ພໍ່ແມ່ທັງຫຼາຍ ເຈົ້າໄດ້ຊ່ວຍລູກໃຫ້ກ້າວໜ້າຈົນເຖິງຂັ້ນຮັບບັບເຕມາບໍ?

ເປີດ

‘ທ່ານຍັງຄອຍຖ້າຫຍັງ? ຈົ່ງລຸກຂຶ້ນແລະຮັບສິນບັບເຕມາ.’—ກິດຈະການ 22:16

1. ພໍ່ແມ່ທີ່ເປັນຄລິດສະຕຽນຢາກໝັ້ນໃຈໃນເລື່ອງໃດກ່ອນທີ່ລູກຈະຮັບບັບເຕມາ?

“ເປັນເວລາຫຼາຍເດືອນທີ່ຂ້ອຍບອກກັບພໍ່ແມ່ວ່າຂ້ອຍຢາກຮັບບັບເຕມາແລະເຂົາເຈົ້າມັກຈະເວົ້າເລື່ອງນີ້ກັບຂ້ອຍສະເໝີ. ເຂົາເຈົ້າຢາກໝັ້ນໃຈວ່າຂ້ອຍຮູ້ແທ້ໆບໍວ່າການຕັດສິນໃຈນີ້ສຳຄັນຫຼາຍສໍ່າໃດ. ໃນວັນທີ 31 ທັນວາ 1934 ເຫດການທີ່ສຳຄັນທີ່ສຸດໃນຊີວິດຂອງຂ້ອຍກໍມາເຖິງ.” ນີ້ເປັນຄຳເວົ້າຂອງບລອດຊຳ ແບຣນກ່ຽວກັບສິ່ງທີ່ເກີດຂຶ້ນເມື່ອລາວຕັດສິນໃຈຈະຮັບບັບເຕມາ. ທຸກມື້ນີ້ກໍຄືກັນ ພໍ່ແມ່ຫຼາຍຄົນຕ້ອງການຊ່ວຍລູກໃຫ້ຕັດສິນໃຈຢ່າງສະຫຼາດ. ຖ້າລູກຕ້ອງລໍຖ້າເພື່ອຈະຮັບບັບເຕມາໂດຍທີ່ບໍ່ມີເຫດຜົນທີ່ດີ ນີ້ອາດເຮັດໃຫ້ສາຍສຳພັນລະຫວ່າງລູກກັບພະເຢໂຫວາເສຍຫາຍໄດ້. (ຢາໂກໂບ 4:17) ກ່ອນທີ່ລູກຈະຮັບບັບເຕມາ ພໍ່ແມ່ທີ່ສຸຂຸມຢາກໝັ້ນໃຈກ່ອນວ່າລູກພ້ອມແລ້ວທີ່ຈະເປັນສາວົກຂອງພະຄລິດ.

2. (ກ) ຜູ້ດູແລໝວດບາງຄົນສັງເກດເຫັນບັນຫາຫຍັງ? (ຂ) ເຮົາຈະພິຈາລະນາຫຍັງໃນບົດຄວາມນີ້?

²ຜູ້ດູແລໝວດບາງຄົນສັງເກດເຫັນວ່າໜຸ່ມສາວຫຼາຍຄົນທີ່ມີອາຍຸ 17-23 ປີ ຍັງບໍ່ໄດ້ຮັບບັບເຕມາ ທັງໆທີ່ເຂົາເຈົ້າກໍໃຫຍ່ມາໃນຄວາມຈິງ. ໜຸ່ມສາວເຫຼົ່ານີ້ໄດ້ໃຊ້ເວລາສ່ວນຫຼາຍໄປກັບການປະຊຸມ ການປະກາດ ແລະຄິດວ່າຕົວເອງກໍເປັນພະຍານພະເຢໂຫວາ. ແຕ່ຍັງມີເຫດຜົນບາງຢ່າງທີ່ເຮັດໃຫ້ເຂົາເຈົ້າບໍ່ໄດ້ອຸທິດຕົວໃຫ້ກັບພະເຢໂຫວາແລະຮັບບັບເຕມາ. ໃນບາງກໍລະນີ ເປັນເພາະວ່າພໍ່ແມ່ຄິດວ່າລູກຍັງບໍ່ພ້ອມທີ່ຈະຮັບບັບເຕມາ. ໃນບົດຄວາມນີ້ ເຮົາຈະພິຈາລະນາ 4 ຢ່າງທີ່ພໍ່ແມ່ບາງຄົນກັງວົນແລະເຮັດໃຫ້ເຂົາເຈົ້າບໍ່ໄດ້ສະໜັບສະໜູນລູກໃຫ້ຮັບບັບເຕມາ.

