ການຮັບບັບເຕມາເປັນຂໍ້ຮຽກຮ້ອງສຳລັບຄລິດສະຕຽນ
“ຕອນນີ້ ການຮັບບັບເຕມາຊ່ວຍພວກເຈົ້າໃຫ້ລອດ.”—1 ເປໂຕ 3:21, ລ.ມ.
1, 2. (ກ) ພໍ່ແມ່ບາງຄົນອາດຮູ້ສຶກແນວໃດເມື່ອລູກຢາກຮັບບັບເຕມາ? (ຂ) ເປັນຫຍັງຈຶ່ງມີການຖາມຄົນທີ່ຈະຮັບບັບເຕມາວ່າເຂົາເຈົ້າໄດ້ອຸທິດຊີວິດໃຫ້ກັບພະເຢໂຫວາແລ້ວບໍ? (ເບິ່ງຮູບທຳອິດ)
ພໍ່ແມ່ຂອງມາເຣຍເບິ່ງລູກສາວທີ່ຍັງນ້ອຍຢືນຂຶ້ນພ້ອມກັບຄົນທີ່ຕ້ອງການຮັບບັບເຕມາ. ຜູ້ບັນລະຍາຍຖາມຄຳຖາມສອງຂໍ້. ມາເຣຍຕອບດ້ວຍສຽງດັງແລະຈະແຈ້ງ ຈາກນັ້ນບໍ່ດົນລາວກໍຮັບບັບເຕມາ.
2 ພໍ່ແມ່ຂອງມາເຣຍພູມໃຈທີ່ລູກສາວໄດ້ອຸທິດຕົວໃຫ້ພະເຢໂຫວາແລະຮັບບັບເຕມາ. ແຕ່ກ່ອນໜ້ານັ້ນແມ່ຂອງມາເຣຍກໍຮູ້ສຶກກັງວົນໜ້ອຍໜຶ່ງ. ລາວສົງໄສວ່າ: ‘ມາເຣຍຍັງນ້ອຍເກີນໄປບໍທີ່ຈະຮັບບັບເຕມາ? ມາເຣຍເຂົ້າໃຈແທ້ໆບໍວ່າການອຸທິດຊີວິດໃຫ້ກັບພະເຢໂຫວາເປັນເລື່ອງຈິງຈັງ? ມາເຣຍຄວນຖ້າອີກຈັກໜ້ອຍດີບໍແລ້ວຈຶ່ງຄ່ອຍຮັບບັບເຕມາ?’ ພໍ່ແມ່ຫຼາຍຄົນທີ່ຮັກລູກອາດຖາມຕົວເອງຄ້າຍໆກັນນີ້ເມື່ອລູກບອກວ່າຢາກຮັບບັບເຕມາ. (ຜູ້ເທສະໜາປ່າວປະກາດ 5:5) ແນວໃດກໍຕາມ ການຕັດສິນໃຈທີ່ສຳຄັນທີ່ສຸດຂອງຄົນເຮົາແມ່ນການອຸທິດ ຊີວິດໃຫ້ກັບພະເຢໂຫວາແລະຮັບບັບເຕມາ.—ເບິ່ງຂອບ “ ເຈົ້າໄດ້ອຸທິດຕົວໃຫ້ກັບພະເຢໂຫວາແລ້ວບໍ?”
3, 4. (ກ) ເປໂຕປຽບທຽບການຮັບບັບເຕມາຄືກັບຫຍັງ? (ຂ) ເປັນຫຍັງເປໂຕຈຶ່ງປຽບທຽບການຮັບບັບເຕມາກັບການສ້າງເຮືອນາວາຂອງໂນເອ?
3 ອັກຄະສາວົກເປໂຕປຽບທຽບການຮັບບັບເຕມາກັບການສ້າງເຮືອນາວາຂອງໂນເອ. ລາວບອກວ່າ: “ເລື່ອງນີ້ທຽບໄດ້ກັບການຮັບບັບເຕມາ ຕອນນີ້ ການຮັບບັບເຕມາຊ່ວຍພວກເຈົ້າໃຫ້ລອດ.” (ອ່ານ 1 ເປໂຕ 3:20, 21 *) ເຮືອທີ່ໂນເອສ້າງເປັນຫຼັກຖານໃຫ້ຄົນອື່ນໆເຫັນວ່າລາວຢາກເຮັດຕາມຄຳສັ່ງຂອງພະເຢໂຫວາຢ່າງສຸດຫົວໃຈ. ໂນເອເຮັດວຽກທີ່ພະເຢໂຫວາມອບໝາຍໃຫ້ຢ່າງສັດຊື່. ຍ້ອນຄວາມເຊື່ອຂອງລາວ ພະເຢໂຫວາຈຶ່ງຊ່ວຍລາວແລະຄອບຄົວໃຫ້ລອດຈາກນໍ້າຖ້ວມໂລກ. ເປໂຕກຳລັງສອນຫຍັງເຮົາ?
