ລາວເກືອບຈະໄດ້ເປັນທີ່ຮັກຂອງພະເຈົ້າ
ເຮົາຮັບໃຊ້ພະເຢໂຫວາ ເຮົາຢາກໃຫ້ເພິ່ນຮັກແລະອວຍພອນເຮົາ ແຕ່ເຮົາຈະເປັນທີ່ຮັກຂອງເພິ່ນໄດ້ແນວໃດ? ໃນສະໄໝຄຳພີໄບເບິນບາງຄົນເຮັດຜິດຮ້າຍແຮງ ແຕ່ກໍກັບມາເປັນທີ່ຮັກຂອງພະເຈົ້າອີກຄັ້ງ. ສ່ວນບາງຄົນທຳອິດກໍເປັນຄົນດີ ແຕ່ສຸດທ້າຍກໍບໍ່ໄດ້ເປັນທີ່ຮັກຂອງພະເຈົ້າ. ດັ່ງນັ້ນ ເຮົາອາດຢາກຮູ້ວ່າ: “ພະເຢໂຫວາຢາກໃຫ້ເຮົາເປັນຄົນແບບໃດ?” ຕົວຢ່າງຂອງໂຣໂບອາມ ກະສັດຢູດາຈະຊ່ວຍເຮົາໃຫ້ຮູ້ຄຳຕອບ.
ການເລີ່ມຕົ້ນທີ່ບໍ່ດີ
ຊາໂລໂມນເປັນພໍ່ຂອງໂຣໂບອາມ ເຊິ່ງເປັນກະສັດປົກຄອງອິດສະແອນ 40 ປີ. (1 ກະສັດ 11:42) ຫຼັງຈາກພໍ່ຕາຍ ໂຣໂບອາມເດີນທາງຈາກເມືອງເຢຣຶຊາເລມໄປເມືອງຊີເຄມເພື່ອເປັນກະສັດ. (2 ຂ່າວຄາວ 10:1) ລາວຮູ້ສຶກຢ້ານບໍທີ່ຈະເປັນກະສັດອົງໃໝ່? ເພາະຊາໂລໂມນມີຊື່ສຽງວ່າເປັນຜູ້ມີສະຕິປັນຍາຫຼາຍ ແລະໂຣໂບອາມຈະຕ້ອງພິສູດໃຫ້ເຫັນວ່າລາວມີສະຕິປັນຍາຫຼາຍພໍທີ່ຈະແກ້ໄຂບັນຫາທີ່ຫຍຸ້ງຍາກໄດ້.
ປະຊາຊົນອິດສະລາແອນຮູ້ສຶກວ່າໂຣໂບອາມກົດຂີ່ເຂົາເຈົ້າຫຼາຍ ເຂົາເຈົ້າຈຶ່ງສົ່ງຕົວແທນມາຮ້ອງຂໍໂຣໂບອາມວ່າ: “ພໍ່ຂອງທ່ານໄດ້ເອົາແອກໜັກວາງໄວ້ເທິງພວກເຮົາ ແລະດຽວນີ້ການຫຼວງຍາກສຳລັບພໍ່ທ່ານກັບແອກໜັກທີ່ພໍ່ທ່ານໄດ້ວາງໄວ້ເທິງພວກເຮົາ ເຊີນທ່ານໃຫ້ເບົາງ່າຍແດ່ເຖີ້ນ ແລະພວກເຮົາຈະເປັນບ່າວທ່ານ.”—2 ຂ່າວຄາວ 10:3, 4