ລູກຂອງຂ້ອຍໃຫຍ່ພໍແລ້ວບໍ?

3. ພໍ່ແມ່ຂອງບລອດຊຳກັງວົນເລື່ອງຫຍັງ?

³ພໍ່ແມ່ຂອງບລອດຊຳທີ່ເວົ້າເຖິງໃນຂໍ້ທຳອິດຂອງບົດຄວາມນີ້ກໍຍັງກັງວົນຢູ່ວ່າລູກໃຫຍ່ພໍທີ່ຈະເຂົ້າໃຈເຖິງຄວາມໝາຍແລະຄວາມສຳຄັນຂອງການຮັບບັບເຕມາແລ້ວຫຼືບໍ. ແລ້ວພໍ່ແມ່ຈະຮູ້ໄດ້ແນວໃດວ່າລູກຂອງເຂົາເຈົ້າພ້ອມແລ້ວບໍທີ່ຈະອຸທິດຕົວໃຫ້ກັບພະເຢໂຫວາ?

4. ຄຳສັ່ງຂອງພະເຍຊູໃນມັດທາຍ 28:19, 20 ຊ່ວຍພໍ່ແມ່ໃນທຸກມື້ນີ້ແນວໃດ?

⁴ອ່ານມັດທາຍ 28:19, 20. ຄຳພີໄບເບິນບໍ່ໄດ້ບອກວ່າຄົນທີ່ສາມາດຮັບບັບເຕມາໄດ້ຈະຕ້ອງມີອາຍຸເທົ່າໃດ. ແຕ່ມັນເປັນສິ່ງທີ່ດີສຳລັບພໍ່ແມ່ທີ່ຈະຄິດຢ່າງຮອບຄອບກ່ຽວກັບຄວາມໝາຍຂອງການສອນຄົນໃຫ້ເປັນລູກສິດ. ໃນພາສາເກັຣກຄຳວ່າ: ‘ກະທຳໃຫ້ເປັນລູກສິດ’ ທີ່ໃຊ້ໃນມັດທາຍ 28:19 ມີຄວາມໝາຍວ່າສອນຄົນໂດຍມີເປົ້າໝາຍທີ່ຈະຊ່ວຍເຂົາເຈົ້າໃຫ້ມາເປັນນັກສຶກສາຫຼືເປັນລູກສິດ. ລູກສິດແມ່ນຄົນທີ່ໄດ້ຮຽນແລະເຂົ້າໃຈໃນສິ່ງທີ່ພະເຍຊູສອນແລະຕ້ອງການຈະເຊື່ອຟັງເພິ່ນ. ຕັ້ງແຕ່ລູກເກີດມາ ພໍ່ແມ່ຄວນສອນລູກໂດຍມີເປົ້າໝາຍທີ່ຈະຊ່ວຍລູກໃຫ້ອຸທິດຕົວກັບພະເຢໂຫວາແລະເຂົ້າມາເປັນສາວົກຂອງພະຄລິດ. ແນ່ນອນວ່າແອນ້ອຍບໍ່ມີຄຸນສົມບັດທີ່ຈະຮັບບັບເຕມາ. ແຕ່ຄຳພີໄບເບິນສະແດງໃຫ້ເຫັນວ່າແມ່ນແຕ່ເດັກນ້ອຍໆກໍສາມາດເຂົ້າໃຈແລະຮັບຄວາມຈິງໃນຄຳພີໄບເບິນໄດ້.

5, 6. (ກ) ສິ່ງທີ່ຄຳພີໄບເບິນບອກກ່ຽວກັບຕີໂມເຕເຮັດໃຫ້ເຮົາລົງຄວາມເຫັນແນວໃດໃນເລື່ອງການຮັບບັບເຕມາຂອງລາວ (ຂ) ວິທີທີ່ດີທີ່ສຸດທີ່ພໍ່ແມ່ຈະຊ່ວຍລູກແມ່ນຫຍັງ?

⁵ຕີໂມເຕເປັນລູກສິດຄົນໜຶ່ງທີ່ຕັດສິນໃຈຮັບໃຊ້ພະເຢໂຫວາຕັ້ງແຕ່ເປັນໄວໜຸ່ມ. ໂປໂລບອກວ່າຕີໂມເຕເລີ່ມຮຽນຄວາມຈິງຈາກພະຄຳຂອງພະເຈົ້າ “ຕັ້ງແຕ່ຍັງເປັນແອນ້ອຍ.” ພໍ່ຂອງຕີໂມເຕບໍ່ໄດ້ຮັບໃຊ້ພະເຢໂຫວາ ແຕ່ແມ່ແລະແມ່ຕູ້ຊ່ວຍຕີໂມເຕໃຫ້ຮັກພະຄຳຂອງພະເຈົ້າ ນີ້ເຮັດໃຫ້ລາວມີຄວາມເຊື່ອທີ່ເຂັ້ມແຂງ. (2 ຕີໂມເຕ 1:5; 3:14, 15, ລ.ມ.) ຕອນທີ່ລາວມີຄຸນສົມບັດທີ່ຈະຮັບວຽກມອບໝາຍພິເສດໃນປະຊາຄົມ ລາວອາດມີອາຍຸປະມານ 17-23 ປີ.—ກິດຈະການ 16:1-3