4 ເມື່ອຜູ້ຄົນເຫັນເຮືອນາວາ ເຂົາເຈົ້າກໍຮູ້ເລີຍວ່າໂນເອມີຄວາມເຊື່ອໃນພະເຈົ້າ. ເມື່ອຜູ້ຄົນເຫັນບາງຄົນຮັບບັບເຕມາ ເຂົາເຈົ້າກໍຮູ້ເລີຍວ່າຄົນເຫຼົ່ານັ້ນໄດ້ອຸທິດຊີວິດໃຫ້ກັບພະເຈົ້າຍ້ອນມີຄວາມເຊື່ອໃນພະຄລິດທີ່ຟື້ນຄືນມາຈາກຕາຍ. ຄົນທີ່ຮັບບັບເຕມາກໍຄືກັບໂນເອ ເຂົາເຈົ້າເຊື່ອຟັງພະເຈົ້າແລະເຮັດວຽກທີ່ພະອົງມອບໝາຍໃຫ້ເຮັດ ແລະຄືກັບທີ່ພະເຢໂຫວາຊ່ວຍໂນເອໃຫ້ລອດຈາກນໍ້າຖ້ວມໂລກ ພະອົງກໍຈະຊ່ວຍຜູ້ທີ່ຮັບບັບເຕມາທີ່ພັກດີຂອງພະອົງໃຫ້ລອດຈາກການທຳລາຍໂລກທີ່ຊົ່ວຊ້ານີ້. (ມາລະໂກ 13:10; ຄຳປາກົດ 7:9, 10) ເຫັນໄດ້ຢ່າງຈະແຈ້ງວ່າການອຸທິດຊີວິດໃຫ້ກັບພະເຢໂຫວາແລະຮັບບັບເຕມາເປັນເລື່ອງທີ່ສຳຄັນຫຼາຍແທ້ໆ. ທີ່ຈິງ ຖ້າຫາກບາງຄົນມັກເລື່ອນການຮັບ ບັບເຕມາອອກໄປເລື້ອຍໆ ລາວກໍອາດສູນເສຍໂອກາດທີ່ຈະໄດ້ຮັບຊີວິດຕະຫຼອດໄປ.
5. ເຮົາຈະຮຽນຫຍັງໃນບົດຄວາມນີ້?
5 ເຮົາຮູ້ແລ້ວວ່າການຮັບບັບເຕມາເປັນເລື່ອງຈິງຈັງສໍ່າໃດ. ດັ່ງນັ້ນ ເຮົາຈຶ່ງຈຳເປັນຕ້ອງຮູ້ຄຳຕອບຂອງ 3 ຄຳຖາມນີ້ທີ່ວ່າ: ຄຳພີໄບເບິນສອນແນວໃດກ່ຽວກັບການຮັບບັບເຕມາ? ເຮົາຕ້ອງເຮັດຫຍັງກ່ອນທີ່ຈະຮັບບັບເຕມາ? ເປັນຫຍັງເຮົາຄວນຄິດຢູ່ສະເໝີກ່ຽວກັບຄວາມສຳຄັນຂອງການຮັບບັບເຕມາເມື່ອສອນລູກຫຼືນັກສຶກສາ?
ຄຳພີໄບເບິນສອນແນວໃດກ່ຽວກັບການຮັບບັບເຕມາ
6, 7. (ກ) ການໃຫ້ບັບເຕມາຂອງໂຢຮັນມີຄວາມໝາຍແນວໃດ? (ຂ) ການຮັບບັບເຕມາຂອງໃຜທີ່ຕ່າງຈາກຄົນອື່ນແລະຍ້ອນຫຍັງ?