ໂຣໂບອາມມີເລື່ອງຍາກຕ້ອງຕັດສິນໃຈ. ຖ້າເຮັດຕາມປະຊາຊົນຂໍ ລາວກັບຄອບຄົວແລະຄົນໃນວັງຂອງລາວກໍອາດຈະບໍ່ໄດ້ໃຊ້ຊີວິດຫຼູຫຼາຟູມເຟືອຍອີກ. ແຕ່ຖ້າປະຕິເສດຄຳຂໍ ປະຊາຊົນກໍອາດຈະກະບົດຕໍ່ລາວ. ລາວຈະເຮັດແນວໃດ? ທຳອິດລາວໄປປຶກສາກັບພວກຜູ້ເຖົ້າແກ່ທີ່ເຄີຍຊ່ວຍພໍ່ຂອງລາວ. ພວກຜູ້ເຖົ້າແກ່ບອກໃຫ້ລາວຟັງປະຊາຊົນ. ແຕ່ຕໍ່ມາໂຣໂບອາມກໍໄປປຶກສາກັບຄົນຮຸ່ນດຽວກັນ ແລະລາວກໍເລືອກປະຕິບັດກັບປະຊາຊົນຢ່າງໂຫດຮ້າຍ. ລາວບອກເຂົາເຈົ້າວ່າ: “ພໍ່ຂ້ອຍໄດ້ເອົາແອກໜັກວາງໄວ້ເທິງພວກທ່ານ ແລະຝ່າຍຂ້ອຍ ຂ້ອຍຈະຕື່ມອີກ. ພໍ່ຂ້ອຍໄດ້ເອົາສາຍແສ້ຕີສອນພວກທ່ານ ແລະຝ່າຍຂ້ອຍ ຂ້ອຍຈະເອົາສາຍແສ້ມີໄລເຫຼັກ.”—2 ຂ່າວຄາວ 10:6-14
ເຮົາໄດ້ບົດຮຽນຫຍັງ? ໃນທຸກມື້ນີ້ ເຮົາມີຜູ້ສູງອາຍຸຫຼາຍຄົນທີ່ຮັບໃຊ້ພະເຢໂຫວາມາຫຼາຍປີ ແລະເຂົາເຈົ້າກໍສາມາດຊ່ວຍເຮົາໃຫ້ຕັດສິນໃຈຢ່າງສະຫຼາດໄດ້. ຂໍໃຫ້ເຮົາເປັນຄົນສະຫຼາດແລະຟັງເຂົາເຈົ້າ.—ໂຢບ 12:12
“ເຂົາໄດ້ຟັງຄວາມຂອງພະເຢໂຫວາ”
ໂຣໂບອາມໄດ້ຮວບຮວມກອງທັບໄປຕໍ່ສູ້ພວກກະບົດ. ແຕ່ພະເຢໂຫວາສົ່ງຜູ້ພະຍາກອນເຊມາເຫຍໄປບອກວ່າ: “ຢ່າຊູ່ຂຶ້ນໄປທຳເສິກຕໍ່ສູ້ພວກພີ່ນ້ອງຂອງທ່ານທັງຫຼາຍຄືລູກຫຼານຍິດສະລາເອນ. ຈົ່ງເມືອເຮືອນແຫ່ງຕົນທຸກຄົນ ເຫດວ່າການນັ້ນໄດ້ບັງເກີດມາແຕ່ເຮົາ.”—1 ກະສັດ 12:21-24 *—ເບິ່ງໄຂເງື່ອນ
ມັນງ່າຍບໍທີ່ໂຣໂບອາມຈະເຊື່ອຟັງພະເຢໂຫວາ? ຖ້າລາວເຊື່ອຟັງ ຜູ້ຄົນຈະຄິດແນວໃດກັບລາວ? ເພາະກ່ອນໜ້ານີ້ລາວເຄີຍບອກວ່າຈະເອົາ “ສາຍແສ້ມີໄລເຫຼັກ” ຂ້ຽນເຂົາເຈົ້າ. ແຕ່ຕອນນີ້ລາວພັດບໍ່ເຮັດຫຍັງກັບພວກກະບົດ! (ສົມທຽບກັບ 2 ຂ່າວຄາວ 13:7) ບໍ່ວ່າໃຜຈະຄິດແນວໃດ ລາວກັບທະຫານ “ໄດ້ຟັງຄວາມຂອງພະເຢໂຫວາແລະໄດ້ຫຼົບເມືອໄປຕາມພະຄຳຂອງພະເຢໂຫວາ.”
