຊາຍທີ່ມີປະສົບການຢູ່ນຳ ກໍຂໍໃຫ້ລາວນຳການສຶກສາໄດ້. ເມື່ອເຮົາຊວນຄົນອື່ນໄປສຶກສານຳ ນັກສຶກສາຂອງເຮົາຈະໄດ້ປະໂຫຍດຈາກປະສົບການຂອງພວກເຂົາ. ຂໍໃຫ້ຈື່ໄວ້ວ່າ ເປົ້າໝາຍຂອງເຮົາຄືຊ່ວຍນັກສຶກສາໃຫ້ກ້າວໜ້າທາງຄວາມເຊື່ອ.
ຂ້ອຍຄວນເຊົາສຶກສາກັບບາງຄົນບໍ?
17-18. ເຈົ້າຄວນພິຈາລະນາຫຍັງກ່ອນທີ່ຈະຕັດສິນໃຈເຊົາສຶກສາກັບນັກສຶກສາຂອງເຈົ້າ?
17 ຖ້ານັກສຶກສາຂອງເຈົ້າບໍ່ໄດ້ປ່ຽນແປງຊີວິດຕົວເອງ ພໍຮອດຈຸດໜຶ່ງເຈົ້າຕ້ອງຖາມຕົວເອງວ່າ ‘ຂ້ອຍຄວນຈະເຊົາສຶກສາກັບລາວບໍ?’ ແຕ່ກ່ອນທີ່ຈະຕັດສິນໃຈ ເຈົ້າຄວນຄິດເຖິງຄວາມສາມາດຂອງນັກສຶກສາ. ບາງຄົນປ່ຽນແປງຊີວິດໄວກວ່າຄົນອື່ນ. ໃຫ້ຖາມຕົວເອງວ່າ: ‘ນັກສຶກສາຂອງຂ້ອຍເຮັດການປ່ຽນແປງໄດ້ດີຕາມສະພາບການຂອງລາວບໍ?’ ‘ລາວເລີ່ມ “ເຮັດຕາມ” ຫຼືນຳໃຊ້ສິ່ງທີ່ລາວໄດ້ຮຽນບໍ?’ (ມທ. 28:20) ນັກສຶກສາບາງຄົນອາດໃຊ້ເວລາດົນເພື່ອປ່ຽນແປງຊີວິດ ແຕ່ລາວກໍຕ້ອງປ່ຽນແປງຕົວເອງຢູ່ດີແລະຕ້ອງປ່ຽນແປງຢ່າງຕໍ່ເນື່ອງ.
18 ສົມມຸດວ່ານັກສຶກສາຄົນໜຶ່ງສຶກສາໄດ້ດົນແລ້ວແຕ່ *
ບໍ່ໄດ້ສະແດງໃຫ້ເຫັນວ່າການສຶກສາສຳຄັນ ເຮົາຈະເຮັດແນວໃດ? ຂໍໃຫ້ພິຈາລະນາເຫດການນີ້: ນັກສຶກສາຂອງເຈົ້າສຶກສາປຶ້ມໄບເບິນສອນ ຈົບແລ້ວຫຼືເຖິງກັບໄດ້ເລີ່ມປຶ້ມຮັກຂອງພະເຈົ້າ ແຕ່ລາວກໍຍັງບໍ່ເຂົ້າຮ່ວມການປະຊຸມຈັກເທື່ອແລະແມ່ນແຕ່ການປະຊຸມອະນຸສອນ! ແລະຫຼາຍເທື່ອລາວກໍມັກບອກວ່າບໍ່ວ່າງທີ່ຈະສຶກສາດ້ວຍເຫດຜົນເລັກໆນ້ອຍໆ. ຖ້ານັກສຶກສາຂອງເຈົ້າເປັນແບບນີ້ ເຈົ້າຄວນລົມກັບລາວແບບກົງໄປກົງມາ.19. ເຈົ້າອາດເວົ້າກັບນັກສຶກສາແນວໃດເມື່ອເບິ່ງຄືວ່າລາວບໍ່ເຫັນຄ່າການສຶກສາຄຳພີໄບເບິນ ແລະເຈົ້າຕ້ອງຄິດເຖິງຫຍັງ?