6 ຜູ້ທຳອິດທີ່ເຮົາອ່ານພົບໃນຄຳພີໄບເບິນທີ່ໃຫ້ບັບເຕມາກັບຄົນອື່ນກໍຄືໂຢຮັນບັບຕິດໂຕ. (ມັດທາຍ 3:1-6) ເປັນຫຍັງປະຊາຊົນຈຶ່ງມາຫາລາວເພື່ອຮັບບັບເຕມາ? ຍ້ອນເຂົາເຈົ້າຢາກສະແດງໃຫ້ເຫັນວ່າໄດ້ກັບໃຈຈາກບາບຂອງຕົວເອງເພາະບໍ່ໄດ້ເຊື່ອຟັງກົດໝາຍຂອງໂມເຊແລະຮູ້ສຶກເສຍໃຈແທ້ໆ. ແຕ່ການໃຫ້ບັບເຕມາທີ່ສຳຄັນທີ່ສຸດທີ່ໂຢຮັນໄດ້ເຮັດມີຄວາມໝາຍທີ່ຕ່າງອອກໄປ. ໂຢຮັນໄດ້ຮັບກຽດທີ່ຍິ່ງໃຫຍ່ໂດຍເປັນຜູ້ໃຫ້ບັບເຕມາແກ່ພະເຍຊູລູກຊາຍທີ່ສົມບູນແບບຂອງພະເຈົ້າ. (ມັດທາຍ 3:13-17) ເນື່ອງຈາກພະເຍຊູບໍ່ເຄີຍເຮັດບາບ ເພິ່ນກໍບໍ່ຈຳເປັນຕ້ອງກັບໃຈ. (1 ເປໂຕ 2:22) ແລ້ວເປັນຫຍັງເພິ່ນຈຶ່ງຮັບບັບເຕມາ? ກໍເພື່ອສະແດງໃຫ້ເຫັນວ່າເພິ່ນພ້ອມທີ່ຈະໃຊ້ຊີວິດຕາມຄວາມຕ້ອງການຂອງພະເຈົ້າ.—ເຫບເລີ 10:7
7 ຫຼັງຈາກທີ່ພະເຍຊູເລີ່ມວຽກປະກາດ ລູກສິດຂອງເພິ່ນກໍເລີ່ມໃຫ້ບັບເຕມາກັບຄົນອື່ນໆ. (ໂຢຮັນ 3:22; 4:1, 2) ເຫດຜົນທີ່ຄົນເຫຼົ່ານັ້ນຮັບບັບເຕມາກໍຍ້ອນວ່າເຂົາເຈົ້າໄດ້ກັບໃຈຈາກບາບທີ່ເຮັດຜິດຕໍ່ກົດໝາຍຂອງໂມເຊ. ແຕ່ຫຼັງຈາກທີ່ພະເຍຊູຕາຍແລະຟື້ນຄືນມາ ຄົນທີ່ຢາກເປັນລູກສິດຂອງພະເຍຊູຈະຕ້ອງຮັບບັບເຕມາໃນເຫດຜົນທີ່ຕ່າງອອກໄປ.
8. (ກ) ຫຼັງຈາກພະເຍຊູຟື້ນຄືນມາຈາກຕາຍ ເພິ່ນສັ່ງໃຫ້ຜູ້ຕິດຕາມເຮັດຫຍັງ? (ຂ) ເປັນຫຍັງຄລິດສະຕຽນຈຶ່ງຕ້ອງຮັບບັບເຕມາ?