⁶ເດັກນ້ອຍແຕ່ລະຄົນບໍ່ຄືກັນ. ບໍ່ແມ່ນທຸກຄົນຈະມີຄວາມເປັນຜູ້ໃຫຍ່ຕອນທີ່ມີອາຍຸສໍ່າກັນ. ເດັກນ້ອຍບາງຄົນເຂົ້າໃຈຄວາມຈິງ ຕັດສິນໃຈໄດ້ຢ່າງສະຫຼາດ ແລະຕ້ອງການທີ່ຈະຮັບບັບເຕມາຕັ້ງແຕ່ທີ່ເຂົາເຈົ້າອາຍຸຍັງນ້ອຍ. ແຕ່ບາງຄົນກໍບໍ່ພ້ອມທີ່ຈະຮັບບັບເຕມາຈົນກວ່າຈະໃຫຍ່ຂຶ້ນມາອີກຈັກໜ້ອຍ. ພໍ່ແມ່ທີ່ສຸຂຸມຈະບໍ່ກົດດັນລູກໃຫ້ຮັບບັບເຕມາ. ແທນທີ່ຈະເຮັດແບບນັ້ນ ເຂົາເຈົ້າຈະຊ່ວຍລູກແຕ່ລະຄົນໃຫ້ພັດທະນາຄວາມກ້າວໜ້າຕາມຄວາມສາມາດຂອງລູກ. ພໍ່ແມ່ຈະມີຄວາມສຸກເມື່ອລູກເຮັດຕາມຄຳແນະນຳໃນສຸພາສິດ 27:11. (ອ່ານ) ແຕ່ເຂົາເຈົ້າຕ້ອງຈື່ໄວ້ວ່າເປົ້າໝາຍຂອງເຂົາເຈົ້າແມ່ນການຊ່ວຍລູກໃຫ້ເຂົ້າມາເປັນລູກສິດ. ເຂົາເຈົ້າຄວນຖາມຕົວເອງວ່າ: ‘ລູກມີຄວາມຮູ້ພຽງພໍແລ້ວບໍທີ່ຈະອຸທິດຕົວໃຫ້ກັບພະເຈົ້າແລະຮັບບັບເຕມາ?’

ລູກມີຄວາມຮູ້ພໍແລ້ວບໍ?

7. ຄົນທີ່ຈະຮັບບັບເຕມາໄດ້ຈຳເປັນຕ້ອງຮູ້ລາຍລະອຽດທັງໝົດຂອງຄຳສອນໃນຄຳພີໄບເບິນກ່ອນບໍ? ຂໍໃຫ້ອະທິບາຍ.

⁷ໃນຖານະພໍ່ແມ່ທີ່ຕ້ອງສອນລູກ ເຂົາເຈົ້າຊ່ວຍລູກໃຫ້ຮູ້ຄວາມຈິງເປັນຢ່າງດີ. ຄວາມຮູ້ນີ້ຈະຊ່ວຍລູກໃຫ້ອຸທິດຕົວໃຫ້ກັບພະເຢໂຫວາ. ແຕ່ນັ້ນບໍ່ໄດ້ໝາຍຄວາມວ່າລູກຕ້ອງຮູ້ທຸກລາຍລະອຽດຂອງຄຳສອນໃນຄຳພີໄບເບິນກ່ອນຈຶ່ງຈະອຸທິດຕົວແລະຮັບບັບເຕມາໄດ້. ລູກສິດທຸກຄົນຂອງພະຄລິດຕ້ອງຮຽນຮູ້ຕໍ່ໆໄປເຖິງວ່າຈະຮັບບັບເຕມາແລ້ວກໍຕາມ. (ອ່ານໂກໂລດ 1:9, 10) ດັ່ງນັ້ນ ຄົນທີ່ຈະຮັບບັບເຕມາຈະຕ້ອງຮູ້ຫຼາຍສໍ່າໃດ?

ລູກສິດທຸກຄົນຂອງພະຄລິດຕ້ອງຮຽນຮູ້ຕໍ່ໆໄປເຖິງວ່າຈະຮັບບັບເຕມາແລ້ວກໍຕາມ

8, 9. ເກີດຫຍັງຂຶ້ນກັບຜູ້ຄຸມຄຸກໃນຟີລິບ ແລະເຮົາໄດ້ຮຽນຫຍັງຈາກປະສົບການຂອງລາວ?