ເຮົາໄດ້ບົດຮຽນຫຍັງ? ການເຊື່ອຟັງພະເຢໂຫວາເປັນເລື່ອງສະຫຼາດແທ້ໆເຖິງວ່າຜູ້ຄົນຈະເຍາະເຍີ້ຍທີ່ເຮົາເຮັດແບບນັ້ນ. ຖ້າເຮົາເຊື່ອຟັງ ພະອົງຈະອວຍພອນເຮົາແນ່ນອນ.—ພະບັນຍັດ 28:2
ພະເຈົ້າອວຍພອນໂຣໂບອາມບໍທີ່ລາວເຊື່ອຟັງ? ລາວຍັງປົກຄອງຢູດາແລະເບນຢາມີນຕໍ່ໄປ ແລະລາວກໍໄດ້ສ້າງເມືອງໃໝ່ຫຼາຍໆເມືອງແລະເຮັດໃຫ້ຫຼາຍເມືອງ “ແຂງແຮງຫຼາຍ.” (2 ຂ່າວຄາວ 11:5-12) ແຕ່ທີ່ສຳຄັນ ການທີ່ໂຣໂບອາມເຊື່ອຟັງກົດໝາຍຂອງພະເຢໂຫວາໄລຍະໜຶ່ງ ເຮັດໃຫ້ປະຊາຊົນຫຼາຍຄົນໃນອານາຈັກ 10 ຕະກູນມາເຢຣຶຊາເລມເພື່ອສະໜັບສະໜູນລາວແລະການນະມັດສະການແທ້ ເພາະຕອນນັ້ນອານາຈັກ 10 ຕະກູນເລີ່ມນະມັດສະການຮູບປັ້ນ. (2 ຂ່າວຄາວ 11:16, 17) ຍ້ອນໂຣໂບອາມເຊື່ອຟັງພະເຢໂຫວາ ອານາຈັກຂອງລາວຈຶ່ງເຂັ້ມແຂງຂຶ້ນ.
ການເຮັດຜິດແລະການກັບໃຈຂອງໂຣໂບອາມ
ເມື່ອອານາຈັກຂອງໂຣໂບອາມເຂັ້ມແຂງ ລາວໄດ້ເຮັດສິ່ງທີ່ບໍ່ຄວນເຮັດ. ລາວເຊົາເຊື່ອພະເຢໂຫວາແລະໄປນະມັດສະການພະປອມ! ຍ້ອນຫຍັງ? ການທີ່ແມ່ຂອງລາວເປັນຄົນອາມໂມນມີຜົນຕໍ່ການຕັດສິນໃຈຂອງລາວບໍ? (1 ກະສັດ 14:21) ເຮົາບໍ່ຮູ້ ແຕ່ປະຊາຊົນໄດ້ເຮັດຕາມຕົວຢ່າງທີ່ບໍ່ດີຂອງລາວ. ດັ່ງນັ້ນ ພະເຢໂຫວາຈຶ່ງໃຫ້ຊີຊາກກະສັດເອຢິບຍຶດເອົາເມືອງຕ່າງໆໃນອານາຈັກຢູດາ ເຖິງວ່າໂຣໂບອາມຈະມີເມືອງທີ່ແຂງແຮງຫຼາຍກໍຕາມ!—1 ກະສັດ 14:22-24; 2 ຂ່າວຄາວ 12:1-4