8 ໃນປີ 33 ຫຼັງຈາກທີ່ພະເຍຊູຟື້ນຄືນມາຈາກຕາຍໄດ້ບໍ່ດົນ ເພິ່ນເວົ້າກັບຜູ້ຄົນຫຼາຍກວ່າ 500 ຄົນເຊິ່ງມີທັງຜູ້ຊາຍ ຜູ້ຍິງ ແລະອາດມີເດັກນ້ອຍນຳ. ນີ້ອາດເປັນຕອນທີ່ເພິ່ນບອກວ່າ: “ເຫດສັນນີ້ທ່ານທັງຫຼາຍຈົ່ງໄປແລະກະທຳໃຫ້ພວກຕ່າງປະເທດທັງປວງເຂົ້າເປັນລູກສິດ ໃຫ້ເຂົາຮັບສິນບັບເຕມາໃນນາມຊື່ແຫ່ງພະບິດາແລະພະບຸດແລະພະວິນຍານບໍລິສຸດ. ຈົ່ງສັ່ງສອນເຂົາໃຫ້ຖືຮັກສາສິ່ງທັງປວງທີ່ເຮົາໄດ້ສັ່ງໄວ້ແກ່ທ່ານທັງຫຼາຍແລ້ວ.” (ມັດທາຍ 28:19, 20; 1 ໂກລິນໂທ 15:6) ພະເຍຊູສັ່ງຜູ້ຕິດຕາມເພິ່ນໃຫ້ໄປສອນຄົນໃຫ້ເປັນລູກສິດ. ຄົນທີ່ຢາກມາເປັນລູກສິດຫຼືຢາກມາຮັບເອົາ “ແອກ” ຂອງເພິ່ນຈະຕ້ອງຮັບບັບເຕມາ. (ມັດທາຍ 11:29, 30) ຄົນທີ່ຢາກຮັບໃຊ້ພະເຈົ້າໃນແບບທີ່ພະອົງພໍໃຈຕ້ອງຍອມຮັບວ່າພະເຍຊູເປັນຜູ້ທີ່ພະເຈົ້າໃຊ້ມາເພື່ອເຮັດໃຫ້ໃຈປະສົງຂອງພະອົງສຳເລັດ. ຈາກນັ້ນ ຄົນນັ້ນຈຶ່ງຈະຮັບບັບເຕມາໃນແບບທີ່ພະເຈົ້າຍອມຮັບໄດ້. ຄຳພີໄບເບິນໃຫ້ຫຼັກຖານຫຼາຍຢ່າງວ່າລູກສິດຂອງພະເຍຊູໃນສະຕະວັດທຳອິດຮູ້ວ່າເປັນເລື່ອງສຳຄັນຫຼາຍທີ່ຈະຮັບບັບເຕມາ. ເຂົາເຈົ້າບໍ່ໄດ້ຄິດວ່າຄວນຖ້າກ່ອນແລ້ວຈຶ່ງຄ່ອຍຮັບບັບເຕມາກໍໄດ້.—ກິດຈະການ 2:41; 9:18; 16:14, 15, 32, 33
ຢ່າລັງເລທີ່ຈະຮັບບັບເຕມາ
9, 10. ເຮົາໄດ້ຮຽນຫຍັງຈາກການຮັບບັບເຕມາຂອງຊາຍຊາວເອທຽວປຽນແລະໂຊໂລ?
9 ອ່ານກິດຈະການ 8:35, 36. ຕອນທີ່ຜູ້ຊາຍຊາວເອທຽວປຽນຄົນໜຶ່ງທີ່ປ່ຽນມານັບຖືສາສະໜາຢິວກຳລັງ ເດີນທາງກັບບ້ານຫຼັງຈາກໄປນະມັດສະການທີ່ວິຫານໃນເມືອງເຢຣຶຊາເລມ ທູດສະຫວັນຂອງພະເຢໂຫວາໄດ້ສົ່ງຟີລິບໃຫ້ມາປະກາດກັບລາວ. ຟີລິບໄດ້ສອນລາວກ່ຽວກັບ “[ຂ່າວດີເລື່ອງ] ພະເຍຊູ.” ຜູ້ຊາຍຊາວເອທຽວປຽນຕອບຮັບແນວໃດ? ເນື່ອງຈາກລາວເຂົ້າໃຈວ່າການຍອມຮັບພະເຍຊູໃນຖານະພະອົງເຈົ້າເປັນເລື່ອງທີ່ສຳຄັນຫຼາຍແລະລາວກໍຢາກເຮັດສິ່ງທີ່ພະເຈົ້າຢາກໃຫ້ຄລິດສະຕຽນເຮັດ ລາວຈຶ່ງຮັບບັບເຕມາໂດຍບໍ່ລັງເລ.