⁸ປະສົບການໃນອະດີດຂອງຄອບຄົວໜຶ່ງສາມາດຊ່ວຍພໍ່ແມ່ໃນທຸກມື້ນີ້ໄດ້. (ກິດຈະການ 16:25-33) ໃນປີ ຄ.ສ. 50 ໂປໂລເດີນທາງໄປເມືອງຟີລິບເຊິ່ງເປັນການເດີນທາງໄປປະກາດໃນຕ່າງປະເທດຮອບທີສອງຂອງລາວ. ຕອນຢູ່ທີ່ນັ້ນ ໂປໂລກັບສີລາຖືກກ່າວຫາຢ່າງຜິດໆ ຖືກຈັບແລະຖືກຂັງຄຸກ. ໃນຄືນນັ້ນ ມີແຜ່ນດິນໄຫວຢ່າງຮຸນແຮງເຮັດໃຫ້ປະຕູຄຸກທັງໝົດເປີດອອກ. ຜູ້ຄຸມຄຸກຄິດວ່ານັກໂທດໜີໄປໝົດແລ້ວແລະເຮັດໃຫ້ລາວຢາກຂ້າຕົວຕາຍ ແຕ່ໂປໂລໄດ້ຫ້າມລາວໄວ້. ຕໍ່ມາ ໂປໂລກັບສີລາກໍສອນຄວາມຈິງເລື່ອງພະເຍຊູໃຫ້ກັບຜູ້ຄຸມຄຸກແລະຄອບຄົວ. ເຂົາເຈົ້າເຊື່ອໃນສິ່ງທີ່ໄດ້ຮຽນກ່ຽວກັບພະເຍຊູແລະໄດ້ສຳນຶກເຖິງຄວາມສຳຄັນທີ່ຈະຕ້ອງເຊື່ອຟັງເພິ່ນ. ດັ່ງນັ້ນ ເຂົາເຈົ້າຈຶ່ງຮັບບັບເຕມາ. ເຮົາຮຽນຮູ້ຫຍັງຈາກປະສົບການຂອງເຂົາເຈົ້າ?

⁹ຜູ້ຄຸມຄຸກອາດເຄີຍເປັນທະຫານໂລມທີ່ກະສຽນແລ້ວ. ລາວບໍ່ເຄີຍຮູ້ກ່ຽວກັບພະຄຳຂອງພະເຈົ້າ. ດັ່ງນັ້ນ ເພື່ອຈະເຂົ້າມາເປັນຄລິດສະຕຽນ ລາວຕ້ອງຮຽນຮູ້ຄວາມຈິງພື້ນຖານຈາກຄຳພີໄບເບິນ ເຂົ້າໃຈສິ່ງທີ່ພະເຢໂຫວາຮຽກຮ້ອງຕໍ່ຜູ້ຮັບໃຊ້ຂອງພະອົງ ແລະຕ້ອງການເຊື່ອຟັງຄຳສອນຂອງພະເຍຊູ. ສິ່ງທີ່ລາວໄດ້ຮຽນຮູ້ໃນເວລາສັ້ນໆນີ້ກະຕຸ້ນໃຫ້ລາວຢາກຮັບບັບເຕມາ. ແນ່ນອນວ່າ ຫຼັງຈາກຮັບບັບເຕມາແລ້ວລາວກໍຍັງຕ້ອງຮຽນຮູ້ຕໍ່ໆໄປ. ດັ່ງນັ້ນ ຖ້າລູກບອກເຈົ້າວ່າລາວຕ້ອງການຮັບບັບເຕມາເພາະຮັກພະເຢໂຫວາແລະຢາກເຊື່ອຟັງພະອົງ ເຈົ້າຈະເຮັດແນວໃດ? ເຈົ້າອາດໃຫ້ລູກລົມກັບຜູ້ເຖົ້າແກ່ເພື່ອເຂົາເຈົ້າຈະຕັດສິນໃຈວ່າລາວມີຄຸນສົມບັດທີ່ຈະຮັບບັບເຕມາໄດ້ຫຼືບໍ່. * (ເບິ່ງໄຂເງື່ອນ) ຄືກັບຄລິດສະຕຽນທີ່ຮັບບັບເຕມາແລ້ວທຸກຄົນ ລາວຈະຕ້ອງຮຽນຮູ້ຫຼາຍຂຶ້ນກ່ຽວກັບພະເຢໂຫວາຕະຫຼອດຊີວິດຂອງລາວແລະຕະຫຼອດໄປ.—ໂລມ 11:33, 34

ອັນໃດເປັນການສຶກສາທີ່ດີທີ່ສຸດສຳລັບລູກ?