ສະຖານະການຮ້າຍແຮງກວ່າເກົ່າເມື່ອຊີຊາກແລະກອງທັບມາໂຈມຕີເມືອງເຢຣຶຊາເລມທີ່ໂຣໂບອາມປົກຄອງ. ເມື່ອເຖິງຕອນນີ້ ພະເຢໂຫວາໄດ້ສົ່ງຜູ້ພະຍາກອນເຊມາເຫຍມາບອກຂ່າວສານກັບໂຣໂບອາມແລະຂ້າລາຊະການວ່າ: “ທ່ານທັງຫຼາຍໄດ້ປະເຮົາແລະເຮົາປະທ່ານທັງຫຼາຍໄວ້ໃນມືທ່ານຊີຊາກດ້ວຍ.” ລາວເຮັດແນວໃດ? ລາວໄດ້ກັບໃຈ! ຄຳພີໄບເບິນບອກວ່າ: “ພວກເຈົ້ານາຍຍິດສະລາເອນກັບກະສັດໄດ້ຖ່ອມຕົວລົງແລະໄດ້ກ່າວວ່າ ‘ພະເຢໂຫວາກໍຊອບທຳ.’” ດັ່ງນັ້ນ ພະເຢໂຫວາຊ່ວຍໂຣໂບອາມແລະເມືອງເຢຣຶຊາເລມບໍ່ໃຫ້ຖືກທຳລາຍ.—2 ຂ່າວຄາວ 12:5-7, 12
ໂຣໂບອາມໄດ້ປົກຄອງຢູດາຕໍ່ໄປ. ກ່ອນລາວຈະຕາຍ ລາວໄດ້ໃຫ້ຊັບສິນຢ່າງຫຼວງຫຼາຍກັບພວກລູກຊາຍ ລາວຢາກເຮັດໃຫ້ແນ່ໃຈວ່າເຂົາເຈົ້າຈະບໍ່ກະບົດຕໍ່ອາເບຍລູກຊາຍທີ່ລາວໄດ້ແຕ່ງຕັ້ງໃຫ້ເປັນກະສັດຄົນຕໍ່ໄປ. (2 ຂ່າວຄາວ 11:21-23) ການເຮັດແບບນີ້ສະແດງວ່າລາວສະຫຼາດກວ່າຕອນທີ່ຍັງໜຸ່ມ.
ໂຣໂບອາມເປັນຄົນດີຫຼືບໍ່ດີ?
ເຖິງວ່າໂຣໂບອາມໄດ້ເຮັດບາງສິ່ງທີ່ດີ ແຕ່ຄຳພີໄບເບິນບອກວ່າໃນການປົກຄອງຂອງລາວ ລາວ “ໄດ້ເຮັດການຊົ່ວ.” ຍ້ອນຫຍັງ? ຍ້ອນລາວ “ບໍ່ໄດ້ເອົາໃຈໃສ່ຊອກຫາພະເຢໂຫວາ.” ດັ່ງນັ້ນ ພະເຢໂຫວາຈຶ່ງບໍ່ພໍໃຈລາວ.—2 ຂ່າວຄາວ 12:14
ໂຣໂບອາມບໍ່ໄດ້ມີສາຍສຳພັນທີ່ໃກ້ຊິດກັບພະເຢໂຫວາຄືກັບດາວິດ
ເຮົາໄດ້ຮຽນຮູ້ຫຍັງຈາກຊີວິດໂຣໂບອາມ? ລາວເຊື່ອຟັງພະເຈົ້າບາງຄັ້ງ. ລາວເຮັດດີກັບປະຊາຊົນບາງເທື່ອ. ແຕ່ລາວບໍ່ໄດ້ມີສາຍສຳພັນທີ່ໃກ້ຊິດກັບພະເຢໂຫວາແລະບໍ່ໄດ້ຢາກເຮັດໃຫ້ພະອົງພໍໃຈແທ້ໆ. ດັ່ງນັ້ນ ລາວຈຶ່ງເຊົາເຮັດສິ່ງທີ່ຖືກຕ້ອງແລະເລີ່ມນະມັດສະການພະປອມ. ເຈົ້າອາດສົງໄສວ່າ: ‘ການທີ່ໂຣໂບອາມຍອມຮັບການແກ້ໄຂເປັນຍ້ອນລາວຮູ້ສຶກເສຍໃຈໃນຄວາມຜິດທີ່ໄດ້ເຮັດແລະຢາກເຮັດໃຫ້ພະເຈົ້າພໍໃຈແທ້ໆບໍ? ຫຼືເປັນຍ້ອນຄົນອື່ນບອກໃຫ້ເຮັດ?’ (2 ຂ່າວຄາວ 11:3, 4; 12:6) ຕໍ່ມາ ລາວກໍກັບມາເຮັດສິ່ງທີ່ບໍ່ດີອີກ. ລາວແຕກຕ່າງຈາກດາວິດພໍ່ຕູ້ຂອງລາວແທ້ໆ! ແມ່ນຢູ່ວ່າດາວິດໄດ້ເຮັດຜິດພາດ ແຕ່ດາວິດກໍກັບໃຈຈາກບາບແທ້ໆ. ດາວິດຮັກພະເຢໂຫວາແລະການນະມັດສະການແທ້ຕະຫຼອດຊີວິດ.—1 ກະສັດ 14:8; ຄຳເພງ 51:1, 17; 63:1
ເຮົາຍັງໄດ້ຮຽນຮູ້ອີກຫຼາຍຢ່າງຈາກເລື່ອງນີ້. ເປັນເລື່ອງທີ່ໜ້າຊົມເຊີຍທີ່ຜູ້ຮັບໃຊ້ຂອງພະເຢໂຫວາຫາລ້ຽງຄອບຄົວແລະເຮັດສິ່ງດີໆເພື່ອຄົນອື່ນ. ແຕ່ເພື່ອຈະເຮັດໃຫ້ພະອົງຮັກ ເຮົາຕ້ອງນະມັດສະການໃນວິທີທີ່ພະອົງຍອມຮັບແລະຕ້ອງມີສາຍສຳພັນທີ່ແໜ້ນແຟ້ນກັບພະອົງ.
ເພື່ອຈະເຮັດຢ່າງນັ້ນໄດ້ ເຮົາຕ້ອງຮັກພະເຢໂຫວາຈາກໃຈຂອງເຮົາແທ້ໆ. ເພື່ອທີ່ໄຟຈະລຸກຢູ່ຕະຫຼອດ ຕ້ອງໝັ່ນຕື່ມຟືນໃສ່ເລື້ອຍໆ. ຄ້າຍຄືກັນ ເພື່ອເຮົາຈະຮັກພະເຈົ້າສະເໝີ ເຮົາຕ້ອງສຶກສາຄຳພີໄບເບິນເປັນປະຈຳ ຄິດຕຶກຕອງ ແລະໝັ່ນອະທິດຖານ. (ຄຳເພງ 1:2; ໂລມ 12:12) ຄວາມຮັກນີ້ຈະກະຕຸ້ນເຮົາໃຫ້ເຮັດທຸກສິ່ງເພື່ອເຮັດໃຫ້ພະເຈົ້າພໍໃຈ ກະຕຸ້ນເຮົາໃຫ້ເສຍໃຈແທ້ໆເມື່ອເຮັດຜິດແລະຂໍພະອົງຍົກໂທດໃຫ້ເຮົາ. ແລ້ວເຮົາຈະບໍ່ເປັນຄືກັບໂຣໂບອາມ ແຕ່ເຮົາຈະນະມັດສະການພະເຈົ້າຢ່າງສັດຊື່ຕໍ່ໆໄປ.—ຢູເດ 20, 21
^ ຂໍ້ 9 ຍ້ອນຊາໂລໂມນບໍ່ສັດຊື່ ພະເຈົ້າຈຶ່ງໄດ້ບອກໄວ້ວ່າອານາຈັກຈະຖືກແບ່ງອອກເປັນສອງສ່ວນ.—1 ກະສັດ 11:31