10 ອີກຕົວຢ່າງໜຶ່ງກໍຄືຜູ້ຊາຍຊາວຢິວທີ່ຊື່ໂຊໂລ. ຄົນຢິວທັງຊາດໄດ້ອຸທິດຕົວໃຫ້ກັບພະເຢໂຫວາ ແຕ່ພະອົງປະຕິເສດເຂົາເຈົ້າເພາະເຂົາເຈົ້າບໍ່ເຊື່ອຟັງພະອົງ. ໂຊໂລເຊື່ອວ່າຊາວຢິວຍັງຮັບໃຊ້ພະເຈົ້າຢ່າງຖືກຕ້ອງຢູ່ ລາວຈຶ່ງຂົ່ມເຫງຄລິດສະຕຽນ. ແຕ່ມື້ໜຶ່ງ ພະເຍຊູທີ່ຟື້ນຄືນມາຈາກຕາຍໄດ້ເວົ້າກັບໂຊໂລຈາກສະຫວັນເຊິ່ງຕອນນັ້ນໂຊໂລຄິດວ່າພະເຍຊູໄດ້ຕາຍໄປແລ້ວ. ເມື່ອໄດ້ຍິນທີ່ພະເຍຊູເວົ້າ ໂຊໂລຕອບຮັບແນວໃດ? ລາວຍິນດີຮັບຄວາມຊ່ວຍເຫຼືອຈາກລູກສິດຄົນໜຶ່ງຂອງພະເຍຊູທີ່ຊື່ອານາເນຍ. ຄຳພີໄບເບິນບອກວ່າລາວ ‘ຢືນຂຶ້ນແລະໄດ້ຮັບສິນບັບເຕມາ.’ (ກິດຈະການ 9:17, 18; ຄາລາຊີ 1:14) ຕໍ່ມາລາວເປັນທີ່ຮູ້ຈັກໃນຖານະອັກຄະສາວົກໂປໂລ. ຂໍສັງເກດວ່າທັນທີທີ່ລາວຮູ້ວ່າພະເຍຊູເປັນຜູ້ທີ່ພະເຈົ້າໃຊ້ມາເພື່ອເຮັດໃຫ້ໃຈປະສົງຂອງພະອົງສຳເລັດ ລາວກໍຮັບບັບເຕມາໂດຍບໍ່ລັງເລ.—ອ່ານກິດຈະການ 22:12-16
11. (ກ) ອັນໃດເຮັດໃຫ້ນັກສຶກສາໃນທຸກມື້ນີ້ຕັດສິນໃຈຮັບບັບເຕມາ? (ຂ) ເຮົາຮູ້ສຶກແນວໃດເມື່ອເຫັນຄົນຮັບບັບເຕມາ?
11 ໃນທຸກມື້ນີ້ ນັກສຶກສາຄຳພີໄບເບິນບໍ່ວ່າຈະເປັນເດັກນ້ອຍຫຼືຜູ້ໃຫຍ່ກໍຄືກັນ. ເນື່ອງຈາກເຂົາເຈົ້າຮັກແລະເຊື່ອໝັ້ນໃນສິ່ງທີ່ຄຳພີໄບເບິນບອກ ເຂົາເຈົ້າຈຶ່ງຢາກອຸທິດຊີວິດໃຫ້ກັບພະເຢໂຫວາແລະຮັບບັບເຕມາ. ທີ່ຈິງ ຄຳບັນລະຍາຍຮັບບັບເຕມາທຸກຄັ້ງມັກເປັນເວລາທີ່ພິເສດຂອງການປະຊຸມໃຫຍ່. ພະຍານພະເຢໂຫວາມີຄວາມສຸກເມື່ອເຫັນນັກສຶກສາຕອບຮັບຄວາມຈິງແລະຕັດສິນໃຈຮັບບັບເຕມາ. ພໍ່ແມ່ກໍມີຄວາມສຸກເມື່ອລູກຮັບບັບເຕມາ. ໃນປີການຮັບໃຊ້ 2017 ມີຫຼາຍກວ່າ 284.000 ຄົນຮັບບັບເຕມາເພື່ອສະແດງໃຫ້ເຫັນວ່າເຂົາເຈົ້າໄດ້ອຸທິດຊີວິດໃຫ້ພະເຢໂຫວາແລ້ວ. (ກິດຈະການ 13:48) ເຫັນໄດ້ແຈ້ງວ່າ ເຂົາເຈົ້າເຂົ້າໃຈວ່າການຮັບບັບເຕມາເປັນສິ່ງທີ່ຄລິດສະຕຽນຕ້ອງເຮັດ. ແຕ່ເຂົາເຈົ້າຕ້ອງເຮັດຫຍັງກ່ອນທີ່ຈະຮັບບັບເຕມາ?
12. ນັກສຶກສາຕ້ອງເຮັດຫຍັງກ່ອນຈຶ່ງຈະຮັບບັບເຕມາໄດ້?