10, 11. (ກ) ພໍ່ແມ່ບາງຄົນຄິດແນວໃດ? (ຂ) ອັນໃດຈະປົກປ້ອງລູກໄດ້ແທ້ໆ?

¹⁰ພໍ່ແມ່ບາງຄົນຄິດວ່າດີທີ່ສຸດສຳລັບລູກທີ່ຈະຮັບບັບເຕມາຫຼັງຈາກທີ່ຮຽນຈົບແລ້ວແລະມີວຽກອາຊີບທີ່ດີເຮັດກ່ອນ. ກໍແມ່ນຢູ່ວ່າເຂົາເຈົ້າອາດຫວັງດີກັບລູກ ແຕ່ເຂົາເຈົ້າກໍຄວນຖາມຕົວເອງວ່າ: ‘ການເຮັດແບບນີ້ຈະຊ່ວຍລູກໃຫ້ປະສົບຄວາມສຳເລັດແທ້ໆບໍ? ການເຮັດແບບນີ້ສອດຄ້ອງກັບສິ່ງທີ່ເຮົາຮຽນຈາກຄຳພີໄບເບິນບໍ? ພະເຢໂຫວາຕ້ອງການໃຫ້ເຮົາໃຊ້ຊີວິດແນວໃດ?’—ອ່ານຜູ້ເທສະໜາປ່າວປະກາດ 12:1

¹¹ເປັນສິ່ງສຳຄັນທີ່ຈະຈື່ໄວ້ວ່າໂລກນີ້ແລະສິ່ງທີ່ຢູ່ໃນໂລກນີ້ຂັດກັບໃຈປະສົງແລະຄວາມຄິດຂອງພະເຢໂຫວາ. (ຢາໂກໂບ 4:7, 8; 1 ໂຢຮັນ 2:15-17; 5:19) ສາຍສຳພັນທີ່ໃກ້ຊິດທີ່ລູກມີກັບພະເຢໂຫວາເປັນສິ່ງທີ່ດີທີ່ສຸດທີ່ຈະຊ່ວຍປົກປ້ອງລູກຈາກຊາຕານ ຈາກໂລກນີ້ ແລະຈາກຄວາມຄິດທີ່ຊົ່ວຮ້າຍຂອງໂລກນີ້. ຖ້າພໍ່ແມ່ສະໜັບສະໜູນລູກໃຫ້ເອົາການສຶກສາແລະວຽກອາຊີບດີໆມາເປັນອັນດັບທຳອິດໃນຊີວິດ ລູກກໍອາດເຊື່ອວ່າສິ່ງຕ່າງໆທີ່ຢູ່ໃນໂລກນີ້ສຳຄັນຫຼາຍກວ່າສາຍສຳພັນທີ່ໃກ້ຊິດກັບພະເຢໂຫວາ. ນີ້ເປັນສິ່ງທີ່ອັນຕະລາຍ. ຖ້າເຈົ້າຮັກລູກ ເຈົ້າຢາກໃຫ້ໂລກນີ້ສອນລູກຂອງເຈົ້າແທ້ໆບໍວ່າອັນໃດທີ່ຈະເຮັດໃຫ້ເຂົາເຈົ້າມີຄວາມສຸກ? ວິທີດຽວເທົ່ານັ້ນທີ່ຈະເຮັດໃຫ້ປະສົບຜົນສຳເລັດແລະມີຄວາມສຸກແທ້ກໍຄືການໃຫ້ພະເຢໂຫວາມາເປັນອັນດັບທຳອິດໃນຊີວິດຂອງເຮົາ.—ອ່ານຄຳເພງ 1:2, 3

ຈະເປັນແນວໃດຖ້າລູກເຮັດຜິດຮ້າຍແຮງ?

12. ເປັນຫຍັງພໍ່ແມ່ບາງຄົນຄິດວ່າດີກວ່າທີ່ຈະໃຫ້ລູກລໍຖ້າກ່ອນແລ້ວຈຶ່ງຮັບບັບເຕມາ?