19 ເຈົ້າອາດເລີ່ມຖາມລາວວ່າ: ‘ສິ່ງທີ່ຍາກທີ່ສຸດສຳລັບເຈົ້າທີ່ຈະເຂົ້າມາເປັນພະຍານພະເຢໂຫວາແມ່ນຫຍັງ?’ ນັກສຶກສາອາດຕອບວ່າ: ‘ຂ້ອຍມັກສຶກສາຄຳພີໄບເບິນ ແຕ່ຂ້ອຍບໍ່ຢາກເປັນພະຍານພະເຢໂຫວາ!’ ຖ້າລາວຄິດແບບນັ້ນຫຼັງຈາກທີ່ສຶກສາມາໄລຍະໜຶ່ງແລ້ວ ເຈົ້າຄວນສຶກສາກັບລາວຕໍ່ໄປບໍ? ແນວໃດກໍຕາມ ນັກສຶກສາຂອງເຈົ້າອາດບອກຄວາມຈິງກັບເຈົ້າກ່ຽວກັບສິ່ງທີ່ດຶງລາວໄວ້ບໍ່ໃຫ້ກ້າວໜ້າ. ຕົວຢ່າງ: ລາວອາດຮູ້ສຶກວ່າລາວບໍ່ສາມາດໄປປະກາດຕາມເຮືອນໄດ້. ຕອນນີ້ເຈົ້າຮູ້ແລ້ວວ່າລາວຮູ້ສຶກແນວໃດ ເຈົ້າກໍຈະຮູ້ວິທີຊ່ວຍລາວໄດ້ດີຂຶ້ນ.
ຢ່າສຶກສາກັບນັກສຶກສາທີ່ບໍ່ກ້າວໜ້າ (ເບິ່ງຂໍ້ 20)
20. ກິດຈະການ 13:48 ຊ່ວຍເຮົາແນວໃດໃຫ້ຕັດສິນໃຈເຊົາສຶກສາກັບນັກສຶກສາ?
20 ໜ້າເສຍດາຍ ນັກສຶກສາບາງຄົນເປັນຄືກັບຊາວອິດສະຣາເອນໃນສະໄໝຂອງເອເຊກຽນ. ຂໍໃຫ້ສັງເກດສິ່ງທີ່ພະເຢໂຫວາເວົ້າກັບເອເຊກຽນກ່ຽວກັບພວກເຂົາ ທີ່ວ່າ: “ສຳລັບພວກເຂົາ ເຈົ້າເປັນຄືຄົນທີ່ຮ້ອງເພງຮັກເຊິ່ງມີສຽງມ່ວນແລະຫຼິ້ນເຄື່ອງສາຍຢ່າງຊຳນານ ພວກເຂົາຈະຟັງເຈົ້າເວົ້າ ແຕ່ຈະບໍ່ມີໃຜເຮັດຕາມ.” (ເອເຊກ. 33:32, ລ.ມ.) ເຮົາອາດຮູ້ສຶກຍາກທີ່ຈະບອກນັກສຶກສາວ່າຈະເຊົາສຶກສາກັບລາວ ແຕ່ “ເວລາເຫຼືອໜ້ອຍແລ້ວ.” (1 ກຣ. 7:29) ແທນທີ່ຈະໃຊ້ເວລາຫຼາຍກັບນັກສຶກສາທີ່ບໍ່ຄ່ອຍກ້າວໜ້າ ດີກວ່າບໍທີ່ເຮົາຈະໃຊ້ເວລານັ້ນໄປຊອກຫາຄົນອື່ນທີ່ “ເຕັມໃຈຕອບຮັບຄວາມຈິງເຊິ່ງເຮັດໃຫ້ໄດ້ຊີວິດຕະຫຼອດໄປ.”—ອ່ານກິດຈະການ 13:48
ອາດມີບາງຄົນໃນເຂດຂອງເຈົ້າກຳລັງອະທິດຖານຂໍຄວາມຊ່ວຍເຫຼືອ (ເບິ່ງຂໍ້ 20)
21. ຂໍ້ພະຄຳພີປະຈຳປີ 2020 ແມ່ນຫຍັງ ແລະຈະຊ່ວຍເຮົາແນວໃດ?