12 ກ່ອນນັກສຶກສາຈະຮັບບັບເຕມາໄດ້ ເຂົາເຈົ້າຕ້ອງຮຽນຮູ້ຄວາມຈິງກ່ຽວກັບພະເຈົ້າ ໃຈປະສົງຂອງພະອົງທີ່ມີຕໍ່ມະນຸດແລະໂລກ ແລະສິ່ງທີ່ພະອົງໄດ້ເຮັດເພື່ອຊ່ວຍມະນຸດໃຫ້ລອດ. (1 ຕີໂມເຕ 2:3-6) ຈາກນັ້ນ ເຂົາເຈົ້າຕ້ອງພັດທະນາຄວາມເຊື່ອເພື່ອຈະຊ່ວຍໃຫ້ເຊື່ອຟັງກົດໝາຍຂອງພະເຢໂຫວາແລະເຊົາເຮັດສິ່ງທີ່ພະອົງກຽດຊັງ. (ກິດຈະການ 3:19) ນີ້ເປັນເລື່ອງທີ່ສຳຄັນ ເພາະພະເຢໂຫວາຈະບໍ່ຍອມຮັບການອຸທິດຕົວຂອງຄົນທີ່ຍັງເຮັດສິ່ງທີ່ພະອົງກຽດຊັງຢູ່. (1 ໂກລິນໂທ 6:9, 10) ແຕ່ຍັງມີຫຼາຍກວ່ານັ້ນອີກ ຄົນທີ່ຢາກອຸທິດຊີວິດໃຫ້ກັບພະເຢໂຫວາຕ້ອງເຂົ້າຮ່ວມການປະຊຸມ ການປະກາດຂ່າວດີ ແລະສອນຄົນອື່ນຢູ່ ສະເໝີ. ຄົນທີ່ຢາກຕິດຕາມພະຄລິດຕ້ອງເຮັດສິ່ງເຫຼົ່ານີ້. (ກິດຈະການ 1:8) ນັກສຶກສາຕ້ອງເຮັດຕາມຂັ້ນຕອນເຫຼົ່ານີ້ທັງໝົດກ່ອນ. ຈາກນັ້ນ ເຂົາເຈົ້າຈຶ່ງຈະສາມາດອຸທິດຊີວິດໃຫ້ກັບພະເຢໂຫວາໃນຄຳອະທິດຖານສ່ວນຕົວແລະຮັບບັບເຕມາໄດ້.
ຊ່ວຍນັກສຶກສາໃຫ້ມີເປົ້າໝາຍທີ່ຈະຮັບບັບເຕມາ
13. ເມື່ອສອນຄົນອື່ນ ເປັນຫຍັງເຮົາຕ້ອງຄິດສະເໝີວ່າການຮັບບັບເຕມາເປັນສິ່ງທີ່ຕ້ອງເຮັດ?
13 ເມື່ອເຮົາຊ່ວຍລູກແລະນັກສຶກສາໃຫ້ເຮັດຕາມຂັ້ນຕອນທີ່ຈຳເປັນເຫຼົ່ານັ້ນ ເຮົາຕ້ອງຄິດສະເໝີວ່າຄົນທີ່ຢາກເປັນລູກສິດແທ້ຂອງພະເຍຊູຕ້ອງຮັບບັບເຕມາ. ຖ້າເຮົາຄິດແບບນີ້ ເຮົາກໍບໍ່ຢ້ານທີ່ຈະລົມກັບເຂົາເຈົ້າເມື່ອເຖິງເວລາທີ່ຕ້ອງເນັ້ນຄວາມສຳຄັນຂອງການອຸທິດຕົວແລະຮັບບັບເຕມາ. ເຮົາຢາກໃຫ້ລູກແລະນັກສຶກສາກ້າວໜ້າຕໍ່ໆໄປຈົນເຖິງຂັ້ນຮັບບັບເຕມາ!
14. ເປັນຫຍັງເຮົາບໍ່ຄວນກົດດັນຄົນອື່ນໃຫ້ຮັບບັບເຕມາ?