¹²ແມ່ຄົນໜຶ່ງບອກເຫດຜົນທີ່ລາວບໍ່ຢາກໃຫ້ລູກຮັບບັບເຕມາວ່າ: “ຂ້ອຍຮູ້ສຶກອາຍຖ້າຈະຕ້ອງບອກຄົນອື່ນໆວ່າລູກຂອງຂ້ອຍຖືກຕັດສຳພັນ.” ຄືກັບພີ່ນ້ອງຄົນນີ້ ພໍ່ແມ່ບາງຄົນຮູ້ສຶກວ່າດີກວ່າທີ່ຈະໃຫ້ລູກລໍຖ້າຈົນໃຫຍ່ກ່ອນແລ້ວຈຶ່ງຮັບບັບເຕມາເພື່ອຫຼີກລ່ຽງການເຮັດຜິດ. (ຕົ້ນເດີມ 8:21; ສຸພາສິດ 22:15) ພໍ່ແມ່ເຫຼົ່ານັ້ນອາດຮູ້ສຶກວ່າຖ້າລູກຍັງບໍ່ທັນຮັບບັບເຕມາ ລູກກໍຈະບໍ່ຖືຕັດສຳພັນ. ຜິດບໍທີ່ຈະຫາເຫດຜົນແບບນີ້?—ຢາໂກໂບ 1:22

13. ຖ້າບາງຄົນຍັງບໍ່ໄດ້ຮັບບັບເຕມາໝາຍຄວາມວ່າເຂົາເຈົ້າບໍ່ຕ້ອງໃຫ້ການຕໍ່ພະເຢໂຫວາບໍ? ຂໍໃຫ້ອະທິບາຍ.

¹³ແນ່ນອນວ່າ ພໍ່ແມ່ບໍ່ຢາກໃຫ້ລູກຮັບບັບເຕມາຖ້າເຂົາເຈົ້າຍັງບໍ່ພ້ອມທີ່ຈະອຸທິດຕົວໃຫ້ກັບພະເຢໂຫວາ. ແຕ່ເປັນສິ່ງທີ່ຜິດທີ່ຈະຄິດວ່າລູກຈະບໍ່ຕ້ອງໃຫ້ການຕໍ່ພະເຢໂຫວາຈົນກວ່າເຂົາເຈົ້າຈະຮັບບັບເຕມາແລ້ວ. ແທ້ໆແລ້ວລູກຈະຕ້ອງໃຫ້ການຕໍ່ພະເຈົ້າຕັ້ງແຕ່ໄດ້ຮູ້ສິ່ງທີ່ພະເຢໂຫວາບອກກ່ຽວກັບສິ່ງທີ່ຖືກແລະຜິດ. (ອ່ານຢາໂກໂບ 4:17) ພໍ່ແມ່ທີ່ສຸຂຸມຈະບໍ່ຂັດຂວາງລູກໄວ້ຈາກການຮັບບັບເຕມາ. ໃນຕອນທີ່ລູກຍັງນ້ອຍ ພໍ່ແມ່ຈະສອນລູກໃຫ້ເຮັດແບບດຽວກັບເຂົາເຈົ້າຄື ຮັກໃນສິ່ງທີ່ພະເຢໂຫວາບອກວ່າຖືກແລະຊັງໃນສິ່ງທີ່ພະອົງບອກວ່າຜິດ. (ລືກາ 6:40) ຄວາມຮັກທີ່ລູກມີຕໍ່ພະເຢໂຫວາຈະຊ່ວຍປົກປ້ອງເຂົາເຈົ້າໄວ້ຈາກການເຮັດບາບຮ້າຍແຮງເພາະເຂົາເຈົ້າຢາກເຮັດສິ່ງທີ່ຖືກຕ້ອງສຳລັບພະເຢໂຫວາ.—ເອຊາອີ 35:8

ຄົນອື່ນໆສາມາດຊ່ວຍໄດ້

14. ຜູ້ເຖົ້າແກ່ຈະສະໜັບສະໜູນຄົນທີ່ເປັນພໍ່ແມ່ໂດຍວິທີໃດ?

¹⁴ຜູ້ເຖົ້າແກ່ຈະສະໜັບສະໜູນຄົນທີ່ເປັນພໍ່ແມ່ໄດ້ໂດຍເວົ້າໃນແງ່ບວກກ່ຽວກັບເປົ້າໝາຍໃນການຮັບໃຊ້ພະເຢໂຫວາ. ພີ່ນ້ອງຍິງຄົນໜຶ່ງຈື່ໄດ້ວ່າພີ່ນ້ອງຣັດເຊວເວົ້າກັບລາວຕອນລາວອາຍຸ 6 ປີ. ລາວບອກວ່າ: “ພີ່ນ້ອງຣັດເຊວໃຊ້ເວລາ 15 ນາທີລົມກັບຂ້ອຍກ່ຽວກັບເປົ້າໝາຍດ້ານຄວາມເຊື່ອ.” ຜົນເປັນແນວໃດ? ຕໍ່ມາ ພີ່ນ້ອງຍິງຄົນນີ້ໄດ້ເປັນໄພໂອເນຍແລະລາວເປັນມາຫຼາຍກວ່າ 70 ປີແລ້ວ! ເຫັນໄດ້ແຈ້ງວ່າ ຄຳເວົ້າໃນແງ່ບວກແລະການໃຫ້ກຳລັງໃຈສົ່ງຜົນກະທົບຕໍ່ຊີວິດທັງໝົດຂອງຄົນໆໜຶ່ງ. (ສຸພາສິດ 25:11) ຜູ້ເຖົ້າແກ່ເຊີນຄົນທີ່ເປັນພໍ່ແມ່ແລະລູກຂອງເຂົາເຈົ້າໃຫ້ຊ່ວຍວຽກຢູ່ຫໍປະຊຸມ. ເຂົາເຈົ້າສາມາດຂໍໃຫ້ເດັກນ້ອຍເຮັດໃນສິ່ງທີ່ເໝາະສົມກັບອາຍຸແລະຄວາມສາມາດ.