21 ຕະຫຼອດປີ 2020 ຂໍ້ພະຄຳພີປະຈຳປີຂອງເຮົາຈະຊ່ວຍເຮົາໃຫ້ປັບປຸງຄວາມສາມາດໃນການສອນຄົນໃຫ້ເປັນລູກສິດ. ຂໍ້ພະຄຳພີປະຈຳປີເປັນສ່ວນໜຶ່ງຈາກຄຳເວົ້າຂອງພະເຢຊູທີ່ເພິ່ນເວົ້າໃນການພົບກັນຄັ້ງສຳຄັນເທິງພູເຂົາໃນຄາລີເລທີ່ວ່າ: “ໃຫ້ພວກເຈົ້າໄປຫາຄົນ . . . ແລະສອນພວກເຂົາໃຫ້ເຂົ້າມາເປັນລູກສິດ ໃຫ້ພວກເຂົາຮັບບັບເຕມາ.”—ມທ. 28:19
ຂໍໃຫ້ເຮົາຕັ້ງໃຈແນວແນ່ທີ່ຈະປັບປຸງຄວາມສາມາດໃນການສອນຄົນໃຫ້ເຂົ້າມາເປັນລູກສິດແລະຊ່ວຍນັກສຶກສາໃຫ້ຮັບບັບເຕມາ (ເບິ່ງຂໍ້ 21)
ເພງ 70 ຊອກຫາຄົນທີ່ຄູ່ຄວນ
^ ຂໍ້ 5 ຂໍ້ພະຄຳພີປະຈຳປີ 2020 ສະໜັບສະໜູນເຮົາໃຫ້ໄປ ‘ສອນຄົນໃຫ້ເຂົ້າມາເປັນລູກສິດ.’ ຜູ້ຮັບໃຊ້ຂອງພະເຢໂຫວາທຸກຄົນຕ້ອງເຮັດຕາມຄຳສັ່ງນີ້. ເຮົາຈະກະຕຸ້ນນັກສຶກສາໃຫ້ເຂົ້າມາເປັນລູກສິດຂອງພະຄລິດໄດ້ແນວໃດ? ບົດຄວາມນີ້ ເຮົາຈະພິຈາລະນາວິທີທີ່ເຮົາຊ່ວຍນັກສຶກສາໃຫ້ໃກ້ຊິດກັບພະເຢໂຫວາຫຼາຍຂຶ້ນ ແລະເຮົາຍັງຈະພິຈາລະນາສິ່ງທີ່ຊ່ວຍເຮົາໃຫ້ຕັດສິນໃຈໄດ້ວ່າເຮົາຄວນຈະສຶກສາກັບນັກສຶກສາຕໍ່ຫຼືບໍ່.
^ ຂໍ້ 9 ຖ້າປຶ້ມຮຽນຄຳພີໄບເບິນແລ້ວໄດ້ຫຍັງ? ແລະປຶ້ມເຮັດແນວໃດໃຫ້ພະເຈົ້າຮັກເຮົາສະເໝີ? ມີໃນພາສາຂອງເຈົ້າ ເຈົ້າຄວນໃຊ້ປຶ້ມເຫຼົ່ານີ້.
^ ຂໍ້ 18 ເບິ່ງວິດີໂອການເຊົາສຶກສາກັບນັກສຶກສາທີ່ບໍ່ກ້າວໜ້າ ໃນລາຍການໂທລະທັດ JW.