14 ບໍ່ຄວນມີໃຜກົດດັນຫຼືບັງຄັບລູກແລະນັກສຶກສາໃຫ້ຮັບບັບເຕມາ. ພະເຢໂຫວາເອງກໍບໍ່ໄດ້ບັງຄັບຜູ້ໃດໃຫ້ມາຮັບໃຊ້ພະອົງ. (1 ໂຢຮັນ 4:8) ເມື່ອເຮົາສອນຄົນອື່ນ ເຮົາຕ້ອງຊ່ວຍເຂົາເຈົ້າໃຫ້ເຂົ້າໃຈວ່າການພັດທະນາສາຍສຳພັນເປັນສ່ວນຕົວກັບພະເຢໂຫວາສຳຄັນຫຼາຍສໍ່າໃດ. ຖ້ານັກສຶກສາເຫັນຄຸນຄ່າຄວາມຈິງທີ່ໄດ້ຮຽນກ່ຽວກັບພະເຈົ້າແລະຕ້ອງການແທ້ໆທີ່ຈະເຮັດທຸກສິ່ງທຸກຢ່າງທີ່ຄລິດສະຕຽນແທ້ຄວນເຮັດ ນັ້ນກໍຈະກະຕຸ້ນລາວໃຫ້ຢາກຮັບບັບເຕມາ.—2 ໂກລິນໂທ 5:14, 15
15, 16. (ກ) ມີການກຳນົດອາຍຸຂອງຄົນທີ່ຈະຮັບບັບເຕມາບໍ? ຂໍໃຫ້ອະທິບາຍ (ຂ) ເປັນຫຍັງນັກສຶກສາຄຳພີໄບເບິນຕ້ອງຮັບບັບເຕມາເປັນພະຍານພະເຢໂຫວາເຖິງວ່າຈະເຄີຍຮັບບັບເຕມາໃນສາສະໜາອື່ນມາແລ້ວ?
15 ບໍ່ມີການກຳນົດອາຍຸຄົນທີ່ຈະຮັບບັບເຕມາ. ແຕ່ລະຄົນແຕກຕ່າງກັນ ນັກສຶກສາບາງຄົນກໍກ້າວໜ້າໄວ
ກວ່າຄົນອື່ນ. ມີຫຼາຍຄົນຮັບບັບເຕມາຕັ້ງແຕ່ຍັງນ້ອຍແລະເຂົາເຈົ້າກໍຍັງຮັກສາຄວາມສັດຊື່ຕໍ່ພະເຢໂຫວາໄວ້ໄດ້ເມື່ອໃຫຍ່ຂຶ້ນ. ແຕ່ບາງຄົນກໍຮຽນຮູ້ຄວາມຈິງໃນຄຳພີໄບເບິນແລະຮັບບັບເຕມາຕອນທີ່ອາຍຸຫຼາຍແລ້ວ ເຊິ່ງບາງຄົນກໍມີອາຍຸຫຼາຍກວ່າ 100 ປີ!16 ຜູ້ຍິງຄົນໜຶ່ງທີ່ສຶກສາຄຳພີໄບເບິນຖາມຜູ້ນຳການສຶກສາວ່າ ຈຳເປັນແທ້ໆບໍທີ່ລາວຕ້ອງຮັບບັບເຕມາອີກ ເພາະລາວເຄີຍຮັບບັບເຕມາໃນສາສະໜາອື່ນມາແລ້ວ. ຜູ້ນຳການສຶກສາໃຫ້ລາວເບິ່ງຄຳຕອບຈາກຄຳພີໄບເບິນ. ເມື່ອລາວເຂົ້າໃຈວ່ານີ້ເປັນຂໍ້ຮຽກຮ້ອງຂອງຄຳພີໄບເບິນ ລາວກໍຮັບບັບເຕມາເຖິງວ່າຕອນນັ້ນລາວຈະອາຍຸເກືອບ 80 ປີແລ້ວ. ເຮົາຮຽນຫຍັງໄດ້ຈາກຕົວຢ່າງນີ້? ພະເຢໂຫວາຈະຍອມຮັບການຮັບບັບເຕມາຂອງເຮົາກໍຕໍ່ເມື່ອເຮົາຮູ້ຄວາມຈິງກ່ຽວກັບໃຈປະສົງຂອງພະອົງເທົ່ານັ້ນ. ດັ່ງນັ້ນ ເຖິງວ່າເຮົາຈະຮັບບັບເຕມາໃນສາສະໜາອື່ນມາແລ້ວ ເຮົາກໍຍັງຕ້ອງຮັບບັບເຕມາອີກເພື່ອຈະເປັນພະຍານພະເຢໂຫວາ.—ອ່ານກິດຈະການ 19:3-5
17. ຄົນທີ່ຮັບບັບເຕມາຄວນຄິດຕຶກຕອງເລື່ອງຫຍັງໃນມື້ທີ່ລາວຮັບບັບເຕມາ?