15. ຄົນອື່ນໆໃນປະຊາຄົມຈະຊ່ວຍເດັກນ້ອຍແລະໄວຮຸ່ນໄດ້ແນວໃດ?

¹⁵ຄົນອື່ນໆໃນປະຊາຄົມຈະສາມາດຊ່ວຍໄດ້ແນວໃດ? ໂດຍສະແດງຄວາມສົນໃຈເປັນສ່ວນຕົວຢ່າງເໝາະສົມກັບເດັກນ້ອຍແລະໄວຮຸ່ນ. ເຈົ້າອາດເຫັນເດັກນ້ອຍແລະໄວຮຸ່ນທີ່ມີສາຍສຳພັນທີ່ໃກ້ຊິດກັບພະເຢໂຫວາ ເຊັ່ນ: ມີເດັກນ້ອຍທີ່ອອກຄວາມຄິດເຫັນທີ່ດີໃນການປະຊຸມ ຫຼືມີສ່ວນຮ່ວມໃນການປະຊຸມກາງອາທິດບໍ? ລາວໃຫ້ຄຳພະຍານກັບຄົນທີ່ໂຮງຮຽນ ຫຼືເຮັດໃນສິ່ງທີ່ຖືກຕ້ອງເມື່ອຖືກລໍ້ໃຈໃຫ້ເຮັດບາງຢ່າງທີ່ຜິດບໍ? ຖ້າມີ ຂໍໃຫ້ຟ້າວຊົມເຊີຍລາວວ່າເຈົ້າເຮັດໄດ້ດີຫຼາຍ! ພວກເຮົາສາມາດຕັ້ງເປົ້າໃນການລົມກັບເດັກນ້ອຍແລະໄວຮຸ່ນກ່ອນແລະຫຼັງປະຊຸມໄດ້. ເມື່ອເຮົາເຮັດແບບນັ້ນ ເຂົາເຈົ້າຈະຮູ້ສຶກວ່າຕົວເອງກໍເປັນສ່ວນໜຶ່ງໃນ “ພວກຊຸມນຸມອັນໃຫຍ່.”—ຄຳເພງ 35:18

ຊ່ວຍລູກຂອງເຈົ້າໃຫ້ກ້າວໜ້າຈົນເຖິງຂັ້ນຮັບບັບເຕມາ

16, 17. (ກ) ເປັນຫຍັງຈຶ່ງສຳຄັນສຳລັບລູກທີ່ຈະຮັບບັບເຕມາ? (ຂ) ອັນໃດທີ່ເຮັດໃຫ້ພໍ່ແມ່ຄລິດສະຕຽນມີຄວາມສຸກ? (ເບິ່ງຮູບທຳອິດ)

¹⁶ໜຶ່ງໃນສິດທິພິເສດທີ່ຍິ່ງໃຫຍ່ທີ່ສຸດຂອງພໍ່ແມ່ແມ່ນການສອນລູກໃຫ້ຮັກພະເຢໂຫວາ. (ຄຳເພງ 127:3; ເອເຟດ 6:4) ໃນຊາດອິດສະລາແອນບູຮານ ເດັກນ້ອຍອຸທິດຕົວໃຫ້ກັບພະເຢໂຫວາຕັ້ງແຕ່ເກີດ ແຕ່ລູກຂອງເຮົາບໍ່ໄດ້ເຮັດແບບນັ້ນ. ການທີ່ພໍ່ແມ່ຮັກພະເຢໂຫວາແລະຄວາມຈິງບໍ່ໄດ້ໝາຍຄວາມວ່າລູກຈະຮັກຄືກັນ. ຕັ້ງແຕ່ມື້ທີ່ລູກເກີດ ພໍ່ແມ່ຕ້ອງມີເປົ້າໝາຍທີ່ຈະຊ່ວຍລູກໃຫ້ເຂົ້າມາເປັນລູກສິດ ອຸທິດຕົວໃຫ້ກັບພະເຢໂຫວາ ແລະຮັບບັບເຕມາ. ຈະມີສິ່ງໃດສຳຄັນຫຼາຍກວ່ານັ້ນອີກ? ຄົນທີ່ອຸທິດຕົວ ຮັບບັບເຕມາ ແລະຮັບໃຊ້ພະເຢໂຫວາຢ່າງສັດຊື່ຈະໄດ້ຮັບການຊ່ວຍຊີວິດໃຫ້ລອດຜ່ານຄວາມທຸກລຳບາກຄັ້ງໃຫຍ່.—ມັດທາຍ 24:13

ພໍ່ແມ່ຕ້ອງມີເປົ້າໝາຍຊ່ວຍລູກໃຫ້ເຂົ້າມາເປັນລູກສິດ (ເບິ່ງຂໍ້ 16, 17)

¹⁷ເມື່ອບລອດຊຳ ແບຣນຢາກຮັບບັບເຕມາ ພໍ່ແມ່ຂອງລາວຢາກໝັ້ນໃຈວ່າລາວພ້ອມແທ້ໆ. ເມື່ອໝັ້ນໃຈແລ້ວ ເຂົາເຈົ້າກໍສະໜັບສະໜູນການຕັດສິນໃຈຂອງລູກ. ຄືນກ່ອນທີ່ບລອດຊຳຈະຮັບບັບເຕມາ ລາວບອກວ່າ: “ພໍ່ໃຫ້ພວກເຮົາຄູ້ເຂົ່າລົງແລ້ວພໍ່ກໍອະທິດຖານ ພໍ່ບອກພະເຢໂຫວາວ່າພໍ່ມີຄວາມສຸກຫຼາຍທີ່ລູກສາວຂອງລາວຕັດສິນໃຈອຸທິດຕົວໃຫ້ກັບພະອົງ.” ຫຼາຍກວ່າ 60 ປີທີ່ຜ່ານມາ ບລອດຊຳບອກວ່າ: “ບໍ່ວ່າຈະຜ່ານໄປດົນປານໃດ ຂ້ອຍກໍບໍ່ເຄີຍລືມຄືນນັ້ນເລີຍ!” ພໍ່ແມ່ທັງຫຼາຍຂໍໃຫ້ເຈົ້າມີຄວາມສຸກຄວາມຍິນດີແບບນັ້ນຄືກັນເມື່ອເຫັນລູກໆຂອງເຈົ້າອຸທິດຕົວແລະຮັບບັບເຕມາເປັນຜູ້ຮັບໃຊ້ຂອງພະເຢໂຫວາ.

^ ຂໍ້ 9 ພໍ່ແມ່ສາມາດໃຊ້ຂໍ້ມູນທີ່ເປັນປະໂຫຍດເຫຼົ່ານີ້ລົມກັບລູກໄດ້ເຊັ່ນ: ໃນປຶ້ມຄຳຖາມທີ່ໜຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫຼັ້ມ 2 ໜ້າ 304-310 ແລະ “ຕູ້ບັນຫາ” ໃນພະລາຊະກິດ 4/11 ໜ້າ 2 (ບໍ່ມີໃນພາສາລາວ).

ການອະທິບາຍບາງສຳນວນ

ລູກສິດ ຄືຄົນທີ່ໄດ້ຮັບການສອນກ່ຽວກັບພະເຢໂຫວາແລະພະເຍຊູ. ລາວພະຍາຍາມທີ່ຈະຮຽນແບບພະເຍຊູແລະຈັດໃຫ້ວຽກຂອງພະເຢໂຫວາມາເປັນອັນດັບທຳອິດໃນຊີວິດ. ລາວຍັງເຊື່ອຟັງພະເຍຊູແລະຮັບບັບເຕມາ. ເປົ້າໝາຍຂອງພໍ່ແມ່ຄືຊ່ວຍລູກໃຫ້ເປັນລູກສິດແລະອຸທິດຕົວໃຫ້ກັບພະເຢໂຫວາໂດຍບໍ່ລັງເລ.
ເມື່ອເຮົາຮູ້ສິ່ງທີ່ພະເຢໂຫວາຢາກໃຫ້ເຮົາເຮັດ ເຮົາຕ້ອງໃຫ້ການຕໍ່ພະເຢໂຫວາບໍ່ວ່າຈະຮັບບັບເຕມາແລ້ວຫຼືບໍ່ກໍຕາມ. ການໃຫ້ການຕໍ່ພະເຢໂຫວາໝາຍເຖິງການທີ່ເຮົາຕ້ອງຮັບຜິດຊອບຕໍ່ການກະທຳແລະການຕັດສິນໃຈຂອງເຮົາ.

ຫໍສັງເກດການສະບັບສຶກສາ