17 ມື້ທີ່ຮັບບັບເຕມາເປັນມື້ທີ່ມີຄວາມສຸກຫຼາຍແທ້ໆ ແລະເປັນເວລາທີ່ຄວນຈະຄິດຕຶກຕອງວ່າການອຸທິດຕົວແລະການຮັບບັບເຕມາໝາຍເຖິງຫຍັງແດ່. ເພື່ອທີ່ເຮົາຈະສາມາດເຮັດຕາມຂໍ້ຮຽກຮ້ອງທຸກຢ່າງຂອງຄລິດສະຕຽນແທ້ໄດ້ ເຮົາຈະຕ້ອງອອກຄວາມພະຍາຍາມຢ່າງໜັກ. ລູກສິດຂອງພະເຍຊູຕ້ອງ “ມີຊີວິດຕໍ່ໄປບໍ່ໃຊ່ສຳລັບຕົວເອງ ແຕ່ວ່າສຳລັບພະອົງຜູ້ໄດ້ຕາຍແລະໄດ້ເປັນຄືນມາ.”—2 ໂກລິນໂທ 5:15; ມັດທາຍ 16:24
18. ເຮົາຈະພິຈາລະນາຄຳຖາມຫຍັງໃນບົດຄວາມຕໍ່ໄປ?
18 ຈາກທີ່ເຮົາໄດ້ຮຽນໄປແລ້ວໃນບົດຄວາມນີ້ ການຕັດສິນໃຈທີ່ຈະເຂົ້າມາເປັນຄລິດສະຕຽນແທ້ເປັນເລື່ອງທີ່ຈິງຈັງຫຼາຍ. ນີ້ເປັນເຫດຜົນທີ່ແມ່ຂອງມາເຣຍໄດ້ຖາມຕົວເອງດັ່ງທີ່ໄດ້ເວົ້າໄປແລ້ວໃນຕອນຕົ້ນຂອງບົດຄວາມນີ້. ຖ້າເຈົ້າເປັນພໍ່ແມ່ ເຈົ້າອາດຖາມຕົວເອງວ່າ: ‘ລູກພ້ອມແທ້ໆບໍທີ່ຈະຮັບບັບເຕມາ? ລູກມີຄວາມຮູ້ເລື່ອງພະເຢໂຫວາຫຼາຍພໍແລ້ວບໍທີ່ຈະອຸທິດຕົວໃຫ້ກັບພະອົງ? ລູກຄວນໄດ້ຮັບການສຶກສາທີ່ດີແລະມີວຽກດີໆເຮັດກ່ອນບໍຈຶ່ງຈະຮັບບັບເຕມາ? ຖ້າລູກເຮັດຜິດຮ້າຍແຮງຫຼັງຈາກທີ່ຮັບບັບເຕມາເດຈະເຮັດແນວໃດ?’ ເຮົາຈະພິຈາລະນາຄຳຖາມເຫຼົ່ານີ້ໃນບົດຄວາມຕໍ່ໄປ ແລະເຮົາຈະຮຽນຮູ້ວ່າພໍ່ແມ່ຄລິດສະຕຽນຈະມີຄວາມຄິດທີ່ຖືກຕ້ອງຕໍ່ການຮັບບັບເຕມາໄດ້ແນວໃດ.
^ ຂໍ້ 3 1 ເປໂຕ 3:21 (ລ.ມ.): “ເລື່ອງນີ້ທຽບໄດ້ກັບການຮັບບັບເຕມາ ຕອນນີ້ ການຮັບບັບເຕມາຊ່ວຍພວກເຈົ້າໃຫ້ລອດເພາະພວກເຈົ້າເຊື່ອໃນການຟື້ນຂຶ້ນຈາກຕາຍຂອງພະເຍຊູຄລິດ ການຮັບບັບເຕມາບໍ່ແມ່ນການຊຳຮະຮ່າງກາຍໃຫ້ສະອາດ ແຕ່ເປັນການຂໍພະເຈົ້າເພື່ອຊ່ວຍບໍ່ໃຫ້ມີຫຍັງມາລົບກວນຄວາມຮູ້ສຶກຜິດຊອບຊົ່ວດີ”
ເມື່ອນັກສຶກສາຄຳພີໄບເບິນເຫັນຄຸນຄ່າຄວາມຈິງທີ່ໄດ້ຮຽນ ເຂົາເຈົ້າກໍຈະຢາກຮັບບັບເຕມາ